1, 2. E fakamaluga aka pefea ne te New World Translation a te igoa o te Atua?

I TE taeao o te Aso Lua, se aso ‵moko kae ‵kasa te la, i a Tesema po 2, 1947, ne olo atu ei se potukau foliki o taina fakaekegina mai te Peteli i Brooklyn, Niu Ioki, o fai se galuega lasi ‵ki. Ne faigata ‵ki te galuega, kae ne tumau eiloa latou i ei, ke oko foki eiloa ki te suā 12 tausaga mai tua ifo i ei. Mai tua o se taimi leva ‵ki, i te Aso Sa, i a Mati 13, 1960, ne fakaoti ei ne latou a toe fakamatalaga fakaoti mō se ‵fuliga fou o te Tusi Tapu. I te tolu masina mai tua ifo, i a Iuni 18, 1960, ne ‵tala mai i te aso tenā ne te Taina ko Natano Noa a te tusi fakaoti o te New World Translation of the Holy Scriptures kātoa ki te kautaina fia‵fia kolā ne ‵kau atu ki te fono i Manchester, i Egelani. Ne fakaasi faka‵lei mai eiloa ne te failauga a lagonaga o tino katoa kolā ne ‵kau atu i te taimi ne fai mai ei a ia: ‘A te aso nei ko te aso ke fia‵fia ei a Molimau a Ieova i te lalolagi kātoa!’ A te vaega fakaofoofogia e tasi o te ‵fuliga fou tenā ko te pogai fakapito ke fia‵fia ei​—ko te fakaaogaga faeloa o te igoa totino o te Atua.

² E se fakaaoga ne ‵fuliga e uke o te Tusi Tapu a te igoa o te Atua. Kae ne ‵teke atu eiloa a tavini fakaekegina a Ieova ki togafiti a Satani ke ‵solo keatea te igoa o te Atua mai i mafaufauga o tino. Ne fai mai penei te fakatomuaga o te New World Translation: “A te pogai tāua o te ‵fuliga tenei ko te fakafoki atu o te igoa o Ieova ki tena tulaga tonu i te Tusi Tapu.” A te ‵tonuga loa, e fakaaoga ne te New World Translation a te igoa totino o te Atua, e silia atu i te 7,000 taimi. Ko oko eiloa i te tu ‵kese o te ‵fuliga tenei i te fakamalugaga o te igoa o te ‵tou Tamana faka-te-lagi​—ko Ieova!

3. (a) Se a te mea ne maina i ei a ‵tou taina i te uiga o te igoa o te Atua? (e) E ‵tau o pefea te ‵tou malamalama i te Esoto 3:13, 14? (Ke onoono ki te pokisi “ Te Uiga o te Igoa o te Atua.”)

³ I tausaga ne kamata mai ei, ne malamalama a Tino A‵koga i te Tusi Tapu me i te uiga o te igoa o te Atua ko te “Ko Au, ko Au eiloa.” (Eso. 3:14, TT) Tela la, ne fai mai The Watch Tower i a Ianuali 1, 1926, penei: “A te igoa o Ieova se fakailoga o te Tino telā e ola, . . . se tino telā e seai sena kamataga mo se fakaotiga.” Kae i te taimi ne kamata ei ne te kau ‵fulitusi o te New World Translation te lotou galuega, ko oti eiloa ne fesoasoani atu a Ieova ki ana tino ke malamalama me e se fakauiga fua tena igoa me i  a ia e ola kae ko te ‵toe uiga tāua me i a ia se Atua fai fuafuaga kae fakataunu foki ne ia. Ne iloa ne latou me tenei te uiga tonu o te igoa o Ieova “E Fai mo Fai so se Mea.” Ao, ne faite ne ia a te iunivesi mo mea ola kae ‵poto, kae e tumau foki i te fakataunuga o tena loto mo tena fuafuaga. Kaia la e tāua ei ke fakamaluga aka te igoa o te Atua, kae e mafai pefea o aofia tatou i te fakamalugaga?

4, 5. (a) Se a te mea e akai atu tatou ki ei i te taimi e ‵talo atu ei tatou: “Ke tapu tou igoa”? (e) Ka faka‵malu pefea ne te Atua tena igoa, kae mafea foki la?

⁴ E manako a Ieova ke fakamaluga tena igoa. A te ‵tonuga loa, a tena fuafuaga muamua eiloa ko te faka‵maluga o tena igoa, e pelā mo te mea e lavea atu i te fakamolemole muamua a Iesu i tena ‵talo fakaakoako: “Ke tapu tou igoa.” (Mata. 6:9) I te taimi e taku atu ei te fakamolemole tenā, se a te mea e ‵talo atu tatou ki ei?

