1, 2. Ha ano nga paagi iginpahitaas han New World Translation an ngaran han Dios?

HA USA nga mahayahay kondi masirak nga Martes nga aga han Disyembre 2, 1947, gintikangan han gutiay nga grupo han dinihogan nga kabugtoan ha Bethel ha Brooklyn, New York, an usa nga daku nga toka. Damu an trabahoon, kondi ha sulod hin 12 ka tuig nagpadayon hira ha pagbuhat hito. Han Domingo, Marso 13, 1960, natapos nira an ultimo nga bahin han bag-o nga hubad han Biblia. Paglabay hin tulo ka bulan, han Hunyo 18, 1960, iginrelis ni Bugto Nathan Knorr an ultimo nga volume han kompleto nga New World Translation of the Holy Scriptures ha malipayon nga mga kombensyonista ha Manchester, Inglatera. Iginpahayag han mamumulong an gin-abat han mga tinambong, ha pagsiring: ‘Adlaw yana han pagrayhak han mga Saksi ni Jehova ha bug-os nga kalibotan!’ An usa nga makatirigamnan nga aspekto hito nga hubad amo an espesyal nga rason han aton kalipay—an agsob nga paggamit han personal nga ngaran han Dios.

² Ha damu nga hubad han Biblia waray na gamita an ngaran han Dios. Kondi nangalimbasog gud an dinihogan nga mga surugoon ni Jehova kontra ha mga paagi ni Satanas ha pagpara han ngaran han Dios ha hinumdoman han tawo. Ha introduksyon han New World Translation nga iginrelis hito nga adlaw mababasa: “An pinakaimportante nga bahin hini nga hubad amo an pagpahiuli han ngaran han Dios ha husto nga hinmumutangan hito.” Oo, gin-gamit han New World Translation an personal nga ngaran han Dios nga Jehova hin sobra 7,000 ka beses. Iginpahitaas gud hini nga hubad an ngaran han aton langitnon nga Amay—hi Jehova!

3. (a) Ano an hinsabtan han aton kabugtoan mahitungod han kahulogan han ngaran han Dios? (b) Paonan-o naton sadang sabton an Eksodo 3:13, 14? (Kitaa an kahon nga “ An Kahulogan han Ngaran han Dios.”)

³ Ha naglabay, ginsabot han mga Estudyante han Biblia an ngaran han Dios sugad nga nangangahulogan hin “Ako Amo Ako.” (Eks. 3:14) Salit, an The Watch Tower han Enero 1, 1926, nagsiring: “An ngaran nga Jehova nagtutudlok ha Usa nga waray naglarang, . . . an Usa nga waray tinikangan ngan waray kataposan.” Kondi han tikangan na an paghubad han New World Translation, ginbuligan ni Jehova an iya katawohan nga masabtan nga an iya ngaran diri la basta nagpapasabot nga waray naglarang ha iya,  kondi labaw ha ngatanan, nga hiya Dios han katuyoan ngan buruhaton. Ira hinbaroan nga an ngaran nga Jehova literal nga nangangahulogan hin “Hiya Nagpapahinabo nga Magin.” Oo, iya iginpahinabo nga umiksister an uniberso ngan an intelihente nga mga linarang, ngan padayon niya nga iginpapahinabo nga matuman an iya kaburut-on ngan katuyoan. Kondi kay ano nga importante gud nga pahitas-on an ngaran han Dios, ngan paonan-o kita makikigbahin ha pagpahitaas hini?

4, 5. (a) Ano an aton ginhahangyo kon kita nag-aampo: “Pagbaraanon an imo ngaran”? (b) Ha ano nga paagi pagbabaraanon han Dios an iya ngaran ngan san-o niya pagbubuhaton ito?

