1, 2. ¿Imaynapitaj Jesús sumaj pusaykachaj runa jina karqa?

 KAYPI tʼukuriy: uj runa, qanta wajkunatawan uj llajtaj kʼacha lugaresninta rejsichej pusashasunkichej. Qankunaqa chay llajtapi forasteros kasqaykichejrayku, chay runa parlashajtin allinta uyarinkichej. Chantapis mana rejsisqaykichej lugaresman niraj chayashaspa, imaynachus kasqanta yachayllataña munankichej. Chay runaqa tapojtiykichejpis ni imata willasunkichejchu, chay lugaresman chayanaykichejkama. Chay runa imatachus yachanaykichejta maychus tiemponpi willasusqaykichejrayku, allinta yachasqanta reparankichej.

² Cheqa cristianospis chay jinapi rikukunchej. “Sumaj cimientosniyoj” llajtamanta nisunman Diospa Reinonmanta mayta yachayta munanchej (Heb. 11:10). Jesusqa, Jallpʼapi kashaspa yachachisqasninta chay Reinomanta astawan yachanankupaj yanaparqa. Yachachisqasnin tapojtinkutaj wakillanta kuticherqa, nitaj ujllapichu tukuy imata sutʼincharqa. Astawanpis jinata nerqa: “Ashkha imastawanraj qankunaman ninay kashan, manataj atinichu, imaraykuchus kunanqa anchaña kanman qankunapaj”, nispa (Juan 16:12). Chayrayku Jesusqa, sumaj pusaykachaj runa jina yachachisqasninman, entiendeyta atisqallankuta willarqa.

3, 4. 1) ¿Imaynatá Jesús yachachisqasninman Diospa Reinonmanta yachachillanpuni? 2) ¿Imatá kay yachaqanapi ukhuncharisun?

³ Jesusqa, Juan 16:12 versiculopi nisqanta, wañupunan pʼunchay ñaupaj chʼisinpi nerqa. Wañupuytawan, ¿imaynatá cheqa sonqo kamachisninman Diospa Reinonmanta yachachillanmanpuni karqa? Jesusqa apostolesninman nerqa: “Cheqa Espíritu [...] cheqa kajman pusasonqachej”, nispa (Juan 16:13). Espíritu santoqa chay pusaykachaj runa jina. Jesusqa, yachachisqasninta espíritu santonejta yanapan Diospa Reinonmanta yachanankupaj, maychus tiemponpi.

⁴ Kay yachaqanapeqa, Jehovaj espíritu santon, cheqa cristianosta Reinonmanta astawan yachanankupaj yanapasqanta ukhuncharisun. Ñaupajtaqa, maykʼajchus Diospa Reinon kamachiyta qallarisqanmanta, imaynatachus aswan sutʼita entiendesqanchejta ukhuncharisun, jinallataj chay Reinopi kamachejkunamanta, pikunatachus kamachinankumanta, ima suyakuyniyojchus kasqankumanta ima. Chantá ukhunchallasuntaj,  Diospa Reinonman cheqa sonqo kay, ima niytachus munasqanta astawan entiendesqanchejta.

5, 6. 1) ¿Imatataj yuyarqanku Bibliamanta Yachaqajkuna, Diospa Reinon sayarichisqa kasqanmanta, cosecha tiempomantawan? 2) Jinata yuyasqankurayku, ¿nisunmanchu Jesús paykunata mana yanapasqanta?

⁵ Kay libroj 2 yachaqananpi yachakorqanchej jina, Bibliamanta Yachaqajkunaqa, unayta yuyarqanku 1914 watapi Bibliaj profeciasnin juntʼakunanta. Chay tiempopeqa creerqanku, Cristoj kutimuynin 1874 watapi qallarisqanta, kay 1878 watapitaj janaj pachapi kamachiyta qallarisqanta. Creellarqankutaj Diospa Reinon octubre killapi 1914 watapiraj kamachinanpaj tukuy atiyniyoj kananta. Cosecha tiempotaj 1874 watamanta 1914 watakama kananta yuyarqanku, ajllasqa cristianos janaj pachaman ripojtinkutaj tukukunanta. Jina pantasqata yuyasqankurayku, ¿Jesús cheqa sonqo kamachisninta espíritu santonejta mana yanapasqantachu nisunman?

