1, 2. Oñgeni Ombimbiliya Tradução do Novo Mundo inkhimaneka enyina lia Huku?

 MONTHIKI imwe komuhuka, Muvali 2 ya Kayovo yo 1947, otyikundyi otyitutu tyo vakuatate ovalembulwa vatunda ko Mbetele yo Brooklyn, ko Nova York, vahimbika otyilinga tyimwe otyinene. Otyilinga otyo ankho katyapepukile, mahi vatualako okutyilinga momanima 12 alandulako. Okuhulililako mo Tyalumingu, 13 ya Tyitalale yo 1960, vamanuhula okupitiya onthele yahulililako Yombimbiliya omphe. Etyi palamba onohanyi ononthatu, monthiki 18 ya Pepo Linene yo 1960, Omukuatate Nathan Knorr alekesa Ombimbiliya Tradução do Novo Mundo das Escrituras Sagradas kovateheleli vahambukwa motyonge tyalingilwa mo Manchester, ko Inglaterra. Omulongomoni walekesa nawa oñgeni aveho motyonge velitehelela etyi ati: ‘Hono onthiki yehambu ko Nombangi mba Jeova ouye auho!’ Otyipuka tyimwe tyavilapo tyihambukiswa tyikahi Mombimbiliya ei, omokonda ipopia unene enyina lia Huku.

² Mono Mbimbiliya ononyingi mutupu enyina lia Huku. Mahi ovaumbili ovalembulwa va Jeova, kavatokelele meliva lia Satanasi liokuholeka enyina lia Huku kovanthu. Onondaka mbokuhimbika mbo Tradução do Novo Mundo yalekeswa monthiki oyo, mbati: “Otyipuka tyakolela vali Mombimbiliya ei, okukondola enyina lia Huku pomphangu liayo.” Ngotyo, Ombimbiliya Tradução do Novo Mundo, ipopia enyina lia Huku, Jeova, ovikando vilamba po 7.000. Ombimbiliya ei, ikahi nokunkhimaneka enyina lia Tate keulu, Jeova!

3. (a) Oityi ovakuatate vetu vanoñgonoka konthele yetyi enyina lia Huku lihangununa? (b) Oñgeni tuna okunoñgonoka Êxodo 3:13, 14? (Tala okakasa kati “ Etyi Enyina lia Huku Lihangununa.”)

³ Omanima okualamba, Ovalilongesi Vombimbiliya vanoñgonoka okuti enyina lia Huku lihangununa okuti “Ame ndyikahi ngetyi ndyikahi.” (Êxo. 3:14, Version King James) Omutala Womulavi wa 1 ya Kupupu yo 1926, wati: “Enyina Jeova lihangununa okuti Una uhatungilwe, . . . Una uhena onthyimbi nonthyulilo.” Ngotyo, etyi ovapitiyi vahimbika okupitiya o Tradução do Novo Mundo, Jeova wakuatesako ovanthu vae okunoñgonoka okuti enyina liae kalilekesa vala  okuti oe katungilwe, mahi haunene o Huku yevangelo novilinga. Vanoñgonoka okuti enyina lia Jeova lihangununa okuti “Oe Ufuisapo Etyi Ahanda.” Enga, oe walinga ouye novipuka vina onondunge, tupu utualako nokufuisapo ehando liae nevangelo liae. Tyakolela unene okunkhimaneka enyina lia Huku mokonda yatyi? Oñgeni nonthue tupondola okulinkhimaneka?

4, 5. (a) Tyina tulikuambela okuti “enyina liove lisukukiswe,” tukahi nokuita tyi? (b) Onalupi noñgeni Huku masukukisa enyina liae?

⁴ Jeova uhanda enyina liae linkhimanekwe. Tyotyili, ehando liae liotete okusukukisa enyina liae. Otyo tyimoneka nawa muetyi Jesus aita tete melikuambelo liae: “Tate yetu keulu, enyina liove lisukukiswe.” (Mat. 6:9) Tyina tulikuambela ngotyo, tukahi nokuita tyi?

