1, 2. Le Bible Bushintuludi bwa Ntanda Mipya butumbijanga dijina dya Leza namani?

 LUBANGA lwa Dya Bubidi, mafuku 2 Kweji 12, 1947, ku misanya ya ka lupēpo, kisumpi kityetye kya banabetu bashingwe māni ba ku Betele ya mu Brooklyn, New York, ke bashilula mwingilo umo mukatampe. Mwingilo wadi mukomo, myaka 12 kashā bengila’o. Mfulo mfulō, mu Dya Yenga mafuku 13 Kweji 3, 1960, bavuya bilembwa bya mfulo bya bwalamuni bupya bwa Bible. Myeji isatu pa kupita’po, ke mu mafuku 18 Kweji 6, 1960, Tutu Nathan Knorr wasapula kulupulwa kwa volime wa mfulo wa Bible mutuntulu wa Bisonekwa Bijila—Bushintuludi bwa Ntanda Mipya ku kibumbo kya bemvwaniki basangale badi ku kitango kya mu Manchester, mu Angeletele. Muneni wālombwele mwadi mwiimvwanine bantu bonso batenwe’ko na kunena’mba: ‘Dyalelo dino i difuku dya nsangaji ku Batumoni ba Yehova ntanda yonso!’ Kintu kimo kitendelwa kadi kisangaja mu buno bushintuludi bupya—i misunsa itelelwe’mo dijina dinedine dya Leza.

² Malamuni mavule a Bible atalulanga’mo dijina dya Leza. Ino bengidi bashingwe māni ba Yehova balwile na nkuku ya Satana ya kukimba kujimankanya dijina dya Leza mu ñeni ya bantu. Ku ntwelelo ya Bushintuludi bwa Ntanda Mipya bwalupwilwe dyodya difuku, kunena’mba: “Kintu kisangaja mu buno bushintuludi i kujokejibwa kujokejibwe dijina dya Leza pa kifuko kyadyo kifwaninwe.” Na bubine, Bushintuludi bwa Ntanda Mipya bwingidije dijina dya bunka dya Leza, Yehova, misunsa 7 000 ne kupita. Bine buno bwalamuni bwatumbije pakatampe pene dijina dya Tata wetu wa mūlu—Yehova!

3. (a) Le banabetu bajingulwile bika pa buluji bwa dijina dya Leza? (b) I muswelo’ka otufwaninwe kwimvwanija Divilu 3:13, 14? (Tala kapango “ Buluji bwa Dijina dya Leza.”)

³ Myaka kunyuma, Befundi ba Bible baimvwanije amba dijina dya Leza dishintulula amba, “Ami ngidi enka Aye udi.” (Div. 3:14) O mwanda, Kiteba kya Mulami kya mu difuku 1 Kweji 1, 1926, kyanenene amba: “Muntu wiikadile’ko Aye mwine, . . . Yewa kadipo na ngalwilo nansha mfulo mine.” Ino, mwenda mafuku kumeso kwa balamuni ba Bible Bushintuludi bwa Ntanda Mipya kushilula mwingilo wabo, Yehova wakweshe bantu bandi bajingulule amba dijina Yehova  kedishintululangapo’tu enka amba i wiikadile’ko aye mwine, ino dibajinji bidi dishintulula’mba i Leza wa mpango ne wingila. Bafundile amba dijina Yehova dishintulula pa bute pa bute amba i “Yewa wikadija Ke.” Bine, wāikadije’ko diulu ne ntanda ne bipangwa bya ñeni, kadi wendelelanga kwikadija’ko kiswa-mutyima ne mpango yandi ke bya bine. Penepo, mwanda waka i biyampe dijina dya Leza ditumbijibwe, ne i muswelo’ka otubwanya netu kwiditumbija?

4, 5. (a) I bika byotusaka potulomba’mba: “Dijina dyobe dipandulwe”? (b) I muswelo’ka ukapandula Leza dijina dyandi ne kitatyi’ka?

