ជំពូកទី៣
ព្រះយេហូវ៉ាបើកបង្ហាញគោលបំណងរបស់លោក
១, ២. តើតាមរបៀបណាព្រះយេហូវ៉ាបានបើកបង្ហាញឲ្យយល់គោលបំណងរបស់លោកសម្រាប់មនុស្សជាតិ?
ឪពុកម្ដាយដែលស្រឡាញ់កូន ឲ្យកូនចូលរួមពេលដែលពិភាក្សាអំពីរឿងដែលទាក់ទងនឹងក្រុមគ្រួសារ។ ក៏ប៉ុន្តែឪពុកម្ដាយមិនប្រាប់រឿងទាំងអស់ដល់កូនទេ។ ពួកគាត់ប្រាប់តែព័ត៌មានដែលពួកគាត់គិតថាកូនមានភាពចាស់ទុំល្មមនឹងយល់បានប៉ុណ្ណោះ។
២ ស្រដៀងគ្នាដែរ បន្ដិចម្ដងៗព្រះយេហូវ៉ាបានបើកបង្ហាញឲ្យយល់អំពីគោលបំណងរបស់លោកសម្រាប់មនុស្សជាតិ។ ប៉ុន្តែលោកបានបើកបង្ហាញនៅពេលណាដែលលោកចាត់ទុកថាជាពេលត្រឹមត្រូវបំផុត។ សូមពិចារណាយ៉ាងខ្លីអំពីរបៀបដែលព្រះយេហូវ៉ាបានបើកបង្ហាញតាំងពីសម័យបុរាណនូវសេចក្ដីពិតអំពីរាជាណាចក្ររបស់លោក។
ហេតុអ្វីយើងត្រូវការរាជាណាចក្ររបស់ព្រះ?
៣, ៤. តើព្រះយេហូវ៉ាបានកំណត់ទុកជាមុនថា នឹងមានការបះបោរប្រឆាំងការគ្រប់គ្រងរបស់លោកឬទេ? សូមពន្យល់។
៣ នៅដើមដំបូង គោលបំណងរបស់ព្រះយេហូវ៉ាមិនបានរួមបញ្ចូលរាជាណាចក្រមួយក្រោមការគ្រប់គ្រងរបស់មេស្ស៊ីឡើយ។ ហេតុអ្វី? ពីព្រោះព្រះយេហូវ៉ាមិនបានកំណត់ទុកជាមុនថា នឹងមានការបះបោរប្រឆាំងការគ្រប់គ្រងរបស់លោកទេ។ ព្រះបានបង្កើតមនុស្សជាតិឲ្យមានចិត្តសេរី អាចធ្វើការសម្រេចចិត្តដោយខ្លួនឯង ហើយលោកបានប្រាប់អាដាមនិងអេវ៉ាអំពីគោលបំណងរបស់លោកសម្រាប់មនុស្សជាតិ ដោយមានប្រសាសន៍ថា៖ «ចូរបង្កើតកូនឲ្យចំរើនជាច្រើនឡើង ឲ្យមានពេញពាសលើផែនដីចុះ ត្រូវបង្ក្រាបផែនដី»។ (លោ. ១:២៨) ព្រះយេហូវ៉ាក៏តម្រូវឲ្យពួកគាត់គោរពខ្នាតតម្រារបស់លោក ស្តីអំពីអ្វីដែលល្អនិងអ្វីដែលអាក្រក់ដែរ។ (លោ. ២:១៦, ១៧) អាដាមនិងអេវ៉ាអាចសម្រេចចិត្តនៅស្មោះត្រង់នឹងព្រះយេហូវ៉ាបាន។ បើពួកគាត់និងកូនចៅរបស់ពួកគាត់បានធ្វើដូច្នោះ យើងនឹងមិនត្រូវការរាជាណាចក្រក្រោមការគ្រប់គ្រងរបស់គ្រិស្ត ដើម្បីសម្រេចគោលបំណងរបស់ព្រះទេ។ ម្យ៉ាងទៀត ឥឡូវនេះផែនដីនឹងពេញដោយមនុស្សល្អឥតខ្ចោះដែលសុទ្ធតែជាអ្នកគោរពប្រណិប័តន៍ព្រះយេហូវ៉ា។
៤ ប៉ុន្តែ ពេលដែលសាថាន អាដាម និងអេវ៉ាទាត់ចោលការគ្រប់គ្រងរបស់ព្រះ នោះមិនបានធ្វើឲ្យព្រះយេហូវ៉ាបោះបង់ចោលគោលបំណងរបស់លោកដែលចង់ឲ្យផែនដីពេញដោយមនុស្សជាតិដ៏ល្អឥតខ្ចោះនោះទេ។ ផ្ទុយទៅវិញ ព្រះយេហូវ៉ាគ្រាន់តែផ្លាស់ប្ដូរវិធីដែលលោកនឹងសម្រេចគោលបំណងនោះប៉ុណ្ណោះ។ គោលបំណងរបស់លោកមិន មែនដូចជារទេះភ្លើងទេ ពីព្រោះរទេះភ្លើងមានផ្លូវតែមួយ ហើយបើវាបុកប៉ះឧបសគ្គលើផ្លូវនោះ វាខ្ទាតចេញពីផ្លូវភ្លាម លែងទៅមុខរួច។ រីឯព្រះយេហូវ៉ាវិញ ក្រោយពីលោកមានប្រសាសន៍អំពីគោលបំណងរបស់លោកហើយ នោះគ្មានអ្វីក្នុងសកលលោកនេះអាចរារាំងលោក មិនឲ្យសម្រេចគោលបំណងរបស់លោកឡើយ។ (សូមអាន អេសាយ ៥៥:១១) បើមានឧបសគ្គមួយដែលអាចឃាំងផ្លូវ នោះព្រះយេហូវ៉ាប្រើផ្លូវផ្សេងវិញ។ a (និក្ខ. ៣:១៤, ១៥) នៅពេលកំណត់របស់លោក នោះលោកបើកបង្ហាញឲ្យអ្នកស្មោះត្រង់របស់លោកដឹងអំពីវិធីថ្មីដែលលោកនឹងប្រើដើម្បីសម្រេចគោលបំណងរបស់លោក។
៥. តើព្រះយេហូវ៉ាបានធ្វើយ៉ាងណា ក្រោយពីមានការប្រឆាំងការគ្រប់គ្រងរបស់លោកនៅសួនអេដែន?
