1, 2. Ke ka kgopolo efe Jesu e bilego mohlahli yo bohlale?

ANKE o akanye ka mohlahli yo a bontšhago batho naga le yo a nago le phihlelo a go bontšha motse o mobotse le woo o kgahlišago kudu. Wena le batho bao o sepelago le bona ke la mathomo le etela motseng wo, ka gona le theetša se sengwe le se sengwe seo mohlahli yo a le botšago sona. Ka dinako tše dingwe, wena le batho bao o sepelago le bona le ipotšiša ka go fagahla mabapi le tše dingwe tša dilo tšeo di lego motseng woo tšeo le se la hlwago le di bona. Lega go le bjalo, ge le botšiša mohlahli yo ka dilo tšeo, ga a le botše selo go fihlela ka nako ya maleba, gantši o le botša ge selo seo se thoma go tšwelela. Ge nako e dutše e eya, le thoma go kgahlišwa kudu ke bohlale bja gagwe, ka gobane o le botša selo seo le nyakago go se tseba ka nako ya maleba.

² Bakriste ba therešo ba boemong bjo bo swanago le bja batho bao ba bogago motse. Le rena re ithuta ka go fagahla ka motse wo o kgahlišago go feta metse e mengwe ka moka, “motse wo o nago le metheo ya kgonthe,” e lego Mmušo wa Modimo. (Baheb. 11:10) Ge Jesu a be a le mo lefaseng, o ile a hlahla balatedi ba gagwe, a ba ruta ka mo go tseneletšego ka Mmušo woo. Na o ile a araba dipotšišo tša bona ka moka le go ba botša dilo ka moka mabapi le Mmušo woo ka nako e tee? Aowa. O itše: “Ke sa na le dilo tše dintši tšeo nka le botšago tšona, eupša ga le kgone go di rwala ga bjale.” (Joh. 16:12) Ka ge Jesu e le mohlahli yo bohlalehlale, le ka mohla ga se a ka a imetša barutiwa ba gagwe ka dilo tšeo ka nako yeo ba bego ba ka se di kwešiše.

3, 4. (a) Jesu o tšwetše pele bjang go ruta batho bao ba botegago ka Mmušo wa Modimo? (b) Re tlo ahlaahla’ng kgaolong ye?

³ Jesu o boletše mantšu ao a begilwego go Johane 16:12 bošegong bja mafelelo bja bophelo bja gagwe mo lefaseng. O be a tla tšwela pele bjang a ruta batho bao ba botegago ka Mmušo wa Modimo ka morago ga lehu la gagwe? O ile a kgonthišetša baapostola ba gagwe gore: “Moya wa therešo, o tla le hlahla therešong ka moka.” * (Joh. 16:13) Re ka nagana ka moya o mokgethwa e le mohlahli yo a sa felego pelo. Jesu o diriša moya wo go ruta batho ba gagwe selo le ge e le sefe seo ba swanetšego go se tseba ka Mmušo wa Modimo—le gona o dira seo ka nako ya maleba.

⁴ Anke re ahlaahleng kamoo moya o mokgethwa wa Jehofa o bego o dutše o hlahla Bakriste ba botegago gore ba be le tsebo e  oketšegilego ka Mmušo woo. Sa pele, re tlo ahlaahla kamoo re tsebilego ka gona ngwaga woo Mmušo wa Modimo o thomilego go buša ka wona. Ke moka re bolele ka bao e tlago go ba babuši Mmušong wo le balata ba wona gotee le dikholofelo tša bona. Sa mafelelo, re tlo bona kamoo balatedi ba Kriste ba bilego le kwešišo e kwagalago gabotse mabapi le seo go botegela Mmušo wo go se bolelago.

5, 6. (a) Barutwana ba Beibele ba be ba na le dikgopolo dife tše di fošagetšego mabapi le go hlongwa ga Mmušo wa Modimo le ka puno? (b) Ke ka baka la’ng dikgopolo tše bjalo tše di fošagetšego di sa swanela go re dira gore re belaele ge e ba Jesu a be a hlahla balatedi ba gagwe?

