1, 2. Con Jehova a revela su proposito pa humanidad?

 MAYORNAN amoroso ta laga nan yiunan participa den combersacionnan tocante asunto di famia. Pero nan ta tene cuidou si cuanto informacion nan ta comparti cu nan yiunan. Nan ta revela solamente e detayenan cu nan ta kere cu nan yiunan ta suficiente madura pa compronde.

² Asina tambe, Jehova a revela su proposito pa humanidad gradualmente. Pero el a haci esey solamente ora cu e tabata sa cu ta e tempo oportuno pa haci esey. Laga nos considera brevemente con Jehova a revela berdadnan tocante e Reino a traves di historia.

3, 4. Jehova a predestina e rumbo di historia humano? Splica.

³ Originalmente, e Reino Mesianico no tabata parti di e proposito di Jehova. Dicon no? Pasobra Jehova no a predestina e rumbo di historia humano, esta, cu hende lo lanta contra su autoridad. Mas bien, el a crea hende cu boluntad liber y a bisa Adam cu Eva kico tabata su proposito pa humanidad. El a bisa nan: “Sea fructifero y multiplica, y yena e Tera y haci esaki somete na bo.” (Gen. 1:28) Tambe Jehova tabata kier pa nan respeta su normanan encuanto loke ta bon y loke ta malo. (Gen. 2:16, 17) Adam cu Eva por a scoge pa keda leal na dje. Si nan y nan descendientenan a haci esey, nos lo no tabatin mester di e Reino encabesa pa Cristo pa cumpli cu e proposito di Dios. Aworaki, mundo lo tabata yen yen di hende perfecto cu ta sirbi Jehova.

⁴ E rebelion di Satanas y Adam cu Eva no a stroba Jehova di cumpli cu su proposito di yena e Tera cu un famia humano perfecto. Jehova simplemente a adapta su manera di cumpli cu e proposito ey. Unabes Jehova declara su proposito, no tin ningun forsa den universo cu por stroba esey di cumpli. Por ehempel, su proposito no ta manera un auto cu no por yega su destinacion pasobra un hende a pone un troncon den caminda. (Lesa Isaias 55:11.) No ta un problema pa Jehova si  tin un obstaculo den caminda, e ta gewoon uza un otro ruta. a (Exo. 3:14, 15) Anto ora e haya cu ta e tempo oportuno, e ta informa su sirbidornan leal di e medio nobo cu lo e uza pa logra su proposito.

5. Kico Jehova a dicidi di haci ora e rebelion den Eden a tuma luga?

⁵ Ora e rebelion den Eden a tuma luga, Jehova a dicidi di establece un Reino. (Mat. 25:34) Na e momento ey den historia ora cu cos tabata pinta scur, Jehova a cuminsa revela e medio cu e lo uza pa laga humanidad haya bek loke e prome homber a perde y pa drecha e daño cu Satanas a causa den su esfuerso envano pa haya poder. (Gen. 3:14-19) Pero asina mes, Jehova no a revela tur detaye tocante e Reino den un solo shot.

6. Kico Jehova a priminti, pero kico e no a revela?

⁶ Den e prome profecia di Bijbel, Jehova a priminti cu un cierto “simia” lo destrui e colebra. b (Lesa Genesis 3:15.) Pero e tempo ey, Dios no a revela e identidad di e simia ey ni di e simia di e colebra. En realidad, durante e 2.000 añanan cu a sigui, Jehova no a revela nada mas tocante e asunto. c

7. Dicon Dios a scoge Abraham, y ki les importante nos ta siña for di esey?

⁷ Cu tempo, Jehova a scoge Abraham como esun mediante ken e simia, of descendiente, priminti lo a bin. Jehova a scoge Abraham pasobra el “a obedece [Jehova su] bos.” (Gen. 22:18) Esaki ta siña nos un les importante: Jehova ta revela su proposito solamente na hende cu ta tem’e y cu tin respet profundo p’e.—Lesa Salmo 25:14.

