1, 2. Monkedi musinke Jesus ga kere mupitisili gonondunge?

GAZADARA ASI muntu ga diva nawa evango kuna kumupitisira mositata sosiwa sili unene. Nove novakweni kapi mwa diva sitata oso, makura tomu kwama nkenye eyi ana kuuyunga. Pamwe tomu tetuka yininke mwa dira kumona rumwe eyi ya kara mositata oso. Apa nomu pura mupitisili, age kapi na mu tantera dogoro posiruwo sokuwapera. One tomu tetuka ediwo lyendi apa na mu tantera eyi muna hepa kudiva posiruwo sokuwapera.

² Vakriste wousili nawo kuna kara moukaro wokulifana ngwendi wovadinguli. Ose kuna kulironga kuhamena sitata sosiwa “sitata esi sa kara nomatateko,” Uhompa waKarunga. (Heb. 11:10) Apa Jesus ga kere pevhu, age kwa kere mupitisili ogu nga rongo vasikuli vendi kuhamena Uhompa. Age nga limburura mapuro gawo nagenye nokuvatantera nayinye kuhamena Uhompa posikando simwe ndi? Hawe. Age kwa tente asi: “Nina kara simpe noyininke yoyinzi yokumutantera, nye ntaantani one yina mu vhukire.” (Joh. 16:12) Ngomupitisili gonondunge, Jesus kapi ga tanterere varongwa vendi yininke yoyinzi eyi ngano ya va vhukilire.

3, 4. (a) Ngapi Jesus ga twikilire kuronga vantu wovalimburukwi kuhamena Uhompa waKarunga? (b) Yisinke natu ka konakona megaununo eli?

³ Jesus kwa uyungire nonkango domwaJohanesa 16:12 masiku gokuhulilira geparu lyendi pevhu. Konyima zonomfa dendi, ngapi ga twikilire kuronga vantu wovalimburukwi kuhamena Uhompa waKarunga? Age kwa tumbwidilire vapositoli vendi asi: “Mpepo zoUsili, ngazi ya mu ronga usili mudima.” (Joh. 16:13) Mpepo zokupongoka kuna kara ngwendi murongi ndi mupitisili gomuwa. Jesus kuruganesa mpepo zokupongoka mokuronga vasikuli vendi nkenye eyi va hepa kudiva kuhamena Uhompa waKarunga posiruwo sokuwapera.

⁴ Tu konakoneni omu mpepo zokupongoka zaJehova za pitisira Vakriste wousili va dive Uhompa. Pomuhowo tatu  ka konakona omu twa kwete egano kuhamena siruwo esi wa tamekere kupangera Uhompa waKarunga. Ntani natu ka tara omu va dimbwilire ava ngava ka pangera moUhompa ntani nava ngau ka pangera. Moruhura, tatu ka tara omu vasikuli vaKristusa va kwete nawa egano eyi ya hamena mo kukara noulimburukwi koUhompa.

5, 6. (a) Magano musinke gepuko va kere nago Valirongi woBibeli kuhamena etulisopo lyoUhompa ntani siruwo somuzangu? (b) Morwasinke magano ogo gepuko ga dira kulikida asi Jesus kapi ga pitisilire vasikuli vendi?

⁵ Egaununo 2 lyobuke ezi kwa likidire asi Valirongi woBibeli nomvhura dononzi kwa divisire asi mo-1914 ngapa horoka yininke eyi va pumbire moBibeli. Nye posiruwo sina awo kwa pulire asi ekaropo lyaKristusa kwa tamekere mo-1874 nokutameka kupangera meguru mo-1878 ntani asi Uhompa ngava u tulisa po mwaSikukutu 1914. Kwa pulire hena asi muzangu kwa tamekere mo-1874 dogoro 1914 gu ya hage kepongaiko lyovagwavekwa ava ngava za meguru. Magano ogo gepuko kulikida asi Jesus kapi ga pitisilire vantu vena wovalimburukwi kupitira mompepo zokupongoka ndi?

