ບົດທີ 3
ພະເຢໂຫວາເປີດເຜີຍສິ່ງທີ່ພະອົງຕັ້ງໃຈຈະເຮັດ
1, 2. ພະເຢໂຫວາບອກໃຫ້ມະນຸດຮູ້ຄວາມຕັ້ງໃຈຂອງພະອົງແນວໃດ?
ພໍ່ແມ່ທີ່ຮັກແລະຫ່ວງໃຍລູກຈະໃຫ້ລູກນັ່ງຢູ່ນຳໃນຂະນະທີ່ລົມເລື່ອງສຳຄັນໃນຄອບຄົວ. ພໍ່ແມ່ຈະບໍ່ບອກຂໍ້ມູນຫຼາຍເກີນໄປ ແຕ່ບອກລາຍລະອຽດທີ່ຄິດວ່າລູກໃຫຍ່ພໍທີ່ຈະຮູ້ແລະເຂົ້າໃຈໄດ້.
2 ຄ້າຍຄືກັບຕົວຢ່າງນີ້ ພະເຢໂຫວາກໍຄ່ອຍໆບອກມະນຸດວ່າພະອົງຕັ້ງໃຈຈະເຮັດອັນໃດ. ແຕ່ພະອົງເຮັດແບບນັ້ນກໍຕໍ່ເມື່ອເຫັນວ່າເໝາະສົມກັບເວລາ. ໃຫ້ເຮົາມາພິຈາລະນາພາບລວມນຳກັນສັ້ນໆວ່າຕະຫຼອດປະຫວັດສາດທີ່ຜ່ານມາພະເຢໂຫວາໄດ້ເປີດເຜີຍຄວາມຈິງເລື່ອງລາຊະອານາຈັກຂອງພະອົງແນວໃດ.
ເປັນຫຍັງຕ້ອງມີລາຊະອານາຈັກຂອງພະເຈົ້າ?
3, 4. ພະເຢໂຫວາກຳນົດເສັ້ນທາງປະຫວັດສາດຂອງມະນຸດໄວ້ລ່ວງໜ້າບໍ? ຂໍໃຫ້ອະທິບາຍ
3 ທຳອິດ ພະເຢໂຫວາບໍ່ໄດ້ຄິດທີ່ຈະຕັ້ງລາຊະອານາຈັກຂຶ້ນມາ ຍ້ອນຫຍັງ? ຍ້ອນວ່າພະເຢໂຫວາບໍ່ໄດ້ກຳນົດເສັ້ນທາງປະຫວັດສາດຂອງມະນຸດໄວ້ລ່ວງໜ້າ ນອກຈາກນັ້ນ ພະອົງຍັງສ້າງມະນຸດໃຫ້ມີອິດສະຫຼະທາງດ້ານຄວາມຄິດ. ດັງນັ້ນ ພະເຢໂຫວາຈຶ່ງບອກອາດາມແລະເອວາໃຫ້ຮູ້ຄວາມຕັ້ງໃຈຂອງພະອົງ ໂດຍບອກວ່າ: “ຈົ່ງພາກັນອອກແມ່ແພ່ລູກເກີດມາກທະວີຂຶ້ນໃຫ້ແຜ່ນດິນເຕັມ.” (ຕົ້ນ. 1:28) ພະເຢໂຫວາຍັງບອກມະນຸດໃຫ້ເຮັດຕາມມາດຕະຖານຂອງພະອົງໃນເລື່ອງຄວາມດີແລະຄວາມຊົ່ວ. (ຕົ້ນ. 2:16, 17) ອາດາມແລະເອວາສາມາດເລືອກໄດ້ວ່າຈະເຊື່ອຟັງພະເຈົ້າຫຼືບໍ່. ຖ້າເຂົາເຈົ້າກັບລູກຫຼານເຊື່ອຟັງພະເຢໂຫວາ ເຮົາກໍບໍ່ຈຳເປັນຕ້ອງມີລາຊະອານາຈັກທີ່ມີພະຄລິດເປັນກະສັດເພື່ອເຮັດໃຫ້ສິ່ງທີ່ພະເຢໂຫວາຕັ້ງໃຈໄວ້ເກີດຂຶ້ນແທ້ ແລະຕອນນີ້ໂລກກໍຄົງມີແຕ່ມະນຸດສົມບູນແບບທີ່ນະມັດສະການພະເຢໂຫວາ.
