1, 2. Traduction du monde nouveau be bonya la Ala tɔgɔ kan cogo di?

 SAAN 1947 desanburukalo tile 2, talatalon sɔgɔma, kerecɛn mɔlenw jɛnkulu dennin dɔ ye baaraba dɔ daminɛ Buruklini, Niyɔriki. Bibulu bayɛlɛmani baara tun lo. O baara tun ka gwɛlɛ nka, u y’u jija a la saan 12 kɔnɔ. A laban, saan 1960 marisikalo tile 13, dimansilon, o baara banna. Kalo saba o kɔ, zuwɛnkalo tile 18, lajɛnba dɔ kɛra Mansɛstɛri, Angletɛri jamana na. Balimacɛ Nathan Knorr y’a fɔ jama ye ko Bibulu Traduction du monde nouveau yɔrɔ laban bɔra. Jama ninsɔn diyara cogo min na, kalankɛla y’o ɲɛfɔ ten ko: “Bi ye ninsɔndiya loon ye Jehova Seerew fɛ, duniɲa kuru bɛɛ kɔnɔ!” Fɛɛn min y’a to mɔgɔw tun ninsɔndiyanin lo ten, o ye ko Ala tɔgɔ be sɔrɔ siɲɛ caaman o Bibulu bayɛlɛmani kura kɔnɔ.

² Bibulu bayɛlɛmabagaw tun ye Ala tɔgɔ bɔ Bibulu bayɛlɛmani caaman kɔnɔ. Sutana tun be nanbarakow kɛra walisa mɔgɔw ka ɲinɛ Ala tɔgɔ kɔ. Nka, kerecɛn mɔlenw y’a bali k’o kɛ. A tun fɔra Traduction du monde nouveau dadonkumaw kɔnɔ ko: “Fɛɛn min b’a to o Bibulu bayɛlɛmani be dan na tɔɔw la, o ye ko u ye Ala tɔgɔ segi a nɔɔ na.” Ala tɔgɔ Jehova be sɔrɔ Traduction du monde nouveau kɔnɔ siɲɛ 7 000 ni kɔ. O Bibulu bayɛlɛmani be bonya la an sankolola Faa Jehova tɔgɔ kan yɛrɛ le!

3. a) An balimaw ye mun lo faamu Ala tɔgɔ kɔrɔ koo la? b) An ka ɲi ka Ɛkizɔdi 3:13, 14 faamu cogo di? (koorilen nin lajɛ: “ Ala tɔgɔ kɔrɔ”).

³ A daminɛ na, Bibulu Kalandenw tun b’a miiri ko Ala tɔgɔ kɔrɔ ko: “Ne ye min ye, n y’o ye.” (Ɛkiz. 3:14). O lo kama, a tun fɔra saan 1926, zanwiye tile fɔlɔ ka Kɔrɔsili Sangaso kɔnɔ ko: “Ala tɔgɔ Jehova kɔrɔ ko . . . daminɛ t’a la ani laban fana t’a la.” Nka, sanni balimaw ka Traduction du monde nouveau bayɛlɛmani daminɛ, Jehova y’u dɛmɛ u y’a faamu ko a tɔgɔ kɔrɔ tɛ dan o ma. U y’a faamu fana ko a kɔrɔ ko a be ni sagonata ye ani a b’o dafa. U tun y’a faamu ko Ala tɔgɔ kɔrɔ ko: “A b’a kɛ a be kɛ a ye.” Tiɲɛn na, Jehova lo ye duniɲa, adamadenw ani mɛlɛkɛw dan ani a bele b’a  kɛra a sagonata n’a ka layiduw ka dafa. N’o lo, mun na a kɔrɔtanin lo bonya ka la Ala tɔgɔ kan? An be se k’o kɛ cogo di?

4, 5. a) N’an be Ala delila ko: “I tɔgɔ ka saniya,” an be mun lo ɲinina a fɛ? b) Ala bena a tɔgɔ saniya cogo di ani tuma juman?

⁴ Jehova b’a fɛ bonya ka la a tɔgɔ kan. A ka laɲinita fɔlɔ ye ko a tɔgɔ ka saniya. Yezu ye fɛɛn fɔlɔ min kofɔ a ka delili modɛli la, o b’o lo yira ka gwɛ. A ko: “An Faa min be sankolo la, i tɔgɔ ka boɲa [wala ka saniya].” (Mat. 6:9). N’an be Jehova deli o koo la, an b’a fɛ a ka mun lo kɛ tigitigi?