⁶ Hawe! Gazadara kosifanekeso setu tuna tumbura. Nsene vadinguli va kara nomagano gepuko ngoso kulikida asi ogu ana kuvapitisira nokuvhura si kumuhuguvara ndi? Hawe! Mokulifana, vantu vaKarunga pamwe kuhetekera ko pwavene kukwata egano sitambo saJehova komeho mpepo zokupongoka zi va horwere mausili ogo. Nye Jesus simpe kuvapitisira, ano vantu wovalimburukwi kutambura mapukururo nokulinunupika pokurundurura magazaro gawo.—Jak. 4:6.

7. Usili musinke va va tungikire nawo vantu vaKarunga?

⁷ Nomvhura da ya kweme ko-1919, vantu vaKarunga kwa va tungikire apa usili wa ya minikilire unene. (Resa Episarome 97:11.) Mo-1925 yipo sa pwege sirongwa somulyo moRuhungu sosiparatjangwa asi: “Ehampuruko lyomuhoko.” Aso kwa geve umbangi womoMatjangwa asi Uhompa woUmesiyasa kwa u hampurukire mo-1914, pokusikisa mo uporofete womukadi ogu ga hampurukire va tumbura mEhororo egaununo 12. * Sirongwa kwa likidire hena asi mahepeko nomaudigu aga ga wizilire vantu vaJehova nomvhura dina doyita kwa likidire asi Satana vana mu zuguma mo meguru ntani ana kara “nehandu lyenene, morwa ana diva asi siruwo sendi esi sina hupu ko, sisupi!”—Ehor. 12:12.

8, 9. (a) Ngapi mulyo goUhompa waKarunga va ya gu nkondopekere? (b) Mapuro musinke natu ka konakona?

⁸ Ngapi omu wa kara Uhompa nomulyo? Mo-1928, sifo soRuhungu kwa nkondopekere unene asi Uhompa mulyo unene kupitakana ezoworo lyetu kupitira mosizoweseso. Yosili, kupitira moUhompa woUmesiyasa, Jehova nga ka pongora  edina lyendi nokukahungameka upangeli wendi ntani kukasikisa mo sitambo sendi kovantu.

⁹ Wolye ngava ka pangera naKristusa moUhompa owo? Wolye ngau ka pangera Uhompa? Ntani sirugana musinke va hepa kurugana vasikuli vaKristusa?

10. Yisinke va ya kwete egano vantu vaKarunga kuhamena 144 000?

¹⁰ Nomvhura dononzi komeho zo-1914, Vakriste wousili kwa kwete egano asi vasikuli vaKristusa wovalimburukwi 144 000 ngava ka pangera nendi meguru. * Valirongi woBibeli va dimbwililire hena asi sivaro oso kwa tamekere kusipongaika posiruwo sovapositoli.

11. Yisinke va ya kwete egano ava ngava ka pangera naKristusa kuhamena sirugana sawo sepevhu?

¹¹ Sirugana musinke va va pere owo ngava ka pangera naKristusa siruwo esi va kere pevhu? Awo kwa dimbwililire asi Jesus kwa nkondopekere sirugana sokuzuvhisa esi ga kwatakanesere nosiruwo somuzangu. (Mat. 9:37; Joh. 4:35) Egaununo 2 kwa likida asi pomuhowo awo kwa gazarere asi muzangu ngagu gusa nomvhura 40 gu ka hage pepongaiko lyovagwavekwa ava ngava za meguru. Nye morwa sirugana kwa twikilire kupitakana nomvhura 40, pwa hepere marunduruko mekwatogano lyawo. Ngesi tuna diva asi muzangu kwa tamekere mo-1914. Aso kwa kere siruwo sokuhangura yilya nomau, kutanta asi kuhangura Vakriste wovagwavekwa wovalimburukwi koVakriste woyimpempa. Siruwo sa sikire mo sokudemenena kokupongaika sivaro esi sa hupire ko sava ngava za meguru.

