1, 2. Wanem nao New World Translation duim for mekhae lo nem blo God?

 WANFALA Tuesday morning lo December 2, 1947, wanfala smol grup blo olketa anointed brata wea stap lo Brooklyn Bethel, lo New York, start for duim wanfala bigfala waka. Waka hia hem big tumas bat for 12-fala year olketa gohed for duim. Bihaen samfala year, lo Sunday, March 13, 1960, olketa finisim lastfala part blo wanfala niu Bible transleison. Thrifala month bihaen, lo June 18, 1960, Brata Nathan Knorr releasem lastfala volume blo datfala New World Translation of the Holy Scriptures lo wanfala convention lo Manchester, England. Evriwan wea hipap olketa hapi tumas. Wanem speaker talem lo datfala taem barava showim feeling blo audience taem hem sei: ‘Tuday, hem day wea Olketa Jehovah’s Witness evriwea lo world barava hapi!’ Wanfala nambawan samting abaotem disfala transleison nao, nem blo God stap lo staka ples insaed. Diswan nao mekem iumi barava hapi.

² Staka Bible transleison aotem nem blo God. Bat olketa anointed servant blo Jehovah olketa againstim plan blo Satan for aotem nem blo God mekem pipol no savve. Lo introduction page lo New World Translation Bible wea olketa releasem lo datfala day, hem sei: “Main samting lo disfala transleison nao, olketa putim bak nem blo God lo olketa ples wea nem hia shud stap.” Olsem iumi savve, New World Translation iusim nem blo God, Jehovah, winim 7,000 taem. Disfala transleison barava mekhae lo nem blo Dadi blo iumi lo heven, Jehovah.

3. (a) Wanem nao olketa brata blo iumi luksavve lo hem abaotem mining lo nem blo God? (b) Wanem nao mining lo toktok lo Exodus 3:13, 14? (Lukim box “ Mining blo Nem blo God.”)

³ Lo olketa year bifor, Olketa Bible Student savve nem blo God hem minim “Mi nao mi stap.” (Ex. 3:14, King James Version) Dastawe, The Watch Tower blo January 1, 1926 sei: “Nem blo Jehovah hem minim hem stap longtaem finis . . . Hem no garem start and hem no garem end.” Bat gogo, taem olketa start transleitim New World Translation, Jehovah helpem pipol blo hem for luksavve nem blo hem no minim hem stap longtaem finis nomoa, bat barava important samting hem God wea garem plan and hem God wea duim samting followim plan blo  hem. Olketa luksavve nem blo Jehovah hem minim “Hem Savve Duim Eni Samting.” Diswan hem tru, bikos hem nao wakem evri samting lo universe and olketa man, and hem gohed for mekem plan blo hem kamap tru. Bat why nao hem important for mekhae lo nem blo God, and wanem nao iumi savve duim for mekhae lo nem blo hem?

4, 5. (a) Wanem nao iumi askem taem iumi sei: “Mifala laekem nem bilong iu for holy?” (b) Hao and wanem taem nao bae God mekem nem blo hem for kamap holy?

⁴ Jehovah laekem pipol for mekhae lo nem blo hem. Main plan blo Jehovah hem for mekem nem blo hem kamap holy. Diswan showaot klia lo first samting wea Jesus askem lo lord’s prea: “Mifala laekem nem bilong iu for holy.” (Matt. 6:9) Taem iumi talem diswan, wanem nao iumi askem?

