1, 2. Ngaa masiling naton nga si Jesus isa ka maalam gid nga giya?

 IMADYINA nga gina-tour kamo sang isa ka eksperiensiado nga tour guide sa isa ka matahom nga siudad. Subong pa lang kamo nakakadto diri amo nga ginapamatian gid ninyo sing maayo ang iya ginasiling. Kon kaisa, gusto na ninyo mahibaluan ang pila ka impormasyon parte sa mga bahin sang siudad nga wala pa ninyo makita. Pero kon pamangkuton ninyo ang tour guide, ginapahawathawat niya anay kamo asta nga ara na kamo sa eksakto nga lugar. Gani, nagdayaw gid kamo sa iya kaalam, kay ginasugid niya sa inyo ang impormasyon sa nagakaigo gid nga tion.

² Ang matuod nga mga Cristiano daw kaangay man sa mga turista. Gusto gid naton mahibaluan ang parte sa pinakamatahom nga siudad, “ang siudad nga may matuod nga mga sadsaran,” ang Ginharian sang Dios. (Heb. 11:10) Sang ari si Jesus sa duta, sia mismo ang naggiya sa iya mga sumulunod amo nga mas nagdalom ang ila ihibalo sa Ginharian. Ginsabat bala niya gilayon ang tanan nila nga pamangkot kag ginsugid sa ila ang tanan nga detalye parte sa Ginharian? Wala. Nagsiling sia: “Madamo pa kuntani ako sing isugid sa inyo, apang indi pa ninyo ini mahangpan subong.” (Juan 16:12) Bilang pinakamaalam nga giya, wala ginpatam-an ni Jesus ang iya mga disipulo sing mga impormasyon nga indi pa nila mahangpan sadto.

3, 4. (a) Paano padayon nga ginatudluan ni Jesus ang mga matutom parte sa Ginharian sang Dios? (b) Ano ang binagbinagon naton sa sini nga kapitulo?

³ Ang Juan 16:12 ginhambal ni Jesus sang katapusan niya nga gab-i sa duta. Sang napatay sia, paano pa niya padayon nga matudluan ang mga matutom parte sa Ginharian sang Dios? Ginpalig-on niya ang iya mga apostoles: ‘Ang espiritu sang kamatuoran magatuytoy sa inyo sang tanan nga kamatuoran.’ a (Juan 16:13) Ang balaan nga espiritu mapaanggid naton sa isa ka mapinasensiahon nga manugtuytoy ukon guide. Amo ini ang ginagamit ni Jesus sa pagtudlo sa iya mga sumulunod sang kinahanglan nila mahibaluan parte sa Ginharian sang Dios—sa eksakto nga tion.

⁴ Binagbinagon naton kon paano gingiyahan sang balaan nga espiritu ni Jehova ang sinsero nga mga Cristiano sa dugang nga ihibalo parte sa sina nga Ginharian. Una, binagbinagon naton ang aton paghangop kon san-o nagsugod sa paggahom ang Ginharian  sang Dios. Dayon, binagbinagon naton kon sin-o ang mga gumalahom kag mga sakop sang Ginharian kag kon ano ang ila paglaum. Sa katapusan, tan-awon naton kon paano nahangpan sing mas maathag sang mga sumulunod sang Cristo kon ano ang kinahanglan para mangin mainunungon sa Ginharian.

5, 6. (a) Ano anay ang sayop nga pagtamod sang mga Estudyante sang Biblia parte sa pagtukod sang Ginharian kag sa pag-ani? (b) Ngaa ining sayop nga mga pagtamod indi dapat mangin rason para duhaduhaan naton nga ginagiyahan ni Jesus ang iya mga sumulunod?

⁵ Subong sang natun-an naton sa Kapitulo 2, tinuig na nga ginapatihan sang mga Estudyante sang Biblia nga ang 1914 isa ka importante nga tuig sa katumanan sang tagna sa Biblia. Pero abi nila sadto ang presensia sang Cristo nagsugod na sang 1874, kag nagagahom na sia gikan sa langit sang 1878, kag ang Ginharian natukod lang sing bug-os sang Oktubre 1914. Abi nila ang pag-ani natabo halin sang 1874 asta 1914 kag magahingapos ini sa pagtipon sang mga hinaplas sa langit. Duhaduhaan na bala naton nga ginagiyahan ni Jesus ang mga matutom paagi sa balaan nga espiritu bangod sa sining sayop nga mga paghangop?