⁴ Yehova usakanga dijina dyandi ditumbijibwe. Na bubine, mpango yandi mibajinji i ya kupandula dijina dyandi, monka mwēkilombedile Yesu dibajinji mu milombelo yandi ya kulondela’po amba: “Dijina dyobe dipandulwe.” (Mat. 6:9) I bika byotusakanga shi ke tulombela namino?

⁵ Monka motwefundile’kyo mu Shapita 1 wa dino dibuku, binenwa “dijina dyobe dipandulwe” bibadilwa mu bintu bisatu byātelele Yesu mu milombelo yandi ya kulondela’po bikwatañene na mpango ya Yehova. Bintu bibidi bikwabo i bya amba: “Bulopwe bobe bwiye. Kiswa-mutyima kyobe kilongeke.” (Mat. 6:10) Nanshi, monka motulombela Yehova alonge’po kintu pa kusaka’mba Bulopwe bwandi bwine ne kiswa-mutyima kyandi kilongeke, mo monka tulombanga Yehova alonge’po kintu mwanda wa kupandula dijina dyandi. Mu muneneno mukwabo, tulombanga Yehova amba aye mwine alonge’po kintu mwa kutalwila butyafu bonso bushingilwe dijina dyandi tamba ku butomboki bwa mu Edena. Le Yehova ukalondolola namani ku milombelo ya uno muswelo? Unena’mba: “Nkapandulamo dijina dyami dikatampe dyajilulwa umbukata mwa mizo’ya.” (Ezk. 36:23; 38:23) Yehova pakatalula’ko bibi byonso pa Amakedona, ukapandula dijina dyandi ku meso a bipangwa byonso.

6. Le netu tubwanya kulonga bika pa kupandula dijina dya Leza?

⁶ Mu bula bwa mānga, Yehova i mupe bengidi bandi muswelo wa kupandula dijina dyandi. Shako ketubwanyapo kupandula ne pa mfulo dijina dya Leza. Adyo i dijila kadi i dikola nyeke kwampikwa pashala. Ino i muswelo’ka otukedipandula? Isaya unena’mba: ‘Yehova wa bibumbo Ye o mufwaninwe kumona bu ujila.’ Kadi Yehova mwine wānene pangala pa bantu bandi amba: “Bakapandula dyami dijina . . . , ne kwakamwa Leza wa Isalela.” (Isa. 8:13; 29:23) Nanshi tupandulanga dijina dya Leza na kwidimona bu disansane ne bu didi peulu pa majina onso, na kulēmeka bine byodishintulula, ne na kukwasha bakwabo bonso bedimone bu dijila. Kutabukidila, tulombolanga’mba twakaminwe ne kulēmeka dijina dyandi potwitabija Yehova bu Muludiki wetu ne potumukōkela na mutyima wetu onso.—Nki. 3:1; Kus. 4:11.

7, 8. (a) Mwanda waka byalombele kitatyi pa kusaka’mba bantu ba Leza betyilwe pa dijina dyandi? (b) I bika byotusa kubandaula pano?

⁷ Tamba mu myaka ya 1870, bengidi ba Leza bengidijanga dijina dyandi mu mabuku abo. Kimfwa mu Kiteba kya Mulami kya Ziona kya mu Kweji 8, 1879 ne mu dibuku dya ñimbo ditwa bu Ñimbo ya Musongwa, dyalupwilwe enka mu mwaka’u mu Angele, mwadi dijina dya Yehova. Bimweka’mba Yehova wasakile kumona bidi shi bantu bandi i babwanye bisakibwa kumeso kwa kupebwa dyese dikatampe dya kwitwa pa dijina dyandi dijila ku meso a bantu bonso. Le Yehova wāteakenye namani bano Befundi babajinji ba Bible bekale basedi ba dijina dyandi?