⁵ Olsem iumi lanem lo Chapter 1 blo disfala buk, taem iumi talem “Mifala laekem nem bilong iu for holy” hem wanfala lo thrifala samting wea Jesus talem wea join witim plan blo Jehovah. Nara tufala samting hem: “Mifala laekem Kingdom bilong iu for kam. Duim samting wea iu laek for duim.” (Matt. 6:10) So taem iumi askem Jehovah for duim samting mekem Kingdom blo hem for kam and plan blo hem gohed, iumi askem Jehovah for duim samting for mekhae lo nem blo hem tu. Lo nara wei hem olsem iumi askem Jehovah for duim samting for aotem evri laea toktok wea spoelem nem blo hem, start kam lo garden lo Eden. Taem iumi talem disfala prea, wanem nao bae Jehovah duim? Hem talem hem bae showimaot paoa lo holy nem blo hem wea pipol bin spoelem lo eye blo olketa pipol blo olketa narafala kantri. (Esikiel 36:23; 38:23) Taem Jehovah finisim evri nogud pipol lo Armageddon, evri samting wea hem wakem bae lukim nem blo hem kamap holy.

6. Wanem nao iumi savve duim for mekem nem blo God kamap holy?

⁶ Start lo bifor, Jehovah gohed letem olketa servant blo hem for mekem nem blo hem holy. Hem tru, iumi hard for mekem nem blo God holy go moa bikos hem holy finis. So hao nao bae iumi mekem nem blo God holy? Isaiah sei: “Mi nao [Jehovah] hu mi garem evri paoa, an mi holi tumas. Mi nomoa yu mas tinghae long mi.” And Jehovah talem diswan lo pipol blo hem: “Bae yufala i talemaot dat mi nao mi Holi God blong yufala . . . An bae yufala tinghae long mi, God blong yufala long Israel.” (Aesaea 8:13; 29:23) So iumi mekem nem blo God holy taem iumi ting lo datfala nem olsem hem difren and hae winim evri nara nem, iumi tinghae lo mining blo nem hia, and taem iumi helpem olketa narawan for luksavve hao nem hia hem holy. Iumi showimaot iumi tinghae and respectim nem blo God, taem iumi luksavve Jehovah nao fit for rulim iumi and iumi obeyim hem witim full heart blo iumi.—Provebs 3:1; Rev. 4:11.

7, 8. (a) Why nao hem longtaem lelebet bifor God letem pipol blo hem for garem nem blo hem? (b) Wanem nao bae iumi storyim distaem?

⁷ Olketa servant blo God distaem iusim nem blo God lo olketa pablikeson blo olketa start kam lo olketa year blo 1870. Olsem example, nem blo Jehovah stap lo Zion’s Watch Tower blo August 1879, and lo wanfala song buk Songs of the Bride wea olketa printim lo datfala sem year. Bat bifor Jehovah letem pipol blo hem for garem datfala nem, hem mek sure wei blo olketa mas fitim nambawan privilege hia. Wanem nao Jehovah duim for redyim Olketa Bible Student lo bifor for garem nem blo hem?

⁸ Taem iumi ting go bak lo olketa year lo 1800 and start lo 1900, iumi lukim wanem Jehovah duim for helpem pipol blo hem for minim klia olketa important truth abaotem nem blo hem. Iumi bae storyim thrifala lo olketa truth hia.

9, 10. (a) Why nao olketa firstfala Watch Tower story abaotem Jesus evritaem? (b) Wanem change nao happen start lo 1919, and wanem nao kamaot from datwan? (Lukim tu box “ Wanem The Watchtower Duim for Mekhae lo Nem blo God.”)

⁹ First samting, olketa servant blo Jehovah kasem stretfala savve abaotem why nem blo God hem important. Olketa firstfala Bible Student tingse ransom nao hem main teaching lo Bible. Dastawe Watch Tower story abaotem Jesus evritaem. Olsem example, lo olketa first magasin wea olketa printim, nem blo Jesus hem stap tenfala taem winim nem blo Jehovah. The Watchtower blo March 15, 1976, talem diswan abaotem Olketa Bible Student lo datfala taem, olketa ‘ova tumas for mekhae’ lo Jesus. Gogo, Jehovah isisi helpem olketa for luksavve Bible mekhae lo nem blo God. Wanem nao Olketa Bible Student duim, taem olketa savve lo datwan? Datfala sem Watchtower sei, start lo 1919 “olketa start for mekhae lo Dadi blo Messiah lo heven, Jehovah.” Tenfala year bihaen lo 1919, nem blo God stap winim 6,500 taem insaed The Watch Tower.