⁵ Go etša ge re bone go Kgaolo 2 ka pukung ye, Barutwana ba Beibele ba feditše nywagasome ba bolela gore 1914 e tla ba ngwaga wa bohlokwa kudu go phethagatšeng boporofeta bja Beibele. Lega go le bjalo, ka nako yeo ba be ba dumela gore go ba gona ga Kriste go thomile ka 1874, gore o thomile go buša legodimong ka 1878 le gore Mmušo wa Modimo o be o ka se buše ka mo go feletšego go fihlela ka October 1914. Ba be ba dumela le gore puno e be e tla thoma ka 1874 go fihla ka 1914 gomme ya fela ge go kgobokeletšwa batlotšwa legodimong. Na dikgopolo tše bjalo ka tše tšeo di fošagetšego di dira gore re belaele ge e ba Jesu a be a hlahla batho ba bao ba botegago ka moya o mokgethwa?

⁶ Aowa! Nagana gape ka papišo yeo e lego mathomong a kgaolo ye. Na dikgopolo le dipotšišo tša go nyaka go tseba tša batho bao ba bogago motse di ka dira gore ba se bote mohlahli wa bona? Le gatee! Ka mo go swanago, gaešita le ge ka dinako tše dingwe batho ba Modimo ba leka go kwešiša dilo tše itšego mabapi le morero wa Jehofa pele e ka ba nako ya gore moya o mokgethwa o ba hlahle gore ba kwešiše ditherešo tšeo, go molaleng gore Jesu o a ba hlahla. Ka go re’alo, babotegi bao ba amogela go phošollwa, gomme ka boikokobetšo ba lokiša dikgopolo tša bona.—Jak. 4:6.

7. Batho ba Modimo ba ile ba šegofatšwa ka go hlabišetšwa seetša sefe sa moya?

⁷ Nywageng yeo e latetšego 1919, batho ba Modimo ba ile ba šegofatšwa ka go hlabišetšwa seetša se se oketšegilego sa moya. (Bala Psalme 97:11.) Ka 1925, go ile gwa gatišwa sehlogo sa bohlokwa ka go Morokami, seo se rego: “Go Tswalwa ga Setšhaba.” Se ile sa ahlaahla bohlatse bjo bo kgodišago bja Mangwalo bja gore Mmušo wa Mesia o tswetšwe legodimong ka 1914, e le go phethagatša seswantšho sa boporofeta bjo bo begilwego go Kutollo kgaolo 12 sa mabapi le mosadi wa Modimo wa legodimong a belega. * Sehlogo seo se tšwetše pele go bontšha gore tlaišo le mathata ao a ilego a wela batho ba Jehofa nywageng yeo ya ntwa e be e le maswao ao a bonagalago gabotse a gore Sathane o rakilwe legodimong, “a galefile kudu, ka ge a tseba gore o na le nako e kopana.”—Kut. 12:12.

8, 9. (a) Bohlokwa bja Mmušo wa Modimo bo ile bja gatelelwa bjang? (b) Ke dipotšišo dife tšeo re tlago go di ahlaahla?

⁸ Mmušo woo o bohlokwa gakaaka’ng? Ka 1928, Morokami o ile wa thoma go gatelela gore Mmušo wo o bohlokwa go feta go phološwa ga batho ka topollo. Ke therešo gore Jehofa o tla diriša Mmušo wa Mesia go kgethagatša leina la gagwe, go godiša bogoši bja gagwe le go phethagatša merero ya gagwe ka moka ya mabapi le batho.

 ⁹ Ke bomang bao ba tlago go buša le Kriste Mmušong woo? Ke bomang e tlago go ba balata ba Mmušo woo mo lefaseng? Le gona ke modiro ofe woo balatedi ba Kriste ba swanetšego go swarega ka wona?

10. Ke’ng seo e lego kgale batho ba Modimo ba se kwešiša ka ba 144 000?

¹⁰ Nywagasomeng ya pele ga 1914, Bakriste ba therešo ba be ba šetše ba kwešiša gore balatedi ba botegago ba Kriste ba 144 000 ba tla buša le yena legodimong. * Barutwana bao ba Beibele ba ile ba lemoga gore palo yeo e be e le ya kgonthe le gore e thomile go kgoboketšwa morago kua lekgolong la pele la nywaga C.E.