⁵ I ko an y’a ye gafe nin sapitiri fɔlɔ la cogo min na, Yezu kɔnna ka fɛɛn saba minw kofɔ a ka delili modɛli kɔnɔ, u ɲɛsinna Ala sagonata koo ma. A fɔlɔ, a ko: “I tɔgɔ ka boɲa.” O kɔ, a ko: “I ka masaya ka na.” A laban, a ko: “I sago ka kɛ.” (Mat. 6:10). An b’a ɲini Jehova fɛ, a k’a kɛ a ka Masaya ka na ani a sago ka kɛ. O cogo kelen na, an b’a ɲini a fɛ fana, a k’a kɛ a tɔgɔ ka saniya. O kɔrɔ, a k’a tɔgɔ saniya ka bɔ ngalon sifaw bɛɛ la minw lara a kan kabi Edɛn nankɔ kɔnɔ. Jehova bena o delili jaabi cogo di? A ko: ‘Ne tɔgɔba min tiɲɛna siya wɛrɛw cɛma, ne bena nɔɔrɔ la o kan.’ (Ezek. 36:23; 38:23). Arimagedɔn kɛlɛ la, Jehova bena a tɔgɔ saniya danfɛnw bɛɛ ɲɛɛ na, tuma min na a bena daan sigi juguya la.

6. An be se k’an niin don Ala tɔgɔ saniyako la cogo di?

⁶ Sanga ni wagati bɛɛ, Jehova y’a to a sagokɛlaw y’u niin don a tɔgɔ saniyako la. Ala tɔgɔ ka senu cogo dafanin na. O kama, an tɛ se ka dɔ fara a ka senumanya kan. N’o lo, an be se k’a tɔgɔ saniya cogo di? Kira Ezayi y’a sɛbɛ ko: “Aw k’a lɔn ko Masaba, Setigi ka senu.” Jehova yɛrɛ y’a fɔ a ka jama koo la ko: “Aw bena ne ka senumanya boɲa . . . aw bena yɛrɛyɛrɛ ne, Isirayɛli ka Ala ɲakɔrɔ.” (Ezayi 8:13; 29:23). O la, an be Jehova tɔgɔ saniya n’an b’a jati k’o tɔgɔ be dan na, ko a kɔrɔtanin lo ka tɛmɛ tɔgɔ tɔɔw bɛɛ kan ani n’an be tɔɔw dɛmɛ u k’a jati k’o tɔgɔ ka senu. Ani fana, o tɔgɔ be min bɛɛ yira a koo la, an b’o jati fɛɛnba ye. An b’a yira ko an be bonya la Ala tɔgɔ kan kosɔbɛ, n’an be sɔn a ma ko Jehova lo y’an ka Masaba ye ani n’an be mɛnni kɛ a fɛ n’an dusu bɛɛ ye.—Talenw 3:1; Yir. 4:11.

7, 8. a) Sanni Ala k’a to a tɔgɔ ka la a sagokɛlaw kan, o ye wagati ta. Mun na do? b) An bena mun lo lajɛ sisan?

⁷ Kabi saan 1870, Ala sagokɛlaw b’a tɔgɔ don u ka sɛbɛw kɔnɔ. Misali la, saan 1879 utikalo la, Ala tɔgɔ tun be sɔrɔ Kɔrɔsili Sangaso ani an ka dɔnkili gafe dɔ kɔnɔ min bɔra o saan na (Songs of the Bride [Kɔɲɔmuso ka dɔnkiliw]).  Nɛɛmaba lo ka weele Ala tɔgɔ la. O kama, sanni Jehova k’a to a tɔgɔ senuman ka la a sagokɛlaw kan, a y’a janto u ka sarati dɔw dafa fɔlɔ. Jehova ye Bibulu Kalandenw labɛn cogo di walisa a tɔgɔ ka la u kan?

⁸ K’a ta saan 1870 ka taga se 1930 ma, Jehova y’a sagokɛlaw dɛmɛ u ye tiɲɛn nafaman dɔw faamu a tɔgɔ koo la. An k’u la saba lajɛ.

9, 10. a) Mun na a daminɛ na, Kɔrɔsili Sangaso tun be kuma Yezu lo koo la siɲɛ caaman? b) K’a ta saan 1919 ma, yɛlɛmani jumanw lo kɛra ani mun lo sɔrɔla o la? (koorilen nin lajɛ: “ Bonya lara Ala tɔgɔ kan cogo min na Kɔrɔsili Sangaso kɔnɔ”).