4 ເຖິງແມ່ນວ່າຊາຕານ ອາດາມ ແລະເອວາຈະຂືນອຳນາດ ແຕ່ພະເຢໂຫວາກໍບໍ່ໄດ້ລົ້ມເລີກຄວາມຕັ້ງໃຈທີ່ຈະເຮັດໃຫ້ໂລກເຕັມໄປດ້ວຍຄອບຄົວມະນຸດທີ່ສົມບູນແບບ. ດັງນັ້ນ ພະເຢໂຫວາຈຶ່ງປ່ຽນເສັ້ນທາງເພື່ອເຮັດໃຫ້ທຸກສິ່ງເປັນໄປຕາມທີ່ພະອົງຕັ້ງໃຈໄວ້. ຄວາມຕັ້ງໃຈຂອງພະເຢໂຫວາບໍ່ຄືກັບລົດໄຟທີ່ແລ່ນໄປເລື້ອຍໆຈົນກວ່າຈະເຖິງຈຸດໝາຍ ເຊິ່ງອາດຈະຕົກລາງໄດ້ຖ້າມີໃຜຈົງໃຈເຮັດໃຫ້ມັນຕົກລາງ. ຖ້າພະເຢໂຫວາບອກໄວ້ແລ້ວວ່າຈະເຮັດອັນໃດ ກໍບໍ່ມີພະລັງຫຼືອຳນາດໃດໆໃນເອກະພົບຈະມາຂັດຂວາງໄດ້. (ອ່ານເອຊາອີ 55:11) ຖ້າມີອຸປະສັກເກີດຂຶ້ນ ພະເຢໂຫວາກໍຈະປ່ຽນໄປໃຊ້ເສັ້ນທາງໃໝ່. a (ອົບ. 3:14, 15) ເມື່ອເຖິງເວລາທີ່ເໝາະສົມ ພະອົງຈະບອກຜູ້ຮັບໃຊ້ທີ່ສັດຊື່ໃຫ້ຮູ້ວິທີໃໝ່ທີ່ພະອົງຈະໃຊ້ເພື່ອເຮັດໃຫ້ເປັນໄປຕາມທີ່ພະອົງຕັ້ງໃຈໄວ້.
5. ພະເຢໂຫວາເຮັດອັນໃດເພື່ອແກ້ໄຂບັນຫາທີ່ເກີດຂຶ້ນໃນສວນເອເດນ?
5 ເພື່ອແກ້ໄຂບັນຫາທີ່ເກີດຂຶ້ນໃນສວນເອເດນ ພະເຢໂຫວາຈຶ່ງສ້າງຕັ້ງລາຊະອານາຈັກຂຶ້ນມາ. (ມັດ. 25:34) ໃນເວລາທີ່ເບິ່ງຄືວ່າສິ້ນຫວັງແລະມືດມົນ ພະເຢໂຫວາເລີ່ມໃຫ້ແສງສະຫວ່າງໂດຍເປີດເຜີຍວິທີທີ່ພະອົງຈະໃຊ້ໃນການຟື້ນຟູສັງຄົມມະນຸດແລະແກ້ໄຂບັນຫາຕ່າງໆເຊິ່ງເກີດຂຶ້ນເມື່ອຊາຕານພະຍາຍາມຍຶດອຳນາດ. (ຕົ້ນ. 3:14-19) ແຕ່ພະເຢໂຫວາບໍ່ໄດ້ບອກລາຍລະອຽດທັງໝົດກ່ຽວກັບລາຊະອານາຈັກຂອງພະອົງໃນຄັ້ງດຽວ.
ພະເຢໂຫວາເລີ່ມເປີດເຜີຍຄວາມຈິງເລື່ອງລາຊະອານາຈັກ
6. ພະເຢໂຫວາສັນຍາເລື່ອງຫຍັງ ແຕ່ພະອົງບໍ່ໄດ້ເປີດເຜີຍຫຍັງ?
6 ໃນຄຳພະຍາກອນທຳອິດທີ່ບັນທຶກໄວ້ໃນຄຳພີໄບເບິນ ພະເຢໂຫວາສັນຍາວ່າຈະມີ “ເຊື້ອສາຍ” ມາຢຽບຫົວງູໃຫ້ແຕກ. (ອ່ານຕົ້ນເດີມ 3:15) ແຕ່ໃນຕອນນັ້ນພະອົງບໍ່ໄດ້ບອກວ່າເຊື້ອສາຍຂອງຜູ້ຍິງແລະເຊື້ອສາຍຂອງງູແມ່ນໃຜ. ຄວາມຈິງແລ້ວ ພະເຢໂຫວາບໍ່ໄດ້ເປີດເຜີຍລາຍລະອຽດຈົນກວ່າເວລາຜ່ານໄປ 2.000 ປີຫຼັງຈາກນັ້ນ. b
7. ເປັນຫຍັງພະເຢໂຫວາຈຶ່ງເລືອກອັບລາຫາມ ແລະບົດຮຽນສຳຄັນທີ່ເຮົາໄດ້ຈາກເລື່ອງນີ້ແມ່ນຫຍັງ?
7 ໃນທີ່ສຸດພະເຢໂຫວາກໍເລືອກອັບລາຫາມ ແລ້ວໃຫ້ເຜົ່າພັນຫຼືລູກຫຼານຕາມຄຳສັນຍາມາທາງເຊື້ອສາຍຂອງລາວ ເພາະລາວ “ເຊື່ອຟັງຄວາມ [ພະເຢໂຫວາ].” (ຕົ້ນ. 22:18) ບົດຮຽນສຳຄັນທີ່ເຮົາໄດ້ຈາກເລື່ອງນີ້ກໍຄື: ພະເຢໂຫວາເປີດເຜີຍສິ່ງທີ່ພະອົງຕັ້ງໃຈຈະເຮັດກັບຜູ້ທີ່ຢ້ານຢຳພະອົງເທົ່ານັ້ນ.—ອ່ານຄຳເພງ 25:14
8, 9. ເມື່ອພະເຢໂຫວາເວົ້າກັບອັບລາຫາມແລະຢາໂຄບ ພະອົງບອກອັນໃດກ່ຽວກັບລູກຫຼານຕາມຄຳສັນຍາ?
