1, 2. ¿Mbaʼéichapa pe Traducción del Nuevo Mundo omombaʼeguasu Ñandejára réra?

 PETEĨ martes pyhareve 2 de diciembre de 1947, omimbi pe kuarahy péro hoʼỹsavy avei. Upérõ peteĩ grúpo de unhído oĩva Betel de Broóklynpe (Nueva York) oñepyrũ ojapo peteĩ tembiapo ndetuichapa jepéva. Upe traváho ningo ijetuʼueterei ha osegi ojapo hikuái 12 áño aja. Upéi og̃uahẽ domingo 13 de marzo de 1960, upe féchape otradusipa hikuái la Biblia. Tres mése upe rire, 18 de junio de 1960 peteĩ asambléape ojejapóva Mánchesterpe (Inglaterra), ermáno Nathan Knorr opresenta peteĩ Biblia ingléspe hérava Traducción del Nuevo Mundo de las Santas Escrituras. Umi hénte oĩva upe atýpe ovyʼaiterei. Ermáno Knorr omombeʼu porã mbaʼéichapa oñeñandu entéro oĩva upe asambléape. Haʼe heʼi: “Opavave testígo de Jehová oikóva ko yvy tuichakuére koestedía ovyʼaiterei”. Ko traduksión pyahu ndaijojahái oiporúgui Ñandejára réra tee entéro umi lugár oĩ haguépe ojeskrivi ypýrõ guare la Biblia.

² Heta traduksión de la Biblia nomoĩri Ñandejára réra. Satanás voi ojapoka upéva ani hag̃ua ni peteĩ yvypóra imanduʼave Ñandejára rérare. Péro umi unhído otradusi vaʼekue la Biblia ojepytaso mbarete Satanás kóntrape. Upe Traducción del Nuevo Mundo ñepyrũmbýpe heʼi: “Iporãveha, ko Biblia omoĩ jey hendaitépe Ñandejára réra”. Ha upeichaite ningo, Ñandejára réra tee Jehová oñemoĩ mas de siete mil vése Traducción del Nuevo Múndope. ¡Ajépa omombaʼete ñande Ru yvagapegua réra ko traduksión!

3. a) ¿Mbaʼépa oimoʼã vaʼekue umi ermáno heʼiseha Ñandejára réra? b) ¿Mbaʼéichapa ñantende vaʼerã heʼíva Éxodo 3:13, 14? (Ehecha pe rrekuádro “ Mbaʼépa heʼise Ñandejára réra”)

³ Ymave umi Estudiánte de la Biblia oimoʼã vaʼekue Ñandejára réra heʼiseha “Che hína che voi” (Éxo. 3:14, Sociedad Bíblica Paraguaya). Rrevísta Ñemañaha osẽ vaʼekue 1 de enero de 1926-pe heʼi: “Jehová réra heʼise pe oikovéva ijehegui rei, upe ndorekóiva ñepyrũ ha ndopamoʼãiva arakaʼeve”. Péro oñepyrũtarõ guare otradusi pe Traducción del Nuevo Mundo, Jehová oipytyvõ isiervokuérape  ontende porãve hag̃ua mbaʼépa heʼise héra. Jehová réra ohechauka avei haʼe ojapotaha opa oñekotevẽva okumpli hag̃ua hembipota. Haʼekuéra ohechakuaa Jehová réra heʼiseha: “Chugui oikóta oñekotevẽva guive”. Jehová ojapo ko univérso ha entéro ánhel ha yvypóra, ha osegi ojapo opa mbaʼe oñekotevẽva oiko hag̃ua Haʼe oipotáva. Upéicharõ, ¿mbaʼérepa tekotevẽte oñembotuicha Ñandejára réra? ¿Mbaʼépa ñande ikatu jajapo ñambotuicha hag̃ua upe téra?

4, 5. a) ¿Mbaʼépa la jajeruréva ñañemboʼe jave: “Toñemomarangatu nde réra”? b) ¿Mbaʼéicha ha arakaʼépa Jehová ombotuicháta héra?

