1, 2. Yesu ndi mutandudzi wa vhuṱali nga muhumbulo ufhio?

 KHA ri ri mutandudzi a re na tshenzhelo u ni tandudza ḓoroboni yo nakaho vhukuma. Ndi lwa u thoma inwi na vhane na khou tshimbila navho ni tshi ya ḓoroboni yeneyo, nga zwenezwo ni thetshelesa zwoṱhe zwine na vhudzwa nga mutandudzi. Nga zwiṅwe zwifhinga, inwi na vhatanduli nga inwi ni mangadzwa nga zwithu zwine na khou zwi vhona lwa u tou thoma henefho ḓoroboni. Naho zwo ralo, musi ni tshi vhudzisa mutandudzi waṋu nga ha zwenezwo zwithu, ha ni vhudzi u swika no no vha tsini na henefho fhethu, ni tshi vho thoma u zwi vhona. Nga u ya ha tshifhinga, ni mangadzwa nga vhuṱali hawe, ngauri u ni vhudza zwine na ṱoḓa u zwi ḓivha nga tshifhinga tsho teaho.

² Vhakriste vha ngoho vha vhuimoni vhu fanaho na ha vhenevho vhatanduli. Ri swela u guda nga ha muḓi wo nakaho vhukuma, “muḓi u re na mutheo wa vhukuma,” Muvhuso wa Mudzimu. (Vhaheb. 11:10) Musi Yesu e kha ḽifhasi o dededza vhatevheli vhawe nga tshavhukoma, a ita uri vha pfesese wonoyo Muvhuso nga ho dzikaho. Naa o fhindula mbudziso dzavho dzoṱhe na u vha vhudza zwoṱhe nga ha wonoyo Muvhuso nga luthihi? Hai. O ri: “Ndi kha ḓi vha na zwithu zwinzhi zwine nda nga ni vhudza zwone, fhedzi ni nga si kone u zwi pfesesa zwino.” (Yoh. 16:12) Yesu mutandudzi o ṱalifhaho u fhira vhoṱhe, ho ngo vhuya a lemedza vhafunziwa vhawe nga u vha vhudza zwithu zwe vha vha vha sa ḓo kona u zwi pfesesa.

3, 4. (a) Yesu o bvela hani phanḓa a tshi funza vhathu vha fulufhedzeaho nga ha Muvhuso wa Mudzimu? (b) Ri ḓo haseledza mini kha yeneyi ndima?

³ Yesu o bula maipfi o ṅwalaho kha Yohane 16:12 nga vhusiku ha u fhedza ha vhutshilo hawe kha ḽifhasi. Nga murahu ha lufu lwawe, o vha a tshi ḓo kona hani u bvela phanḓa u funza vhathu vha fulufhedzeaho nga ha Muvhuso wa Mudzimu? O khwaṱhisedza vhaapostola a ri: “Muya une wa dzumbulula ngoho, u ḓo ni livhisa kha ngoho yoṱhe.” a (Yoh. 16:13) Ri nga dzhia muya mukhethwa sa mutandudzi a sa fheli mbilu. Yesu u shumisa muya u itela u funza vhatevheli vhawe zwiṅwe na zwiṅwe zwine vha tea u zwi ḓivha nga ha Muvhuso wa Mudzimu—nga tshifhinga tshine vha tea u zwi ḓivha ngatsho.

⁴ Kha ri ṱhogomele nḓila ye muya mukhethwa wa Yehova wa vha u tshi khou ḓi livhisa ngayo Vhakriste vha mbilu dzavhuḓi uri vha pfesese wonoyo Muvhuso nga vhuḓalo. Tsha u thoma, ri ḓo sedza  pfeseso yashu ya uri Muvhuso wa Mudzimu wo thoma lini u vhusa. Nga murahu ri ḓo ṱolisisa nḓila ine ra nga ṱalula ngayo vhavhusi na vhavhusiwa vha Muvhuso na fulufhelo ḽine vha vha naḽo. Tsha u fhedza, ri ḓo vhona nḓila ye vhatevheli vha Kristo vha pfesesa ngayo nga vhuḓalo zwine zwa ṱoḓea uri vha fulufhedzee kha wonoyo Muvhuso.

