1, 2. Kon Hesus a demostrá ku e ta un guia sabí?

 IMAGINÁ bo ku un guia turístiko ku tin hopi eksperensia ta dunando abo ku un grupo di turista un tour di un stat impreshonante i bunita. Ta promé biaha ku boso ta bishitá e stat, pues boso ta presta bon atenshon na tur loke e guia ta bisa. De bes en kuando, boso ta ansioso pa sa tokante un ke otro karakterístika di e stat ku ainda boso no a mira. Ora boso puntra e guia tokante e kosnan ei, e no ta bisa nada sino te na e momento oportuno. Anto, hopi biaha, esei ta nèt ora ku boso ta yegando na un sitio interesante. Segun ku e tour ta sigui, boso ta keda mas i mas impreshoná ku e sabiduria di e guia, pasobra e ta konta boso e kosnan ku boso mester sa na e momento ku boso mester sa nan.

² Kristiannan berdadero ta den kasi e mesun situashon ku e turistanan ei. Nos ta ansioso pa siña mas tokante e stat di mas maravioso ku ta eksistí, “e stat ku tin berdadero fundeshi,” esta, e Reino di Dios. (Heb. 11:10) Tempu Hesus tabata riba tera, e mes a guia su siguidónan i a hiba nan na un konosementu mas profundo di e Reino. Pero akaso el a kontestá tur nan preguntanan i a konta nan tur kos tokante e Reino ei den un tiru? Nò. E di ku nan: “Mi tin hopi kos mas di bisa boso, ma boso no por komprondé nan aworakí.” (Huan 16:12) Komo e guia di mas sabí ku a yega di biba, Hesus nunka a pone un peso riba su disipelnan dor di duna nan konosementu ku nan no tabata prepará pa komprondé.

3, 4. (a) Kon Hesus a sigui siña su siguidónan fiel tokante e Reino di Dios? (b) Kiko nos lo konsiderá den e kapítulo akí?

³ Hesus a ekspresá e palabranan di Huan 16:12 riba e último anochi di su bida komo hende riba tera. Pero despues di su morto, kon lo el a sigui siña su siguidónan fiel tokante e Reino di Dios? El a sigurá su apòstelnan: ‘E spiritu di e bèrdat lo guia boso pa komprondé e bèrdat plenamente.’ a (Huan 16:13) Nos por konsiderá e spiritu santu manera un guia ku tin hopi pasenshi. Pues, e spiritu santu ta e medio ku Hesus ta usa pa siña su siguidónan tur loke nan mester sa tokante e Reino di Dios; anto nèt na e momento ku nan mester sa e kosnan ei.

⁴ Laga nos wak kon Yehova su spiritu santu a guia kristiannan sinsero pa haña mas konosementu tokante e Reino. Promé nos lo  konsiderá kon nos a bin komprondé ta na ki tempu e Reino di Dios a kuminsá goberná. Kaba nos lo analisá ken ta e gobernantenan i e siudadanonan di e Reino i ki speransa nan kada un tin. I por último nos lo mira kon e siguidónan di Kristu a haña un komprondementu mas kla di kiko lealtat na e Reino ta enserá.

5, 6. (a) Ki punto di bista robes e Studiantenan di Beibel tabatin tokante e tempu ku e Reino lo a keda establesé i tokante e kosecha? (b) Dikon e ideanan robes ei no mester pone nos duda ku Hesus tabata guia su siguidónan?

⁵ Manera nos a mira den Kapítulo 2 di e buki akí, pa vários dékada e Studiantenan di Beibel a señalá ku na 1914 profesia importante di Beibel lo a kumpli. Ma e tempu ei nan tabata kere ku Kristu su presensia a kuminsá na 1874, ku el a kuminsá goberná den shelu na 1878 i ku ta te na òktober 1914 numa e Reino lo a haña tur outoridat. E kosecha lo a tuma lugá di 1874 pa 1914 i lo a kulminá ora Hesus rekohé e ungínan i tuma nan den shelu. Akaso e ideanan robes ei mester pone nos duda ku Hesus tabata guia e rumannan fiel ei pa medio di spiritu santu? Klaru ku nò!

