1, 2. Kon e Tradukshon di Mundu Nobo ta halsa e nòmber di Dios?

 DJAMARS mainta, 2 di desèmber 1947, un grupo chikitu di ruman ungí di Bètel na Brooklyn, New York, a kuminsá traha riba un proyekto inmenso. E trabou tabata pisá, pero nan a keda riba dje 12 aña largu. Por fin, djadumingu 13 di mart 1960, nan a kaba ku e teksto final di un tradukshon nobo di Beibel. Tres luna despues, dia 18 di yüni 1960, Ruman Nathan Knorr a anunsiá publikashon di e último tomo di e Tradukshon di Mundu Nobo di e Santu Skritura. E públiko ku tabata presente na e kongreso ei na Manchester, Inglatera, a keda masha emoshoná ku awor e tradukshon di Beibel ei tabata kompleto. E oradó a ekspresá e sintimentu di tur presente ora el a deklará: ‘Awe ta un dia di alegria pa tur Testigu di Yehova rònt mundu!’ Un karakterístika sobresaliente di e tradukshon nobo ei tabata e echo ku el a usa e nòmber personal di Dios tur kaminda ku esaki a aparesé den e teksto bíbliko original. Esei a hasi e rumannan masha kontentu mes!

² Hopi tradukshon di Beibel ta laga e nòmber di Dios afó. Pero e sirbidónan ungí di Yehova a para firme kontra e kòmplòt di Satanas pa saka e nòmber di Dios for di hende su mente. Segun e introdukshon di e Tradukshon di Mundu Nobo ku a sali e dia ei: “E karakterístika prinsipal di e tradukshon akí ta ku el a restorá e nòmber divino na su lugá legítimo.” I esei ta bèrdat! E Tradukshon di Mundu Nobo ta usa Dios su nòmber personal, Yehova, mas ku 7.000 biaha. E tradukshon akí sí a halsa e nòmber di nos Tata selestial, Yehova, na un manera ekstraordinario!

3. (a) Kiko nos rumannan a bin komprondé tokante nifikashon di e nòmber di Dios? (b) Kon nos mester komprondé Éksodo 3:13 i 14? (Wak e kuadro “ Nifikashon di e Nòmber di Dios.”)

³ Na prinsipio, e Studiantenan di Beibel tabata komprondé ku e nòmber di Dios ta nifiká “AMI TA ESUN KU TA.” (Éks. 3:14, BPK) Pues, E Toren di Vigilansia di 1 di yanüari 1926 a komentá: “E nòmber Yehova ta nifiká . . . Esun ku no tabatin kuminsamentu ni final.” Pero tempu ku e rumannan a kuminsá traha riba e Tradukshon di Mundu Nobo di e Santu Skritura, ya  Yehova a yuda su pueblo komprondé ku su nòmber no ta nifiká simplemente ku e no tin kuminsamentu ni final, sino ku mas bien e ta un Dios ku tin un gran propósito i ku e ta dal e pasonan nesesario pa kumpli kuné. Nan a komprondé ku e nòmber Yehova ta nifiká literalmente “e ta kousa pa bira òf kousa pa bini na eksistensia.” Sí, ta Yehova ta Esun ku a kousa e eksistensia di e universo i di kriaturanan inteligente, i e ta sigui sòru pa su boluntat i propósito bira realidat. Pero dikon ta asina importante pa e nòmber di Dios ser halsá, i kon nos por yuda hals’é?

4, 5. (a) Kiko nos ta pidi p’e ora nos ta bisa Yehova den orashon: “Bo nòmber sea santifiká”? (b) Na ki tempu Dios lo santifiká su nòmber, i kon?

⁴ Yehova ke pa su nòmber ser halsá. De echo, e propósito prinsipal di Yehova ta pa santifiká su nòmber, manera e promé petishon di Hesus su orashon modelo ta laga nos mira klaramente: “Tata . . . bo nòmber sea santifiká.” (Mat. 6:9) Kiko presis nos ta pidiendo Yehova?