⁹ A fɔlɔ, Jehova sagokɛlaw y’a faamu ko Ala tɔgɔ kɔrɔtanin lo ka tɛmɛ fɛɛn bɛɛ kan. A daminɛ na, Bibulu Kalanden kantigiw tun b’a miiri ko kunmabɔsara lo ye Bibulu ka kalan jɔnjɔn ye. O kama, Kɔrɔsili Sangaso tun be kuma Yezu lo koo la siɲɛ caaman. Misali la, o zurunali bɔra saan min na, Yezu tɔgɔ fɔra a kɔnɔ siɲɛ 10 ka tɛmɛ Jehova tɔgɔ kan. A daminɛ na, i ko saan 1976, zuwekalo tile fɔlɔ ka Kɔrɔsili Sangaso tun y’a fɔ cogo min na faransɛkan na, Bibulu Kalandenw tun be “bonya la kojugu” Yezu tɔgɔ kan. Nka dɔɔni dɔɔni, Jehova y’u dɛmɛ u y’a faamu ale tɔgɔ kɔrɔtanin lo cogo min na Bibulu kɔnɔ. Bibulu Kalandenw y’o koo ta cogo di? O Kɔrɔsili Sangaso tun y’a fɔ fana ko k’a ta saan 1919, Bibulu Kalandenw “y’a daminɛ ka bonya la Masiya sankolola Faa Jehova kan kosɔbɛ ka tɛmɛ fɔlɔ kan.” O kama, saan 10 minw tugura saan 1919 kɔ, Ala tɔgɔ fɔra siɲɛ 6 500 ni kɔ Kɔrɔsili Sangaso kɔnɔ!

¹⁰ Ala tɔgɔ ka kan ni bonya min ye, an balimaw kɛtɔ k’o la a kan, u y’a yira ko Ala tɔgɔ ka di u ye. I ko Musa y’a kɛ cogo min na galen, u y’a latigɛ ka Jehova “tɔgɔ fɔ.” (Deter. 32:3; Zab. 34:4). Jehova y’a kɔrɔsi ko a tɔgɔ ka di u ye minkɛ, a y’u duga i ko a y’a daa di cogo min na a ka Kuma kɔnɔ.—Zab. 119:132; Eburuw 6:10.

11, 12. a) Dɔɔni saan 1919 kɔ, yɛlɛmani jumanw lo donna an ka gafew kɔnɔ? b) Jehova y’a sagokɛlaw dɛmɛ ka mun lo faamu ani mun na?

¹¹ A filanan, kerecɛn sɔbɛw y’a faamu ka ɲɛ Ala ye baara min kalifa u ma. Dɔɔni saan 1919 kɔ, kerecɛn mɔlen minw tun be Ala ka mɔgɔw ɲɛminɛna, hakili senu y’olu lasun u ye Ezayi ka kiraya kuma sɛgɛsɛgɛ. Kabi o wagati, an ka sɛbɛw y’a daminɛ ka sinsin waajuli baara kan. Mun na an be se k’a fɔ k’o yɛlɛmani kɛra wagati bɛnnin na?—Mat. 24:45.

¹² Ka kɔn saan 1919 ɲɛ, Kɔrɔsili Sangaso tun ma deli ka kira Ezayi ka kuma nunu ɲɛfɔ k’u pereperelatigɛ: “Masaba ko: ‘Ne seere ye aw le ye. Ne ka baarakɛlaw ye aw le ye, ne y’aw minw woloma.’ ” (Ezayi 43:10-12 kalan). Nka dɔɔni o saan kɔ, an ka gafew y’a daminɛ k’o bibulusen walawala ani ka kerecɛn mɔlenw bɛɛ jija ko Jehova ye baara min kalifa u ma, u k’u seen don o la. O baara ye ka seereya kɛ Jehova koo la. K’a ta saan 1925 ka taga se saan 1931 ma,  o wagati dɔrɔn na, Kɔrɔsili Sangaso 57 bɛɛ ye Ezayi sapitiri 43 kɔnɔnakumaw walawala. U kelen kelen bɛɛ y’a ɲɛfɔ k’o kumaw ɲɛsinna kerecɛn sɔbɛw lo ma. A gwɛnin lo k’o saanw na, Jehova tun b’a ka mɔgɔw dɛmɛna u k’a faamu u ka kan ka baara min kɛ. Mun na do? A y’o kɛ walisa “k’u sɛgɛsɛgɛ fɔlɔ.” (1 Tim. 3:10). U ka baara fɛ, Bibulu Kalandenw tun ka ɲi k’a yira Jehova la fɔlɔ k’u ye a seerew ye sɔbɛ la. O la, u tun bena a yira ko a bɛnnin lo a tɔgɔ ka la u kan.—Luka 24:47, 48.