៥ ដើម្បីឆ្លើយតបនឹងការបះបោរប្រឆាំងនៅសួនអេដែន នោះព្រះយេហូវ៉ាបានរួមបញ្ចូលរាជាណាចក្ររបស់មេស្ស៊ីក្នុងគោលបំណងរបស់លោក។ (ម៉ាថ. ២៥:៣៤) នៅគ្រាខ្មៅងងឹតក្នុងប្រវត្ដិសាស្ត្រមនុស្សជាតិនោះ ព្រះយេហូវ៉ាចាប់ផ្ដើមបំភ្លឺអំពីវិធីដែលលោកនឹងប្រើដើម្បីធ្វើឲ្យមនុស្សជាតិទៅជាល្អឥតខ្ចោះឡើងវិញ និងដើម្បីបំបាត់ចោលរាល់ផលវិបាកដែលបណ្ដាលមកពីសាថានខំដណ្ដើមយកអំណាចគ្រប់គ្រងរបស់លោក។ (លោ. ៣:១៤-១៩) ទោះជាយ៉ាងនោះក៏ដោយ ព្រះយេហូវ៉ាមិនផ្ដល់ព័ត៌មានល្អិតល្អន់អំពីរាជាណាចក្រនោះភ្លាមៗទេ។
ព្រះយេហូវ៉ាចាប់ផ្ដើមបើកបង្ហាញសេចក្ដីពិតអំពីរាជាណាចក្ររបស់លោក
៦. តើព្រះយេហូវ៉ាបានសន្យាអ្វី ហើយតើលោកមិនបានបើកបង្ហាញព័ត៌មានអ្វីខ្លះ?
៦ នៅទំនាយដំបូងក្នុងគម្ពីរ ព្រះយេហូវ៉ាសន្យាថានឹងមាន«ពូជ»ឬកូនមួយរូបដែលនឹងកិនបំផ្លាញសត្វពស់។ (សូមអាន លោកុប្បត្តិ ៣:១៥) ក៏ប៉ុន្តែនៅពេលនោះ លោកមិនបានបញ្ជាក់ថាកូនរបស់សត្វពស់ និងកូនដែលនឹងបំផ្លាញសត្វពស់ជានរណាទេ។ តាមពិត គឺប្រហែលជា២.០០០ឆ្នាំក្រោយមក ទើបព្រះយេហូវ៉ាបានបំភ្លឺថែមទៀតអំពីរឿងនោះ។ b
៧. ហេតុអ្វីព្រះយេហូវ៉ាបានជ្រើសរើសអាប្រាហាំ ហើយតើយើងទាញយកមេរៀនសំខាន់អ្វីពីចំណុចនេះ?
៧ ក្រោយមក ព្រះយេហូវ៉ាបានជ្រើសរើសអាប្រាហាំ ឲ្យធ្វើជាបុព្វបុរសរបស់កូនដែលលោកបានសន្យាថានឹងមកនោះ។ ព្រះបានជ្រើសរើសអាប្រាហាំដោយសារគាត់«បានស្ដាប់តាមពាក្យ[ព្រះយេហូវ៉ា]»។ (លោ. ២២:១៨) យើងអាចទាញយកមេរៀនដ៏សំខាន់ពីចំណុចនេះ គឺព្រះយេហូវ៉ាបើកបង្ហាញគោលបំណងរបស់លោកចំពោះតែអ្នកដែលកោតខ្លាចលោកប៉ុណ្ណោះ។—សូមអាន ទំនុកតម្កើង ២៥:១៤
៨, ៩. ស្តីអំពីពូជឬកូនដែលព្រះយេហូវ៉ាបានសន្យាចាត់ឲ្យមកនោះ តើលោកបានបើកបង្ហាញព័ត៌មានអ្វីខ្លះដល់អាប្រាហាំនិងយ៉ាកុប?
