KAPITE 4
ʼE Fakakololiaʼi e Sehova Tona Huafa
1, 2. ʼE fakakololiaʼi feafeaʼi ʼi te Traduction du monde nouveau ia te huafa ʼo te ʼAtua?
ʼI TE Feliatolu ʼaho 2 ʼo Tesepeli 1947, ko he ʼu tehina fakanofo ʼi te Petele ʼi Amelika, neʼe natou kamata ia he toe gaue lahi. Neʼe faigataʼa te gaue ʼaia, ʼo natou gaue kinakina lolotoga taʼu ʼe 12. Hili te temi loaloaga ʼaia, ʼi te ʼAhotapu ʼaho 13 ʼo Malesio 1960, neʼe hoki katoa ai leva tanatou fakaliliu ia te Tohi-Tapu foʼou. Hili ki ai mahina ʼe tolu, ʼi te ʼaho 18 ʼo Sunio 1960, neʼe fakaha e te tehina ko Nathan Knorr te Tohi-Tapu katoa Fakapilitania, ko te Les Saintes Écritures. Traduction du monde nouveau. Pea neʼe fiafia ʼaupito ai te nofoʼaki ʼae neʼe kau ki te fakatahi ʼi Manchester ʼi Pilitania. Neʼe ha ʼi te ʼu palalau ʼae neʼe fai e te tehina ia te meʼa ʼae neʼe logoʼi e te nofoʼaki. Neʼe ina ui fenei: ‘Koia, ko te ʼaho ʼaeni ʼe ko he ʼaho fakafiafia ki te kau Fakamoʼoni ʼa Sehova ʼi te malamanei katoa!ʼ Neʼe tupu tafitō ia te fiafia ʼaia koteʼuhi neʼe toe tuʼu ʼi te fakaliliu foʼou ʼaia ia te huafa ʼo te ʼAtua.
Ko te Tohi-Tapu Fakapilitania Les Écritures grecques chrétiennes — Traduction du monde nouveau neʼe fakaha ʼi te taʼu 1950, ʼi te Fakatahi Te Tuputupu Fakateokalatike (Faʼahi hema: Yankee Stadium, New York; Faʼahi mataʼu: Ghana)
2 ʼE lahi te ʼu fakaliliu ʼo te Tohi-Tapu ʼe natou molehi ia te huafa ʼo te ʼAtua. Kaʼe neʼe fakafeagai ia te ʼu kaugana fakanofo ʼa Sehova ki te faiga ʼae ʼa Satana ke galoʼi e te hahaʼi ia te huafa ʼo te ʼAtua. Neʼe fakamahino ʼi te ʼu ʼuluaki palalau ʼo te Traduction du monde nouveau ʼae neʼe fakaha ʼi te ʼaho ʼaia, neʼe faigaʼi e te ʼu tehina ke natou toe tohi te huafa ʼo te ʼAtua, ia Sehova, ʼi te ʼu vaega fuli ʼae neʼe tuʼu ai tona huafa. Koia, ʼi te Traduction du monde nouveau ʼe tohi ai tuʼa 7 000 tupu ia te huafa ʼo te ʼAtua, ʼae ko Sehova. ʼE mahino ia, ʼe fakakololiaʼi ʼi te Tohi-Tapu ʼaia ia te huafa ʼo tatatou Tamai ʼae ʼe ʼi selo, ia Sehova!
3. (1) ʼO ʼuhiga mo te fakaʼuhiga ʼo te huafa ʼo te ʼAtua, kotea ʼae neʼe mahino ki ai ʼotatou tehina? (2) ʼE tonu ke feafeaʼi tatatou mahino ki te ʼu vaega ʼo Ekesote 3:13, 14? (Vakaʼi te fakamatala ʼae ʼi te ʼa takai “ Te Fakaʼuhiga ʼo Te Huafa ʼo Te ʼAtua.”)