⁵ Ngetyi tuelilongesa Mokapitulu 1 komukanda ou, okuita okuti “Enyina liae lisukukiswe,” otyipuka tyatatu Jesus aita melikuambelo liae, konthele yehando lia Jeova. Ovikuavo vivali ovievi: “Ouhamba wove uye. Ehando liove lilingwe pano pohi.” (Mat. 6:10) Moluotyo, tyina tuita ku Jeova okuti Ouhamba wove uye, ehando liove lilingwe pano pohi, ngotyo tukahi nokuita opo Jeova alinge atyiho pala okusukukisa enyina liae. Monondaka ononkhuavo, tukahi nokuita Jeova opo asukukise enyina liae kesilo liapakwa tunde koumphuki wo mo Endene. Oñgeni Jeova makumbulula elikuambelo? Oe wati: “Ame tyotyili mandyisukukisa enyina liange enene, likahi nokusiliswa novanthu vomalongo.” (Eze. 36:23; 38:23) Mo Armagedon, tyina amanyimiko ovivi, Jeova makasukukisa enyina liae komaiho ovipuka aviho atunga.

6. Oñgeni matukuatesako okusukukisa enyina lia Huku?

⁶ Mokueenda kuomanima, Jeova ukahi nokuyeka ovaumbili vae vemukuateseko okusukukisa enyina liae. Tyotyili, onthue katupondola okusukukisa vali unene enyina lia Huku. Mokonda muene liasukukale monkhalelo yavilapo. Ngotyo oñgeni matulisukukisa? Isaia wati: “Muesukisa okutala okuti Jeova wonongombo mbovita, omusukuki.” Iya Jeova wapopia konthele yovanthu vae okuti: “Mavasukukisa enyina liange, . . . nokukala nonthilo na Huku yo Isilayeli.” (Isa. 8:13; 29:23) Ngotyo, matusukukisa enyina lia Huku, tyina tulitala okuti lielikalela nokuavilapo komanyina omakuavo aeho. Tupu, tulisukisika tyina tukala nonthilo na muene walio, nokukuatesako vakuetu vaimbuke okuti enyina olio liasukuka. Onthue matulekesa haunene okuti tuna onthilo nokuapanda enyina lia Huku tyina tuimbuka okuti Jeova Omutumini wetu, nokutavela kwe nomutima auho.—Pro. 3:1; Apo. 4:11.

7, 8. (a) Omokonda yatyi ovanthu va Huku vakalela ehimbwe pala okutyinda enyina Liae? (b) Oityi matulilongesa pahe?

⁷ Ovanthu va Huku hono, vaundapesa enyina lia Huku momikanda viavo tunde mo 1870. Mongeleka, omukanda Torre de Vigia de Sião wa Kwenye Kunene yo 1879, no woviimbo utiwa Cânticos da Noiva nao walingua menima olio, vipopia enyina Jeova. Mahi, tyimoneka okuti opo Jeova ayeke ovanthu vae vaihanwe enyina liae liasukuka, tete watala nawa okuti vekahi nokuendela movitumino viae vielikuata notyilinga otyo otyinene. Oñgeni Jeova apongiya Ovalilongesi ovo Vombimbiliya votete, opo vatyinde enyina liae?

⁸ Okutala konyima, konthyulilo yomanima 1800 alo konthyimbi yomanima 1900, tuimbuka okuti Jeova waavela ovanthu vae enoñgonoko liotyili tyakolela konthele yenyina liae. Potyili otyo tutalei po vitatu.

9, 10. (a) Omokonda yatyi ononthele mbotete mbo Mutala Womulavi ankho mbupopila vali Jesus? (b) Epiluluko patyi liahimbikila mo 1919 okuenda no komutwe? Iya otyo atyieta tyi? (Tupu, tala okakasa kati “ Oñgeni Omutala Womulavi Ukahi Nokunkhimaneka Enyina lia Huku.”)

⁹ Tete, ovaumbili va Jeova vahimbika okutala esilivilo lienyina lia Huku monkhalelo yaviuka. Ovalilongesi vekolelo Vombimbiliya vaimbuka okuti otyilikutila tyeyovo elongeso liavilapo lio Mbimbiliya. Otyo tyilekesa omokonda yatyi Omutala Womulavi upopila unene Jesus. Mongeleka, menima liotete etyi Omutala Womulavi walingua, wapopia enyina lia Jesus ovikando ekwi tyipona enyina lia Jeova. Omutala Womulavi 15 ya Tyitalale yo 1976, wapopia konthele yomanima otete Ovalilongesi Vombimbiliya, okuti “vaavelele unene esilivilo lihaviukile” Jesus. Mokueenda kuomuvo Jeova wevekuatesako okuimbuka esilivilo Ombimbiliya yaavela enyina lia Huku. Oñgeni otyo tyakalesa Ovalilongesi Vombimbiliya? Haunene tunde mo 1919 okuenda no komutwe, onthele oyo Yomutala Womulavi, yati, “vahimbika okunkhimaneka vali Jeova Tate ya Mesiya keulu.” Omanima ekwi alandula ko 1919, Omutala Womulavi wapopia enyina lia Huku ovikando vilamba 6.500!