11. Ke’ng seo bao e bego e tla ba ditho tša monyadiwa wa Kriste ba ilego ba thoma go se kwešiša ka kabelo ya bona ya mo lefaseng?

¹¹ Lega go le bjalo, bao e bego e tla ba ditho tša monyadiwa wa Kriste ba be ba neilwe modiro ofe ge ba sa le mo lefaseng? Ba ile ba lemoga gore Jesu o boletše kudu ka modiro wa boboledi le go o tswalanya le lebaka la puno. (Mat. 9:37; Joh. 4:35) Go etša ge re bone go Kgaolo 2, ka nakwana ba be ba nagana gore lebaka la puno le be le tla tšea nywaga e 40, gomme la fela ge go kgobokeletšwa batlotšwa legodimong. Lega go le bjalo, ka baka la ge modiro wa boboledi o ile wa tšwela pele ka morago ga ge nywaga yeo e 40 e fedile, go be go nyakega tlhaloso e oketšegilego. Ga bjale re a tseba gore lebaka la puno—nako ya go aroganya korong go mefoka, ke gore Bakriste ba botegago bao ba tloditšwego go Bakriste ba mankekišane—le thomile ka 1914. Go be go fihlile nako ya gore go kgoboketšwe palo e šetšego ya sehlopha sa bao ba yago legodimong.

12, 13. Seswantšho sa Jesu sa dikgarebe tše lesome le sa ditalente di phethagetše bjang mehleng ye ya bofelo?

¹² Go tloga ka 1919 go ya pele, Kriste o tšwetše pele go hlahla mohlanka yo a botegago le wa temogo go gatelela bohlokwa bja modiro wa boboledi. O boletše ka modiro wo lekgolong la pele la nywaga. (Mat. 28:19, 20) Le gona o boletše gore ke dika dife tšeo balatedi ba gagwe bao ba tloditšwego ba bego ba tla swanelwa ke go ba le tšona e le gore ba phethe modiro woo wa boboledi. O dirile seo bjang? Seswantšhong sa gagwe sa dikgarebe tše lesome, o bontšhitše gore batlotšwa ba be ba tla swanelwa ke go dula ba phakgame, ba phafogile moyeng, ge e ba ba be ba tla fihlelela pakane ya bona ya go ba karolo ya lenyalo le legolo la legodimong, ge Kriste a tla be a kopanywa le “monyadiwa” wa gagwe wa ditho  tše 144 000. (Kut. 21:2) Ke moka, seswantšhong sa gagwe sa ditalente, Jesu o rutile gore bahlanka ba gagwe bao ba tloditšwego ba tla phetha ka mafolofolo modiro wa boboledi wo a bego a ba neile wona.—Mat. 25:1-30.

¹³ Batlotšwa ba itlhatsetše ba phakgame e bile ba le mafolofolo nywageng e lekgolo e fetilego. Ruri ba tla putswa ka go dula ba phakgame! Lega go le bjalo, na modiro o mogolo wa puno e be e tla ba wa go kgoboketša feela babušigotee le Kriste ba 144 000?

14, 15. Ke dihlopha dife tše nne tšeo go boletšwego ka tšona ka pukung ya The Finished Mystery?

¹⁴ Ke kgale banna le basadi ba botegago ba nyaka go tseba ka “lešaba le legolo” (“lešaba le legologolo,” King James Version) leo go boletšwego ka lona go Kutollo 7:9-14. Ga go makatše gore pele ga ge go ka fihla nako ya Kriste ya go utolla gore sehlopha se se segolo ke bomang, dilo tše dintši tšeo di ilego tša bolelwa ka taba ye di be di le kgole le ditherešo tše bonolo le tše di kwagalago tšeo re di tsebago le go di rata lehono.

