၁၊ ၂။ လူ့မိသားစုနဲ့ပတ်သက်တဲ့ ရည်ရွယ်ချက်တွေကို ယေဟောဝါ ဘယ်လိုဖော်ပြသလဲ။

ဂရုစိုက်တတ်တဲ့မိဘတွေဟာ မိသားစုကိစ္စတွေ ဆွေးနွေးချိန်မှာ သားသမီးတွေကို ပါဝင်ခိုင်းတယ်။ ဒါပေမဲ့ အချက်အလက်အားလုံးကိုတော့ မပြောပြဘူး။ သားသမီးတွေ နားလည်နိုင်သလောက်ကိုပဲ ပညာရှိရှိပြောပြကြတယ်။

^၂ အလားတူ၊ ယေဟောဝါကလည်း လူ့မိသားစုနဲ့ပတ်သက်တဲ့ရည်ရွယ်ချက်တွေကို အဆင့်ဆင့်ဖော်ပြပေးတယ်။ ဒါပေမဲ့ သင့်တော်တဲ့အချိန်ကျမှပဲ ဖော်ပြတယ်။ သမိုင်းတစ်လျှောက် နိုင်ငံတော်နဲ့ပတ်သက်တဲ့အမှန်တရားတွေကို ယေဟောဝါ ဘယ်လိုဖော်ပြခဲ့သလဲဆိုတာ အကျဉ်းချုပ်သုံးသပ်ကြည့်ရအောင်။

၃၊ ၄။ ဧဒင်မှာပုန်ကန်မှု ပေါ်ပေါက်လာဖို့ ယေဟောဝါ ကြိုတင်သတ်မှတ်ခဲ့သလား။ ရှင်းပြပါ။

^၃ တကယ်တော့ ယေဟောဝါရဲ့မူလရည်ရွယ်ချက်မှာ မေရှိယနိုင်ငံတော်မပါဘူး။ ဘာကြောင့်လဲ။ ယေဟောဝါက ဧဒင်မှာ ပုန်ကန်မှုပေါ်ပေါက်လာဖို့ ကြိုတင်မသတ်မှတ်ခဲ့လို့ပဲ။ ကိုယ်တော်က လူသားတွေကို လွတ်လပ်စွာရွေးချယ်ခွင့်ပေးပြီး ဖန်ဆင်းခဲ့တယ်။ လူသားတွေအတွက် မိမိရည်ရွယ်ချက်နဲ့ပတ်သက်ပြီး အာဒံနဲ့ဧဝကို ‘သားသမီးတွေ အများကြီးမွေးကြပါ။ မြေကြီးကိုပြည့်စေပြီး အုပ်ထိန်းကြပါ’ လို့ပြောခဲ့တယ်။ (က. ၁:၂၈၊ ကဘ) ယေဟောဝါက အကောင်းအဆိုးနဲ့ပတ်သက်တဲ့ မိမိရဲ့စံနှုန်းကိုလည်း လေးစားဖို့ သူတို့ကိုတောင်းဆိုတယ်။ (က. ၂:၁၆၊ ၁၇) အာဒံနဲ့ဧဝဟာ ဘုရားသခင်ကို သစ္စာစောင့်သိဖို့ ရွေးချယ်နိုင်တယ်။ သူတို့နဲ့ သူတို့သားမြေးတွေသာ အဲဒီလိုရွေးချယ်ခဲ့မယ်ဆိုရင် ဘုရားသခင့်ရည်ရွယ်ချက်ပြည့်စုံဖို့ ခရစ်တော်အုပ်ချုပ်တဲ့နိုင်ငံတော် လိုအပ်မှာမဟုတ်ဘူး။ အခုအချိန်ဆိုရင် ကမ္ဘာကြီးဟာ ယေဟောဝါကိုဝတ်ပြုတဲ့ ပြည့်ဝစုံလင်တဲ့လူသားတွေနဲ့ ပြည့်နေမှာပဲ။