¹⁰ Mokuaavela enyina lia Jeova omunkhima liatokala, ovakuatate vetu valekesa okuti vehole enyina lia Huku. Nga Moisesi kohale, “vaivisa enyina lia Jeova.” (Deut. 32:3; Sal. 34:3) Moluotyo, ngetyi Ovihonekwa vialaa, Jeova wamona ohole vena nenyina liae, iya evepande.—Sal. 119:132; Heb. 6:10.

11, 12. (a) Omonkhalelo patyi omikanda vietu viapiluluka konyima yo 1919? (b) Oityi ankho Jeova ekahi nokulekesa kovaumbili vae, omokonda yatyi?

¹¹ Vali, Ovakristau votyotyili vena enoñgonoko liaviuka konthele yovilinga vapewa na Huku. Etyi o 1919 yalamba, ovakuatate ovalembulwa ankho vekahi komutwe, avahimbika okulilongesa eulo lia Isaia. Konyima yotyo, omikanda vietu avihimbika okupiluluka. Omokonda yatyi epiluluko olio, liakalela “okulia momuvo wanakua”?—Mat. 24:45.

¹² Etyi 1919 ihenehike po, Omutala Womulavi ankho kaunepopie nawa konthele yonondaka mba Isaia mbokuati: Jeova wapopia okuti: “‘Onwe,  onwe nombangi mbange, enga, omuumbili wange una naholovona.’” (Tanga Isaías 43:10-12.) Mahi, konyima yo 1919, omikanda vietu viahimbika okuhangununa nawa onondaka ombo mbo Mbimbiliya, okuavela ondundo ovalembulwa aveho, opo valinge ovilinga Jeova eveavela, viokuava oumbangi konthele yae. Tunde 1925 alo 1931, okapitulu 43 ka Isaia ankho kelilongeswa Momutala Womulavi ovikando 57. Kese nthele ankho iviukisa onondaka mba Isaia mo Vakristau votyotyili. Mokueenda kuomanima oo, Jeova ankho ukahi nokulekesa ovaumbili vae ovilinga vena okulinga. Omokonda yatyi? Omokonda ankho vena “okulolwa tete inkha vafuapo.” (1 Tim. 3:10) Etyi Ovalilongesi Wombimbiliya nkhele veheneihanwe okuti Onombangi mba Jeova, ankho vena okulekesa ku Jeova novilinga viavo okuti tyotyili onombangi mbae.—Luc. 24:47, 48.

13. Oñgeni Ondaka ya Huku yahololola otyipuka tyakolela tyina okutetululwa?

¹³ Tatu, ovanthu va Jeova vanoñgonoka esilivilo liokusukukisa enyina lia Huku. Mokueenda kuomanima ahimbika 1920, vaimbuka okuti okusukukisa enyina lia Huku otyipuka tyakolela vali tyina okutetululwa. Oñgeni Ondaka ya Huku yahololola otyili otyo tyakolela? Tala onongeleka onombali. Ehunga patyi liavilapo Huku ayovolela ova Isilayeli ko Egitu? Jeova wati: “Opo enyina liange liiviswe mouye auho.” (Êxo. 9:16) Iya omokonda yatyi Jeova akalela nokankhenda no va Isilayeli etyi vemutyitukilapo vali? Jeova apopi vali okuti: “Ame nalinga ngotyo mokonda yenyina liange, opo lihapopiwe omapita komalongo.” (Eze. 20:8-10) Oityi Ovalilongesi Vombimbiliya velilongesila komahipululo oo Ombimbiliya nomakuavo?

14. (a) Tunde konthyulilo yomanima 1920, oityi ovanthu va Huku vaimbuka? (b) Enoñgonoko enene Ovalilongesi Vombimbiliya vakala nalio lievekalesa ñgeni movilinga viokuivisa? (Tala okakasa kati “ Ehunga Enene pala Okuivisa.”)

