1, 2. Con e Traduccion di Mundo Nobo ta halsa e nomber di Dios?

 DIAMARS mainta, 2 di december 1947, un grupo chikito di ruman ungi di Betel na Brooklyn, New York, a cuminsa traha riba un proyecto inmenso. E trabou tabata hopi pisa, pero toch nan a sigui traha riba dje pa 12 aña largo. Porfin, diadomingo 13 di maart 1960, nan a caba di refina e traduccion nobo di Bijbel. Tres luna despues, dia 18 di juni 1960, Ruman Nathan Knorr a presenta e ultimo volumen di e Traduccion di Mundo Nobo di e Santo Scritura. E publico cu tabata presente na e congreso ey na Manchester, Inglatera, a keda hopi emociona cu e traduccion di Bijbel ey tabata completo. E orador a expresa e sintimento di tur esnan presente ora el a declara: “Awe ta un dia di alegria pa tur testigo di Jehova rond mundo.” Un caracteristica sobresaliente di e traduccion nobo ey tabata e echo cu el a uza e nomber personal di Dios tur caminda cu esaki ta aparece den e texto biblico original. Esey ta algo cu a haci e rumannan masha contento mes.

² Hopi traduccion di Bijbel ta laga e nomber di Dios afo. Pero e sirbidornan ungi di Jehova a para firme contra e complot di Satanas pa saca e nomber di Dios for di hende su mente. Segun e introduccion di e Traduccion di Mundo Nobo cu a sali e dia ey: “E caracteristica principal di e traduccion aki ta cu el a pone e nomber divino na su luga legitimo.” Y esey ta berdad. E Traduccion di Mundo Nobo ta uza Dios su nomber personal, Jehova, mas cu 7.000 biaha. E traduccion aki si a halsa e nomber di nos Tata celestial, Jehova, na un manera extraordinario.

3. (a) Kico nos rumannan a compronde tocante nificacion di e nomber di Dios? (b) Con nos mester compronde Exodo 3:13 y 14? (Wak e cuadro “Nificacion di e Nomber di Dios.”)

³ Na principio, e Studiantenan di Bijbel tabata compronde cu e nomber di Dios ta nifica “AMI TA ESUN KU TA.” (Exo. 3:14, BPK) Pues, E Toren di Vigilancia di 1 di januari 1926 a comenta: “E nomber Jehova ta nifica ... Esun cu no tin cuminsamento ni final.” Pero tempo cu e rumannan a cuminsa traha riba e Traduccion di Mundo Nobo di e Santo Scritura, ya Jehova a yuda su pueblo compronde cu su nomber no ta nifica simplemente cu e no tin cuminsamento ni final, sino cu mas bien e  ta un Dios cu tin un gran proposito y cu e ta dal e pasonan necesario pa cumpli cu ne. Nan a compronde cu e nomber Jehova ta nifica literalmente “e ta causa pa bira of causa pa bin na existencia.” Si, ta Jehova ta Esun cu a traha e universo y e criaturanan inteligente, y e ta sigui percura pa su boluntad y proposito bira realidad. Pero dicon ta asina importante pa e nomber di Dios ser halsa, y con nos por yuda hals’e?

4, 5. (a) Kico nos ta pidi p’e ora nos ta bisa Jehova den oracion: “Bo nomber sea santifica”? (b) Na ki tempo Dios lo santifica su nomber, y con?

⁴ Jehova kier pa su nomber ser halsa. En realidad, e proposito principal di Jehova ta pa santifica su nomber, manera e prome peticion di Hesus su oracion modelo ta laga nos mira claramente: “Tata ... bo nomber sea santifica.” (Mat. 6:9) Kico precies nos ta pidiendo Jehova?

