1, 2. New World Translation i hulisa hani dzina ḽa Mudzimu?

 NGA matsheloni a Ḽavhuvhili nga ḽa 2 December, 1947, mutsho wo vha wo fhola zwavhuḓi, tshigwada tshiṱuku tsha vhahashu vho ḓodzwaho vha Bethele ya ngei Brooklyn, kha ḽa New York, vho vha vho ḓidzudzanyela u ita mushumo wa ndeme vhukuma. Wo vha u mushumo u konḓaho, fhedzi vho bvela phanḓa nawo lwa miṅwaha ya 12. Mafheleloni, nga Swondaha ya ḽa 13 March, 1960, vha khunyeledza ṱhalutshedzelo ntswa yo fhelelaho ya Bivhili. Nga murahu ha miṅwedzi miraru, nga ḽa 18 June, 1960, Wahashu Nathan Knorr a bvisa volumu ya u fhedza ya New World Translation of the Holy Scriptures yo fhelelaho buthanoni ḽo nyanyulaho vhathetshelesi ngei Manchester, kha ḽa England. Tshiambi tsho bvisela khagala vhuḓipfi ha vhathetshelesi vhoṱhe musi tshi tshi amba uri: ‘Ṋamusi ndi ḓuvha ḽa dakalofulu kha Ṱhanzi dza Yehova shangoni ḽoṱhe!’ Tshiṅwe tshithu tsho khetheaho tshe tsha ita uri vhathu vha takalele nga maanḓa yeneyo ṱhalutshedzelo ntswa ndi u shumiswa lunzhi-lunzhi ha dzina ḽa Mudzimu.

² Bivhili nnzhi a dzi na dzina ḽa Mudzimu. Fhedzi vhashumeli vha Yehova vho ḓodzwaho vho lwisana na vhukwila ha Sathane ha u thutha dzina ḽa Mudzimu mihumbuloni ya vhathu. Marangaphanḓa a New World Translation yo bviswaho ḽeneḽo ḓuvha o ri: “Tshithu tsha ndeme vhukuma tsha yeneyi ṱhalutshedzelo ndi u vhuyedzedza dzina ḽa Mudzimu vhudzuloni haḽo.” I ngoho, ṱhalutshedzelo ya New World Translation i shumisa dzina ḽa Mudzimu, Yehova, lu fhiraho 7 000. Yeneyi ṱhalutshedzelo yo hulisa vhukuma dzina ḽa Khotsi ashu wa ṱaḓulu—Yehova!

3. (a) Vhahashu vho ṱhogomela mini malugana na zwine dzina ḽa Mudzimu ḽa amba zwone? (b) Ri fanela u pfesesa hani Ekisodo 3:13, 14? (Sedzani bogisi “ Zwine Dzina ḽa Mudzimu ḽa Amba Zwone.”)

³ Miṅwahani yo fhiraho, Vhagudi vha Bivhili vho pfesesa uri dzina ḽa Mudzimu ḽi amba uri “Ndi Nṋe ndi re hone.” (Ek. 3:14) Nga zwenezwo, magazini une wa pfi The Watch Tower wa ḽa 1 January, 1926, wo amba uri: “Dzina Yehova ḽi amba we a si vhumbwe nga muṅwe muthu, . . . A si na mathomo na magumo.” Naho zwo ralo, musi vhaṱalutshedzeli vha New World Translation vha tshi thoma mushumo wavho, Yehova o vha o no thusa vhathu vhawe u ṱalukanya uri a ḽi ambi fhedzi uri ho ngo vhumbwa nga muṅwe muthu, fhedzi ḽi dovha ḽa sumbedza uri ndi Mudzimu ane a ḓadzisa  ndivho yawe. Vho guda uri dzina Yehova nga ho livhaho ḽi amba uri “U Ita Uri Zwi Vhe Hone.” Ngoho ndi ya uri o sika fhethu hoṱhe na zwivhumbiwa zwo ṱalifhaho, nahone u khou bvela phanḓa a tshi ita uri zwine a funa na ndivho yawe zwi ḓadzee. Fhedzi ndi ngani zwi zwa ndeme nga u rali uri dzina ḽa Mudzimu ḽi huliswe nahone ri nga shela hani mulenzhe kha u ḽi hulisa?