8 ພະເຢໂຫວາໃຊ້ທູດສະຫວັນໄປເວົ້າກັບອັບລາຫາມໝູ່ຂອງພະອົງ ນັ້ນເປັນຄັ້ງທຳອິດທີ່ພະເຢໂຫວາເປີດເຜີຍເລື່ອງທີ່ສຳຄັນກ່ຽວກັບລູກຫຼານຕາມທີ່ພະອົງສັນຍາເຊິ່ງເປັນມະນຸດຄົນໜຶ່ງ. (ຕົ້ນ. 22:15-17; ຢໂກ. 2:23) ແຕ່ມະນຸດຄົນນີ້ຈະຢຽບຫົວຂອງງູໂດຍວິທີໃດ? ໃຜແມ່ນງູ? ການເປີດເຜີຍຫຼັງຈາກນັ້ນເຮັດໃຫ້ເຮົາຮູ້ຄຳຕອບ.
9 ພະເຢໂຫວາຕັ້ງໃຈຈະໃຫ້ລູກຫຼານທີ່ພະອົງສັນຍາໄວ້ມາທາງຫຼານຂອງອັບລາຫາມທີ່ຊື່ຢາໂຄບ ເຊິ່ງເປັນຄົນທີ່ມີຄວາມເຊື່ອເຂັ້ມແຂງໃນພະເຈົ້າ. (ຕົ້ນ. 28:13-22) ພະເຢໂຫວາບອກຢາໂຄບວ່າລູກຫຼານທີ່ກ່າວເຖິງນີ້ຈະມາທາງເຊື້ອສາຍຂອງຢູດາ ເຊິ່ງເປັນລູກຊາຍຂອງຢາໂຄບ. ຢາໂຄບພະຍາກອນວ່າລູກຫຼານຂອງຢູດາຈະໄດ້ຮັບ “ຄ້ອນສຳຄັນ” ຫຼືຄະທາ ເຊິ່ງເປັນສັນຍະລັກແທນອຳນາດກະສັດ ແລະ “ພວກຕ່າງປະເທດຈະຍອມຟັງຄວາມພະອົງ.” (ຕົ້ນ. 49:1, 10) ພະເຢໂຫວາຍັງບອກອີກວ່າລູກຫຼານຕາມຄຳສັນຍາຈະເປັນຜູ້ປົກຄອງ ເປັນກະສັດ.
10, 11. ເປັນຫຍັງພະເຢໂຫວາເປີດເຜີຍໃຫ້ດາວິດກັບດານຽນຮູ້ສິ່ງທີ່ພະອົງຕັ້ງໃຈຈະເຮັດ?
10 ຫຼັງຈາກສະໄໝຂອງຢູດາປະມານ 650 ປີ ພະເຢໂຫວາໄດ້ເປີດເຜີຍຄວາມຕັ້ງໃຈຂອງພະອົງອີກ ໂດຍບອກກັບດາວິດຜູ້ເປັນເຊື້ອສາຍໃນຕະກູນຢູດາ ແລະເປັນ “ຄົນໜຶ່ງທີ່ພະອົງພໍໃຈ, ລ.ມ.” (1 ຊາມ. 13:14; 17:12; ກິດ. 13:22) ເນື່ອງຈາກດາວິດຢ້ານຢຳພະເຢໂຫວາສຸດຫົວໃຈ ພະອົງຈຶ່ງເລືອກທີ່ຈະເຮັດສັນຍາກັບດາວິດໂດຍບອກວ່າຈະໃຫ້ລູກຫຼານຄົນໜຶ່ງຂອງລາວປົກຄອງເປັນກະສັດຕະຫຼອດໄປ.—2 ຊາມ. 7:8, 12-16
11 ປະມານ 500 ປີຕໍ່ມາ ພະເຢໂຫວາໃຊ້ຜູ້ພະຍາກອນດານຽນໃຫ້ລະບຸປີທີ່ຜູ້ຖືກເຈີມຫຼືເມຊີຈະປາກົດຕົວເທິງໂລກ. (ດາ. 9:25) ພະເຢໂຫວາຖືວ່າດານຽນເປັນຄົນທີ່ “ມີຄ່າຫຼາຍ, ລ.ມ.” ຍ້ອນຫຍັງ? ຍ້ອນວ່າດານຽນນັບຖືແລະຮັບໃຊ້ພະເຢໂຫວາຢ່າງສັດຊື່ຕະຫຼອດຊີວິດຂອງລາວ.—ດາ. 6:16; 9:22, 23
12. ພະເຢໂຫວາບອກດານຽນໃຫ້ເຮັດຫຍັງ ແລະຍ້ອນຫຍັງ?