5, 6. (a) Ndi afhio mavhonele o khakheaho e Vhagudi vha Bivhili vha vha vhe nao nga ha u tikwa ha Muvhuso na khaṋo? (b) Ndi ngani eneo mavhonele o khakheaho a songo tea u ri ita uri ri timatime uri Yesu u khou livhisa vhatevheli vhawe?

⁵ Samusi ro zwi vhona kha Ndima ya 2 ya ino bugu, Vhagudi vha Bivhili vho fhedza mahumi a miṅwaha vha tshi khou amba uri ṅwaha wa 1914 u ḓo vha wa ndeme kha u khunyelela ha vhuporofita ha Bivhili. Naho zwo ralo, nga tshenetsho tshifhinga vho vha vha tshi tenda uri u vha hone ha Kristo ho thoma nga 1874, uri o thoma u vhusa ṱaḓulu nga 1878 na uri Muvhuso wo vha u tshi ḓo tikwa nga vhuḓalo nga October 1914. Vho vha vha tshi tenda uri khaṋo i ḓo thoma nga 1874 u swika nga 1914 nahone yo vha i tshi ḓo guma musi vhaḓodzwa vha tshi kuvhanganyelwa ṱaḓulu. Naa mavhonele o khakheaho a ngaho eneo a ita uri ri timatime uri Yesu o vha a tshi khou livhisa vhenevho vhahashu vha fulufhedzeaho nga muya mukhethwa?

⁶ Na kathihi! Dovhani ni humbule nga tshifanyiso tshi re mathomoni a yeneyi ndima. Naa mavhonele a vhatanduli a u ṱoḓa u ṱalutshedzwa zwithu tshifhinga tshi sa athu swika na mbudziso dzavho dzi sumbedzaho u fhisetshela u ḓivha, zwi ita uri vha timatime u fulufhedzea ha mutandudzi wavho? Na kathihi! Nga hu fanaho, naho nga zwiṅwe zwifhinga vhathu vha Mudzimu vha tshi lingedza u pfesesa zwidodombedzwa zwa ndivho ya Yehova hu sa athu u swika tshifhinga tsha uri muya mukhethwa u vha livhise uri vha pfesese ngoho yo raloho, zwi khagala uri Yesu u khou vha ranga phanḓa. Nga zwenezwo, vhathu vha fulufhedzeaho vha a tenda u khakhululwa nahone vha shandula mavhonele avho nga u ḓiṱukufhadza.—Yak. 4:6.

7. Vhathu vha Mudzimu vho shudufhadzwa nga u ṱavhiselwa tshedza tshifhio tsha lwa muya?

⁷ U bva nga 1919, vhathu vha Mudzimu vho fhaṱutshedzwa nga u ṱavhelwa nga tshedza tsha muya. (Vhalani Psalme ya 97:11.) Nga 1925, magazini une wa pfi The Watch Tower wo vha u na thero yo khetheaho i re na tshiṱoho tshine tsha ri “U Bebwa Ha Lushaka.” Yo ṋea vhuṱanzi vhu pfalaho vhu bvaho Maṅwaloni ha uri Muvhuso wa Vhumessia wo bebwa nga 1914, zwa ḓadzisa tshifanyiso tsha vhuporofita tsha mufumakadzi wa Mudzimu wa ṱaḓulu a tshi khou beba, samusi zwo ṅwalwa kha Nzumbululo ndima ya 12. b Yeneyo thero yo dovha ya zwi bvisela khagala uri u tovholwa na khakhathi zwe zwa wela vhathu vha Yehova miṅwahani yeneyo ya nndwa zwo vha zwi zwiga zwi re khagala zwa uri Sathane o shakulwa ṱaḓulu, u a “ḓivha uri o salelwa nga tshifhinga tshiṱuku.”—Nzumb. 12:12.

8, 9. (a) Ndeme ya Muvhuso wa Mudzimu yo ombedzelwa hani? (b) Ndi mbudziso dzifhio dzine ra ḓo dzi ṱolisisa?