៨ នៅពេលមួយ តាមរយៈទេវតាមួយរូប ព្រះយេហូវ៉ាបាននិយាយជាមួយនឹងអាប្រាហាំដែលជាមិត្តសម្លាញ់របស់លោក។ នៅពេលនោះ លោកបើកបង្ហាញជាលើកដំបូងនូវចំណុចដ៏សំខាន់មួយអំពីកូនដែលលោកបានសន្យាថានឹងមកនោះ ពោលគឺកូននោះត្រូវជាមនុស្សជាតិ។ (លោ. ២២:១៥-១៧; យ៉ា. ២:២៣) ប៉ុន្តែតើកូននោះនឹងបំផ្លាញសត្វពស់យ៉ាងដូចម្ដេច? ហើយតើសត្វពស់នោះជានរណា? អ្វីដែលព្រះបើកបង្ហាញក្រោយមក ផ្ដល់ចម្លើយចំពោះសំណួរទាំងនោះ។
៩ ព្រះយេហូវ៉ាបានកំណត់ថា កូនដែលលោកសន្យាថានឹងមកនោះ ត្រូវកើតក្នុងពូជពង្សរបស់យ៉ាកុបដែលជាចៅរបស់អាប្រាហាំ។ យ៉ាកុបជាបុរសម្នាក់ដែលជឿព្រះខ្លាំងណាស់។ (លោ. ២៨:១៣-២២) ក្រោយមក តាមរយៈយ៉ាកុប ព្រះយេហូវ៉ាបានបើកបង្ហាញថាកូនដែលត្រូវមកនោះ ត្រូវជាកូនចៅម្នាក់របស់កូនប្រុសយ៉ាកុបឈ្មោះយូដា។ យ៉ាកុបបានប្រកាសទុកជាមុនថា កូនចៅយូដានេះនឹងទទួល«ដំបងរាជ្យ» ជាតំណាងអំណាចគ្រប់គ្រង ហើយ«បណ្ដាជនទាំងឡាយនឹងចុះចូលចំពោះ»លោក។ (លោ. ៤៩:១, ១០) តាមរយៈសេចក្ដីប្រកាសនេះ ព្រះយេហូវ៉ាបានបញ្ជាក់ថា អ្នកដែលលោកសន្យាចាត់ឲ្យមកនោះ នឹងទទួលអំណាចគ្រប់គ្រងជាស្តេច។
១០, ១១. ហេតុអ្វីបានជាព្រះយេហូវ៉ាបើកបង្ហាញគោលបំណងរបស់លោកដល់ដាវីឌនិងដានីយ៉ែល?
១០ ប្រហែលជា៦៥០ឆ្នាំក្រោយសម័យយូដា ព្រះយេហូវ៉ាបានបើកបង្ហាញឲ្យស្តេចដាវីឌយល់ព័ត៌មានថែមទៀតអំពីគោលបំណងរបស់លោក។ ស្តេចដាវីឌនៅក្នុងពូជពង្សយូដា ហើយព្រះយេហូវ៉ាបានរៀបរាប់អំពីដាវីឌថា គាត់ជាអ្នកដែល«ត្រូវនឹងព្រះហឫទ័យទ្រង់»។ (១សាំ. ១៣:១៤; ១៧:១២; សកម្ម. ១៣:២២) ដោយសារដាវីឌកោតខ្លាចព្រះយេហូវ៉ា នោះលោកសម្រេចចិត្តធ្វើកិច្ចព្រមព្រៀងជាមួយនឹងគាត់ ដោយសន្យាថា កូនចៅម្នាក់របស់គាត់នឹងគ្រប់គ្រងជារៀងរហូត។—២សាំ. ៧:៨, ១២-១៦
១១ ប្រហែលជា៥០០ឆ្នាំក្រោយមក តាមរយៈដានីយ៉ែលដែលជាអ្នកប្រកាសទំនាយ ព្រះយេហូវ៉ាបានបើកបង្ហាញព័ត៌មានថែមទៀត។ លោកបានបញ្ជាក់ច្បាស់អំពីឆ្នាំដែលមេស្ស៊ីឬអ្នកដែលបានត្រូវរើសតាំងនោះនឹងលេចមកនៅផែនដី។ (ដាន. ៩:២៥) ព្រះយេហូវ៉ាបានចាត់ទុកដានីយ៉ែលជា«មនុស្សសំណប់យ៉ាងសំខាន់»។ ហេតុអ្វី? ពីព្រោះដានីយ៉ែលបានគោរពព្រះយេហូវ៉ាយ៉ាងជ្រាលជ្រៅ ហើយបានបម្រើលោកជានិច្ច។—ដាន. ៦:១៦; ៩:២២, ២៣
១២. តើដានីយ៉ែលបានត្រូវបង្គាប់ឲ្យធ្វើអ្វី ហើយហេតុអ្វី?