¹⁵ Ka 1917, puku ya The Finished Mystery e ile ya gatelela gore go na le “ditekanyo goba mehuta e mebedi ya phologo ya Legodimong, le ditekanyo goba mehuta e mebedi ya phologo ya lefaseng.” Ke bomang ba bego ba bopa dihlopha tšeo tše nne tša batho bao ba bego ba tlo phologa ka ditsela tše tše di sa swanego? Sehlopha sa pele e be e le sa ba 144 000, bao ba tlago go buša gotee le Kriste. Sehlopha sa bobedi e be e le sa lešaba le legologolo. Mehleng yeo, go be go naganwa gore sehlopha se e be e le sa batho bao ba ipitšago Bakriste bao ba bego ba sa dutše ba le dikerekeng tša Bojakane. Ba be ba na le tumelo eupša e se e lekanego go ba dira gore ba dule ba botega. Ka go re’alo, ba be ba tla newa maemo a tlasana legodimong. Mabapi le bao ba bego ba tla phologa mo lefaseng, go be go naganwa gore sehlopha sa boraro, e lego sa “batho bao ba hlomphegago ba kgale”—ba bjalo ka babotegi ba go swana le Aborahama, Moshe le ba bangwe—se be se tla laola sehlopha sa bone, e lego sa batho ka kakaretšo.

16. Ke seetša sefe sa moya seo se ilego sa hlaba ka 1923 le ka 1932?

¹⁶ Moya o mokgethwa o ile wa hlahla bjang balatedi ba Kriste gore ba be le kwešišo yeo re e thabelago lehono? O ile wa ba hlabišetša seetša sa moya ganyenyane-ganyenyane. Ga e sa le go tloga ka 1923, Morokami o ile wa bolela ka sehlopha sa batho bao ba sa yego legodimong seo se tlago go dula mo lefaseng ka tlase ga pušo ya Kriste. Ka 1932, Morokami o boletše ka Jonadaba (Jehonadaba), yo a ilego a sepela le Kgoši e tloditšwego ya Modimo ya Moisiraele e lego Jehu go mo thuša go fediša borapedi bja maaka. (2 Dikg. 10:15-17) Sehlogo seo se boletše gore mehleng yeno go na le sehlopha sa batho bao ba swanago le Jonadaba, sa oketša ka gore Jehofa o tla se “phološa masetlapelong a Haramagedone” gore se tlo phela mo lefaseng.

17. (a) Ka 1935, go ile gwa hlaba seetša sefe se segolo? (b) Bakriste ba botegago ba ile ba kgongwa bjang ke kwešišo e mpsha ya mabapi le lešaba le legologolo? (Bona lepokisi le le rego, “ Ba Ile ba Imologa Kudu.”)

¹⁷ Ka 1935, go ile gwa hlaba seetša se segolo sa moya. Kopanong yeo e bego e swaretšwe kua Washington, D.C., lešaba le legologolo le ile la tsebja e le sehlopha sa lefaseng, e le sehlopha sa dinku tšeo Jesu a boletšego ka tšona seswantšhong sa dinku le  dipudi. (Mat. 25:33-40) Lešaba le legologolo le be le tla ba gare ga “dinku tše dingwe,” tšeo Jesu a boletšego ka tšona gore: “Le tšona ke swanetše go di tliša.” (Joh. 10:16) Ge J. F. Rutherford yo a bego a nea polelo a be a re: “Anke bohle bao ba nago le kholofelo ya go phela ka mo go sa felego lefaseng ba emelele,” ba bantši ba batheetši ba ile ba emelela! Ke moka Ngwanabo rena Rutherford a re: “Bonang! Lešaba le legologolo!” Ba bantši ba be ba thabile kudu ka ge ga bjale ba be ba kwešiša kholofelo ya bona ka bokamoso.

18. Balatedi ba Kriste ba ile ba swarega ka’ng bodireding, gona ka mafelelo afe?

¹⁸ Ga e sa le go tloga ka nako yeo, Kriste o hlahlile batho ba gagwe gore ba swarege kudu ka go kgoboketša bao e tlago go ba ditho tša lešaba le legolo leo le tlago go phologa masetlapelo a magolo. Mathomong, modiro wo wa go kgoboketša o be o bonagala o sa atlege. Ngwanabo rena Rutherford o ile a ba a re: “Go bonala eka ‘lešaba le legologolo’ e ka se be le legolo kudu.” Ke therešo gore ga bjale re bona kamoo Jehofa a šegofaditšego modiro wa puno kudu ga e sa le go tloga ka nako yeo! Ba hlahlwa ke Jesu le moya o mokgethwa, batlotšwa le bagwera ba bona ba “dinku tše dingwe” ba fetogile seo Jesu a boletšego ka sona e sa le pele—e lego “mohlape o tee” wo o hlankelago gotee ka tlase ga “modiši o tee.”

