1, 2. Ana Baibulo ja Cilambo Casambano jikusacimbicisya camtuli lina lya Mlungu?

 LYAŴILI kundaŵi, pa December 2, 1947, kakuga kamwana ka abale ŵasagulwe ŵa m’liŵasa lya Beteli lya ku Brooklyn, ku New York, katandite masengo gekulungwa mnope. Ŵasosekwaga kukamula masengoga mwakulimbicila soni mwakusamala mnope, mwamti ŵakamwile masengoga kwa yaka 12. Pambesi pakwe, Lyamlungu pa March 13, 1960, ŵamalisisye kukamula masengo gakugopolela Baibulo. Kaneko, pa June 18, 1960, M’bale Nathan Knorr, jwakopwesye Baibulo jamtundu pamsongano wekulungwa wawatendecele ku Manchester, m’cilambo ca England. Baibuloji ŵajikolasile kuti New World Translation of the Holy Scriptures. Pakulosya mwaŵasangalalile ŵandu pamsonganopo, m’baleju jwatite, ‘Lelo lili lisiku lyakusangasya kwa Ŵamboni sya Yehofa pacilambo cosope!’ Cindu capajika cacatendekasisye ŵandu kusangalala caliji kusimanikwa kwa lina lisyesyene lya Mlungu m’malo gejinji m’Baibuloji.

² M’ma Baibulo gejinji ŵatyosisyemo lina lisyesyene lya Mlungu. Celeci caliji cakulinga ca Satana cakuti lina lya Mlungu likamanyikwa kwa ŵandu. Nambo ŵakutumicila ŵasagulwe ŵa Yehofa ŵalimbene ni cakulingaci. Maloŵe gandanda m’Baibulo jiŵakopwesyeji gatite, “Cakulinga cekulungwa ca Baibuloji cili kuwucisya lina lisyesyene lya Mlungu pa malo gakwe gakuŵajilwa.” Yeleyi yili yakuwona ligongo lyakuti Baibulo ja New World Translation jeleji jikusakamulicisya masengo lina lisyesyene lya Mlungu lyakuti Yehofa maulendo gakupunda 7,000. Kuŵeceta yisyene, Baibuloji jicimbicisye lina lya Atati ŵetu ŵakwinani Yehofa.

3. (a) Ana Ŵakulijiganya Baibulo ŵapikanicisye yamtuli ya ngopolelo ja lina lya Mlungu? (b) Ana Lilemba lya Ekisodo 3:13, 14 likusagopolela cici? (Alole libokosi lyakuti “Ngopolelo ja Lina lya Mlungu.”)

³ Mu yaka yamunyuma, Ŵakulijiganya Baibuloŵa ŵapikanicisye kuti lina lya Mlungu likusagopolela kuti “Une ndili Une.” (Eks. 3:14, King James Version) M’yoyo, Sanja ja Mlonda ja January 1, 1926, jatite, “Lina lyakuti Yehofa likusalosya kuti pangali juŵampanganyisye, . . . Jwalakwe jwangali ndanda soni mbesi.” Nambope pandaŵi jiŵagopolelaga Baibulo ja New World Translation, Yehofa ŵakamucisye ŵandu ŵakwe kupikanicisya kuti lina lyakwe ngalikusagamba kugopolela kuti pangali juŵampanganyisye, nambo kuti ali Mlungu jwakwete cakulinga soni akusakwanilisya cakulinga cakweco. Kusala yisyene jwalakwejo ni juŵapanganyisye cilambo cosope kupwatikapo malayika soni ŵandu. Jwalakwe akupitilisya kwanilisya cakulinga cakwe. Sambano, ana ligongo cici yili yakusosekwa kuti  lina lya Mlungu licimbicikweje, soni ana mpaka tutende yamtuli kuti tulicimbicisyeje?

4, 5. (a) Ana patukupopela kuti “lina lyawo liswejesyedwe” tukusaŵa tuli mkuŵenda cici? (b) Ana Mlungu caciswejesya lina lyakwe cakaci soni mwamtuli?