8, 9. Kico Jehova a revela na Abraham y Jacob tocante e descendiente priminti?

⁸ Un biaha cu Jehova tabata papia cu su amigo Abraham via di un angel, Jehova a revela pa prome biaha un detaye sumamente importante tocante e descendiente priminti: Lo e ta un hende. (Gen. 22:15-17; Sant. 2:23) Pero con e hende ey lo destrui e colebra? Ken e colebra ta? Loke Jehova a revela mas despues ta contesta e preguntanan ey.

⁹ Jehova a dicidi cu e Descendiente Priminti lo a bin di Abraham su nieto Jacob, un homber cu a demostra gran fe den Dios. (Gen. 28:13-22) Via Jacob, Jehova a indica cu e Descendiente Priminti lo a bin di Jacob su yiu Juda. Jacob a profetisa cu e descendiente aki di Juda lo ricibi un “septer” (un bara cu a simbolisa autoridad di rey) y cu “nacionnan lo obedec’e.” (Gen. 49:1, 10) Cu e declaracion ey, Jehova a indica cu e Descendiente Priminti lo a bira un gobernante, un rey.

10, 11. Dicon Jehova a revela su proposito na David y Daniel?

¹⁰ Un 650 aña despues di tempo di Juda, Jehova a revela na Rey David mas cos tocante Su proposito. Jehova a describi David, un descendiente di Juda, como “un homber cu ta na agrado di [su] curason.” (Echo. 13:22; 1 Sam. 13:14; 17:12) Como cu David tabata teme Jehova y tabatin respet profundo p’e, Jehova a dicidi di cera un pacto cu ne. El a priminti David cu  un di su descendientenan lo goberna pa semper.—2 Sam. 7:8, 12-16.

¹¹ Un 500 aña despues, Jehova a uza profeta Daniel pa revela e aña exacto cu e Ungi, of Mesias, lo a aparece riba Tera. (Dan. 9:25) Dicon Jehova a revela su proposito na Daniel? Pasobra Jehova a considera Daniel un persona “masha stima”, ya cu Daniel tabatin respet profundo pa Jehova y a sirbie fielmente.—Dan. 6:16; 9:22, 23.

12. Kico e angel a bisa Daniel pa haci, y dicon?

¹² Jehova a uza profetanan fiel manera Daniel pa skirbi un gran cantidad di detaye tocante e Descendiente Priminti, esta, e Mesias. Pero ainda no tabata tempo pa Jehova su sirbidornan compronde plenamente loke el a inspira nan pa skirbi. Por ehempel, despues cu Daniel a haya un vision cu a mustra con e Reino di Dios lo ser estableci, e angel a bis’e pa seya e profecia ey te na e tempo cu Jehova a stipula. Y na e tempo ey, den futuro, berdadero “conocemento lo aumenta.”—Dan. 12:4.

13. (a) Ken tabata e Descendiente Priminti? (b) Con Hesus a aclaria e profecia di Genesis 3:15?

¹³ Jehova a mustra bon cla cu Hesus ta e simia priminti, e descendiente di David cu lo goberna como Rey. (Luc. 1:30-33; 3:21, 22) Ora Hesus a cuminsa su sirbishi, ta comosifuera solo a sali pa duna claridad riba hende su conocemento di e proposito di Dios. (Mat. 4:13-17) Por ehempel, Hesus a kita tur duda tocante ken “e colebra” menciona na Genesis 3:14 y 15 ta ora el a yama Diabel “un matado” y “e tata di mentira.” (Juan 8:44) Den e revelacion cu Hesus a duna Juan, el a identifica “e colebra original” como “esun cu yama Diabel y Satanas.” d (Lesa Revelacion 1:1; 12:9.) Y den e mesun revelacion ey, Hesus a mustra con na final e—como e descendiente priminti—lo cumpli cu e profecia cu a ser duna den Eden y destrui Satanas.—Rev. 20:7-10.