¹⁰ Taem olketa brata duim stret samting for mekhae lo nem blo God, diswan showimaot olketa barava tinghae lo nem blo God. Olsem Moses bifor, olketa tu go aot for “preisim nem blong [Jehovah].” (Diutronomi 32:3; Sams 34:3) And olsem Bible promisim, Jehovah lukim love wea olketa showimaot for nem blo hem and hem sapotim olketa.—Ps. 119:132, NW; Heb. 6:10.

11, 12. (a) Bihaen lo 1919, wanem change nao kamap lo olketa pablikeson blo iumi? (b) Wanem nao Jehovah laekem olketa servant blo hem for tingim, and why nao olsem?

¹¹ Mek-tu samting, olketa tru Christian need for kasem stretfala savve abaotem waka wea God givim lo olketa. Samfala taem bihaen 1919, spirit blo Jehovah leadim olketa anointed brata wea leadim pipol blo God for lukluk gud moa lo profesi blo Isaiah. Bihaen diswan, evritaem olketa pablikeson blo iumi story abaotem preaching waka. Why nao disfala change hem olsem ‘kaikai long barava taem’?—Matt. 24:45.

¹² Lo olketa year bifor 1919, no enitaem The Watch Tower story abaotem toktok blo Isaiah wea sei: “‘Yufala . . . nao i witnes blong mi! Mi nao bin siusim yufala fo kamap wakaman blong  mi.’” (Readim Aesaea 43:10-12.) Bat stretawe bihaen lo 1919, olketa pablikeson blo iumi start for storyim gud olketa verse hia, and encouragem evri anointed brata and sista for duim waka wea Jehovah givim lo olketa, hem nao for witness abaotem hem. From diswan, start lo 1925 go kasem 1931, 57-fala The Watch Tower magasin nao story abaotem Isaiah chapter 43, evri magasin hia storyim hao toktok wea Isaiah talem hem for olketa tru Christian. Hem showaot klia, lo olketa year hia, Jehovah mekem olketa servant blo hem for tinghae lo waka wea olketa mas duim. Why nao olsem? Diswan hem for “testim olketa man olsem firstaem for lukim sapos olketa fit.” (1 Tim. 3:10) Bifor Olketa Bible Student savve garem nem blo God, olketa mas duim waka for pruvim lo Jehovah, olketa nao tru witness blo hem.—Luke 24:47, 48.

13. Wanem nao Bible talem abaotem wei for mekem nem blo God kamap holy?

¹³ Mek-thri samting, pipol blo Jehovah savve hem important for mekem nem blo God kamap holy. Lo olketa year blo 1920, olketa luksavve for mekem nem blo God kamap holy hem barava important samting. Wanem nao Bible talem abaotem datwan? Tingim tufala example hia. Why nao Jehovah sevem olketa Israelite from Egypt? Jehovah sei: “Mekem nius long [nem] blong mi hemi kasem evriwea long wol.” (Eksodas 9:16) And why nao Jehovah showim mercy lo olketa Israelite taem olketa bighed againstim hem? Jehovah sei moa: “Mi no duim olsem, bikos sapos olketa pipol long Ijip save long diswan, bae i meksem long nem blong mi.” (Esikiel 20:8-10) Wanem nao Olketa Bible Student lanem from olketa story hia and olketa nara story lo Bible?

14. (a) Klosap lo 1930, wanem nao pipol blo God luksavve lo hem? (b) Taem Olketa Bible Student kasem stretfala savve, diswan mekem olketa garem wanem kaen tingting abaotem preaching waka? (Lukim tu box “ Barava Important Reason for Preach.”)