⁴ Jehová oipota oñemombaʼe héra. Upéva la iñimportantevéva chupe g̃uarã. Upéicha rupi Jesús omboʼérõ guare pe padrenuéstro, tenondete ojerure: “Toñemomarangatu nde réra” (Mat. 6:9). Ñañemboʼévo péicha, ¿mbaʼépa la jajeruréva añetehápe?

⁵ Jahecháma haguéicha kapítulo 1-pe, pe padrenuéstrope Jesús ojerure mbohapy mbaʼe tekotevẽva oiko oñekumpli hag̃ua Ñandejára oipotáva. Haʼe heʼi: “Toñemomarangatu nde réra”, ha upéi: “Tou ne Rréino, tojejapo ne rembipota” (Mat. 6:10). Ñañemboʼévo péicha jajerure hína Jehovápe ojapo hag̃ua oñekotevẽva ikatu hag̃uáicha ou Irréino ha ojejapo hembipota. Jajerure avei Jehovápe tojapo oñekotevẽva oñemombaʼe hag̃ua héra. Ñande jaikuaa Edénpe oñepyrũ hague oñemongyʼa Jehová réra, upévare jajerure chupe tomopotĩ héra opa mbaʼe vai ojeʼe vaʼekuégui hese. ¿Mbaʼéichapa Jehová ombohováita ñane ñemboʼe? Haʼe heʼi: ‘Che amopotĩta che réra, oñemongyʼa vaʼekue umi tetãnguéra apytépe’ (Ezeq. 36:23; 38:23). Armagedónpe ohundi vove entéro umi iñañávape, Jehová ombotuicháta héra opavave renondépe.

6. ¿Mbaʼéichapa ñande ikatu ñambotuicha Ñandejára réra?

⁶ Ymaite guive Jehová opermiti isiervokuérape ombotuicha héra. Añetehápe Jehová réra ndaijojahái ha ndaipóri hese mbaʼeve ivaíva. ¿Mbaʼéicha piko upéicharõ peteĩ yvypóra ikatúta ombotuicha Ñandejára réra? Proféta Isaías heʼi: “Ñandejára ipuʼakapávape pereko Imarangatúvaramo”. Ha Jehová heʼi avei ipuévlore: ‘Ombotuicháta hikuái che réra ha okyhyjéta Israel Járagui’ (Isa. 8:13; 29:23, ÑÑB). Ñambotuicha hag̃ua Jehová réra ñamombaʼe vaʼerã, jahechakuaágui idiferénte ha iñimportanteveha oimeraẽ ótro téragui. Ñande jarrespeta héra ha ñaipytyvõ ótrope orrespeta hag̃ua avei. Ñamombaʼe hag̃ua Ñandejára réra, ñañemoĩ vaʼerã ipoguýpe ha ñaneñeʼẽrendu chupe ñande pyʼaite guive (Prov. 3:1; Apoc. 4:11).

7, 8. a) ¿Mbaʼérepa ohaʼarõve vaʼerã Ñandejára siervokuéra oñehenói hag̃ua chupekuéra Jehová rérarupi? b) ¿Mbaʼépa ñahesaʼỹijóta koʼág̃a?

⁷ Ñandejára siervokuéra oiporu Jehová réra ipuvlikasionkuérape 1870 guive. Por ehémplo ojeporúma vaʼekue pe téra Jehová Ñemañaha agosto de 1879-pe ha Canciones de la nóviape, peteĩ purahéi ryru osẽ vaʼekue upe áñope. Upéicharõ jepe, Jehová opermiti mboyve ipuévlope oñehenói chupekuéra hérarupi, ohecha tekotevẽha okambia hikuái. ¿Mbaʼéichapa Jehová oprepara umi Estudiánte de la Biblia ypykuépe oiporu hag̃ua héra?