⁵ E pelā mo te mea ne tauloto ne tatou i te Mataupu 1 o te tusi tenei, a te fakamolemole ko te “Ke tapu tou igoa” ko te fakamolemole e tasi mai i fakamolemole e tolu i te ‵talo fakaakoako a Iesu telā e aofia i te fakataunuga o te fuafuaga a Ieova. A te suā avā fakamolemole: “Ke oko mai tou Malo. Ke fai te mea e loto koe ki ei.” (Mata. 6:10) Tela la, e pelā eiloa mo te akai atu o tatou ki a Ieova ke gasuesue o fakaoko mai tena Malo kae ke fai te mea e loto a ia ki ei, e akai atu foki tatou ki a Ieova ke gasuesue o faka‵malu tena igoa. I nisi tugapati, e akai atu tatou ki a Ieova ke gasuesue a ia o faka‵ma tena igoa mai i taku fakamaseiga katoa kolā ko oti ne fakaoko atu ki ei talu mai te ‵tekeatuga i Etena. Ne saga atu pefea a Ieova ki se vaegā ‵talo penā? E fai mai a ia: “Kafai ko fakaasi ne au ki malo a te tapu o toku igoa takutakua​—te igoa telā ne taku fakavalea ne koutou i olotou fenua, tenā la, ka iloa ei ne latou i a au ko [Ieova].” (Eseki. 36:23; 38:23) I Amaketo, i te taimi e ave keatea ei ne ia a amioga ma‵sei, ka faka‵malu ne Ieova tena igoa i mua o mea ola katoa.

6. E mafai pefea o ‵kau atu tatou ki te faka‵maluga o te igoa o te Atua?

⁶ I tala mua katoa, ne talia ne Ieova ana tavini ke aofia i te faka‵maluga o tena igoa. E tonu, e se mafai o fai ne tatou a te igoa o te Atua ke ‵malu atu. Ko leva loa ne ‵malu, io me e tapu, i se auala ‵lei katoatoa. Tela la, e mafai pefea o faka‵malu ne tatou? E fai mai a Isaia: “Masaua i a au, [Ieova] te Aliki Malosi, e ‵malu.” Kae ne toe fai mai a Ieova e uiga ki ana tino: “Kafai ko lavea ne koutou. . . , Kae ka talia ne koutou i a au ko te Atua tapu o Isalaelu. Ka fakaaloalo mai koutou ki a au, kae ma‵taku mai ki a au.” (Isa. 8:13; 29:23) Tela la, e faka‵malu ne tatou te igoa o te Atua mai i te ‵kilo atu ki ei e pelā me tu ‵kese kae maluga atu i lō nisi igoa katoa, mai i te āva ki te mea telā e fakaata mai i ei, mo te fesoasoani atu ki nisi tino ke ‵kilo atu ki ei e pelā me e ‵malu. E fakaasi atu ne tatou a te ōfo mo te mataku ki te igoa o te Atua, maise eiloa māfai e talia ne tatou a Ieova e pelā me ko te ‵tou Pule kae faka‵logo ki a ia mo ‵tou loto kātoa.​—⁠Faata. 3:1; Faka. 4:11.

7, 8. (a) Kaia ne fatoa tauave ei ne tino o te Atua tena igoa? (e) Se a te mea ka mafau‵fau nei tatou ki ei?

⁷ Ko oti ne fakaaoga ne tavini a te Atua i aso nei a te igoa o te Atua i olotou tusi talu mai i te 1870. E pelā mo te Zion’s Watch Tower i a Aokuso 1879 mo te Songs of the Bride, se pese telā ne ‵lomi i te tausaga foki eiloa tenā, e taku mai i ei a te igoa o Ieova. Kae koi foliga mai me i aso mua, ne talia ne Ieova ana tino ke fakaigoa ne latou a latou eiloa i mua o tino ki te igoa ‵malu tenā, ne fakamautinoa aka ne ia me e fetaui ‵lei eiloa latou ki mea e manakogina mō te tauliaga sili tenā. Ne fakatoka pefea ne Ieova a Tino A‵koga muamua konā ke tauave ne latou tena igoa?