⁴ Karuyag ni Jehova nga pahitas-on an iya ngaran. Ngani, an iya siyahan nga katuyoan amo an pagbaraan han iya ngaran, sugad han makikita ha siyahan nga hangyo ni Jesus ha modelo nga pag-ampo: “Pagbaraanon an imo ngaran.” (Mat. 6:9) Kon naghahangyo kita hito, ano an aton igin-aampo?

⁵ Gin-unabi ha Kapitulo 1 hini nga libro nga an hangyo nga “Pagbaraanon an imo ngaran” usa han tulo nga hangyo ha modelo nga pag-ampo may kalabotan ha katuyoan ni Jehova. An duha pa nga hangyo amo an: “Kumanhi unta an imo Ginhadian. Matuman an imo kaburut-on.” (Mat. 6:10) Salit, kon ginhahangyo naton hi Jehova nga gumios basi umabot an iya Ginhadian dinhi ha tuna ngan matuman an iya kaburut-on, ginhahangyo naton hiya nga gumios basi baraanon an iya ngaran. Ha iba nga pagkayakan, ginhahangyo naton nga gumios hiya basi limpyohan an iya ngaran ha tanan nga pakaraot tikang pa han pagrebelde ha Eden. Paonan-o babatunon ni Jehova an sugad nga pag-ampo? Hiya nagsiring: “Akon pagbabaraanon an akon daku nga ngaran, nga ginpasiparahan dida ha mga nasud.” (Esek. 36:23; 38:23) Ha Armagedon, kon wad-on na ni Jehova an karaotan, babaraanon niya an iya ngaran ha atubangan han tanan nga linarang.

6. Paonan-o kita makikigbahin ha pagbaraan han ngaran han Dios?

⁶ Ha bug-os nga kasaysayan, gintugotan ni Jehova an iya mga surugoon nga makigbahin ha pagbaraan han iya ngaran. Syempre, waray kita mahihimo nga magpapahinabo nga magin mas sagrado an ngaran han Dios tungod kay sagrado na ito, o baraan, ha bug-os nga kahulogan hito. Salit, paonan-o naton ito mababaraan? Hi Isaias nagsiring: “Hi Jehova han mga kasundalohan, ha iya kamo magbaraan.” Ngan may kalabotan ha iya katawohan, hi Jehova nagsiring: “Hira magbabaraan han akon ngaran . . . ngan matindog ha kahadlok han Dios ha Israel.” (Isa. 8:13; 29:23) Salit, ginbabaraan naton an ngaran han Dios pinaagi ha pagtagad hito nga waray katupong ngan labaw ha ngatanan nga ngaran, ha pagtahod kon ano an ginrirepresentaran hito, ngan ha pagbulig ha iba ha pagtagad hito nga baraan. Naipapakita liwat naton an pagdayaw ngan pagtahod ha ngaran han Dios kon ginkikilala naton hi Jehova nga aton Magmarando ngan ginsusunod hiya ha aton bug-os nga kasingkasing.—Prob. 3:1; Pah. 4:11.

7, 8. (a) Kay ano nga waray dayon tuguti han Dios an iya katawohan ha pagdara han iya ngaran? (b) Ano an aton paghihisgotan?

⁷ Ginagamit na han mga surugoon han Dios ha moderno nga panahon an baraan nga ngaran ha ira mga publikasyon tikang pa ha dekada han 1870. Pananglitan, an ngaran nga Jehova gin-gamit ha gowa han Agosto 1879 nga Zion’s Watch Tower ngan ha Songs of the Bride nga songbook nga iginpublikar hito nga tuig. Kondi, baga hin antes tugotan ni Jehova an iya katawohan nga magdara han iya sagrado nga ngaran ha kadaygan, ginsiguro anay niya nga maabot nira an ginkikinahanglan para hiton daku nga pribilehiyo. Paonan-o igin-andam ni Jehova an siyahan nga mga Estudyante han Biblia ha pagdara han iya ngaran?

⁸ Ha mga katuigan han pag-ikatarapos han 1800 ngan han pagtikang han 1900, ginbuligan ni Jehova an iya katawohan nga mas masabtan an importante nga mga kamatuoran may kalabotan han iya ngaran. Aton paghisgotan an tulo hito.