⁵ Manera nos a siña den Capitulo 1 di e buki aki, “Bo nomber sea santifica” ta un di e tres peticionnan den Hesus su oracion modelo di Nos Tata cu tin di haber cu e proposito di Jehova. E dos otronan ta: “Laga bo Reino bin. Laga bo boluntad sosode.” (Mat. 6:10) Pues, mescos cu nos ta pidi Jehova pa tuma accion pa laga su Reino bin y pa su boluntad sosode, asina tambe nos ta pidi Jehova pa tuma accion pa santifica su nomber. Cu otro palabra, nos ta pidiendo Jehova pa dal paso pa limpia su nomber cu nan a mancha desde e rebelion den Eden te awe. Con Jehova lo contesta e oracion ey? El a declara: “Lo mi santifica mi nomber grandi cu a wordo profana meymey di e nacionnan.” (Eze. 36:23; 38:23) Na Armagedon, Jehova lo santifica su nomber den bista di henter creacion ora e elimina maldad.

6. Con nos por yuda santifica e nomber di Dios?

⁶ A traves di historia, Jehova a permiti su sirbidornan yuda santifica su nomber. Ya cu e nomber di Dios ta santo den tur sentido, nos no por hacie mas santo, of sagrado, di loke e ta caba. Con nos por santific’e anto? Isaias a declara: “Ta [Jehova] di ehercitonan boso mester considera como santo.” Y Jehova mes a bisa cu su pueblo lo santifica su nomber y cu “nan lo sinti profundo rèspèt [p’e].” (Isa. 8:13; 29:23, BPK) Pues, nos ta santifica e nomber di Dios ora nos ta consider’e special y superior cu tur otro nomber, ora nos ta respeta loke e ta representa y ora nos ta yuda otro hende consider’e santo. Un manera special cu nos ta demostra nos respet y admiracion profundo pa e nomber di Dios ta door di reconoce Jehova como nos Gobernante y obedec’e di henter nos curason.—Prov. 3:1; Rev. 4:11.

7, 8. (a) Dicon a dura un tempo prome cu e pueblo di Dios por a carga Su nomber? (b) Kico nos lo bay analisa awor?

⁷ For di e decada di 1870, e sirbidornan di Dios di nos tempo a cuminsa uza Jehova su nomber den nan publicacionnan.  Por ehempel, E Toren di Vigilancia di augustus 1879 y un buki di cantica publica e mesun aña ey, Songs of the Bride, ta menciona e nomber Jehova. Pero ta parce cu prome cu Jehova a permiti su pueblo yama nan mes publicamente na su nomber sagrado, el a percura pa nan cumpli cu e rekisitonan necesario pa nan por ricibi e gran privilegio ey. Con Jehova a prepara e prome Studiantenan di Bijbel pa nan por carga su nomber?

⁸ Ora nos wak bek na e periodo entre fin di siglo 19 y comienso di siglo 20, nos ta mira con Jehova a duna su pueblo un comprondemento mas cla di varios berdad importante relaciona cu su nomber. Laga nos analisa tres di nan.

9, 10. (a) Dicon e prome articulonan di E Toren di Vigilancia tabata concentra riba Hesus? (b) Ki cambio a tuma luga di 1919 en adelante, y cu ki resultado? (Wak e cuadro “ E Toren di Vigilancia A Halsa e Nomber di Dios.”)

⁹ E prome: E sirbidornan di Jehova a compronde con importante e nomber di Dios ta. Na principio, e fiel Studiantenan di Bijbel a pensa cu e rescate ta e siñansa principal di Bijbel. Ta pesey E Toren di Vigilancia tabata concentra asina tanto riba Hesus. Por ehempel, durante e prome aña cu e revista a ser publica, el a menciona e nomber “Hesus” dies biaha mas cu e nomber “Jehova.” La Atalaya di 15 di augustus 1976 a bisa cu durante e tempo ey, nan a duna “demasiado importancia” na Hesus. Pero cu tempo, Jehova a yuda nan compronde e importancia cu Bijbel ta duna na e nomber personal di Dios. Ki efecto esey tabatin riba e Studiantenan di Bijbel? E mesun articulo di e revista ey a bisa cu specialmente di 1919 en adelante, “nan a cuminsa mustra mas aprecio pa Jehova Dios, e Tata celestial di e Mesias.” Figura bo, den e decada despues di 1919, E Toren di Vigilancia a menciona e nomber di Dios mas cu 6.500 biaha!

