1, 2. Muunzila nzi Jesu mwaatondezya kuti ngusikusololela musongo?

AMWEEZYEEZYE kuti muntu umwi uucibwene kweenzyeenzya beenzu nguumusololela nomweendeenda kubona dolopo libotu. Dolopo eeli ndyeenzu kulindinywe alimwi akuli baabo mbomuli limwi, aboobo mulaabikkila kapati maano majwi oonse ngaamba sikumweenzyeenzya. Ziindi zimwi, nywebo alimwi abeenzyinyoko mbomuli limwi, calukkomano mwatalika kulibuzya kujatikizya zintu zimwi nzyomutanabona. Nokuba boobo, ciindi nomumubuzya sikumweenzyeenzya kujatikizya zintu eezyo, tainguli mpoonya-mpoonya ulalindila kusikila mane mwasika afwaafwi azintu eezyo. Mukuya kwaciindi, bwamukkomanisya busongo mbwajisi, nkaambo ulamwaambila zintu aciindi ceelede nomweelede kuzyizyiba.

² Banakristo bakasimpe bali mubukkale bukozyenye abwabeenzu aabo. Tuliyandide kapati kwiiya kujatikizya dolopo libotu kwiinda oonse, “munzi uujisi ntalisyo zini-zini,” nkokuti Bwami bwa Leza. (Heb. 11:10) Ciindi Jesu naakali anyika, walo mwini wakabasololela basikumutobela, kubagwasya kumvwisya makani malamfwu aajatikizya Bwami oobo. Sena wakali kwiingula mibuzyo yabo yoonse akubaambila makani oonse aajatikizya Bwami aciindi comwe? Peepe. Wakaamba kuti: “Ndicijisi zyintu zinji zyakumwaambila, pele tamukonzyi kuzimvwisya lino.” (Joh. 16:12) Mbwaanga ngosikusololela musongo kwiinda boonse, Jesu kunyina naakali kubaminya basikwiiya bakwe aluzyibo lunji ndobatakali kukonzya kumvwisya.

3, 4. (a) Mbuti Jesu mbwaazumanana kuyiisya bantu basyomeka kujatikizya Bwami bwa Leza? (b) Ino tulalanga-langa nzi mucibalo eeci?

³ Jesu wakaamba majwi aalembedwe mulugwalo lwa Johane 16:12 mubusiku bwamamanino aabuumi bwakwe bwaanyika. Naakaunka kujulu, mbuti mbwaakali kukonzya kuzumanana kubayiisya bantu basyomeka makani aajatikizya Bwami bwa Leza? Wakabasyomezya baapostolo bakwe basyomeka kuti: “Muuya wakasimpe, uyoomugwasya kukamvwisya kasimpe koonse.” * (Joh. 16:13) Muuya uusalala tulakonzya kuubona kuba mbuli sikweenzyeenzya beenzu uukkazika moyo. Jesu ubelesya muuya kuyiisya basikumutobela kufwumbwa makani ngobayandika kuzyiba aajatikizya Bwami bwa Leza—aciindi ceelede nobayandika kwaazyiba.

⁴ Atubone muuya uusalala wa Jehova mbowali kubasololela Banakristo bakasimpe kutegwa baamvwisye makani aamba zya  Bwami. Cakusaanguna, tulalanga-langa mbotwakazikuzyiba ciindi nobwakatalika kulela Bwami bwa Leza. Mpoonya, tulalanga-langa makani aamba baleli abalelwa ba Bwami alimwi abulangizi mbobajisi. Kumamanino, tulabona basikutobela Kristo mbobakamvwisya ncocaamba kusyomeka ku Bwami.

5, 6. (a) Mizeezo nzi iilubide iijatikizya kutalika kulela kwa Bwami amulimo wabutebuzi njobakajisi Basikwiiya Bbaibbele? (b) Nkaambo nzi mizeezo iili boobu iilubide ncoiteelede kutupa kuyeeya kuti Jesu taakwe naakali kubasololela basikumutobela?