13. Koo min kɔrɔtanin lo ka tɛmɛ fɛɛn bɛɛ kan, Ala ka Kuma b’o yira cogo di?

¹³ A sabanan, Jehova sagokɛlaw y’a faamu ko a kɔrɔtanin lo u ka Jehova tɔgɔ saniya. Saan 1920 kɔ, u y’a faamu ko min kɔrɔtanin lo ka tɛmɛ fɛɛn bɛɛ kan, o ye ka Ala tɔgɔ saniya. Ala ka Kuma b’o koo kɔrɔtaninba yira cogo di? An ka misali fila lajɛ. Kuun jɔnjɔn juman lo kama Jehova ye Israɛldenw kisi ka bɔ Ezipiti? A ko ale y’o kɛ walisa ale “tɔgɔ ka fɔ diɲɛ faan bɛɛ la.” (Ɛkiz. 9:16). Mun na Jehova makarila Israɛldenw na fana tuma min na u murutira a ma? A ko ale y’o kɛ ale “yɛrɛ tɔgɔ kosɔn, janko o tun siginin bɛ siya minw cɛ ra, . . . [ale] tɔgɔ kana cɛn o siyaw ɲa kɔrɔ.” (Ezek. 20:8-10, Biblu Ala ta Kuma). O maanaw ni maana wɛrɛw ye Bibulu Kalandenw dɛmɛ ka mun lo faamu?

14. a) Dɔɔni ka kɔn saan 1930 ɲɛ, Ala sagokɛlaw ye mun lo faamu? b) O faamuyali kura ye Bibulu Kalandenw lasun ka mun lo kɛ? (koorilen nin fana lajɛ: “ Fɛɛn min b’an lasun ka waajuli kɛ bɛrɛbɛrɛ”).

¹⁴ Dɔɔni ka kɔn saan 1930 ɲɛ, Ala sagokɛlaw ye kira Ezayi ka kumaw kɔrɔ faamu. O y’a sɔrɔ o kumaw tun sɛbɛra a saan 2 700 ɲɔgɔn ye nin ye. Ezayi tun y’a sɛbɛ Jehova koo la ko a y’a ka “jama bila sira ten ka tɔgɔba sɔrɔ.” (Ezayi 63:14). Bibulu Kalandenw y’a faamu ko Ala tɔgɔ saniyako lo kɔrɔtanin lo ka tɛmɛ an ka kisili koo kan (Ezayi 37:20; Ezek. 38:23). Saan 1929 (saan 1934 faransɛkan na), gafe Prophétie y’o tiɲɛnkuma fɔ ka surunya ten ko: “Danfɛnw bɛɛ ka kan k’a faamu ko Jehova tɔgɔ saniyako kɔrɔtanin lo ka tɛmɛ fɛɛn bɛɛ kan.” O faamuyali kura ye Ala sagokɛlaw lasun u ka seereya kɛ Jehova koo la ani u k’a tɔgɔ saniya ka bɔ ngalon sifa bɛɛ la.

15. a) Dɔɔni saan 1930 kɔ, an balimaw tun ye mun lo faamu? b) Wagati tun sera Jehova fɛ ka mun lo kɛ?

¹⁵ Dɔɔni saan 1930 kɔ, balimaw ye koo nunu faamu ka ɲɛ: Ala tɔgɔ kɔrɔtanin lo ka tɛmɛ fɛɛn bɛɛ kan, Ala ye baara min kalifa u ma, ani Ala tɔgɔ saniyako kɔrɔtanin lo ka tɛmɛ fɛɛn bɛɛ kan. Sisan, wagati tun sera Jehova fɛ ka nɛɛma kɛ a sagokɛlaw ye a kɛtɔ k’a tɔgɔ la u kan. Walisa k’a faamu o kɛra cogo min na, an ka koo tɛmɛnin dɔw lajɛ.

16. a) Jehova ye bonya la a tɔgɔ kan cogo kabakoman juman na? b) Mɔgɔ jumanw lo kɔnna ka kɛ Ala ka jama ye a tɔgɔ lara min kan?