9, 10. (a) Kay ano nga an siyahan nga mga gowa han Watch Tower agsob nakapokus kan Jesus? (b) Ano nga pagbag-o an nahitabo han 1919 padayon, ngan ano an resulta? (Kitaa liwat an kahon nga “ Kon Paonan-o Ginpahitaas han The Watchtower an Ngaran han Dios.”)

⁹ Siyahan, an mga surugoon ni Jehova nagkaada husto nga pagsabot ha pagkaimportante han ngaran han Dios. Nagtoo an matinumanon nga mga Estudyante han Biblia nga an kahikayan han lukat an nangunguna nga katutdoan han Biblia. Ito an rason kon kay ano nga an Watch Tower agsob nakapokus kan Jesus. Pananglitan, ha siyahan nga tuig han pagpublikar hito, mas gin-unabi hito an ngaran ni Jesus hin napulo ka beses kay han ngaran ni Jehova. May kalabotan han siyahan nga katuigan han mga Estudyante han Biblia, an The Watchtower han Marso 15, 1976, nagsiring nga naghatag hira hin “sobra nga importansya” kan Jesus. Kondi paglabay han panahon, ginbuligan hira ni Jehova nga masabtan nga an Biblia naghahatag hin mas daku nga importansya ha personal nga ngaran han Dios. Paonan-o ito nakaapekto ha ira? Partikular na han tuig 1919 padayon, an amo gihap nga artikulo ha Watchtower nagsiring nga “nagtikang hira magpakita hin mas daku nga pagpasidungog ha langitnon nga Amay han Mesias, hi Jehova.” Ngani, tikang han 1920 tubtob han 1929, gin-unabi han The Watch Tower an ngaran han Dios hin sobra 6,500 ka beses!

¹⁰ Pinaagi han husto nga pagkilala ha ngaran nga Jehova, iginpakita han aton kabugtoan an ira gugma ha ngaran han Dios. Pariho kan Moises, andam hira ‘magpahibaro han ngaran ni Jehova.’ (Deut. 32:3; Sal. 34:3) Tungod hito, waray hingalimti ni Jehova an ira gugma para ha iya ngaran ngan ginpakitaan hira hin pag-uyon, sugad han iginsaad ha Kasuratan.—Sal. 119:132; Heb. 6:10.

11, 12. (a) Ano nga mga pagbag-o ha aton publikasyon an nahitabo katapos han 1919? (b) Ano nga buruhaton an ginpabug-atan ni Jehova ha iya mga surugoon, ngan kay ano?

¹¹ Ikaduha, an tinuod nga mga Kristiano nagkaada husto nga pagsabot ha buruhaton nga igintoka han Dios. Katapos la han 1919, gin-usisa han mga nangunguna nga dinihogan an tagna ni Isaias. Katapos, nagkaada hin pagbag-o ha ginpapabug-atan han aton mga publikasyon. Kay ano nga masisiring nga an sugad nga pagbag-o “pagkaon ha husto nga panahon”?—Mat. 24:45.

¹² Antes han 1919, waray pa hisguti han The Watch Tower ha sugad kadetalyado an mga pulong ni Isaias: “Kamo an akon mga  saksi, nasiring hi Jehova, ngan akon surugoon nga akon ginpili.” (Basaha an Isaias 43:10-12.) Pero katapos han 1919, an aton mga publikasyon nagtikang paghisgot gud hito, nga nagdadasig ha mga dinihogan nga makigbahin ha buruhaton nga iginsugo ni Jehova ha ira—an pagsangyaw mahitungod ha iya. Ngani, tikang han 1925 tubtob han 1931, ginhisgotan an kapitulo 43 han Isaias ha 57 nga magkalain-lain nga gowa han The Watch Tower, ngan ha tagsa hito nga gowa igin-aplikar an mga pulong ni Isaias ha tinuod nga mga Kristiano. Klaro nga hito nga mga tuig, ginpabug-atan ni Jehova ha iya mga surugoon an buruhaton nga kinahanglan nira himoon. Kay ano? Basi hira ‘masarihan anay kon angay hira hini nga pribilehiyo.’ (1 Tim. 3:10) Antes hira magdara han ngaran han Dios, kinahanglan anay nira pamatud-an kan Jehova pinaagi han ira buhat nga tinuod hira nga iya mga saksi.—Luc. 24:47, 48.