១២ ព្រះយេហូវ៉ាបានប្រើដានីយ៉ែលនិងអ្នកស្មោះត្រង់ឯទៀតដែលជាអ្នកប្រកាសទំនាយ ដើម្បីកត់ទុកនូវព័ត៌មានល្អិតល្អន់ជាច្រើនអំពីមេស្ស៊ីឬកូនដែលលោកសន្យាចាត់ឲ្យមក។ ទោះជាយ៉ាងនោះក្ដី មិនទាន់ដល់ពេលកំណត់ដែលព្រះយេហូវ៉ាចង់ឲ្យអ្នកបម្រើលោកយល់យ៉ាងពេញលេញអំពីអ្វីដែលលោកបានដឹកនាំពួកគេឲ្យកត់ទុកនោះទេ។ ជាឧទាហរណ៍ ព្រះយេហូវ៉ាបានបើកបង្ហាញឲ្យដានីយ៉ែលឃើញក្នុងគំនិតនូវការចាប់ផ្ដើមគ្រប់គ្រងនៃរាជាណាចក្ររបស់លោក។ រួចមក ដានីយ៉ែលបានត្រូវបង្គាប់ឲ្យបិទបាំងទំនាយនោះ រហូតដល់ពេលកំណត់របស់ព្រះយេហូវ៉ា។ នៅអនាគត នាពេលកំណត់របស់ព្រះយេហូវ៉ា ចំណេះត្រឹមត្រូវនឹង«ចំរើនឡើង»។—ដាន. ១២:៤
ព្រះយេហូវ៉ាបានប្រើដានីយ៉ែលនិងអ្នកស្មោះត្រង់ឯទៀត ដើម្បីកត់ទុកនូវព័ត៌មានល្អិតល្អន់អំពីរាជាណាចក្ររបស់មេស្ស៊ី
លោកយេស៊ូបំភ្លឺអំពីគោលបំណងរបស់ព្រះ
១៣. (ក) តើអ្នកណាជាកូនដែលព្រះសន្យាចាត់ឲ្យមក? (ខ) តើលោកយេស៊ូបានបំភ្លឺអំពីទំនាយនៅលោកុប្បត្តិ ៣:១៥យ៉ាងដូចម្ដេច?
១៣ ព្រះយេហូវ៉ាបានបញ្ជាក់ច្បាស់ថា លោកយេស៊ូជាពូជឬកូនដែលលោកសន្យាថានឹងមក ហើយដែលជាកូនចៅរបស់ដាវីឌដែលត្រូវគ្រប់គ្រងជាស្តេច។ (លូក. ១:៣០-៣៣; ៣:២១, ២២) ពេលលោកយេស៊ូចាប់ផ្ដើមកិច្ចបម្រើរបស់លោក នោះមនុស្ស ចាប់ផ្ដើមយល់ច្បាស់អំពីគោលបំណងរបស់ព្រះយេហូវ៉ា។ (ម៉ាថ. ៤:១៣-១៧) ជាឧទាហរណ៍ ពេលដែលលោកយេស៊ូហៅមេកំណាចថា«ឃាតករ»និង«ឪពុកនៃការភូតភរ» លោកបញ្ជាក់ឲ្យដឹងច្បាស់ថា«ពស់»ដែលបានត្រូវរៀបរាប់នៅលោកុប្បត្តិ ៣:១៤, ១៥ជានរណា។ (យ៉ូន. ៨:៤៤) ម្យ៉ាងទៀត អ្វីដែលលោកយេស៊ូបើកបង្ហាញឲ្យយ៉ូហានឃើញ បានបញ្ជាក់ថា«ពស់ដំបូងបង្អស់» គឺ«អ្នកដែលត្រូវហៅថាមេកំណាចនិងសាថាន»។ c (សូមអាន ការបើកបង្ហាញ ១:១; ១២:៩) ក្នុងការបើកបង្ហាញដដែលនោះ លោកយេស៊ូបញ្ជាក់ឲ្យដឹងអំពីរបៀបដែលលោកនឹងសម្រេចទំនាយ ដែលបានត្រូវប្រកាសនៅសួនអេដែន ហើយបំផ្លាញសាថានឲ្យសាបសូន្យ ក្នុងនាមជាកូនដែលព្រះបានសន្យាចាត់ឲ្យមកនោះ។—បប. ២០:៧-១០
១៤-១៦. នៅសតវត្សរ៍ទី១ តើអ្នកកាន់តាមលោកយេស៊ូតែងតែយល់យ៉ាងពេលលេញ អំពីអត្ថន័យនៃសេចក្ដីពិតផ្សេងៗ ដែលលោកយេស៊ូបានបើកបង្ហាញចំពោះពួកគេឬទេ? សូមពន្យល់។
