1, 2. Bõe la a Zezi maan tɩ wilg t’a yaa sor-wilgd sẽn tar yam?

MAMS-Y wa yãmb ne neb sẽn tũ taab n na n tɩ bãng tẽnga, tẽn-neere. La y sẽn zɩ n kẽng be wã yĩnga, y sẽn ta wã, y baoo ned sẽn mi tẽngã sõma, t’a na n lʋɩ taoor n wilg-y tẽngã. Yãmb ne y tũud-n-taasã ra zoe n wʋmame tɩ b gom zĩis kẽer yelle, tɩ y rat ne y sũy fãa n yã. La y sã n sok sẽn yãagd-a yãmbã, a pa yãgd n leok ye. A wat n baoo wakat sẽn zems n leoke. Naoor wʋsg menga, a basdame tɩ y sã n wa tool n ne zĩigã, bɩ a yaool n togs-yã. Tarẽ-n-tarẽ, y bãngame t’a tara yam, bala a gũuda wakat sẽn zemse, n yaool n togs yãmb bũmb nins sẽn yaa tɩlae tɩ y bãngã.

² Kiris-neb hakɩkã wõnda neb sẽn kẽng n na n tɩ bãng tẽnga. Sɩd me, d yãgdame n dat n bãng bũmb wʋsg Wẽnnaam Rĩungã zugu, Rĩung ning Biiblã sẽn boond tɩ “tẽng sẽn tar yẽbgr sõma” wã. (Heb. 11:10) A Zezi sẽn da be tẽngã zugã, a lʋɩɩ taoore, n wilg a karen-biisã bũmb wʋsg Rĩungã zugu. La rẽ yĩnga, yaa zĩig pʋgẽ la a leok b sogsgã, la a togs-b bũmba fãa Rĩungã zug bɩ? Ayo. A pʋd n yeel-b-la woto: “Mam ket n tara bũmb wʋsg n dat n togs yãmba, la yãmb ka tõe n deeg bãmb masã ye.” (Zã 16:12) A Zezi sẽn yaa sor-wilgd sẽn tar yam n yɩɩd ninsaalbã, a pa togs a karen-biisã bũmba fãa, bala a ra miime tɩ b nan pa tõe n wʋm b võor ye.

3, 4. a) Wãn to la a Zezi maan n kell n sõng sẽn sakd-b yẽ wã tɩ b bãng bũmb wʋsg Rĩungã zugu? b) Bõe yell la d na n gom sag-kãngã pʋgẽ?

³ Yɩɩ yʋng ning b sẽn yõk a Zezi wã la a togs goam nins sẽn be Zã 16:12 wã. A kũumã poore, wãn to la a ra na n maane, n kell n sõng sẽn sakd-b yẽ wã tɩ b bãng bũmb kẽer Wẽnnaam Rĩungã zugu? A yeela a tʋm-tʋmdbã woto: “Sɩd sɩɩgã . . . na yãag yãmb sɩdã fãa pʋgẽ.” * (Zã 16:13) D tõe n yeelame tɩ vʋʋsem sõngã yaa wa yãagda, sẽn maagd a yĩng n wilgd tõnd sore. Sɩd me, a Zezi sã n mik tɩ yaa tɩlae t’a nebã bãng bũmb kẽer Wẽnnaam Rĩungã zugu, a tũnugda ne vʋʋsem sõngã n sõng-b tɩ b bãng rẽ, wakat sẽn zemse.

 ⁴ Bɩ d ges a Zeova vʋʋsem sõngã sẽn sõng kiris-neb hakɩkã to-to, tɩ b bãng bũmb wʋsg Rĩungã zugu. Pipi, d na n yãa d sẽn maan to-to n bãng Wẽnnaam Rĩungã sẽn lugl wakat ninga. Rẽ poore, d na n bao n bãnga Rĩungã nanambsã sẽn yaa-b rãmba, bark nins b sẽn na n paame, b sẽn na n dɩ naam neb nins zutã, la nin-kãens me sẽn na n paam bark ninsã. Sẽn na n baase, d na n yãa kiris-nebã sẽn tõe n maan n wilg tɩ b teenda Rĩungã.

5, 6. a) Rĩungã luglgã la tigsgã wɛɛngẽ, bõe la Biiblã Zãmsdbã ra tẽeda, tɩ pa zemse? b) Bõe yĩng tɩ b sẽn tudgã pa tog n kɩt tɩ d tags t’a Zezi ra pa wilgd-b sore?