¹⁴ Konthyulilo yomanima 1920, ovanthu va Huku vanoñgonoka etyi tyihangununa onondaka Isaia apopia omanima 2.700 konyima. Konthele ya Jeova oe wati: “Ongotyo wahongolela ovanthu vove, opo unkhimaneke enyina liove.” (Isa. 63:14) Ovalilongesi Vombimbiliya vanoñgonoka okuti otyipuka tyakolela vali, heyovo lia kese umwe, mahi okunkhimaneka enyina lia Huku. (Isa. 37:20; Eze. 38:23) Mo 1929, omukanda utiwa Profecia wahangununa otyili otyo okuti: “Enyina lia Jeova, otyipuka tyakolela unene kovipuka aviho atunga.” Enoñgonoko olio epe lialunda ovaumbili va Huku okuava oumbangi konthele ya Jeova nokusukukisa enyina liae kounkhembi.

15. (a) Menima 1930, oityi Ovakuatate vetu valingile? (b) Ankho omuvo wehikapo, owokulinga tyi?

¹⁵ Konthyimbi yomanima 1930, ovakuatate vetu vakalele nolusoke luaviuka konthele yenyina lia Huku. Vanoñgonoka nawa ovilinga Huku eveavela pala okulinga, notyipuka tyavilapo tyina okutetululwa. Ankho pahe omuwo wa Jeova wehikapo wokupanda ovaumbili vae opo vatyinde enyina liae. Opo tunoñgonoke oñgeni tyaenda, tutalei ovipuka vimwe viaendako.

16. (a) Omonkhalelo patyi yavilapo Jeova ankhimaneka enyina liae? (b) Kohale ovalie vakalele tete ovanthu venyina lia Huku?

¹⁶ Onkhalelo imwe Jeova ankhimaneka enyina liae, okuna ovanthu pano pohi vatyinda enyina liae. Tunde mo 1513 P.K.E okuenda no komutwe, elongo lio Isilayeli ankho ovanthu va Jeova. (Isa. 43:12) Mahi, vaponya okufuisapo otyilinga tyavo momphango yavo na Huku. Iya menima 33 P.K., oupanga wavilapo ankho vena na Huku, wahanyauka-po. Etyi palamba katutu, Jeova “ahimbika okutala nawa momalongo, opo aholovone-mo ovanthu pala enyina liae.” (Atos 15:14) Ovanthu ovo ovape vaholovonwa, avaihanwa okuti “o Isilayeli ya Huku,” ovalanduli ovalembulwa va Kristu, vatunda momalongo omanyingi.—Gál 6:16.

17. Eliva patyi Satanasi evila okuundapesa nawa?

 ¹⁷ Menima 44 P.K., ovalongwa va Kristu, “kehando lia Huku vaihanwa okuti Ovakristau.” (Atos 11:26) Potete, enyina olio ankho o liavo vala, ankho olio Vakristau votyotyili vala. (1 Ped. 4:16) Mahi, ngetyi onthengele-popia ya Jesus yotiliku nevu yalekesa, Satanasi waundapesa nawa eliva liae liokuihana Ovakristau aveho vouye okuti Ovakristau. Moluotyo, momanima omanyingi, ankho katyapepukile okupunga Ovakristau votyotyili ko Vakristau vouye. Mahi, otyo tyahimbika okupiluluka mokueenda “kuomuvo wokuteya,” wahimbika mo 1914. Omokonda yatyi? Omokonda ono andyu mbahimbika okupunga Ovakristau vouye ko votyotyili.—Mat. 13:30, 39-41.

18. Oityi tyakuatesako ovakuatate vetu okuimbuka okuti ankho vesukisa enyina epe?

¹⁸ Etyi omupika wekolelo aholovonwa mo 1919, Jeova wakuatesako ovanthu vae okunoñgonoka ovilinga evetuma okulinga. Liwa-liwa vaimbuka okuti okuivisa umbo na umbo, matyivekalesa tyelikalela no Vakristau aveho vouye. Etyi vasoka ngotyo, kapakalele ehimbwe avaimbuka okuti enyina “Ovalilongesi Vombimbiliya” kalivepungu. Otyilinga tyavo tyotete, hakulilongesa vala Ombimbiliya, okuava oumbangi konthele ya Huku, okuhumba nokunkhimaneka enyina liae. Ngotyo, enyina patyi lielikuata novilinga ankho vekahi nokulinga? Epulo olio liakumbululwa menima 1931.