១៤ ដូចយើងបានរៀននៅជំពូកទី១នៃសៀវភៅនេះ លោកយេស៊ូបានបង្រៀនច្រើនអំពីរាជាណាចក្ររបស់ព្រះ។ ក៏ប៉ុន្តែ លោកមិនតែងតែប្រាប់ព័ត៌មានល្អិតល្អន់ទាំងអស់ដែលអ្នកកាន់តាមលោកចង់ដឹងនោះទេ។ ម្យ៉ាងទៀត សូម្បីតែពេលគ្រិស្តប្រាប់ព័ត៌មានចំៗក្ដី ក៏អ្នកកាន់តាមលោកមិនបានយល់យ៉ាងពេញលេញអំពីអត្ថន័យនៃសេចក្ដីពិតទាំងប៉ុន្មាន ដែលលោកម្ចាស់ចង់បើកបង្ហាញដល់ពួកគេនៅពេលនោះដែរ។ គឺពេលក្រោយមក ទើបពួកគេបានយល់ ហើយក្នុងករណីខ្លះត្រូវចាំអស់រាប់រយឆ្នាំ។ សូមពិចារណាអំពីឧទាហរណ៍ខ្លះ។
១៥ នៅឆ្នាំ៣៣ គ.ស. លោកយេស៊ូបានបញ្ជាក់ច្បាស់ថា ពួកអ្នកដែលនឹងគ្រប់គ្រងជាមួយស្តេចនៃរាជាណាចក្ររបស់ព្រះ នឹងត្រូវជ្រើសរើសពីផែនដី ហើយនឹងត្រូវប្រោសឲ្យរស់ឡើងវិញជាបុគ្គលវិញ្ញាណនៅស្ថានសួគ៌។ ប៉ុន្តែអ្នកកាន់តាមលោកមិនបានយល់ភ្លាមៗអំពីអត្ថន័យនៃអ្វីដែលលោកបានបើកបង្ហាញស្តីអំពីរឿងនេះឡើយ។ (ដាន. ៧:១៨; យ៉ូន. ១៤:២-៥) នៅឆ្នាំដដែលនោះ លោកយេស៊ូបានរៀបរាប់រឿងប្រៀបប្រដូចផ្សេងៗ ដើម្បីឲ្យយល់ថារាជាណាចក្រនឹងមិនចាប់ផ្ដើមគ្រប់គ្រង រហូតដល់ មួយរយៈពេលយូរក្រោយពីលោកបានឡើងទៅស្ថានសួគ៌វិញ។ (ម៉ាថ. ២៥:១៤, ១៩; លូក. ១៩:១១, ១២) ពួកអ្នកកាន់តាមលោក មិនបានយល់ចំណុចដ៏សំខាន់នេះឡើយ ហើយពួកគេបានសួរលោកយេស៊ូក្រោយពីលោករស់ឡើងវិញថា៖ «តើលោកនឹងតាំងរាជាណាចក្រអ៊ីស្រាអែលឡើងវិញនៅពេលនេះឬ?»។ ក៏ប៉ុន្តែ លោកយេស៊ូមិនបានបើកបង្ហាញព័ត៌មានថែមទៀតនៅពេលនោះទេ។ (សកម្ម. ១:៦, ៧) លោកយេស៊ូក៏បានបង្រៀនដែរថា ក្រៅពី«ហ្វូងតូច»ដែលជាអ្នកគ្រប់គ្រងជាមួយនឹងលោក ក៏នឹងមាន«ចៀមឯទៀត»ដែរ។ (យ៉ូន. ១០:១៦; លូក. ១២:៣២) អ្នកកាន់តាមគ្រិស្តមិនបានយល់ត្រឹមត្រូវអំពីក្រុមទាំងពីរនោះទេ រហូតដល់មួយរយៈពេលយូរក្រោយពីរាជាណាចក្របានចាប់ផ្ដើមគ្រប់គ្រងនៅឆ្នាំ១៩១៤។
១៦ លោកយេស៊ូមានព័ត៌មានជាច្រើនដែលលោកអាចប្រាប់អ្នកកាន់តាមលោក ពេលដែលលោកនៅជាមួយនឹងពួកគេនៅផែនដី ប៉ុន្តែលោកជ្រាបថាពួកគេមិនអាចយល់បានទេ។ (យ៉ូន. ១៦:១២) ពិតមែនតែចំណេះជាច្រើនអំពីរាជាណាចក្ររបស់ព្រះបានត្រូវបើកបង្ហាញនៅសតវត្សរ៍ទី១ ក៏ប៉ុន្តែមិនទាន់ដល់ពេលឲ្យចំណេះនោះបានចម្រើនឡើងទេ។
ចំណេះត្រឹមត្រូវចម្រើនឡើងនៅ«គ្រាចុងបំផុត»
១៧. ដើម្បីយល់សេចក្ដីពិតអំពីរាជាណាចក្ររបស់ព្រះ តើយើងត្រូវធ្វើអ្វី ហើយតើយើងត្រូវការអ្វី?