⁵ Wa d sẽn yã sak a 2 pʋgẽ wã, Biiblã Zãmsdbã ra togsa hal daar zãr tɩ bãngr-gomd n da na n pids yʋʋmd 1914. La b ra tẽedame tɩ “Kiristã waoongã wakat” sɩnga yʋʋmd 1874, t’a sɩnga a naamã rɩɩb saasẽ yʋʋmd 1878, la tɩ yɩɩ yʋʋmd 1914 zĩ-likr kiuugã la Rĩmã reeg naamã n sa. B ra yetame tɩ tigsgã wakat na n sɩnga yʋʋmd 1874 n tãag yʋʋmd 1914, la tɩ tigsgã na n baasa ne sẽn paam-b vʋʋsem sõngã zaeebã saasẽ loogrã. B sɩd ra tudgame. La rat n yeelame t’a Zezi ra pa wilgd Biiblã Zãmsdbã sor ne vʋʋsem sõngã maasem bɩ? Pa woto ye!

⁶ D tẽeg makrã d sẽn dɩk sɩngrẽ wã. Rẽ yĩnga, nebã sẽn da sokd sogsg la b yãgd n dat n bãng bũmb kẽerã, wilgdame tɩ b ra pa kɩs ned ning sẽn da yãagd bãmbã sɩd bɩ? Ayo! Woto me, Wẽnnaam nin-buiidã mi n dat n wʋma yɛl kẽer võor n tõog n bãng a Zeova raabã, tɩ wakat ning vʋʋsem sõngã sẽn na n sõng-b tɩ b bãng rẽ wã nan pa ta ye. Baa ne rẽ, yaa vẽeneg t’a Zezi wilgd-b-la sore. Dẽnd wẽn-sakdbã ra ratame tɩ b sõng-b tɩ b rems yɛl kẽere. Sɩd me, b sika b mens n tũ.—Zak 4:6.

7. Bõe la Wẽnnaam vẽneg a nin-buiidã tɩ b bãnge?

⁷ Yʋʋmd 1919 wã poore, Wẽnnaam nin-buiidã paama vẽnegr n paase. (Karm-y Yɩɩl Sõamyã 97:11.) Yʋʋmd 1925 Gũusg Gasg a ye sõsg gom-zug n da yet tɩ “Buudã sɩngre.” Sõsgã pʋgẽ, b sõdga vɛrse rãmb n wilg tɩ Wẽnnaam lugla Rĩungã yʋʋmd 1914, tɩ pidsd gomd Biiblã sẽn deng n togs tɩ be Wilgr sak 12 wã pʋgẽ. Be b gomda pag sẽn dog bi-ribl yelle. * B paasame t’a Zeova nin-buiidã sẽn paam namsg ning zabrã sasa wã wilgda vẽeneg tɩ b sɩd riga Sʋɩtãanã t’a sig tẽngã zugu, la t’a “sũ-puugrã yaa kãsenga, a sẽn bãng t’a wakat yaa bilfã yĩnga.”—Wil. 12:12.

8, 9. a) Bõe la b yeel Gũusg Gasgã pʋgẽ yʋʋmd 1928? b) Sogs-bʋs la d na n leoke?

⁸ Rĩungã luglgã yõod yaa bõe? Yʋʋmd 1928 wã, b sɩngame n wilgd Gũusg Gasgã pʋgẽ tɩ Rĩungã luglgã tara yõod n yɩɩd ninsaalbã sẽn na n paam fãagr rondã maasem yĩnga. Sɩd me, yaa ne Mesi wã Rĩungã maasem la a Zeova na n kɩt t’a yʋʋrã paam waoogre, n wilg tɩ yẽ n sɩd segd n  yɩ yĩngr la tẽng naaba, la a pids a sẽn pʋlem ninsaalbã bũmb ninsã.

⁹ Ãnd dãmb n na n dɩ naam ne Kiristã? B na n dɩɩ naamã ãnd dãmb zugu? La tʋʋm-bʋg la kiris-nebã tog n tʋme?

10. Bõe la Wẽnnaam nin-buiidã ra zoe n mi neb 144000 zugu?

¹⁰ Yʋʋm wʋsg sẽn deng 1914, kiris-neb hakɩkã ra zoe n bãngame tɩ neb 144000 n na n tɩ rɩ naam saasẽ ne Kiristã. * Biiblã Zãmsdbã bãngame tɩ yaa neb b sẽn tũus ninsaalbã sʋka, la tɩ b yãkrã sɩnga pipi kiris-nebã wakate.