⁸ Muvhuso ndi wa ndeme nga nḓila-ḓe? Nga 1928, magazini une wa pfi The Watch Tower wo thoma u ombedzela uri Muvhuso ndi wa ndeme u fhira u tshidzwa ha muthu nga tshirengululi. Vhukuma, Yehova u ḓo shumisa Muvhuso wa Vhumessia u khetha dzina ḽawe, u lwela vhuvhusahoṱhe hawe na u ḓadzisa ndivho dzawe dzoṱhe malugana na vhathu.

 ⁹ Ndi vhafhio vhane vha ḓo vhusa na Kristo kha wonoyo Muvhuso? Ndi vhafhio vhane vha ḓo vhuswa nga wonoyo Muvhuso? Ndi ufhio mushumo une vhatevheli vha Kristo vha tea u farakanea ngawo?

10. Vhathu vha Mudzimu vho vha vha tshi pfesesa mini kale nga ha vha 144 000?

¹⁰ Mahumini a miṅwaha hu sa athu swika 1914, Vhakriste vha ngoho vho vha vha tshi vho zwi pfesesa uri vhatevheli vha Kristo vha fulufhedzeaho vha 144 000 vha ḓo vhusa nae ṱaḓulu. c Vhenevho Vhagudi vha Bivhili vho zwi ṱhogomela uri yeneyo mbalo ndi ya vhukuma na uri vha yeneyo mbalo vho thoma u kuvhanganywa ḓanani ḽa u thoma ḽa miṅwaha C.E.

11. Vhe vha vha vha tshi ḓo vha miraḓo ya muselwa wa Kristo vho ḓivha hani nga ha mushumo we vha vha vha tshi fanela u u ita kha ḽifhasi?

¹¹ Vhe vha vha vha tshi ḓo vha miraḓo ya muselwa wa Kristo vho avhelwa u ita mini musi vha tshee kha ḽifhasi? Vho zwi ṱhogomela uri Yesu o ombedzela mushumo wa u huwelela nahone a u ṱumanya na tshifhinga tsha khaṋo. (Mat. 9:37; Yoh. 4:35) Samusi ro zwi vhona kha Ndima ya 2, vho fhedza tshifhinga tshilapfu vha tshi humbula uri khaṋo i ḓo fhedza miṅwaha ya 40, ya guma musi vhaḓodzwa vha tshi kuvhanganyelwa ṱaḓulu. Naho zwo ralo, ho vha hu tshi ṱoḓea ṱhaluso yo engedzeaho ngauri mushumo wo bvela phanḓa nga murahu ha miṅwaha ya 40. Zwino ri a ḓivha uri tshifhinga tsha khaṋo—tsha u khethekanya goroi na tsheṋe, Vhakriste vho ḓodzwaho vha fulufhedzeaho kha Vhakriste vha mafanedza—tsho thoma nga 1914. Tsho vha tsho swika tshifhinga tsha u livhisa ṱhogomelo kha u kuvhanganywa ha tshivhalo tsho salaho tsha tshigwada tsha vhane vha ḓo tshila ṱaḓulu!

12, 13. Tshifanyiso tsha Yesu tsha vhasidzana vha fumi na tsha dzitalente tsho ḓadzea hani maḓuvhani a vhufhelo?

¹² U bva nga 1919, Kristo o bvela phanḓa a tshi livhisa mulanda a fulufhedzeaho na wa vhuṱali uri a ombedzele mushumo wa u huwelela. O ita wonoyo mushumo ḓanani ḽa u thoma ḽa miṅwaha. (Mat. 28:19, 20) O dovha a sumbedza pfaneleo dzine vhatevheli vhawe vho ḓodzwaho vha fanela u vha nadzo u itela u ḓadzisa wonoyo mushumo wa u huwelela. O zwi ita nga nḓila-ḓe? Kha tshifanyiso tshawe tsha vhasidzana vha fumi, o sumbedza uri vhaḓodzwa vha tea u dzula vho fhaṱuwa, vha si kumedze nga lwa muya, u itela uri vha swikelele tshipikwa tshavho tshihulwane tsha u shela mulenzhe kha munyanya muhulwane wa mbingano ngei ṱaḓulu, musi Kristo a tshi ṱangana na vha 144 000 vhane vha vha “muselwa” wawe. (Nzumb.  21:2) Zwenezwo, kha tshifanyiso tshawe tsha dzitalente, Yesu o funza uri vhashumeli vhawe vho ḓodzwaho vha ḓo fhisetshela u ita mushumo wa u huwelela we a vha kumedza wone.—Mat. 25:1-30.