១៧ ព្រះយេហូវ៉ាបានសន្យានឹងដានីយ៉ែលថា នៅ«គ្រាចុងបំផុត»មនុស្សជាច្រើននឹង«ខំរកយល់» ហើយចំណេះត្រឹមត្រូវស្តីអំពីគោលបំណងរបស់ព្រះនឹងចម្រើនឡើង។ (ដាន. ១២:៤) អ្នកដែលចង់បានចំណេះនោះ ត្រូវខំប្រឹងព្យាយាមទើបទទួលបាន។ ឯកសារយោងមួយពន្យល់ថា កិរិយាសព្ទភាសាហេប្រឺដែលបានត្រូវបកប្រែថា«ខំរកយល់» ទាក់ទងនឹងការពិនិត្យពិចារណាសៀវភៅមួយដោយយកចិត្តទុកដាក់និងយ៉ាងដិតដល់។ ក៏ប៉ុន្តែទោះជាយើងពិនិត្យមើលបទគម្ពីរដិតដល់យ៉ាងណាក្ដី ក៏យើងមិនអាចយល់យ៉ាងត្រឹមត្រូវអំពីសេចក្ដីពិតផ្សេងៗស្តីអំពីរាជាណាចក្ររបស់ព្រះ លុះត្រាតែព្រះយេហូវ៉ាជួយយើងឲ្យយល់។—សូមអាន ម៉ាថាយ ១៣:១១
១៨. តើអ្នកដែលកោតខ្លាចព្រះយេហូវ៉ាបានបង្ហាញជំនឿនិងចិត្តរាបទាបយ៉ាងដូចម្ដេច?
១៨ ក្នុងគ្រាមុនឆ្នាំ១៩១៤ ព្រះយេហូវ៉ាបានបើកបង្ហាញបន្ដិចម្ដងៗនូវសេចក្ដីពិតផ្សេងៗអំពីរាជាណាចក្ររបស់លោក។ នៅគ្រាចុងបំផុត លោកនៅតែធ្វើដូច្នេះដែរ។ នៅជំពូកទី៤និងទី៥ក្នុងសៀវភៅនេះ យើងនឹងឃើញថា រាស្ត្ររបស់ព្រះត្រូវកែប្រែការយល់ដឹងរបស់ពួកគេច្រើនដង ក្នុងអំឡុង១០០ឆ្នាំកន្លងទៅហើយនេះ។ តើនេះមានន័យថាព្រះយេហូវ៉ាមិនគាំទ្រពួកគេទេឬ? មិនមានន័យដូច្នេះឡើយ! លោកប្រាកដជាគាំទ្រពួកគេ។ ហេតុអ្វី? ពីព្រោះអ្នកដែលកោតខ្លាចព្រះយេហូវ៉ាបានបង្ហាញគុណសម្បត្ដិពីរដែលលោកពេញចិត្ត គឺជំនឿនិងចិត្តរាបទាប។ (ហេ. ១១:៦; យ៉ា. ៤:៦) អ្នកបម្រើព្រះយេហូវ៉ាមានជំនឿថា ព្រះនឹងធ្វើអ្វីៗទាំងអស់ដែលលោកបានសន្យាក្នុងបណ្ដាំរបស់លោក។ ពួកគេបង្ហាញចិត្តរាបទាបដោយសារភាពថា ពួកគេមិនបានយល់ច្បាស់អំពីរបៀបដែលលោកនឹងធ្វើតាមសេចក្ដីសន្យាទាំងនោះទេ។ ចិត្តរាបទាបនោះ បានឃើញច្បាស់ក្នុងទស្សនាវដ្ដីប៉មយាម ថ្ងៃទី១ ខែមីនា ឆ្នាំ១៩២៥ ដែលចែងថា៖ «យើងដឹងថាលោកម្ចាស់ជាអ្នកបកស្រាយអត្ថន័យបណ្ដាំរបស់លោកដោយខ្លួនលោក ហើយយើងក៏ដឹងដែរថា លោកនឹងបកស្រាយបណ្ដាំរបស់លោកឲ្យរាស្ត្ររបស់លោកយល់តាមវិធីដែលលោកពេញចិត្ត និងនៅពេលដែលលោកពេញចិត្ត»។
«លោកម្ចាស់ . . . នឹងបកស្រាយបណ្ដាំរបស់លោកឲ្យរាស្ត្ររបស់លោកយល់តាមវិធីដែលលោកពេញចិត្ត និងនៅពេលដែលលោកពេញចិត្ត»
១៩. ឥឡូវនេះ តើព្រះយេហូវ៉ាបានឲ្យយើងយល់អ្វីខ្លះ ហើយហេតុអ្វី?
