第5章
君王使人明白王國嘅真理
1,2． 點解話，耶穌係最有智慧嘅嚮導呢？
試諗吓，一個經驗豐富嘅導遊帶住你同其他團友去到一個城市觀光，嗰度景色迷人，令人驚嘆。你哋從來都未去過嗰個城市，乜嘢都覺得好新奇。所以導遊講嘅每一句話，你哋都留心聽。對於嗰啲仲未見到嘅景物，你哋又好奇又興奮，於是去問導遊。但係導遊話，到時你哋就知道喇。導遊通常會到咗景點，先至同你哋介紹、講解。你慢慢睇出導遊好有智慧，佢會喺最適當嘅時候將你需要知道嘅講俾你知。
2 真基督徒嘅情況同呢啲遊客差唔多。不過，我哋好想認識嘅，係一座最令人驚嘆嘅城，呢座“有穩確根基嘅城”就係上帝嘅王國。（希伯來書11:10）耶穌仲喺地上嗰時，親自引導門徒深入認識上帝嘅王國。門徒提出嘅問題，耶穌有冇全部都回答晒呢？冇。佢係唔係一下子就將上帝王國嘅事全部都話俾門徒知呢？唔係。耶穌話：“我仲有好多事要話你哋知，只係你哋目前承擔唔嚟。”（約翰福音16:12）耶穌係最有智慧嘅屬靈嚮導，一直都按照門徒能够理解嘅，引導佢哋認識上帝嘅王國。
3,4． （甲）耶穌點樣繼續教導忠心嘅門徒認識上帝嘅王國？（乙）本章會探討乜嘢？
3 約翰福音16:12所記載嘅話，係耶穌喺犧牲生命之前嗰晚講嘅。噉耶穌犧牲生命之後，會點樣繼續教導忠心嘅門徒認識上帝嘅王國呢？佢向使徒保證：“顯示真理嘅聖靈……會引導你哋明白全部真理”。 a（約翰福音16:13）耶穌會用聖靈引導門徒認識上帝嘅王國，所以聖靈亦都好似耐心嘅嚮導。門徒需要明白嘅，耶穌都會喺最適當嘅時候使佢哋明白。
4 下文會分析，聖靈點樣引導誠心跟隨基督嘅人深入認識上帝嘅王國。首先講吓，我哋點樣睇出上帝嘅王國係幾時開始統治嘅。跟住會探討，邊啲人會統治上帝嘅王國，邊啲人會成為呢個王國嘅子民，同埋呢兩群人有乜嘢唔同嘅希望。最後會睇睇，基督徒點樣更加清楚明白，忠於上帝嘅王國意味住乜嘢。
明白1914年係個重要年份
5,6． （甲）關於上帝王國嘅建立同收割時期，聖經研究者有乜嘢錯誤嘅睇法？（乙）點解門徒理解錯咗，並唔表示耶穌冇用聖靈指引佢哋？
5 呢本書第2章2提到，聖經研究者用咗幾十年嘅時間，向人指出1914年係個重要年份，對聖經預言嘅應驗有重大意義。不過，當時佢哋以為基督嘅臨在喺1874年已經開始咗，亦都以為1878年基督已經喺天上開始統治，但其實上帝嘅王國要到1914年10月先至完全建立。1874年到1914年間係收割時期，到咗收割嘅高潮，受膏基督徒會被召集到天上。事實表明，當時嘅理解係錯誤嘅。噉係唔係話，耶穌冇用聖靈引導佢嘅忠心門徒呢？絶對唔係！
6 再睇吓文章開頭嘅比喻。遊客出於好奇，迫不及待噉提出問題，但係導遊冇馬上答佢哋。噉係唔係話導遊唔够稱職呢？當然唔係。上帝子民嘅情況亦都好類似。有時，聖靈引導佢哋明白耶和華旨意嘅時候仲未到，佢哋就嘗試解釋其中嘅一啲細節，不過耶穌繼續帶領住佢哋。後來，忠心嘅基督徒謙卑噉改變自己嘅睇法，表明佢哋甘願接受糾正。（雅各書4:6）
7． 上帝嘅子民得到乜嘢屬靈嘅亮光？
7 1919年之後，上帝嘅子民得到越來越多屬靈嘅亮光。（請讀詩篇97:11）1925年，英語版《守望台》刊登咗《國家嘅誕生》呢篇深具歷史意義嘅文章，解釋啟示錄12章嘅預言。預言提到上帝喺天上嘅“女人”生咗一個兒子，呢件事象徵彌賽亞王國喺天上誕生。文章亦都提出確鑿嘅證據，表明呢個王國已經喺1914年建立。 b文章進一步指出，第一次世界大戰期間，耶和華嘅子民遭到迫害，忍受磨難，呢一點清楚顯示撒但就喺嗰段時間從天上被掟落嚟。佢“知道自己時日無多，就非常憤怒”。（啟示錄12:12）