^၄ မြေကြီးကို ပြည့်ဝစုံလင်တဲ့လူသားတွေနဲ့ ပြည့်စေမယ်ဆိုတဲ့ ယေဟောဝါရဲ့ရည်ရွယ်ချက်ဟာ အာဒံ၊ ဧဝနဲ့ စာတန်တို့ကြောင့် ပျက်မသွားပါဘူး။ အဲဒီအစား ရည်ရွယ်ချက်ပြည့်စုံစေဖို့ ယေဟောဝါက သူ့နည်းလမ်းကို ပြောင်းလဲလိုက်တယ်။ ယေဟောဝါရဲ့ရည်ရွယ်ချက်က လိုရာခရီးရောက်ဖို့ လမ်းကြောင်းတစ်ခုတည်းမှာပဲသွားရတဲ့ ရထားတစ်စီးလို မဟုတ်ဘူး။ အဲဒီရထားက အကြောင်းတစ်ခုခုကြောင့် လမ်းချော်သွားနိုင်တယ်။ ယေဟောဝါကတော့ သူ့ရည်ရွယ်ချက်ကို ပြောလိုက်ပြီဆိုတာနဲ့ စကြဝဠာမှာ ဘယ်အရာကမှ အဲဒီရည်ရွယ်ချက်မပြည့်စုံအောင် မတားဆီးနိုင်ဘူး။ (ဟေရှာယ ၅၅:၁၁ ကိုဖတ်ပါ။) ရည်ရွယ်ချက်ပြည့်စုံစေမယ့်လမ်းကြောင်းပေါ်မှာ အတားအဆီးတစ်ခုရှိပြီဆိုရင် ယေဟောဝါက နောက်လမ်းကြောင်းကို သုံးတယ်။ * (ထွ. ၃:၁၄၊ ၁၅) ပြီးတော့ မိမိရည်ရွယ်ချက်ပြည့်စုံစေဖို့  အသုံးပြုမယ့်နည်းလမ်းအသစ်ကို သင့်တော်တဲ့အချိန်မှာ သစ္စာရှိကျေးကျွန်တွေကို အသိပေးတယ်။

၅။ ဧဒင်မှာပေါ်ပေါက်ခဲ့တဲ့ ပုန်ကန်မှုကို ယေဟောဝါ ဘယ်လိုတုံ့ပြန်သလဲ။

^၅ ဧဒင်မှာပုန်ကန်မှုပေါ်လာတဲ့အတွက် ယေဟောဝါရဲ့ရည်ရွယ်ချက်ထဲမှာ နိုင်ငံတော်တည်ထောင်ဖို့ဆိုတဲ့အစီအစဉ် ပါလာတယ်။ (မ. ၂၅:၃၄) လူသားထုအတွက် မျှော်လင့်ချက်မဲ့သလိုဖြစ်နေချိန်မှာ ယေဟောဝါက နိုင်ငံတော်အကြောင်း စတင်ဖော်ပြပေးတယ်။ အာဏာလုတဲ့စာတန်ကြောင့် ဖြစ်ပေါ်ခဲ့တဲ့ ထိခိုက်နစ်နာမှုတွေကို ပြန်ပြုပြင်ပေးနိုင်အောင်၊ လူသားတွေ နဂိုအခြေအနေပြန်ရောက်အောင် အဲဒီနိုင်ငံတော်ကို ကိုယ်တော်အသုံးပြုပါလိမ့်မယ်။ (က. ၃:၁၄-၁၉) ဒါပေမဲ့ ယေဟောဝါက နိုင်ငံတော်နဲ့ပတ်သက်တဲ့အချက်အလက်အားလုံးကို တစ်ကြိမ်တည်းအပြီး မဖော်ပြခဲ့ဘူး။

၆။ ယေဟောဝါ ဘာကတိပေးခဲ့သလဲ။ ဘာကိုတော့ မဖော်ပြခဲ့ဘူးလဲ။

^၆ ဦးဆုံးပရောဖက်ပြုချက်မှာ ‘မျိုးနွယ်’ က မြွေရဲ့ခေါင်းကို ကြိတ်မယ်လို့ ယေဟောဝါကတိပြုခဲ့တယ်။ (ကမ္ဘာဦး ၃:၁၅ ကိုဖတ်ပါ။) ဒါပေမဲ့ အဲဒီမျိုးနွယ်နဲ့ မြွေရဲ့မျိုးနွယ် ဘယ်သူဘယ်ဝါဖြစ်မှန်းကိုတော့ အဲဒီအချိန်မှာ မဖော်ပြခဲ့ဘူး။ နောက်နှစ်ပေါင်း ၂,၀၀၀ နီးပါးအထိ အဲဒီလိုအချက်အလက်တွေကို ယေဟောဝါ ထပ်မဖော်ပြတော့ဘူး။ *

၇။ အာဗြဟံက ဘာလို့ရွေးချယ်ခံရတာလဲ။ အဲဒီကနေ ဘယ်အရေးကြီးတဲ့ သင်ခန်းစာ ရရှိသလဲ။

^၇ နောက်ဆုံးမှာ ယေဟောဝါက အာဗြဟံကို ရွေးချယ်လိုက်တယ်။ သူကတစ်ဆင့် ကတိထားရာမျိုးနွယ် ဆင်းသက်လာမှာဖြစ်တယ်။ အာဗြဟံက ‘ယေဟောဝါစကားကို နားထောင်တဲ့အတွက်’ ရွေးချယ်ခံရတာ။ (က. ၂၂:၁၈၊ ကဘ) ဒီအချက်ကနေ အရေးကြီးတဲ့သင်ခန်းစာတစ်ခုကို ကျွန်တော်တို့ရရှိတယ်။ ယေဟောဝါက သူ့ကို ကြောက်ရွံ့ရိုသေသူတွေကိုပဲ ရည်ရွယ်တော်မူချက်တွေကို ဖော်ပြပေးတယ်ဆိုတာပဲ။—ဆာလံ ၂၅:၁၄ ကိုဖတ်ပါ။