14-16. Ta semper e discipelnan di e prome siglo a compronde completamente kico tabata e nificacion di e berdadnan cu Hesus a revela? Splica.

¹⁴ Manera nos a mira den Capitulo 1 di e buki aki, Hesus a papia ampliamente riba e Reino. Pero no ta semper el a revela tur e detayenan cu su discipelnan tabata kier sa. Hasta ora el a duna nan detayenan specifico, ta despues di hopi tempo—tin biaha siglonan despues—e siguidornan di Cristo a cuminsa compronde completamente e nificacion di e berdadnan cu nan Maestro a revela. Laga nos considera algun ehempel.

¹⁵ Na aña 33 di e prome siglo, Hesus a mustra bon cla cu ta for di Tera lo scoge e cogobernantenan cu lo yuda e Rey di e Reino di Dios y cu lo resucita nan como criaturanan spiritual den cielo. Pero su discipelnan no a compronde loke el a bisa di biaha. (Dan. 7:18; Juan 14:2-5) Den e mesun aña ey, Hesus a indica via ilustracion cu ta hopi tempo despues cu e  subi na cielo e Reino lo ser estableci. (Mat. 25:14, 19; Luc. 19:11, 12) E discipelnan no a compronde e punto sumamente importante ey tampoco. Pesey, nan a puntra Hesus despues cu el a resucita: “Ta aworaki bo ta bay restaura e Reino pa Israel?” Pero Hesus a dicidi di no duna nan niun detaye mas e tempo ey. (Echo. 1:6, 7) Ademas, Hesus a siña nan cu lo tin “otro carne” cu lo no forma parti di e “tou chikito” di cogobernante. (Juan 10:16; Luc. 12:32) Ta hopi tempo despues cu e Reino a cuminsa goberna na 1914, e siguidornan di Cristo a bin compronde bon cla ta ken e dos gruponan ey tabata.

¹⁶ Hesus por a conta su discipelnan hopi cos mas tempo e tabata hunto cu nan riba Tera, pero e tabata sa cu nan lo no por a compronde tur e cosnan ey. (Juan 16:12) No tin duda cu den e prome siglo hopi conocemento tocante e Reino a keda revela. Pero ainda no tabata tempo pa e conocemento ey aumenta.

17. Kico nos tin cu haci pa compronde e berdadnan tocante e Reino, pero kico mas ta necesario?

¹⁷ Jehova a priminti Daniel cu durante “e tempo di e fin” hopi hende lo “core pariba-pabou, y [berdadero] conocemento” di e proposito di Dios lo aumenta. (Dan. 12:4) Segun un buki di consulta, e verbo Hebreo cu nan a uza pa “core pariba-pabou” ta transmiti tambe e idea di un hende cu ta studia un buki cuidadosamente y cabalmente. Pues, e hendenan cu tabata kier e berdadero conocemento lo mester a traha duro pa hay’e. Pero maske cuanto nos studia Bijbel, nos no por haya un bon comprondemento di e berdadnan tocante e Reino a menos cu Jehova duna nos e privilegio ey.—Lesa Mateo 13:11.

18. Con e sirbidornan di Jehova a demostra fe y humildad?

 ¹⁸ Mescos cu Jehova a revela e berdadnan tocante e Reino gradualmente durante e periodo prome cu 1914, asina el a sigui haci durante e tempo di fin. Manera Capitulo 4 y 5 di e buki aki ta mustra, e sirbidornan di Dios mester a ahusta nan comprondemento na varios ocasion durante e ultimo 100 añanan. Acaso esey ta nifica cu Jehova no ta apoya nan? Al contrario! E ta sostene nan plenamente. Dicon? Como cu e sirbidornan di Jehova tin temor pa Dios, nan ta demostra dos cualidad cu e ta balora: fe y humildad. (Heb. 11:6; Sant. 4:6) E sirbidornan di Jehova tin fe cu tur e promesanan di Dios cu tin den su Palabra lo bira realidad. Nan ta demostra humildad ora nan ta admiti cu nan no a compronde bon con e promesanan ey lo cumpli. E actitud humilde ey a keda refleha den E Toren di Vigilancia di 1 di maart 1925, cu a bisa: “Nos sa cu Señor ta su propio interprete; ta e mes lo interpreta su Palabra pa su pueblo, na su manera y na su debido tempo.”