4, 5. (a) Ri vha ri tshi khou humbela mini musi ri tshi rabela ri tshi ri: “Dzina ḽau nga ḽi itwe ḽikhethwa”? (b) Dzina ḽa Mudzimu ḽi ḓo itwa ḽikhethwa hani nahone lini?

⁴ Yehova u ṱoḓa dzina ḽawe ḽi tshi huliswa. Zwi re zwone ndi uri ndivho yawe khulwane ndi u ita uri dzina ḽawe ḽi vhe ḽikhethwa, samusi zwo sumbedzwa kha khumbelo ya u thoma ya Yesu kha thabelo yawe ya tsumbo: “Dzina ḽau nga ḽi itwe ḽikhethwa.” (Mat. 6:9) Ri vha ri tshi khou rabelela mini musi ri tshi ita yeneyo khumbelo?

⁵ Samusi ro zwi guda kha Ndima ya 1 ya ino bugu, khumbelo ine ya ri “Dzina ḽau nga ḽi itwe ḽikhethwa” ndi iṅwe ya khumbelo tharu dza thabelo ya Yesu ya tsumbo ya malugana na ndivho ya Yehova. Dziṅwe mbili dzi ri: “Muvhuso wau nga u ḓe. Zwine wa funa nga zwi itwe.” (Mat. 6:10) Nga zwenezwo, samusi ri tshi humbela Yehova uri a ḓise Muvhuso wawe na uri zwine a funa zwi itwe, ri vha ri tshi khou humbela uri Yehova a dzhie vhukando ha u ita uri dzina ḽawe ḽi khethwe. Nga maṅwe maipfi, ri khou humbela Yehova uri a dzhie vhukando ha u ṱanzwa dzina ḽawe ḽe ḽa tshikafhadzwa nga samba u bva nga tshifhinga tsha vhushandukwa ngei Edeni. Yehova u ḓo aravha hani thabelo yo raloho? U ri: “Ngauri dzina ḽanga ḽihulu, ḽe ḽa tshinywa nga vha-nnḓa, ḽe na ḽi tshinya ni vhukati havho, ndi ḓo ḽi ita ḽikhethwa.” (Hesek. 36:23; 38:23) Musi Yehova a tshi fhelisa vhuvhi nga Haramagedo, u ḓo ita uri dzina ḽawe ḽi itwe ḽikhethwa tsiko yoṱhe i tshi zwi vhona.

6. Ri nga shela hani mulenzhe kha u ita uri dzina ḽa Mudzimu ḽi itwe ḽikhethwa?

⁶ U bva kale, Yehova o tendela vhashumeli vhawe vha tshi shela mulenzhe kha u ita uri dzina ḽawe ḽi vhe ḽikhethwa. Ndi ngoho uri ri nga si ite uri dzina ḽa Mudzimu ḽi vhe ḽikhethwa u fhira nga nḓila ine ḽa vha ngayo. Ḽo no ḓi khethwa kana ndi ḽikhethwa nga ho fhelelaho. Nga zwenezwo, ri nga ḽi ita ḽikhethwa nga nḓila-ḓe? Yesaya u ri: “Ni ḓivhe uri Yehova wa Mavhuthu—ndi Mukhethwa ni ofhe Ene.” Yehova nga dzawe o amba zwi tevhelaho malugana na vhathu vhawe, o ri: “Dzina ḽanga vha ḓo ḽi ita ḽikhethwa . . . , Mudzimu wa Isiraele vha ḓo mu ofha.” (Yes. 8:13; 29:23) Nga zwenezwo, ri ita uri dzina ḽa Mudzimu ḽi vhe ḽikhethwa nga u ḽi fhambanya na maṅwe madzina oṱhe na u ḽi dzhia ḽi ḽihulwane kha maṅwe madzina oṱhe, nga u ṱhonifha zwine ḽa imela zwone, na nga u thusa vhaṅwe uri vha ḽi dzhie ḽi ḽikhethwa. Ri sumbedza u ofha na u ṱhonifha dzina ḽa Mudzimu musi ri tshi ṱhogomela uri Yehova ndi Muvhusi washu na u mu thetshelesa nga mbilu dzashu dzoṱhe.—Mir. 3:1; Nzumb. 4:11.