⁵ Mbuli mbotwakabona mu Cibalo 2 cabbuku eeli, kwamyaka minji Basikwiiya Bbaibbele bakali kwaamba kujatikizya mwaka wa 1914 kuti uyakuba mwaka uuyandika kapati mukuzuzikizya businsimi bwamu Bbaibbele. Nokuba boobo, aciindi eeco bakali kusyoma kuti kubako kwa Kristo kwakatalikide mu 1874, kuti wakatalika kulela kujulu mu 1878, alimwi akuti Bwami buyakukkazyikizyigwa cakumaninina mu October 1914. Bakali kusyoma kuti mulimo wabutebuzi wakali kuyakuzumanana kuzwa mumwaka wa 1874 kusikila mu 1914, mpoonya kumamanino aamulimo ooyu bananike bakali kuyakutolwa kujulu. Sena mizeezo iilubide iili boobu itondezya kuti Jesu taakwe naakali kubasololela bantu aabo basyomeka kwiinda mumuuya uusalala?

⁶ Peepe! Amuyeeye alimwi cikozyanyo cesu icili kumatalikilo aacibalo. Sena mizeezo iilubide amibuzyo yabeenzu yakuyandisisya kuzyiba zintu inga yapa kuti bamudooneke sikubeenzyeenzya? Peepe! Mbubwenya buyo, nokuba kuti bantu ba Leza balasola kumvwisya makani amwi aajatikizya makanze aa Jehova kacitanasika ciindi cakuti muuya uusalala ubasololele kukasimpe kali boobo, cilisalede kuti Jesu ulabasololela. Aboobo, aabo ibasyomeka balazumina kululamikwa, alimwi cakulicesya balacinca mizeezo yabo.—Jak. 4:6.

7. Ino bantu ba Leza bakalongezyegwa amumuni uuli buti wakumuuya?

⁷ Mumyaka yakatobela kuzwa mumwaka wa 1919, bantu ba Leza bakalongezyegwa kwiinda mukumunikilwa amumuni wakumuuya. (Amubale Intembauzyo 97:11.) Mu 1925, kwakalembwa cibalo ciyandika kapati mu Ngazi Yamulindizi yamu Chingisi, icakajisi mutwe wakuti “Birth of the Nation” (Ikuzyalwa kwa Cisi). Cakajisi bumboni bwamu Magwalo ibwakali kusinizya kuti Bwami bwa Mesiya bwakazyalwa mu 1914, ikuzuzikizya businsimi ibwaamba zyamukaintu wa Leza wakujulu iwakali kutumbuka kweelana ambokulembedwe mulugwalo lwa Ciyubunuzyo caandaano 12. * Cibalo alimwi cakatondezya kuti kupenzyegwa alimwi abuyumuyumu ibwakasikila bantu ba Jehova mumyaka yankondo eeyo zyakali zitondezyo izyakali kusinizya kuti Saatani wakawaalwa aansi kuzwa kujulu, kajisi “bukali bupati, mbwaanga ulizyi kuti ujisi buyo kaindi kaniini.”—Ciy. 12:12.

8, 9. (a) Mbuti mbobakatalika kumvwisya mbobuyandika Bwami bwa Leza? (b) Ino mibuzyo nzi njotutiilange-lange?

⁸ Ino Bwami oobu buyandika kapati buti? Kutalikila mu 1928, Ngazi Yamulindizi yakatalika kukankaizya kaambo kakuti Bwami bwa Leza bulayandika kapati kwiinda lufwutuko lwesu ndotujana mucinunuzyo. Inzya, kwiinda mu Bwami bwa Mesiya Jehova uyakusalazya zina lyakwe, kusumpula bweendelezi bwakwe, alimwi akuzuzikizya makanze oonse ngajisi kujatikizya bantu.

 ⁹ Mbaani ibakali kuyakulela antoomwe a Kristo mu Bwami oobo? Mbaani ibakali kuyakuba balelwa baanyika ba Bwami oobo? Alimwi mulimo nzi ngobeelede kubikkila kapati maano basikutobela Kristo?

10. Ncinzi ncobali kusyoma bantu ba Leza kuzwa kaindi kujatikizya ba 144,000?

¹⁰ Kakuceede myaka minji kuti usike mwaka wa 1914, Banakristo bakasimpe bakalizyi kuti basikutobela Kristo basyomeka ibali 144,000 bayakulela anguwe kujulu. * Basikwiiya Bbaibbele aabo bakalizyi kuti ooyu wakali mweelwe wini-wini alimwi akuti kusalwa kwakatalika mumwaanda wamyaka wakusaanguna C.E.