၈၊ ၉။ ကတိထားရာမျိုးနွယ်နဲ့ဆိုင်တဲ့ ဘယ်အချက်တွေကို အာဗြဟံနဲ့ယာကုပ်ကို ယေဟောဝါ ဖော်ပြခဲ့သလဲ။

^၈ ယေဟောဝါက မိတ်ဆွေအာဗြဟံကို ကောင်းကင်တမန်ကတစ်ဆင့် စကားပြောချိန်မှာ ကတိထားရာမျိုးနွယ်နဲ့ဆိုင်တဲ့ အရေးကြီးတဲ့အချက်ကို ဦးဆုံးဖော်ပြခဲ့တယ်။ မျိုးနွယ်က လူသားတစ်ဦးဖြစ်မယ်ဆိုတဲ့အချက်ပဲ။ (က. ၂၂:၁၅-၁၇; ယာ. ၂:၂၃) ဒါပေမဲ့ အဲဒီလူသားက မြွေရဲ့ခေါင်းကို ဘယ်လိုကြိတ်မှာလဲ။ မြွေက ဘယ်သူလဲ။ နောက်ပိုင်းဖော်ပြချက်တွေက ဒီမေးခွန်းတွေကို အလင်းဖြာပေးပါလိမ့်မယ်။

^၉ အာဗြဟံရဲ့မြေး၊ ဘုရားသခင်အပေါ် ကြီးမားတဲ့ယုံကြည်ခြင်းတင်ပြခဲ့သူ ယာကုပ်ကနေ ကတိထားရာမျိုးနွယ် ဆင်းသက်လာစေဖို့ ယေဟောဝါ ဆုံးဖြတ်တယ်။ (က. ၂၈:၁၃-၂၂) ကတိထားရာမျိုးနွယ်ဟာ ယာကုပ်ရဲ့သား ယုဒကနေ ဆင်းသက်လာမယ်လို့ ယာကုပ်အားဖြင့် ယေဟောဝါဖော်ပြခဲ့တယ်။ ယုဒကနေ ဆင်းသက်လာမယ့်သူဟာ ဘုရင့်အခွင့်အာဏာကိုတင်စားတဲ့ “ရာဇလှံတံ” ရရှိပြီး သူ့ကို ‘လူတွေနာခံကြလိမ့်မယ်’ လို့ ယာကုပ် ပရောဖက်ပြုခဲ့တယ်။ (က. ၄၉:၁၊ ၁၀၊ ကဘ) ဒီနည်းနဲ့ ကတိထားရာမျိုးနွယ်ဟာ ဘုရင်တစ်ပါးဖြစ်မယ်ဆိုပြီး ယေဟောဝါ ဖော်ပြခဲ့တယ်။

၁၀၊ ၁၁။ ယေဟောဝါက သူ့ရည်ရွယ်ချက်ကို ဒါဝိဒ်နဲ့ဒံယေလကို ဘာကြောင့်ဖော်ပြခဲ့သလဲ။

^၁၀ ယုဒအချိန်ကနေ နှစ်ပေါင်း ၆၅၀ နီးပါးကြာပြီးနောက် ယေဟောဝါက သူ့ရည်ရွယ်ချက်နဲ့ပတ်သက်တဲ့ ထပ်ဆင့်အချက်အလက်တွေကို ယုဒရဲ့မျိုးနွယ်ဖြစ်သူ ဘုရင်ဒါဝိဒ်ကို ဖော်ပြတယ်။ ဒါဝိဒ်ဟာ ‘မိမိနဲ့စိတ်သဘောထားချင်း ကိုက်ညီသူ’ ဖြစ်တယ်လို့ ယေဟောဝါပြောတယ်။ (၁ ရာ. ၁၃:၁၄၊ ကဘ; ၁၇:၁၂; တ. ၁၃:၂၂)  ဒါဝိဒ်ဟာ ယေဟောဝါကို ကြောက်ရွံ့ရိုသေတဲ့အတွက် ကိုယ်တော်က သူနဲ့ပဋိညာဉ်ဖွဲ့ပြီး သူ့သားမြေးတစ်ယောက်က ထာဝစဉ်အုပ်ချုပ်မယ်လို့ ကတိပြုခဲ့တယ်။—၂ ရာ. ၇:၈၊ ၁၂-၁၆။