7, 8. (a) Ndi ngani zwo dzhia tshifhinga uri vhathu vha Mudzimu vha vhidzwe nga dzina ḽawe? (b) Ndi mini zwine ra ḓo zwi ṱhogomela zwino?

⁷ Vhashumeli vha Mudzimu musalauno vho shumisa dzina ḽa Mudzimu kha khandiso dzavho u bva nga vho-1870. Sa tsumbo,  magazini une wa pfi Zion’s Watch Tower wa August 1879 na bugu Songs of the Bride ya dzinyimbo yo bviswaho nga wonoyo ṅwaha, zwi bula dzina Yehova. Naho zwo ralo, zwi vhonala uri musi Yehova a sa athu u tendela vhathu vhawe vha tshi ḓivhidza khagala nga dzina ḽawe ḽikhethwa, o ita vhungoho ha uri vha swikelela ṱhoḓea dza uri vha ṋewe yeneyo ndugelo khulwane. Yehova o lugisela hani Vhagudi vha Bivhili vha kale uri vha vhidzwe nga dzina ḽawe?

⁸ Musi ri tshi sedza murahu nga vho-1800 na mathomoni a vho-1900, ri ṱhogomela nḓila ye Yehova a ṋea ngayo vhathu vhawe pfeseso ya ngoho dza ndeme malugana na dzina ḽawe. Kha ri senguluse tharu dza dzenedzo ngoho.

9, 10. (a) Ndi ngani thero dza u thoma dza magazini une wa pfi Watch Tower dzo livhisa ṱhogomelo kha Yesu? (b) Ndi tshanduko ifhio yo iteaho nga 1919 u ya phanḓa nahone ho vha na mvelelo dzifhio? (Sedzani na bogisi “ Nḓila Ye Magazini Une Wa Pfi The Watchtower Wa Hulisa Dzina Ḽa Mudzimu Ngayo.”)

⁹ Ya u thoma, vhashumeli vha Yehova vho mbo ḓi vha na mavhonele o teaho malugana na ndeme ya dzina ḽa Mudzimu. Vhagudi vha Bivhili vha u thoma vha fulufhedzeaho vho dzhia ndugiselelo ya tshirengululi sa pfunzo khulwane ya Bivhili. Ndi ngazwo magazini une wa pfi Watch Tower wo livhisa ṱhogomelo kha Yesu. Sa tsumbo, nga ṅwaha we wa thoma u gandiswa ngawo, wonoyo magazini wo bula dzina Yesu lwa fumi u fhira dzina Yehova. Malugana na Vhagudi vha Bivhili vha miṅwahani ya u thoma, magazini une wa pfi The Watchtower wa ḽa 15 March, 1976, wo ombedzela uri Yesu vho mu “hulisa lwo kalulaho.” Naho zwo ralo, nga u ya ha tshifhinga Yehova a vha thusa u pfesesa khuliso ine Bivhili ya ṋea dzina ḽa Mudzimu. Zwenezwo zwo kwama hani Vhagudi vha Bivhili? Zwihuluhulu u bva nga vho-1919 u ya phanḓa, yeneyo thero ya magazini une wa pfi Watchtower yo amba uri “vho mbo ḓi thoma u sumbedza u dzhiela nṱha Khotsi a Messia wa ṱaḓulu, Yehova.” Zwi re zwone ndi uri mahumini a miṅwaha nga murahu ha 1919, magazini une wa pfi The Watch Tower wo bula dzina ḽa Mudzimu lu fhiraho 6 500!