⁴ Yehofa akusasaka kuti lina lyakwe licimbicikweje. Kusala yisyene, cakulinga cekulungwa ca Yehofa cili kuswejesyedwa kwa lina lyakwe. Yeleyi yikukamulana ni cindu candanda caŵacikolasile Yesu mu lipopelo lyacisyasyo kuti, “Lina lyawo liswejesyedwe.” (Mat. 6:9, NW) Ana tukusaŵa tuli mkuŵenda cici patukusala yeleyi mu lipopelo?

⁵ Mpela mutwalijiganyicisye mu Mtwe 1 wa buku ajino, kuŵenda kuti “lina lyawo liswejesyedwe” jili mbali jimo ja mbali sitatu sya kuŵenda syaŵasikolasile Yesu mu lipopelo lyakwe lyacisyasyo. Mbali sitatusi ni syasikwayana ni cakulinga ca Yehofa. Mbali siŵili sinesyo sili, “Ucimwene wawo uyice,” soni kuti “Lisosa lyawo litendekwe.” (Mat. 6:10) M’yoyo patukumŵenda Yehofa kuti atendepo kandu kuti Ucimwene wakwe uyice, soni kuti lisosa lyakwe litendekwe, tukusaŵasoni tuli mkuŵenda kuti Yehofajo atendepo kandu kuti lina lyakwe liswejesyedwe. Pelepa tukusaŵa tuli kumŵenda Yehofa kuti aliswejesye lina lyakwe ku yakunyalaya yayiŵele mkuŵecetedwa pa linali kutyocela pandaŵi jakwimucila kukwatendekwe mumgunda wa Edeni. Ana Yehofa cacitenda yamtuli pakwanga lipopeloli? Jwalakwe akuti, “Lina lyangu lyakupikanika limlicembulwisyeje kapena kuti limlinyosisyeje sikati ja ŵandu ŵa mitundu jine, tinjililosya kuti lili lyeswela.” (Esek. 36:23; 38:23) Yehofa caciswejesya lina lyakwe pameso pa yakupanganyidwa yosope pacacityosya yakusakala yosope pa Alamagedo.

6. Ana mpaka tutende yamtuli pakuswejesya lina lya Mlungu?

⁶ Mu mbili josope ja ŵandu, Yehofa aŵele ali mkwakunda ŵakutumicila ŵakwe kukamula nawo masengo gakuswejesya lina lyakwe. Kusala yisyene nganituŵa tukombwele kulitendekasya lina lya Mlungu kuŵa lyeswela mnope, ligongo lili lyeswela kalape. M’yoyo ana mpaka tuliswejesye camtuli? Yesaya jwalembile kuti, “Ambuje ŵamacili gosope, ni ŵele mkwenela kwalola kuti ali ŵaswela.” Pakwamba ya ŵandu ŵakwe, Yehofa msyenejo ŵatite, “Tacililumba lina lyangu lyeswela . . . nipo tacitenda najo woga Mlungu jwa Aisalaeli.” [Maloŵega tugombelecesye m’weji] (Yes. 8:13; 29:23) M’yoyo mpaka tuliswejesye lina lya Mlungu mwakuliwona kuŵa lyakulekangana soni lyapenani kupunda mena gosope. Mpaka tuliswejesyesoni mwakucimbicisya yiliyose yalikwimila linali soni mwakwakamucisya ŵane kuti aliwoneje kuŵa lyeswela. Tukusalosya woga soni kulicimbicisya lina lya Mlungu patukumwona Yehofa kuŵa jwakulamulila jwetu soni kumpikanila jwalakwe ni mtima wetu wosope.—Mis. 3:1; Ciw. 4:11.

7, 8. (a) Ligongo cici pajigele ndaŵi kuti ŵandu ŵa Mlungu atande kolanjidwa ni lina lyakwe? (b) Ana sambano citukambilane cici?