11. Mbuti aabo ibalangilwa kuba cibeela canabwiinga wa Kristo mbobakatalika kuumvwisya mulimo wabo waanyika?

¹¹ Aboobo, ino mulimo nzi ngobakalaililwa kubeleka nobakacili anyika aabo ibakali kulangila kuba cibeela canabwiinga wa Kristo? Bakazyiba kuti Jesu wakaukankaizya kapati mulimo wakukambauka alimwi wakatondezya kuti mulimo ooyo wakali kweendelana aciindi cakutebula. (Mt. 9:37; Joh. 4:35) Mbuli mbotwakabona mu Cibalo 2, kwaciindi cili mbocibede bakali kuyeeya kuti ciindi cakutebula cakali kuyakutola myaka iili 40, alimwi akuti kumamanino bananike bakali kuyakutolwa kujulu. Nokuba boobo, akaambo kakuti mulimo wakazumanana noyakainda myaka iili 40, kumvwisya ooko kwakali kuyandika kucinca. Lino tulizyi kuti ciindi cakutebula—ciindi cakwaandaanya maila ansaku, nkokuti kwaandaanya Banakristo bananike basyomeka kuzwa ku Banakristo bakubeja—cakatalika mu 1914. Ciindi cakalisikide cakuti babikkile maano kukubunganya baabo basyeede ibayakuunka kujulu!

12, 13. Mbuti cikozyanyo ca Jesu cabanakalindu ibali kkumi acamatalenta mbocazuzikizyigwa mumazuba aamamanino?

¹² Kuzwa mu 1919 kuyakumbele, Kristo wakazumanana kusololela muzike musyomesi uucenjede kuti abikkile maano kumulimo wakukambauka. Kristo wakatalisya mulimo ooyu mumwaanda wamyaka wakusaanguna. (Mt. 28:19, 20) Alimwi wakatondezya bube mbobakali kuyandika kuba ambubo basikumutobela bananike kutegwa bakauzuzikizye mulimo wakukambauka. Ino wakacita buti oobo? Mucikozyanyo cakwe cabanakalindu bali kkumi, wakatondezya kuti bananike beelede kuzumanana kulangila, nkokuti kupakamana kumuuya, kutegwa bazuzikizye mbaakani yabo yakutola lubazu mubwiinga bupati bwakujulu, ibuyakucitwa ciindi “nabwiinga,” nkokuti iba  144,000, nobayakumusangana Kristo. (Ciy. 21:2) Mpoonya mucikozyanyo cakwe camatalenta, Jesu wakayiisya kuti babelesi bakwe bananike banakuli basungu mumulimo wakukambauka ngobakapegwa.—Mt. 25:1-30.

¹³ Mumwaanda wamyaka wainda, bananike batondezya ncobeni kuti balipakamene alimwi akuti mbasungu. Cakutadooneka, bayakulumbulwa akaambo kakupakamana kwabo! Nokuba boobo, sena mulimo mupati wakutebula wakali kuyakujatikizya buyo kuyobolola ba 144,000 ibaceede ibayakulela a Kristo?

14, 15. Ninkamu zili zyone izyakabandikwa mubbuku lyakuti The Finished Mystery?

¹⁴ Kwaciindi cilamfwu bamaalumi abamakaintu basyomeka balikuyandisisya kwiizyiba “nkamu mpati” yaambidwe mulugwalo lwa Ciyubunuzyo 7:9-14. Cakutadooneka, kacitanasika ciindi cakuti Kristo ayubunune nkamu eeyi mpati, twaambo tunji itwakali kwaambwa twakali kujatikizya kasimpe katakatazyi kumvwisya nkotuzyi alimwi nkotuyanda mazuba aano.

