1, 2. ¿Kunatsa ‘Jesusaw Diosan Reinopat sum yatichistaspa’ sasin sissna?

 YAQHA marka uñtʼiris sarksna ukham amuytʼañäni, mayniw uka marka sum uñtʼañ yanaptʼistaspa. Jupakiw uka mark sum uñtʼi, ukatwa kuntï siski uk sum istʼtanjja. Awisajj kunanakampis uka markan utji uk wal yatiñ munasaw jupar jisktʼsna. Ukampis mä cheqar puriñampïktan ukhakiw jupajj uka cheqat sum qhanañchistu. Jupajj wali yatjjattʼatawa ukat kuntï yatiñasäki ukjja horasaparuw sum qhanañchtʼistu, ukatwa jupar wal yuspärtanjja.

² Cheqpach cristianonakajj ukhamanwa uñjasiraktanjja. Jehová Diosan Reinopatwa jukʼamp yatjjatañ muntanjja, uka Reinojj “suma uttʼayata” mä markar uñtatawa (Heb. 11:10). Cheqansa, kunapachatï Jesusajj aka Oraqenkkäna ukhajja, jupa pachpaw arkirinakaparojj Diosan Reinopat sum yatichäna ukat amuytʼayarakïna. Ukampis arkirinakapajj Reino toqet jisktʼapkäna ukhajja, janiw Jesusajj taqpach jisktʼanakapar qhanañchkänti, jan ukasti, akham sänwa: “Jumanakar arsuñanakajjajj utjaskitu[wa], ukampis jichhajj janiw amuytʼapkasmati” sasa (Juan 16:12). Kuntï arkirinakapajj sum amuyapkasapäna ukakwa Jesusajj yatichäna, kunjamtï marka uñtʼayir mä jaqejj lurkaspa ukhama.

3, 4. 1) ¿Kunjamsa Jesusajj jichhürunakan arkirinakapar yatichaski? 2) ¿Kunsa aka yatichäwin yatjjataskañäni?

³ Jiwañapajj jakʼäjjäna ukhaw Jesusajj kuntï Juan 16:12 qellqatan siski uka arunak arsüna. Ukhamajj jiwjjatapatjja, ¿kunjamsa arkirinakaparojj Diosan Reinopat yatichaskakisapäna? Jupajj akham sasaw arkirinakapar säna: ‘Qollan Ajayuw taqe kunatejj cheqäki [“ukar irpapjjätam”, MT]’ sasa (Juan 16:13). a Cheqansa, Jehová Diosan qollan ajayupajj pacienciamp marka sum uñtʼayiri mä jaqemp sasispawa. Uka taypiw  Jesusajj arkirinakaparojj Diosan Reinopat cheqa yatichäwinak horasapar sum yatichi.

⁴ Kunjamsa qollan ajayojj Diosan Reinopat jukʼamp yatjjatapjjañapatakejj cheqpach cristianonakar yanaptʼawayi, ukwa jichhajj uñjaskañäni. Nayraqatjja, Diosan Reinopajj kunapachas apnaqañ qalltäna, uka Reinon apnaqerinakasa ukat apnaqatäpkani ukanakasa, khitinakäpjjesa ukat kunsa jupanakajj jutïrit suyapjje ukwa yatjjataskañäni. Ukjjarusti, Jehová Diosan Reinopar yanaptʼañajj kamsañsa muni uk kunjamsa Criston arkirinakapajj sum amuyapjjäna ukwa yatjjatarakiñäni.

5, 6. 1) Diosan Reinopan uttʼayasitapata ukat cosecha apthapiñ tiempotjja, ¿kunsa Bibliat Yatjjatirinakajj amuyapjjäna? 2) Niyakejjay Jesusan arkirinakapajj amuyunakapan pantjasipjjchïnjja, ¿janit jupajj arkirinakapar yanaptʼkpachäna?

⁵ Kunjamtï aka libron payïr yatichäwin yatjjataniwayktanjja, ‘walja profecianakaw 1914 maran phoqasini’ sasaw Bibliat Yatjjatirinakajj walja maranak yatichapjjäna. ‘Cristojj kuttʼaniñapäkäna uka tiempojj 1874 maranwa qalltjjäna, 1878 maranwa Cristojj alajjpachan apnaqjjäna ukat 1914 maran octubre phajjsinwa Diosan Reinopajj alajjpachan suma uttʼayatäni’ sasaw jupanakajj amuyapjjäna. Ukatjja, ‘1874 marata 1914 marakamaw cosechajj apthapisini ukat taqe ajllitanakaru alajjpachar sarañatak tantachthapiskani ukhaw cosecha tiempojj tukuyani’ sasaw amuyapjjarakïna. Ukham amuyasajj pantjasipjjänwa, ukhamajj ¿janit Jesusajj arkirinakapar qollan ajayump yanaptʼkpachäna?