12 ເຖິງແມ່ນວ່າພະເຢໂຫວາດົນໃຈໃຫ້ຜູ້ພະຍາກອນດານຽນບັນທຶກລາຍລະອຽດຫຼາຍຢ່າງກ່ຽວກັບເມຊີຜູ້ເປັນລູກຫຼານຕາມຄຳສັນຍາ ແຕ່ກໍຍັງບໍ່ເຖິງເວລາທີ່ພະອົງຈະໃຫ້ຜູ້ຮັບໃຊ້ເຂົ້າໃຈໃນເລື່ອງນີ້ຢ່າງເຕັມທີ ຕົວຢ່າງເຊັ່ນ: ຫຼັງຈາກໃຫ້ດານຽນໄດ້ເຫັນນິມິດກ່ຽວກັບການສ້າງຕັ້ງລາຊະອານາຈັກຂອງພະເຈົ້າ ພະອົງບອກດານຽນໃຫ້ເກັບເລື່ອງນີ້ໄວ້ເປັນຄວາມລັບຈົນເຖິງເວລາທີ່ພະອົງເຫັນວ່າເໝາະສົມ ເມື່ອເຖິງຕອນນັ້ນຄວາມຮູ້ແທ້ຂອງພະເຢໂຫວາຈະ “ມາກທະວີຂຶ້ນ” ຫຼືມີຢ່າງບໍລິບູນ.—ດາ. 12:4
ພະເຢໂຫວາດົນໃຈຜູ້ພະຍາກອນດານຽນທີ່ສັດຊື່ໃຫ້ບັນທຶກເລື່ອງລາຊະອານາຈັກເມຊີໄວ້ຢ່າງລະອຽດ
ພະເຍຊູຊ່ວຍເຮົາໃຫ້ເຂົ້າໃຈຫຼາຍຂຶ້ນກ່ຽວກັບສິ່ງທີ່ພະເຢໂຫວາຕັ້ງໃຈຈະເຮັດ
13. (ກ) ລູກຫຼານຕາມຄຳສັນຍາແມ່ນໃຜ? (ຂ) ພະເຍຊູໃຫ້ແສງສະຫວ່າງກັບມະນຸດກ່ຽວກັບຄຳພະຍາກອນໃນຕົ້ນເດີມ 3:15 ແນວໃດ?
13 ພະເຢໂຫວາລະບຸຢ່າງຊັດເຈນວ່າ ພະເຍຊູເປັນລູກຫຼານຕາມທີ່ພະອົງສັນຍາໄວ້ ເພິ່ນເປັນເຊື້ອສາຍຂອງດາວິດແລະຈະໄດ້ເປັນກະສັດ. (ລືກາ 1:30-33; 3:21, 22) ເມື່ອພະເຍຊູເລີ່ມວຽກຮັບໃຊ້ ພະອົງໄດ້ໃຫ້ແສງສະຫວ່າງກັບມະນຸດ ໂດຍຊ່ວຍໃຫ້ເຂົ້າເຈົ້າມີຄວາມຮູ້ຫຼາຍຂຶ້ນກ່ຽວກັບສິ່ງທີ່ພະເຢໂຫວາຕັ້ງໃຈຈະເຮັດ. (ມັດ. 4:13-17) ຕົວຢ່າງເຊັ່ນ ພະເຍຊູກຳຈັດຂໍ້ສົງໄສກ່ຽວກັບ “ງູ” ໃນຕົ້ນເດີມ 3:14, 15 ໂດຍເອີ້ນພະຍາມານວ່າ: “ຜູ້ຂ້າຄົນ” ແລະ “ພໍ່ແຫ່ງຄວາມຕົວະ.” (ໂຢ. 8:44) ໃນນິມິດຂອງໂຢຮັນ ພະເຍຊູໄດ້ເປີດເຜີຍວ່າ: “ງູບູຮານ” ກໍຄື “ເດຍໂບໂລແລະຊາຕານ.” c (ອ່ານຄຳປາກົດ 1:1; 12:9) ໃນນິມິດດຽວກັນນີ້ ພະເຍຊູຜູ້ເປັນລູກຫຼານຕາມຄຳສັນຍາໄດ້ເປີດເຜີຍໃຫ້ຮູ້ວິທີທີ່ເພິ່ນຈະເຮັດໃຫ້ຄຳພະຍາກອນໃນສວນເອເດນສຳເລັດໂດຍການທຳລາຍຊາຕານ.—ຄຳປ. 20:7-10
14-16. ລູກສິດຂອງພະເຍຊູໃນສະຕະວັດທຳອິດເຂົ້າໃຈຄວາມໝາຍຂອງສິ່ງທີ່ພະເຍຊູບອກທັງໝົດບໍ? ຂໍໃຫ້ອະທິບາຍ.
14 ຕາມທີ່ເຮົາໄດ້ຮຽນໄປແລ້ວໃນບົດທີ 1 ຂອງປຶ້ມນີ້ ພະເຍຊູເວົ້າເຖິງເລື່ອງລາຊະອານາຈັກຫຼາຍແທ້ໆ. ແຕ່ເພິ່ນກໍບໍ່ໄດ້ບອກລາຍລະອຽດທຸກຢ່າງທີ່ພວກລູກສິດຢາກຮູ້. ແມ່ນແຕ່ຕອນທີ່ພະເຍຊູບອກລາຍລະອຽດທີ່ສະເພາະເຈາະຈົງ ກໍຍັງຕ້ອງໃຊ້ເວລາອີກຫຼາຍຮ້ອຍປີກວ່າທີ່ຜູ້ຕິດຕາມເພິ່ນຈະເຂົ້າໃຈຄວາມໝາຍທັງໝົດຂອງຄວາມຈິງຕາມທີ່ເພິ່ນບອກໄວ້. ໃຫ້ເຮົາມາເບິ່ງບາງຕົວຢ່າງນຳກັນ.