¹⁵ Mu 1917, bbuku litegwa The Finished Mystery lyakaamba kuti kuli “zibeela naa misyobo yobilo iijatikizya lufwutuko lwabaabo baunka kujulu, alimwi azibeela naa misyobo yobilo iijatikizya lufwutuko lwaanyika.” Ino mbaani ibakali munkamu eezyi zyone zyabantu ibakajisi bulangizi oobo bwiindene bwalufwutuko? Munkamu yakusaanguna kwakali ba 144,000, ibakali kuyakulela antoomwe a Kristo. Nkamu yabili, mwakali bankamu mpati. Aciindi eeco musyule, bakali kusyoma kuti aaba mbabaabo ibaambwa kuti Banakristo ibakacili muzikombelo zya Bunakristo Bwanyika. Bakalijisi lusyomo pesi tiilwakali luyumu cakuti inga lwabagwasya kuzumanana kusyomeka. Aboobo, bakali kuyakupegwa zyuuno zyaansi kujulu. Kujatikizya baabo ibakali kuyakukkala anyika, bakali kuyeeya kuti nkamu yatatu yakali yababelesi ‘bakali kusyomeka kaindi’—bantu basyomeka mbuli Abrahamu, Musa abambi—bakali kuyakuba beendelezi babaabo ibali munkamu yane, nkokuti bantu boonse.

16. Nkumunikilwa kuli buti kwakumuuya ikwakacitika mu 1923 amu 1932?

¹⁶ Mbuti muuya uusalala mbowakabagwasya basikutobela Kristo kutegwa babumvwisye bupanduluzi mbotuyandisisya mazuba aano? Eeci cakacitika buce-buce, kwiinda mukumunikilwa amumuni wakumuuya. Mumwaka wa 1923, Ngazi Yamulindizi yakatalika kwaamba zyankamu imwi iyatakajisi bulangizi bwakuunka kujulu iyakali kuyakukkala anyika akweendelezyegwa a Kristo. Mu 1932, Ngazi Yamulindizi yakajisi makani aamba zya Jonadabu (Jehonadabu), iwakasala kugwasyilizya munanike wa Leza muna Israyeli Mwami Jehu mukulwana bukombi bwakubeja. (2 Bam. 10:15-17) Cibalo eeco cakaamba kuti kwakali kabunga kabantu ibakali mbuli Jonadabu, alimwi cakayungizya kwaamba kuti: Jehova uyakufwutula nkamu eeyi “lya Amagedoni” kutegwa bakakkale ano anyika.

17. (a) Mu 1935, mumuni uuli buti wakumuuya iwakamwekesya? (b) Mbuti Banakristo basyomeka mbobakajatikizyigwa akumvwisya ooko kupya kujatikizya nkamu mpati? (Amubone kabbokesi kakuti: “ Ikuswa Ciya Kupati Ikutondezya Kwaanguluka.”)

¹⁷ Mu 1935 mumuni wakumuuya wakamwekesya. Lyamuswaangano wacooko iwakacitilwa ku Washington, D.C., inkamu mpati yakazyibwa kuti nciinga cabantu ibayakukkala anyika, bali mbuli mbelele zyaambidwe mucikozyanyo ncakaamba Jesu  cambelele ampongo. (Mt. 25:33-40) Nkamu mpati yakali kuyakuba cibeela ‘cambelele zimbi,’ Jesu nzyaakaamba kuti: “Azyalo eezyo ndeelede kuzileta.” (Joh. 10:16) Ciindi mukwesu J. F. Rutherford iwakali kukanana makani naakati: “Aabo boonse ibajisi bulangizi bwakupona kukabe kutamani ano anyika abaimikile,” bantu bainda kucisela bakaimikila! Mpoonya wakoompolola ategwa: “Amubone, Nkamu mpati!” Banji bakakkomana kubumvwisya bulangizi bwabo bwakumbele.

18. Mbuti basikutobela Kristo mbobabikkila maano kumulimo wakukambauka, alimwi mbubotu nzi ibwajanika?

¹⁸ Kuzwa leelyo, Kristo wali kusololela bantu bakwe kutegwa babikkile kapati maano kumulimo wakutamba bankamu mpati ibayakufwutuka mapenzi mapati. Akusaanguna, cakali kulibonya mbuli kuti nkamu eeyi taikakomeni kapati. Aciindi cimwi, Mukwesu Rutherford wakaambide kuti: “Kulibonya kuti ‘bankamu mpati’ tabakavwuli kapati mbuli mbotuyeeya.” Cakutadooneka, tulizyi Jehova mbwaaulongezya mulimo wakutebula kuzwa leelyo! Kwiinda mukusololelwa a Jesu alimwi amuuya uusalala, boonse antoomwe, bananike abeenzyinyina ‘ibambelele zimbi,’ baba mbubwenya mbwaakaambila limwi Jesu—“itanga lyomwe” ibabelekela antoomwe kwiinda mukusololelwa “amweembezi omwe.”