⁶ Janiw uk sañ munkiti. Qalltan parlkayätan uka uñachtʼäwit amuytʼaskakiñäni. Kunanakas mä markan utji uk janïrjjat amuyasin pantjassna ukhajja, ¿‘marka uñtʼañ yanaptʼkistu ukajj janiw sum yatkiti’ sañajj walikïskaspati? Janiwa. Diosan servirinakapajj ukhamarakiw kunjamsa Diosan amtanakapajj phoqasini uk wal yatiñ munapjjäna, ukampis janïraw qollan ajayojj ukanak sum qhanañchkänti. Ukhamajja, ¿janit Jesusajj jupanakar yanaptʼkpachäna? Janiw uk sañ munkiti. Niyakejjay Diosat jan jitheqtir servirinakajj altʼat chuymanïpjjchïnjja, jankʼakiw pantjat amuyunakap cheqañchapjjäna (Sant. 4:6).

7. ¿Kuna cheqa yatichäwinaksa Diosan servirinakapajj jukʼamp sum amuyapjjäna?

⁷ Khä 1919 marat aksarojja, Jehová Diosan yanaptʼapampejj jukʼamp sumwa servirinakapajj cheqa yatichäwinak amuyapjjäna (Salmo 97:11 liytʼañataki).  1925 maranjja, “Mä machaq markaruw uttʼayasi” siski uka jan armkañ yatichäwiw Yatiyañataki sat revistan mistüna. Ukanwa Diosan Reinopajj 1914 maran apnaqañ qalltatap sum qhanañchasïna. Kunapachatï Jehová Diosan Reinopajj uttʼayaskäna ukhaw Apocalipsis 12 jaljan jikjjataski uka profeciajj phoqasïna. Diosan alajjpachankir warmipajj mä wawa ususkäna uka toqetwa uka profeciajj parli. b Uka revistajj akham sarakïnwa: ‘Guerrajj utjkäna uka maranakanjja, Jehová Diosan markapajj arknaqata tʼaqhesiyata ukhamaw uñjasïna, ¿kunsa ukajj uñachtʼayistu? ¡Supayajj aka Oraqer jaqoqanitäjjewa! Ukat “wali colera[taw] juti, tiempopan jukʼakïtapa yatisina”’ sasa (Apo. 12:12).

8, 9. 1) ¿Diosan Reinopajj kunja wakiskirisa? 2) ¿Kuna jisktʼanakarus qhanañchaskañäni?

⁸ ‘Diosan Reinopaw jiwasan qhespiyasiñasat sipansa jukʼamp wakiskirejja’ sasaw Yatiyañataki revistajj 1928 maran qhanañchäna. Cheqas uka Reino toqew Jehová Diosajj sutip qʼomachani, Taqe Kunjjar Munañanïtap uñachtʼayani ukat kuntï jaqenakatak lurañ amtawayki uksa phoqarakini.

⁹ ¿Khitinakas Cristomp chikajj alajjpachat apnaqanipjjani? ¿Khitinakas aka Oraqen uka Reinomp apnaqatäpjjani? Ukat ¿kunsa Criston arkirinakapajj lurapjjañapäna?

10. ¿Kunsa cheqpach cristianonakajj 144.000 ajllitanakat amuyapjjäna?

¹⁰ Janïr 1914 mara purinkäna ukhaw cheqpach cristianonakajj akham amuyapjjäna: ‘Qollan ajayump ajllita 144.000 cristianonakaw Jesusamp chik alajjpachat apnaqanipjjani’ sasa. c ‘Ajllitanakajj ukhanïpjjapuniniwa ukat nayrïr patak maranakatwa jupanakarojj ajllisiñ qalltasiwayi’ sasaw uka cristianonakajj amuyapjjäna.