⁸ I te ‵toe kilo atu ki tausaga talu mai te 1800 mo te tausaga kamata talu mai te 1900, e lavea ne tatou a te auala ne tuku atu ei ne Ieova ki ana tino se malamalama manino ki muna‵tonu tāua kolā e aofia i ei tena igoa. Ke onoono aka ki muna‵tonu e tolu konei.

9, 10. (a) Kaia ne fakasino atu faeloa ki a Iesu a mataupu muamua i te Watch Tower? (e) Se a te ‵fuliga telā ne tupu mai te 1919 o vau ki mua, kae se a te ikuga? (Ke onoono foki ki te pokisi “ Te Auala ne Fakamaluga Aka ei ne The Watchtower a te Igoa o te Atua.”)

⁹ Muamua la, ne maua ne tavini a Ieova a te kilokiloga ‵lei ki te tāua o te igoa o te Atua. Ne ‵kilo atu a Tino A‵koga i te Tusi Tapu fakamaoni mua ki te fakatokaga o te togiola e pelā me ko te akoakoga fakavae i te Tusi Tapu. E fakamatala mai i ei te pogai ne masani o fakasino atu faeloa a te Watch Tower ki a Iesu. E pelā mo te tausaga muamua ne ‵lomi ei, ne silia atu i te fakasefulu taimi ne taku mai ei i te mekesini a te igoa o Iesu i lō te igoa o Ieova. Ne fai mai The Watchtower i a Mati 15, 1976 e uiga ki Tino A‵koga i te kamataga, me ne “tō fakatāua malosi” ne latou a Iesu. E se leva kae ne fesoasoani atu a Ieova ki a latou ke malamalama i te tulaga tāua telā e tuku atu ne te Tusi Tapu ki te igoa totino o te Atua. Ne pokotia pefea a Tino A‵koga i te Tusi Tapu i ei? Maise eiloa mai te 1919 o vau ki mua, e fai mai te mataupu foki eiloa tenā o te Watchtower, “ne momea aka te fakaasi atu ne latou a te loto fakafetai ki te Tamana faka-te-lagi o te Mesia, ko Ieova.” A te ‵tonuga loa, i te fia sefulu o tausaga talu mai te 1919, ne taku mai i The Watch Tower a te igoa o te Atua e silia atu i te 6,500 taimi!

¹⁰ Mai i te tukuatuga o te igoa o Ieova ki koga e ‵tau o o tuku ki ei, ne fakaasi atu ei ne ‵tou taina a te lotou a‵lofa ki te igoa o te Atua. E pela mo Mose i aso mua, ne olo atu latou o “folafola atu te igoa o Ieova.” (Teu. 32:3; Sala. 34:3) Ne iku atu ei, e pelā mo te mea ne folafola mai i te Tusi Tapu, ki te lavea ne Ieova te lotou a‵lofa ki tena igoa telā ne fakaasi atu ei tena fiafia.​—Sala. 119:132; Epe. 6:10.

11, 12. (a) Se a te auala ne ‵fuli ei ‵tou tusi mai tua malie ifo o te 1919? (e) Se a te mea ne fai ne Ieova ke ‵saga tonu atu ki ei ana tavini, kae kaia?

¹¹ A te lua, ne maua ne Kelisiano ‵tonu a te malamalama tonu i te galuega ne tuku atu ne te Atua. Mai tua malie ifo o te 1919, ne gasue‵sue a taina fakaekegina kolā e fai ne latou te takitakiga ke iloilo faka‵lei a valoaga a Isaia. Mai konā ne kamata ei o fai a ‵fuliga ki fakamatalaga i ‵tou tusi. Kaia ne fai ei a te fakamafuliga tenā mo “meakai i te taimi tonu”?​—Mata. 24:45.

¹² Mai mua o te 1919, ne seki fakamatala mai aka eiloa ne The  Watch Tower so se mea e uiga ki pati konei a Isaia: “Koutou ko aku molimau, ne filifili ne au koutou ke fai mo aku tavini, . . . ko au tokotasi ko te Aliki [ko Ieova].” (Faitau te Isaia 43:10-12.) Kae mai tua malie o te 1919, ne kamata o fakasino atu ‵tou tusi ki fuaiupu konā i te Tusi Tapu, telā ne fakamalosi atu ki te kau fakaekegina katoa ke ‵kau atu ki te galuega telā ne tuku atu ne Ieova ki a latou​—telā ko te molimau atu e uiga ki a ia. A te ‵tonuga loa, mai i te 1925 ki te 1931, ne fakamatala mai i ei a te Isaia mataupu e 43 i lōmiga kese‵kese e 57 o The Watch Tower, kae ne fakasino atu ne lōmiga takitasi a pati a Isaia ki Kelisiano ‵tonu. E manino ‵lei, me i tausaga konā, ne fai eiloa ne Ieova ke ‵saga tonu atu ana tavini ki te galuega ne ‵tau o fai ne latou. Kaia? Ne fai penā me “e ‵tau o tofotofo muamua latou.” (1 Timo. 3:10) A koi tuai o tauave ne latou te igoa o te Atua i se auala tonu, ne ‵tau o fakamaoni atu ne Tino A‵koga ki a Ieova e auala i olotou galuega me i a latou ko ana molimau ‵tonu eiloa.​—Luka 24:47, 48.