¹⁰ Vhahashu vho ṱhonifha dzina ḽa Mudzimu u sumbedza uri vha a ḽi funa. U tou fana na Mushe wa tshifhingani tsho fhiraho, vho “bula dzina ḽa Yehova.” (Doit. 32:3; Ps. 34:3) Nga zwenezwo, samusi zwo fulufhedziswa Maṅwaloni, Yehova o ṱhogomela nḓila ine vha funa ngayo dzina ḽawe nahone a vha tonda.—Ps. 119:132; Vhaheb. 6:10.

11, 12. Khandiso dzashu dzo shanduka nga nḓiḽa-ḓe nga murahunyana ha 1919? (b) Yehova o vha a tshi khou ita uri vhashumeli vhawe vha livhise ṱhogomelo kha mini, nahone ndi ngani?

¹¹ Ya vhuvhili, Vhakriste vha ngoho vho pfesesa nga nḓila yo teaho mushumo we vha ṋewa nga Mudzimu. Nga murahunyana ha 1919, vhahashu vho ḓodzwaho vhane vha ranga phanḓa vho sudzuluselwa u ṱolisisa vhuporofita ha Yesaya. Nga murahu ha zwenezwo, zwi re kha khandiso dzashu zwa shandukiswa. Ndi ngani dzenedzo tshanduko dzo vha “zwiḽiwa zwavho nga tshifhinga tsho teaho”?—Mat. 24:45.

¹² Nga phanḓa ha 1919, magazini une wa pfi The Watch Tower wo vha u sa athu vhuya wa haseledza nga vhuḓalo zwo bulwaho kha Yesaya: “Inwi ni dziṱhanzi dzanga; ni vhalanda vhanga vhe nda vha nanga.” (Vhalani Yesaya 43:10-12.) Fhedzi nga murahunyana ha 1919, khandiso dzashu dza thoma u livhisa ṱhogomelo kha  yeneyo ndimana ya Bivhili, dza ṱuṱuwedza vhaḓodzwa vhoṱhe uri vha dzhenele mushumo we vha avhelwa wone nga Yehova—wa u ṱanziela nga hae. Zwi re zwone ndi uri u bva nga 1925 u swika nga 1931 fhedzi, Yesaya ndima ya 43 yo haseledzwa kha magazini dzashu dza 57 dza The Watch Tower, nahone khandiso iṅwe na iṅwe ya livhisa maipfi a Yesaya kha Vhakriste vha ngoho. Zwi tou vha khagala uri kha yeneyo miṅwaha, Yehova o vha a tshi khou ita uri vhashumeli vhawe vha livhise ṱhogomelo kha mushumo we vha vha vha tshi fanela u u ita. Ndi ngani? U itela uri vha thome nga u “lingwa u itela u vhona arali vha tshi fanelea.” (1 Tim. 3:10) Musi vha sa athu u vhidzwa nga dzina ḽa Mudzimu, Vhagudi vha Bivhili vho vha vha tshi fanela u thoma vha khwaṱhisedza Yehova nga mishumo yavho uri zwa vhukuma vha ṱhanzi dzawe.—Luka 24:47, 48.

13. Ipfi ḽa Mudzimu ḽi dzumbulula hani khani ya ndeme vhukuma ine ya fanela u dzudzanywa?

¹³ Ya vhuraru, vhathu vha Yehova vho pfesesa ndeme ya u khethwa ha dzina ḽa Mudzimu. Nga vho-1920, vho pfesesa uri u khethwa ha dzina ḽa Mudzimu ndi yone khani ya ndeme vhukuma ine ya fanela u dzudzanywa. Ipfi ḽa Mudzimu ḽi dzumbulula hani yeneyo ngoho ya ndeme? Ṱhogomelani tsumbo mbili. Ndi tshifhio tshiitisi tshihulwane tsho itaho uri Mudzimu a vhofholole Vhaisiraele ngei Egipita? Yehova o amba a ri: “Uri dzina ḽanga ḽi khoḓiwe mashangoni oṱhe.” (Ek. 9:16) Ndi ngani Yehova o khathutshela Vhaisiraele musi vha tshi mu shandukela? Yehova o dovha a ri: ‘Ndi itela dzina ḽanga, uri ndi si ḽi nyadzise kha vha-nnḓa.’ (Hesek. 20:8-10) Vhagudi vha Bivhili vho guda mini kha zwenezwi na kha maṅwe mafhungo a Bivhilini?