15 ໃນປີ ຄ.ສ. 33 ພະເຍຊູບອກຢ່າງຊັດເຈນວ່າບາງຄົນຈະຮ່ວມປົກຄອງກັບກະສັດໃນລາຊະອານາຈັກຂອງພະເຈົ້າ ເຂົາເຈົ້າຈະຖືກຮັບໄປຈາກແຜ່ນດິນໂລກແລະຈະມີຊີວິດຢູ່ໃນສະຫວັນ. ແຕ່ໃນຕອນນັ້ນລູກສິດຂອງພະເຍຊູບໍ່ເຂົ້າໃຈເລື່ອງທີ່ເພິ່ນເວົ້າ. (ດາ. 7:18; ໂຢ. 14:2-5) ໃນປີດຽວກັນນັ້ນ ພະເຍຊູໄດ້ໃຊ້ຕົວຢ່າງປຽບທຽບເພື່ອໃຫ້ເຮົາຮູ້ວ່າລາຊະອານາຈັກບໍ່ໄດ້ເກີດຂຶ້ນທັນທີຫຼັງຈາກທີ່ເພິ່ນໄປສະຫວັນ ແຕ່ຕ້ອງຄອຍຖ້າອີກດົນ. (ມັດ. 25:14, 19; ລືກາ 19:11, 12) ພວກລູກສິດບໍ່ເຂົ້າໃຈຈຸດທີ່ສຳຄັນນີ້ ຫຼັງຈາກທີ່ພະເຍຊູຖືກປຸກໃຫ້ຟື້ນຄືນຈາກຕາຍເຂົາເຈົ້າກໍຍັງຖາມເພິ່ນວ່າ: “ພະອົງຈະໃຫ້ຊົນຊາດອິດສະລາເອນໄດ້ຄອງອຳນາດຄືນໃນເວລານີ້ບໍ?, ທ.ປ.” ແຕ່ພະເຍຊູກໍເລືອກທີ່ຈະບໍ່ບອກລາຍລະອຽດຫຍັງອີກ. (ກິດ. 1:6, 7) ພະເຍຊູຍັງສອນອີກວ່າຈະມີຄົນອີກກຸ່ມໜຶ່ງທີ່ເອີ້ນວ່າ: “ແກະອື່ນ” ເຊິ່ງເປັນຄົນລະກຸ່ມກັບ “ແກະຝູງນ້ອຍ, ລ.ມ.” ທີ່ຈະຮ່ວມປົກຄອງກັບເພິ່ນ. (ໂຢ. 10:16; ລືກາ 12:32) ລູກສິດຂອງພະຄລິດບໍ່ເຂົ້າໃຈຢ່າງຈະແຈ້ງວ່າຄົນ 2 ກຸ່ມນີ້ແມ່ນໃຜ ແລະຫຼັງຈາກລາຊະອານາຈັກສ້າງຕັ້ງໃນປີ 1914 ເຂົາເຈົ້າຍັງຕ້ອງໃຊ້ເວລາອີກດົນເພື່ອຈະເຂົ້າໃຈ.
16 ຕອນທີ່ພະເຍຊູຢູ່ໃນໂລກເພິ່ນບໍ່ໄດ້ບອກທຸກສິ່ງກັບພວກລູກສິດເພາະເພິ່ນຮູ້ດີວ່າເຂົາເຈົ້າຈະຮັບບໍ່ໄຫວ. (ໂຢ. 16:12) ບໍ່ຕ້ອງສົງໄສເລີຍວ່າໃນສະຕະວັດທຳອິດຕ້ອງມີການເປີດເຜີຍຄວາມຮູ້ຫຼາຍເລື່ອງກ່ຽວກັບລາຊະອານາຈັກ ແຕ່ກໍຍັງບໍ່ເຖິງເວລາທີ່ຄວາມຮູ້ນັ້ນຈະມີຢ່າງບໍລິບູນ.
ຄວາມຮູ້ແທ້ມີຢ່າງບໍລິບູນໃນ “ສະໄໝສຸດທ້າຍ”
17. ເຮົາຕ້ອງເຮັດຫຍັງເພື່ອຈະເຂົ້າໃຈຄວາມຈິງເລື່ອງລາຊະອານາຈັກ ແລະເຮົາຕ້ອງໄດ້ຮັບຄວາມຊ່ວຍເຫຼືອອັນໃດອີກ?
17 ພະເຢໂຫວາສັນຍາກັບດານຽນວ່າໃນ “ສະໄໝສຸດທ້າຍ” ຫຼາຍຄົນຈະ “ຄົ້ນເບິ່ງມ້ວນໜັງສືນີ້ຢ່າງຖີ່ຖ້ວນ ແລະຄວາມຮູ້ແທ້” ກ່ຽວກັບສິ່ງທີ່ພະເຈົ້າຕັ້ງໃຈຈະເຮັດກໍຈະມີໃຫ້ຮຽນຮູ້ຢ່າງບໍລິບູນ. (ດາ. 12:4, ລ.ມ.) ຄົນທີ່ຢາກໄດ້ຄວາມຮູ້ນັ້ນຕ້ອງອອກຄວາມພະຍາຍາມຫຼາຍແທ້ໆ ແຕ່ບໍ່ວ່າເຮົາຈະກວດສອບຄຳພີໄບເບິນຢ່າງລະອຽດຖີ່ຖ້ວນຂະໜາດໃດ ເຮົາກໍບໍ່ສາມາດເຂົ້າໃຈຄວາມຈິງເລື່ອງລາຊະອານາຈັກຂອງພະເຈົ້າໄດ້ ຖ້າພະເຢໂຫວາບໍ່ຊ່ວຍເຮົາ.—ອ່ານມັດທາຍ 13:11
18. ຄົນທີ່ຢ້ານຢຳພະເຢໂຫວາສະແດງຄວາມເຊື່ອແລະຄວາມຖ່ອມໃຈແນວໃດ?