⁵ Manera nos a siña den Kapítulo 1 di e buki akí, “Bo nòmber sea santifiká” ta un di e tres petishonnan den Hesus su orashon modelo ku tin di haber ku e propósito di Yehova. E dos otronan ta: “Laga bo Reino bini. Laga bo boluntat sosodé.” (Mat. 6:10) Pues, meskos ku nos ta pidi Yehova pa tuma akshon pa laga su Reino bini i pa su boluntat sosodé, asina tambe nos ta pidi Yehova pa tuma akshon pa santifiká su nòmber. Ku otro palabra, nos ta pidiendo Yehova pa dal paso pa limpia su nòmber ku nan a lastra den lodo desde e rebelion den Edén te awe. Kon Yehova lo kontestá e orashon ei? El a deklará: “Lo mi santifiká mi nòmber grandi ku a wòrdu profaná meimei di e nashonnan.” (Eze. 36:23; 38:23) Na Armagedon, Yehova lo santifiká su nòmber den bista di henter kreashon ora e eliminá maldat.

6. Kon nos por yuda santifiká e nòmber di Dios?

⁶ Atraves di historia, Yehova a permití su sirbidónan yuda santifiká su nòmber. Ya ku e nòmber di Dios ta santu den tur sentido, nos no por hasié mas santu, òf sagrado, di loke e ta kaba. Kon nos por santifik’é anto? Isaías a deklará: “Ta [Yehova] di ehérsitonan boso mester konsiderá komo santu.” I Yehova mes a bisa en konekshon ku su pueblo: ‘Nan lo santifiká mi nòmber; nan lo sinti profundo rèspèt pa e Dios di Israel.’ (Isa. 8:13; 29:23; BPK ) Pues, nos ta santifiká e nòmber di Dios ora nos ta konsider’é apart for di tur otro nòmber i mas haltu ku tur otro nòmber, ora nos ta respetá loke e ta representá i ora nos ta yuda otro hende konsider’é santu. Un manera spesial ku nos ta demostrá nos rèspèt i atmirashon profundo pa e nòmber di Dios ta ora nos ta rekonosé Yehova komo nos Gobernante i ta obedes’é di henter nos kurason.—Pro. 3:1; Rev. 4:11.

7, 8. (a) Dikon a dura un tempu promé ku e pueblo di Dios por a karga Su nòmber? (b) Kiko nos lo bai konsiderá awor?

⁷ For di dékada di 1870, e sirbidónan di Dios di nos tempu a kuminsá usa Yehova su nòmber den nan publikashonnan. Por ehèmpel, E Toren di Vigilansia di ougùstùs 1879 i un buki di kantika publiká e mesun aña ei, Kantikanan di e Brùit, ta menshoná e nòmber Yehova. Pero ta parse ku promé ku Yehova a permití su pueblo yama nan mes públikamente na su nòmber sagrado, el a sòru pa nan kumpli ku e rekisitonan nesesario pa nan por risibí e gran privilegio ei. Kon Yehova a prepará e promé Studiantenan di Beibel pa nan bai karga su nòmber?

⁸ Ora nos wak bèk na e periodo entre fin di siglo 19 i komienso di siglo 20, nos ta mira kon Yehova a duna su pueblo un komprondementu mas kla di vários bèrdat importante relashoná ku su nòmber. Laga nos konsiderá tres di nan.

9, 10. (a) Dikon e promé artíkulonan di E Toren di Vigilansia tabata konsentrá riba Hesus? (b) Ki kambio a tuma lugá di 1919 en adelante, i ku ki resultado? (Wak e kuadro “ E Toren di Vigilansia A Halsa e Nòmber di Dios.”)

⁹ Di promé, e sirbidónan di Yehova a bin komprondé kon importante e nòmber di Dios ta. Na prinsipio, e fiel Studiantenan di Beibel a konsiderá e provishon di e reskate komo e siñansa prinsipal di Beibel. Ta p’esei E Toren di Vigilansia tabata konsentrá asina tantu riba Hesus. Por ehèmpel, e promé aña di publikashon, e revista ei a menshoná e nòmber “Hesus” 10 biaha mas tantu ku e nòmber “Yehova.” La Atalaya di 15 di ougùstùs 1976 a bisa ku durante e promé añanan di e Studiantenan di Beibel, nan a duna “demasiado importansia” na Hesus. Pero ku tempu, Yehova a yuda nan komprondé e lugá prominente ku Beibel ta duna e nòmber personal di Dios. Ki efekto esei tabatin riba e Studiantenan di Beibel? E mesun artíkulo di e revista ei a bisa ku foral di 1919 en adelante, “nan a kuminsá mustra mas apresio pa Yehova Dios, e Tata selestial di e Mesías.” De echo, den e dékada despues di 1919, E Toren di Vigilansia a menshoná e nòmber di Dios mas ku 6.500 biaha!