14. (a) Mafheleloni a vho-1920, vhathu vha Mudzimu vho pfesesa mini? (b) Vhagudi vha Bivhili vho ita mini musi vha tshi vho pfesesa zwithu nga ho dzikaho? (Sedzani na bogisi “ Tshiitisi Tshihulwane Tsha U Huwelela.”)

¹⁴ Mafheloni a vho-1920, vhathu vha Mudzimu vho pfesesa ndeme ya zwe Yesaya a zwi amba miṅwahani ya 2 700 hu tshee nga phanḓa. Malugana na Yehova o ri: “Ndi zwone zwe a ḓi-itela dzina ḽi kanukisaho ngazwo.” (Yes. 63:14) Vhagudi vha Bivhili vho pfesesa uri khani ya ndeme yo vha i si u tshidzwa havho, fhedzi ndi u ita uri dzina ḽa Mudzimu ḽi khethwe. (Yes. 37:20; Hesek. 38:23) Nga 1929, bugu ine ya pfi Prophecy yo ṱalusa yeneyo ngoho, ya amba uri: “Dzina Yehova ndi ḽone ḽa ndeme kha tsiko yoṱhe.” Yeneyo pfeseso ntswa yo ṱuṱuwedza vhashumeli vha Mudzimu uri vha ṱanziele nga ha Yehova na u kupula samba kha dzina ḽawe.

15. (a) Ndi mini zwe vhahashu vha zwi pfesesa nga vho-1930? (b) Ho vha ho swika tshifhinga tsha mini?

¹⁵ Mathomoni a vho-1930, vhahashu vho vha na mavhonele avhuḓi nga ha nḓila ine dzina ḽa Mudzimu ḽa vha ḽa ndeme ngayo, vho pfesesa zwavhuḓi mushumo we a vha avhela uri vha u ite, nahone vho pfesesa nga ho dzikaho mafhungo ane a tea u dzudzanywa. Zwino ho vha ho swika tshifhinga tsha uri Yehova a hulise vhashumeli vhawe nga u ita uri vha vhidzwe nga dzina ḽawe. U itela u vhona nḓila ye zwa itea ngayo, kha ri ṱhogomele zwiitea zwa tshifhingani tsho fhiraho.

16. (a) Yehova u hulisa dzina ḽawe nga nḓila ifhio i swayeaho? (b) Tshifhingani tsho fhiraho, ndi vhafhio vha u thoma u vhidzwa nga dzina ḽa Mudzimu?

¹⁶ Nḓila i swayeaho ine Yehova a hulisa ngayo dzina ḽawe ndi nga u vha na vhathu vhane vha vhidzwa nga dzina ḽawe kha ḽifhasi.  U bva nga 1513 B.C.E., lushaka lwa Vhaisiraele lwo imela Yehova nga u vha vhathu vhawe. (Yes. 43:12) Naho zwo ralo, vho kundelwa u tshila u tendelana na mulanga we vha u vhofha na Mudzimu, nahone nga 33 C.E., vho xelelwa nga vhushaka ho khetheaho nae. Nga murahunyana ha zwenezwo, Yehova a ‘ṱhogomela vha dzitshaka, a ḓinangela vhathu vhane vha ḓo vhidzwa nga dzina ḽawe.’ (Mish. 15:14) Vhenevho vhathu vhaswa vho nangiwaho vho mbo ḓi vhidzwa “Isiraele wa Mudzimu,” ane a vhumbwa nga vhatevheli vha Kristo vho ḓodzwaho vhane vha bva kha tshaka dzo fhamba-fhambanaho.—Vhagal. 6:16.