¹³ Vhaḓodzwa vho fhaṱuwa na u fhisea ḓanani ḽa miṅwaha ḽo fhiraho. A zwi vhuyi zwa timatimisa uri u fhaṱuwa havho hu ḓo lambedzwa! Naho zwo ralo, naa mushumo muhulwane wa khaṋo wo vha u tshi katela u kuvhanganywa ha vha 144 000 fhedzi, vhane vha ḓo vhusa na Kristo?

14, 15. Ndi zwifhio zwigwada zwiṋa zwe zwa haseledzwa kha bugu The Finished Mystery?

¹⁴ Ndi kale vhanna na vhafumakadzi vha fhiseaho vha tshi swela u ḓivha nga ha “gogo ḽihulu” ḽo bulwaho kha Nzumbululo 7:9-14. A zwi mangadzi uri musi tshi sa athu vha tshifhinga tsha uri Kristo a ṱalule tshenetshi tshigwada tshihulwane, vhunzhi ha zwe zwa ambiwa nga ha enea mafhungo zwo vha zwo fhambana tshoṱhe na ngoho i pfalaho, i leluwaho ine ra i ḓivha na u i funa ṋamusi.

¹⁵ Nga 1917, bugu ine ya pfi The Finished Mystery yo amba uri hu na “vhuimo kana mifuda mivhili ya u tshidzwa u itela u tshila Ṱaḓulu na vhuimo kana mifuda mivhili ya u tshidzwa u itela u tshila kha ḽifhasi.” Ndi vhafhio vha vhe vha vha vha tshi wela kha zwenezwo zwigwada zwiṋa zwi re na mafulufhelo a sa fani a u tshidzwa? Tshigwada tsha u thoma ho vha hu vha 144 000, vhane vha ḓo vhusa na Kristo. Tshigwada tsha vhuvhili ho vha hu vha gogo ḽihulu. Kale ho vha hu tshi humbulwa uri havha vho vha vhe vhane vha ḓivhidza Vhakriste, vhane vha kha ḓi dzhena kereke dza Vhudzhagane. Vho vha vhe na lutendo, fhedzi lu songo eḓanaho lune vha nga kona u fulufhedzea nga ho khwaṱhaho. Nga zwenezwo, vho vha vha tshi ḓo ṋewa vhuimo ha fhasi ṱaḓulu. Malugana na ḽifhasi, ho vha hu tshi humbulwa uri tshigwada tsha vhuraru, “vhathu vha kale vha ṱhonifheaho”—vha ngaho vhanna vha fulufhedzeaho Abrahamu, Mushe na vhaṅwe—vha ḓo ingamela tshigwada tsha vhuṋa, tshine tsha imela vhathu vhoṱhe nga u tou angaredza.

16. Ndi hufhio huṅwe u ṱavha ha tshedza tsha lwa muya he ha vha hone nga 1923 na nga 1932?

¹⁶ Muya mukhethwa wo livhisa hani vhatevheli vha Kristo uri vha pfesese mafhungo nga nḓila ine ra a dzhia ngayo ṋamusi? Zwo itea nga zwiṱuku nga zwiṱuku, nga u ṱavha ha tshedza tsha lwa muya. Mathomoni a vho-1923, magazini une wa pfi The Watch Tower wo amba nga ha tshigwada tsha vhathu vha si na lutamo lwa u tshila ṱaḓulu, vhane vha ḓo tshila kha ḽifhasi nga fhasi ha vhuvhusi ha Kristo. Nga 1932, magazini une wa pfi The Watchtower wo haseledza nga ha Yonadaba, we a ḓiṱanganya na Yehu Khosi yo ḓodzwaho ya Isiraele, u itela u mu tikedza musi a tshi lwisana na vhurabeli ha mazwifhi. (2 Dzikh. 10:15-17) Yeneyo thero yo amba uri musalauno hu na tshigwada tsha vhathu vhe vha vha vha tshi nga Yonadaba, ya engedza nga ḽa uri Yehova u ḓo ita uri tshenetshi tshigwada tshi “ponyoke nndwa ya Haramagedo” uri tshi tshile fhano kha ḽifhasi.