19. Mbuti mbotukonzya kutola lubazu mukukomezya nkamu mpati?

¹⁹ Bantu banji basyomeka bayakupona kukabe kutamani anyika muparadaiso, kabeendelezyegwa a Kristo abasikulelanyina ba 144,000. Sena tacikkomanisyi kulanga-langa Kristo mbwaali kubasololela bantu ba Leza kutegwa babumvwisye kabotu-kabotu bulangizi buli boobu bwamu Magwalo? Eelo kaka tulijisi coolwe cakwaambila bambi mbotuswaanganya mumulimo wakukambauka kujatikizya bulangizi oobu! Aboobo, atube basungu kweelana abukkale bwesu kutegwa nkamu mpati izumanane kukomena, akupa kuti zina lya Jehova litembaulwe kwiinda kaindi!—Amubale Luka 10:2.

20. Nzibeela nzi izipanga mbunga ya Saatani, alimwi mbuti kusyomeka kwa Bunakristo mbokujatikizyidwe?

²⁰ Bantu ba Leza mbobakali kuyaabwiiya kujatikizya Bwami, bakali kuyandika alimwi kumvwisya ncocaamba kusyomeka kumfwulumende yakujulu. Kujatikizya makani aaya, mu 1922, Ngazi Yamulindizi yakatondezya kuti kuli mbunga zyobilo izili mukubeleka, mbunga ya Jehova aaya Saatani, mbunga ya Saatani ibikkilizya makwebo, bukombi, alimwi atwaambo twacisi. Aabo ibasyomeka ku Bwami bwa Leza ibweendelezyegwa a Kristo beelede kusyomeka kwiinda mukweeleba kujatikizyigwa munzila iiteelede mumbazu zili zyoonse zyambunga ya Saatani. (2 Ko. 6:17) Ino eeci caamba nzi?

21. (a) Mbuti muzike musyomesi mbwaali kubacenjezya bantu ba Leza kujatikizya mbunga zipati-pati zyamakwebo? (b) Mu 1963, ino Ngazi Yamulindizi yakayubununa nzi kujatikizya “Babuloni Mupati”?

²¹ Cakulya cakumuuya icipegwa amuzike musyomesi cazumanana kuyubununa bumpelenge ibujanika mumbunga zipati-pati zyamakwebo alimwi bantu ba Leza bacenjezyegwa kuti tabeelede kujatikizyigwa kwiinda mukuba bantu bayandisya lubono. (Mt. 6:24) Mbubwenya buyo, mabbuku eesu azumanana kutugwasya kuzyiba cibeela cabukombi icizulilwa kumbunga ya Saatani. Mu 1963, Ngazi Yamulindizi cakutainda mumbali yakatondezya kuti “Babuloni Mupati” wiiminina bukombi boonse bwakubeja  kutali buyo Bunakristo Bwanyika. Aboobo, mbubwenya mbotuyakubona mu Cibalo 10 mubbuku eeli, bantu ba Leza kufwumbwa nkobabede, kufwumbwa zilengwa nzyobajisi, bagwasyigwa kuti ‘bazwe mulinguwe,’ akulisalazya kumicito yoonse yabukombi bwakubeja.—Ciy. 18:2, 4.

22. Ciindi ca Nkondo Yakusaanguna Yanyika Yoonse, mbuti bantu ba Leza banji mbobakali kuluteelela lugwalo lwa Baloma 13:1?