⁶ Mana. Uj kaj parrafopi pusaykachaj runamanta parlarerqanchej jina, chay runamanta forasteros usqhayllata pantasqata yuyankuman chay, ¿chay runa mana allinta yachasqantachu nisunman? Mana, ¿icharí? Jehovaj kamachisninpis wakin kuti munayninmanta wakin imasta yachayllataña munarqanku, niraj espíritu santonnejta maychus tiemponpi sutʼinchashajtin. Chaytaj, ¿Jesús mana yanapasqantachu niyta munan? Mana. Astawanpis paykunaqa cheqa sonqos kanku, kʼumuykukoj sonqotaj, mana yuyasqankuman jinachu kasqanta nikojtintaj kasukunkupacha (Sant. 4:6).

7. ¿Imatá Jehovaj llajtan sutʼita entienderqa?

⁷ Kay 1919 watamanta qhepaman, Jehovaqa llajtanta Reinonmanta cheqa kajta aswan sutʼita entiendenanpaj yanaparqa (Salmo 97:11 leey). Kay 1925 watapi Torremanta Qhawaj revistapi “Nacimiento de la nación” nisqa yachaqanata orqhokorqa. Chay yachaqanaqa, Diospa Reinon 1914 watapipuni kamachiyta qallarisqanta Bibliaman jina sutʼincharqa. Chaytaj Apocalipsis 12 capitulonpi nisqan profeciata juntʼasharqa. Chay capituloqa parlashan janaj pachapi uj warmi qhari wawitata nacechikusqanmanta. a Chantapis chay yachaqanaqa parlasharqa, Jehovaj llajtan qhatiykachasqa kasqanmanta, chʼampaykunapi rikukusqanmantawan. Chaytaj sutʼita rikucherqa Satanás janaj pachamanta wijchʼuchikamusqanta, “manchay” phiñasqataj kashasqanta “yachaspa paypaj pisi tiempollaña kasqanta” (Apo. 12:12).

8, 9. 1) ¿Imaynatá Diospa Reinon ñaupajpi kasqanta sutʼinchakorqa? 2) ¿Ima tapuykunatataj ukhuncharisun?

⁸ ¿Imaynatá Diospa Reinonta qhawananchej tiyan? Kay 1928 watapi Torremanta Qhawaj revista, Jesuspa wañuyninnejta salvakuyta munanamantaqa, Diospa Reinon aswan ñaupajpi kasqanta sutʼincharqa. Jehovaqa chay Reinonejta sutinta jatunchanqa, paylla kamachej kasqanta rikuchenqa, imatachus runaspaj munasqantataj juntʼanqa.

⁹ ¿Pikunataj Cristowan kamachinanku karqa? ¿Pikunatataj Jallpʼapi kamachinanku karqa? ¿Ima llankʼaytataj Cristoj yachachisqasnin juntʼananku karqa?

10. ¿Imatataj Diospa llajtan 144.000 ajllasqa cristianosmanta entienderqa?

¹⁰ Kay 1914 wata ñaupajta, cheqa cristianosqa, 144.000 ajllasqa cristianos Cristowan janaj pachapi kamachinankuta entienderqankuña. b Bibliamanta Yachaqajkunaqa, chay chhikapuni kanankuta entienderqanku. Chantapis ñaupa cristianospa tiemponkumantapacha chay ajllasqa cristianosta ajllakusqanta repararqanku.

11. ¿Imatataj entienderqanku Cristoj novianwan ninakoj runas, ima llankʼaytachus juntʼanankumanta?