18 ກ່ອນຈະເຖິງປີ 1914 ພະເຢໂຫວາເປີດເຜີຍຄວາມຈິງເລື່ອງລາຊະອານາຈັກເທື່ອລະຂັ້ນ ແລະພະອົງກໍຍັງເຮັດແບບນັ້ນໃນສະໄໝສຸດທ້າຍ. ໃນບົດທີ 4 ແລະ 5 ຂອງປຶ້ມນີ້ຈະສະແດງໃຫ້ເຫັນວ່າ ຕະຫຼອດ 100 ປີທີ່ຜ່ານມາປະຊາຊົນຂອງພະເຈົ້າຕ້ອງປັບປ່ຽນຄວາມເຂົ້າໃຈຫຼາຍຄັ້ງ. ນີ້ໝາຍຄວາມວ່າພະເຢໂຫວາບໍ່ໄດ້ສະໜັບສະໜູນເຂົາເຈົ້າບໍ? ບໍ່ແມ່ນ! ຄວາມຈິງແລ້ວພະເຢໂຫວາສະໜັບສະໜູນເຂົາເຈົ້າ ເພາະຄົນທີ່ຢ້ານຢຳພະເຢໂຫວາມີຄຸນລັກສະນະ 2 ຢ່າງທີ່ເຮັດໃຫ້ພະອົງຮັກເຂົາເຈົ້ານັ້ນຄື: ຄວາມເຊື່ອແລະຄວາມຖ່ອມໃຈ. (ເຫບ. 11:6; ຢໂກ. 4:6) ຜູ້ຮັບໃຊ້ຂອງພະເຢໂຫວາເຊື່ອວ່າທຸກຢ່າງທີ່ພະອົງສັນຍາໄວ້ໃນຄຳພີໄບເບິນຈະເປັນຈິງ. ເຂົາເຈົ້າສະແດງຄວາມຖ່ອມໃຈ ເມື່ອຍອມຮັບວ່າເຂົາເຈົ້າເຂົ້າໃຈຜິດກ່ຽວກັບວິທີທີ່ພະເຈົ້າຈະເຮັດໃຫ້ຄຳສັນຍາຂອງພະອົງເປັນຈິງ ເຮົາເຫັນຄວາມຖ່ອມໃຈນີ້ໄດ້ຈາກຫໍສັງເກດການ 1 ມີນາ 1925 ທີ່ບອກວ່າ: “ເຮົາຮູ້ວ່າພະເຈົ້າຈະເປັນຜູ້ອະທິບາຍຄວາມໝາຍເອງ ພະເຈົ້າຈະອະທິບາຍຄວາມໝາຍໃຫ້ປະຊາຊົນເຂົ້າໃຈເລື່ອງຕ່າງໆໃນຄຳພີໄບເບິນ ໃນວິທີຂອງພະອົງແລະໃນເວລາທີ່ເໝາະສົມ.”
“ພະເຈົ້າຈະອະທິບາຍຄວາມໝາຍໃຫ້ປະຊາຊົນເຂົ້າໃຈເລື່ອງຕ່າງໆໃນຄຳພີໄບເບິນ ໃນວິທີຂອງພະອົງແລະໃນເວລາທີ່ເໝາະສົມ”
19. ຕອນນີ້ພະເຢໂຫວາຊ່ວຍເຮົາໃຫ້ເຂົ້າໃຈໃນເລື່ອງໃດ ແລະຍ້ອນຫຍັງ?
19 ເມື່ອລາຊະອານາຈັກສ້າງຕັ້ງຂຶ້ນໃນປີ 1914 ປະຊາຊົນຂອງພະເຈົ້າກໍຍັງບໍ່ເຂົ້າໃຈທັງໝົດວ່າຄຳພະຍາກອນທີ່ກ່ຽວຂ້ອງກັບລາຊະອານາຈັກຈະເກີດຂຶ້ນແທ້ແນວໃດ. (1 ໂກ. 13:9, 10, 12) ເນື່ອງຈາກເຮົາຄອຍຖ້າແລະຢາກເຫັນຄຳສັນຍາຂອງພະເຈົ້າເປັນຈິງ ບາງຄັ້ງເຮົາກໍເລີຍລົງຄວາມເຫັນຢ່າງຜິດໆ. ຫໍສັງເກດການ 1 ມີນາ 1925 ບອກວ່າ: “ຫຼັກການຢ່າງໜຶ່ງທີ່ເຮົາຄວນຈື່ໄວ້ສະເໝີຄື ເຮົາບໍ່ສາມາດເຂົ້າໃຈຄຳພະຍາກອນທັ້ງໝົດໄດ້ ຈົນກວ່າຄຳພະຍາກອນນັ້ນເກີດຂຶ້ນແລ້ວ ຫຼືກຳລັງເກີດຂຶ້ນ.” ແລະຕະຫຼອດຫຼາຍປີທີ່ຜ່ານມາເຮົາກໍເຫັນວ່ານີ້ເປັນຄຳເວົ້າທີ່ຖືກຕ້ອງ. ຕອນນີ້ເຮົາຢູ່ໃນເວລາທີ່ໃກ້ຈະເຖິງຈຸດອະວະສານແລ້ວ ຄຳພະຍາກອນຫຼາຍຂໍ້ກ່ຽວກັບລາຊະອານາຈັກໄດ້ເກີດຂຶ້ນແລ້ວ ແລະອີກຫຼາຍຂໍ້ກໍກຳລັງເກີດຂຶ້ນ. ເນື່ອງຈາກປະຊາຊົນຂອງພະເຈົ້າຖ່ອມໃຈແລະເຕັມໃຈຍອມຮັບການແກ້ໄຂ ພະເຢໂຫວາຈຶ່ງຊ່ວຍໃຫ້ເຮົາເຂົ້າໃຈຫຼາຍຂຶ້ນກ່ຽວກັບສິ່ງທີ່ພະອົງຈະເຮັດ ແລະຄວາມຮູ້ແທ້ຈຶ່ງມີຢ່າງບໍລິບູນ!