17. (a) Ndi hufhio huṅwe u ṱavha huhulwane ha tshedza tsha lwa muya he ha vha hone nga 1935? (b) Vhakriste vha fulufhedzeaho vho kwamea hani nga pfeseso ntswa ya malugana na gogo ḽihulu? (Sedzani bogisi “ Vho Tou Xu!”)

¹⁷ Nga 1935 ha vha na huṅwe u ṱavha huhulwane ha tshedza tsha lwa muya. Buthanoni ḽe ḽa farelwa ngei Washington, D.C., ho ṱaluswa uri gogo ḽihulu ndi tshigwada tsha kha ḽifhasi, ḽi fana na  nngu dza kha tshifanyiso tsha Yesu tsha nngu na mbudzi. (Mat. 25:33-40) Vha gogo ḽihulu vha ḓo vha tshipiḓa tsha vha “dziṅwe nngu,” dze Yesu a amba uri: “Na dzenedzo ndi fanela u dzi ḓisa.” (Yoh. 10:16) Musi tshiambi, J. F. Rutherford, a tshi ri: “Ri humbela uri vhoṱhe vha re na fulufhelo ḽa u tshila kha ḽifhasi nga hu sa fheli vha ime,” tshivhalo tshi ṱoḓaho u vha hafu ya vhathetshelesi tsho takuwa! Rutherford a ri: “Vhonani! Gogo ḽihulu!” Vhanzhi vho kwamea nga ho dzikaho musi vha tshi fheleledza vho pfesesa fulufhelo ḽavho ḽa vhumatshelo.

18. Vhatevheli vha Kristo vho ita vhuḓidini vhufhio vhuḓinḓani nahone ha vha na mvelelo dzifhio?

¹⁸ U bva nga tshenetsho tshifhinga, Kristo o livhisa vhathu vhawe uri vha ite vhuḓidini ha u kuvhanganya vhathu vhane vha ḓo vha miraḓo ya ḽeneḽi gogo ḽihulu ḽine ḽa ḓo ponyoka maṱungu mahulu. U thomani honoho u kuvhanganywa ho vhonala hu huṱuku. Wahashu Rutherford o vhuya a ri: “Zwi vhonala u nga ‘gogo ḽihulu’ a ḽi nga ḓo vha ḽihulwane.” Vhukuma, ri a zwi ḓivha zwino uri Yehova o fhaṱutshedza zwihulu khaṋo u bva tsheetsho! Vha tshi livhiswa nga Yesu na muya mukhethwa, vhaḓodzwa na khonani dzavho vha “dziṅwe nngu” vho vha zwe Yesu a dzula o zwi amba—“sambi ḽithihi” ḽine ḽa shuma nga fhasi ha “mulisa muthihi.”

19. Ri nga shela hani mulenzhe kha u andisa gogo ḽihulu?

¹⁹ Vhunzhi ha vhathu vha fulufhedzeaho vha ḓo tshila tshoṱhe kha ḽifhasi ḽa paradiso, ḽine ḽa ḓo vhuswa nga Kristo na vhavhusi ngae vha 144 000. Zwi a takadza u humbula nga ha nḓila ye Kristo a livhisa ngayo vhathu vha Mudzimu uri vha vhe na fulufhelo ḽi pfalaho ḽi bvaho Maṅwaloni ḽa vhumatshelo! Ndi ndugelo yavhuḓi lungafhani u vhudza vhane ra ṱangana navho vhuḓinḓani nga ha ḽeneḽo fulufhelo! Kha ri fhisee u tendelana na zwiimo zwashu u itela uri gogo ḽihulu ḽi bvele phanḓa ḽi tshi engedzea, ḽi tshi renda dzina Yehova nga nḓila khulwane!—Vhalani Luka 10:2.