⁸ Oñepyrũ mboyve áño 1900 ha upe rire avei, Jehová omyesakã ipuévlope heta mbaʼe iñimportánteva ha tekotevẽva oikuaa hikuái oñehenói hag̃ua hérarupi. Koʼág̃a ñahesaʼỹijóta mbohapy mbaʼe ontende porãve vaʼekue hikuái.

9, 10. a) Umi Ñemañaha osẽ ypy vaʼekue, ¿mbaʼérepa omombaʼe rasáma raʼe Jesúspe? b) ¿Mbaʼépa oñekambia 1919 guive, ha mbaʼépa ojehupyty upévare? (Ehecha avei pe rrekuádro “ Ñemañaha ombotuicha Ñandejára réra”.)

⁹ Primero, Jehová siervokuéra ohechakuaa iñimportanteha Ñandejára réra. Ñepyrũrã umi Estudiánte de la Biblia opensa vaʼekue Jesús sakrifísio haʼeha pe enseñánsa iñimportantevéva oĩva la Bíbliape. Upévare rrevísta Ñemañaha oñeʼẽ meme Jesús rehe. Por ehémplo primer áño osẽrõ guare ko rrevísta, diez vése mas oñeʼẽ Jesús rérare Jehováre rangue. Oñeʼẽvo umi Estudiánte de la Biblia ypykuére, Ñemañaha 15 de agosto de 1976 heʼi haʼekuéra “omombaʼe rasáma hague” Jesúspe. Tiémpo rire Jehová oipytyvõ chupekuéra ohechakuaa hag̃ua la Bíbliape iñimportantetereiha Ñandejára réra. ¿Mbaʼépa ojapo upémarõ umi Estudiánte de la Biblia? Pe rrevísta heʼi 1919 guive “oñepyrũ hague omombaʼeve hikuái Jehovápe, haʼéva pe Mesías Túva yvagapegua”. Upéi umi diez áño ohasávape 1919 guive, Ñemañaháme oñemoĩ Ñandejára réra 6.500 vése rasa.

¹⁰ Umi ermáno oñepyrũ omombaʼeve pe téra Jehová, ha péicha ohechauka tuichaiterei mbaʼeha chupekuéra g̃uarã Ñandejára réra. Moisés ojapo haguéicha yma, osẽ hikuái ‘omombeʼu Jehová réra’ (Deut. 32:3; Sal. 34:3). Oñepromete haguéicha la Bíbliape, Jehová oguerohory upéva ha ovendesi umi ermánope pórke ohecha ohayhuha héra (Sal. 119:132; Heb. 6:10).

11, 12. a) ¿Mbaʼe tembiapópa oñemombaʼeve ñane puvlikasionkuérape áño 1919 riremi? b) ¿Mbaʼépa oipota vaʼekue Jehová ojapo isiervokuéra, ha mbaʼérepa?

¹¹ Segundo, umi kristiáno tee ontende porã mbaʼe tembiapópa omeʼẽ chupekuéra Ñandejára. Áño 1919 riremi pe espíritu sánto omomýi umi unhído omoakãvape Ñandejára puévlo ostudia porã hag̃ua pe profesía oĩva Isaíaspe. Upéicha rupi ñane puvlikasionkuéra oñepyrũ omokyreʼỹ ermanokuérape opredika hag̃ua. ¿Mbaʼérepa upéva haʼe raʼe “hiʼupy hiʼoraitépe”? (Mat. 24:45.)