^၁၁ အနှစ် ၅၀၀ ကြာပြီးနောက် ယေဟောဝါက ပရောဖက်ဒံယေလကို အသုံးပြုပြီး ဘိသိက်ပေးခံရသူ မေရှိယပေါ်ထွန်းလာမယ့်ခုနှစ် အတိအကျကိုဖော်ပြတယ်။ (ဒံ. ၉:၂၅) ယေဟောဝါက မိမိရည်ရွယ်ချက်ကို ဒံယေလကို ဘာကြောင့်ဖော်ပြတာလဲ။ ဒံယေလဟာ ယေဟောဝါကို အလွန်ရိုသေလေးစားပြီး အမြဲသစ္စာရှိရှိဝတ်ပြုတာကြောင့် ‘သိပ်ကိုအထင်ကြီးလေးစားစရာကောင်းသူ’ အဖြစ် ကိုယ်တော်ယူမှတ်လို့ပဲ။—ဒံ. ၆:၁၆; ၉:၂၂၊ ၂၃၊ ကဘ။

၁၂။ ဒံယေလကို ဘာလုပ်ဖို့ပြောခဲ့သလဲ။ ဘာကြောင့်လဲ။

^၁၂ ယေဟောဝါက ဒံယေလလိုမျိုး သစ္စာရှိပရောဖက်တွေကို အသုံးပြုပြီး ကတိထားရာမျိုးနွယ် မေရှိယနဲ့ပတ်သက်တဲ့ အချက်အလက်များစွာကို ရေးသားစေခဲ့တယ်။ ဒါပေမဲ့ ဒီရေးသားချက်တွေရဲ့ အဓိပ္ပာယ်အပြည့်အဝကို မိမိကျေးကျွန်တွေနားလည်နိုင်ဖို့ ယေဟောဝါသတ်မှတ်ထားတဲ့အချိန် မရောက်သေးဘူး။ ဥပမာ၊ ဒံယေလကို ဘုရားသခင့်နိုင်ငံတော် တည်ထောင်ခြင်းနဲ့ပတ်သက်တဲ့ ရူပါရုံတစ်ခုပေးပြီးနောက် အဲဒီပရောဖက်ပြုချက်ကို ယေဟောဝါ သတ်မှတ်ထားချိန်အထိ တံဆိပ်ခတ်ထားပါလို့ ပြောခဲ့တယ်။ သတ်မှတ်ထားတဲ့ အဲဒီအနာဂတ်အချိန်မှာ စစ်မှန်တဲ့အသိပညာ ‘တိုးများလာလိမ့်မယ်။’—ဒံ. ၁၂:၄၊ ကဘ။

၁၃။ (က) ကတိထားရာမျိုးနွယ်က ဘယ်သူလဲ။ (ခ) ကမ္ဘာဦး ၃:၁၅ မှာပါတဲ့ ပရောဖက်ပြုချက်အပေါ် ယေရှု ဘယ်လိုအလင်းဖြာပေးသလဲ။

^၁၃ ယေရှုဟာ ကတိထားရာမျိုးနွယ်၊ ဒါဝိဒ်ရဲ့မျိုးနွယ်ဖြစ်ပြီး ဘုရင်အဖြစ်စိုးစံမယ်ဆိုတာ ယေဟောဝါ ရှင်းရှင်းလင်းလင်းဖော်ပြတယ်။ (လု. ၁:၃၀-၃၃; ၃:၂၁၊ ၂၂) ယေရှုရဲ့အမှုဆောင်လုပ်ငန်း စတင်တဲ့အခါ ဘုရားသခင့်ရည်ရွယ်ချက်အကြောင်း လူတွေရဲ့သိနားလည်မှုအပေါ် နေရောင်ခြည်အလင်း ဖြာကျလာသလိုပါပဲ။ (မ. ၄:၁၃-၁၇) ဥပမာ၊ ယေရှုက မာရ်နတ်ကို “လူ့အသက်ကိုသတ်သောသူ၊” “မုသာ၏အဖ” လို့ခေါ်ခြင်းအားဖြင့် ကမ္ဘာဦး ၃:၁၄၊ ၁၅ မှာပါတဲ့ “မြွေ” ဟာ ဘယ်သူဘယ်ဝါဖြစ်မှန်း ရှင်းရှင်းလင်းလင်း ဖော်ထုတ်ခဲ့တယ်။ (ယော. ၈:၄၄) ယောဟန်ကိုပေးတဲ့ရူပါရုံမှာ “မူလမြွေ” ဟာ “မာရ်နတ် စာတန်” ဖြစ်ကြောင်း ယေရှုဖော်ပြခဲ့တယ်။ * (ဗျာဒိတ် ၁:၁; ၁၂:၉ ကိုဖတ်ပါ။) အဲဒီစိတ်အာရုံမှာပဲ ယေရှုက ကတိထားရာမျိုးနွယ်ဖြစ်တဲ့ မိမိဟာ ဧဒင်မှာပေးတဲ့ပရောဖက်ပြုချက်ကို နောက်ဆုံးဘယ်လိုပြည့်စုံစေမယ်၊ စာတန်ကို ဘယ်လိုဖယ်ရှားမယ်ဆိုတာ ဖော်ပြခဲ့တယ်။—ဗျာ. ၂၀:၇-၁၀။