19. Re ka tšea karolo bjang go oketšeng lešaba le legolo?

¹⁹ Batho ba bangwe ka moka bao ba botegago ba tla phela ka mo go sa felego lefaseng la paradeise, ba bušwa ke Kriste le babušigotee le yena ba 144 000. Na ga se mo go kgahlišago go naganišiša ka tsela yeo Kriste a hlahlilego batho ba Modimo gore ba kwešiše kholofelo ye ya Mangwalo ka bokamoso, e lego kholofelo yeo e kwagalago gabotse? Ruri re na le tokelo e kgolo ya go botša bao re ba hwetšago bodireding ka kholofelo yeo! Anke re swaregeng ka botlalo ka mo re ka kgonago modirong wo e le gore lešaba le legolo le tšwele pele le ata, le tumiša leina la Jehofa le go feta!—Bala Luka 10:2.

20. Mokgatlo wa Sathane o na le dikarolo dife, gona potego ya Bokriste e akaretšwa bjang?

²⁰ Ge batho ba Modimo ba be ba tšwela pele ba ithuta ka Mmušo wa gagwe, ba ile ba swanelwa gape ke go kwešiša ka botlalo seo se bolelwago ke go botegela Mmušo woo wa legodimong. Tabeng ye, ka 1922, Morokami o ile wa bontšha gore go na le mekgatlo e mebedi, wa Jehofa le wa Sathane. Mokgatlo wa Sathane o akaretša dikgwebo, madumedi le dipolotiki. Bao ba botegelago Mmušo wa Modimo ka tlase ga Kriste ga se ba swanela go kwanantšha potego ya bona ka go itsenyatsenya karolong le ge e le efe ya mokgatlo wa Sathane. (2 Bakor. 6:17) Seo se ra go re’ng?

21. (a) Mohlanka yo a botegago o lemošitše bjang batho ba Modimo ka dikgwebo tše dikgolo? (b) Ka 1963, Morokami o ile wa utolla’ng ka “Babilona o Mogolo”?

²¹ Dijo tša moya tše di tšwago go mohlanka yo a botegago ka mehla di pepentšhitše go se botege ga dikgwebo tše dikgolo le go lemoša batho ba Modimo gore ba se ke ba ineela go rateng dilo tše di bonagalago mo go atilego. (Mat. 6:24) Ka mo go swanago, ka mehla dikgatišo tša rena di be di bolela kudu ka karolo ya bodumedi ya mokgatlo wa Sathane. Ka 1963, Morokami o bontšhitše gabotse gore “Babilona o Mogolo” o emela mmušo ka moka wa lefase wa bodumedi bja maaka, e sego Bojakane feela. Ka go re’alo, go etša ge re tla ithuta ka botlalo go Kgaolo 10 ka pukung  ye, batho ba Modimo nageng e nngwe le e nngwe le setšong se sengwe le se sengwe ba thušitšwe go ‘tšwa go Babilona o Mogolo,’ ba itlhwekiša mekgweng ka moka ya bodumedi bja maaka.—Kut. 18:2, 4.

22. Nakong ya Ntwa ya Pele ya Lefase, batho ba Modimo ba bantši ba ile ba kwešiša bjang keletšo yeo e lego go Baroma 13:1?

²² Eupša go thwe’ng ka karolo ya dipolotiki ya mokgatlo wa Sathane? Na Bakriste ba therešo ba ka tšea karolo dintweng le dikgohlanong tša ditšhaba? Nakong ya Ntwa ya Pele ya Lefase, Barutwana ba Beibele ba be ba kwešiša gore balatedi ba Kriste ga se ba swanela go bolaya. (Mat. 26:52) Lega go le bjalo, ba bantši ba be ba nagana gore keletšo yeo e lego go Baroma 13:1 ya gore re kwe “balaodi ba bagolo” e be e bolela gore ba ka ya ntweng, ba apara yunifomo ya mašole, gaešita le go swara dibetša; eupša ge ba kgopelwa gore ba bolaye manaba a bona, ba tla fo thuntšhetša moyeng.