⁶ Pensa atrobe riba e ilustrashon ku nos a usa na prinsipio di e kapítulo akí. E turistanan tin ideanan prematuro i ta ansioso pa sa sierto kosnan. Akaso esei ta pone nos duda ku e guia ta konfiabel? Nò! Asina tambe, maske tin biaha e pueblo di Dios ta purba di komprondé sierto detaye di e propósito di Yehova promé ku ta tempu pa spiritu santu guia nan na e bèrdatnan ei, ta bisto ku Hesus ta guiando nan. Pues, e rumannan fiel ta demostrá ku nan ta dispuesto pa aseptá korekshon i humildemente ta ahustá nan punto di bista.—Sant. 4:6.

7. Dios a bendishoná su pueblo ku kua rayonan di lus spiritual?

⁷ Durante e añanan despues di 1919, Dios a bendishoná su pueblo ku mas i mas rayo di lus spiritual. (Lesa Salmo 97:11.) Na 1925 a sali un artíkulo memorabel den E Toren di Vigilansia, titulá “Nasementu di e Nashon.” E artíkulo ei a presentá evidensia bíbliko konvinsente ku e Reino Mesiániko a nase na 1914 i a kumpli asina ku e vishon profétiko ku nos ta haña na Revelashon kapítulo 12, den kua e muhé selestial ta duna lus. b E artíkulo a sigui mustra ku e persekushon i difikultatnan ku e pueblo di Yehova a konfrontá durante e añanan di Promé Guera Mundial a indiká klaramente ku Satanas a ser saká for di shelu i a baha riba tera “yen di rabia, pasobra e sa ku a ked’é masha poko tempu.”—Rev. 12:12.

8, 9. (a) Kon e importansia di e Reino di Dios a keda enfatisá? (b) Kua ta e preguntanan ku nos lo bai konsiderá?

⁸ Kon importante e Reino ta? Na 1928, E Toren di Vigilansia a kuminsá enfatisá ku e Reino tabata mas importante ku hende su salbashon personal mediante e reskate. Dikon? Pasobra ta pa medio di e Reino Mesiániko Yehova lo santifiká su nòmber, vindiká su derecho di goberná komo Soberano di universo i kumpli ku tur su propósito relashoná ku humanidat.

⁹ Ken lo goberná huntu ku Kristu den e Reino ei? Ken lo ta e Reino su siudadanonan riba tera? I ku ki trabou e siguidónan di Kristu lo okupá nan mes?

10. Kiko e pueblo di Dios tabata komprondé for di hopi tempu tokante e 144.000?

¹⁰ Dékadanan promé ku 1914, kristiannan berdadero tabata komprondé kaba ku 144.000 siguidó fiel di Kristu lo a goberná huntu kuné den shelu. c E Studiantenan di Beibel a realisá ku esaki tabata un kantidat literal i ku for di e promé siglo a kuminsá skohe e hendenan di e grupo ei.

11. Kon e futuro miembronan di e brùit di Kristu a bin komprondé kiko ta nan asignashon riba tera?

¹¹ Pero kiko e futuro miembronan di e brùit di Kristu tabata asigná pa hasi turesten ku nan tabata riba tera? Nan a ripará ku Hesus a pone énfasis riba e trabou di prediká i ku el a konekt’é ku un periodo di kosecha. (Mat. 9:37; Huan 4:35) Manera nos a menshoná den Kapítulo 2, pa un tempu e Studiantenan di Beibel a kere ku e periodo di kosecha lo a dura 40 aña i ku e kulminashon lo tabata ora Hesus rekohé e ungínan i tuma nan den shelu. Pero, komo ku e trabou a sigui despues ku e 40 añanan a pasa, e rumannan tabatin mester di mas klarifikashon. Awe nos sa ku e temporada di kosecha—e tempu pa separá trigu for di mal yerba, esta, kristiannan ungí fiel for di kristiannan falsu—a kuminsá na 1914. Tabata tempu pa konsentrá riba e trabou di rekohé e restu di e grupo selestial!

12, 13. Kon e ilustrashon ku Hesus a duna di e 10 bírgennan i esun di e talentonan a kumpli den e último dianan?