3 ʼI te kamata mai, neʼe mahino ia te Kau Ako ʼo Te Tohi-Tapu ko te huafa ʼo te ʼAtua ko tona fakaʼuhiga “Ko Au.” (Eke. 3:14) Koia neʼe tohi fenei ʼi Te Tule Leʼo ʼo te ʼaho 1 ʼo Sanualio 1926: “Ko te huafa Sehova ʼe fakaʼuhiga kia Ia ʼae ʼe maʼuli tuputupua, . . . neʼe mole hona kamataʼaga pea mo hona gataʼaga.” Kaʼe ʼi te temi ʼae neʼe kamata fakaliliu ai te Traduction du monde nouveau, neʼe kua tokoni ia Sehova ke mahino tana hahaʼi ko tona huafa ʼe mole fakaʼuhiga pe ki tona maʼuli tuputupua. Kaʼe ʼe fakaʼuhiga tafitō ki he ʼAtua ʼe ʼi ai tana fakatuʼutuʼu pea mo tana gaue. Neʼe natou mahino ai ko te huafa ʼo Sehova ko tona fakaʼuhiga “ ʼE Ina Fakahoko.” ʼE moʼoni te faʼahi ʼaia, koteʼuhi neʼe ina fakatupu ia te ʼatulaulau pea mo te ʼu meʼa maʼuli popoto, pea ʼe kei hoko atu pe tana fakahoko ia tana fakatuʼutuʼu. Kaʼe he ko ʼe ʼe maʼuhiga ʼaupito ke fakakololiaʼi ia te huafa ʼo te ʼAtua, pea ʼe tou lava kau feafeaʼi ki tona fakakololiaʼi?
Te Fakatapuha ʼo Te Huafa ʼo Te ʼAtua
4, 5. (1) Kotea te fakaʼuhiga ʼo tatatou kole ʼae “ke tapuha tou huafa”? (2) ʼE fakatapuha feafeaʼi anai e te ʼAtua tona huafa pea ʼi te temi fea?
4 ʼE loto e Sehova ke fakakololiaʼi tona huafa. ʼI tona fakahagatonu, ʼe ko tana fakatuʼutuʼu tafitō ʼaia, ohage ko tona ha lelei ʼi te kamata ʼo te faikole faʼifaʼitaki ʼa Sesu, ʼae ʼe ui fenei ai: “Ke tapuha tou huafa.” (Mat. 6:9, MN) Kotea te fakaʼuhiga ʼo tatatou kole ʼaia?
5 Ohage ko tatatou vakaʼi ʼi te Kapite 1 ʼo te tohi ʼaeni, ʼi te faikole faʼifaʼitaki ʼa Sesu ko te ʼu faʼahi ʼaeni ʼe tolu ʼae ʼe tou kole: “Ke tapuha tou huafa. Ke hoko mai tou puleʼaga. Ke fai tou finegalo.” (Mat. 6:9, 10, MN) Pea ʼe ʼi ai tonatou pikipikiga mo te fakatuʼutuʼu ʼa Sehova. Koia, ohage pe ko tatatou kole ʼae ke haga ia Sehova ʼo fakahoko mai tona Puleʼaga pea ke fai mo tona finegalo, ʼo toe feia pe ʼe tou kole ke haga ia Sehova ʼo fakatapuha tona huafa. Ko tona fakaʼuhiga ʼae, ʼe tou kole ke fakamaʼa e Sehova tona huafa mai te ʼu laukovi fuli ʼae neʼe fai ki ai talu mai te agatuʼu ʼi Eteni. ʼE tali feafeaʼi anai ia Sehova ki te ʼu kole ʼaia? ʼE ina ui fenei: “E au fakamaonionii anai toku huafa lahi ae nee ulihi i te lotolotoga o te atu puleaga.” (Esk. 36:23; 38:23) ʼI Halamaketone, ʼi te temi ʼae ka fakaʼauha ai e Sehova ia te kau agakovi, ʼe ina fakatapuha anai tona huafa ia mata ʼo te fakatupu fuape.
6. ʼE tou lava fakatapuha feafeaʼi ia te huafa ʼo te ʼAtua?