23, 24. Re be re kwešiša bjang Baroma 13:1 nakong ya Ntwa ya Bobedi ya Lefase, gona balatedi ba Kriste ba ile ba hwetša tlhaloso efe e nepagetšego?

²³ Ge Ntwa ya Bobedi ya Lefase e be e thoma ka 1939, Morokami o ile wa ba le sehlogo seo se bego se ahlaahla ka mo go tseneletšego taba ya go se tšee karolo dipolotiking. Sehlogo seo se ile sa bontšha gabotse gore Bakriste ba ka se tšee karolo ka mo go feletšego dintweng ka moka le dikgohlanong tša ditšhaba tša lefase la Sathane. Yeo e be e le tlhahlo e lego nakong e le ruri! Ka go re’alo, balatedi ba Kriste ba ile ba šireletšwa molatong wa madi woo ditšhaba di bilego le wona ntweng yeo. Lega go le bjalo, go thoma ka 1929, dikgatišo tša rena di be di hlalosa gape gore balaodi ba bagolo bao go boletšwego ka bona go Baroma 13:1 ga se babuši ba lefase, eupša ke Jehofa le Jesu. Go be go sa nyakega tlhaloso e nngwe yeo e nepagetšego.

 ²⁴ Moya o mokgethwa o ile wa hlahla balatedi ba Kriste gore ba hwetše tlhaloso yeo ka 1962, ge dihlogo tša bohlokwa tša mabapi le Baroma 13:1-7 di be di gatišwa ka ditokollong tša Morokami wa November 15 le wa December 1. Mafelelong, batho ba Modimo ba ile ba kwešiša molao wa motheo wa go ikokobeletša balaodi ba bagolo go fihla bokgoleng bjo itšego, woo Jesu a boletšego ka wona mantšung a gagwe a tsebjago kudu ao a rego: “Neang Kesara tša Kesara eupša Modimo le mo nee tša Modimo.” (Luka 20:25) Ga bjale Bakriste ba therešo ba kwešiša gore balaodi ba bagolo ke babuši ba lefase le le gore Bakriste ba swanetše go ikokobeletša bona. Lega go le bjalo, re ikokobeletša bona go fihla bokgoleng bjo itšego. Ge babuši ba re laela gore re se kwe Jehofa Modimo, re araba go etša baapostola ba bogologolo bao ba itšego: “Modimo ke mmuši yo re swanetšego go mo kwa go e na le go kwa batho.” (Dit. 5:29) Go Dikgaolo 13 le 14 tša puku ye, re tlo ithuta ka mo go oketšegilego mabapi le kamoo batho ba Modimo ba dirišitšego molao wa motheo wa go se tšee karolo dipolotiking.

25. Ke ka baka la’ng o leboga tlhahlo ya moya o mokgethwa go kwešišeng Mmušo wa Modimo?

²⁵ Nagana ka dilo ka moka tšeo balatedi ba Kriste ba di rutilwego ka Mmušo wa Modimo nywageng e lekgolo e fetilego. Re ithutile gore Mmušo wa Modimo o thomile neng go buša legodimong le kamoo o lego bohlokwa ka gona. Re kwešiša gabotse dikholofelo tše pedi tša batho bao ba botegago, e lego kholofelo ya go ya legodimong le ya go phela mo lefaseng. Le gona re tseba kamoo re ka botegelago Mmušo wa Modimo re dutše re ikokobeletša babuši ba lefase go fihla bokgoleng bjo itšego. Ka gona ipotšiše gore: ‘Na ke be ke tla tseba le ge e le efe ya ditherešo tšeo tša bohlokwa ge nkabe Jesu Kriste a se a hlahla mohlanka wa gagwe yo a botegago mo lefaseng go di kwešiša le go re ruta tšona?’ Ruri ke tšhegofatšo go hlahlwa ke Kriste le moya o mokgethwa!