8,9． （甲）《守望台》點樣表明上帝嘅王國非常重要？（乙）我哋會解答邊啲問題？
8 上帝嘅王國有幾重要？喺1928年，英語版《守望台》已經强調，上帝嘅王國比人類通過贖價得救更加重要。通過彌賽亞所統治嘅王國，耶和華會使佢嘅名彰顯為聖，證明佢嘅至高統治權係正當嘅，而且徹底執行佢對人類嘅旨意。
9 喺上帝嘅王國裏面，邊啲人會同基督一齊統治呢？邊啲人會成為王國嘅地上子民？基督徒應該專心做乜嘢工作呢？
收割工作着重召集受膏基督徒
10． 關於14萬4000人，上帝嘅子民喺好耐之前已經睇出乜嘢？
10 1914年之前幾十年，真基督徒已經明白，會有14萬4000個忠心門徒同耶穌基督一齊喺天上統治。 c當時嘅聖經研究者睇出，14萬4000係個實數，而且喺公元1世紀上帝已經開始召集14萬4000人。
11． 有希望成為基督“新娘”嘅嗰群人，點樣睇出自己喺地上有任務要執行？
11 呢群人有希望成為基督嘅“新娘”。噉佢哋仲喺地上嘅時候，要執行乜嘢任務呢？佢哋睇出，耶穌好重視傳道工作，而且將呢件工作同收割時期聯繫起嚟。（馬太福音9:37；約翰福音4:35）呢本書第2章講過，曾經有一段時間，聖經研究者認為收割時期只係會延續40年，喺收割嘅高潮受膏基督徒會被召集到天上。但40年過去嘞，傳道工作仲係繼續擴展。顯然，當時聖經研究者有好多事仲未完全明白。今日，我哋知道收割時期喺1914年開始咗。喺收割期間，小麥同毒麥會分開，亦即係話，忠心嘅受膏基督徒會同假基督徒區分開。係時候全力召集14萬4000人嘅剩餘分子嘞！
收割時期喺1914年開始（見第11段）
12,13． 喺十個處女嘅比喻同銀元嘅比喻裏面，耶穌提到嘅事點樣喺最後嘅日子應驗？
12 從1919年起，喺基督嘅引導之下，忠信睿智嘅奴隸一直强調傳道工作非常重要。喺公元1世紀，基督已經差門徒去傳道。（馬太福音28:19,20）佢仲指出受膏門徒必須具備乜嘢特質先可以完成傳道任務。我哋點知呢？喺十個處女嘅比喻裏面，耶穌表明受膏門徒一定要時刻守望，喺靈性上保持警惕，先能够得到最終嘅獎賞，可以去到綿羊羔天上嘅盛大婚宴。喺呢個場合，綿羊羔基督會迎娶由14萬4000個忠心受膏門徒組成嘅“新娘”。（啟示錄21:2）喺銀元嘅比喻裏面，耶穌指出受膏僕人要勤懇噉執行佢交託嘅傳道任務。（馬太福音25:1-30）
13 過去一百年期間，受膏基督徒唔單止保持警惕，而且勤奮傳道。佢哋警醒守望，一定會蒙上帝獎賞。但呢件偉大嘅收割工作所召集嘅，係唔係只有嗰啲同基督一齊作王嘅14萬4000人嘅剩餘分子呢？
召集王國喺地上嘅子民
14,15． 《完成嘅奧秘》提到邊四群人？
14 以前，忠心嘅基督徒一直都好想知道，啟示錄7:9-14提到嘅“大群人”係指邊啲人。喺基督使人明白“大群人”嘅身份之前，聖經研究者關於呢個課題所發表嘅見解，大部分都複雜難明，同我哋而家學到嘅顯淺真理相差好遠。
15 1917年出版嘅《完成嘅奧秘》（英語）指出，“得救到天上享永生嘅人有兩群或兩個階層，得救喺地上享永生嘅人亦都有兩群或兩個階層”，亦即係話，一共有四群人得救。邊四群呢？先講吓有希望到天上去嘅人。第一群就係同基督一齊作王嘅14萬4000人。第二群係大群人，當時嘅聖經研究者認為，呢群人係名義上嘅基督徒，但仲未正式脱離教會。佢哋唔係冇信心，只係信心唔够堅定，喺考驗之下冇緊守忠義，所以喺天上居次要地位。再講吓有希望喺地上享永生嘅人。聖經研究者認為，第三群係古代嘅忠僕，例如亞伯拉罕、摩西等。佢哋會喺地上管理第四群人，亦即係全地嘅人。