⁶ Indi gid! Hunahunaa liwat ang ilustrasyon sa umpisa. Kon ang mga turista may abanse nga ginahunahuna kag mga pamangkot, duhaduhaan bala nila ang tour guide? Indi gid! Sing kaanggid, ang katawhan sang Dios kon kaisa may abanse nga ginahunahuna parte sa katuyuan ni Jehova bisan indi pa tion para sa balaan nga espiritu nga giyahan sila sa husto nga paghangop. Pero, maathag nga ginagiyahan sila ni Jesus. Gani, ang mga matutom handa magpatadlong kag mapainubuson nga ginabag-o ang ila pagtamod.—Sant. 4:6.

7. Ano nga mga espirituwal nga kapawa ang nabaton sang katawhan sang Dios?

⁷ Pagligad sang 1919, ang katawhan sang Dios nakabaton sing madamo nga espirituwal nga kapawa. (Basaha ang Salmo 97:11.) Sang 1925, isa ka importante nga artikulo ang naggua sa Watch Tower, nga natig-uluhan “Birth of the Nation.” Ginbalay sini ang makapakumbinsi nga pamatuod sa Kasulatan nga ang Mesianikong Ginharian nabun-ag sang 1914, bilang katumanan sang tagna sa Bugna kapitulo 12 parte sa langitnon nga babayi sang Dios nga nagbun-ag. b Ginpakita man sang artikulo nga ang paghingabot kag kabudlayan nga naagihan sang katawhan ni Jehova sa tion sang inaway maathag nga mga tanda nga si Satanas gintagbong gikan sa langit, “nga may daku nga kaakig, kay nahibaluan niya nga malip-ot na lamang ang iya tion.”—Bug. 12:12.

8, 9. (a) Paano ginpadaku ang importansia sang Ginharian sang Dios? (b) Ano nga mga pamangkot ang aton binagbinagon?

⁸ Daw ano ka importante ang Ginharian? Sang 1928, ginsugdan sang Watch Tower nga ipadaku nga mas importante ang Ginharian sangsa personal nga kaluwasan paagi sa gawad. Sa pagkamatuod, ang Mesianikong Ginharian amo ang gamiton ni Jehova sa pagpakabalaan sang iya ngalan, pagbindikar sang iya pagkasoberano, kag pagtuman sang iya mga katuyuan para sa katawhan.

⁹ Sin-o ang magagahom upod sa Cristo sa sina nga Ginharian? Sin-o ang mangin dutan-on nga mga sakop sina nga Ginharian? Ano dapat ang ginahimo sang mga sumulunod sang Cristo?

10. Ano ang madugay na nga nahangpan sang katawhan sang Dios parte sa 144,000?

¹⁰ Mga tinuig antes sang 1914, nahangpan na sang matuod nga mga Cristiano nga ang 144,000 ka matutom nga sumulunod sang Cristo magagahom kaupod niya sa langit. c Nahangpan sang mga Estudyante sang Biblia nga ang kadamuon literal kag ang pagtipon sini nagsugod sang unang siglo C.E.

11. Paano nag-uswag ang ihibalo sang mangin bahin sang nobya sang Cristo parte sa ila asaynment diri sa duta?

¹¹ Pero, ano ang asaynment sang mangin bahin sang nobya sang Cristo samtang ari pa sila sa duta? Nakita nila nga ginpadaku ni Jesus ang pagbantala kag gin-angot ini sa pag-ani. (Mat. 9:37; Juan 4:35) Subong sang nakita naton sa Kapitulo 2, abi nila ang pag-ani magalawig sing 40 ka tuig kag magahingapos sa pagtipon sang mga hinaplas sa langit. Pero sang nagpadayon gihapon ang hilikuton pagkatapos sang 40 ka tuig, maathag nga kinahanglan nila bag-uhon ang ila pagtamod. Karon, nahibaluan naton nga ang tig-alani—ang panahon sang pagpain sang trigo sa hilamon, sang hinaplas nga mga Cristiano sa butig nga mga Cristiano—nagsugod sang 1914. Tion na para magkonsentrar sa pagtipon sa nabilin nga bahin sang hinaplas nga grupo!

12, 13. Paano natuman sa katapusan nga mga adlaw ang ilustrasyon ni Jesus parte sa napulo ka birhen kag sa mga talanton?