⁸ Shi tutale kunyuma padi ke pakafule myaka ya 1800 ne ku ngalwilo kwa myaka ya 1900, tumona’ko muswelo watōkejeje Yehova bantu bandi bubine bwa mvubu butala dijina dyandi. Tubandaulei’mo bidi bintu bisatu mu buno bubine.

9, 10. (a) Mwanda waka bishinte bibajinjibajinji bya mu Kiteba kya Mulami byadi bitele mpata mutyima padi Yesu? (b) I bujadiki’ka bwalongekele tamba mu 1919, ne bwalupwile bipa’ka? (Tala ne kapango “ Kiteba kya Mulami Muswelo Okitumbije Dijina dya Leza.”)

⁹ Kibajinji, bengidi ba Yehova baikele na mumweno mwendele’mo pa dijina dya Leza. Befundi babajinji ba Bible ba kikōkeji badi bamwene mpangiko ya kinkūlwa bu lufundijo lukatampe lwa mu Bible. O mwanda mwine nanshi Kiteba kya Mulami kyadi kitela mpata Yesu. Kimfwa, mwaka umbajinji odyalupwilwe, mu dino dipepala, dijina dya Yesu dyatelelwe misunsa dikumi kupita dya Yehova. Kiteba kya Mulami kya mafuku 15 Kweji 3, 1976 kinena pangala pa Befundi ba Bible mu myaka imbajinjibajinji amba, “bapele [Yesu] bulēme bupite kipimo.” Ino mwenda mafuku, Yehova webakwasha bajingulule bulēme bupelwe dijina dya bunka dya Leza mu Bible. Le byatengele namani Befundi ba Bible? Kishinte kimo kyonka kya Kiteba kya Mulami kinena’mba, nakampata tamba mu 1919, Befundi “bashilwile kulombola bulēme bukatampe kudi Shandya Meshiasa udi mūlu, ke Yehova kadi.” Bine, mu myaka dikumi yalondele 1919, Kiteba kya Mulami kyatelele dijina dya Leza misunsa 6 500 ne kupita!

¹⁰ Banabetu pa kupa dijina dya Yehova bulēme bodifwaninwe, balombwele buswe bwabo bobaswele dijina dya Leza. Pamo bwa Mosesa wa pa kala, bashilwile kwela “lubila pa dijina dya Yehova.” (Kup. 32:3; Ñim. 34:3) Yehova nandi, monka mokilailwe mu Bisonekwa, wamwene buswe bwabo pa dijina dyandi, webetabija.—Ñim. 119:132; Bah. 6:10.

11, 12. (a) Le mabuku etu ajadikilwe namani kupwa’tu kwa 1919? (b) Le Yehova wakweshe bengidi bandi bate mutyima ku bika, ne mwanda waka?

¹¹ Kya bubidi, bene Kidishitu ba bine baimvwanije senene mwingilo wibapele Leza. Kinondanonda na 1919, banabetu bashingwe māni badi bendeja batonwenwe kubandaula bupolofeto bwa Isaya. Kupwa, batele mutyima ku kujadika myanda idi mu mabuku etu. Mwanda waka buno bujadiki bwadi bine “byakudya [bya] pa kitatyi kifwaninwe?”—Mat. 24:45.

¹² Kumeso kwa 1919, Kiteba kya Mulami kyadi kekyesambīle pa mwanda nansha umo wa mu bino binenwa bya Isaya bya amba: “E mwanenena Yehova namino amba: Banwe mwi  bami batumoni, ne mwingidi wami o natonga.” (Tanga Isaya 43:10-12.) Ino kupwa’tu kwa mwaka wa 1919, kyashilwile kuta mutyima ku kino kisonekwa kya mu Bible, kyakankamika bashingwe māni bonso bengile mwingilo wibapele Yehova—wa kupāna bukamoni padi. Tamba mu 1925 kutūla ku 1931 kete, Isaya shapita 43 watelelwe mu bishinte 57 palapala bya mu Kiteba kya Mulami, kadi kishinte ne kishinte kyatelēle bene Kidishitu ba bine bino binenwa bya Isaya. Bine, mu bula bwa myaka’yo, Yehova wasakile bengidi bandi bate mutyima ku mwingilo obadi bafwaninwe kwingila. Mwanda waka? Ku mutamba umo i mwanda wa “batompibwe bidi shi i bafwaninwe.” (1 Tm. 3:10) Kumeso kwa kwityilwa pa dijina dya Leza, Befundi ba Bible badi bafwaninwe bidi kulombola Yehova kupityila ku mingilo yabo amba bine i batumoni bandi.—Luka 24:47, 48.