¹² Áño 1919 mboyve, rrevísta Ñemañaháme nosẽi vaʼekue ni peteĩ artíkulo ohesaʼỹijóva pe profesía oĩva Isaíaspe. Upe  profesía heʼi: ‘“Peẽ hína che testígo”, heʼi Jehová, “che rembiguái aiporavo vaʼekue”’ (elee Isaías 43:10-12). Péro 1919 riremi ñane puvlikasionkuéra oñepyrũ oñeʼẽ meme ko téxtore. Upéicha rupi omokyreʼỹ enterove unhídope ojapo hag̃ua pe tembiapo Jehová onkarga vaʼekue chupekuéra: opredika vaʼerã hikuái. Upéi 1925 guive 1931 peve osẽ 57 rrevísta Ñemañaha ohesaʼỹijóva Isaías kapítulo 43. Káda rrevísta heʼi umi kristiáno tee ojapo vaʼerãha Isaías heʼi vaʼekue. Ojehecha porãiterei upe tiémpope Jehová oipotaha isiervokuéra ojesareko pe tembiapo haʼe omeʼẽvare chupekuéra. ¿Mbaʼérepa? Ikatu hag̃uáicha “ojehecha porã raẽ ikatupyrýpa” hikuái (1 Tim. 3:10). Umi Estudiánte de la Biblia oñehenói mboyve testígo de Jehová, ohechauka vaʼerã Jehovápe añetehápe haʼeha itestígo (Luc. 24:47, 48).

13. ¿Mbaʼéichapa Ñandejára Ñeʼẽ ohechauka iñimportanteha oñembotuicha Ñandejára réra?

¹³ Tercero, Jehová puévlo ohechakuaa iñimportanteha oñembotuicha Ñandejára réra. Áño 1920 guive haʼekuéra ontende oñemombaʼe vaʼerãha Ñandejára réra, ha ndaiporiha mbaʼeve iñimportantevéva upévagui. ¿Mbaʼéichapa Ñandejára Ñeʼẽ ohechauka upéva? Epensamína koʼã mokõi ehémplore. ¿Mbaʼérepa Ñandejára oguenohẽ rakaʼe Israélpe Egíptogui? Jehová heʼi: ‘Oñemombaʼeguasu hag̃ua che réra yvy tuichakuére’ (Éxo. 9:16). Ha, ¿mbaʼérepa Jehová oiporiahuvereko jey Israélpe, opuʼãramo jepe hese hikuái? Jehová heʼi: ‘Che ajapo umi mbaʼe che réra rehehápe, ani hag̃ua umi tetã oikóva ijerére oñeʼẽ vai cherehe’ (Ezeq. 20:8-10, ÑÑB). ¿Mbaʼépa oaprende umi Estudiánte de la Biblia koʼã istóriagui ha ótro téxtogui oĩva la Bíbliape?

14. a) ¿Mbaʼépa ontende Ñandejára puévlo 1930 mboyve? b) ¿Mbaʼépa ojapo umi Estudiánte de la Biblia ontende porãve rire Ñandejára réra iñimportanteha? (Ehecha avei pe rrekuádro “ Mbaʼépa ñanemomýi japredika hag̃ua”.)

¹⁴ Áño 1930 mboyve Ñandejára puévlo ontende porã mbaʼépa heʼise pe ohai vaʼekue Isaías 2.700 áño upe mboyve. Oñeʼẽvo Jehováre haʼe heʼi: ‘Péicha reisãmbyhy ne retãme, remombaʼeguasu hag̃ua nde réra’ (Is. 63:14). Umi Estudiánte de la Biblia ohechakuaa la iñimportantevéva ndahaʼeiha ojesalvátapa hikuái, síno oñembotuicha Ñandejára réra (Is. 37:20; Ezeq. 38:23). Áño 1929-pe, pe lívro Profecía heʼi: “Jehová réra haʼe hína pe iñimportantevéva opa mbaʼégui”. Oñentende porãve rire ko mbaʼe, Ñandejára siervokuéra ikyreʼỹve oikuaauka ha odefende hag̃ua Jehová réra.

15. a) ¿Mbaʼépa ohechakuaáma ñane ermanokuéra oñepyrũvo 1930? b) ¿Mbaʼe tiémpopa og̃uahẽ upérõ?

¹⁵ Oñepyrũvo 1930, ñane ermanokuéra ohechakuaáma Ñandejára réra iñimportantetereiha, opredika vaʼerãha hikuái, ha Ñandejára réra oñembotuicha vaʼerãha. Upévo og̃uahẽ pe tiémpo Jehová oheja hag̃ua ipuévlope ojekuaa hérarupi. ¡Ajépa tuichaite mbaʼe upéva! Jahechami mbaʼéichapa oiko raʼe.