6 Neʼe fakagafua tuʼumaʼu pe e Sehova ki ʼana kaugana ke natou kau ki te fakatapuha ʼo tona huafa. ʼE mahino ia, ʼe mole feala ke tou fakaʼaʼasili age ia te ʼuhiga maʼoniʼoni ʼo te huafa ʼo te ʼAtua, he ʼe kua katoa ia tona maʼoniʼoni. Koia, ʼe lava feafeaʼi hatatou fakatapuha tona huafa? ʼE ui fenei e Esaia: “Ko [Sehova] o te atu fua tau ae e tonu ke koutou iloi * ko te Maonioni.” Pea neʼe ui fenei e Sehova ʼo ʼuhiga mo tana hahaʼi: “E natou tapuaki anai ki toku huafa . . . pea e natou matataku anai ki te Atua o Iselaele.” (Esa. 8:13; 29:23) Koia, ʼe tou fakatapuha ia te huafa ʼo te ʼAtua moka tou iloʼi peʼe tou fakamoʼoni ʼe kehe pea mo maʼoluga age ia ʼi te tahi atu ʼu higoa, moka tou fakaʼapaʼapa ki tona fakaʼuhiga, pea moka tou tokoni ki te hahaʼi ke natou iloʼi ʼe maʼoniʼoni ia te huafa ʼaia. ʼE tou fakaha tafitō tatatou manavasiʼi mo fakaʼapaʼapa ki te huafa ʼo te ʼAtua, moka tou tali ia Sehova ko totatou Pule pea mo fakalogo kia te ia ʼaki totatou loto katoa.—Taag. 3:1; Apk. 4:11.
Neʼe Teuteuʼi Natou Ke Natou Fua Pea Mo Fakakololiaʼi Te Huafa ʼo Te ʼAtua
7, 8. (1) He ko ʼe neʼe ʼaoga he temi ke feala ai he fua e te hahaʼi ʼa te ʼAtua tona huafa? (2) Kotea ʼae ka tou vakaʼi anai?
7 ʼE fakaʼaogaʼi e te ʼu kaugana ʼa te ʼAtua tona huafa ʼi ʼanatou tohi talu mai te ʼu taʼu 1870. Ohage la, ʼi Te Tule Leʼo ʼo te mahina ʼo ʼAukusito 1879 pea mo te tohi katiko neʼe ta ʼi te taʼu pe ʼaia, neʼe tuʼu ai te huafa ʼo Sehova. Kaʼe ʼe mahino ia, ʼi muʼa ʼo te fakagafua ʼae e Sehova ke fua e tana hahaʼi ia tona huafa maʼoniʼoni, neʼe tokaga ia ke natou fakahoko he ʼu faʼahi ke feala ai hanatou maʼu te toe pilivilesio lahi ʼaia. Neʼe teuteuʼi feafeaʼi e Sehova te kau ʼuluaki Kau Ako ʼo Te Tohi-Tapu ke feala hanatou fua tona huafa?
8 Ka tou toe vakaʼi te ʼu meʼa ʼae neʼe hoko ʼi te fakaʼosi ʼo te ʼu taʼu 1800 pea mo te kamata ʼo te ʼu taʼu 1900, ʼe tou tokagaʼi ai pe neʼe fakamahino feafeaʼi e Sehova ki tana hahaʼi te ʼu moʼoni maʼuhiga ʼo ʼuhiga mo tona huafa. Tou vakaʼi ia moʼoni maʼuhiga ʼe tolu.
9, 10. (1) He ko ʼe neʼe talanoa tafitō ʼi te ʼu ʼuluaki alatike ʼo Te Tule Leʼo kia Sesu? (2) Ko te fetogi fea ʼae neʼe hoko talu mai te taʼu 1919, pea kotea ʼona fua? (Vakaʼi mo te fakamatala ʼae ʼi te ʼa takai “ ʼE Fakakololiaʼi ʼi Te Tule Leʼo Ia Te Huafa ʼo Te ʼAtua.”)