¹² Di 1919 en adelante, Kristu a sigui guia e esklabo fiel i prudente pa enfatisá e trabou di prediká. For di den promé siglo Hesus a duna su siguidónan e asignashon ei. (Mat. 28:19, 20) El a indiká tambe kua ta e kualidatnan ku su siguidónan ungí lo tabatin mester pa kumpli ku e asignashon di prediká. Kon asina? Wèl, den su ilustrashon di e 10 bírgennan, el a mustra ku e ungínan lo tin ku keda vigilá, es desir, keda spiritualmente alerta, si nan ke alkansá nan meta final di partisipá den e gran fiesta di kasamentu den shelu. Den e kuadro selestial ei, e ungínan fiel ta ser presentá tambe na un otro manera, esta, komo e “brùit” di 144.000 siguidó ungí. (Rev. 21:2) Anto den e ilustrashon di e talentonan, Hesus a indiká ku su sirbidónan ungí lo kumpli diligentemente ku e trabou di prediká ku el a enkargá nan kuné.—Mat. 25:1-30.

 ¹³ Durante e último 100 añanan, e ungínan a keda vigilá i a traha diligentemente. Nan aktitut vigilante sin duda lo ser rekompensá! Pero akaso e gran trabou di kosecha lo a keda limitá na rekohementu di e restu di e 144.000 ko-gobernantenan di Kristu?

14, 15. Menshoná e kuater gruponan ku e buki E Misterio Terminá a papia di dje.

¹⁴ Pa hopi tempu, e rumannan fiel tabata sumamente kurioso pa sa ken tabata e “multitut grandi” menshoná na Revelashon 7:9-14. Pero ainda no tabata tempu pa Kristu revelá e identidat di e grupo grandi akí. P’esei no ta un sorpresa ku gran parti di loke e rumannan a bisa e tempu ei tokante e multitut grandi tabata leu for di e bèrdatnan kla i simpel ku awe nos konosé i ta stima.

¹⁵ Por ehèmpel, na 1917, e buki E Misterio Terminá a deklará ku tin “dos grado òf tipo di salbashon selestial i dos grado òf tipo di salbashon terenal.” Di ken e kuater gruponan di hende ei, kada grupo ku un speransa di salbashon diferente, tabata konsistí? Di promé, tabatin e 144.000 ku lo goberná ku Kristu. Di dos, tabatin e multitut grandi. E tempu ei e rumannan tabata kere ku e multitut grandi tabata konsistí di hende ku ta kristian pa nòmber i ku ainda tabata den e iglesianan di kristiandat. Nan tabatin un grado di fe pero no sufisiente pa tuma un posishon firme na fabor di adorashon berdadero. P’esei nan lo a risibí un puesto inferior den shelu. Pa loke ta esnan ku lo biba riba tera, nan a kere ku un di tres grupo—hendenan fiel manera Abraham, Moises i otronan—lo a haña outoridat riba e di kuater grupo, esta, e mundu di humanidat.

16. Kua ta e rayonan di lus spiritual ku a bria na 1923 i na 1932?

¹⁶ Kon spiritu santu a guia e siguidónan di Kristu pa yega na e komprondementu ku nos ta apresiá awe? Esei a sosodé progresivamente, mediante un seri di rayo di lus spiritual ku a bria riba nan. Kuminsando for di 1923, E Toren di Vigilansia a hala atenshon na un grupo ku no tabatin aspirashon selestial i ku lo a biba riba tera bou di e reinado di Kristu. Na 1932, E Toren di Vigilansia a analisá e relato di Jonadab, kende a djòin Jehú, Dios su rei ungí di Israel, pa apoy’é den e guera kontra adorashon falsu. (2 Rei. 10:15-17) Segun e artíkulo, tabatin un grupo di hende den tempu moderno ku tabata manera Jonadab i ku Yehova lo a laga e grupo akí sobrebibí e tribulashon di Armagedon pa biba aki riba tera.

17. (a) Ki rayo di lus spiritual briante tabatin na 1935? (b) Ki efekto e komprondementu nobo tokante e multitut grandi tabatin riba kristiannan fiel? (Wak e kuadro “ Hopi Ruman A Sinti Nan Aliviá.”)