¹⁰ Nos rumannan a demostrá nan amor pa e nòmber di Dios dor di duna e nòmber “Yehova” e atenshon ku e meresé. Meskos ku Moises, nan a kuminsá ‘proklamá e nòmber di Yehova.’ (Deu. 32:3; Sal. 34:3) Anto Yehova na su turno, manera el a primintí den Beibel, a tuma nota di nan amor pa su nòmber i a tene miserikòrdia di nan.—Sal. 119:132; Heb. 6:10.

11, 12. (a) Kon e enfoke di nos publikashonnan a kambia poko despues di 1919? (b) Na kiko Yehova tabata hala atenshon di su sirbidónan, i dikon?

¹¹ Di dos, kristiannan berdadero a bin komprondé ki trabou Dios tabata ke pa nan hasi. Poko despues di 1919, bou di guia di e spiritu di Yehova, e rumannan ungí ku tabata dirigí e organisashon a analisá e buki profétiko di Isaías. Despues di esei, e kontenido di nos publikashonnan a kuminsá pone énfasis riba e trabou di prediká. Dikon e ahuste akí a resultá di ta “kuminda na e debido tempu”?—Mat. 24:45.

¹² Promé ku 1919, E Toren di Vigilansia no a yega di analisá  niun biaha e deklarashon di Isaías ku ta bisa: “‘Boso ta mi testigunan,’ SEÑOR [Yehova] ta deklará, ‘i mi sirbidó ku mi a skohe.’” (Lesa Isaías 43:10-12.) Pero poko despues di 1919, nos publikashonnan a kuminsá presta mas atenshon na e pasashi di Beibel ei. Nan a animá tur e ungínan pa partisipá den e trabou ku Yehova a asigná na nan, esta, e trabou di testiguá òf duna testimonio tokante dje. De echo, di 1925 pa 1931 so kaba, 57 edishon di E Toren di Vigilansia a trata Isaías kapítulo 43, i kada un di nan a apliká e palabranan di Isaías na kristiannan berdadero. Ta bisto anto ku durante e añanan ei Yehova tabata hala atenshon di su sirbidónan na e trabou ku nan tabatin ku hasi. Dikon? Pa asina, den un sentido, e por ‘a tèst nan promé pa wak si nan ta apto.’ (1 Tim. 3:10) Pues, promé ku e Studiantenan di Beibel por a haña e privilegio di karga e nòmber di Dios, nan mester a mustra Yehova pa medio di nan obranan ku di bèrdat nan tabata su testigunan.—Luk. 24:47, 48.

13. Kon e Palabra di Dios ta revelá kiko ta e kuestion universal di mas importante ku mester keda resolvé?

¹³ Di tres, e pueblo di Yehova a bin komprondé kon importante ta pa e nòmber di Dios keda santifiká. Den dékada di 1920, nan a bin realisá ku santifikashon di e nòmber di Dios ta e kuestion di mas importante ku mester keda resolvé. Kon e Palabra di Dios ta revelá e bèrdat di peso ei? Laga nos konsiderá dos ehèmpel. Kiko tabata e motibu prinsipal ku Yehova a reskatá Israel for di Egipto? Wèl, Yehova a deklará: “Pa proklamá mi nòmber den henter mundu.” (Éks. 9:16) I dikon Yehova a tene miserikòrdia ku Israel ora nan a rebeldiá kontra dje? Yehova a bolbe bisa: “Mi a aktua pa kousa di mi nòmber, pa esaki no wòrdu profaná den bista di e nashonnan.” (Eze. 20:8-10) Kiko e Studiantenan di Beibel a siña for di e relatonan akí i otronan mas den Beibel?

14. (a) Kiko e pueblo di Dios a bin komprondé na kabamentu di dékada di 1920? (b) Ki efekto e komprondementu mas kla ku e Studiantenan di Beibel a haña tabatin riba e trabou di prediká? (Wak tambe e kuadro “ Un Gran Motivashon pa Prediká.”)