19, 20. (a) Eiviso patyi lialingwa motyonge tyo 1931? (b) Etyi ovakuatate vetu vapopilwa enyina epe, atyivekalesa ñgeni?

¹⁹ Mu Kakwenye yo 1931, Ovalilongesi Vombimbiliya vatuuka 15.000, aveya kotyonge otyinene mo Kolumbus, Ohio, ko Amelika. Etyi vatala po programa yotyonge, avakala nolumbwe nomaletela evali J no W, ahonekwa kombanda. Ankho velipula oityi ahangununa. Avakala nomalusoke elikalaila. Mo Tyalumingu 26 ya Kakwenye Omukuatate Joseph Rutherford wapopia etokolo liati: “Onthue tuhanda okunoñgonokwa nokuihanwa okuti Onombangi mba Jeova.” Okutuka opo, aveho ankho vekahipo avanoñgonoka omaletela oo ankho ekahi po programa, iya avetavela enyina Onombangi mba Jeova, liatunda Movihonekwa mu Isaías 43:10.

²⁰ Ovateheleli vetavela etokolo olio nokukuiilila nokuhakela ehimbwe. Ehambu olio mo Kolumbu, aliivala kovilongo ovinyingi molaliu! Ernest na Naomi Barber ko Australia, vati: “Etyi veiva ovakuatate ko Amelika vatualako okuhakela, ovakuatate mo Melbourne vatutula navo avahakela. Onthue kamatutyilimbwa nalumwe!” a

21. Oñgeni enyina epe lievelunda movilinga viokuivisa?

²¹ Mokonda pahe vatiwa Onombangi mba Jeova, enyina liapolwa Movihonekwa, tyevepa vali ononkhono mbokuundapa movilinga  viokuivisa. Edward na Jessie Grimes, ovakokoli-ndyila ko Estados Unidos, vokuali potyonge mo Kolumbu mo 1931, vati: “Keumbo tuatunda-ko Tuvalilongesi Vombimbiliya, mahi tuakondoka Tunombangi mba Jeova. Ankho tuahambukwa mokonda pahe tuna enyina litukuatesako okunkhimaneka enyina lia Huku yetu.” Konyima yotyonge otyo, Onombangi vamwe avaundapesa onkhalelo omphe yokunkhimaneka enyina lia Huku. Ankho vahimbika etompho, mokulekesa kovanthu otyikalatau tyahonekwa okuti: “Umwe po nombangi mba JEOVA wivisa Ouhamba wa JEOVA Huku yetu.” Tyotyili, ovanthu va Huku ankho vahambukwa okutyinda enyina Jeova. Tupu ankho vafuapo pala okuivisa etyi enyina olio lihangununa ouye auho.—Isa. 12:4.

22. Oityi tyilekesa okuti Ovanthu va Jeova vena enyina lielikalela?

²² Palamba omanima omanyingi tunde etyi Jeova alunda ovakuatate vetu ovalembulwa vatokola okuihanwa enyina lielikalela. Tunde menima lio 1931, okuti Satanasi wetyivila okuholeka enyina liovanthu va Huku? Okuti wetyivila okutyilika ovanthu okutupunga konongeleya ononkhuavo? Au, ketyivilile! Mahi, mokonda tunombangi mba Huku, tumoneka vali nawa okuti tuelikalela. (Tanga Miquéias 4:5; Malaquias 3:18.) Tyotyili, enyina lia Huku lietukuata nawa, kese munthu ulitumbula hono, liwa-liwa vemuihana okuti Ombangi ya Jeova. Onongeleya mbomatutu mbokukahi ngo nomphunda ononyingi, kambevilile okuholeka efendelo liotyotyili. Mahi efendelo liotyotyili lia Jeova “liapumphikwa kombanda yovitongo-tongo vionomphunda.” (Isa. 2:2) Hono efendelo lia Jeova, nenyina liae esukuki vikahi nokunkhimanekwa unene.

23. Ngetyi tyapopia o Salmo 121:5, otyili patyi tyakolela konthele ya Jeova tyitupameka unene?

²³ Tyitupameka unene okunoñgonoka okuti Jeova metuyakulila kovilwa Satanasi etukatulila hono no komutwe! (Sal. 121:5) Nehunga ewa, tupopia ngo muhoneki wo salmu wati: “Lina ombembwa elongo liiwe okuti Huku yalio o Jeova, Ovanthu aholovona opo vakale epingo liae.”—Sal. 33:12.