⁷ Kutandila m’ma 1870, ŵakutumicila ŵa Mlungu aŵele ali mkukamulicisya masengo lina lya Mlungu m’mabuku gawo.  Mwacisyasyo, magasini ja Zion’s Watch Tower ja August 1879 soni buku ja nyimbo jajakopwece m’caka cicoco yakolasile lina lyakuti Yehofa. Yikuwoneka kuti Yehofa mkaniŵakunde ŵandu ŵakwe kukolanjidwa ni lina lyakwe lyeswela, jwalakwe jwalolecesye kuti ŵanduwo ali ŵakuŵajilwa kupocela upile wekulungwawu. Ana Yehofa ŵakosecelesye camtuli Ŵakulijiganya Baibulo ŵandandaŵa kuti amanyikweje ni lina lyakwe?

⁸ Patukulola yayatendekwe kumbesi kwa yaka ya m’ma 1800 soni kundanda kwa yaka ya m’ma 1900, tukuyiwona kuti Yehofa ŵakamucisye ŵandu ŵakwe kupikanicisya usyesyene wakusosekwa wakwamba lina lyakwe. Kwende tukambilane yiwundo yitatu ya usyesyenewu.

9, 10. (a) Ana ligongo cici magasini gakundanda gasalaga mnope ya Yesu? (b) Ana ni kucenga kwamtuli kukwatendekwe mu 1919 kwawulaga msogolo, soni papali yakuyicisya yamtuli? (Alolesoni libokosi lyakuti “Ana Sanja ja Mlonda Jicimbicisye Mwamtuli Lina lya Mlungu?”)

⁹ Candanda, ŵakutumicila ŵa Yehofa ŵatandite kupikanicisya kusosekwa kwa lina lya Mlungu. Ŵakulijiganya Baibulo ŵakulupicikaŵa, ŵajiwonaga ngani jakwamba ciwombolo kuŵa cijiganyo cekulungwa ca m’Baibulo. Ni ligongo lyakwe magasini ga Sanja ja Mlonda galondesyaga ya Yesu kaŵilikaŵili. Mwacisyasyo, magasini gandanda kukopoka gakolasile lina lya Yesu kuwilisya maulendo 10 kupunda lina lya Yehofa. Pakusala ya kundanda kwa Ŵakulijiganya Baibulo, Sanja ja Mlonda ja March 15, 1976, jasasile kuti ŵakulijiganyaŵa ŵamwonaga Yesu kuŵa “jwakusosekwa mwakupundanganya mnope.” Nambo mkupita kwandaŵi, Yehofa ŵakamucisye kumanyilila ucimbicimbi wajikusapeleka Baibulo ku lina lisyesyene lya Mlungu. Ana Ŵakulijiganya Baibuloŵa ŵatesile uli paŵamanyilile yeleyi? Ngani ja m’magasiniji japitilisye kusala kuti kutyocela mu 1919 kwawula msogolo, Ŵakulijiganya Baibuloŵa “ŵatandite kumcimbicisya mnope Yehofa, jwali Atati ŵakwinani ŵa Mesiya.” Yeleyi yili yisyene, ligongo kutyocela mu 1920 kwika mu 1929, magasini ga Sanja ja Mlonda gakolasile lina lisyesyene lya Mlungu maulendo gakupunda 6, 500.

¹⁰ Ligongo lyakuŵika nganisyo syawo pa lina lya Yehofa, acalongo acimjetuŵa ŵalosisye kuti ŵaliwonaga lina lya Mlungu kuŵa lyakusosekwa. Mpela muŵatendelaga Mose, nombe nawo Ŵakulijiganya Baibulo ŵatandite ‘kwenesya lina lya Yehofa.’ (Det. 32:3, NW; Sal. 34:3) Mwakamulana ni Malemba, yakuyicisya yakwe yaliji yakuti, Yehofa ŵaciweni cinonyelo cawo pa lina lyakweli ni ŵajaliwe.—Sal. 119:132; Aheb. 6:10.