13. Paonan-o iginhayag han Pulong han Dios an pinakaimportante nga isyu nga angay sulbaron?

¹³ Ikatulo, nasabtan han katawohan ni Jehova an pagkaimportante han pagbaraan han ngaran han Dios. Ha katuigan han 1920, hinsabtan nira nga an pagbaraan han ngaran han Dios an pinakaimportante nga isyu nga angay sulbaron. Paonan-o iginhayag han Pulong han Dios iton importante nga kamatuoran? Tagda inin duha nga ehemplo. Ano an nangunguna nga rason kon kay ano nga gintalwas han Dios an Israel tikang ha Ehipto? Hi Jehova nagsiring: “Basi an akon ngaran mahisangyaw ha bug-os nga tuna.” (Eks. 9:16) Ngan kay ano nga nalooy hi Jehova ha Israel bisan kon nagrebelde hira ha iya? Makausa pa, hi Jehova nagsiring: “Ako nagbuhat tungod han akon ngaran, nga ini diri pagpasiparahan ha mga mata han mga nasud.” (Esek. 20:8-10) Ano an hinbaroan han mga Estudyante han Biblia tikang hito ngan ha iba pa nga mga asoy han Biblia?

14. (a) Ha pag-ikatarapos han dekada han 1920, ano an nasabtan han katawohan han Dios? (b) Ha ano nga paagi nakaapekto an hilarom nga pagsabot han mga Estudyante han Biblia ha ira pagsangyaw? (Kitaa liwat an kahon nga “ Daku nga Hinungdan ha Pagsangyaw.”)

¹⁴ Ha pag-ikatarapos han dekada han 1920, nasabtan han katawohan han Dios an kahulogan han ginsiring ni Isaias mga 2,700 ka tuig na an naglabay. May kalabotan kan Jehova, hi Isaias nagsiring: “Amo man ginmandoan mo an imo katawohan, ha paghimo para ha imo hin mahimayaon nga ngaran.” (Isa. 63:14) Nasabtan han mga Estudyante han Biblia nga an nangunguna nga isyu amo an pagbaraan han ngaran han Dios, diri an ira katalwasan. (Isa. 37:20; Esek. 38:23) Han 1929, ginsumaryo han libro nga Prophecy ito nga kamatuoran, ha pagsiring: “An ngaran ni Jehova an pinakaimportante nga isyu ha ngatanan nga linarang.” Tungod hinin bag-o nga pagsabot, mas naaghat an mga surugoon han Dios ha pagsangyaw mahitungod kan Jehova ngan ha paglimpyo han iya ngaran tikang ha mga pakaraot.

15. (a) Ano an hinsabtan han aton kabugtoan ha dekada han 1930? (b) Inabot na an panahon para ha ano?

¹⁵ Temprano han dekada han 1930, an aton kabugtoan nagkaada hin husto nga pagsabot ha pagkaimportante han ngaran han Dios, hin mas matin-aw nga pagsabot ha buruhaton nga igintoka han Dios ha ira, ngan hin mas hilarom nga pagsabot ha pinakaimportante nga isyu. Para kan Jehova, panahon na nga tawagon  an iya mga surugoon ha iya ngaran, ngan usa gud ito nira nga kadungganan. Basi hibaroan kon paonan-o ito nahitabo, aton tagdon an pipira nga panhitabo ha naglabay.