20. Ndi zwifhio zwipiḓa zwo vhumbaho dzangano ḽa Sathane nahone u fulufhedzea ha Vhukriste hu kwamea hani?

²⁰ Musi vhathu Mudzimu vha tshi khou bvela phanḓa u guda nga ha Muvhuso, zwo dovha zwa ṱoḓea uri vha pfesese nga vhuḓalo zwine u fulufhedzea kha wonoyo muvhuso wa ṱaḓulu zwa amba zwone. Kha ḽeneḽi sia, nga 1922, magazini une wa pfi The Watch Tower wo bula uri hu na madzangano mavhili, ḽa Yehova na ḽa Sathane, dzangano ḽa Sathane ndi ḽa zwa mabindu, vhurereli na politiki. Vhane vha fulufhedzea kha Muvhuso wa Mudzimu u re nga fhasi ha Kristo a vho ngo tea u litsha u fulufhedzea nga u ḓidzhenisa kha sia naho ḽi ḽifhio ḽa dzangano ḽa Sathane. (2 Vhakor. 6:17) Zwenezwo zwi amba mini?

21. (a) Mulanda a fulufhedzeaho o sevha hani vhathu vha Mudzimu nga ha mabindu mahulwane? (b) Nga 1963, magazini une wa pfi The Watchtower wo dzumbulula mini nga ha “Babele Ḽihulu”?

²¹ Zwiḽiwa zwa muya zwi bvaho kha mulanda a fulufhedzeaho tshifhinga tshoṱhe zwo bvukulula vhufhura ha mabindu mahulwane nahone zwa sevha vhathu vha Mudzimu uri vha si ḓidzhenise kha u tovhola zwithu zwi vhonalaho zwa enea mabindu mahulwane. (Mat. 6:24) Nga hu fanaho, khandiso dzashu dzo dzula dzi tshi bvukulula uri vhurereli ndi tshipiḓa tsha dzangano ḽa Sathane. Nga 1963, magazini une wa pfi The Watchtower wo bvisela khagala uri “Babele Ḽihulu” a ḽi imeli Vhudzhagane fhedzi, ḽi imela na vhurereli ha mazwifhi ha shango ḽoṱhe. Nga zwenezwo, samusi ri tshi ḓo zwi  vhona nga vhuḓalo kha Ndima ya 10 ya ino bugu, vhathu vha Mudzimu shangoni ḽoṱhe na kha mvelele dzoṱhe vho thuswa uri vha ‘bve khaḽo,’ vha ḓikunakise kha pfunzo dzoṱhe dza mazwifhi dza zwa vhurereli.—Nzumb. 18:2, 4.

22. Tshifhingani tsha Nndwa ya Shango ya U Thoma, vhunzhi ha vhathu vha Mudzimu vho pfesesa hani ṱhuṱhuwedzo ya Vharoma 13:1?

²² Hu pfi mini nga tshipiḓa tsha politiki tsha dzangano ḽa Sathane? Naa Vhakriste vha ngoho vha nga shela mulenzhe kha dzinndwa na khakhathi dza dzitshaka? Tshifhingani tsha Nndwa ya Shango ya U Thoma, vhunzhi ha Vhagudi vha Bivhili nga u tou angaredza vho zwi pfesesa uri vhatevheli vha Kristo a vho ngo tea u vhulaha vhaṅwe vhathu. (Mat. 26:52) Naho zwo ralo, vhanzhi vho humbula uri ṱhuṱhuwedzo ine ya wanala kha Vharoma 13:1 ya u thetshelesa “vhavhusi” i amba uri vha tea u ya nndwani, vha ambare yunifomo ya vhuswole nahone vha fare zwihali; fhedzi musi vha tshi vhudzwa uri vha vhulahe swina, vho vha vha tshi fanela u thuntsha muyani.

23, 24. Ro vha ri tshi pfesesa hani Vharoma 13:1 tshifhingani tsha Nndwa ya Shango ya Vhuvhili nahone vhatevheli vha Kristo vho livhiswa kha mavhonele afhio o teaho vhukuma?