11, 12. (a) Ana panyuma pa caka ca 1919, m’mabuku mwetu mwapali kucenga kwamtuli? (b) Ana Yehofa ŵakamucisye ŵakutumicila ŵakwe kuŵika nganisyo syawo pa cici soni ligongo cici?

¹¹ Caŵili, Aklistu ŵasyesyeneŵa ŵapikanicisye cenene masengo gaŵapele Mlungu. Panyuma pa caka ca 1919, abale ŵasagulwe ŵaŵalongolelaga likuga ŵaganisisye yakuwungunya yakulocesya ya Yesaya. Kaneko cakulinga ca ngani sya m’mabuku getu catandite kucenga. Ana ligongo cici kucengaku kwaŵele mpela, “yakulya yawo mu ndaŵi jakwe”?—Mat. 24:45.

¹² Mkanicikwane caka ca 1919, magasini ga Sanja ja Mlonda galiji mkanigasale yiliyose yakwayana ni maloŵe ga jwakulocesya Yesaya gakuti, “‘Jemanja mli mboni syangu,’ akuti Yehofa, ‘ni ŵakutumicila ŵangu, ŵanamsagwile.’” (Aŵalanje Yesaya 43:10-12, NW.)  Nambo panyuma pa caka ca 1919, mabuku getu gatandite kusala yejinji yakwamba utenga wa m’Baibulowu. Mabuku getu galimbikasisye ŵasagulwe wosope kuti akamuleje masengo gaŵapele Yehofa, gagaliji kutendela umboni ya jwalakwe. Yeleyi yili yisyene ligongo kutyocela mu caka ca 1925 mpaka mu 1931, maloŵe ga m’caputala 43 ca buku ja Yesaya ŵagatagulile m’magasini gakwana 57 ga Sanja ja Mlonda. Konjecesya pelepa magasini jilijose jalosyaga mugakwayilaga Aklistu ŵasyesyene maloŵega. Yili yakuwonecela cenene kuti mu yaka yeleyi, Yehofa ŵaliji mkwakosecelesya ŵakutumicila ŵakwe ku masengo gaŵasosekwaga kukamula. Ligongo cici tukuŵeceta yeleyi? Lili ligongo lyakuti jemanjaji ŵasosekwaga “kulinjidwa.” (1 Tim. 3:10) Mkanamanyikwe ni lina lya Mlungu, Ŵakulijiganya Baibulo ŵasosekwaga kulosya kwa Yehofa kupitila muyitendo yawo kuti ŵaliji mboni syakwe sisyesyene.—Luk. 24:47, 48.

13. Ana Maloŵe ga Mlungu gakusalosya camtuli ngani jakusosekwa mnope jakuswejesyedwa kwa lina lyakwe?

¹³ Catatu, ŵandu ŵa Yehofa ŵapikanicisye kusosekwa kwa kuswejesya lina lya Mlungu. Mu 1920, ŵakulijiganyaŵa ŵamanyilile kuti kuswejesya lina lya Mlungu jaliji ngani jakusosekwa mnope. Ana Baibulo jikusalosya camtuli usyesyene wakusosekwawu? Aganicisye yisyasyo yiŵili ayi. Ana Mlungu ŵakulupwisye Aisalaeli ku ukapolo wa ku Iguputo paligongo lyekulungwa lyapi? Yehofa ŵatite, “Kuti lina lyangu limanyice pacilambo cosope capasi.” (Eks. 9:16) Nambosoni, ana ligongo cici Yehofa ŵalosisye canasa Aisalaeli paŵamjimucile? Apasoni Yehofa ŵatite, “Nganinayitenda yeleyo, ligongo yikatendekasisye kuti lina lyangu likacimbicika.” (Esek. 20:8-10) Ana Ŵakulijiganya Baibulo ŵalijiganyisye cici payakutendekwayi soni payakutendekwa yine ya m’Baibulo?

