CHAPTER 3
Jehovah Showimaot Plan blo Hem
1, 2. Hao nao Jehovah showimaot plan blo hem for olketa man?
PARENTS wea lovem pikinini bae story tugeta witim hem abaotem olketa samting lo famili. Nomata olsem, bae olketa no storyim evri samting bat olketa bae storyim nomoa wanem pikinini hia fit for minim followim age blo hem.
2 Jehovah duim sem samting tu taem hem isisi showimaot plan blo hem lo olketa man. Hem duim diswan nomoa lo taem wea hem luksavve hem fitim. Bae iumi storyim wanem Jehovah duim start kam from bifor, for showimaot tru samting abaotem Kingdom.
Why Nao Iumi Needim Kingdom?
3, 4. Waswe, Jehovah disaedem finis wanem bae happen lo olketa man? Minim kam.
3 Firstaem, disfala Kingdom wea Christ hem rulim hem no part lo plan blo Jehovah. Why nao olsem? Bikos Jehovah no disaedem finis wanem bae happen lo olketa man, hem givim lo olketa man freedom for disaedem samting seleva. Dastawe, hem talem lo Adam and Eve plan blo hem for olketa man, taem hem sei: “Hemi gud fo yutufala garem plande pikinini mekem olketa . . . go an stap long evri ples long wol. Nao bae yufala save mekem evrisamting long wol ya fo stap andanit long han blong yufala.” (Jenesis 1:28) And tu, Jehovah laekem tufala for obeyim olketa standard blo hem saed lo wanem hem gud and wanem hem nogud. (Jenesis 2:16, 17) Adam and Eve shud chus for faithful lo Jehovah. Sapos tufala and olketa pikinini blo tufala duim datwan lo firstaem, iumi bae no needim Kingdom wea Christ hem rulim for mekem plan blo God kamap tru. And earth wea iumi stap lo hem distaem bae hem fulap witim pipol wea perfect and wea worshipim Jehovah.
4 Nomata Satan, Adam, and Eve olketa no obey, diswan no stopem plan blo Jehovah firstaem for olketa man wea perfect for stap lo disfala earth. Jehovah duim samting mekem datfala plan savve kamap tru. Plan blo Jehovah hem no olsem wanfala car wea need for kasem wanfala ples bat sapos samfala samting blokem road, hem no savve go nao. Taem Jehovah mekem plan blo hem, no eni samting lo universe savve stopem for kamap tru. (Readim Aesaea 55:11.) Sapos luk olsem eni samting bae blokem plan blo Jehovah, bae hem iusim nara wei. a (Ex. 3:14, 15, NW) Lo taem wea Jehovah luksavve hem fitim, hem bae storyim lo olketa faithful servant blo hem wanem hem bae duim for mekem plan blo hem kamap tru.
5. Wanem nao Jehovah duim taem Satan, Adam, and Eve no obey?
5 From Satan, Adam, and Eve no obey, Jehovah mekem plan for disfala Kingdom mas kamap. (Matt. 25:34) Start lo datfala taem, Jehovah talemaot wanem hem bae iusim for mekem olketa man stap gud, and for stretem olketa nogud samting wea Satan duim taem hem laek for kasem paoa. (Jenesis 3:14-19) Nomata olsem, Jehovah no talemaot evri samting wantaem abaotem wanem Kingdom bae duim, bat hem isisi duim datwan.
Jehovah Start for Showimaot Tru Samting Abaotem Kingdom
6. Wanem samting nao Jehovah promisim, and wanem nao hem no talem?
6 Lo firstfala profesi, Jehovah promisim bae wanfala “pikinini” hem brekem hed blo snek. (Readim Jenesis 3:15.) Bat lo datfala taem Jehovah no talem hu nao datfala pikinini, and hu nao pikinini blo datfala snek. For samting olsem 2,000 year bihaen, Jehovah storyim samfala samting abaotem diswan moa. b
7. Why nao Jehovah chusim Abraham, and wanem important samting nao iumi lanem from diswan?
7 Gogo, Jehovah talem datfala pikinini wea hem promisim bae kam from laen blo Abraham. Jehovah chusim Abraham bikos hem ‘obeim toktok blong Jehovah.’ (Jenesis 22:18) Iumi lanem wanfala important samting from diswan, Jehovah showimaot plan blo hem lo olketa wea fraet lo hem nomoa.—Readim Sams 25:14.