12, 13. Ngapi sifanekeso saJesus sovakadona murongo nesi soyimaliwa sa sika mo pomazuva gopouhura?

¹² Kutundilira mo-1919, Kristusa kwa twikira kupitisira mukareli gokulimburukwa gonondunge a nkondopeke sirugana sokuzuvhisa. Jesus kwa geve sirugana oso posiruwo sovapositoli. (Mat. 28:19, 20) Ga likidire hena yikara eyi va hepa kukara nayo vasikuli vendi wovagwavekwa mokusisikisa mo. Monkedi musinke? Mosifanekeso sendi sovakadona murongo, age ga likidire asi vagwavekwa va  hepa kuvangarara nsene vana hara ngava ka sike kositambo sawo sokukara posipito sosinene sononkwara meguru, apa Kristusa nga ka lipakerera ‘nomufuko’ gwendi ndi vantu 144 000. (Ehor. 21:2) Ano mosifanekeso sendi soyimaliwa, Jesus kwa rongere asi vakareli vendi wovagwavekwa ngava litura mo unene mosirugana sokuzuvhisa esi ga va pa.—Mat. 25:1-30.

¹³ Mwa za nomvhura, vagwavekwa kwa vangarara nokulitura mo mosirugana sawo. Ngava ka va tungika morwa kuvangarara! Momuzangu gomunene kwa hamena mo tupu epongaiko lyovantu 144 000 ava ngava ka pangera naKristusa ndi?

14, 15. Nombunga musinke ne va zogera mobuke The Finished Mystery?

¹⁴ Vagara novakadi wovalimburukwi kwa here kudiva kuhamena “emukurumbunga” va tumbura mEhororo 7:9-14. Komeho Kristusa a ka horore emukurumbunga olyo, pwa kere magano gepuko kuhamena ava va hamena mo.

¹⁵ Mo-1917, buke The Finished Mystery, kwa tente asi “pwa kara nombunga mbali dava ngava ka parukira meguru ntani nombunga mbali dava ngava parukira pevhu.” Wolye va hamenene mo monombunga odo ne? Zokuhova, kwa kere vantu 144 000 ava ngava ka pangera naKristusa. Zauvali, kwa kere emukurumbunga. Awo kwa gazarere asi emukurumbunga kwa kere Vakriste ava va kere simpe monongereka doyimpempa. Vakriste owo va kere nepuro nye kapi lya gwanenene po va vhure kukara noulimburukwi. Yipo nye, awo ngano kwa gwene evango lyauvali meguru. Ano pevhu pwa kere mbunga zautatu, “zovantu vanare womulyo” ngwendi Abirahamu naMosesa navamwe awo ngano yiwo ngava pangera mbunga zaune zovantu womouzuni.

16. Yisinke va ya kwete egano momvhura 1923 ntani 1932?

¹⁶ Ngapi mpepo zokupongoka za pitisilire vasikuli vaKristusa va kwate egano usili ou tuna diva naina? Awo kwa ya kwete egano usili kanunu-kanunu kupitira moyirongwa yokulisiga-siga. Mo-1923, sifo soRuhungu kwa demenene kombunga ezi ngazi parukira pevhu mepangero lyaKristusa. Mo-1932, sifo soRuhungu, kwa zogerere kuhamena Jonadaba ogu ga likwatakanene nahompa Jehu goMuisraeli mokurwanesa po ukareli woyimpempa. (2 Vah. 10:15-17) Sirongwa kwa likidire asi pwa kara mbunga zovantu ngwendi Jonadaba ezi Jehova nga “parura poHarumagedoni” zi ka paruke pevhu.

17. (a) Yisinke va ya kwete egano mo-1935? (b) Ngapi Vakriste wousili lya va kundamene ekwatogano lyepe kuhamena emukurumbunga? (Tara kakende “ Rufuwo rorunene.”)