¹¹ Chantá, ¿imatataj Cristoj novianwan ninakoj runas Jallpʼapiraj kashaspa ruwananku karqa? Paykunaqa, Jesús willayta ñaupajman churasqanta entienderqanku, cosecha tiempowantaj kikinchasqanta (Mat. 9:37; Juan 4:35). Kay libroj 2 yachaqananpi yachakorqanchej jina, cosecha tiempoqa 40 watasta kananta yuyarqanku, ajllasqa cristianos janaj pachaman ripojtinkutaj tukukunanta. Jinapis Diosmanta willakushallarqapuni, chayrayku astawanraj entiendenanku karqa. Kunanqa yachanchej, cosecha tiempo 1914 watapi qallarisqanta (trigota, cizaña qhoramanta tʼaqakunan karqa, nisunman cheqa ajllasqa cristianosta, llulla cristianosmanta). Chayrayku janaj pachapi kausayta suyakojkunata tantakunan karqa.

12, 13. ¿Imaynatá 1914 watamantapacha juntʼakun Jesuspa rijchʼanachinasnin chunka sipaskunamanta chantá qolqe mirachinamanta?

¹² Kay 1919 watamantapacha, Cristoqa allin kamachi yuyayniyojta yanapashan willayta ñaupajman churananpaj. Ñaupa cristianospa tiemponkupipis chayta kamacherqaña (Mat. 28:19, 20). Chay llankʼayta juntʼanankupaj imaynachus kanankutapis nerqaña. Jesusqa, chunka sipaskunamanta rijchʼanachinanpi nerqa, ajllasqa cristianos janaj pachapi kaj casamientopi kayta munaspaqa, wakichisqas kanankuta, Diosmanta mana karunchakuspa. Kay 144.000 cheqa sonqo ajllasqa cristianosqa, janaj pachapi Cristoj novianman tukunku (Apo. 21:2). Chantapis Jesusqa, qolqe mirachina rijchʼanachinanpi, yachachisqasnin sumajta, tukuy sonqotaj chay llankʼayta juntʼanankuta yachacherqa (Mat. 25:1-30).

¹³ Ajllasqa cristianosqa 1914 watamantapacha, wakichisqasllapuni kashanku, sumajtataj ruwanankuta juntʼashanku. Chayraykutaj tʼinkankuta japʼenqanku. Chantapis, ¿cosecha tiempopi 144.000 ajllasqa cristianosllatachu tantakunan karqa?

14, 15. ¿Mashkha qotus kasqantataj yuyakorqa? Sutʼinchay.

¹⁴ Unay watasta, ashkha cheqa sonqo runasqa, Apocalipsis 7:9-14 versiculospi “may chhika” runasmanta parlasqan, pikunachus kasqanta yachayta munarqanku. Jinapis pikunachus may chhika runas kasqanta, Cristo sutʼinchananpaj niraj tiempochu karqa. Chayrayku may chhika runasmanta entiendekusqanqa, kunan entiendekusqanwan mana kikinchu karqa.

¹⁵ Kay 1917 watapi, El misterio terminado nisqa libropi nerqa, “iskay qotu runas janaj pachaman ripunankuta, Jallpʼapitaj iskay qotu runas qhepakunankuta”. ¿Pikunataj janaj pachaman ripojkunamanta karqanku? Ñaupaj kaj qotoqa 144.000 Cristowan kamachejkuna karqanku. Iskay kaj qotutaj may chhika runasmanta kajkuna karqanku. Chay tiempopeqa yuyakorqa iskay kaj qotumanta kajkuna, Jesuspi creejkuna kasqankuta, pikunachus cristiano nichikoj iglesiankuta niraj saqerqankuchu. Creeyniyoj kaspapis mana Diosman cheqa sonqo kayta atinankupaj jinachu karqanku. Chayrayku janaj pachaman rispapis, mana Cristowan kamachiyta atinkumanchu karqa. Jallpʼapi kausakuyta suyakojkunamantarí, ¿pikunataj karqanku? Ñaupaj kaj qotoqa Abraham, Moisés wajkuna ima kasqankuta yuyakorqa. Paykunataj Jallpʼapi kausakojkunamanta iskay kaj qotuta kamachinanku karqa.