13. Le Kinenwa kya Leza kilombola namani mwanda wa mvubu ufwaninwe kupwijibwa?

¹³ Kya busatu, bantu ba Yehova bafikile pa kusangela kamweno ka kupandwila dijina dya Leza. Mu myaka ya 1920, bajingulwile amba kupandulwa kwa dijina dya Leza i mwanda wa mvubu mpata ufwaninwe kupwija. Le kino Kinenwa kya Leza kyalombwele namani buno bubine bulēme? Tala bino bimfwa bibidi. Le i bubinga’ka bukatampe bwānyongolwedile Leza bene Isalela mu Edipito? Yehova wānene amba: “Dijina dyami disapulwe konso konso panopantanda.” (Div. 9:16) Ne mwanda waka Yehova wāfwidile bene Isalela lusa pobāmutombokēle? Yehova wānene monka amba: “Ino nalongela mwanda wa dyami dijina, amba dyakajilulwa mu meso abo.” (Ezk. 20:8-10) Le Befundi ba Bible befundile bika ku ino nsekununi ne ku mikwabo idi mu Bible?

14. (a) Bantu ba Leza bajingulwile bika dya ku mfulo kwa myaka ya 1920? (b) Kwimvwanija kwa mushike kwaimvwanije Befundi ba Bible kwadi na lupusa’ka pa mwingilo wabo wa busapudi? (Tala ne kapango “ Bubinga Bukatampe bwa Kusapwila.”)

¹⁴ Ku mfulo kwa myaka ya 1920, bantu ba Leza bajingulwile buluji bwa binenwa byānenene Isaya kintu kya myaka 2 700 kunyuma. Wānene padi Yehova amba: “E monka mo wakunkwija bobe bantu, kwitumbija dijina dyobe.” (Isa. 63:14) Befundi ba Bible baimvwanije amba, bubinga bwinebwine ke kwibapandijapo’tu, ino i mwanda wa kupandula dijina dya Leza. (Isa. 37:20; Ezk. 38:23) Mu 1929, kitabo Bupolofeto kya mu Angele kyanenene mu kīpi pa buno bubine amba: “Dijina dya Yehova dyo dya mvubu mpata ku meso a bipangwa byonso.” Buno bujadiki bwa mu mwimvwanino bwabwejeje’ko kininga mu bengidi ba Leza kya kupāna bukamoni padi Yehova ne kupampula bubela bonso bodibepelwe.

15. (a) Dya mu myaka ya 1930, le banabetu baikele na bika? (b) Le i kitatyi’ka kyabwene?

¹⁵ Ku ngalwilo kwa myaka ya 1930, banabetu baikele na mumweno moloke pa mvubu ya dijina dya Leza, ne kwimvwanija senene mwingilo webapele Leza, kadi bajingulula na mushike mwanda mwine ufwaninwe kupwijibwa. Pano, kitatyi kyabwene kya Yehova kupa bengidi bandi dyese dya kwityilwa pa dijina dyandi ku meso a bantu bonso. Tubandaulei myanda imo yapityile kala ilombola mobapēlelwe dino dyese.

16. (a) I muswelo’ka wa kutendelwa utumbijija’mo Yehova dijina dyandi? (b) Pa kala, le i bāni bādi baselele dibajinji dijina dya Leza?