17. Ndi vhukwila vhufhio he Sathane a bvelela u vhu ita?

¹⁷ Hu ṱoḓaho u vha nga 44 C.E., vhafunziwa vha Kristo vho “thoma u vhidzwa Vhakriste nga fhasi ha vhulivhisi ha Mudzimu.”  (Mish. 11:26) U thomani ḽeneḽo dzina ḽo vha ḽo khethea, ngauri ḽo vha ḽi tshi ambela kha Vhakriste vha ngoho fhedzi. (1 Pet. 4:16) Naho zwo ralo, samusi zwo sumbedzwa kha tshifanyiso tsha Yesu tsha goroi na tsheṋe, Sathane o bvelela kha vhukwila hawe ha u ita uri dzina ḽo khetheaho Vhukriste ḽi shumiswe nga mifuda yoṱhe ya Vhakriste vha mafanedza. Nga zwenezwo, maḓanani manzhi a miṅwaha, zwo vha zwi sa leluwi u ṱalula Vhakriste vha ngoho kha Vhakriste vha mafanedza. Fhedzi zwenezwo zwo thoma u shanduka nga “tshifhinga tsha khaṋo,” ye ya thoma nga 1914. Ndi ngani? Ngauri vharuṅwa vho thoma u khethekanya Vhakriste vha mafanedza kha Vhakriste vha vhukuma.—Mat. 13:30, 39-41.

18. Ndi mini zwo thusaho vhahashu uri vha kone u ṱhogomela ṱhoḓea ya dzina ḽiswa?

¹⁸ Nga murahu ha u vhewa ha mulanda a fulufhedzeaho nga 1919, Yehova o thusa vhathu vhawe u pfesesa mushumo we a vha avhela wone uri vha u ite. Vho ṱavhanya vha zwi ṱhogomela uri u huwelela nnḓu nga nnḓu zwo vha zwi tshi ita uri vha fhambane na Vhakriste vhoṱhe vha mafanedza. Musi vho no ṱhogomela yeneyo mbuno, a zwo ngo dzhia tshifhinga tshilapfu uri vha kone u pfesesa uri dzina “Vhagudi vha Bivhili” a ḽi vha ṱaluli nga vhuḓalo. Ndivho yavho khulwane vhutshiloni yo vha i si u sokou guda Bivhili, yo vha i u ṱanziela nga ha dzina ḽa Mudzimu na u ḽi hulisa. Nga zwenezwo, ndi dzina ḽifhio ḽe ḽa vha ḽi tshi tea mushumo we vha vha vha tshi khou ita? Yeneyo mbudziso yo fhindulwa nga 1931.

19, 20. (a) Ndi ḽifhio fhungo ḽikumedzwa ḽi takadzaho ḽe ḽa itwa buthanoni nga 1931? (b) Vhahashu vho kwamea hani nga u swa dzina ḽiswa?

¹⁹ Nga July 1931, Vhagudi vha Bivhili vha linganaho 15 000 vho swika buthanoni ngei Columbus, Ohio, U.S.A. Musi vha tshi vhona mbekanyamushumo ya buthano, vho tswea maṱo nga maḽeḓere mavhili mahulwane, J na W e a vha o gandiswa kha gwati ḽa mbekanyamushumo ya buthano. Vho ḓivhudzisa uri eneo maḽeḓere a imela mini. Vhaṅwe vho humbulela uri a imela, ‘Just Watch’; vhaṅwe vha ri, ‘Just Wait’. Nga Swondaha nga ḽa 26 July, Wahashu Joseph Rutherford o ṋekedza fhungo ḽikumedzwa ḽi re na mbuno khulwane vhukuma: “Ri ṱoḓa u ḓivhiwa na u vhidzwa nga dzina Jehovah’s Witnesses [Ṱhanzi dza Yehova].” Nga tshenetsho tshifhinga, vhoṱhe vhe vha vha vhe hone vho mbo ḓi pfesesa zwine eneo maḽeḓere a amba zwone—o vha a tshi imela Jehovah’s Witnesses [Ṱhanzi dza Yehova], dzina ḽo thewaho maṅwaloni kha Yesaya 43:10.