11. Criston noviapjam uñtʼatäpki uka ajllitanakajja, ¿aka Oraqen kun lurapjjañapsa amuyapjjäna?

¹¹ Criston noviapjam uñtʼatäpki uka ajllitanakajja, ¿kunsa aka Oraqenkkasajj lurapjjañapäna? Diosan arunakap yatiyañaw Jesusatakejj nayrankäna ukat uk lurañajja, ‘cosecha apthapiñ tiempomp sasiwa’ sasaw jupajj sarakïna, ukwa ajllitanakajj sum amuyapjjäna (Mat. 9:37; Juan 4:35). Kunjamtï payïr yatichäwin yatjjatktanjja, ‘cosecha apthapiñ tiempojj 40 maranakäniwa ukat taqe ajllitanakar alajjpachan jakapjjañapatak apthapisjjani ukhaw cosecha apthapiñ tiempojj tukusini’ sasaw ajllitanakajj amuyapjjäna. Ukampis 40 maranak  qhepatjja, yatiyañajj utjaskakïnwa, ukhamajj uka toqet jukʼamp amuytʼañaw wakisïna. Kunjamtï jichhajj yatktanjja, cosecha apthapiñ tiempojj 1914 maranwa qalltäna, ukhaw jan wali qorampi trigomp jaljañ tiempojj purinïna, mä arunjja, alajjpachar sarañataki ajllit cristianonakaruw kʼari cristianonakat jaljasiñapäna. Ukhamasti, alajjpachar sarañatak ajllitäpki ukanakaruw nayraqat apthapisiñapäna.

12, 13. Tunka virgen tawaqonakata ukat mä jaqejj servirinakapar qollqe churkäna uka uñachtʼäwinakajja, ¿kunjamsa aka qhepa urunakan phoqasiski?

¹² Khä 1919 marat aksaruw Cristojj Amuyasiri Cheqapa Uywatarojj jukʼamp yatiyañapatak yanaptʼawayi. Cheqas nayrïr patak maranakanwa ukham yatiyapjjañapatakejj ajllit arkirinakapar chʼamañchtʼäna (Mat. 28:19, 20). Ukat ukamp phoqañatakejj kunjam chuymanïpjjañapas wakisi ukwa Jesusajj qhanañcharakïna. Tunka virgen tawaqonakat Jesusajj parlkäna uka uñachtʼäwirjamajja, ajllitanakajj Jupan puriniñap ‘suyapjjapuniñapänwa’. Ukhamatakwa Jesusajj noviapampi alajjpachan casaraskani, mä arunjja, 144.000 ajllitanakamp mayachaskani uka urun ukankapjjasapäna (Apo. 21:2). Ukat qollqe churiri mä jaqetwa Jesusajj parlarakïna. Ukarjamajja, jan inaktʼasaw ajllit arkirinakapajj yatiyapjjañapäna (Mat. 25:1-30).

¹³ Pasïr patak maranakatwa ajllit cristianonakajj Jesusan puriniñap suyasipkatapa ukat jan inaktʼas yatiyasipkatap uñachtʼayasipki. ¡Ukham lurapjjatapajj janiw inamayäkaniti! Ukampis ¿Jesusamp chik apnaqanipkani uka 144.000 ajllitanakarukit apthapisiñapäna?

14, 15. El misterio terminado sat libronjja, ¿kuna pusi tamanakatsa qhanañchasïna?

¹⁴ Apocalipsis 7:9-14 qellqatan parlki uka ‘walja jaqenakajja’ khitinakäpjjesa, uk nayratpachawa Diosar  serviri walja chacha warminakajj wal yatiñ munapjjäna. Ukampis uk qhanañchañ horasajj janïraw purkänti. Ukatwa uka tiempon jakir cristianonakajj uka toqet amuyasajj pantjasipjjäna. Cheqas janiw kunjamtï jichhajj uka toqet sum amuyktan ukham amuyapkänti.