¹⁶ Muswelo umo wa kutendelwa watumbije Yehova dijina dyandi i kwikala na bantu betyilwa pa dijina dyandi pano pa ntanda. Tamba mu 1513 K.K.K., bantu ba Yehova wādi muzo wa Isalela. (Isa. 43:12) Inoko bākomenwe kuvuija kiselwa kyabo mu kipwano kyabo na Leza, ne kufika mu 33 K.K., bājimija kipwano kyabo kya pa bula pamo nandi. Kepāijijepo kala, Yehova wāta “mutyima dibajinji ku mizo mwanda wa kutonga’mo bantu ba dijina dyandi.” (Bil. 15:14) Bantu bapya bātongelwe bāyukene bu “Isalela wa Leza,” ubundilwe na balondi bashingwe māni ba Kidishitu batambile mu mizo yonso.—Ngt. 6:16.

17. I nkuku’ka yafikidije Satana?

 ¹⁷ Mu 44 K.K., bana ba bwanga ba Kidishitu bāityilwe “na buludiki bwa Leza bu bene Kidishitu.” (Bil. 11:26) Ku ngalwilo, dino dijina dyādi dibwane, mwanda dyādi ditelelwa’nka bene Kidishitu ba bine kete. (1 Pe. 4:16) Inoko, enka mwēkinenene Yesu mu kyelekejo kya ñano ne biyombo bityani, Satana wāfikidije nkuku yandi ya kwingidija dino dijina dya bu bene Kidishitu ne ku bipwilo byonso bītela bu bya bwine Kidishitu. O mwanda, mu bula bwa tutwa twa myaka, bene Kidishitu ba bine kebadipo besansanye patōkelela na bipwilo bītela bu bya bwine Kidishitu. Inoko bino byashilwile kushinta mu “kitatyi kya mwangulo,” kyaanjile mu 1914. Mwanda waka? Mwanda bamwikeulu bashilwile kusansanya bene Kidishitu ba bubela na bene Kidishitu ba bine.—Mat. 13:30, 39-41.

18. I bika byakweshe banabetu bamone’mba bafwaninwe kushinta dijina dyobetyilwa’po?

¹⁸ Umpika mukōkele pa kutūlwa’ko mu 1919, Yehova wakweshe bantu bandi bajingulule mwingilo mwine waebapele kwingila. Bamwene bukidi bonka amba kusapula ku njibo ne njibo kwibasansanyanga na bipwilo byonso bītela bu bya bwine Kidishitu. Abo pa kujingulula buno bubine, kepaijijepo bayuka amba kutelwa bu “Befundi ba Bible” kekwakidipo kwibashiyañanya. Mwingilo wabo umbajinji umbūmi kewakidipo’tu’nka wa kwifunda Bible, ino i wa kupāna bukamoni padi Leza, kulēmeka ne kutumbija dijina dyandi. Pene’pa i dijina’ka dyadi dyendele’mo kukwatañana na mwingilo obadi bengila? Kino kipangujo kyalondolwelwe mu 1931.

19, 20. (a) Le i lukwembo’ka lwatyipilwe ku kitango kya mu 1931? (b) Le banabetu balongele namani pa kupebwa dino dijina dipya?

¹⁹ Mu Kweji 7, 1931, kintu kya Befundi ba Bible 15 000 baile mu Columbus, Ohio, États-Unis, kutanwa ku kitango. Abo pa kutala ku mpangiko ya kitango, batulumunwa na masomo abidi makatampe J ne W adi pa kibalu. Kebeipangula’mba, ‘Le ano masomo ashintulula bika?’ Bamo balangile amba adi ashintulula amba, ‘Abe Tengela’ (Just Watch); bakwabo nabo amba i, ‘Abe Kungila’ (Just Wait). Ebiya, mu Dya Yenga, mafuku 26 Kweji 7, Tutu Joseph Rutherford waletele lukwembo lwadi’mo bino binenwa bya bukomo amba: “Tusakanga kuyukwa ne kwitwa mobifwaninwe bu “Batumoni ba Yehova.” Mu nsá’ya, bemvwaniki bonso ko kuyuka bayuka buluji bwa ano masomo adi ebakanja—baitabije kwikala Batumoni ba Yehova, (Jehovah’s Witnesses), dijina dya mu Bisonekwa dimanine pa Isaya 43:10.