11. Kiristã pʋg-paalã maana wãn n bãng a sẽn tog n tʋm tʋʋmd ning b sẽn da bobl-a wã sõma?

¹¹ B boonda nin-kãensã fãa sẽn naag taab tɩ Kiristã pʋg-paala. La b kẽer sẽn ket tẽngã zugã, b tʋʋmd yaa bõe? B bãngame t’a Zezi goamã ra wilgdame tɩ koɛɛgã mooneg tara yõod wʋsgo, la tɩ tigsgã wakate, b na n moona koɛɛgã wʋsgo. (Mat. 9:37; Zã 4:35) D yãa sak a 2 wã pʋgẽ tɩ b ra tẽedame tɩ tigsgã na n kaoosa yʋʋm 40, la tɩ na n baasa ne sẽn paam-b vʋʋsem sõng zaeebã saasẽ loogrã. La yʋʋm 40 loogame tɩ b ket n moond koɛɛgã. Dẽnd ra yaa tɩlae tɩ b paam vẽenem. Rũndã-rũndã, tõnd miime tɩ tigsgã wakatã, rat n yeel tɩ wakat ning b sẽn welg ki wã ne nadensã sɩnga yʋʋmd 1914. D miime me tɩ ki wã ne nadensã welgrã yaa kiris-neb nins sẽn paam zaeebã ne kiris-neb ne yʋʋrã welgre. Wakat ra taame tɩ b tog n bao Kirist na-rɩt-n-taasã sẽn ketã, tɩ neb 144000 sõor pidi.

12, 13. Wãn to la pʋg-sadb piigã yel-bũndã, la talã rãmbã yel-bũndã pidsd yaoolem dayã sasa?

¹² Yʋʋmd 1919 wã tɛka, Kiristã sõngda tʋm-tʋmd sẽn tũud sɩd la sẽn tar yamã t’a wɩngd ne koɛɛgã moonego. Yaa pipi kiris-nebã wakat la a bobl tʋm-tʋmdã tʋʋm-kãngã. (Mat. 28:19, 20) A leb n wilga zʋg-sõma sẽn na n sõng kiris-neb nins sẽn paam zaeebã tɩ b tõog tʋʋmdã a sẽn kõ-bã. Bala yel-bũnd ning a sẽn wẽ n gom pʋg-sadb piig yellã pʋgẽ, a wilgame tɩ sẽn na n paam-b zaeebã tog n yɩɩ gũusdba, la b tall b tẽebã kãn-kãe. Rẽ n da na n sõng-b tɩ b wa paam  n naag neb 144000 b sẽn boond tɩ Kirist “pʋg-paalã,” n maan sũ-noog saasẽ, pʋg-peegrã daare. (Wil. 21:2) Rẽ poore, talã rãmbã yel-bũndã pʋgẽ, a wilgame tɩ sẽn na n paam-b zaeebã tog n wɩnga ne tʋʋmd ning a sẽn na n bobl-bã, sẽn yaa koɛɛgã moonegã.—Mat. 25:1-30.

¹³ Yʋʋm koabgã sẽn loogã, sẽn paam-b zaeebã sɩd wilgame tɩ b yaa gũusdb la neb sẽn tar yẽesem. Hakɩka, b na n paama keoore, b sẽn kell n yɩ gũusdbã! La tigsgã wakate, rẽ yĩnga yaa sẽn na n tɩ rɩ-b naam ne Kiristã, n yaool n ket tẽngã zugã bal la b na n tigim bɩ?

14, 15. Wilg-y sul nins yell “ Le mystère accompli ” sebrã sẽn gomã.

¹⁴ Rap la pagb sẽn yɩ wẽn-sakdb baoo ne b sũy fãa, n na n bãng “kʋʋng” ning yell b sẽn gom Wilgr 7:9-14 sẽn yaa-b rãmba. Nand tɩ Kiristã sõng-b tɩ b bãng rẽ, b sẽn da togs sɛbã pʋsẽ rẽ wɛɛngẽ wã yaa toor fasɩ ne tõnd sẽn mi rũndã wã. Masã, tõnd wʋmda a võorã nana tɩ yaa vẽeneg d yamẽ, tɩ noom-do.