¹⁵ Khä 1917 maranjja, El misterio terminado sat librojj akham sänwa: “Alajjpachar sarañatakejj pä tama jan ukajj pä kasta qhespiyasiñaw utji. Aka Oraqen jakañatakisti, pä tama jan ukajj pä kasta qhespiyasiñaw utjaraki” sasa. ¿Khitinakas sapa tamankapjjpachäna? Cristomp chik apnaqanipkani uka 144.000 ajllit cristianonakaw nayrïr tamankapjjäna. Payïr tamansti, ‘walja jaqenakjam’ uñtʼatäpki ukanakaw ukankapjjarakïna. ‘Jupanakajj yaqha iglesianakar sariri cristianonakäpjjewa’ sasaw uka tiempon amuyasïna. ‘Uka cristianonakajj Diosar confiyasipjjewa, ukampis Dios toqet saytʼasiñatakejj janiw taqe chuymapun Jupar confiyasipkiti, ukatwa 144.000 ajllitanakampejj alajjpachan apnaqatäpjjani’ sasaw ‘walja jaqenakjam’ uñtʼatäpki ukanakat amuyasirakïna. ¿Khitinakas aka Oraqen jakapjjañapäna? Nayra tiempon jakapkäna uka chacha warminakaw kimsïr tamankapjjäna. Sañäni: Abraham, Moisés ukat jupanakjam Diosar taqe chuyma servir yaqha chacha warminakampi. ‘Jupanakajj pusïr tamankapki, mä arunjja, aka Oraqen jiltʼapkani taqe ukanakaruw apnaqapjjani’ sasaw amuyasirakïna.

16. ¿Kawkïr cheqa yatichäwinakas 1923 ukat 1932 maranakan qhanstäna?

¹⁶ Kuntï jichhürunakan ‘walja jaqenakat’ yatktan uk sum amuyapjjañapatakejja, ¿kunjamsa qollan ajayojj Criston arkirinakapar yanaptʼpachäna? Jukʼat jukʼatwa Biblian cheqa yatichäwinakapajj qhanstäna. 1923 maranwa Yatiyañataki sat revistajj aka Oraqen jakañ suyapki uka jaqenakat jukʼamp sum qhanañchjjäna, jupanakajj Cristomp apnaqatäpjjañapänwa. Ukatjja, 1932 maranwa Yatiyañataki sat revistajj Jonadab sat chachat parlarakïna, jupajj kʼari yupaychäw chhaqtayañatakiw Diosan uttʼayat Jehú sat reyir yanaptʼäna (2 Rey. 10:15-17). ‘Jonadab sat chachar uñtasit jaqenakaw jichhürunakan utji’ sasaw uka revistajj sarakïna. Ukat uka kasta jaqenakaruw Diosajj Oraqen jakapjjañapatakejja, “Armagedonan utjkani uka  jan waltʼäwinakat qhespiyani” sasaw uka revistan qhanañchasirakïna.

17. 1) ¿Kuna cheqa yatichäwis 1935 maran qhanstäna? 2) Khitinakas walja jaqenakjam uñtʼatäpjje uk yatisajja, ¿kunjamsa cheqpach cristianonakajj jikjjatasipjjäna? (“ Waljaniw wal kusisipjjäna” siski uka recuadro uñjjattʼäta.)

¹⁷ Khä 1935 maranwa cheqa yatichäwinakajj jukʼamp qhanstäna. Bibliajj parlki uka ‘walja jaqenakajja’, aka Oraqenwa jakapjjani sasaw Washington markan utjkäna uka jachʼa tantachäwin qhanañchasïna. Jupanakajj uwijanakampit cabritonakampit mä uñachtʼäwipan Jesusajj parlkäna uka uwijanakampi sasiwa (Mat. 25:33-40). Jupanakat parlasaw Jesusajj akham säna: “Utjarakituwa yaqha ovejanakajja [...]; ukanakarojj apaniñajjarakiwa” sasa (Juan 10:16). Arstʼäwipanjja, Rutherford jilatajj akhamwa tantachasirinakar säna: “Mirä amp suma, ¿aka Oraqen jakañatak suytʼäwinïpkta ukanakajj saytʼasipjjasmati?” sasa. Uk istʼasajj niya taqeniw saytʼasipjjäna. Jilatajj akham saskakïnwa: “¡Jumanakaw uka ‘walja jaqenakäpjjtajja’!” sasa. Kuna suytʼäwinïpjjesa uk yatisajj waljaniw wal kusisipjjäna.

18. ¿Khitinakar apthapiñatakis Criston arkirinakapajj chʼamachasiwayapjje, ukat kunas jikjjatasïna?

¹⁸ Uka tiempot aksaruw Cristojj ‘walja jaqenakar’ apthapipjjañapatakejj arkirinakapar wal yanaptʼaski, uka walja jaqenakaw jachʼa tʼaqhesïwi urunakat qhespipjjani. Qalltanjja, ‘janiw waljanïpkaniti’ sañjamänwa, ukatwa mä kutejj Rutherford jilatajj akham säna: “Amuyatajja, walja jaqenakjam uñtʼatäpki ukanakajj janiw sinti waljäpkaniti” sasa. Uka tiempot jichhakamajja, Jehová Diosaw walja jaqenakar apthapisiñapatak wal yanaptʼawayi. Jesusana ukat qollan ajayun yanaptʼapampejj ajllitanakasa ukat yaqha uwijanakasa, ‘mä sapa tamakiw mä sapa awatirini’ mayachtʼat irnaqtʼapjje. Kunjamtï Jesusajj siskäna ukhampuniw phoqasiski.