8, 9. Wanem information abaotem datfala pikinini nao Jehovah talem lo Abraham and lo Jacob?
8 Taem Jehovah iusim wanfala angel for story lo fren blo hem Abraham, datwan hem firstaem wea Hem talem disfala important information, hao datfala pikinini bae born lo disfala earth. (Jenesis 22:15-17; Jas. 2:23) Bat hao nao bae hem brekem hed blo datfala snek? Hu nao datfala snek? Olketa samting wea bae happen bihaen bae ansarem olketa kwestin hia.
9 Jehovah mek sure pikinini hia wea hem promisim bae kam from laen blo Jacob, granson blo Abraham, from Jacob hem man wea garem strongfala faith lo God. (Jenesis 28:13-22) Jehovah talem lo Jacob disfala Promis Wan bae hem born lo laen blo Judah, son blo Jacob. Jacob talem profesi hao disfala pikinini wea born lo laen blo Judah bae kasem wanfala “scepter,” hem stik wea piksarem man hem garem paoa for rul olsem king, and “pipol bae obeyim hem.” (Gen. 49:1, 10, NW) So from datfala profesi, Jehovah talemaot datfala Promis Wan bae hem kamap wanfala king.
10, 11. Why nao Jehovah talem plan blo hem lo David and Daniel?
10 Samting olsem 650 year bihaen Judah dae, Jehovah talem samfala samting moa abaotem plan blo hem lo King David, wea hem kam from laen blo Judah. Jehovah storyim David hem man wea “barava wanmaen wetem hem.” (Fas Samuel 13:14; 17:12; Acts 13:22) From David hem man wea fraet lo God, Jehovah promisim hem, bae wanfala from laen blo hem bae rul for olowe.—Mektu Samuel 7:8, 12-16.
11 Samting olsem 500 year bihaen, Jehovah iusim profet Daniel for talem barava year wea Anointed Wan, or Messiah bae kam. (Daniel 9:25) Why nao Jehovah “lavem [Daniel] tumas”? Bikos Daniel barava respectim Jehovah and evritaem obeyim hem.—Daniel 6:16; 9:22, 23.
12. Wanem nao angel talem Daniel for duim, and why nao olsem?
12 Nomata Jehovah iusim olketa faithful profet olsem Daniel for raetem staka samting abaotem Messiah, hem no taem yet for olketa servant blo Jehovah for minim evri samting hia wea olketa raet abaotem. Olsem example, bihaen Daniel lukim vision abaotem taem Kingdom blo God start for rul, angel talem Daniel hao datfala profesi bae stap haed go kasem taem wea Jehovah markem. Gogo, lo stret taem, stretfala savve bae “hem staka.”—Dan. 12:4, NW.
Jehovah iusim olketa faithful man olsem Daniel for raetem olketa samting abaotem Kingdom wea Christ hem rulim
Jesus Storyim Klia Plan blo God
13. (a) Hu nao datfala pikinini wea God promisim? (b) Wanem nao Jesus talem abaotem profesi wea stap lo Jenesis 3:15?
13 Jehovah talem klia hao Jesus nao hem datfala pikinini wea hem promisim. Hem kam from laen blo David and bae hem King. (Luke 1:30-33; 3:21, 22) Taem Jesus start for duim ministry, hem olsem laet hem shaen for mekem pipol savve moa abaotem plan blo God for disfala earth. (Matt. 4:13-17) Olsem example, Jesus talem klia hu nao datfala “snek” wea Jenesis 3:14, 15, story abaotem taem hem sei, Devil hem “man for killim man dae” and “dadi bilong wei for laea.” (John 8:44) Lo vision blo Revelation wea John lukim, Jesus showim lo hem “snek bilong bifor kam” hem nao, “nem bilong hem Devil and Satan.” c (Readim Revelation 1:1; 12:9.) Insaed sem vision, Jesus showim hem nao datfala pikinini wea God promisim. Hem bae brekem hed blo Satan and finisim for olowe olsem datfala profesi lo Eden talem.—Rev. 20:7-10.
14-16. Waswe, olketa disaepol lo first century minim evri samting wea Jesus story abaotem? Minim kam.