²² Ino mbuti kujatikizya cibeela cambunga ya Saatani catwaambo twacisi? Sena Banakristo bakaleelede kutola lubazu munkondo zyazisi? Ciindi ca Nkondo Yakusaanguna Yanyika Yoonse, Basikwiiya Bbaibbele bakakamvwisya kaambo kakuti basikutobela Kristo tabeelede kujaya bantunyina. (Mt. 26:52) Nokuba boobo, kubantu banji, majwi aajanika mulugwalo lwa Baloma 13:1 aamba kumvwida “beendelezi” bakali kwaateelela kuti beelede kunjila mulimo wabusikalumamba, kusama zisani zyabasilikani, akunyamuna ntobolo; nokuba boobo, ikuti baambilwa kujaya sinkondonyina, beelede kudubula buyo mumuwo.

23, 24. Ciindi ca Nkondo Yabili Yanyika Yoonse, mbuti mbotwakali kuluteelela lugwalo lwa Baloma 13:1, alimwi ino basikutobela Kristo bakagwasyigwa buti kulumvwisya munzila iiluzi?

²³ Ciindi Nkondo Yabili Yanyika Yoonse noyakatalika mu 1939, Ngazi Yamulindizi yakajisi makani manji aakali kujatikizya kutatola lubazu mutwaambo twacisi. Cibalo cakatondezya caantangalala kuti Banakristo taakwe nobakali kuyakutola lubazu munkondo amukulwana kwazisi zyamunyika ya Saatani. Eelo kaka oobu bwakali busolozi ibwakapegwa aciindi ceelede! Munzila eeyo, basikutobela Kristo kunyina nobakaba amulandu wakutila bulowa iwakasikila masi ciindi cankondo. Nokuba boobo, kumatalikilo aamwaka wa 1929, mabbuku eesu akali kwaamba kuti beendelezi baambidwe mulugwalo lwa Baloma 13:1 tiibakali beendelezi  bamunyika pe, pele ngu Jehova a Jesu. Makani aaya akacili kuyandika kwaamvwisya munzila iiluzi.

²⁴ Muuya uusalala wakabasololela basikutobela Kristo kwaamvwisya makani aayo mu 1962, ciindi zibalo zitakalubwi izyakali kujatikizya lugwalo lwa Baloma 13:1-7 nozyakamwaigwa mu Ngazi Yamulindizi yamu Chingisi ya November 15 a December 1. Aciindi eeco, bantu ba Leza bakaimvwisya njiisyo iijatikizya kumvwida beendelezi kweelana ambwaakaamba Jesu mumajwi aazyibidwe kapati aakuti: “Amupe Kaisala zyintu zya Kaisala, pele zyintu zya Leza amupe Leza.” (Lk. 20:25) Lino, Banakristo bakasimpe balizyi kuti beendelezi mbabaabo ibali mubweendelezi munyika ino alimwi Banakristo beelede kubamvwida. Nokuba boobo, kumvwida ooko kuli mpokugolela. Ikuti beendelezi bamunyika batwaambila kusotoka mulawo wa Jehova Leza, tweelede kwiingula mbuli mbobakaingula baapostolo kuti: “Tweelede kumvwida Leza mbwali ngomweendelezi kutali bantu.” (Mil. 5:29) Mu Cibalo 13 a 14 mubbuku eeli, tuyakwiiya zinji kujatikizya bantu ba Leza mbobazumanana kwiitobela njiisyo ya Banakristo yakutatola lubazu mutwaambo twacisi.

25. Nkaambo nzi mulalumba kubusolozi bupegwa amuuya uusalala mukumvwisya Bwami bwa Leza?

²⁵ Amuyeeye buyo kujatikizya zintu zyoonse nzyobaiya basikutobela Kristo zijatikizya Bwami mumwaanda ooyu wainda. Twaiya kujatikizya Bwami bwa Leza nobwakatalika kulela kujulu alimwi akaambo ncobuyandika. Tulibuzyi kabotu-kabotu bulangizi mbobajisi bantu basyomeka, bulangizi bwakuunka kujulu abwakukkala anyika. Alimwi tulizyi mbotukonzya kusyomeka ku Bwami bwa Leza akumvwida beendelezi bamunyika. Aboobo, amulibuzye kuti, ‘Sena nondali kukonzya kwaamvwisya makani aaya aakasimpe nokwali kuti Jesu Kristo tanaakamusololela muzike musyomesi ano anyika kumvwisya makani aaya alimwi akuyiisya bambi?’ Eelo kaka tulijisi coolwe cakusololelwa a Kristo alimwi amuuya uusalala!