၁၄–၁၆။ ပထမရာစုတပည့်တွေဟာ ယေရှုဖော်ပြခဲ့တဲ့ အမှန်တရားရဲ့အဓိပ္ပာယ်အပြည့်အဝကို အမြဲနားလည် ခဲ့ကြသလား။ ရှင်းပြပါ။

^၁၄ ဒီစာအုပ်ရဲ့အခန်း ၁ မှာ တွေ့ရတဲ့အတိုင်း ယေရှုဟာ နိုင်ငံတော်အကြောင်း များစွာပြောဆိုခဲ့တယ်။ ဒါပေမဲ့ တပည့်တွေသိချင်တဲ့ အချက်အလက်အားလုံးကို အမြဲမပြောပြခဲ့ဘူး။ အသေးစိတ်အချက်အလက်တွေကို ပြောပြတဲ့အခါမှာတောင် သူတို့ချက်ချင်းနားမလည်ခဲ့ဘူး။ ခရစ်တော်ရဲ့နောက်လိုက်တွေဟာ သူတို့သခင်ဖော်ပြခဲ့တဲ့ အမှန်တရားရဲ့အဓိပ္ပာယ်အပြည့်အဝကို နောက်ပိုင်းမှ၊ တစ်ခါတလေ ရာစုနှစ်များစွာကြာပြီးမှ သိလာကြတယ်။ သာဓကတချို့ကို သုံးသပ်ကြည့်ပါ။

^၁၅ အေဒီ ၃၃ မှာ ယေရှုက ဘုရားသခင့်နိုင်ငံတော်ဘုရင်ကို ကူညီပေးမယ့် တွဲဖက်အုပ်ချုပ်သူတွေကို မြေကြီးကနေရွေးချယ်ပြီး ကောင်းကင်မှာ နာမ်ဝိညာဉ်အသက်တာပေးမယ်ဆိုတာ ရှင်းရှင်းလင်းလင်းဖော်ပြခဲ့တယ်။ ဒါပေမဲ့ အဲဒီအချက်ကို  တပည့်တွေ ချက်ချင်းနားမလည်ခဲ့ဘူး။ (ဒံ. ၇:၁၈; ယော. ၁၄:၂-၅) အဲဒီနှစ်မှာပဲ၊ ယေရှုက သူကောင်းကင်တက်ပြီး အချိန်အတော်ကြာအထိ နိုင်ငံတော်တည်ထောင်မှာမဟုတ်ကြောင်းကို ပုံဥပမာတွေနဲ့ဖော်ပြခဲ့တယ်။ (မ. ၂၅:၁၄၊ ၁၉; လု. ၁၉:၁၁၊ ၁၂) ဒီအရေးကြီးတဲ့အချက်ကို တပည့်တွေ နားမလည်ကြဘူး။ ဒါကြောင့် ရှင်ပြန်ထမြောက်ပြီးဖြစ်တဲ့ယေရှုကို “ကိုယ်တော်သည် အစ္စရေးလူမျိုးအတွက် နိုင်ငံကို ယခု ပြန်တည်ထောင်ပေးမည်လော” ဆိုပြီးမေးခဲ့ကြတယ်။ ဒါပေမဲ့ အဲဒီအချိန်မှာ ထပ်ဆင့်အချက်အလက်တွေကို ယေရှု မဖော်ပြပေးခဲ့ဘူး။ (တ. ၁:၆၊ ၇) မိမိနဲ့တွဲဖက်အုပ်ချုပ်သူ “သိုးစုငယ်” အဝင်မဟုတ်တဲ့ “အခြားသိုး” ရှိမယ်လို့လည်း ယေရှုပြောခဲ့တယ်။ (ယော. ၁၀:၁၆; လု. ၁၂:၃၂) အဲဒီအုပ်စုနှစ်စုဟာ ဘယ်သူဘယ်ဝါဖြစ်ကြောင်းကို ၁၉၁၄ မှာ နိုင်ငံတော်တည်ထောင်ပြီးနောက်ပိုင်းအထိ ခရစ်တော်ရဲ့နောက်လိုက်တွေ ကောင်းကောင်းနားမလည်ခဲ့ဘူး။