¹⁵ Yʋʋmd 1917 wã, sebr ning gom-zug sẽn yɩ “ Le mystère accompli ” wã pʋgẽ, b ra yeelame tɩ “sẽn na n kẽng-b saasẽ wã yaa sul a yiibu, tɩ sẽn na n pa-b tẽngã zugã me yaa sul a yiibu.” Fãa yaa sul a naase. Pipi sullã yaa neb 144000 sẽn na n tɩ rɩ naam ne Kiristã. Yiib-n-soabã yaa kʋʋn-kãsengã neba. B yeela sebrã pʋgẽ tɩ kʋʋn-kãsengã yaa neb sẽn ket n kẽnd egiliiz rãmbẽ wã. B tara tẽebo, la pa sek b na lak b mens ne ziri tũudmã ye. B na n kẽnga saasẽ, la b pa na n paam ziir kãseng ye. Sull a tãab-n-soabã yaa neb sẽn na n zĩnd tẽngã zugu. Yaa pĩnd wẽndẽ wẽn-sakdba, wala a Abrahaam, a Moiiz la neb a taaba. B na n sooga neb a taabã, sẽn yaa sull a naas-n-soabã.

16. Bõe la kiris-nebã bãng yʋʋmd 1923 ne yʋʋmd 1932 wã?

¹⁶ Rũndã-rũndã, tõnd mii keoor ning wẽn-sakdbã sẽn na n paamã. La wãn to la vʋʋsem sõngã sõng kiris-nebã tɩ b bãng rẽ? Yɩɩ bilf-bilf la Wẽnnaam vẽneg-ba. Wala makre, hal yʋʋmd 1923 wã, Gũusg Gasgã goma neb sẽn pa saagd tɩ b na n tɩ vɩɩmda saasẽ, n yeel tɩ b na n zĩnda tẽngã zug Kiristã naam sasa. Yʋʋmd 1932 wã, Gũusg Gasgã goma a Zonadaab yelle, n wilg a sẽn sõng Israyɛll rĩm a Zehu Wẽnnaam sẽn zaeyã, tɩ b sãam ziri tũudmã. (2 Rĩm 10:15-17) Sebrã pʋgẽ, b yeelame tɩ neb sull n be rũndã-rũndã n wõnd a Zonadaab. B paasame t’a Zeova na n kɩtame tɩ nin-kãens “põs Armagedõ,” n paam n vɩɩmd tẽngã zugu.

17. a) Yʋʋmd 1935 wã, Wẽnnaam vẽnega a nin-buiidã tɩ b bãng bõe? b) Kiris-neb hakɩkã manesem yɩɩ wãna, b sẽn bãng kʋʋn-kãsengã sẽn yaa-b rãmbã? (Ges-y zĩ-gũbrã sẽn yet tɩ “ D sũy yɩɩ noog wʋsgo.”)

¹⁷ Yʋʋmd 1935 wã, Wẽnnaam nin-buiidã paama vẽenem sõma. Tigis-kãsengã sẽn zĩnd Wasĩnton D.C. wã sasa, b wilgame tɩ kʋʋn-kãsengã yaa neb sẽn na n zĩnd tẽngã zugu,  la t’a Zezi sẽn wẽ yel-bũnd n gom piis ne bʋʋs yellã, yaa bãmb la a sẽn bool tɩ piisã. (Mat. 25:33-40) Kʋʋn-kãsengã naaga ‘piis a taabã,’ piis nins yell a Zezi sẽn gom n yeel tɩ ‘yaa tɩlae tɩ yẽ wa ne bãmbã.’ (Zã 10:16) Saam-biig a Rutherford sõsgã sasa, a yeelame: “Bɩ neb nins sẽn saagd n na n wa vɩɩmd tẽngã zug wakat sẽn kõn sa wã yik n yalse.” Sẽn yɩɩd kɛlgdbã pʋɩ-sʋk yikame. A yeelame: “Ges-y-yã! Ad kʋʋn-kãsengã.” Neb wʋsg sẽn bãng tɩ b na n vɩɩmda tẽngã zugã, sɩd yɩ-b-la noog hal kẽengo.