9 ʼUluaki, ko te ʼu kaugana ʼa Sehova neʼe natou mahino lelei ki te maʼuhiga ʼo te huafa ʼo te ʼAtua. Maʼa te kau ʼuluaki Kau Ako ʼo Te Tohi-Tapu agatonu, ko te akonaki ʼo ʼuhiga mo te sakilifisio faitotogi ʼo Sesu neʼe ko te akonaki maʼuhiga ʼaia ʼo te Tohi-Tapu. Neʼe ko te tupuʼaga la ʼaia ʼo te talanoa tafitō ʼi Te Tule Leʼo kia Sesu. Ohage la, ʼi te ʼuluaki taʼu ʼae neʼe ta ai te nusipepa ʼaia, neʼe ha tuʼa hogofulu age ia te huafa ʼo Sesu ʼi ʼae ʼo Sehova. Pea ʼi Te Tule Leʼo ʼo te ʼaho 1 ʼo Sulio 1976 (Fakafalani), neʼe ui ai ʼo ʼuhiga mo te kau ʼuluaki Kau Ako ʼo Te Tohi-Tapu, neʼe natou “fakamaʼuhigaʼi fau” ia Sesu. Kaʼe ʼaki te temi, neʼe tokoni ia Sehova ke natou mahino ʼe fakamaʼuhigaʼi ʼi te Tohi-Tapu ia te huafa ʼo te ʼAtua. Neʼe tali feafeaʼi e te Kau Ako ʼo Te Tohi-Tapu ia te faʼahi ʼaia? Neʼe ui ʼi te alatike pe ʼaia ʼo Te Tule Leʼo, talu mai te taʼu 1919 “neʼe natou kamata fakaʼapaʼapa lahi age ki te Tamai ʼa te Mesia, ia Sehova.” ʼI tona fakahagatonu, ʼi te ʼu taʼu ʼe hogofulu ʼae neʼe hoa atu ki te taʼu 1919, neʼe ha tuʼa 6 500 tupu ia te huafa ʼo te ʼAtua ʼi Te Tule Leʼo.
10 Neʼe fakaha e ʼotatou tehina tonatou ʼofa ki te huafa ʼo te ʼAtua ʼaki tanatou fakamaʼuhigaʼi ia te huafa ʼo Sehova. Ohage ko Moisese ʼi te temi muʼa, neʼe natou kamata “fakaha . . . te huafa o [Sehova].” (Tet. 32:3; Pes. 34:4) Pea ohage ko tona fakapapau ʼi te Tohi-Tapu, neʼe tokagaʼi e Sehova tonatou ʼofa ʼaia ki tona huafa pea neʼe ina tapuakiʼi ai natou.—Pes. 119:132; Hep. 6:10.
11, 12. (1) Kotea ʼae neʼe fetogi ʼi ʼatatou tohi ʼi te hili pe ʼo te taʼu 1919? (2) Kotea ʼae neʼe fakatokaga e Sehova ki ʼana kaugana, pea kotea tona tupuʼaga?
11 Lua, ko te kau Kilisitiano moʼoni neʼe natou mahino lelei ki te gaue ʼae neʼe foaki age e te ʼAtua. ʼI te hili pe ʼo te taʼu 1919, ko te ʼu tehina takitaki fakanofo neʼe natou vakavakaʼi ia te lea fakapolofeta ʼo Esaia. Ki muli age leva, neʼe kamata fakamaʼuhiga ʼi ʼatatou tohi ia te gaue faifakamafola. He ko ʼe ko te fetogi ʼaia neʼe ko “te meakai i tona temi totonu”?—Mat. 24:45.
12 ʼI muʼa ʼo te taʼu 1919, neʼe mole he Tule Leʼo neʼe vakaʼi ai te ʼu palalau ʼaeni neʼe tohi e Esaia: “Ko koutou ko aku tagata Esaia 43:10-12.) Kaʼe ʼi te hili pe ʼo te taʼu 1919, neʼe kamata vakavakaʼi ʼi ʼatatou tohi te ʼu vaega Tohi-Tapu ʼaia, ʼo fakalotomalohiʼi ai te kau Kilisitiano fakanofo fuli ke natou kau ki te gaue ʼae neʼe foaki age e Sehova kia natou, ʼae ke natou fakamoʼoni kia te ia. ʼI tona fakahagatonu, mai te taʼu 1925 ki te taʼu 1931, neʼe vakaʼi ia te koga tohi ʼo Esaia kapite 43 ʼi te ʼu Tule Leʼo kehekehe ʼe 57, pea neʼe ui ai ko te ʼu vaega ʼaia ʼo Esaia ʼe fakahagahaga ki te kau Kilisitiano moʼoni. ʼE tou mahino ai, ʼi te ʼu taʼu ʼaia, neʼe fakatokaga e Sehova ki ʼana kaugana te gaue ʼae neʼe tonu ke natou fai. Kotea tona tupuʼaga? Ke feala ai ke “ahiahii mua natou” peʼe natou tuha mo tona huafa. (1 Tim. 3:10) ʼI muʼa ʼo tanatou lava fua ia te huafa ʼo te ʼAtua, neʼe tonu ki te Kau Ako ʼo Te Tohi-Tapu ke natou fakaha kia Sehova ʼaki ʼanatou gaue ko natou ko ʼana fakamoʼoni.—Luka 24:47, 48.