^၁၆ ယေရှုက မြေကြီးပေါ်မှာ တပည့်တွေနဲ့အတူရှိနေစဉ် အကြောင်းအရာများစွာကို ပြောပြနိုင်ပေမဲ့ တပည့်တွေ မခံယူနိုင်မှန်းသိတယ်။ (ယော. ၁၆:၁၂) ပထမရာစုမှာ နိုင်ငံတော်နဲ့ပတ်သက်တဲ့အသိပညာ အများကြီးဖော်ပြခဲ့တာ မှန်ပါတယ်။ ဒါပေမဲ့ အဲဒီအသိပညာ တိုးများလာမယ့်အချိန် မရောက်သေးဘူး။

၁၇။ နိုင်ငံတော်နဲ့ပတ်သက်တဲ့အမှန်တရားကို နားလည်ဖို့ ကျွန်တော်တို့ဘာလုပ်ရမလဲ။ ဒါပေမဲ့ ဘာလည်း လိုအပ်သလဲ။

^၁၇ ‘အဆုံးပိုင်းကာလ’ အတွင်း လူအများကြီးက ‘စူးစမ်းရှာဖွေလိမ့်မယ်၊’ ဘုရားသခင့်ရည်ရွယ်ချက်နဲ့ဆိုင်တဲ့ ‘စစ်မှန်တဲ့အသိပညာ’ တိုးများလာလိမ့်မယ်လို့ ဒံယေလကို ယေဟောဝါကတိပြုခဲ့တယ်။ (ဒံ. ၁၂:၄၊ ကဘ) အဲဒီအသိပညာကို လိုချင်တဲ့သူတွေက ကျမ်းစာကို ကြိုးစားအားထုတ်ပြီး လေ့လာရမယ်။ ဒါပေမဲ့ ကျွန်တော်တို့ ဘယ်လောက်ပဲကြိုးစားကြိုးစား ယေဟောဝါရဲ့အကူအညီမပါဘဲ နိုင်ငံတော်နဲ့ပတ်သက်တဲ့အမှန်တရားတွေအကြောင်း မှန်မှန်ကန်ကန် နားလည်နိုင်မှာမဟုတ်ဘူး။—မဿဲ ၁၃:၁၁ ကိုဖတ်ပါ။

၁၈။ ယေဟောဝါကိုကြောက်ရွံ့သူတွေဟာ ယုံကြည်ခြင်းနဲ့နှိမ့်ချမှု ဘယ်လို တင်ပြခဲ့သလဲ။

^၁၈ ယေဟောဝါက နိုင်ငံတော်နဲ့ပတ်သက်တဲ့ အမှန်တရားတွေကို ၁၉၁၄ မတိုင်ခင် နှစ်တွေတစ်လျှောက် အဆင့်ဆင့်ဖော်ပြလာခဲ့သလို အဆုံးပိုင်းကာလမှာလည်း ဆက်ဖော်ပြပေးနေတယ်။ လွန်ခဲ့တဲ့နှစ် ၁၀၀ ကျော်အတွင်း ဘုရားသခင့်လူမျိုး တွေက အကြောင်းအရာတော်တော်များများနဲ့ပတ်သက်တဲ့ နားလည်မှုကို ပြုပြင်ပြောင်းလဲခဲ့ရမှန်း ဒီစာအုပ်ရဲ့ အခန်း ၄၊ ၅ မှာ တွေ့ရမယ်။ ဒါက ယေဟောဝါရဲ့ကျောထောက်နောက်ခံမှု မရှိဘူးဆိုတဲ့သဘောလား။ မဟုတ်ပါဘူး။ တကယ်တော့ ကိုယ်တော် သူတို့ကိုထောက်မပေးနေတယ်။ ဘာကြောင့်လဲ။ ယေဟောဝါကိုကြောက်ရွံ့သူတွေက ယုံကြည်ခြင်းနဲ့နှိမ့်ချမှုဆိုတဲ့ ကိုယ်တော်နှစ်သက်တဲ့ အရည်အသွေးနှစ်ခုကို တင်ပြလို့ပဲ။ (ဟေဗြဲ ၁၁:၆; ယာ. ၄:၆) ကျမ်းစာမှာပါတဲ့ ကတိတော်အားလုံးပြည့်စုံလာမယ်ဆိုတာ ယေဟောဝါရဲ့ကျေးကျွန်တွေ ယုံကြည်ကြတယ်။ အဲဒီကတိတော်တွေ ဘယ်လိုပြည့်စုံမယ်ဆိုတာနဲ့ပတ်သက်ပြီး သူတို့ရဲ့နားလည်မှု လုံးဝလွဲမှားသွားတယ်ဆိုတာ နှိမ့်ချစွာဝန်ခံကြတယ်။ အဲဒီလိုနှိမ့်ချတဲ့သဘောထားကို ၁၉၂၅ ခုနှစ်၊ မတ် ၁ ရက်ထုတ် ကင်းမျှော်စင်မှာ အခုလိုဖော်ပြတယ်– “သခင်က သူ့စကားတွေကို သူကိုယ်တိုင်အနက်ဖွင့်တယ်ဆိုတာ ကျွန်တော်တို့သိကြတယ်။ ဒါကြောင့် သူသတ်မှတ်ထားတဲ့အချိန်မှာ သူ့နည်းသူ့ဟန်နဲ့ လူမျိုးတော်ကို အနက်ဖွင့်ပြပါလိမ့်မယ်။”