13. E fakaasi mai pefea ne te Muna a te Atua a te ‵toe kinauga tāua telā e ‵tau o fakatoka faka‵lei?

¹³ A te tolu, ne kamata o fakatāua ne tino o Ieova a te tāua o te faka‵maluga o te igoa o te Atua. Mai te 1920 o vau ki mua, ne malamalama latou me i te faka‵maluga o te igoa o te Atua ko te ‵toe kinauga tāua telā e ‵tau o fakatoka faka‵lei. Ne fakaasi mai pefea ne te Muna a te Atua a te munatonu tāua tenā? Mafaufau ki fakaakoakoga e lua konei. Se a te pogai fakavae ne faka‵sao ei ne te Atua a Isalaelu mai i Aikupito? Ne fai mai a Ieova: “Ka ko au [toku igoa] foki ke takutakua i te lalolagi kātoa.” (Eso. 9:16) Kae kaia ne fakaasi atu ei ne Ieova a te alofa fakamagalo ki Isalaelu i te taimi ne ‵teke atu ei ki a ia? Ne toe fai mai a Ieova: “Kae ne seki fai ne au, i toku igoa ma taku valea.” (Eseki. 20:8-10) Ne a mea ne tauloto ne Tino A‵koga mai i mea konā mo nisi tala i te Tusi Tapu?

14. (a) Se a te mea ne malamalama i ei a tino o te Atua i tausaga tai pilipili ki te 1930? (e) Se a te ikuga o te mainaga ‵loto telā ne maua ne Tino A‵koga i te Tusi Tapu e uiga ki te galuega talai? (Ke onoono ki te pokisi “ Se Pogai Tāua ke Talai Atu.”)

¹⁴ I tausaga mai tua ifo o te 1920, ne iloa ei ne tino o te Atua a te tāua o pati ne fai mai ne Isaia i te 2,700 tausaga mai mua atu i ei. Ne fai mai a ia e uiga ki a Ieova: “Ne ‵taki ne ia tena fenua, ne ala ei o fakaaloalogina tena igoa.” (Isa. 63:14) Ne malamalama ei a Tino A‵koga i te Tusi Tapu, me i te ‵toe kinauga tāua, ko te faka‵maluga o te igoa o te Atua, kae e se ko te fakaolataga totino. (Isa. 37:20; Eseki. 38:23) I te 1929, ne fakatoetoe aka ne te tusi ko te Prophecy a te munatonu tenā, penei: “A te igoa o Ieova ko te ‵toe kinauga tāua eiloa i mua o mea katoa ne faite.” A te malamalama fou tenei ne toe fakamalosi aka ei a tavini a te Atua ke molimau atu e uiga ki a Ieova kae ke faka‵ma tena igoa mai fakamaseiga.

15. (a) I tausaga talu mai te 1930, ne a mea ko oti ne maua ne ‵tou taina? (e) Se a te mea ne ‵tau o fai i te taimi tenā?

¹⁵ I tausaga kamata mai te 1930, ne maua ne ‵tou taina se kilokiloga ‵lei ki te tāua o te igoa o te Atua, se malamalama manino ki te galuega ne tuku atu ne te Atua ke fai ne latou, mo te mainaga ‵loto ki te kinauga tāua telā e ‵tau o fakatoka faka‵lei. Ko oko atu nei ki te taimi o Ieova ke tuku atu te fakaaloalo ki ana tavini ke tauave ne latou tena igoa i mua o tino. Ke onoono  tatou ki te auala ne tupu ei te mea tenā, ke mafau‵fau tatou ki nisi mea ne ‵tupu i aso mua.

16. (a) Se a te auala fakaofoofogia e fakamaluga aka ei ne Ieova tena igoa? (e) I aso ko ‵teka, ko oi ne tavini atu muamua e pelā me ne tino mō te igoa o te Atua?