¹⁰ Nos rumannan a demostra nan amor pa e nomber di Dios door di duna e nomber “Jehova” e atencion cu e merece. Mescos cu Moises, nan a cuminsa “proclama e nomber di [Jehova].” (Deu. 32:3; Sal. 34:3) Anto Jehova na su turno, manera el a priminti den Bijbel, a tuma nota di nan amor pa su nomber y a bendiciona nan.—Sal. 119:132; Heb. 6:10.

11, 12. (a) Con e enfoke di nos publicacionnan a cambia poco despues di 1919? (b) Na kico Jehova tabata hala atencion di su sirbidornan, y dicon?

¹¹ E di dos: Cristiannan berdadero a compronde ki trabou Dios tabata kier pa nan haci. Poco despues di 1919, bou di guia di e spirito di Jehova, e rumannan ungi cu tabata dirigi e organisacion a analisa e buki profetico di Isaias. Despues di esey, nos publicacionnan a cuminsa pone enfasis riba e trabou di predica. Den ki sentido e ahuste aki tabata “cuminda na e debido tempo”?—Mat. 24:45.

¹² Prome cu 1919, E Toren di Vigilancia no a yega di analisa niun biaha e declaracion di Isaias cu ta bisa: “‘Boso ta mi testigonan’, SEÑOR [Jehova] ta declara, ‘y mi sirbidor cu mi a scoge.’” (Lesa Isaias 43:10-12.) Pero poco despues di 1919, nos publicacionnan a cuminsa presta mas atencion na e textonan  ey di Bijbel. Nan a anima tur e unginan pa participa den e trabou cu Jehova a asigna na nan, esta, e trabou di testigua of duna testimonio tocante dje. En realidad, di 1925 pa 1931 so, ya caba 57 edicion di E Toren di Vigilancia a trata Isaias capitulo 43, y cada un di nan a aplica e palabranan di Isaias na cristiannan berdadero. Ta bisto anto cu durante e añanan ey Jehova tabata hala atencion di su sirbidornan na e trabou cu nan tabatin cu haci. Dicon? Pa asina, den un sentido, e “por a test [nan] prome pa wak si nan ta apto.” (1 Tim. 3:10) Pues, prome cu e Studiantenan di Bijbel por a haya e privilegio di carga e nomber di Dios, nan mester a mustra Jehova pa medio di nan obranan cu di berdad nan tabata su testigonan.—Luc. 24:47, 48.

13. Con e Palabra di Dios ta revela kico ta e cuestion universal di mas importante cu mester wordo resolvi?

¹³ E di tres: E pueblo di Jehova a compronde con importante ta pa e nomber di Dios wordo santifica. Den e decada di 1920, nan a realisa cu santificacion di e nomber di Dios ta e cuestion di mas importante cu mester wordo resolvi. Con e Palabra di Dios ta revela e berdad fundamental ey? Laga nos considera dos ehempel. Kico tabata e motibo principal cu Jehova a rescata Israel for di Egipto? Wel, Jehova a declara: “Pa proclama mi nomber den henter mundo.” (Exo. 9:16) Y dicon Jehova a tene misericordia di Israel ora nan a rebela contra dje? Jehova a bolbe bisa: “Mi a actua pa causa di mi nomber, pa esaki no wordo profana den bista di e nacionnan.” (Eze. 20:8-10) Kico e Studiantenan di Bijbel a siña for di e relatonan aki y di hopi otro cu tin den Bijbel?

14. (a) Kico e pueblo di Dios a compronde na cabamento di e decada di 1920? (b) Ki efecto e comprondemento mas cla cu e Studiantenan di Bijbel a haya tabatin riba e trabou di predica? (Wak tambe e cuadro “ Un Motibo Importante pa Predica.”)