fakamooni, e ui e [Sehova], . . . mo taku tagata faifekau ae nee au filifili.” (Lau ia13. ʼE ha feafeaʼi ʼi te Folafola ʼa te ʼAtua ia te maʼuhiga ʼaupito ʼae ke fakatapuha ia te huafa ʼo te ʼAtua?
13 Tolu, ko te hahaʼi ʼa Sehova neʼe natou mahino ki te maʼuhiga ʼae ke fakatapuha ia te huafa ʼo te ʼAtua. Lolotoga te ʼu taʼu 1920, neʼe natou mahino ai neʼe maʼuhiga ʼaupito ia te fakatapuha ʼo te huafa ʼo te ʼAtua. ʼE ha feafeaʼi ʼi te Folafola ʼa te ʼAtua ia te moʼoni maʼuhiga ʼaia? Tou vakaʼi faʼahi ʼe lua. Neʼe kotea te tupuʼaga tafitō ʼo te haofaki e te ʼAtua ia Iselaele mai Esipito? Neʼe ui fenei e Sehova: “Ke fakamafola toku huafa i te kele katoa.” (Eke. 9:16) Pea he ko ʼe neʼe manavaʼofa ia Sehova ki Iselaele logo la tanatou agatuʼu kia te ia? Neʼe manavaʼofa ia Sehova ʼuhi ko ‘tona huafa, ʼo tupu ke ʼaua naʼa fakalialiaʼi ia ia muʼa ʼo te ʼatu puleʼaga.ʼ (Esk. 20:8-10) Kotea ʼae neʼe mahino ki ai te Kau Ako ʼo Te Tohi-Tapu ʼaki te ʼu vaega Tohi-Tapu ʼaia pea mo ʼihi atu?
14. (1) ʼI te fakaʼosi ʼo te ʼu taʼu 1920, kotea ʼae neʼe mahino ki ai te hahaʼi ʼa te ʼAtua? (2) ʼI te mahino ʼa te Kau Ako ʼo Te Tohi-Tapu ki te faʼahi ʼaia, neʼe kotea tona fua ki te gaue faifakamafola? (Vakaʼi mo te fakamatala ʼae ʼi te ʼa takai “ Ko He Tupuʼaga Malohi Ke Tou Faifakamafola Ai.”)
14 ʼI te fakaʼosi ʼo te ʼu taʼu 1920, neʼe mahino te hahaʼi ʼa te ʼAtua ki te fakaʼuhiga ʼo te ʼu palalau neʼe fai e Esaia kua hili ki ai taʼu ʼe 2 700. ʼO ʼuhiga mo Sehova, neʼe ui fenei e Esaia: “Nee fena tau taki tau hahai, o logologona ai tou huafa.” (Esa. 63:14) Neʼe mahino te Kau Ako ʼo Te Tohi-Tapu ko te faʼahi ʼae neʼe maʼuhiga neʼe ko te fakatapuha ʼo te huafa ʼo te ʼAtua, kaʼe mole ko tonatou haofaki. (Esa. 37:20; Esk. 38:23) ʼI te taʼu 1929, ʼi te tohi Te ʼu Lea Fakapolofeta (Fakapilitania) neʼe talanoa ai ki te moʼoni ʼaia. Neʼe tohi fenei ai: “ ʼE ko te huafa ʼo Sehova ʼae ʼe maʼuhiga ʼaupito kia mata ʼo te fakatupu fuape.” Ki muli age, ko te manatu foʼou ʼaia neʼe ina uga te ʼu kaugana ʼa te ʼAtua ke natou fakamoʼoni kia Sehova pea mo fakamaʼa tona huafa mai te ʼu laukovi ʼae neʼe fai ki ai.