²⁰ Vhathetshelesi vho aravha ḽeneḽo fhungo ḽikumedzwa nga u ṱavha mukosi muhulu na u vhanda zwanḓa tshifhinga tshilapfu. Maṅwe mashango o vha o thetshelesa kha radio tshenetsho tshiitea tshi takadzaho tshe tsha vha tshi tshi khou itea Columbus! Ernest na Naomi Barber vha ngei Australia vha kha ḓi zwi elelwa: “Musi vhathu vha tshi khou vha vhanda zwanḓa ngei America, vhahashu vha Melbourne vho vha vha tshi khou fhufha-fhufha nahone vha bvela phanḓa na u vhanda zwanḓa. Ri nga si vhuye ra zwi hangwa!” a

21. U swa dzina zwo engedza hani mushumo wa u huwelela?

²¹ U swa dzina ḽo thewaho Maṅwaloni, ḽine ḽa vha Ṱhanzi dza Yehova, zwo engedza nungo kha vhashumeli vha Mudzimu uri vha ṱanganele kha mushumo wa u huwelela. Edward na Jessie Grimes vhavhingani vha vhavulanḓila vha ngei United States vhe vha ya buthanoni ḽa 1931 ngei Columbus vho ri: “Ro bva hayani ri Vhagudi vha Bivhili, fhedzi ra vhuya ri Ṱhanzi dza Yehova. Ro vha ro takala ngauri ro vha ro no vha na dzina ḽine ḽa ri thusa u hulisa dzina ḽa Mudzimu washu.” Nga murahu ha ḽeneḽo buthano, dziṅwe Ṱhanzi dzo shumisa maitele maswa a u hulisa dzina ḽa Mudzimu. Vho ḓiḓivhadza kha vhoṋemuḓi nga u vha ṋea garaṱa i re na mulaedza une wa ri: “Ndi muṅwe wa ṱhanzi dza YEHOVA ane a khou huwelela nga ha Muvhuso wa YEHOVA Mudzimu washu.” Ee, vhathu vha Mudzimu vho vha tshi ḓirwa khana nga u vhidzwa nga dzina Yehova, nahone vho vha vho no lugela u ḓivhadza zwine ḽa amba zwone shangoni ḽoṱhe.—Yes. 12:4.

22. Ndi mini zwi sumbedzaho uri vhathu vha Yehova vho fhambana na vhuṅwe vhurereli?

²² Ho no fhela miṅwaha minzhi u bva tshee Yehova a sudzulusela vhahashu vho ḓodzwaho uri vha ṱanganedze dzina ḽavho ḽi vha ṱalulaho. U bva nga 1931, naa Sathane o kona u ita uri vhathu vha Mudzimu vha si kone u ṱalulwa? Naa o bvelela kha u ita uri zwi konḓele vhathu uri fhambanya na vhuṅwe vhurereli? Hai, na luthihi! Zwine ra vha zwone sa ṱhanzi dza Mudzimu zwi ri ṱalula nga ho fhelelaho u fhira naho hu lini. (Vhalani Mixa 4:5; Maleaxi 3:18.) Zwi re zwone ndi uri ri ḓivhiwa nga maanḓa nga dzina ḽa Mudzimu lune muṅwe na muṅwe ane a ḽi shumisa ṋamusi hu mbo ḓi ambiwa uri ndi muṅwe wa Ṱhanzi dza Yehova. Nṱhani ha u tsirwa nga vhurereli vhunzhi ha mazwifhi, vhurabeli ha Yehova ha ngoho ho ‘dzudzwa ṱaḓulu ha dzithavha.’ (Yes. 2:2) I ngoho, ṋamusi vhurabeli ha Yehova na dzina ḽawe ḽikhethwa, zwo huliswa vhukuma.

23. U ya nga Psalme ya 121:5, ndi ngoho ifhio ya ndeme nga ha Yehova ine ya ri ṋea maanḓa vhukuma?

²³ Zwi khwaṱhisa hani u ḓivha uri Yehova u ḓo ri tsireledza kha mvutshelo dza Sathane zwino na tshifhingani tshi ḓaho! (Ps. 121:5) Ri na tshiitisi tshi pfalaho tsha u ḓipfa sa mupsalme we a ṅwala a ri: “Vha mashudu ndi avho vhathu vhane Yehova a vha Mudzimu wavho.”—Ps. 33:12.