១៩ ពេលដែលរាជាណាចក្ររបស់ព្រះចាប់ផ្ដើមគ្រប់គ្រងនៅឆ្នាំ១៩១៤ រាស្ត្ររបស់ព្រះមិនបានយល់យ៉ាងពេញលេញអំពីអត្ថន័យនៃទំនាយផ្សេងៗដែលទាក់ទងនឹងរាជាណាចក្ររបស់ព្រះទេ។ (១កូ. ១៣:៩, ១០, ១២) ដោយសារយើងរំភើបចិត្តចង់ឃើញអ្វីៗកើតឡើងដូចព្រះបានសន្យា នោះជួនកាលយើងបានសន្និដ្ឋានខុស។ យូរៗទៅ យើងឃើញថា ទស្សនាវដ្ដីប៉មយាមដែលបានត្រូវរៀបរាប់ក្នុងវគ្គមុន បានចែងត្រឹមត្រូវ ពេលដែលប្រាប់ថា៖ «យើងមិនអាចយល់ទំនាយមួយបានទេ ទាល់តែអ្វីដែលបានត្រូវទាយនោះបានកើតឡើងរួចហើយ ឬកំពុងកើតឡើង។ តាមមើលទៅ នេះជាគោលការណ៍មួយដែលយើងគួរចាំមិនភ្លេច»។ ឥឡូវ យើងកំពុងរស់នៅជិតទីបញ្ចប់នៃគ្រាចុងបំផុត ហើយព្រឹត្ដិការណ៍ជាច្រើនដែលបានត្រូវទាយទុកជាមុននិងដែលទាក់ទងនឹងរាជាណាចក្ររបស់ព្រះ បានកើតឡើងរួចហើយ ឬមួយក៏កំពុងកើតឡើងឥឡូវនេះ។ ដោយសាររាស្ត្ររបស់ព្រះមានចិត្តរាបទាប ហើយសុខចិត្តទទួលការកែតម្រង់ នោះព្រះយេហូវ៉ាបានឲ្យយើងយល់ពេញលេញជាងមុនអំពីគោលបំណងរបស់លោក។ ចំណេះត្រឹមត្រូវបានកើនឡើងមែន!
រាស្ត្ររបស់ព្រះបានត្រូវសាកល្បងដោយការកែតម្រូវខាងការយល់ដឹង
២០, ២១. ពេលដែលការយល់ដឹងរបស់គ្រិស្តសាសនិកនៅសតវត្សរ៍ទី១បានត្រូវកែតម្រូវ តើនោះមានឥទ្ធិពលយ៉ាងណាទៅលើពួកគេ?
២០ ពេលដែលព្រះយេហូវ៉ាកែតម្រូវការយល់ដឹងរបស់យើងស្តីអំពីសេចក្ដីពិត នេះសាកល្បងចិត្តគំនិតរបស់យើង។ តើជំនឿនិងចិត្តរាបទាបនឹងជំរុញយើងឲ្យព្រមទទួលការកែតម្រូវនោះឬទេ? គ្រិស្តសាសនិកដែលរស់នៅសតវត្សរ៍ទី១បានប្រឈមមុខការសាកល្បងមួយបែបនេះ។ ជាឧទាហរណ៍ សូមស្រមៃគិតថាអ្នកជាគ្រិស្តសាសនិកជនជាតិយូដាដែលកំពុងរស់នៅសម័យនោះ។ អ្នកគោរពច្បាប់ម៉ូសេយ៉ាងខ្លាំង ហើយមាន មោទនភាពចំពោះជាតិសាសន៍របស់អ្នក។ ប៉ុន្តែក្រោយមក អ្នកទទួលសំបុត្រពីសាវ័កប៉ូលដែលប្រាប់ថា ច្បាប់ម៉ូសេលែងមានសុពលភាព ព្រះយេហូវ៉ាលែងទទួលស្គាល់ជនជាតិអ៊ីស្រាអែលជារាស្ត្ររបស់លោក ហើយឥឡូវ លោកពេញចិត្តប្រមូលអ៊ីស្រាអែលក្នុងន័យធៀបដែលមានសមាជិកជាជនជាតិយូដាផង និងជនជាតិដទៃផង។ (រ៉ូម ១០:១២; ១១:១៧-២៤; កាឡ. ៦:១៥, ១៦; កូឡ. ២:១៣, ១៤) តើអ្នកនឹងមានប្រតិកម្មយ៉ាងណា?
២១ គ្រិស្តសាសនិកដែលមានចិត្តរាបទាបបានទទួលស្គាល់ការពន្យល់របស់ប៉ូលដែលព្រះបានដឹកនាំឲ្យសរសេរ ហើយព្រះយេហូវ៉ាបានឲ្យពរពួកគេ។ (សកម្ម. ១៣:៤៨) អ្នកឯទៀតបានទើសចិត្តនឹងការកែប្រែនោះ ហើយចង់កាន់ខ្ជាប់តាមការយល់ដឹងរបស់ខ្លួនវិញ។ (កាឡ. ៥:៧-១២) បើពួកគេមិនកែប្រែទស្សនៈរបស់ពួកគេទេ នោះពួកគេនឹងបាត់បង់ឱកាសទៅជាអ្នកគ្រប់គ្រងជាមួយនឹងលោកយេស៊ូ។—២ពេ. ២:១
២២. តើអ្នកមានអារម្មណ៍យ៉ាងណាពេលការយល់ដឹងរបស់យើងស្តីអំពីគោលបំណងរបស់ព្រះត្រូវកែតម្រូវឲ្យច្បាស់ជាង?