¹⁶ Jehova ye bonya la a tɔgɔ kan cogo kabakoman min na, o ye ko jama dɔ b’a fɛ dugukolo kan a tɔgɔ lara min  kan. K’a ta saan 1513 ka kɔn Krista tile ɲɛ, o jama tun ye Israɛl siya lo ye (Ezayi 43:12). Nka, layidu min tun be u ni Jehova cɛ, u m’o dafa. O kama, saan 33 Krista tile la, jɛnɲɔgɔnya kɛrɛnkɛrɛnnin min tun be u ni Ala cɛ, u bɔnɛna o la. Dɔɔni o kɔ, Jehova y’a “janto siya wɛrɛw la . . . [A] ye siya dɔ woloma u cɛma k’u kɛ a tɔgɔla ta ye.” (Kɛw. 15:14). O siya lo nana weele ko “Ala ka Israɛl.” Krista ka kalanden mɔlenw lo, ani u bɔra siya caaman na.—Gal. 6:16, Bible senuma.

17. Sutana sera ka mun lo kɛ?

¹⁷ Saan 44 fan fɛ, ‘Yezu ka kalandenw welela kerecɛnw’ hakili senu barika la (Kɛw. 11:26). A daminɛ na, kerecɛn sɔbɛw dɔrɔn lo tun be weele ten (1 Piyɛri 4:16). Nka, Sutana  sera k’a kɛ u be kerecɛn tɔgɔtigiw fana weele o cogo la. O kama, saan kɛmɛkulu caaman kɔnɔ, a tun man nɔgɔ ka kerecɛn sɔbɛw lɔn ka bɔ kerecɛn tɔgɔtigiw la. Yezu tun kɔnna k’o koo fɔ a ka ntalen na, bile ni binjugu koo la. Nka, yɛlɛmani donna o koo la “sumantigɛtuma” na, o min daminɛna saan 1914. Mun na do? Sabu mɛlɛkɛw y’a daminɛ ka kerecɛn tɔgɔtigiw faran ka bɔ kerecɛn sɔbɛw la.—Mat. 13:30, 39-41.

18. Mun lo y’an balimaw dɛmɛ k’a faamu k’u mako be tɔgɔ kura la?

¹⁸ Jehova ye jɔncɛ kantigiman sigi saan 1919 la. O kɔ, a y’a ka mɔgɔw dɛmɛ u k’a faamu a ye baara min kalifa u ma. U sinna k’a faamu ko ka waajuli kɛ soo ni soo, o b’a to u be kɛ dan na ni kerecɛn tɔgɔtigiw ye. Dɔɔni o kɔ, u y’a faamu ko u tun be weele cogo min na ko “Bibulu Kalandenw,” o t’u faranfasi koɲuman ka bɔ kerecɛn tɔgɔtigiw la. U ka laɲinita fɔlɔ tun tɛ ka Bibulu kalan dɔrɔn. Nka, o tun ye ka seereya kɛ Ala koo la ani ka bonya ni nɔɔrɔ la a tɔgɔ kan. O la, ka kɛɲɛ n’u ka baara ye, tɔgɔ juman lo tun bena bɛn u ma? U y’o ɲiningali jaabili sɔrɔ saan 1931.

19, 20. a) Saan1931, u ye ŋaniya juman lo ta lajɛnba dɔ la min ye mɔgɔw ninsɔn diya? b) Balimaw ye mun lo kɛ tuma min na u y’a mɛn ko tɔgɔ kura lara u kan?

¹⁹ Saan 1931 zuwekalo la, lajɛnba dɔ kɛra Kolɔmbis dugu la, Oyo mara la Etazini. Bibulu Kalanden mɔgɔ 15 000 ɲɔgɔn nana o lajɛnba la. Siginindenbaba fila nunu tun b’o lajɛnba porogramu kan: J ani W. O sigininden fila tun ye mɔgɔw dabali ban ani u tun b’u yɛrɛ ɲiningara u kɔrɔ ye min ye. Bɛɛ tun b’a ka miiriya fɔra o koo la. Dimansilon, zuwekalo tile 26, balimacɛ Joseph Rutherford y’a ɲɛfɔ jama ye ko a b’a fɛ u ka ŋaniya dɔ ta ɲɔgɔn fɛ. A ko: “An b’a fɛ mɔgɔw k’an lɔn ani u k’an weele ko Jehova Seerew.” O wagati lo la, mɔgɔw y’a faamu k’o sigininden fila kɔrɔ ko Jehova Seerew (angilikan na Jehovah’s Witnesses). O tɔgɔ basiginin lo Ezayi 43:10 kan.