14. (a) Ana ŵandu ŵa Mlungu ŵapikanicisye cici cakumbesi kwa caka ca 1920? (b) Ana kupikanicisya cenene yiwundo ya usyesyene kwakamucisye camtuli Ŵakulijiganya Baibulo pamasengo gakulalicila? (Alolesoni libokosi lyakuti “Ligongo Lyekulungwa Lyakulalicilila.”)

¹⁴ Cakumbesi kwa caka ca 1920, ŵandu ŵa Mlunguŵa ŵapikanicisye kusosekwa kwa maloŵe gaŵalembile Yesaya yaka yakupunda 2,700 munyumamo. Pakwamba ya Yehofa jwalakwe jwatite, “M’yoyo m’mwe Ambuje mwalongolele ŵandu ŵenu kuti lina lyenu licimbicikwe.” [Maloŵega tugombelecesye m’weji] (Yes. 63:14) Ŵakulijiganya Baibuloŵa ŵapikanicisye kuti cindu cakusosekwa mnope cili kuswejesyedwa kwa lina lya Mlungu ngaŵa kulupuka kwa mundu. (Yes. 37:20; Esek. 38:23) Mu 1929, buku ja mtwe wakuti Prophecy (Yakulocesya) jalondesisye ciwundo ca usyesyenewu mwakusala kuti, “Lina lya Yehofa jili ngani jakusosekwa mnope pameso pa yakupanganyidwa yosope.” Kapikanicisye keleka kakamucisye Ŵakulijiganya Baibulo kutendela umboni ya Yehofa soni kuswejesya lina lyakwe ku yindu yaunami.

15. (a) Ana ca m’ma 1930, Ŵakulijiganya Baibulo ŵapikanicisye cici? (b) Ana nambi jakwanile ndaŵi jakuti apocele cici?

¹⁵ Cakundanda kwa caka ca 1930, abale ŵetuŵa ŵaliji ali apikanicisye kusosekwa kwa lina lya Mlungu, masengo gaŵapele Mlungu kuti atende, soni ŵaliji ali apikanicisye cenene ngani jakusosekwa mnope jakuswejesyedwa kwa lina lya Mlungu. M’yoyo, ndaŵi jakwanile jakuti Yehofa ŵape ŵakutumicila ŵakwe ucimbicimbi wakukolanjidwa pelanguka ni lina lyakwe. Kuti tumanyilile muyatendecele yeleyi, kwende tulole yakutendekwa yine ya mundaŵi jamunyuma.

16. (a) Ana Yehofa akusakamulicisya masengo litala lyakumanyika cenene lyapi pakucimbicisya lina lyakwe? (b) Ana ŵandu ŵandanda kwimila lina lya Mlungu ŵaliji ŵani?

¹⁶ Litala lyakumanyika cenene lyakusalikamulicisya masengo Yehofa pakucimbicisya lina lyakwe lili kukola ŵandu ŵakumanyikwa ni lina lyakwe pacilambo capasi. Kutandila m’caka ca 1513 B.C.E. kwawula msogolo, mtundu wa Aisalaeli wajimilaga Yehofa mpela ŵandu ŵakwe. (Yes. 43:12) Nambope jemanjaji ŵalepele kutenda yindu mwakamulana ni cilanga caŵatesile ni Mlungu, mwamti mu 33 C.E., ŵajasile unasi wapajika ni jwalakwe. Pandaŵiji Yehofa, ‘Ŵakumbucile ŵandu ŵa mitundu jine, pakwasapula ŵane pasikati pawo kuti aŵe ŵandu ŵakweŵakwepe kapena kuti ŵakumanyikwa ni lina lyakwe.’ (Mase. 15:14) Mtundu wasambano ŵa ŵandu welewu wamanyice kuti “Isalaeli jwa Mlungu.” Mtunduwu  upanganyidwe ni ŵasagulwe ŵali ŵakumkuya Klistu ŵakutyocela m’mitundu jakulekanganalekangana.—Aga. 6:16, NW.