¹⁷ Mo-1935 usili yipo wa ya pwege. Posigongi sa kere moWashington, D.C., emukurumbunga kwa ya li dimbwilire asi mbunga zepevhu, ngwendi nonzwi domosifanekeso  saJesus sononzwi noyikombo. (Mat. 25:33-40) Emukurumbunga kuna kara ‘nonzwi dapeke’ edi ga uyungire Jesus asi: “Nado na hepa kudipitira komeho.” (Joh. 10:16) Muuyungi J. F. Rutherford kwa uyungire asi: “Namuvenye mwa kara nehuguvaro lyokukaparuka narunye pevhu, katukeni!” Sinzi sovakalimo kwa katukire. Makura ta tanta asi: “Tareni! Emukurumbunga!” Wovanzi kwa va gumine komutjima pokukwata egano ehuguvaro lyawo lyokomeho.

18. Kosinke vasikuli vaKristusa va demenenene, ntani noyitundwamo musinke?

¹⁸ Kutunda pena, Kristusa kwa pitisira vantu vendi va demenene kokupongaika emukurumbunga eli ngali ka pita moudigu wounene nokukaparuka. Pomuhowo kwa gazarere asi kapi ngayi tompoka kupongaika emukurumbunga. Munazinyetu Rutherford kwa tente asi: “Kuna kumoneka asi ‘emukurumbunga’ kapi ngali kara mbunga zonene.” Nye twa yi diva omu Jehova ga tungika muzangu! Mepitisiro lyaJesus nompepo zokupongoka, vagwavekwa novakwaawo ‘nonzwi dapeke’ awo kuna kara “siunda simwe tupu nomusita gumwe tupu” ngwendi moomu ga yi pumbire Jesus.

19. Ngapi natu lihameka mo mokupongaika emukurumbunga?

¹⁹ Sinzi sovantu wovalimburukwi ngava paruka narunye pevhu moparadisa, mepangero lyaKristusa novantu 144 000. Ayo kuhafesa pokugazadara ko omu Kristusa ga pitisira vantu vaKarunga va kwate egano ehuguvaro lyokomeho lyomoMatjangwa. Ee, mfumwa musi twa kara nazo zokutantera ko vantu ehuguvaro olyo! Tu litureni mo paapa twa hulira yipo emukurumbunga li twikire kuligwederera nokureta efumano kedina lyaJehova.—Resa Rukasa 10:2.

20. Yisinke ya hamena mo mombunga zaSatana, ntani ngapi wa hamena mo ulimburukwi woVakriste?

²⁰ Ngomu vantu vaKarunga va twikilire kulironga kuhamena Uhompa, va hepere hena kukwata egano eyi ya hamena mo kulimburukwa kepangero lyemeguru. Mo-1922, sifo soRuhungu kwa fatwilire asi pwa kara nombunga mbali, zaJehova nezi zaSatana, ano zaSatana kwa hamena mo unangesefa noukarelikarunga ntani upolitika. Ava ava limburukwa koUhompa waKarunga mepitisiro lyaKristusa kapisi va lihameke mwankenye ruha rombunga zaSatana. (2 Kol. 6:17) Yisinke yina kutanta oyo?

21. (a) Ngapi mukareli gokulimburukwa ga rondora vantu vaKarunga kuhamena unangesefa? (b) Mo-1963, yisinke sa horwere sifo soRuhungu kuhamena “Babironi zonene”?

²¹ Nondya dopampepo edi a gava nkenye apa mukareli gokulimburukwa kwa tura poruzera ufuki wounangesefa nokurondora vantu vaKarunga va dire kugwira mosiraha semona. (Mat. 6:24) Ntani hena yimbapiratjangwa yetu kwa twikira kutura poruzera ukarelikarunga woyimpempa. Mo-1963, sifo soRuhungu kwa fatwilire nawa asi “Babironi zonene” kwa fanekesa, kapisi nongereka doyimpempa delike, nye maukarelikarunga nagenye goyimpempa uzuni  mudima. MEgaununo 10 ngatu ka mona asi vantu vaKarunga mwankenye sirongo kwa va vatera va ‘pwage mo,’ pokulizeresa vene konongendeseso nadinye domaukarelikarunga goyimpempa.—Ehor. 18:2, 4.