២២ ក្នុងអំឡុងប៉ុន្មានទសវត្សរ៍កន្លងទៅនេះ ព្រះយេហូវ៉ាបានជួយយើងឲ្យយល់ត្រឹមត្រូវជាងអំពីរាជាណាចក្ររបស់លោក។ ជាឧទាហរណ៍ លោកបានជួយយើងឲ្យយល់ច្បាស់ជាងស្តីអំពីពេលណាមនុស្សដែលជារាស្ត្រនៃរាជាណាចក្រ នឹងត្រូវចាត់ទុកជាសត្វចៀម ហើយត្រូវញែកចេញពីមនុស្សដែលមិនព្រមស្ដាប់ ដែលត្រូវចាត់ទុកជាសត្វពពែវិញ។ ម្យ៉ាងទៀត លោកបានបង្រៀនយើងថា១៤៤.០០០នាក់នឹងគ្រប់ចំនួននៅពេលណា ក៏បានបង្រៀនអត្ថន័យនៃឧទាហរណ៍ផ្សេងៗរបស់លោកយេស៊ូស្តីអំពីរាជាណាចក្រ ហើយបានបង្រៀនថាគ្រិស្តសាសនិកចុងក្រោយក្នុងចំណោមអ្នកដែលបានត្រូវរើសតាំង នឹងត្រូវប្រោសឲ្យរស់ឡើងវិញនៅស្ថានសួគ៌នៅពេលណា។ d ពេលដែលមានការបង្រៀនច្បាស់ជាងដូច្នេះ តើអ្នកមានប្រតិកម្មយ៉ាងណា? តើនេះពង្រឹងជំនឿរបស់អ្នកឬ? តើអ្នកយល់ថានេះជាភ័ស្តុតាងដែលបញ្ជាក់ថា ព្រះយេហូវ៉ាកំពុងអប់រំរាស្ត្ររបស់លោកដែលមានចិត្តរាបទាបឬ? ព័ត៌មានដែលមានបន្តបន្ទាប់ក្នុងសៀវភៅនេះនឹងពង្រឹងទំនុកចិត្តរបស់អ្នកថា ព្រះយេហូវ៉ាកំពុងបើកបង្ហាញបន្ដិចម្ដងៗនូវគោលបំណងរបស់លោកឲ្យអ្នកដែលកោតខ្លាចលោកយល់ច្បាស់។
a នាមរបស់ព្រះមកពីកិរិយាសព្ទហេប្រឺដែលមានន័យថា«ធ្វើឲ្យក្លាយជា»ឬ«ធ្វើឲ្យកើតមក»។ នាមរបស់ព្រះយេហូវ៉ាបញ្ជាក់អត្ថន័យថា លោកធ្វើតាមសេចក្ដីសន្យាទាំងអស់របស់លោក។ សូមមើលប្រអប់ដែលមានចំណងជើងថា«អត្ថន័យនៃនាមរបស់ព្រះ» នៅទំព័រ៤៣។
b ទោះជាពេលវេលានេះស្ដាប់ទៅដូចជាយូរណាស់ចំពោះយើងដែលរស់នៅសព្វថ្ងៃនេះក្ដី តែយើងត្រូវចាំថា អាយុជីវិតមនុស្សសម័យបុរាណធ្លាប់វែងជាងឥឡូវឆ្ងាយណាស់។ ឧទាហរណ៍ មានតែបួនតំណពីអាដាមដល់អាប្រាហាំ។ អស់មួយរយៈពេល អាដាមនិងឡាមេកដែលជាឪពុករបស់ណូអេ បានរស់នៅសម័យជាមួយគ្នា។ ឡាមេកបានរស់នៅអស់មួយរយៈពេល ក្នុងសម័យដែលសិមជាកូនរបស់ណូអេបានរស់នៅ ហើយសិមនិងអាប្រាហាំក៏បានរស់នៅអស់មួយរយៈពេលក្នុងសម័យជាមួយគ្នាដែរ។—លោ. ៥:៥, ៣១; ៩:២៩; ១១:១០, ១១; ២៥:៧
c ពាក្យ«សាតាំង»ឬ«សាថាន»មាន១៨ដងក្នុងបទគម្ពីរភាសាហេប្រឺ។ ក៏ប៉ុន្តែពាក្យ«សាថាន»មានជាង៣០ដងក្នុងបទគម្ពីរគ្រិស្តសាសនិកជាភាសាក្រិច។ គឺសមរម្យដែលបទគម្ពីរភាសាហេប្រឺមិនបានផ្ដោតទៅលើសាថានហួសហេតុពេកទេ តែបានផ្ដោតទៅលើការសម្គាល់មេស្ស៊ីវិញ។ ពេលមេស្ស៊ីមកដល់ លោកបានបកអាក្រាតសាថានយ៉ាងពេញលេញ ហើយនេះបានត្រូវកត់ក្នុងបទគម្ពីរគ្រិស្តសាសនិកជាភាសាក្រិច។
d ដើម្បីអានសេចក្ដីពន្យល់អំពីការកែប្រែទាំងនេះ សូមមើលទស្សនាវដ្ដីប៉មយាម ថ្ងៃទី១ ខែមករា ឆ្នាំ១៩៩៦ ទំព័រ២៧-៣២ ថ្ងៃទី១ ខែមករា ឆ្នាំ២០០៨ ទំព័រ២៤-២៨ ថ្ងៃទី១ ខែកក្កដា ឆ្នាំ២០០៨ ទំព័រ២១-២៦ និងថ្ងៃទី១៥ ខែកក្កដា ឆ្នាំ២០១៣ ទំព័រ៩-១៤។