၁၉။ အခု ယေဟောဝါက ကျွန်တော်တို့ကို ဘာအကြောင်း နားလည်စေသလဲ။ ဘာကြောင့်လဲ။

^၁၉ နိုင်ငံတော်တည်ထောင်တဲ့ ၁၉၁၄ ခုနှစ်မှာ ဘုရားသခင့်လူမျိုးတွေက နိုင်ငံတော်နဲ့ပတ်သက်တဲ့ ပရောဖက်ပြုချက်တွေ ဘယ်လိုပြည့်စုံလာမယ်ဆိုတာ အနည်းအကျဉ်းပဲသိခဲ့တယ်။ (၁ ကော. ၁၃:၉၊ ၁၀၊ ၁၂) ဘုရားသခင့်ကတိတွေ ပြည့်စုံတာကို မြင်ချင်လွန်းလို့ တလွဲကောက်ချက်ချမိတဲ့အခါတွေလည်း ရှိပါတယ်။ ရှေ့အပိုဒ်မှာပါတဲ့ ကင်းမျှော်စင်က အခုလိုပြောတယ်– “ပရောဖက်ပြုချက်တစ်ခု မပြည့်စုံမချင်း ဒါမှမဟုတ် ပြည့်စုံမယ့်လမ်းကြောင်းပေါ် မရောက်မချင်း အဲဒါကို ကျွန်တော်တို့နားလည်နိုင်မှာ မဟုတ်ဘူး။ ဒီအချက်ကိုလက်ခံတာက အကောင်းဆုံးဖြစ်ပုံပါပဲ။” နှစ်တွေတစ်လျှောက် အဲဒီပညာရှိစကားတွေမှန်ကြောင်း ထင်ရှားလာတယ်။ အခု ကျွန်တော်တို့ဟာ နောက်ဆုံးကာလရဲ့ အဆုံးစွန်ပိုင်းကို ရောက်နေပြီ။ နိုင်ငံတော်နဲ့ဆိုင်တဲ့ပရောဖက်ပြုချက်များစွာ ပြည့်စုံခဲ့ပြီ။ ပြည့်စုံနေဆဲပရောဖက်ပြုချက်တွေလည်းရှိတယ်။ ဘုရားသခင့်လူမျိုးတွေက နှိမ့်ချမှုရှိပြီး ပြုပြင်တည့်မတ်ပေးတာကို လိုလိုလားလားလက်ခံတဲ့အတွက် ယေဟောဝါက ရည်ရွယ်တော်မူချက်တွေအကြောင်း ကျွန်တော်တို့ကို ပိုပြီးအပြည့်အဝနားလည်စေတယ်။ စစ်မှန်တဲ့အသိပညာ တကယ်ပဲ တိုးများလာနေပါပြီ။

၂၀၊ ၂၁။ နားလည်မှုပိုင်းဆိုင်ရာ ပြုပြင်ပြောင်းလဲမှုတွေက ပထမရာစုခရစ်ယာန်တွေအပေါ် ဘယ်လိုသက်ရောက်မှုရှိခဲ့သလဲ။