¹² Halin sang 1919, padayon nga gingiyahan sang Cristo ang matutom kag mainandamon nga ulipon nga ipadaku ang pagbantala. Sia ang naghatag sina nga asaynment sang unang siglo. (Mat. 28:19, 20) Ginpakita man niya kon ano nga mga kinaiya ang kinahanglan sang iya hinaplas nga mga sumulunod para matuman ina nga asaynment. Paano? Sa iya ilustrasyon parte sa napulo ka birhen, ginpakita niya nga ang mga hinaplas kinahanglan mangin mabinantayon, alisto sa espirituwal, kon gusto nila makapakigbahin sa daku nga punsion sa langit, sa tion nga mahiusa ang Cristo sa iya “nobya” nga 144,000. (Bug. 21:2) Dayon, sa iya ilustrasyon parte sa mga talanton, gintudlo ni Jesus nga ang iya hinaplas nga mga alagad dapat mangin mapisan sa pagbantala nga gintugyan sa ila.—Mat. 25:1-30.

¹³ Ginpamatud-an sang mga hinaplas ang ila pagkamabinantayon kag kapisan sang nagligad nga siglo. Bangod sini, pagapadyaan gid sila! Pero ang daku nga pag-ani limitado lang bala sa  pagtipon sa nabilin nga bahin sang 144,000 ka kaupod nga manuggahom sang Cristo?

14, 15. Ano ang apat ka grupo nga ginbinagbinag sa The Finished Mystery?

¹⁴ Ang mga matutom nga lalaki kag babayi madugay na nga interesado kon sin-o ang “daku nga kadam-an” nga ginsambit sa Bugna 7:9-14. Gani, antes ipahayag sang Cristo ang identidad sining daku nga grupo, madamo sa ginapatihan parte sa sini ang malayo gid sa maathag kag simple nga kamatuoran nga nahangpan kag nanamian gid naton karon.

¹⁵ Sang 1917, ang libro nga The Finished Mystery nagsiling nga may “duha ka sahi sang Langitnon nga kaluwasan, kag may duha man ka sahi sang dutan-on nga kaluwasan.” Sin-o ang bahin sining apat ka grupo nga may lainlain nga kaluwasan? Una, may 144,000 nga mangin kaupod nga manuggahom sang Cristo. Ikaduha, may daku nga kadam-an. Sadto, ginapatihan nga sila ang nagapangangkon nga mga Cristiano nga bahin gihapon sang mga relihion sang Cristiandad. May pagtuo sila pero kulang pa kag indi makatindog sing malig-on. Bangod sini, mas manubo ang ila posisyon sa langit. Sa duta naman, ginapatihan nga ang ikatlo nga grupo, ang “dumaan nga mga takus”—subong nanday Abraham, Moises, kag iban pa—may awtoridad sa ikap-at nga grupo nga amo ang katawhan sa kalibutan.

16. Ano nga espirituwal nga kapawa ang nagsilak sang 1923 kag sang 1932?

¹⁶ Paano gingiyahan sang balaan nga espiritu ang mga sumulunod sang Cristo sa aton karon paghangop? Amat-amat ini nga ginpahayag paagi sa mga silak sang espirituwal nga kapawa. Halin pa sang 1923, ginpatalupangod na sang Watch Tower nga may isa ka grupo nga wala sing langitnon nga paglaum nga magakabuhi sa duta sa idalom sang paggahom sang Cristo. Sang 1932, ginbinagbinag sang Watchtower ang parte kay Jonadab (Jehonadab), nga nag-upod sa hinaplas nga hari sang Israel nga si Jehu para suportahan sia sa pagpakig-away batok sa butig nga pagsimba. (2 Hari 10:15-17) Ang artikulo nagsiling nga may grupo sang mga tawo sa moderno nga tion nga pareho kay Jonadab, kag ining grupo luwason ni Jehova “sa kagamo sa Armageddon” para magkabuhi diri sa duta.

17. (a) Ano nga masanag nga espirituwal nga kapawa ang nagsilak sang 1935? (b) Ano ang reaksion sang matutom nga mga Cristiano sa bag-o nga paghangop parte sa daku nga kadam-an? (Tan-awa ang kahon nga “ Nakaginhawa Na sing Masulhay.”)