19. Kico Jehova a permiti nos compronde awor, y dicon?

¹⁹ Ora cu e Reino a cuminsa goberna na 1914, e sirbidornan di Dios tabata compronde parcialmente con e profecianan relaciona cu e Reino lo a cumpli. (1 Cor. 13:9, 10, 12) Den nos entusiasmo pa mira e promesanan di Dios cumpli, nos a yega di saca conclusionnan robes. Un articulo cu a sali den E Toren di Vigilancia cita den e paragraf anterior a bisa: “Aparentemente, un bon regla pa sigui ta cu nos no por compronde un profecia sino te ora cu e cumpli of segun cu e ta cumpliendo.” A traves di añanan, e sabiduria tras di e declaracion ey a bira bisto. Awor cu nos ta hopi leu den e tempo di fin, hopi profecia di Reino a cumpli y ta cumpliendo. Como cu e pueblo di Dios ta humilde y dispuesto pa acepta coreccion, Jehova a laga nan compronde su proposito mas mihor. En berdad, conocemento berdadero a aumenta considerablemente.

20, 21. Con e cristiannan di e prome siglo a reacciona ora cu cambionan a tuma luga?

²⁰ Ora Jehova ta refina nos comprondemento di e berdad, esey ta saca na cla kico nos tin den nos curason. Nos tin e fe y humildad necesario pa acepta e cambionan? Cristiannan cu tabata biba den e prome siglo a haya nan den e situacion ey. Supone cu bo ta un cristian Hudiu cu tabata biba den e tempo ey: Bo tin respet profundo pa e Ley di Moises y ta orguyoso cu bo ta forma parti di e nacion di Israel. Awor bo ta haya cartanan inspira for di apostel Pablo cu ta bisa cu e Ley no ta obligatorio mas y cu Jehova a rechasa e nacion di Israel. Na luga di esey, Jehova ta formando un Israel spiritual cu ta consisti di tanto Hudiu como di no Hudiu. (Rom. 10:12; 11:17-24; Gal. 6:15, 16; Col. 2:13, 14) Con abo lo a reacciona?

²¹ Cristiannan humilde a acepta Pablo su splicacion inspira, y Jehova a bendiciona nan. (Echo. 13:48) Otro cristiannan no tabata contento cu e cambionan ey y kier a sigui biba segun nan mes comprondemento. (Gal. 5:7-12) Si e personanan ey lo no a cambia nan punto di bista, nan lo a perde oportunidad di goberna hunto cu Cristo.—2 Ped. 2:1.

22. Nos ta hayando un comprondemento mas cla di e proposito di Dios. Ki efecto esey tin riba bo?

²² Den e ultimo decadanan tambe Jehova a yuda nos compronde mihor algun aspecto tocante e Reino. Por ehempel, el a yuda nos mira mas cla ta na ki tempo Hesus lo separa hende cu lo bira ciudadano di e Reino for di esnan cu no ta haci caso di e bon noticia, mescos cu un wardador ta separa carne for di cabrito. Tambe Jehova a laga nos compronde ta na ki tempo lo completa e cantidad di 144.000, kico e ilustracionnan di Reino cu Hesus a duna ta nifica y ki tempo e ultimo ungi lo ser resucita pa bay cielo. e Ki efecto e puntonan ey cu a bira mas cla tabatin riba bo? Bo fe a bira mas fuerte? Bo ta mira nan como prueba cu Jehova ta sigui educa su pueblo humilde? E siguiente capitulonan di e buki aki lo convence bo hasta mas ainda cu Jehova ta revelando su proposito gradualmente na hende cu ta tem’e.