¹⁴ Klosap lo 1930, pipol blo God luksavve wanem Isaiah talem winim 2,700 year go finis hem barava important. Isaiah sei olsem abaotem Jehovah: “Diswan nao hao iu leadim pipol bilong iu, for mekem nem bilong iuseleva nao kamap hae.” (Isa. 63:14, NW) Olketa Bible Student luksavve samting wea barava important hem no for man sev, bat hem for nem blo God kamap holy. (Aesaea 37:20; Esikiel 38:23) Lo 1929, wanfala buk wea title blo hem Prophecy, sei olsem: “Nem blo Jehovah nao hem important winim evri samting lo creation.” Disfala change lo hao pipol blo God minim diswan muvim olketa for witness abaotem Jehovah and mekhae lo nem blo hem wea Satan tok spoelem.

15. (a) Wanem stretfala savve nao olketa brata blo iumi kasem start lo olketa year blo 1930? (b) Hem kasem nao taem for wanem?

¹⁵ Start lo olketa year blo 1930, olketa brata blo iumi kasem stretfala savve abaotem why nem blo God hem important, stretfala savve abaotem waka wea God givim lo olketa, and luksavve for mekem nem blo God kamap holy hem main samting. Distaem, hem taem for Jehovah givim olketa servant blo hem datfala privilege for garem nem blo hem. Hao nao hem duim diswan? Bae iumi storyim samfala samting wea happen bifor.

16. (a) Lo wanem nambawan wei nao Jehovah mekhae lo nem blo hem? (b) Lo bifor, hu nao Jehovah chusim olsem pipol wea garem nem blo hem?

¹⁶ Wanfala nambawan wei wea Jehovah mekhae lo nem blo hem for chusim pipol lo earth for garem nem blo hem. Start kam lo 1513 B.C.E., Jehovah chusim nation blo Israel for kamap pipol blo hem. (Aesaea 43:12) Bat olketa nating keepim promis wea olketa mekem witim God, and lo 33 C.E., olketa lusim spesol wei wea olketa fren witim hem. No longtaem bihaen, Jehovah “acceptim pipol wea no Jew mekem hem savve chusim samfala wea no Jew tu for garem nem bilong hem.” (Acts 15:14) Olketa hia wea Jehovah chusim olketa kolem olketa “Israel bilong God,” wea insaed diswan hem olketa anointed follower blo Christ wea kam from olketa difren kantri.—Gal. 6:16.

17. Wanem plan nao Satan iusim wea win?

 ¹⁷ Lo samting olsem 44 C.E., olketa disaepol blo Christ “kasem datfala nem ‘Christian.’ God nao givim disfala nem long olketa.” (Acts 11:26) Firstaem, olketa nao garem datfala nem, bikos olketa nomoa tru Christian. (1 Pet. 4:16) Bat Satan win lo plan blo hem for mekem samfala laea Christian for garem datfala nem Christian, olsem Jesus storyim lo tokpiksa blo wheat and olketa rabis grass. From diswan, for staka handred year olketa man no luksavve hu nao olketa tru Christian, and hu nao olketa laea Christian. Bat diswan start for change lo “taem for harvest,” wea start lo 1914. Wanem change nao kamap? Olketa angel start for separatem olketa laea Christian from olketa tru Christian.—Matt. 13:30, 39-41.

18. Wanem nao helpem olketa brata for luksavve olketa needim niu nem?

¹⁸ Bihaen Jehovah markem datfala faithful wakaman lo 1919, for helpem pipol blo hem for luksavve lo waka wea hem givim olketa for duim. Stretawe olketa luksavve preaching waka wea olketa duim nao mekem olketa difren from evri laea Christian. Taem olketa luksavve lo datwan, olketa luksavve, datfala nem “Olketa Bible Student” hem no fitim olketa. Main samting wea olketa shud duim hem no for studyim Bible nomoa bat for witness abaotem God and for praisem and mekhae lo nem blo hem. So followim waka wea olketa duim, wanem kaen nem nao fitim olketa? Lo 1931 olketa kasem ansa blo datfala kwestin.

19, 20. (a) Wanem nao olketa disaedem lo wanfala convention lo 1931? (b) Wanem nao olketa brata duim taem olketa herem niu nem blo olketa?