ການປັບປ່ຽນຄວາມເຂົ້າໃຈທົດສອບປະຊາຊົນຂອງພະເຈົ້າ
20, 21. ການປັບປ່ຽນຄວາມເຂົ້າໃຈມີຜົນກະທົບຕໍ່ຄລິດສະຕຽນໃນສະຕະວັດທຳອິດແນວໃດ?
20 ເມື່ອພະເຢໂຫວາໄດ້ປັບປ່ຽນຄວາມເຂົ້າໃຈຂອງເຮົາໃຫ້ຖືກຕ້ອງ ສະພາບຫົວໃຈຂອງເຮົາກໍຖືກທົດສອບ. ເຮົາມີຄວາມເຊື່ອແລະຄວາມຖ່ອມໃຈຫຼາຍພໍບໍທີ່ຈະຍອມຮັບຄວາມເຂົ້າໃຈໃໝ່? ຄລິດສະຕຽນທີ່ມີຊີວິດຢູ່ໃນກາງສະຕະວັດທຳອິດປະສົບກັບການທົດສອບແບບນັ້ນ. ຕົວຢ່າງເຊັ່ນ: ລອງນຶກພາບວ່າເຈົ້າເປັນຊາວຢິວໃນສະໄໝນັ້ນ ເຈົ້ານັບຖືກົດໝາຍຂອງໂມເຊຫຼາຍແລະພູມໃຈທີ່ໄດ້ເກີດເປັນຊາວຢິວ. ແຕ່ຕອນນີ້ເຈົ້າໄດ້ຮັບຈົດໝາຍທີ່ພະເຈົ້າດົນໃຈໃຫ້ອັກຄະສາວົກໂປໂລຂຽນ ເຊິ່ງບອກວ່າພະເຢໂຫວາຍົກເລີກກົດໝາຍຂອງໂມເຊ ແລະພະອົງບໍ່ຍອມຮັບຊາດອິດສະລາແອນໂດຍກຳເນີດອີກຕໍ່ໄປ. ແຕ່ໄດ້ເລີ່ມລວບລວມຊາດຂອງພະອົງຂຶ້ນໃໝ່ເຊິ່ງມີທັງຄົນຢິວແລະຄົນຕ່າງຊາດ. (ໂລມ 10:12; 11:17-24; ຄລາ. 6:15, 16; ໂກໂລ. 2:13, 14) ເຈົ້າຈະຮູ້ສຶກແນວໃດ?
21 ຄລິດສະຕຽນທີ່ຖ່ອມໃຈຍອມຮັບຄຳອະທິບາຍຂອງໂປໂລເຊິ່ງໄດ້ຮັບການດົນໃຈຈາກພະເຈົ້າ ດັ່ງນັ້ນ ພະເຢໂຫວາຈຶ່ງອວຍພອນເຂົາເຈົ້າ. (ກິດ. 13:48) ແຕ່ມີຫຼາຍຄົນບໍ່ພໍໃຈໃນການປັບປ່ຽນຄວາມເຂົ້າໃຈໃໝ່ນີ້ແລະຍັງຍຶດຕິດຢູ່ກັບຄວາມເຂົ້າໃຈຂອງຕົວເອງ. (ຄລາ. 5:7-12) ຖ້າເຂົາເຈົ້າບໍ່ປ່ຽນຄວາມຄິດ ເຂົາເຈົ້າກໍຈະສູນເສຍໂອກາດທີ່ຈະໄດ້ຮ່ວມປົກຄອງກັບພະຄລິດ.—2 ເປ. 2:1
22. ເຈົ້າຮູ້ສຶກແນວໃດເມື່ອພະເຢໂຫວາປັບປ່ຽນຄວາມເຂົ້າໃຈຂອງເຮົາກ່ຽວກັບສິ່ງທີ່ພະອົງຕັ້ງໃຈຈະເຮັດ?