16. ¿Imastaj 1923 chantá 1932 wataspi sutʼinchakorqa?

¹⁶ May chhika runas pikunachus kasqankuta entiendenankupaj, ¿imaynatá espíritu santo Cristoj yachachisqasninta yanaparqa? Chaytaqa pisimanta pisi entienderqanku. Kay 1923 watapi Torremanta Qhawaj revista sutʼincharqa, uj qotu mana janaj pachamanchu ripunankuta, manaqa Jallpʼapi Cristoj kamachiyninpi kausakunankuta. Kay 1932 watapitaj Torremanta Qhawaj revistapi Jonadabmanta sutʼincharqa, payqa Israelmanta Diospa ajllasqan rey Jehuta llulla religionta chinkachiypi yanaparqa (2 Rey. 10:15-17). Chantapis, Jonadadwan ninakoj runas kay tiempopi kasqanta nillarqataj. Paykunatataj Jehová Armagedón maqanakuypi jarkʼanan karqa, Jallpʼapi kausakunankupaj.

17. 1) ¿Imamantataj 1935 watapi astawan sutʼinchakorqa? 2) May chhika runasmanta pikunachus kasqankuta yachaspa, ¿imaynataj cheqa cristianos kasharqanku? (“ Kusisqa kasharqanku” nisqa recuadrota qhawariy.)

¹⁷ Kay 1935 watapi, may chhika runasmanta astawan sutʼinchakorqa. Uj jatun tantakuyta Washington llajtapi ruwakusqanpi sutʼinchakorqa, may chhika runasmanta kajkunaqa Jallpʼapi kausakunankuta. Paykunaqa, Jesús ovejasmanta cabrasmanta rijchʼanachinanpi parlasqan ovejasllamantataj karqanku (Mat. 25:33-40). Chayrayku, Jesús “chay ovejastapis pusamunallaytaj tiyan” nispa nerqa chaykunapis, may chhika runasllamantataj kananku karqa (Juan 10:16). Hermano Rutherford umallirichishaspa taporqa: “¿Sayarikuwajchejchu Jallpʼapi wiñaypaj kausakuyta suyakojkuna?”, nispa. Chayta uyarispa, khuskan kuraj sayarikorqanku. Chantá hermano Rutherford nerqa: “¡Kaymin may chhika runasmanta kajkunaqa!”, nispa. Ashkhas kusisqa kasharqanku maypichus aswan qhepaman tiyakunankuta yachaspa.

18. ¿Imapajtaj cristianos kallpachakushanku? Sutʼinchay.

 ¹⁸ Chaymantapacha, cristianosqa Cristoj yanapayninwan may chhika runasta tantanankupaj kallpachakushanku, pikunachus jatun ñakʼariypi mana wañonqankuchu chaykunata. Qallariypeqa pisilla kanankupaj jina karqa. Chayrayku hermano Rutherford uj kutipi nerqa: “‘May chhikaʼ runasmanta kajkunaqa nisina ashkhachu kanqanku”, nispa. Chaywanpis mana jinachu karqa. Imaraykuchus chaymantapacha Jehová cosechapi mayta yanapashan. Chantapis ajllasqa cristianoswan waj ovejasmanta kajkunawanqa, Jesuspa chantá espíritu santoj yanapayninwan ima, Jesús nisqanman jina “uj tropalla” kanku “uj kʼata michejniyojtaj”.

19. ¿Imaynatá yanapasunman may chhika runas yapakunallanpajpuni?