¹⁷ Sang 1935, isa ka masanag nga espirituwal nga kapawa ang nagsilak. Sa kombension sa Washington, D.C., ang daku nga kadam-an nakilal-an subong dutan-on nga grupo, nga amo man ang mga karnero sa parabola ni Jesus sang mga karnero kag mga kanding. (Mat. 25:33-40) Ang daku nga kadam-an mangin bahin sang “iban nga mga karnero,” nga siling ni Jesus: “Dapat dalhon ko man.” (Juan 10:16) Sang si J. F. Rutherford, nga humalambal sadto, nangabay: “Puede palihug magtindog ang mga may paglaum nga magkabuhi sing walay katapusan sa duta?” sobra sa katunga ang nagtindog! “Tan-awa!” siling niya. “Ang daku nga kadam-an!” Madamo ang natandog gid sang nag-athag na ang ila paglaum.

18. Paano nagkonsentrar sa ministeryo ang mga sumulunod sang Cristo, kag ano ang resulta?

 ¹⁸ Pagkatapos sadto, gingiyahan na sang Cristo ang iya katawhan nga magkonsentrar sa pagtipon sa mangin bahin sang daku nga kadam-an nga maluwas sa dakung kapipit-an. Sa umpisa, daw diutay lang ining grupo. Si Brother Rutherford nagkomento pa gani: “Siguro ang ‘daku nga kadam-an’ indi gid man magsobra kadamo.” Siempre, karon nahibaluan na naton kon paano gid ginpakamaayo ni Jehova ang pag-ani sugod sadto! Sa panuytoy ni Jesus kag sang balaan nga espiritu, ang mga hinaplas kag ang ila kaupod nga “iban nga mga karnero” nangin “isa ka panong” nga nagaalagad sa idalom sang “isa ka manugbantay” suno sa gintagna ni Jesus.

19. Paano kita makapakigbahin sa pagpadamo sang daku nga kadam-an?

¹⁹ Ang kalabanan nga matutom nga tawo magakabuhi sing walay katapusan sa paraiso sa duta nga pagagamhan sang Cristo kag sang iya 144,000 ka kaupod nga gumalahom. Indi bala nga makalilipay gid hunahunaon kon paano gingiyahan sang Cristo ang katawhan sang Dios sa sining maathag kag suno sa Kasulatan nga paglaum? Daku gid nga pribilehiyo nga ipaambit ini nga paglaum sa mga maistorya naton sa ministeryo! Kabay nga magpadayon kita nga aktibo suno sa aton kahimtangan agod nga magdamo pa gid ang daku nga kadam-an, nga magahatag sing mas daku nga kadayawan sa ngalan ni Jehova!—Basaha ang Lucas 10:2.

20. Ang organisasyon ni Satanas ginahuman sang ano nga mga elemento, kag paano nadalahig diri ang aton pagkamainunungon?

²⁰ Samtang padayon nga nagatuon ang katawhan sang Dios parte sa Ginharian, kinahanglan man nila mahangpan sing bug-os kon paano sila mangin mainunungon sa sini. Sang 1922, ang Watch Tower nagsiling nga may duha ka organisasyon, kay Jehova kag kay Satanas, kag ang kay Satanas ginahuman sang komersial, relihioso, kag pulitikal nga mga elemento. Ang mga mainunungon sa Ginharian sang Dios indi dapat makigbahin sa bisan ano nga aspekto sang organisasyon ni Satanas. (2 Cor. 6:17) Ano ang buot silingon sini?

21. (a) Paano ginpaandaman sang matutom nga ulipon ang katawhan sang Dios parte sa dalagku nga mga negosyo? (b) Sang 1963, ano ang ginpahayag sang Watchtower parte sa “Babilonia nga Daku”?

²¹ Ang espirituwal nga pagkaon halin sa matutom nga ulipon pirme nagabuyagyag sang korapsion sang dalagku nga mga negosyo kag nagapaandam sa katawhan sang Dios nga indi magpadala sa materyalismo. (Mat. 6:24) Padayon man nga ginabuyagyag sang aton mga publikasyon ang relihioso nga bahin sang organisasyon ni Satanas. Sang 1963, maathag nga ginpakita sang Watchtower nga ang “Babilonia nga Daku” wala lamang nagapatuhoy sa Cristiandad kundi sa bug-os kalibutan nga emperyo sang butig nga relihion. Gani, subong sang makita naton sing mas maathag sa Kapitulo 10, ang katawhan sang Dios gikan sa tanan nga kadutaan kag kultura nabuligan nga ‘maggua sa iya,’ paagi sa pagtinlo sang ila kaugalingon sang tanan nga butig nga relihioso nga mga buhat.—Bug. 18:2, 4.