¹⁹ Lo July 1931, samting olsem 15,000 Bible Student arrive lo Columbus, Ohio, U.S.A., for wanfala convention. Taem olketa luk lo program, olketa lukim tufala leta, J and W lo front kava, olketa interest for savve wanem nao tufala leta hia minim. Samfala tingse datwan hem ‘Just Watch,’ olketa narawan tingse ‘Just Wait.’ Then lo Sunday, July 26, Brata Joseph Rutherford talem disison blo olketa taem hem sei: “Iumi laekem pipol for savve lo iumi and kolem iumi Olketa Jehovah’s witness.” Lo datfala taem, evriwan wea hipap luksavve JW, hem minim Olketa Jehovah’s Witness, disfala nem hem kam from Bible lo Aesaea 43:10.

²⁰ Evriwan wea hipap agree lo wanem olketa disaedem taem olketa singaot big and olketa gohed klap. Olketa brata lo staka nara kantri tu herem lo radio, datfala singaot and klap lo Columbus! Ernest and Naomi Barber wea stap lo Australia lo datfala taem sei: “Taem olketa singaot big and gohed klap lo America, olketa brata lo Melbourne tu standap and singaot big and gohed klap. Mitufala no savve forgetim datfala taem!” a

21. Hao nao disfala niu nem mekem olketa brata laek for duim preaching waka?

²¹ Disfala nem Olketa Jehovah’s Witness wea kam from Bible, strongim go moa pipol blo God for duim preaching waka. Edward and Jessie Grimes, wanfala pioneer hasband and waef  lo United States, wea attendim datfala convention lo Columbus lo 1931 sei: “Taem mitufala lusim haos mitufala Olketa Bible Student, bat taem mitufala kam bak mitufala Olketa Jehovah’s Witness. Mitufala hapi from mifala garem nem wea helpem mifala for mekhae lo nem blo God blo iumi.” Bihaen datfala convention, samfala brata and sista iusim niu teknik for mekhae lo nem blo God. Taem olketa startim story witim haosholder, olketa givim wanfala card wea garem disfala raeting: “Mi wanfala lo Olketa JEHOVAH’S witness wea preach abaotem Kingdom blo JEHOVAH, God blo iumi.” Tru nao, pipol blo God praod for garem nem blo Jehovah and olketa redi for mekhae lo nem hia, lo staka difren ples.—Aesaea 12:4.

22. Wanem nao showimaot pipol blo Jehovah difren from olketa nara religion?

²² Staka year nao go pas, from taem Jehovah helpem olketa anointed brata blo iumi, for tinghae lo nem wea olketa nomoa garem. Start kam lo 1931, waswe, Satan mekem pipol for no luksavve hu nao pipol blo God? Waswe, hem mekem pipol for no luksavve iumi difren from pipol lo olketa nara religion? Barava nomoa! Winim enitaem bifor, pipol luksavve iumi olketa witness blo God. (Readim Maeka 4:5; Malakae 3:18.) Iumi nomoa garem nem blo God, so sapos eniwan story abaotem Jehovah, pipol bae kwiktaem luksavve hem wanfala Jehovah’s Witness. Nomata staka false religion stap and olketa olsem maunten wea hae tumas, tru worship blo Jehovah hem “stap antap . . . bae hemi kamap hae moa winim evri narafala maonten.” (Aesaea 2:2) Distaem, tru worship blo Jehovah and nem blo hem wea holy kasem bigfala praise.

23. Wanem important truth abaotem Jehovah nao Sams 121:5 talem wea strongim iumi?

²³ Taem iumi savve Jehovah bae protectim iumi from olketa attak blo Satan distaem and lo future, diswan barava strongim iumi. (Sams 121:5) Iumi tu garem gud reason for talem sem toktok olsem man wea raetem psalm wea sei: “Olketa pipol wea God hemi siusim fo kamap olketa pipol blong hem, olketa ya nao i hapi.”—Sams 33:12.