15. (1) ʼI te ’u taʼu 1930, kotea ʼae neʼe mahino lelei ki ai ʼotatou tehina? (2) Kotea ʼae neʼe feala ai leva ke foaki e Sehova?
15 ʼI te kamata ʼo te ʼu taʼu 1930, neʼe mahino lelei ʼotatou tehina ki te maʼuhiga ʼo te huafa ʼo te ʼAtua, mo te gaue ʼae neʼe foaki age e te ʼAtua kia natou, pea mo te maʼuhiga ʼae ke fakatapuha ia te huafa ʼo te ʼAtua. Neʼe hoko mai leva te temi ʼae ke foaki ai e Sehova ki ʼana kaugana te pilivilesio ʼae ke natou fua tona huafa.
Tou vakaʼi he ʼu aluʼaga ʼe fakaha ai pe neʼe hoko feafeaʼi te faʼahi ʼaia.Neʼe Filifili e Sehova ‘He Hahaʼi Ke Natou Fua Tona Huafaʼ
16. (1) Neʼe fakakololiaʼi feafeaʼi e Sehova ia tona huafa ʼi hona aluʼaga fakaofoofo? (2) ʼI te temi muʼa, ko ai ʼae neʼe natou ʼuluaki fakafofoga te huafa ʼo te ʼAtua?
16 Neʼe fakakololiaʼi e Sehova ia tona huafa ʼi hona aluʼaga fakaofoofo, ʼi te fua ʼae e he hahaʼi ʼi te kele ia tona huafa. ʼI te taʼu 1513 I.M.T.S., ko te puleʼaga ʼo Iselaele neʼe ko te hahaʼi ʼa Sehova pea neʼe natou fakafofoga ia ia. (Esa. 43:12) Kaʼe neʼe mole natou agatonu ki te fuakava ʼae neʼe natou fai mo te ʼAtua, koia ʼi te taʼu 33 H.T.S., neʼe mole kei natou maʼu tanatou felogoʼi makehe ʼaia mo Sehova. Mole faʼa fualoa ki ai, neʼe “tuku e te Atua ona mata ki te u puleaga, o ina filifili maia natou he hahai ke ina fua tona huafa.” (Gaue 15:14) Ko te hahaʼi foʼou ʼaia ʼae neʼe ina filifili neʼe higoa ko “te Iselaele a te Atua,” pea neʼe kau ki ai te kau tisipulo fakanofo ʼa Kilisito mai te ʼu puleʼaga kehekehe.—Kal. 6:16.
17. Ko te fakatuʼutuʼu fea ʼa Satana ʼae neʼe ina lava fakahoko?
17 ʼI te teitei taʼu 44 H.T.S., ko te ʼu tisipulo ʼa Kilisito “nee uluaki fakahigoa . . . ko te kau kilisitiano” ʼaki te takitaki ʼa te ʼAtua. (Gaue 11:26) ʼI te kamata mai, neʼe iloʼi neʼe ko te kau Kilisitiano moʼoni pe ʼae ʼe fakaʼuhiga ki ai te higoa ʼaia. (1 Pet. 4:16) Kaʼe, ohage ko tona fakaha ʼi te lea fakata ʼa Sesu ʼo ʼuhiga mo te fulumeto pea mo te vao kovi, neʼe lava hoko ia te fakatuʼutuʼu ʼa Satana ke toe fakahigoa feia mo te kau Kilisitiano loi fuli. Koia, lolotoga ni lau ʼi taʼu, neʼe mole ha lelei te kau Kilisitiano moʼoni mai te kau Kilisitiano loi. Kaʼe neʼe fetogi leva te aluʼaga ʼaia ʼi te temi ʼae neʼe kamata tanaki ai te taʼukai, ʼi te taʼu 1914. Kotea ʼae neʼe hoko ʼi te taʼu ʼaia? Neʼe kamata tuku keheʼi e te kau ʼaselo ia te kau Kilisitiano loi mai te kau Kilisitiano moʼoni.—Mat. 13:30, 39-41.