18. Yʋʋmd 1935 wã tɛka, kiris-nebã wɩnga ne bõe maanego, la tʋʋmdã biis yaa bõe?

¹⁸ Rẽ tɛka, Kiristã sõngda a nin-buiidã tɩ b wɩngd n tigimd kʋʋn-kãsengã sẽn na n wa põs to-kãsengã. Sɩngrẽ wã, ra wõnda b sõorã pa na n yɩ wʋsg ye. Saam-biig a Rutherford meng wa n yeelame yaa: “Ne wa ‘kʋʋn-kãsengã’ pa na n tolg n yɩ kãseng ye.” La d neeme tɩ hal n tãag masã, a Zeova sɩd ninga tigisgã barka. Ne a Zezi sõngre, la ne vʋʋsem sõngã sor-wilgri, sẽn paam-b zaeebã ne piis a taabã sẽn yaa b tʋmd-n-taasã sɩd lebga “yãgr a yembre,” n tar “pe-kɩɩm a yembre,” wa a Zezi meng sẽn da reng n togsã.

19. Bõe la d tõe n maan n sõng tɩ kʋʋn-kãsengã fɩɩgd n paasdẽ?

¹⁹ Wẽn-sakdbã fãa la bal na n vɩɩmda wakat sẽn kõn sa, arzãnã pʋgẽ tẽngã zugu, tɩ Kiristã ne a na-rɩt-n-taas 144000 rɩ naam b zugu. Rẽ yĩnga, a Zezi sẽn maan to-to n sõng Wẽnnaam nin-buiidã tɩ b bãng b vɩɩmã sẽn na n yɩ to-to beoog-daarã pa noom-d sɩda? D sẽn moond koɛɛgã, n sõngd nebã tɩ b bãngd tɩ b tõe n wa paam n vɩɩmda wakat sẽn kõn sa tẽngã zugã sɩd yaa zu-zẽkre. Bɩ d maan d sẽn tõe fãa n moon koɛɛgã ne yẽesem, tɩ kʋʋn-kãsengã sõor paasd wakat fãa, t’a Zeova yʋʋrã kell n paam pẽgre.—Karm-y Luk 10:2.

20. Sõdg-y bũmb nins sẽn lagem taab n yaa a Sʋɩtãan siglgã? La kiris-nebã manesem tog n yɩɩ wãn ne a Sʋɩtãan siglgã?

²⁰ Bilf-bilfu, Wẽnnaam nin-buiidã bãnga bũmb wʋsg Rĩungã zugu. La ra yaa tɩlae me tɩ b bãng Rĩungã sẽn yaa saasẽ goosneemã teelg sẽn dat n yɛɛlga. Rẽ wɛɛngẽ, yʋʋmd 1922 wã, b wilga Gũusg Gasgã pʋgẽ t’a Zeova tara siglga, t’a Sʋɩtãan me tar siglga. A Sʋɩtãan siglgã yaa ziri tũudmã ne politikã la leebgã siglsã sẽn naag taaba. Neb nins sẽn be Wẽnnaam Rĩungã poorẽ wã pa tog n teel a Sʋɩtãan siglgã baa yaa bilf ye. (2 Kor. 6:17) Woto rat n yeelame tɩ bõe?

21. a) Leebgã wɛɛngẽ, sagl-bʋg la tʋm-tʋmd sẽn tũud sɩdã kõ Wẽnnaam nin-buiidã? b) Yʋʋmd 1963 wã, bõe la Gũusg Gasgã yeel “Babilon-kãsengã” zugu?

²¹ Tʋm-tʋmd sẽn tũud sɩdã sẽn yiisd sɛb ninsã nong n gomda zãmbã sẽn be leebgã pʋgẽ wã yelle, n keoogd Wẽnnaam nin-buiidã tɩ b ra nong laogã ye. (Mat. 6:24) Tõnd sɛbã pʋsẽ, d mi n puka ziri tũudmã bãongo. Hal yʋʋmd 1963 wã, b wilga Gũusg Gasgã pʋgẽ vẽeneg tɩ “Babilon-kãsengã” pa kiris-neb ne yʋʋrã bal ye. Yaa dũniyã  gill ziri tũudmã fãa sẽn naag taaba. D na n yãa sak 10 pʋgẽ tɩ Wẽnnaam nin-buiidã sẽn be tẽns toɛy-toɛyã paama sõngre, n yi n bas Babilon-kãsengã, n lak b mens ne ziri tũudmã.—Wil. 18:2, 4.

22. Dũni gill pipi zabrã sasa, kiris-neb wʋsg ra tagsdame tɩ sak nanambsã rat n yeelame tɩ bõe?

²² La politikã yẽ? Tẽns sã n zabd taaba, kiris-neb hakɩkã tõe n kẽesa b toog bɩ? Dũni gill pipi zabrã sasa, Biiblã Zãmsdbã bãngame tɩ kiris-nebã pa tog n naag n kʋ neb ye. (Mat. 26:52) La bãmb wʋsg ra tagsdame tɩ b sẽn yeel Rom dãmb 13:1 tɩ b sak ‘nanambsã noyã,’ rat n yeelame tɩ b tõe n lebga sodaase, n yeelg soda-fut la b bob zab-teed menga. La b sã n wa rat tɩ b kʋ bɛɛba, b tog n tãoo vɩʋʋgẽ.