¹⁴ Na kabamentu di dékada di 1920, e pueblo di Dios a bin komprondé e importansia di loke Isaías a deklará un 2.700 aña promé. Isaías a bisa en konekshon ku Yehova: “Asina bo a guia bo pueblo, pa establesé un nòmber glorioso pa bo mes.” (Isa. 63:14) E Studiantenan di Beibel a komprondé ku e kuestion prinsipal no tabata salbashon personal, sino santifikashon di e nòmber di Dios. (Isa. 37:20; Eze. 38:23) Na 1929, e buki Profesia a resumí e bèrdat ei, bisando: “[Santifikashon di] Yehova su nòmber ta e kuestion di mas importante ku tin di haber ku henter kreashon.” E kambio akí den komprondementu a duna e sirbidónan di Dios mas motibu ainda pa prediká tokante Yehova i limpia su nòmber di kalumnia.

15. (a) Pa kuminsamentu di dékada di 1930, kiko nos rumannan tabatin? (b) A yega e tempu pa Yehova hasi kiko?

¹⁵ Pues, na kuminsamentu di dékada di 1930, nos rumannan a bin komprondé kon importante e nòmber di Dios ta. Tambe nan a mira mas kla ki trabou Dios tabata ke pa nan hasi, i nan a komprondé mihó dikon tabata asina importante  pa e nòmber di Dios ser santifiká. E ora ei Yehova su tempu a yega pa duna su sirbidónan e onor di karga su nòmber públikamente. Laga nos konsiderá algun suseso di pasado pa wak kiko a hiba na esaki.

16. (a) Den ki manera sobresaliente Yehova ta halsa su nòmber? (b) Den pasado, ken tabata e promé ku a sirbi komo un pueblo pa karga e nòmber di Dios?

¹⁶ Un manera sobresaliente ku Yehova ta halsa su nòmber ta dor di skohe un pueblo riba tera pa karga su nòmber. Di aña 1513 promé ku Kristu en adelante, e nashon di Israel tabata representá Yehova komo su pueblo. (Isa. 43:12) Ma nan no a kumpli ku nan parti di e pakto ku nan tabatin ku Dios, i na aña 33 di e promé siglo, nan a pèrdè nan relashon spesial kuné.  Poko despues di esei, Yehova “a dirigí su atenshon na e nashonnan pa saka for di nan un pueblo pa karga su nòmber.” (Echo. 15:14) E nashon resien skohí ei a bira konosí komo “e Israel di Dios.” E ta konsistí di siguidónan ungí di Kristu ku ta bini di vários nashon.—Gal. 6:16.

17. Ki kòmplòt di Satanas a funshoná?

¹⁷ Rònt di aña 44, ‘bou di guia di Dios nan a yama e disipelnan di Kristu “kristian.”’ (Echo. 11:26) Na promé instante, e nòmber ei tabata úniko, pasobra el a referí na kristian berdadero so. (1 Ped. 4:16) Pero, manera Hesus su ilustrashon di e trigu i e mal yerba ta indiká, Satanas su kòmplòt a funshoná i hende a apliká e nòmber úniko “kristian” na tur tipo di kristian falsu, sí, na kristiannan di imitashon. Konsekuentemente, pa hopi siglo hende no por a mira un diferensia kla entre kristian berdadero i kristian falsu. Pero esei a kuminsá kambia durante e “tempu di kosecha” ku a kuminsá na 1914. Dikon? Pasobra angelnan a kuminsá separá e kristiannan falsu for di esnan berdadero.—Mat. 13:30, 39-41.

18. Kiko a yuda nos rumannan mira ku nan tabatin mester di un nòmber nobo?

¹⁸ Despues ku a nombra e esklabo fiel na 1919, Yehova a yuda su pueblo komprondé kiko ta e trabou ku e tabata ke pa nan hasi. Nan a ripará umbes ku e predikashon di kas pa kas a distinguí nan for di tur kristian falsu. Pero unabes nan a realisá esei, no a tarda mashá ku nan a komprondé tambe ku e nòmber “Studiantenan di Beibel” no a distinguí nan sufisientemente. Nan propósito prinsipal den bida no tabata simplemente pa studia Beibel, sino pa prediká tokante Dios, i tambe onra su nòmber i hals’é. Pues, ki nòmber lo a kuadra mas ku e trabou ku nan tabata hasi? Na 1931 e pregunta ei a haña kontesta.