18. Kotea ʼae neʼe tokoni ki ʼotatou tehina ke natou mahino ʼe ʼaoga ia he higoa foʼou?
18 ʼI te ʼosi fakanofo ʼo te tagata faifekau agatonu ʼi te taʼu 1919, neʼe tokoni ia Sehova ki tana hahaʼi ke natou mahino ki te gaue ʼae neʼe ina foaki age kia natou. Neʼe vave pe tanatou tokagaʼi ʼae ʼe fakakeheʼi natou mai te kau Kilisitiano loi ʼaki tanatou faifakamafola ʼi te ʼu ʼapi. ʼI tanatou kua iloʼi ia te faʼahi ʼaia, neʼe natou mahino ai ʼe mole fakakehekeheʼi lelei natou ʼaki te higoa ʼae ko te “Kau Ako ʼo Te Tohi-Tapu.” Ko te fakatuʼutuʼu tafitō ʼi tonatou maʼuli, ʼe mole ko te ako pe ʼo te Tohi-Tapu, kaʼe ko te fakamoʼoni ki te ʼAtua, mo fakaʼapaʼapa pea mo fakakololiaʼi tona huafa. Pea ko te higoa fea ʼae ʼe tuha anai mo te gaue ʼae neʼe natou fai? Neʼe tali ki ai ʼi te taʼu 1931.
Te polokalama ʼo te fakatahi, 1931
19, 20. (1) Kotea te logo fakafiafia ʼae neʼe tala ifo ʼi te fakatahi ʼi te taʼu 1931? (2) Neʼe tali feafeaʼi e ʼotatou tehina ia te fakaha ifo ʼo totatou higoa foʼou?
19 ʼI te mahina ʼo Sulio 1931, ko te teitei toko 15 000 ʼi te Kau Ako ʼo Te Tohi-Tapu neʼe natou olo ki te fakatahi ʼi te kolo ko Columbus, ʼi Amelika. Neʼe ta ʼi te polokalama ʼo te fakatahi ʼaia ia te ʼu mata ʼi tohi ʼaeni “J mo W.” Neʼe feʼuiʼaki e te nofoʼaki pe ʼe kotea ia te fakaʼuhiga ʼo te ʼu mata ʼi tohi ʼaia ʼe lua. Pea ʼi te ʼAhotapu, ʼaho 26 ʼo Sulio, neʼe fai e te tehina ko Joseph Rutherford te ʼu palalau ʼaeni ʼi tana akonaki: “ ʼE tou loto ke iloʼi tatou pea mo fakahigoaʼi tatou ko te kau fakamoʼoni ʼa Sehova.” ʼI te temi leva ʼaia, neʼe mahino te nofoʼaki neʼe fakaʼuhiga te ʼu mata ʼi tohi ʼaia ki te higoa kau “Fakamoʼoni ʼa Sehova” (Jehovahʼs Witnesses ʼi te lea Fakapilitania) ʼae ʼe tuʼu ʼi te Tohi-Tapu ia Esaia 43:10.
20 ʼI te tala ifo ʼo te logo ʼaia, neʼe kalaga fakafiafia ia te nofoʼaki pea mo natou pasipasi fualoa. Neʼe logo ki ai te ʼu fenua mamaʼo ʼi te latio. Neʼe manatuʼi fenei e Ernest mo Naomi Barber ʼi ʼOsitalalia: “ ʼI tanatou logo ki te pasipasi ʼae neʼe hoko ʼi Amelika, ko te ʼu tehina ʼi Melbourne neʼe natou tutuʼu ake pea mo natou haga pasipasi. ʼE mole ma galoʼi anai ʼi he temi te faʼahi ʼaia!” *
ʼE Fakakololiaʼi Te Huafa ʼo Te ʼAtua ʼi Te Malamanei Katoa
21. ʼI tanatou maʼu ia te higoa foʼou ʼaia, neʼe ina fakamalohiʼi feafeaʼi ia te ʼu kaugana ʼa te ʼAtua ke natou faifakamafola?