¹⁶ A te auala fakaofoofogia e fakamaluga ei ne Ieova tena igoa ko te fakaaogaga o tino i te lalolagi kolā e tauave ne latou tena igoa. Mai te 1513 T.L.M. o vau ki mua, ne sui ei ne te fenua o Isalaelu a Ieova e pelā me ko ana tino. (Isa. 43:12) Kae ne fakata‵mala latou o tausi te lotou feagaiga mo te Atua, kae i te 33 T.A., ne galo atu te lotou fesokotakiga fakapito mo ia. E se leva mai tua ifo i ei, ne saga atu a Ieova “ki fenua fakaa‵tea ke aumai mai i a latou ne tino mō tena igoa.” (Galu. 15:14) Ne kamata o lauiloa a te fenua tenā e pelā me ko te “Isalaelu a te Atua,”  telā e aofia i ei a soko fakaekegina o Keliso mai fenua kese‵kese.​—Kala. 6:16.

17. Se a te togafiti ne manuia eiloa a Satani i te fakaaogaga?

¹⁷ Kāti ko te 44 T.A., ne kamata ei o “fakaigoa a soko [o Keliso] ki Kelisiano.” (Galu. 11:26) Muamua la, ne tu ‵kese te igoa tenā me ne fakasino atu fua ki Kelisiano ‵tonu. (1 Pe. 4:16) Kae e pelā mo te mea ne fakaasi mai i te tala fakatusa a Iesu e uiga ki saito mo mouku, ne manumalo a Satani i tena taumafai ke fakagalue aka te igoa tu ‵kese ko te Kelisiano ki vaegā Kelisiano ‵loi kese‵kese katoa. Tela la, i te fia o senitenali, ne seki tu ‵kese eiloa a Kelisiano ‵tonu mai Kelisiano ‵loi. Kae ne kamata o ‵fuli te tulaga tenā i te taimi “e ‵kati ei a saito,” telā ne kamata i te 1914. Kaia? Me ko kamata o ‵vae aka ne agelu a Kelisiano ‵loi mai Kelisiano ‵tonu.​—Mata. 13:30, 39-41.

18. Se a te mea ne fesoasoani atu ki taina ke iloa ne latou a te tāua ke isi se igoa?

¹⁸ Mai tua o te fakasopoga o te tavini fakamaoni i te 1919, ne fesoasoani atu a Ieova ki ana tino ke iloa ne latou a te galuega telā ne tuku atu ne ia ki a latou ke fai. Ne kamata o lavea ne latou me i te galuega talai mai fale ki fale ka fai ei ke tu ‵kese latou mai i Kelisiano ‵loi katoa. I te taimi ne iloa ei ne latou te manatu tenā, kae ne kamata o malamalama fakavave latou mai tua malie ifo i ei, me i te igoa ko te “Tino A‵koga i te Tusi Tapu” e se lava fua i ei ke faka‵kese malosi aka ei latou. A te lotou galuega tāua i te olaga e se ko te sukesuke fua ki te Tusi Tapu kae ko te molimau atu e uiga ki te Atua kae ke fakaaloalo kae fakamaluga tena igoa. Tela la, se a te igoa telā e sili atu te fetaui ‵lei ki te galuega ne fai ne latou? Ne tali aka eiloa te fesili tenā i te 1931.

19, 20. (a) Se a te fakaikuga fakafiafia ne fai i te fono i te 1931? (e) Ne pefea a lagonaga o ‵tou taina ki te fakaaogaga o te igoa fou?

¹⁹ I a Iulai 1931, ne oko atu a nisi Tino A‵koga kāti e toko 15,000 ki Columbus, Ohio, U.S.A., ki te fono. I te laveaga ne latou a te polokalame o te fono, ne avea olotou mata ne mataimanu ‵lasi e lua​—J mo te W​—kolā ne ‵lomi i te ‵kava mai mua. ‘Se a te mea ne fakauiga ki ei a mataimanu konei?’ ne fesili ifo latou. Ne mafau‵fau a nisi tino me ne fakauiga ki te ‘Just Watch’; a ko nisi, ‘Just Wait.’ Kae i te Aso Sa i a Iulai po 26, ne fakaasi mai ei ne te Taina ko Joseph Rutherford a te ikuga telā e aofia i ei a te fakamatalaga tāua tenei: “E ma‵nako matou ke lauiloa kae ke fakaigoa foki ki te igoa, ke molimau atu, Jehovah’s witnesses (Molimau a Ieova).” I te taimi tenā, ne malamalama a tino katoa kolā ne ‵kau atu i te uiga o mataimanu kolā ne mafau‵fau latou ki ei​—me ne fakauiga ki te Jehovah’s Witnesses (Molimau a Ieova), se igoa faka-te-Tusi Tapu telā ne fakavae ki te Isaia 43:10.