19. ¿Kunjamsa jukʼamp jaqenakar apthapisiñapatak yanaptʼsna?

¹⁹ Jehová Diosar taqe chuyma servir jaqenakatjja, niya taqeniw aka Oraqen wiñayatak jakapjjani, jupanakajj Cristompi ukat 144.000 ajllitanakampiw apnaqatäpjjani. Bibliarjamajj kuna suytʼäwinïpjjesa uk sum amuyapjjañapatakiw Cristojj Diosan servirinakapar yanaptʼawayi, uk uñjasajj wali kusisitaw jikjjatastanjja. Uka suytʼäwisat jaqenakar yatiyañajj jiwasatakejj wali askipuniwa. Ukhamajj kuntï lurirjamäktan ukarjamaw yatiyañatak wal chʼamachasiñasa, ukhamatwa walja jaqenakar jukʼamp apthapisiñapatak  yanaptʼañäni ukat jupanakamp chikarakiw Jehová Diosan sutip jachʼañchañäni (Lucas 10:2 liytʼañataki).

20. 1) ¿Khitinakas Supayan tamap taypinkapjje? 2) ¿Diosan Reinopar yanaptʼañatakejj kun lurañasasa?

²⁰ Diosan Reinopat jukʼamp yatjjatkasajja, uka Reinor yanaptʼañatakejj kunsa lurapjjaspa ukwa Diosan servirinakapajj amuyapjjarakïna. Uka toqet parlkasajja, 1922 maran mistkäna uka Yatiyañataki revistajj akham sänwa: ‘Pä tamaw utji, Jehová Diosan tamapampi Supayan tamapampi’ sasa. Kʼari religionanakasa, politiconakasa ukat jachʼa comerciantenakasa Supayan tamap taypinkapjjewa. Ukhamajj khitinakatï Diosan Reinopar yanaptʼañ munapki ukanakajja, janipuniw Supayan tamapar mitisipjjañapäkiti (2 Cor. 6:17). ¿Kunsa uka arunakajj sañ muni?

21. 1) Amuyasiri Cheqapa Uywatajja, ¿kunsa Diosan servirinakaparojj jachʼa comerciantenakat amuytʼayäna? 2) Khä 1963 maran mistkäna uka Yatiyañataki revistajja, ¿kunsa ‘Jachʼa Babilonia’ toqet qhanañchäna?

²¹ Jachʼa comerciantenakajj kuna jan walinaksa lurapjje ukat qollqe chuymäñajj kunja jan walisa uk walja kutiw Amuyasiri Cheqapa Uywatajj Bibliat apstʼat qellqatanak toqejj Diosan servirinakapar yatiyäna (Mat. 6:24). Supayan apnaqat kʼari religionanakan jan wali luräwinakapsa walja kutiw qhanstayarakïna. ‘Janiw cristianöpjjtwa sirinakakejj Jachʼa Babilonia taypinkapkiti, jan ukasti, taqpach kʼari religionanakaw uka taypinkapjje’ sasaw 1963 maran mistkäna uka Yatiyañataki revistajj qhan säna. Ukatwa kʼari religionat mistupjjañapataki ukat jan wali luräwinakapat jitheqtapjjañapatakejj Diosan markapar wal yanaptʼasïna, uka toqetwa aka libron 10 yatichäwipan jukʼamp yatjjataskañäni (Apo. 18:2, 4).

22. Nayrïr Jachʼa Chʼajjwäwi tiemponjja, ¿kunsa Diosan servirinakapajj Romanos 13:1 qellqatat amuyapjjäna?

²² ¿Supayan apnaqat politiconakat kamsasirakispasa? Cheqpach cristianonakajja, ¿guerranakana ukat marka pura nuwasipki ukanakan mitisipjjañapajj walikïskasapänti? Nayrïr Jachʼa Chʼajjwäwi tiemponjja, jaqe masipar jiwayañajj jan walïtapwa Bibliat Yatjjatirinakajj amuyapjjäna (Mat. 26:52). Ukampis Romanos 13:1 qellqatan “[jilïr] autoridadanakarojj jaysapjjañama[wa]” siski uka arunakajja, ejercitor mantañatak qellqayasiña ukat jiwayañatak armanak apaña sañwa muni sasaw jupanakajj amuyapjjarakïna. Ukhamarusa, enemigonakapar jan jiwayañatakejj ina chʼusarukiw illaptʼapjjañapäna jan ukajj qʼajjchtʼapjjañapäna.