^၂၀ အမှန်တရားဆိုင်ရာ သိနားလည်မှုကို ယေဟောဝါ ပြုပြင်မွမ်းမံပေးတဲ့အခါ ကျွန်တော်တို့ရဲ့သဘောထား စမ်းသပ်ခံရတယ်။ အပြောင်းအလဲတွေကိုလက်ခံဖို့ ကျွန်တော်တို့မှာ ယုံကြည်ခြင်းနဲ့နှိမ့်ချမှုရှိသလား။ ပထမရာစုအလယ်ပိုင်းမှာ အသက်ရှင်ခဲ့တဲ့ ခရစ်ယာန်တွေလည်း အလားတူစမ်းသပ်ခံခဲ့ရတယ်။ ဥပမာအနေနဲ့၊ သင်ဟာ အဲဒီအချိန်က ဂျူးခရစ်ယာန်တစ်ယောက်ဖြစ်တယ် ဆိုပါစို့။ သင်က မောရှေပညတ်ကို သိပ်လေးစားပြီး ဂျူးလူမျိုးတစ်ယောက်ဖြစ်ရတာကိုလည်း ဂုဏ်ယူတယ်။ အခု စွမ်းအားတော်နဲ့ရေးသားတဲ့ တမန်တော်ပေါလုရဲ့စာတွေ ရောက်လာတယ်။ စာထဲမှာ ပညတ်တရားကို စောင့်ထိန်းဖို့မလိုတော့ကြောင်း၊ ဇာတိအစ္စရေးလူမျိုးကို ယေဟောဝါငြင်းပယ်လိုက်ပြီဖြစ်ကြောင်း၊ အဲဒီအစား ဂျူးတွေရော လူမျိုးခြားတွေပါ ပါဝင်တဲ့ ပုံဆောင်အစ္စရေးလူမျိုးကို စုသိမ်းနေပြီဖြစ်ကြောင်း ရေးသားထားတယ်။ (ရော. ၁၀:၁၂; ၁၁:၁၇-၂၄; ဂလ. ၆:၁၅၊ ၁၆; ကော. ၂:၁၃၊ ၁၄) ဒီတော့ သင် ဘယ်လိုတုံ့ပြန်မလဲ။

^၂၁ နှိမ့်ချတဲ့ခရစ်ယာန်တွေက ပေါလုရဲ့ရှင်းပြချက်ကို လက်ခံခဲ့ကြလို့ သူတို့ကို ယေဟောဝါ ကောင်းချီးပေးခဲ့တယ်။ (တ. ၁၃:၄၈) တချို့ကတော့ ပြုပြင်ပြောင်းလဲမှုတွေကို လက်မခံဘဲ ကိုယ်သိထားတာတွေကို ဖက်တွယ်ထားချင်ကြတယ်။ (ဂလ. ၅:၇-၁၂) သူတို့ရဲ့အမြင်ကို မပြောင်းလဲဘူးဆိုရင် ခရစ်တော်နဲ့အတူ တွဲဖက်အုပ်ချုပ်ရမယ့် အခွင့်ထူးကို လက်လွှတ်ဆုံးရှုံးရမှာပဲ။—၂ ပေ. ၂:၁။

၂၂။ ဘုရားသခင့်ရည်ရွယ်ချက်အကြောင်း ပိုနားလည်စေတဲ့ ရှင်းပြချက်တွေကို သင် ဘယ်လိုသဘောထားသလဲ။

^၂၂ မကြာသေးခင် ဆယ်စုနှစ်တွေမှာ ယေဟောဝါက နိုင်ငံတော်နဲ့ပတ်သက်တဲ့ ကျွန်တော်တို့ရဲ့နားလည်မှုကို ပြုပြင်မွမ်းမံပေးခဲ့တယ်။ ဥပမာ၊ သိုးနဲ့ဆိတ်ကို ခွဲခြားသလို နိုင်ငံတော်ရဲ့လက်အောက်ခံဖြစ်မယ့်သူတွေနဲ့ သတင်းကောင်းမတုံ့ပြန်သူတွေကို ဘယ်အချိန်မှာခွဲခြားမယ်ဆိုတာ ပိုရှင်းရှင်းလင်းလင်း ဖော်ပြပေးတယ်။ ဘယ်အချိန်မှာ ၁၄၄,၀၀၀ အရေအတွက်ပြည့်သွားမယ်၊ ယေရှုပြောတဲ့ နိုင်ငံတော်ပုံဥပမာတွေက ဘာကိုဆိုလိုတယ်၊ ဘိသိက်ခံအားလုံး ဘယ်အချိန်မှာ ကောင်းကင်အသက်တာရရှိမယ်ဆိုတာကိုလည်း ရှင်းပြပေးတယ်။ * အဲဒီရှင်းပြချက်တွေကို သင် ဘယ်လိုတုံ့ပြန်သလဲ။ သင့်ယုံကြည်ခြင်း ပိုခိုင်ခံ့လာသလား။ ယေဟောဝါက နှိမ့်ချတဲ့ကျေးကျွန်တွေကို ဆက်ပြီးသွန်သင်ပေးနေတယ်ဆိုတဲ့ အထောက်အထားအဖြစ် အဲဒါတွေကို သင်ရှုမြင်သလား။ နောက်လေ့လာမယ့်အကြောင်းအရာက ယေဟောဝါဟာ သူ့ကိုကြောက်ရွံ့သူတွေကို ရည်ရွယ်တော်မူချက်တွေ အဆင့်ဆင့်ဖော်ပြပေးတယ်ဆိုတာ ပိုယုံကြည်စိတ်ချစေပါလိမ့်မယ်။