21 ʼI te maʼu e te ʼu kaugana ʼa te ʼAtua ia te higoa Fakatohi-tapu ʼae ko te kau Fakamoʼoni ʼa Sehova, neʼe malohi age ai tanatou faifakamafola. Ko Edward mo Jessie Grimes, te taumatuʼa pionie ʼi Amelika neʼe nā kau ki te fakatahi ʼae neʼe fai ʼi Columbus ʼi te taʼu 1931, neʼe nā ui fenei: “Neʼe ma olo ki te fakatahi ʼi toma ʼuhiga Kau Ako ʼo Te Tohi-Tapu, kaʼe ʼi tamā foki mai, neʼe kua ma liliu ko he ʼu Fakamoʼoni ʼa Sehova. Neʼe ma fiafia ʼi tamā maʼu leva ia he higoa ʼe tokoni mai ke fakakololiaʼi ia te huafa ʼo totatou ʼAtua.” ʼI te ʼosi ʼo te fakatahi ʼaia, neʼe mulimuli ʼihi kau Fakamoʼoni ki te faʼahiga fai foʼou moʼo fakakololiaʼi te huafa ʼo te ʼAtua. Neʼe natou kamata tanatou faipalalau ʼaki tanatou fakaha ia te kate ʼae neʼe tohi fenei ai: “Ko au ko he fakamoʼoni ʼa SEHOVA ʼe au fakamafola ia te Puleʼaga ʼo SEHOVA, totatou ʼAtua.” ʼE moʼoni, neʼe fiameʼameʼa ia te hahaʼi ʼa te ʼAtua ʼi tanatou fua ia te huafa ʼo Sehova, pea neʼe natou nonofo teuteu ke natou tala ia tona fakaʼuhiga ʼi te potu fuli.—Esa. 12:4.
“Neʼe ma olo ki te fakatahi ʼi toma ʼuhiga Kau Ako ʼo Te Tohi-Tapu, kaʼe ʼi tamā foki mai, neʼe kua ma liliu ko he ʼu Fakamoʼoni ʼa Sehova”
22. Kotea ʼae ʼe ina fakamoʼoni ʼe maʼu e te hahaʼi ʼa Sehova ia he higoa ʼe natou kehe ai mai te tahi ʼu lotu?
22 Kua fakalaka ni taʼu talu mai te uga ʼae e Sehova ʼotatou tehina fakanofo ke natou toʼo ia te higoa ʼaia. Talu mai te taʼu 1931, neʼe lava koa te faiga ʼa Satana ke mole fakakeheʼi ia te hahaʼi ʼa te ʼAtua mai te tahi ʼu lotu? Kailoa! Kaʼe neʼe ha lelei age ia ko tatou ko te kau fakamoʼoni ʼa te ʼAtua. (Lau ia Mikea 4:5; Malakia 3:18.) Ia ʼaho nei, ka fakaʼaogaʼi e he tahi ia te huafa ʼo te ʼAtua, ʼe foimo fakaʼuhiga atu aipe ʼe ko he Fakamoʼoni ʼa Sehova. Neʼe mole fio te tauhi moʼoni mo te ʼu lotu hala, kaʼe ʼe iloga lelei kua “fakatuu . . . i te tumutumu o te u mouga.” (Esa. 2:2) Ia ʼaho nei, ko te tauhi kia Sehova pea mo tona huafa taputapu kua fakakololiaʼi ʼaupito!
23. Ohage ko tona ui ia Pesalemo 121:5, ko te moʼoni maʼuhiga fea ʼae ʼe ina fakalotomalohiʼi tatou?
23 ʼE ko he meʼa fakalotomalohi tatatou iloʼi ʼe puipui tatou e Sehova mai te ʼu ʼohofi ʼa Satana, ia ʼaho nei pea mo te ka haʼu. (Pes. 121:5) Koia, ʼe tou manatu ai ohage ko te tagata faipesalemo, ʼae neʼe ina tohi fenei: “Manuia te puleaga ae e Atua [kia Sehova]! Manuia te hahai ae nee ina filifili ko tona [tofiʼa]!”—Pes. 33:12.
^ pal. 6 ʼI te vaega ʼaeni pea mo ʼihi atu, ko matou ʼae neʼe matou fakaʼiloga keheʼi.
^ pal. 20 Kapau ʼe ke fia maʼu he tahi ʼu manatu ʼo ʼuhiga mo te fakaʼaogaʼi ʼo te latio, vakaʼi ia te Kapite 7, ʼi te ʼu pasina 72-74.