¹⁴ Na cabamento di e decada di 1920, e pueblo di Dios a compronde e importancia di loke Isaias a declara un 2.700 aña prome. Isaias a bisa en conexion cu Jehova: “Asina bo a guia bo pueblo, pa establece un nomber glorioso pa bo mes.” (Isa. 63:14) E Studiantenan di Bijbel a compronde cu e cuestion principal no tabata salbacion personal, sino santificacion di e nomber di Dios. (Isa. 37:20; Eze. 38:23) Na 1929, e buki Prophecy a resumi e berdad ey, bisando: “[Santificacion di] Jehova su nomber ta e cuestion di mas importante cu tin di haber cu henter creacion.” E cambio aki den comprondemento a duna e sirbidornan di Dios mas motibo ainda pa predica tocante Jehova y limpia su nomber di calumnia.

15. (a) Na cuminsamento di e decada di 1930, kico nos rumannan tabatin? (b) E tempo a yega pa Jehova haci kico?

¹⁵ Pues, na cuminsamento di e decada di 1930, nos rumannan a compronde con importante e nomber di Dios ta. Tambe nan a mira mas cla ki trabou Dios tabata kier pa nan haci, y nan a compronde mihor dicon tabata asina importante pa e nomber di Dios ser santifica. E ora ey Jehova su tempo a yega pa duna su sirbidornan e honor di carga su nomber. Laga nos trata algun suceso di pasado pa wak kico a hiba na esaki.

16. (a) Den ki manera sobresaliente Jehova a halsa su nomber? (b) Den pasado, cua pueblo tabata e prome pueblo cu a carga e nomber di Dios?

¹⁶ Un manera sobresaliente cu Jehova a halsa su nomber ta door di scoge un pueblo riba Tera pa carga su nomber. Di aña 1513 prome cu Cristo en adelante, e nacion di Israel tabata representa Jehova como su pueblo. (Isa. 43:12) Pero nan no a cumpli cu nan parti di e pacto cu nan tabatin cu Dios, y na aña 33 di e prome siglo, nan a perde nan relacion special cu ne. Poco despues di esey, Jehova “a dirigi su atencion na e nacionnan pa saca for di nan un pueblo pa carga su nomber.” (Echo. 15:14) E nacion recien scogi ey a bira conoci como “e Israel di Dios.” E ta consisti di siguidornan ungi di Cristo cu ta bin di varios nacion.—Gal. 6:16.

17. Ki complot di Satanas a funciona?

 ¹⁷ Rond di aña 44, “bou di guia di Dios nan a yama e discipelnan [di Cristo] ‘cristian.’” (Echo. 11:26) Na prome instante, e nomber ey tabata unico, pasobra el a referi na cristian berdadero so. (1 Ped. 4:16) Pero, manera Hesus su ilustracion di e trigo y e mal yerba ta indica, Satanas su complot pa cristian falso tambe ser yama cristian a funciona. Consecuentemente, pa hopi siglo hende no por a mira un diferencia cla entre cristian berdadero y cristian falso. Pero esey a cuminsa cambia durante e “tempo di cosecha” cu a cuminsa na 1914. Dicon? Pasobra angelnan a cuminsa separa e cristiannan falso for di esnan berdadero.—Mat. 13:30, 39-41.

18. Kico a yuda nos rumannan compronde cu nan tabatin mester di un nomber nobo?

¹⁸ Despues cu e esclavo fiel a ser nombra na 1919, Jehova a yuda su pueblo compronde ta kico ta e trabou cu e kier pa nan haci. Nan a ripara di biaha cu e predicacion di cas pa cas a distingui nan for di tur cristian falso. Pero unabes nan a realisa esey, no a dura hopi cu nan a compronde tambe cu e nomber “Studiantenan di Bijbel” no tabata apropia mas pa distingui nan for di cristian falso. Nan proposito principal den bida no tabata simplemente pa studia Bijbel, sino pa predica tocante Dios, y tambe honra su nomber y hals’e. Pues, ki nomber lo a cuadra mas cu e trabou cu nan tabata haciendo? Na 1931 e pregunta ey a haya contesta.