22 ບໍ່ເທົ່າໃດປີທີ່ຜ່ານມາ ພະເຢໂຫວາໄດ້ປັບປ່ຽນຄວາມເຂົ້າໃຈຂອງເຮົາໃນເລື່ອງລາຊະອານາຈັກຂອງພະອົງ ຕົວຢ່າງເຊັ່ນ: ພະອົງຊ່ວຍໃຫ້ເຮົາເຂົ້າໃຈຊັດເຈນຂຶ້ນວ່າຈະມີການແຍກແກະອອກຈາກແບ້ເມື່ອໃດ. ສິ່ງນັ້ນໝາຍເຖິງການແຍກຄົນທີ່ຍອມຢູ່ພາຍໃຕ້ການປົກຄອງຂອງພະເຈົ້າອອກຈາກຄົນທີ່ບໍ່ຍອມຮັບການປົກຄອງຂອງພະອົງ. ນອກຈາກນີ້ ພະເຢໂຫວາຍັງສອນເຮົາໃຫ້ຮູ້ວ່າຈະມີການເລືອກຊົນ 144.000 ຄົນໃຫ້ຄົບຈຳນວນເມື່ອໃດ. ຕົວຢ່າງປຽບທຽບເລື່ອງລາຊະອານາຈັກທີ່ພະເຍຊູເວົ້າເຖິງນັ້ນໝາຍຄວາມວ່າແນວໃດ ແລະຜູ້ຖືກເຈີມຄົນສຸດທ້າຍຈະຂຶ້ນໄປສະຫວັນເມື່ອໃດ. d ເມື່ອພະເຢໂຫວາປັບປ່ຽນຄວາມເຂົ້າໃຈໃໝ່ເຈົ້າຕອບຮັບແນວໃດ? ຄວາມເຊື່ອຂອງເຈົ້າເຂັ້ມແຂງຂຶ້ນບໍ? ເຈົ້າເຫັນບໍວ່າການປັບປ່ຽນຄວາມເຂົ້າໃຈເລື່ອງເຫຼົ່ານີ້ພິສູດວ່າພະເຢໂຫວາສອນປະຊາຊົນທີ່ຖ່ອມໃຈຂອງພະອົງສະເໝີ? ເມື່ອອ່ານບົດຕໍ່ໆໄປ ເຈົ້າກໍຈະໝັ້ນໃຈຫຼາຍຂຶ້ນວ່າ ພະເຢໂຫວາກຳລັງເປີດເຜີຍເທື່ອລະຂັ້ນໃຫ້ຄົນທີ່ຢ້ານຢຳພະອົງໄດ້ຮູ້ສິ່ງທີ່ພະອົງຕັ້ງໃຈຈະເຮັດ.
a ຊື່ຂອງພະເຈົ້າເປັນຄຳກຳມະໃນພາສາເຫບເລີໝາຍຄວາມວ່າ “ຈະເປັນ.” ຊື່ພະເຢໂຫວາໝາຍຄວາມວ່າພະອົງເປັນຜູ້ທີ່ຈະເຮັດໃຫ້ຄຳສັນຍາຕ່າງໆທີ່ພະອົງບອກໄວ້ສຳເລັດ. ເບິ່ງຂອບ “ຊື່ຂອງພະເຈົ້າມີຄວາມໝາຍແນວໃດ?” ໜ້າ 43.
b ເຖິງວ່າໄລຍະເວລານີ້ເບິ່ງຄືດົນນານຫຼາຍໃນສະໄໝປັດຈຸບັນ ແຕ່ຢ່າລືມວ່າມະນຸດເຄີຍມີອາຍຸຍືນຍາວກວ່ານີ້ຫຼາຍ ຕັ້ງແຕ່ອາດາມເຖິງອັບລາຫາມມີພຽງແຕ່ 4 ຊົ່ວອາຍຸເທົ່ານັ້ນ ຊ່ວງຊີວິດຂອງອາດາມຄາບກ່ຽວກັບຊ່ວງຊີວິດຂອງເລເມກເຊິ່ງເປັນພໍ່ຂອງໂນເອ ຊ່ວງຊີວິດຂອງເລເມກຄາບກ່ຽວກັບຊ່ວງຊີວິດຂອງເຊມລູກຊາຍຂອງໂນເອ ແລະຊ່ວງຊີວິດຂອງເຊມກໍຄາບກ່ຽວກັບຊ່ວງຊີວິດຂອງອັບລາຫາມ.—ຕົ້ນ. 5:5, 31; 9:29; 11:10, 11; 25:7
c ຄຳວ່າ: “ຊາຕານ” ທີ່ໃຊ້ເອີ້ນບຸກຄົນໃດໜຶ່ງມີຢູ່ 18 ຄັ້ງໃນພະຄຳພີພາກພາສາເຫບເລີ. ແຕ່ມີການກ່າວເຖິງ “ຊາຕານ” ຫຼາຍກວ່າ 30 ຄັ້ງໃນພະຄຳພີຄລິດສະຕຽນພາກພາສາເກັຣກ. ພະຄຳພີພາກພາສາເຫບເລີບໍ່ຄ່ອຍເວົ້າເຖິງຊາຕານ ແຕ່ເນັ້ນເລື່ອງການລະບຸຕົວເມຊີ. ເມື່ອເມຊີມາແລ້ວ ເພິ່ນກໍເປີດໂປງຊາຕານແລະນີ້ເປັນເລື່ອງຈິງທີ່ບັນທຶກໄວ້ໃນພະຄຳພີຄລິດສະຕຽນພາກພາສາເກັຣກ.
d ສຳລັບຂໍ້ມູນເພີ່ມເຕີມກ່ຽວກັບການປັບປ່ຽນຄວາມເຂົ້າໃຈ ເບິ່ງຫໍສັງເກດການ (ພາສາໄທ) 15 ຕຸລາ 1995 ໜ້າ 23-28; 15 ມັງກອນ 2008 ໜ້າ 20-24; 15 ກໍລະກົດ 2008 ໜ້າ 17-21; 15 ກໍລະກົດ 2013 ໜ້າ 9-14.