22. Sang Bug-os Kalibutan nga Inaway I, ano ang paghangop sang madamo sa katawhan sang Dios sa laygay sa Roma 13:1?

²² Kamusta naman ang pulitikal nga bahin sang organisasyon ni Satanas? Makapakigbahin bala ang matuod nga mga Cristiano  sa mga inaway kag mga pagsinuay sang mga pungsod? Sang Bug-os Kalibutan nga Inaway I, nahangpan na sang mga Estudyante sang Biblia nga ang mga sumulunod sang Cristo indi dapat magpatay sang iya isigkatawo. (Mat. 26:52) Pero madamo ang naghunahuna nga ang laygay sa Roma 13:1 nga mangin matinumanon sa “mas mataas nga mga awtoridad” nagakahulugan nga dapat sila mag-entra sa army, magsuksok sang uniporme sang soldado, kag magdala pa gani sang armas; pero kon suguon sila nga patyon ang ila kontra, matiro lang sila sa hangin.

23, 24. Sang Bug-os Kalibutan nga Inaway II, ano ang aton paghangop sa Roma 13:1, kag sa anong mas sibu nga paghangop gingiyahan ang mga sumulunod sang Cristo?

²³ Samtang nagalapuyot ang Bug-os Kalibutan nga Inaway II sang 1939, ginbinagbinag naman sing maayo sang Watchtower ang neutralidad. Maathag nga ginpakita sang artikulo nga ang mga Cristiano indi dapat makigbahin sa tanan nga inaway kag sinuay sang mga pungsod sa kalibutan ni Satanas. Sibu gid sa tion nga panuytoy! Bangod sini, ang mga sumulunod sang Cristo naproteksionan sa makasiligni nga salabton sa dugo nga nahimo sang mga pungsod sa sina nga inaway. Apang sugod sang 1929, ginpaathag man sang aton mga publikasyon nga ang mas mataas nga awtoridad sa Roma 13:1 wala nagapatuhoy sa sekular nga mga gumalahom, kundi kanday Jehova kag Jesus. Kinahanglan pa pasibuon ang ila paghangop.

²⁴ Gingiyahan sang balaan nga espiritu ang mga sumulunod sang Cristo sa sibu nga paghangop sang 1962, sang ginbalhag ang importante nga mga artikulo parte sa Roma 13:1-7 sa Nobiembre  15 kag Disiembre 1 nga Watchtower. Nahangpan gid man sang katawhan sang Dios ang prinsipio parte sa relatibo nga pagpasakop suno sa sining bantog nga pinamulong ni Jesus: “Ihatag ninyo sa Cesar ang mga butang nga iya sang Cesar, apang sa Dios ang mga butang nga iya sang Dios.” (Luc. 20:25) Nahangpan na sang matuod nga mga Cristiano nga ang mas mataas nga awtoridad nagapatuhoy sa sekular nga mga kagamhanan sining kalibutan kag nga ang mga Cristiano dapat magpasakop sa ila. Pero ini nga pagpasakop relatibo. Kon suguon kita sang sekular nga mga awtoridad nga lapason si Jehova nga Dios, magasabat kita pareho sa mga apostoles anay: “Dapat namon tumanon ang Dios subong manuggahom sa baylo sang mga tawo.” (Binu. 5:29) Sa Kapitulo 13 kag 14, matun-an pa naton kon paano gintuman sang katawhan sang Dios ang prinsipio sang neutralidad.

25. Ngaa ginapabaloran mo ang paggiya sang balaan nga espiritu sa paghangop parte sa Ginharian sang Dios?

²⁵ Hunahunaa ang mga natun-an sang mga sumulunod sang Cristo parte sa Ginharian sang nagligad nga siglo. Natun-an naton kon san-o natukod sa langit ang Ginharian sang Dios kag kon daw ano ini ka importante. Nahangpan naton sing mas maathag ang duha ka paglaum sang mga matutom, ang langitnon kag dutan-on nga paglaum. Nahangpan man naton kon paano mangin mainunungon sa Ginharian sang Dios samtang nagapasakop kita sing relatibo sa sekular nga mga awtoridad. Pamangkuta ang imo kaugalingon: ‘Paano ko ayhan natun-an ining hamili nga mga kamatuoran kon wala gingiyahan ni Jesucristo ang iya matutom nga ulipon sa duta nga mahangpan ini kag itudlo sa iban?’ Daw ano gid nga pagpakamaayo nga ginagiyahan kita sang Cristo kag sang balaan nga espiritu!