22. Poyita yokuhova youzuni, ngapi vantu vaKarunga va kwete egano etumangedo lyomoVaroma 13:1?

²² Ngapi kuhamena ruha roupolitika rombunga zaSatana? Kuvhura Vakriste wousili va lihameke moyita nomalitatano gonomuhoko ndi? Poyita yokuhova youzuni, Valirongi woBibeli kwa kwete egano asi vasikuli vaKristusa nokudipaga si vantu. (Mat. 26:52) Nye wovanzi kwa kwete egano etumangedo lyomoVaroma 13:1 ‘lyokulimburukwa kepangero’ asi kuvhura kukara mukwayita nokudwara yidwara yovakwayita nokukara nouta, nye nsene tava ku tantere o roye gonkore to roya tupu meguru.

23, 24. Poyita yauvali youzuni, ngapi twa kwete egano Varoma 13:1, ntani ekwatogano musinke va ya kere nalyo vasikuli vaKristusa konyima zosiruwo?

²³ Apa ya tamekere yita yauvali youzuni mo-1939, sifo soRuhungu kwa fatwilire nawa-nawa asi Vakriste kapi tava lihameke moyita nomalitatano gonomuhoko domouzuni waSatana. Ago kwa kere mapukururo gomawa. Yipo nye vasikuli vaKristusa kapi va lihamekere metjisango lyohonde eli lya horokere moyita oyo. Mo-1929, yimbapiratjangwa yetu kwa fatwilire asi epangero eli va tumbura moVaroma 13:1 kapi lya tamba kepangero lyovantu nye kwaJehova naJesus. Nye simpe pwa hepere marunduruko mekwatogano olyo.

 ²⁴ Mo-1962, mpepo zokupongoka kwa pitisilire vasikuli vaKristusa va kare nekwatogano lyepe. Mosifo soRuhungu 15 Mangundu ntani 1 Sindimba kwa fatwilire etjangwa lyoVaroma 13:1-7. Vantu vaKarunga kwa ya kwete egano ulimburukwi ou ga tumbwire Jesus mononkango dendi edi asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.” (Ruk. 20:25) Vakriste wousili ngesi va kwata egano asi epangero va tumbura moVaroma kwa tamba kepangero lyovantu eli Vakriste va hepa kulimburukwa. Nye ulimburukwi ou kwa u yereka. Nsene mapangero ga tu tantera tu dire kulimburukwa Jehova Karunga, ose kulimburura ngwendi vapositoli asi: “Ose twa hepa po kulimburukwa unene Karunga, kupitakana vantu.” (Yirug. 5:29) MEgaununo 13 ntani 14, ngatu ka lironga yoyinzi kuhamena omu vantu vaKarunga va tura pasirugana nompango odo.

25. Morwasinke o haferere epitisiro lyompepo zokupongoka mokukwata egano Uhompa waKarunga?

²⁵ Gazadara ko kuhamena nayinye vasikuli vaKristusa va va ronga kuhamena Uhompa monomvhura efere da ka pita. Tuna lirongo siruwo esi va tulisire po Uhompa waKarunga ntani omu wa kara nomulyo. Ose twa kwata egano kuhamena mahuguvaro gavali va kara nago vantu wovalimburukwi, lyemeguru neli lyepevhu. Ntani twa kwata egano omu natu likida ulimburukwi wetu koUhompa waKarunga ntani komapangero govantu. Lipura asi: ‘Ngano Jesus Kristusa kapi ga pitisilire mukareli gwendi gokulimburukwa pevhu a kwate egano nokuronga mausili ogo, ngano name na ga diva ndi?’ Ee, uwa musi wokutupitisira Kristusa nompepo zokupongoka!