16. a) ¿Mbaʼéichapa Jehová ombotuicha héra? b) ¿Mávapa orrepresenta Jehovápe ymave?

¹⁶ Ombotuicha porãve hag̃ua héra Jehová oreko peteĩ puévlo ko yvy ape ári ojekuaáva hérarupi. Áño 1513 a.C. guive pe tetã Israel orrepresenta Jehovápe (Is. 43:12). Péro haʼekuéra nokumplíri ikompromíso Ñandejára ndive ha upévare áño 33-pe d.C., haʼe omboyke chupekuéra. Upe riremínte Jehová “ojesareko umi tetã ambuére oguenohẽ hag̃ua ijapyteguikuéra peteĩ tetã ogueraha vaʼerã héra” (Hech. 15:14). Upe puévlo pyahúpe oñehenói “Israel Ñandejára mbaʼéva”. Ko tetãme oĩ Cristo segidorkuéra unhídova ojeporavóva opa tetãgui (Gál. 6:16).

17. ¿Mbaʼéichapa Satanás osẽ ijidéape?

 ¹⁷ Áño 44 rupi d.C. “oñehenói ypy vaʼekue kristiáno umi disípulope. Ñandejára voi ombohéra chupekuéra péicha” (Hech. 11:26). Ñepyrũrã Cristo segidorkuéra añoiténte la oiporúva upe téra, ha upéva ohechauka idiferenteha hikuái umi ótrogui (1 Ped. 4:16). Péro upéi, heʼi haguéicha Jesús pe ehémplo oñeʼẽvape trígo ha ñana vaíre, umi kristiáno japu ojeheʼa umi kristiáno teére ha enterovépe oñehenói kristiáno. Péicha Satanás osẽ ijidéape. Upévare heta áñore ndojepillaporãi mávapa umi kristiáno guaʼu ha mávapa umi kristiáno tee. Péro upéva okambia ‘kosécha tiémpope’, oñepyrũva 1914-pe. ¿Mbaʼérepa? Umi ánhel oipeʼágui ojuehegui umi kristiáno tee ha kristiáno japu (Mat. 13:30, 39-41).

18. ¿Mbaʼéichapa ohechakuaa umi ermáno pe téra “Estudiánte de la Biblia” ndopytaporãveimaha hesekuéra?

¹⁸ Oñenombra rire pe tembiguái jeroviaha 1919-pe, Jehová oipytyvõ ipuévlope ohechakuaa hag̃ua mbaʼe tembiapópa omeʼẽ chupekuéra. Umi kristiáno tee pyaʼe ohechakuaa osẽramo opredika ogahárupi ohechaukataha idiferenteha umi kristiáno guaʼúgui. Upe riremi, ohechakuaáma hikuái pe téra “Estudiánte de la Biblia” noipytyvõveimaha chupekuéra idiferénte hag̃ua umi ótrogui. Haʼekuéra ndahaʼéi ostudiánteva la Biblia síno oñeʼẽ Ñandejára rehe, ha ombotuicha ha omombaʼeguasu héra. Upéicharõ, ¿mbaʼe térapa oho porãta upe tembiapo ojapóvare hikuái? Upe porandu oñembohovái 1931-pe.

19, 20. a) ¿Mbaʼe kárta iñimportántevapa ojelee asambleahápe 1931-pe? b) ¿Mbaʼépa ojapo ñane ermanokuéra oikuaárõ guare pe téra pyahu?

¹⁹ Julio de 1931-pe, quince mil Estudiánte de la Bíbliarupi oho Colúmbuspe (Ohio, Estados Unidos) peteĩ asamblearã. Oñemeʼẽvo chupekuéra pe prográma ohecha hikuái ijapére mokõi létra tuicha J ha W. Opavavénte oikuaasejoa mbaʼépa heʼise koʼã létra. Upéi, domingo 26 de julio, ermáno Josheph Rutherford olee peteĩ kárta ojedesidihápe ko mbaʼe iñimportantetereíva: “Jaipota opavave ñandekuaa ko térarupi: Testígo de Jehová”. Upévo enterove oĩva pe asambléape ontende sapyʼa la heʼiséva umi létra JW, ingléspe heʼiséva Jehovahʼs Witnesses (Testígo de Jehová). Ko téra oñeguenohẽ Isaías 43:10-gui.