¹⁷ Na 1935 tabatin un rayo di lus spiritual mas briante ainda. Na e kongreso ku nan a tene na Washington, D.C., e multitut grandi a keda identifiká komo un grupo ku lo biba riba tera; e ta e mesun grupo ku e karnénan den e komparashon ku Hesus a duna di karné ku kabritu. (Mat. 25:33-40) E multitut grandi lo ta parti di e ‘otro karnénan’ di kua Hesus a bisa ku ‘nan tambe e tin ku trese den e tou.’ (Huan 10:16) Ora e oradó, J. F. Rutherford, a  pidi pa ‘tur esnan ku tin e speransa di biba pa semper riba tera, lanta para,’ mas ku mitar di e ouditorio a lanta para! E ora ei el a deklará: “Ata e multitut grandi!” Hopi ruman a keda profundamente konmoví awor ku por fin nan a komprondé kiko tabata nan speransa pa futuro.

18. Riba kiko e siguidónan di Kristu a konsentrá den sirbishi di vèlt, i ku ki resultado?

¹⁸ Desde e tempu ei en adelante, Kristu a guia su siguidónan pa konsentrá riba e trabou di rekohé e futuro miembronan di e multitut grandi akí ku lo sali sano i salvo for di e tribulashon grandi. Na promé instante, e kantidat ku nan a rekohé no tabata parse masha kos. Un biaha, Ruman Rutherford asta a bisa: “Al fin i al kabo, ta parse ku e ‘multitut grandi’ no ta bai ta dje grandi ei tòg.” Klaru ku, entretantu, nos a mira kon Yehova a bendishoná e kosecha! Bou di guia di Hesus i di spiritu santu, e ungínan i nan kompañeronan di e ‘otro karnénan’ a bira “ún tou,” presis manera Hesus a profetisá, sirbiendo huntu bou di “ún wardadó.”

19. Kiko nos por hasi pa yuda e multitut grandi sigui krese?

¹⁹ E gran mayoria di hende fiel lo biba pa semper den un paradeis riba tera, bou di e reinado di Kristu ku su 144.000 ko-gobernantenan. Ta un plaser pa mira e manera ku Kristu a guia e pueblo di Dios pa komprondé un speransa bíbliko pa futuro ku ta asina kla. Nos tin e gran privilegio di por kompartí e speransa ei ku e hendenan ku nos ta topa den sirbishi di vèlt! Pues, te kaminda nos sirkunstansianan ta permití, laga nos ta mas aktivo posibel. Asina e multitut grandi lo sigui krese, i nan gritu di alabansa na onor di e nòmber di Yehova lo bira mas i mas fuerte!—Lesa Lukas 10:2.

20. E organisashon di Satanas ta konsistí di kua parti, i ki efekto esei por tin riba lealtat kristian?

²⁰ Segun ku e pueblo di Dios a sigui siña tokante e Reino, nan mester a komprondé tambe mas mihó kiko lealtat na e gobièrnu selestial ei a enserá. Relashoná ku e punto akí, un Toren di Vigilansia di 1922 a señalá ku tin dos organisashon ta obrando: di Yehova i di Satanas. Esun di Satanas ta konsistí di e parti komersial, religioso i polítiko di mundu. Hende leal na e Reino di Dios den man di Kristu mester tene kuidou pa nan no mete ku un òf otro parti di e organisashon di Satanas i asina bira desleal. (2 Kor. 6:17) Kiko esaki ta nifiká?

21. (a) Kon e esklabo fiel a spièrta e pueblo di Dios pa e mundu di negoshi? (b) Kiko un Toren di Vigilansia di 1963 a revelá tokante “Babilonia e Grandi”?

²¹ E kuminda spiritual di e esklabo fiel konsistentemente a saka na kla e korupshon ku ta reina den e mundu di negoshi i a spièrta e pueblo di Dios pa no kai den gara di e materialismo ku komèrsio ta promové. (Mat. 6:24) Tambe nos publikashonnan a keda hala atenshon na e parti religioso di e organisashon di Satanas. Na 1963, E Toren di Vigilansia a mustra bon kla ku “Babilonia e Grandi” a representá no solamente kristiandat sino tambe henter e imperio mundial di religion falsu. Pues, manera nos lo mira mas kla den Kapítulo 10 di e buki akí, e pueblo di Dios den tur  pais i kultura a haña yudansa pa “sali for di dje,” i asina libra nan mes for di tur práktika religioso falsu.—Rev. 18:2, 4.