19, 20. (a) Ki resolucion emocionante e rumannan a presenta na un congreso na 1931? (b) Con nos rumannan a reacciona riba e resolucion pa acepta un nomber nobo?

¹⁹ Na juli 1931, un 15.000 Studiante di Bijbel a reuni pa un congreso na Merca, na Columbus, Ohio. Riba e programa di congreso nan a mira dos letter grandi skirbi cu a lanta nan curiosidad: J y W. Hopi di nan a cuminsa puntra nan mes ta kico e dos letternan ey ta nifica. Anto riba diadomingo 26 di juli, Ruman Joseph Rutherford a presenta un resolucion emocionante cu ta bisa en parte: “Nos ta desea pa hende conoce nos como testigonan di Jehovah y yama nos asina tambe.” Na e momento ey tur hende presente a compronde cu e letternan ta nifica Jehovah’s Witnesses (testigonan di Jehova), un nomber biblico basa riba Isaias 43:10.

²⁰ Kico tabata e reaccion di esnan presente? Nan a bira sumamente contento y nan a keda bati man pa basta rato. Via radio, rumannan te na e otro banda di nos planeta a tende e reaccion entusiasma ey. Ernest cu Naomi Barber na Australia a conta: “Ora e rumannan na Merca a cuminsa bati man, e rumannan na Melbourne a bula lanta y a sigui bati man. Hamas nos lo lubida esey!” a

21. Con e nomber nobo a duna e sirbidornan di Dios mas animo pa predica?

²¹ Ora cu e sirbidornan di Dios a haya e nomber biblico testigonan di Jehova, esey a duna nan mas animo pa participa den e trabou di predica. Edward cu Jessie Grimes, un pareha pionero  na Merca cu tabata presente na e congreso di 1931 na Columbus, a bisa: “Nos a sali for di cas como Studiante di Bijbel y bin bek como testigo di Jehova. Nos tabata masha contento mes cu nos tabatin un nomber cu a yuda nos engrandece e nomber di nos Dios.” Despues di e congreso ey, algun Testigo a uza un manera nobo pa engrandece Jehova. Pa introduci nan mes na e doñonan di cas, nan tabata duna nan un carchi cu nan nomber y cu e siguiente mensahe: “Un testigo di JEHOVA cu ta predicando e Reino di JEHOVA, nos Dios.” Si, e pueblo di Dios tabata orguyoso di por carga e nomber Jehova, y nan tabata cla pa proclama e importancia di e nomber ey tur caminda.—Isa. 12:4.

22. Kico ta duna prueba cu e pueblo di Jehova tin un identidad unico?

²² Ya a haci hopi aña caba cu nos rumannan ungi a acepta e nomber unico cu Jehova a duna nan. Acaso Satanas a logra sconde e identidad di e pueblo di Dios durante e añanan ey? Acaso el a pone cu hende no por a mira e diferencia mas entre nan y e otro religionnan cu tin na mundo? No! Al contrario. Nos identidad unico como testigonan di Dios ta destaca mas cu nunca. (Lesa Mikeas 4:5; Malakias 3:18.) En realidad, nan ta relaciona nos asina hopi cu e nomber di Dios cu asina un hende uza e nomber ey abiertamente awe, nan ta identific’e di biaha como un testigo di Jehova. E adoracion berdadero di Jehova ta firmemente “estableci como e sero principal, y [ta] ... mas halto cu e seritonan” di religionnan falso. (Isa. 2:2) Awe, en berdad, Jehova su adoracion y nomber sagrado ta sumamente eleva.

23. Segun Salmo 121:5, ki berdad importante tocante Jehova ta fortalece nos fe?

²³ Nos sa cu Jehova lo proteha nos contra cualkier atake di Satanas, tanto awor como den futuro. Esaki ta fortalece nos fe masha hopi mes. (Sal. 121:5) Nos tin bon motibo anto pa sinti mescos cu e escritor di un salmo cu a bisa: “Felis t’e pueblo ku su Dios ta SEÑOR [Jehova], e nashon skogí pa ta di djE.”—Sal. 33:12BPK.