¹⁹ Diospa ashkha cheqa sonqo kamachisnenqa, Paraíso Jallpʼapi wiñaypaj kausakonqanku. Paykunataqa Cristowan 144.000 ajllasqa cristianoswan kamachenqanku. Jallpʼapi kausakunapaj suyakuy kasqanta sutʼita yachanchej. Cristo Diospa llajtanta chayta yachanankupaj yanapasqanmanta, mayta kusikunchej. Chaytataj runasman yachachiyta atinchej. Chayrayku atisqanchejman jina willananchejpuni tiyan. Ajinamanta may chhika runasmanta kajkuna yapakullanqankupuni, kusiywantaj Jehovaj sutinta jatunchanqanku (Lucas 10:2 leey).

20. ¿Imastaj Satanaspa pachanmanta kanku, imaraykutaj cristianos chayman mana chhapukunankuchu tiyan?

²⁰ Diospa kamachisnin Reinonmanta astawan yachakusqankuman jina, chay Reinoman cheqa sonqo kay ima niytapunichus munasqantapis entiendenallankutaj karqa. Chaymanta sutʼinchaspa 1922 watapi Torremanta Qhawaj revistapi nerqa, Jehová uj llajtayoj kasqanta, jinallataj Satanaspis. Satanaspa llajtanmanta nisunman pachanmantaqa, ranqhajkuna, políticos, religiones ima kanku. Cristoj kamachiyninpi Diospa Reinonman cheqa sonqo kajkunaqa, ni imarayku Satanaspa pachanman chhapukunankuchu tiyan. Imaraykuchus niña cheqa sonqochu kankuman (2 Cor. 6:17). ¿Ima niytataj munan Satanaspa pachanman mana chhapukuy?

21. 1) ¿Imastataj allin kamachi yuyayniyoj ranqhajkunaj ruwasqankumanta Diospa llajtanta yuyarichin? 2) ¿Imatataj 1963 watapi Torremanta Qhawaj revista “Jatun Babiloniamanta” sutʼincharqa?

²¹ Allin kamachi yuyayniyojqa publicacionesnejta, sapa kuti juchachan ranqhajkunaj sajra ruwasqankuta. Chantapis Diospa llajtanta qhapajyaypi urmay mana allinchu kasqanta yuyarichin (Mat. 6:24). Satanaspa pachanmanta llulla religiones imaynachus kasqankutapis sutʼita rikuchin. Sutʼincharinapaj, 1963 watapi (castellanopi 1964) Torremanta Qhawaj revistaqa “Jatun Babilonia” mana cristianos nichikojkunallachu kasqankuta sutʼincharqa, manaqa tukuy llulla religiones. Chayrayku kay libroj 10 yachaqananpi yachakusun jina, tukuy llajtasmanta Diospa kamachisninta Jatun Babiloniamanta llojsipunankupaj, millay ruwaykunasnintataj saqepunankupaj yanapakorqa (Apo. 18:2, 4).

22. ¿Imaynatataj cristianos Ñaupaj kaj Guerra Mundial kashajtin Romanos 13:1 versiculopi nisqanta entienderqanku?

²² Satanaspa atiyninpi kaj politicosmantarí, ¿imatataj nisunman? Cheqa cristianos nacionespa maqanakuyninkupi,  chʼampayninkupitaj chhapukuyta, ¿atinkumanchu karqa? Ñaupaj kaj Guerra Mundial kashajtin Bibliamanta Yachaqajkunaqa, cristianos mana runa masinkuta wañuchinankuchu kasqanta entienderqanku (Mat. 26:52). Jinapis ashkhasqa, Romanos 13:1 versiculopi “kamachejkunata” kasukuymanta parlasqanta, mana allintachu entienderqanku. Chayrayku maqanakuyman riyta atisqankuta, soldado pʼachata churakuyta atisqankuta, armastapis japʼiyta atisqankuta yuyarqanku. Enemigonkuta wañuchinankupaj kamachisqas kaspataj, waj ladollaman baleananku karqa.