17. Ana Satana apakombwele kutenda cici?

¹⁷ Ca m’ma 44 C.E., ŵakulijiganya ŵa Klistu “ŵatandite kuŵilanjidwa kuti Aklistu.” (Mase. 11:26) Pandaŵijo linali lyaliji lyapajika ligongo Aklistu ŵasyesyenepe ni ŵaŵamanyikwaga nalyo. (1 Pet. 4:16) Nambope mwakamulana ni citagu ca Yesu ca tiligu ni namsongole, Satana mwaukalamusi jupakombwele kwatendekasya Aklistu ŵaunami kamulicisya masengo lina lyapajikali. Yakuyicisya yakwe yiŵele yakuti, kwa yaka yejinji yiŵele yakusawusya kulekanganya pasikati pa Aklistu ŵasyesyene ni ŵaunami. Nambo yeleyi yatandite kucenga ‘mundaŵi jagungula,’ jajatandite mu 1914. Ligongo cici? Ligongo lyakuti malayika gatandite kwalekanganya Aklistu ŵasyesyene ni Aklistu ŵaunami.—Mat. 13:30, 39-41.

18. Ana cici cacakamucisye abale ŵetu kumanyilila kuti akusosekwa lina lyasambano?

¹⁸ Panyuma pakusagula Kapolo Jwakulupicika mu 1919, Yehofa ŵakamucisye ŵandu ŵakwe kumanyilila masengo gaŵapele kuti atendeje. Ŵamanyilile kuti kulalicila ku nyumba ni nyumba ni kwakwalekanganyaga ni Aklistu ŵaunami. Ali agambile kumanyilila yeleyi, ŵakopocelesoni kuti kumanyikwa kwawo ni lina lyakuti “Ŵakulijiganya Baibulo” nganikuŵa kwakwanila. Cakulinga cawo cekulungwa nganiciŵa kwamba kulijiganyape Baibulo, nambosoni kutendela umboni ya Mlungu, kucimbicisya soni kwesya lina lyakwe. M’yoyo, ana ni lina lyapi lyalyaliji lyakuŵajilana ni masengoga? Ciwusyoci cajanjidwe mu 1931.

19, 20. (a) Ana cimanyisyo cakusangalasya capi cacapelecedwe pamsongano mu 1931? (b) Ana abale ŵetu ŵatesile yamtuli paŵapocele lina lyasambano?

¹⁹ Mu July, 1931, Ŵakulijiganya Baibulo ŵakwana 15,000 ŵayice kumsongano mumsinda wa Columbus, ku Ohio, m’cilambo ca United States. Ali akaweni kapepala ka pologalamu ja msonganowo, Ŵakulijiganya Baibuloŵa ŵasimonjile ni yilembo yiŵili yekulungwa yayalembedwe pa kapepalako yayaliji J soni W. Ni ŵaliwusyaga kuti, ‘Ana yilembo yeleyi yikwimila cici?’ Ŵandu ŵaganicisyaga mwakulekanganalekangana yayajimilaga yilemboyi. Kaneko Lyamlungu pa July 26, 1931, M’bale Joseph Rutherford ŵapelece cimanyisyo mwamacili kuti, “Tuli ŵakusacilila kumanyikwa soni kolanjidwa ni lina lyakuti, Mboni sya Yehofa.” Pandaŵiji, wosope ŵene ŵapikanicisye kugopolela kwa yilemboyo. Yilemboyi yajimilaga lina lya Cisungu lyakuti Jehovah’s Witnesses lyalili lina lya m’Malemba lyakutyocela pa Yesaya 43:10.