²⁰ Ne talia eiloa ne te kautaina a te fakaikuga tenā mo te paka‵laga kae patipati olotou lima mō se taimi leva ‵ki. Ne lagona atu i te letio a te fiafia lasi tenā i Columbus ne te āfa o te lalolagi! Ne fai mai ne Ernet mo Naomi Barber i Ausetalia a te mea ne masaua ne lāua: “I te taimi ne patipati lima ei i Amelika, ne evaeva a taina i Melbourne kae patipati lima foki. Ne seki mafai eiloa o puli i a māua a te mea tenā!” *

21. Ne fakamalosi aka pefea ne te igoa fou a te galuega talai?

²¹ A te mauaga o te igoa faka-te-Tusi Tapu ko Molimau a Ieova ne tuku atu ei se malosi fakaopoopo ki tavini a te Atua ke ‵kau atu ki te galuega talai. A Edward mo Jessie Grimes, se tauavaga paenia i te Iunaite Sitete kolā ne ‵kau atu ki te fono i te 1931 i Columbus, ne fai mai: “Ne tiaki ne māua a te fale e pelā me ne Tino A‵koga i te Tusi Tapu, kae ne toe ‵foki atu māua e pelā me ne Molimau a Ieova. Ko oko i te fia‵fia o māua me ko maua nei ne matou se igoa telā ne fesoasoani mai ki a māua ke fakamaluga aka te igoa o te ma Atua.” Mai tua o te fono, ne fakaaoga ne nisi Molimau a te auala fou tenā. E fakatomua olotou pati ki tino i fale mai te tukuatuga o se tamā pepa mo te fekau i ei, penei: “Ko talai atu ne se molimau a IEOVA e tokotasi a te Malo o IEOVA te motou Atua.” Ao, ko oko eiloa i te fakamata‵mata o tino o te Atua ke tauave te igoa o Ieova, kae ne toka eiloa latou ke folafola atu tena tāua i te lalolagi kātoa.​—Isa. 12:4.

22. Se a te mea ne fakamaoni atu me ne maua ne tino o Ieova se iloga tu ‵kese?

²² Ko oti eiloa ne ‵teka atu a te fia o tausaga talu mai te taimi ne fakamalosi atu ei a Ieova ki ‵tou taina fakaekegina ke puke ‵mau ki te igoa tu ‵kese tenā. Talu mai te 1931, e mata, ne mafai ne Satani o ‵funa aka a te iloga o tino o te Atua? E mata, ne manuia a ia i te faiga ke se tu ‵kese tatou mai i nisi lotu o te lalolagi? Ikai, e se tāitāi eiloa! E ‵kese mai i ei, ko sili atu eiloa te lauiloa malosi atu o tatou e pelā me ne molimau a te Atua i lō aso mua. (Faitau te Mika 4:5; Malaki 3:18.) A te ‵tonuga loa, ona ko te pili o te fesokotakiga o tatou mo te igoa o te Atua telā kafai e isi se tino ko fakaaoga faeloa ne ia i aso nei, e mafai o iloa vave me se tokotasi o Molimau a Ieova. I lō te galo atu i va o lotu ‵se kolā e fai pelā me ne mauga, “a te mauga telā e tu ei te Faletapu ka maluga atu i mauga katoa.” (Isa. 2:2) I aso nei, ko oti eiloa ne fakamaluga aka a te tapuakiga ki a Ieova mo tena igoa ‵malu.

23. E ‵tusa mo te Salamo 121:5, se a te munatonu tāua e uiga ki a Ieova e maua ei ne tatou a te malosi sili?

²³ Ko oko eiloa i te fakamalosi loto ke iloa atu me ka puipui ne Ieova tatou mai osomaiga a Satani i aso nei mo aso mai mua! (Sala. 121:5) Ona ko pogai ‵lei e toe fakafoki atu ne tatou a pati a te faisalamo telā ne tusi mai: “Amutia te malo telā e fai te Aliki [Ieova] mo olotou Atua; amutia foki tino ko oti ne filifilia ne te Aliki mō ia!”​—Sala. 33:12.