14 Olsem Chapter 1 lo disfala buk storyim, Jesus evritaem story abaotem Kingdom. Bat hem no storyim evri samting wea olketa disaepol laek for savve abaotem. Nomata taem hem storyim staka samting, olketa disaepol blo hem no minim stretawe. Maet staka handred year bihaen nao olketa follower blo Christ start for luksavve lo mining blo olketa tru samting wea Jesus teachim. Iumi storyim samfala example.
15 Lo 33 C.E., Jesus sei olketa wea bae rul witim hem lo Kingdom blo God bae kam from disfala earth, and olketa bae laef olsem spirit lo heven. Bat olketa disaepol blo hem no stretawe minim diswan. (Daniel 7:18; John 14:2-5) Lo datfala sem year, Jesus talem tokpiksa for showim Kingdom bae no start for rul stretawe bihaen hem go ap lo heven. (Matt. 25:14, 19; Luke 19:11, 12) Olketa disaepol no minim diswan, so olketa askem Jesus bihaen hem laef bak: “Distaem nao bae iu mekem rul bilong God kamap moa long Israel?” Bat Jesus no storyim evri samting abaotem datwan lo datfala taem. (Acts 1:6, 7) Jesus sei tu, bae “olketa nara sheepsheep” stap wea olketa no part lo disfala “smol sekson” wea bae rul lo heven. (John 10:16; Luke 12:32) Olketa follower blo Christ minim gud hu nao tufala sekson hia, bihaen Kingdom start for rul lo 1914.
16 Taem Jesus stap lo earth hem savve storyim staka samting lo olketa disaepol blo hem. Bat hem savve hard for olketa minim evri samting lo datfala taem, so hem no storyim evriting. (John 16:12) Tru nao, lo first century olketa kasem moa savve abaotem datfala Kingdom. Bat lo datfala taem, hem no taem yet for datfala savve kamap evriwea.
‘Taem World Gogo for Finis’ Stretfala Savve Bae Kamap Evriwea
17. Wanem nao iumi mas duim for savve lo olketa tru samting abaotem Kingdom, and wanem tu iumi need for duim?
17 Jehovah promisim Daniel, ‘taem world gogo for finis,’ staka bae “lukluk gud” and “stretfala savve” abaotem plan blo God bae hem kamap evriwea. (Dan. 12:4, NW) Olketa wea laekem datfala savve mas waka hard for kasem. Wanfala buk sei disfala toktok “lukluk gud” lo Hebrew languis, hem minim for man studyim gud wanfala buk. Jehovah savve helpem iumi for minim gud olketa tru samting abaotem Kingdom taem iumi studyim Bible.—Readim Matthew 13:11.
18. Hao nao olketa wea fraet lo Jehovah showimaot olketa garem faith and hambol?
18 Start lo 1914 kam kasem distaem, Jehovah gohed for isisi talemaot tru samting abaotem Kingdom. Olsem bae iumi storyim lo Chapter 4 and 5 blo disfala buk, insaed 100 year wea go pas finis, pipol blo God need for changem wei wea olketa minim samfala samting. Waswe, diswan minim Jehovah no sapotim olketa? Nomoa, hem sapotim olketa. Why nao iumi sei olsem? Bikos olketa wea fraet lo Jehovah showimaot faith and hambol, tufala fasin wea hem laekem. (Heb. 11:6; Jas. 4:6) Olketa servant blo Jehovah garem faith hao evri promis blo God bae kamap tru. Taem olketa luksavve hao olketa minim samfala teaching hem no stret, olketa talemaot, datwan showimaot olketa hambol. The Watch Tower blo March 1, 1925, showim diswan taem hem sei: “Lord savve lo mining lo toktok blo hem, and lo stretfala taem bae hem talemaot mining lo toktok blo hem lo pipol blo hem.”
“Lord . . . lo stretfala taem bae hem talemaot mining lo toktok blo hem lo pipol blo hem”
19. Jehovah helpem pipol blo hem for minim wanem, and why nao olsem?
19 Lo 1914, taem Kingdom start for rul, pipol blo God no barava minim evri samting abaotem hao datfala profesi abaotem Kingdom bae kamap tru. (1 Cor. 13:9, 10, 12) From iumi laekem tumas for lukim olketa promis blo God kamap tru, samfala taem iumi talem samting wea hem no stret. Lo olketa year wea go pas, samting wea The Watch Tower blo March 1, 1925, storyim hem tru. Hem sei: “Gud samting for iumi mas tingim hem olsem, iumi savve minim profesi taem hem kamap tru or hem gohed for kamap tru.” From iumi stap lo end blo olketa last day, staka lo olketa profesi abaotem Kingdom hem kamap tru finis and samfala gohed for kamap tru. From pipol blo hem hambol and willing for changem tingting blo olketa, Jehovah helpem olketa for minim plan blo hem. Stretfala savve hem kamap evriwea!