23, 24. Dũni gill zabr a yiib-n-soabã sasa, Wẽnnaam nin-buiidã ra tẽedame tɩ Rom dãmb 13:1 goamã võor yaa bõe, la b vẽneg-b lame tɩ b bãng bõe?

²³ Dũni gill zabr a yiib-n-soabã sẽn wa n sɩng yʋʋmd 1939 wã, Gũusg Gasgã pʋgẽ, b maneg n goma kiris-nebã sẽn pa tog n kẽes b toog dũniyã yɛlẽ wã. B wilga vẽeneg tɩ kiris-ned pa tog n kẽes a meng a Sʋɩtãan dũniyã zab pʋgẽ baa bilf ye. B sẽn paam saglgã wakat kãngã sɩd zemsame! Rẽ kɩtame tɩ kiris-nebã pa tall zɩɩm samd yel-beedã pʋgẽ wa neb a taabã ye. Sẽn sɩng yʋʋmd 1929 wã, d ra yeta d sɛbã pʋsẽ tɩ Rom dãmb 13:1 wã sẽn gomd nanambs nins yellã pa dũniyã nanambse, yaa a Zeova ne a Zezi. Ra yaa tɩlae tɩ d rems rẽ.

 ²⁴ Ne vʋʋsem sõngã maasem, yʋʋmd 1962 wã, kiris-nebã bãngame tɩ b ra pa wʋmd Rom dãmb 13:1-7 wã võor sõma, tɩ b maneg n bao a võore. Sɩd me, sɩpaolg kiuug rasem 15 ne yʋʋm-sar kiuug pipi daarã Gũusg Gasgã goma rẽ yell sõma. Wẽnnaam nin-buiidã wa n wʋma a Zezi sẽn yeel bũmb ning nanambsã sakr wɛɛngẽ wã võor sõma. A Zezi ra yeela woto: “Bɩ y kõ a Sezaar bũmb nins sẽn yaa a Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.” (Luk 20:25) Kiris-neb hakɩkã bãngame masã tɩ nanambsã yaa dũniyã nanambse, la tɩ kiris-nebã tog n sak-b lame. La pa wakat fãa la d tog n sak-b ye. B sã n wa rat tɩ d maan bũmb sẽn kɩɩsd Wẽnnaam a Zeova noyã, d leokda wa tʋm-tʋmdbã sẽn da yeelã. B yeela woto: “A zemsame tɩ tõnd sak Wẽnnaam n yɩɩd nebã.” (Tʋʋ. 5:29) Seb-kãngã sak 14 pʋgẽ, d na n bãnga Wẽnnaam nin-buiidã sẽn maan to-to n wilg tɩ b pa sakd n kẽes b toog dũniyã yɛlẽ ye.

25. Bõe yĩng tɩ vʋʋsem sõngã sẽn vẽneg tõnd tɩ d bãng bũmb wʋsg Wẽnnaam Rĩungã zugã noom-yã?

²⁵ Tags-y n ges-y kiris-nebã sẽn paam n bãng bũmb nins fãa Rĩungã zug yʋʋm koabgã sẽn loogã! D bãnga sẽn yaa wakat ning la Wẽnnaam lugl a Rĩungã saasẽ, la Rĩungã luglg yõodo. D bãnga vẽeneg me tɩ wẽn-sakdbã sʋka, kẽer na n kẽnga saasẽ, tɩ sãnda vɩɩmd tẽngã zugu. D leb n bãnga d sẽn segd n maan n wilg tɩ baa d sẽn sakd dũniyã nanambsã, yaa Wẽnnaam Rĩungã la d teend n yɩɩda. Bɩ d sok d mens woto: ‘A Zezi sã n da pa vẽneg tʋm-tʋmd sẽn tũud sɩdã tɩ b bãng bõn-kãensã la b sõng neb a taabã me tɩ b bãnge, rẽ yĩnga, m da na n wʋma woto võor sɩda?’ Ad d sẽn paam tɩ Kiristã ne vʋʋsem sõngã vẽnegd tõndã sɩd yaa bark tɛkẽ!