16. (a) Ha ano nga makatirigamnan nga paagi ginpahitaas ni Jehova an iya ngaran? (b) Ha naglabay, hin-o an katawohan nga siyahan nga nagrepresentar han ngaran han Dios?

¹⁶ An pagkaada katawohan nga magdadara han iya ngaran usa nga makatirigamnan nga paagi nga ginpahitaas ni Jehova an iya ngaran. Tikang han 1513 B.C.E. padayon, ginrepresentaran han nasud han Israel hi Jehova sugad nga iya katawohan. (Isa. 43:12) Kondi napakyas hira pagtuman han ira kauyonan ha Dios, ngan han 33 C.E., nawara nira an ira espesyal nga relasyon ha iya. Waray pag-iha, “ginkarawat na han Dios an mga nasud, basi tikang ha  ira makapili an Dios hin katawohan nga magdadara han iya ngaran.” (Buh. 15:14) Iton bag-o nga pinili nakilala sugad nga “an Israel han Dios,” nga ginkukompwesto han dinihogan nga mga sumurunod han Kristo tikang ha iba-iba nga nasud.—Gal. 6:16.

17. Naglampos hi Satanas ha pagbuhat han ano?

¹⁷ Han mga 44 C.E., an mga disipulo han Kristo ‘gintawag nga mga Kristiano pinaagi han giya han Dios.’ (Buh. 11:26) Ha tinikangan, naiiba ito nga ngaran kay nagtutudlok ito ha tinuod la nga mga Kristiano. (1 Ped. 4:16) Kondi sugad han iginpakita han ilustrasyon ni Jesus han trigo ngan banwa, naglampos hi Satanas nga gamiton iton naiiba nga ngaran ha pagtawag ha tanan nga diri tinuod nga mga Kristiano. Tungod hito, ha damu ka siglo, waray makilal-i kon hin-o an tinuod nga mga Kristiano. Pero nagbag-o ito durante han “pag-ani,” nga nagtikang han 1914. Kay ano? Kay nagtikang pagbulagon han mga anghel an diri tinuod nga mga Kristiano tikang ha tinuod.—Mat. 13:30, 39-41.

18. Paonan-o hinsabtan han aton kabugtoan nga kinahanglan nira hin bag-o nga ngaran?

¹⁸ Katapos mapili an matinumanon nga uripon han 1919, ginbuligan ni Jehova an iya katawohan nga masabtan an buruhaton nga iya iginsugo ha ira. Nasabtan dayon nira nga an pagsangyaw ha balay-balay nagpapakita nga bulag hira tikang ha diri tinuod nga mga Kristiano. Han nasantop nira ito, naintindihan dayon nira nga diri igo na nga tawagon hira nga “Mga Estudyante han Biblia.” An ira nangunguna nga katuyoan diri basta la pag-aram han Biblia kondi pagsangyaw mahitungod han Dios ngan pagpasidungog ngan pagpahitaas han iya ngaran. Salit, ano an ngaran nga angayan nga magrirepresentar han buruhaton nga ira ginhihimo? Ito nga pakiana nabaton han 1931.

19, 20. (a) Ano nga makalilipay nga resolusyon an iginpahibaro ha kombensyon han 1931? (b) Ano an nagin reaksyon han aton kabugtoan ha bag-o nga ngaran?

¹⁹ Han Hulyo 1931, mga 15,000 nga Estudyante han Biblia an inabot ha Columbus, Ohio, E.U.A., basi tumambong hin kombensyon. Han makita an program han kombensyon, nahipausa hira ha mga letra nga J ngan W nga nakaimprinta ha kobre hito, ngan nagpakiana kon ano an kahulogan hito. An iba naghunahuna nga nangangahulogan ito hin ‘Just Watch’; an iba, ‘Just Wait.’ Ngan han Domingo, Hulyo 26, iginpresenta ni Bugto Joseph Rutherford an resolusyon nga may mapwersa nga mensahe: “Karuyag naton makilala ngan tawagon ha ngaran nga mga saksi ni Jehova (Jehovah’s Witnesses ha Ingles).” Hito nga takna, hinsabtan han ngatanan nga presente an kahulogan hiton duha nga letra—nangangahulogan ito hin Jehovah’s Witnesses, ngaran nga iginbasar ha Isaias 43:10.