Taem Olketa Teaching Change Diswan Testim Pipol blo God
20, 21. Hao nao olketa change wea kamap affectim olketa first century Christian?
20 Taem Jehovah changem hao iumi minim teaching blo hem, diswan savve testim iumi. Waswe, bae iumi showimaot iumi garem faith, and hambol for acceptim olketa change hia? Olketa Christian lo first century feisim kaen test olsem. Olsem example, tingim sapos iu wanfala Christian wea Jew and iu stap lo datfala taem. Iu barava respectim Law blo Moses and iu tinghae lo nation blo iu Israel. Then iu kasem olketa leta wea holy spirit muvim aposol Paul for raetem wea sei olketa Christian no stap anda lo Law blo Moses and Jehovah rejectim finis nation lo Israel. Bat hem hipimap wanfala spiritual Israel, wea insaed diswan hem olketa wea Jew and olketa wea no Jew. (Rome 10:12; 11:17-24; Gal. 6:15, 16; Col. 2:13, 14) Wanem nao bae iu duim?
21 Olketa Christian wea hambol acceptim wanem holy spirit muvim Paul for talem and Jehovah blessim olketa. (Acts 13:48) Olketa narawan no laek acceptim olketa change olsem, olketa laek followim nomoa wanem olketa seleva tingim. (Gal. 5:7-12) Sapos olketa no laek for changem tingting blo olketa, olketa bae lusim chance wea olketa garem for rul witim Christ.—2 Pet. 2:1.
22. Wanem nao tingting blo iu abaotem olketa change lo hao iumi minim plan blo God?
22 Lo olketa year wea go pas, Jehovah gohed helpem iumi for minim olketa teaching abaotem Kingdom. Olsem example, hem helpem iumi for savve, wanem taem nao pipol wea stap anda lo Kingdom bae separate from pipol wea no laek stap anda lo Kingdom, olsem olketa sheepsheep separate from olketa goat. Hem teachim iumi tu taem wea full namba blo datfala 144,000 bae set, wanem nao olketa tokpiksa blo Jesus abaotem Kingdom hem minim, and wanem taem nao last wan lo olketa anointed wan bae go ap lo heven. d Wanem nao bae iu duim taem olketa change olsem kamap? Waswe, diswan strongim faith blo iu? Waswe, diswan pruvim lo iu Jehovah gohed for teachim pipol blo hem wea hambol? Wanem iumi bae lanem lo disfala buk, bae mekem iu barava sure hao Jehovah isisi showimaot plan blo hem lo olketa wea fraet lo hem.
a Nem blo God hem kam from wanfala Hebrew toktok wea minim “duim eni samting.” Disfala nem Jehovah, showimaot hem savve duim eni samting wea hem promisim. Lukim box “Mining blo Nem blo God,” lo Chapter 4.
b Maet hem luk olsem 2,000 year hem long tumas, bat tingim, lo bifor, olketa man savve laef for longfala taem. Fofala genereson nao laef lo semtaem from Adam kasem Abraham. Adam laef yet taem Lamech, dadi blo Noah hem born. Lamech laef yet taem Shem, son blo Noah hem born. And Shem laef yet taem Abraham hem born.—Jenesis 5:5, 31; 9:29; 11:10, 11; 25:7.
c Disfala nem “Satan,” hem stap 18-fala taem lo olketa Hebrew Scripture. And hem stap winim 30-fala taem lo olketa Greek Scripture. Diswan hem fitim, bikos main samting wea Olketa Hebrew Scripture storyim hem hu nao datfala Messiah, olketa no story tumas abaotem Satan. Bat taem Messiah kam, hem nao storyim staka samting abaotem hu nao Satan olsem olketa Greek Scripture storyim.
d For savve lo samfala change wea kamap lo hao iumi minim toktok blo God, lukim olketa Wastaoa magasin blo November 1, 1995, page 15-20; January 15, 2008, page 20-24; July 15, 2008, page 17-21; July 15, 2013, page 9-14.