²³ Nga 1939, musi Nndwa ya Shango ya Vhuvhili i tshi thoma, magazini une wa pfi The Watchtower wo gandisa thero ye ya haseledza nga vhuḓalo mafhungo a u sa dzhia sia. Yeneyo thero yo zwi sumbedza zwavhuḓi uri Vhakriste a vho ngo tea u ṱanganela kha dzinndwa na khakhathi dza dzitshaka dza shango ḽa Sathane. Ho vha vhulivhisi ho swikaho nga tshifhinga lungafhani! Nga zwenezwo, vhatevheli vha Kristo vha tsireledzwa kha mulandu muhulwane wa malofha we tshaka dza vha nawo kha yeneyo nndwa. Naho zwo ralo, u thoma nga 1929, khandiso dzashu dzo vha dzo amba na uri vhavhusi vho bulwaho kha Vharoma 13:1 vho vha vhe si vhavhusi vha shango, fhedzi vho vha vhe Yehova na Yesu. Ho vha hu tshi kha ḓi ṱoḓea pfeseso yo teaho.

 ²⁴ Muya mukhethwa wo livhisa vhatevheli vha Kristo uri vha vhe na pfeseso yo teaho nga 1962, musi hu tshi gandiswa thero dzo khetheaho dzine dza amba nga ha Vharoma 13:1-7 kha magazini une wa pfi The Watchtower wa ḽa 15 November na ḽa 1 December. Vhathu vha Mudzimu vha fheleledza vho pfesesa maitele a u ḓiṱukufhadza nga nḓila yo linganyiselwaho e Yesu a a dzumbulula kha maipfi awe a re na bvumo, ane a ri: “Kesare mu ṋeeni zwi re zwa Kesare, Mudzimu ni mu ṋee zwi re zwa Mudzimu.” (Luka 20:25) Zwino Vhakriste vha ngoho vha a pfesesa uri vhavhusi ndi vhane vha khou vhusa ḽino shango na uri Vhakriste vha tea u ḓiṱukufhadza khavho. Naho zwo ralo, honoho u ḓiṱukufhadza hu na mikano. Musi vhavhusi vha shango vha tshi ri vhudza uri ri si thetshelese Yehova Mudzimu, ri fhindula u fana na vhaapostola vha kale vhe vha ri: “Ri fanela u thetshelesa Mudzimu ane a vha muvhusi nṱhani ha vhathu.” (Mish. 5:29) Kha Ndima ya 13 na 14 ya ino bugu, ri ḓo guda zwinzhi nga ha nḓila ye vhathu vha Mudzimu vha shumisa ngayo maitele a Vhukriste a u sa dzhia sia.

25. Ndi ngani ni tshi dzhiela nṱha u livhiswa nga muya mukhethwa uri ni pfesese Muvhuso wa Mudzimu?

²⁵ Humbulani nga ha zwoṱhe zwe vhatevheli vha Kristo vha funzwa zwone nga ha Muvhuso miṅwahani ya ḓana yo fhelaho. Ro guda uri Muvhuso wa Mudzimu wo tikwa lini ṱaḓulu na nḓila ine wa vha wa ndeme ngayo. Ri a pfesesa zwavhuḓi mafulufhelo mavhili e vhathu vha fulufhedzeaho vha ṋewa one, fulufhelo ḽa u tshila ṱaḓulu na fulufhelo ḽa u tshila kha ḽifhasi. Ri a ḓivha nḓila ya u sumbedza u fulufhedzea kha Muvhuso wa Mudzimu ngeno ri tshi ḓiṱukufhadza nga nḓila yo linganyiselwaho kha vhavhusi vha shango. Ḓivhudziseni, ‘Naa ndo vha ndi tshi ḓo ḓivha yeneyi ngoho ya ndeme arali Yesu Kristo a songo livhisa mulanda wawe a fulufhedzeaho kha ḽifhasi uri a i pfesese nahone nga murahu a i funze vhaṅwe?’ Ndi phaṱhutshedzo yavhuḓi lungafhani u livhiswa nga Kristo na muya wawe mukhethwa!