²⁰ Ŵandu ŵaŵaliji pamsongonowo, ali apikene cimanyisyoci, ŵakwatile m’miyala mwakusangalala kwandaŵi jelewu. Yaŵatesile ŵandu pakusangalalaku yapikanice m’yilambo yejinji kupitila pa wailesi. M’bale ni Mlongo Barber jwa ku Australia, pakumbucila yayatendekwe pamsonganowo ŵatite, “Abale ni alongo ŵa ku America paŵakwatilaga m’miyala mwakusangalala, nombe abale ŵa ku Melbourne, ŵasangalele mnope ali mkukwatila m’miyala. Ngasituliŵalila cakutendekwaci.” a

21. Ana lina lyasambanoli lyakamucisye camtuli pamasengo gakulalicila?

²¹ Kola lina lya m’Malemba lyakuti Mboni sya Yehofa, kwakamucisye ŵandu ŵa Mlungu pandaŵijo kuti alimbicileje mnope  pamasengo gakulalicila. Liŵasa lya M’bale ni Mlongo Grimes ŵaŵaliji apayiniya m’cilambo ca United States ŵatesile nawo msongano wa ku Columbus, mu 1931. Jemanjaji ŵatite, “Twatyosile kunyumba tuli Ŵakulijiganya Baibulo, nambo twawujile tuli Ŵamboni sya Yehofa. Twasangalele kuti twakwete lina lyalyatukamucisye kumanyikasya lina lya Mlungu jwetu.” Panyuma pamsonganowu, Ŵamboni ŵane, ŵakamulicisyaga masengo matala gasambano gakumanyikacisya linali. Jemanjaji ŵalimanyikasyaga kwa acimsyene nyumba pakwapa ka kadi kakakwete utenga wakuti, “Ndili Jwamboni sya YEHOFA jwangulalicila ya Ucimwene wa YEHOFA Mlungu jwetu.” Yisyene, ŵandu ŵa Mlungu ŵaliji ŵakusangalala kumanyikwa ni lina lya Yehofa soni ŵaliji ŵakoseka kulalicila yakusosekwa kwa linali pacilambo cosope.—Yes. 12:4.

22. Ana cici cacikusimicisya kuti ŵandu ŵa Yehofa ali ŵakulekangana ni ŵane?

²² Sano yaka yejinji yimasile kutyocela pele Yehofa ŵakamucisye abale ŵasagulwe kutanda kolanjidwa ni linali. Kutandila m’caka ca 1931, ana Satana akombwele kulepelekasya ŵandu ŵa Mlungu kumanyikwa ni linali? Ana akombwele kwasokonasya ŵandu kuti akatulekanganyaga ni dini sine? Kusala yisyene nganakombola. Mwakulekangana ni nganisyo syakwesi, kumanyikwa kwetu mpela Mboni sya Yehofa kuli kwakuwonecela cenene kulekangana ni kalakose. (Aŵalanje Mika 4:5; Malaki 3:18.) Mwambone, tukusamanyikwa mnope ni lina lya Mlungu mwamti jwalijose jwakusakamulicisya masengo linali yikusaŵa yangasawusya kumkolanga kuti ali Jwamboni sya Yehofa. Dini syaunami syasili mpela matumbi nganisikombola kusokonasya kulambila kusyesyene. M’malo mwakwe litumbi lyalikwimila kulambila kusyesyene ‘litendekwe kuŵa lyelewu mnope kupunda matumbi gane gosope.’ [Maloŵega tugombelecesye m’weji] (Yes. 2:2) Masiku agano, ŵandu akucimbicisya mnope kulambila Yehofa soni lina lyakwe lyeswela.

23. Mwakamulana ni Salimo 121:5, ana ni usyesyene wakusosekwa wapi wakwamba Yehofa wawukusatupaga macili?

²³ Yili yakulimbikasya kumanyilila kuti Yehofa akutucenjela kwa Satana soni catucenjelejepe kusogoloku. (Sal. 121:5) Pelepa yili yakupikanika kamulana ni yaŵalembile jwamasalimo kuti, “Wana upile mtundu wa ŵandu wele Mlungu jwawo ali Yehofa, ŵandu ŵele jwalakwe ŵasagwile kuti aŵe ŵakweŵakwepe.”—Sal. 33:12, NW.