19, 20. (a) Ki resolushon emoshonante e rumannan a tuma na un kongreso na 1931? (b) Kon nos rumannan a reakshoná riba e resolushon pa tuma un nòmber nobo?

¹⁹ Na yüli 1931, un 15.000 Studiante di Beibel a reuní pa un kongreso na Merka, na Columbus, Ohio. Riba e programa di kongreso nan a mira dos lèter grandi skirbí ku a lanta nan kuriosidat: J i W. Hopi di nan a purba di rei ta kiko e dos lèternan ei tabata para p’e. Anto riba djadumingu 26 di yüli, Ruman Joseph Rutherford a presentá un resolushon ku tabatin e deklarashon impreshonante akí: ‘Nos ta deseá pa hende konosé nos komo Testigunan di Yehova i yama nos asina tambe.’ Na e momento ei numa tur hende presente a komprondé ku e lèternan tabata para pa Jehovah’s Witnesses (Testigunan di Yehova), un nòmber bíbliko basá riba Isaías 43:10.

²⁰ E presentenan a reakshoná riba e resolushon ei ku un tremendo gritu i un aplouso largu. Via radio, rumannan te na e otro banda di nos planeta a tende e reakshon entusiasmá ei! Ernest ku Naomi Barber na Australia a konta: “Ora e rumannan na Merka a kuminsá bati man, e rumannan na Melbourne a bula lanta i a sigui bati man. Hamas nos lo lubidá esei!” a

21. Kon e nòmber nobo a duna e sirbidónan di Dios mas ánimo pa prediká?

²¹ Awor ku e sirbidónan di Dios tabatin e nòmber bíbliko Testigunan di Yehova, esei a duna nan mas ánimo pa partisipá den e trabou di prediká. Edward ku Jessie Grimes, un pareha pionero na Merka ku tabata presente na e kongreso di 1931 na Columbus, a bisa: “Nos a sali kas komo Studiante di Beibel i bini bèk komo Testigu di Yehova. Nos tabata masha kontentu mes ku awor nos tabatin un nòmber ku a yuda nos engrandesé e nòmber di nos Dios.” Despues di e kongreso ei, algun Testigu a usa un manera nobo pa engrandesé Yehova. Pa introdusí nan mes na e doñonan di kas, nan tabata duna nan un karchi ku nan nòmber i ku e siguiente mensahe: “Un testigu di YEHOVA ku ta predikando e Reino di YEHOVA, nos Dios.” Sí, e pueblo di Dios tabata orguyoso di por karga e nòmber Yehova, i nan tabata kla pa proklamá su nifikashon i importansia tur kaminda.—Isa. 12:4.

22. Kiko ta duna prueba ku e pueblo di Yehova tin un identidat úniko?

²² Ya ta hasi hopi aña ku Yehova a motivá nos rumannan ungí pa tuma nan nòmber úniko. Akaso Satanas a logra skonde e identidat di e pueblo di Dios durante e añanan ei? El a laga nos kai pèrdè den tur e religionnan ku tin na mundu? Nò! Al kontrario. Nos identidat úniko komo testigunan di Dios ta destaká mas ku nunka. (Lesa Mikéas 4:5; Malakías 3:18.) Bon mirá, nos a bira asina estrechamente ligá ku e nòmber di Dios ku asina un hende usa e nòmber ei abiertamente awe, nan ta identifik’é mesora komo un Testigu di Yehova. E adorashon berdadero di Yehova ta firmemente ‘establesí komo e seru prinsipal, i ta mas haltu ku e seritunan’ di religionnan falsu. (Isa. 2:2) Awe, en bèrdat, Yehova su adorashon i nòmber sagrado ta sumamente halsá.

23. Segun Salmo 121:5, ki bèrdat importante tokante Yehova ta hasi nos fe mas fuerte?

²³ Nos sa ku Yehova lo protehá nos kontra e atakenan aktual di Satanas i tambe kontra esnan di futuro. Esaki ta hasi nos fe mas fuerte! (Sal. 121:5) Nos tin bon motibu anto pa sinti meskos ku e eskritor di un salmo ku a bisa: “Felis t’e pueblo ku su Dios ta Señor [Yehova], e nashon skohí pa ta di djE.”—Sal. 33:12, BPK.