²⁰ Mɔgɔw ye pɛrɛnkanba ci ninsɔndiya kosɔn ani u ye tɛgɛrɛba fɔ k’a yira ko ŋaniya min tara, u sɔnna o ma. Mɔgɔ minw tun b’o lajɛnba lamɛnna arajo la duniɲa faan bɛɛ la, olu y’o mankanba mɛn. Ernest ni Naomi Barber tun y’o kalan lamɛn k’u to Ɔsitarali. U y’a fɔ ko: “Tuma min na mɔgɔw y’a daminɛ ka tɛgɛrɛba fɔ Ameriki, balima minw tun be Mɛlburn, u panna ka wuli ka to ka tɛgɛrɛ fɔ. An tɛna ɲinɛ o kɔ abada!” a

21. Balimaw tɔgɔ kura y’u jija cogo di waajuli baara la?

²¹ Kabi Ala sagokɛlaw basigira Bibulu kan k’u tɔgɔ la ko Jehova Seerew, dɔ farala u ka kisɛya kan waajuli baara la. Edward Grimes n’a muso Jessie tun ye piyɔniyew ye Etazini. Lajɛnba min kɛra Kolɔmbis saan 1931, u tun be  yen. U y’a fɔ ko: “An bɔtɔ soo, an tun ye Bibulu Kalandenw ye ani an kɔsegitɔ soo, an kɛra Jehova Seerew ye. An dusu tun ka di k’a ye ko tɔgɔ min lara an kan, o b’an dɛmɛ ka bonya la an ka Ala tɔgɔ kan.” O lajɛnba kɔ, balima dɔw tun be tɛmɛ fɛɛrɛ kura dɔ fɛ walisa ka bonya la Ala tɔgɔ kan. N’u tun sera luda dɔ la, u tun be sɛbɛ dennin dɔ di u lamɛnbaga ma. A tun sɛbɛnin be o sɛbɛ kan ko: “Ne ye JEHOVA seere dɔ ye, n’ be waajuli kɛra an ka Ala JEHOVA ka Masaya koo la.” Tiɲɛn na, a tun ka di Jehova sagokɛlaw ye ka weele a tɔgɔ la. U tun labɛnnin lo ka mɔgɔw dɛmɛ duniɲa faan bɛɛ la, u k’o tɔgɔ kɔrɔ faamu.—Ezayi 12:4.

22. Mun lo b’a yira ko mɔgɔw be Jehova sagokɛlaw lɔn ka ɲɛ?

²² A saan caaman ye nin ye, Jehova y’an balima kerecɛn mɔlenw lasun u y’o tɔgɔ ta min b’u faranfasi ka bɔ tɔɔw la. Kabi saan 1931, yala Sutana sera k’a kɛ mɔgɔw t’a lɔn Ala ka mɔgɔw ye mɔgɔ minw ye wa? Yala a sera k’a kɛ a ka gwɛlɛ mɔgɔw ma k’an faranfasi ka bɔ diinan tɔɔw la wa? Ayi, a ma se k’o kɛ! Sisan yɛrɛ, a gwɛnin lo ka tɛmɛ sanga ni wagati bɛɛ kan ko an ye Ala seerew ye (Mise 4:5; Malasi 3:18 kalan). Mɔgɔw b’an lɔn kosɔbɛ. O kama, mɔgɔ o mɔgɔ mana Jehova tɔgɔ weele, u ka teli k’a jati Jehova Seere ye. Mɔgɔ tɛ fili tiɲɛn diiman ma. A tɛ komi a dogonin be kulu dɔw kɔfɛ o minw ye ngalon diinanw ye. Nka, a ka jan “ni kulu tɔw ye.” (Ezayi 2:2). Bi bi nin na, Jehova ka batoli kɔrɔtanin lo kosɔbɛ ani bonyaba be lara Jehova tɔgɔ senuman kan.

23. Ka kɛɲɛ ni Zaburuw 121:5 ye, an ye koo kɔrɔtanin juman lo faamu Jehova koo la min b’an barika bonya kosɔbɛ?

²³ Sutana b’an kɛlɛla. Nka, Jehova b’an tanga a ma ani a bena to k’o kɛ. O b’an barika bonya yɛrɛ le! (Zab. 121:5). Joo b’an fɛ ka kɛ ni Zaburu sɛbɛbaga ka miiriya ɲɔgɔn ye. A y’a sɛbɛ ko: “Masaba ye siya min ka Ala ye, o siya nin dagamuna. A ye jama min woloma k’a kɛ a ta ye, o fana dagamuna.”—Zab. 33:12.