²⁰ Bemvwaniki baitabija luno lukwembo na byungwe ne kukupila makasa kashā bakupilē. Kupityila ku ladiyo bantu baimvwene ntanda yonso bino byungwe bya mu Columbus! Ba Ernest ne Naomi Barber ba mu Ostrali bavuluka’mba: “Padi pakupilwa makasa mu Amerika, banabetu ba mu Melbourne badi batumbuka’nka kutumbuka koku bakupila nabo makasa. Ketukelwapo nansha dimo uno mwanda!” a

21. Le dino dijina dipya dyatonwene namani bantu ku mwingilo wa busapudi?

²¹ Kutelelwa pa dijina dya mu Bisonekwa dya bu Batumoni ba Yehova kwabwejeje’ko bengidi ba Leza bukomo bwa kwingila mwingilo wa busapudi. Ba Edward ne Jessie Grimes, ba mulume ne mukaji bapania ba mu États-Unis batenwe ku kitango kya mu Columbus mu 1931 banene amba: “Twatambile kwetu bu Befundi ba Bible, twajokela’ko bu Batumoni ba Yehova. Twasangele pa kuyuka’mba pano ke tudi na dijina ditukwasha tutendele dijina dya Leza wetu.” Pa kupwa kwa kino kitango, Batumoni bamo baingidije manwa mapya pa kuyukwa senene. Badi betela ku mwisambi nabo na kumufunka kalata kalembelwe’po amba: “Ndi kamoni wa YEHOVA usapula bulopwe bwa YEHOVA Leza wetu.” Bine, bantu ba Leza badi befyela kwityilwa padi dijina dya Yehova, kadi badi belongolole kala kusapula buluji bwadyo ne kulampe kwine kwa ntanda.—Isa. 12:4.

22. Le i bika bilombola’mba bantu ba Yehova badi na dijina dibashiyañanya?

²² Ke padi myaka mivule tamba Yehova upēla banabetu bashingwe māni bukomo bwa kusela dino dijina dibashiyañanya. Tamba mu 1931, le Satana i mubwanye kujimakanya dijina diyukanya bantu ba Leza? Le i mubwanye kwitutokenya mu bipwilo bya ntanda? Kijila, kabwenyepo! Ino, dijina dyetu dituyukanya bu batumoni ba Leza wetu po pene dyendanga ditusansenya’ko kutabuka. (Tanga Mika 4:5; Malaki 3:18.) Bine, twi balamate ku dino dijina dya Leza, dyalelo muntu ense utela’dyo’tu kebejanga kumuyuka bu Kamoni wa Yehova. Pa kyaba kya kujimankanibwa na bipwilo bya bubela bidi pamo bwa ngulu, mutōtelo wa bine wa Yehova i ‘mukomejibwe peulu pa nsongo ya ngulu.’ (Isa. 2:2) Dyalelo na bubine, mutōtelo wa Yehova ne dijina dyandi dijila, i bitumbijibwe bininge.

23. Kukwatañana na Mitōto 121:5, le i bubine’ka bwa kamweno butala padi Yehova bwitukankamika?

²³ Bine, i kintu kikankamika’po kashā kuyuka’mba Yehova uketufya ku butambañani bwa Satana dyalelo ne mu mafuku a kumeso! (Ñim. 121:5) Tudi na bubinga bwa kwilunga ku kabobo ka mulembi wa mitōto wāsonekele amba: “Keo wa katōkwe kao shao! owa muzo udi ne Leza wao Yehova; bantu bātongele ke bakupyana bandi aye mwine.”—Ñim. 33:12.