²⁰ An mga mamarati makusog nga nagsinggit ngan maiha nga nagpakpak. Pinaagi han radyo, an malipayon nga reaksyon ha Columbus hinbatian bisan ha iba nga bahin han kalibotan! Hira Ernest ngan Naomi Barber han Australia, nagsiring: “Han magtikakusog an pagpakpak ha Amerika, an kabugtoan ha Melbourne nanindog ngan padayon nga nagpakpak. Diri gud namon ito mahingangalimtan!” *

21. Paonan-o an bag-o nga ngaran nakaaghat ha pagsangyaw nga buruhaton han kabugtoan?

²¹ An ngaran nga mga Saksi ni Jehova nga iginbasar ha Biblia mas nag-aghat ha mga surugoon han Dios nga magsangyaw. Pananglitan, hira Edward ngan Jessie Grimes, mag-asawa nga payunir ha Estados Unidos nga tinambong ha kombensyon ha Columbus han 1931, nagsiring: “Binaya kami ha balay sugad nga mga Estudyante han Biblia, kondi inuli kami sugad nga mga Saksi ni Jehova. Nalipay kami nga may-ada na kami ngaran nga nabulig ha amon ha paghimaya han ngaran han aton Dios.” Katapos han kombensyon, an pipira nga Saksi gumamit hin bag-o nga paagi ha pagbuhat hito. Iginpakilala nira an ira kalugaringon pinaagi ha pagduhol ha tagbalay hin kard nga may nakasurat: “Usa han mga saksi ni JEHOVA nga nagsasangyaw han Ginhadian ni JEHOVA nga aton Dios.” Oo, iginpapasigarbo han katawohan ni Jehova an pagdara han iya ngaran, ngan andam hira ha pagpasamwak han bili hito tubtob ha kahigrayoan.—Isa. 12:4.

22. Ano an nagpapamatuod nga naiiba an katawohan ni Jehova?

²² Damu ka tuig na an naglabay tikang han ginpagios ni Jehova an dinihogan nga kabugtoan nga karawaton an naiiba nga ngaran. Tikang han 1931, naglampos ba hi Satanas ha iya pangalimbasog nga diri makilala an katawohan han Dios? Naglampos ba hiya nga ipariho kita ha iba nga relihiyon? Waray gud! Lugod, nagin mas klaro an aton pangirilal-an sugad nga mga saksi han Dios. (Basaha an Mika 4:5; Malakias 3:18.) Ngani, kilala kita nga nagdadara han ngaran han Dios salit an bisan hin-o nga nagamit hito yana, ginkikilala dayon sugad nga usa han mga Saksi ni Jehova. Imbes matabonan han damu nga sugad-bukid nga buwa nga mga relihiyon, an tinuod nga pagsingba kan Jehova marig-on nga ‘natindog ha igbaw han kabukiran.’ (Isa. 2:2) Yana, an pagsingba kan Jehova ngan an iya baraan nga ngaran ginpapahitaas gud.

23. Ano an importante nga kamatuoran mahitungod kan Jehova an naghahatag ha aton hin karig-on sumala ha Salmo 121:5?

²³ Makaparig-on gud an paghibaro nga papanalipdan kita ni Jehova kontra ha mga pag-atake ni Satanas yana ngan ha tidaraon! (Sal. 121:5) Pariho han salmista, kita makakasiring: ‘Bulahan an nasud nga hi Jehova amo an Dios, an katawohan nga ginpili nga iya kalugaringon nga panurundon.’—Sal. 33:12.