23, 24. Payïr Jachʼa Chʼajjwäwi tiemponjja, ¿kunjamsa Romanos 13:1 qellqatajj amuyasjjäna, ukat kun amuyapjjañapatakis Criston arkirinakapar yanaptʼasïna?

 ²³ Yatiyañataki revistajja, guerrar mitisiñajj jan walïtapwa Payïr Jachʼa Chʼajjwäwi janïr qalltkäna ukhajj 1939 maran sum qhanañchjjäna. ‘Cristianonakajj janipuniw akapachan utjki uka chʼajjwäwinakarusa ni guerranakarus mitisipjjañapäkiti’ sasaw uka revistajj qhan amuytʼayäna. Uka ewjjtʼanak horasapar katoqañajj cristianonakatakejj wali askipunïnwa, guerran walja jaqenakar jiwarayaskäna ukanakat janiw jupanakajj juchanïpkänti. Maysa toqetjja, ‘Romanos 13:1 qellqatan parlki uka “jilïr autoridadanakajj” janiw marka apnaqerinakäkiti, jan ukasti, Jehová Diosata ukat Jesusatwa parlaski’ sasaw 1929 marat aksarojj Bibliat apstʼat qellqatanakan qhanañchasirakïna. Ukhamajj uka toqet sum amuytʼañajj wakisiskakïnwa.

²⁴ Diosan qollan ajayupaw Criston arkirinakaparojj uk sum amuytʼañ yanaptʼawayi. Romanos 13:1-7 qellqatajj kamsañsa muni ukajja, Yatiyañataki mayo 1, ukat mayo 15, 1963 maran mistkäna uka pä revistanakanwa sum qhanañchasïna. Ukhaw jilat kullakanakajj kuna toqetsa Jesusajj parläna uk sum amuytʼapjjäna, jupajj akham sänwa: “Cesarankki ukjja Cesararu churapjjam, Diosankkis uksti Diosaruraki churapjjam” sasa (Luc.  20:25). ‘“Jilïr autoridadanakajj” marka apnaqer gobiernonakawa ukat jupanakaruw cristianonakajj istʼapjjañapa’ sasaw cheqpach cristianonakajj amuyapjjäna. Ukampis uka apnaqerinakatï Jehová Dios contra saytʼasiñas munapjjani ukhajja, apostolonakjamaw akham sañasa: “Nanakanjja Diosar nayraqat istʼapjjañajjaw wakisi, jaqenakar sipansa” sasa (Hech. 5:29). Kunatsa cristianonakajj politicarusa ukat guerranakarus jan mitisipjjäna ukwa aka libron 13 ukat 14 yatichäwinakan jukʼamp yatjjataskañäni.

25. Diosan Reinopat sum yatjjatañasataki qollan ajayun yanaptʼatapatjja, ¿kunatsa Diosar yuspärtanjja?

²⁵ Criston arkirinakapjamajja, Reino toqet kunanaktï aka qhepa patak maranakan yatjjatawayktan uk amtañäni. Uka Reinojj kunapachas alajjpachan uttʼayasiwayi ukat kunatsa ukajj wali askejja ukwa amuytanjja. Diosar taqe chuyma servipki ukanakatjja, khitinakas alajjpachar sarapjjani jan ukajj aka Oraqen jakapjjani uksa amuyjjaraktanwa. Kunjamsa Diosan Reinopar yanaptʼsna ukat autoridadanakarus istʼaraksna uksa yatjjaraktanwa. Ukhamajj sapa mayniw akham jisktʼasiñasa: “Jesusatï Amuyasiri Cheqapa Uywatar uka yatichäwinak amuytʼapjjañapatak jan yanaptʼkasapäna ukhajja, ¿uka yatichäwinak amuyiriskayätti?” sasa. Diosan qollan ajayupa ukat Cristow ukanak amuytʼañatakejj yanaptʼaskistu, uk yatiñajj wali askipuniwa.