²⁰ Umi oĩ vaʼekue pe asambléape ohendúvo upéva, osapukái vyʼágui ha heta ojepopete hikuái. Upéva oñehendu rrádio rupive heta hendápe. Por ehémplo Ernest ha Naomi Barber oĩ vaʼekue Austráliape. Haʼekuéra imanduʼa: “Oñehendúvo umi oĩva Estados Unídospe ojepopetepa, umi ermáno oĩva Mélbournepe opo opuʼã ha ojepopete avei. Núnka ndaoreresaraimoʼãi upévagui”. a

21. ¿Mbaʼéichapa pe téra pyahu omokyreʼỹ umi ermánope opredika hag̃ua?

²¹ Oñehenóimaramo hikuái testígo de Jehová, Ñandejára puévlo ikyreʼỹvéntema opredika hag̃ua. Edward Grimes  ha hembireko Jessie ningo prekursór vaʼekue ha oĩ kuri pe asambleahápe áño 1931-pe. Haʼekuéra omombeʼu: “Rosẽvo ore rógagui roñehenói Estudiánte de la Biblia, péro roju jeývo roñehenóima testígo de Jehová. Rovyʼaiterei ningo rorekógui peteĩ téra orepytyvõtava romombaʼeguasu hag̃ua Ñandejára réra”. Upe asambléa rire heta testígo oñepyrũ opredika omeʼẽvo umi ogajárape peteĩ tarhéta heʼíva: “Ore testígo de JEHOVÁ ropredika hína Ñandejára JEHOVÁ Rréino”. Jahechakuaa mbaʼeichaitépa ovyʼa hikuái ikatu haguére ojekuaa chupekuéra Ñandejára rérarupi. Haʼekuéra oĩmbaitéma oikuaauka hag̃ua upe téra oparupiete (Is. 12:4).

22. ¿Mbaʼépa ohechauka Jehová puévlo idiferenteha?

²² Ohasáma heta áño Jehová oipytyvõ hague ipuévlope ohechakuaa hag̃ua oiporúma vaʼerãha pe téra testígo de Jehová. Upe guive, ¿ikatúpa raʼe Satanás ojoko ani hag̃ua ojekuaa Ñandejára puévlope? ¿Ijetuʼúpa umi héntepe ohechakuaa hag̃ua ñanediferenteha umi ótro rrelihióngui? ¡Ni mbaʼevéicharõ! Káda día ojekuaa porãve umi testígo de Jehovápe ko yvy tuichakuére (elee Miqueas 4:5; Malaquías 3:18). Umi hénte ñandekuaapáma voi ha upévare oĩramo peteĩ oiporúva Ñandejára réra pyaʼe ojeʼe hese haʼeha testígo de Jehová. Okañy rangue atyraite rrelihión japu apytépe, Ñandejára puévlo teete ‘ojepytaso mbarete ha ijyvateve opaite sérrogui’ (Is. 2:2). Ko tiémpope Jehová organisasión ha héra potĩete añetehápe oñembotuicha hína.

23. ¿Mbaʼéichapa ñanemombarete Salmo 121:5?

²³ Jehová ndohejamoʼãi Satanás ojapo ipuévlore mbaʼeve ivaíva koʼág̃a ni amo gotyove. ¡Ajépa ñanemombaretete upéva! (Sal. 121:5). Ñande avei ñañeñandu pe salmísta oñeñandu haguéicha heʼírõ guare: ‘Ovyʼaite pe tetã omombaʼeguasúva Jehovápe Ijára teéramo ha ipyʼarory pe tetã Haʼe oiporavóma vaʼekue imbaʼe teerã’ (Sal. 33:12).