23, 24. ¿Imaynatá Iskay kaj Guerra Mundial kashajtin Romanos 13:1 versiculopi nisqanta entienderqanku, chantá imaynatá aswan sutʼita entienderqanku?

²³ Iskay kaj Guerra Mundial qallarisqantawan, Torremanta Qhawaj revistaqa maqanakuypi mana chhapukunachu kasqanta sumajta sutʼincharqa (inglespi 1 noviembre 1939 watapi, castellanopitaj marzo 1940 watapi). Chay yachaqanaqa sutʼincharqa, Satanaspa pachanpi kaj maqanakuykunapi, cheqa cristianos mana chhapukunankuta. Chay yuyaychayqa may sumajpuni karqa, imaraykuchus cheqa cristianosqa chay guerrapi runata wañuchispa mana juchallikorqankuchu. Chantapis 1929 watamantapacha publicacionesninchejpeqa, Romanos 13:1 versiculopi kamachejkunamanta parlasqan, mana kay pachamanta kamachejkunachu kasqanta sutʼincharqa, manaqa Jehovawan, Jesuswan kasqankuta. Jinapis chayta entiendesqankoqa mana allinchu karqa. Chayrayku astawan sutʼinchakunan karqa.

²⁴ Cristoj yachachisqasnenqa, espíritu santoj yanapayninwan aswan allinta chayta entienderqanku, Romanos 13:1-7 versiculosmanta  ashkha yachaqanaspi sutʼinchakojtin. Chay sutʼinchaykunaqa 1962 watapi Torremanta Qhawaj revistaspi 15 noviembre, 1 diciembre killaspi orqhokorqa (castellanopitaj 1 chantá 15 mayo 1963). Chaytaj Diospa kamachisninpaj may sumajpuni karqa. Chaypiraj entienderqanku, “Cesarpata kajtaqa Cesarman qopuychej, Diospa kajtataj Diosman qopuychej”, nispa Jesús nisqanta (Luc. 20:25). Cheqa cristianosqa, chay “kamachejkuna”, kay pachamanta kamachejkuna kasqankuta, paykunatataj kasukunanku kasqanta entienderqanku. Chaywanpis Diospa kamachiykunasninman churanakojtenqa mana kasukunankuchu karqa. Chayrayku, kamachejkuna Jehovata mana kasunanchejta niwajtinchej, ñaupa tiempomanta apóstoles jina ninchej: “Diostapuni astawanqa kasunayku tiyan, runasta kasunaykumantaqa”, nispa (Hech. 5:29). Kay libroj 13, 14 yachaqanasninpi, Diospa llajtan mana kay pachaj ruwaykunasninwan chhapukusqanmanta astawan ukhuncharisun.

25. ¿Imatá yuyanki Diospa Reinonmanta cheqa kajta allinta entiendesqanchejmanta?

²⁵ Cristianosqa, 1914 watamantapacha Diospa Reinonmanta ashkhataña yachakunchej. Maykʼajchus Diospa Reinon kamachiyta qallarisqanta, imastachus ruwanantapis. Chantapis sumajta entiendenchej, Jehovaj cheqa sonqo kamachisninmanta wakenqa janaj pachaman ripunankuta, wakintaj Jallpʼapi kausakunankuta. Chantá entiendellanchejtaj kamachejkunata maychus kajllata kasukunata, Diospa Reinonmantaj cheqa sonqos kanata. Chayrayku kayta tapurikuna kanman: “Jesucristo, allin kamachi yuyayniyojta cheqa yachachiykunata sutʼita entiendenanpaj mana yanapanmanchu karqa chay, ¿noqanchejpis entiendeyta atisunmanchu karqa?”, nispa. Cristowan, espíritu santowan yanapachikoyqa, ¡may sumaj bendicionpuni!