22. Durante Promé Guera Mundial, kon hopi ruman a komprondé e instrukshon di Romanonan 13:1?

²² Pero kiko di e parti polítiko di e organisashon di Satanas? Akaso kristiannan berdadero por partisipá den e guera- i konfliktonan di e nashonnan? Durante Promé Guera Mundial, mayoria di Studiante di Beibel a komprondé ku siguidónan di Kristu no tabatin mag di mata nan próhimo. (Mat. 26:52) Pero pa hopi ruman, e instrukshon di Romanonan 13:1—sea “sumiso na outoridatnan superior”—a nifiká ku nan lo mester a drenta servisio militar, bisti unifòrm di sòldá i asta karga arma; ma ora nan superiornan lo a pidi nan pa mata e enemigu, nan lo mester a tira den laira.

23, 24. Kon e rumannan a komprondé Romanonan 13:1 durante Segundo Guera Mundial, i na ki punto di bista mas eksakto spiritu santu a guia e siguidónan di Kristu?

²³ Nèt ora ku Segundo Guera Mundial a kuminsá na 1939, E Toren di Vigilansia a presentá un análisis profundo di nos posishon neutral komo kristian. E artíkulo a mustra bon kla ku kristiannan no mester tabatin nada di haber ku e guera- i konfliktonan di e nashonnan di e mundu di Satanas. E instrukshon ei a yega nèt na ora! Esaki a protehá e siguidónan di Kristu, miéntras ku e nashonnan sí a keda ku gran kulpa di sanger den e guera ei. Sinembargo, kuminsando for di 1929, nos publikashonnan a splika tambe ku e outoridatnan superior di Romanonan 13:1 no tabata e gobernantenan di mundu sino Yehova ku Hesus. Pues, ainda e rumannan tabatin mester di un komprondementu mas eksakto.

 ²⁴ Na 1962, spiritu santu a guia e siguidónan di Kristu na un punto di bista mas eksakto di Romanonan 13:1-7. Algun artíkulo memorabel ku a sali den E Toren di Vigilansia di 15 di novèmber i di 1 di desèmber di e aña ei a analisá e versíkulonan akí. Por fin e pueblo di Dios a bin komprondé e prinsipio di sumishon relativo ku Hesus a revelá den su palabranan famoso: “Duna Sésar loke ta di Sésar, ma Dios loke ta di Dios.” (Luk. 20:25) Awor, kristiannan berdadero ta komprondé ku e outoridatnan superior ta e gobernantenan di e mundu akí i ku kristiannan mester ta sumiso na nan. Pero, esei ta un sumishon relativo. Es desir, ora outoridatnan pidi nos desobedesé Yehova Dios, nos ta kontestá nan meskos ku e apòstelnan di pasado: “Nos tin ku obedesé Dios na promé lugá, i no hende.” (Echo. 5:29) Den Kapítulo 14 di e buki akí, nos ta siña mas tokante e diferente maneranan ku den práktika e pueblo di Dios a sigui e prinsipio di keda neutral den asuntunan polítiko.

25. Dikon bo ta apresiá e guia ku spiritu santu a duna nos pa komprondé e Reino di Dios?

²⁵ Pensa un ratu riba tur e kosnan ku e siguidónan di Kristu a siña tokante e Reino di Dios durante e último 100 añanan. Nos a haña sa na ki aña e Reino a keda establesé den shelu i kon importante e ta. Nos tin un bista kla di e dos speransanan ku Dios ta ofresé hende fiel: e speransa di biba den shelu i e speransa di biba riba tera. Tambe nos sa kon pa demostrá nos lealtat na e Reino di Dios miéntras ku nos ta demostrá sumishon relativo na outoridatnan di mundu. Awor, puntra bo mes: ‘Lo mi tabata sa kualke un di e bèrdatnan presioso akí si Hesukristu no a guia su esklabo fiel riba tera pa komprondé eseinan i despues siña nan na otro hende?’ Ki bendishoná nos ta ku Kristu i spiritu santu ta guia nos!