16． 喺1923年同1932年，上帝嘅子民得到乜嘢屬靈嘅亮光？
16 今日，我哋對基督徒所懷嘅希望有咗清晰嘅理解。噉聖靈係點樣引導基督徒清楚理解呢啲真理嘅呢？屬靈嘅亮光一次又一次噉照耀佢哋，逐步幫助佢哋明白。早喺1923年，英語版《守望台》已經提及有一群人唔嚮往到天上，佢哋會喺地上生活，受基督統治。1932年，英語版《守望台》提到，約拿達支持上帝所膏立嘅以色列王耶户，願意同佢一齊去對抗錯誤嘅宗教。（列王紀下10:15-17）文章指出現代有一群人好似約拿達，仲話耶和華會帶領呢群人“渡過哈米吉多頓大戰”繼續喺地上生活。
17． （甲）1935年，上帝嘅子民得到乜嘢燦爛嘅屬靈亮光？（乙）關於“大群人”，忠心嘅基督徒對新嘅理解有乜嘢反應呢？（見附欄“ 大大鬆咗一口氣”）
17 1935年，一道燦爛嘅屬靈亮光照耀上帝嘅子民。喺美國首都華盛頓舉行嘅大會裏面，上帝嘅子民明白咗“大群人”嘅身份，佢哋就係耶穌所講嘅綿羊山羊比喻裏面嘅綿羊，有希望喺地上享永生。（馬太福音25:33-40）大群人屬於“另外嘅綿羊”。講到“另外嘅綿羊”，耶穌話：“我必須將佢哋帶嚟。”（約翰福音10:16）喺大會上，盧述福對在場嘅人話：“凡係希望永遠喺地上生活嘅人，請企起身。”聽衆當中有超過一半嘅人都企咗起身，於是盧述福宣布：“睇吓！大群人！”好多人都感動到不得了，因為終於明白咗自己嘅希望係喺地上享永生。
18． （甲）基督嘅門徒全力召集邊群人？（乙）結果點樣呢？
18 “大群人”會安然渡過大患難。自從1935年以來，基督一直引導佢嘅門徒全力召集“大群人”。起初，大群人嘅數目唔係好多。有一次，盧述福弟兄甚至話：“聖經講嘅‘大群人’睇嚟唔係咁大。”今日，我哋當然知道，從1935年開始，耶和華就大大賜福俾佢嘅子民，大群人嘅數目不斷增多。喺耶穌同聖靈嘅引導之下，受膏基督徒同“另外嘅綿羊”已經“合成一群”，並肩工作，服從“一個牧人”，就好似耶穌預告嘅一樣。
盧述福弟兄點都諗唔到，大群人嘅數目會有咁多（從左到右：内森·諾爾，約瑟夫·盧述福，海登·科温頓）
19． 我哋可以點樣做，使大群人嘅數目不斷增多？
19 忠於上帝嘅人當中，絶大多數會喺地上嘅樂園裏面享永生。統治佢哋嘅，除咗君王基督，仲有同基督一齊作王嘅14萬4000人。聖經提出嘅希望清晰明確。沉思基督點樣引導上帝嘅子民明白呢個希望，唔係好令人欣慰咩？能够向人傳講呢個希望係幾咁大嘅榮幸！等我哋盡己所能，熱心傳道。隨住大群人嘅數目增多，讚美耶和華聖名嘅聲音亦都會越來越雄壯！（請讀路加福音10:2）
大群人嘅數目不斷增多
忠於上帝嘅王國意味住乜嘢
20． （甲）撒但嘅組織包括乜嘢？（乙）要忠於上帝嘅王國，基督徒就要點樣做？
20 上帝嘅子民要繼續認識上帝嘅王國，亦都要完全明白忠於呢個天上政府意味住乜嘢。關於呢點，1922年，英語版《守望台》指出有兩個對立嘅組織，就係耶和華嘅組織同撒但嘅組織。撒但嘅組織包括當今世界嘅商業、宗教同埋政治制度。邊個忠於基督所統治嘅上帝王國，就要避免同撒但嘅組織有任何不當嘅來往，絶對唔會妥協讓步。（哥林多後書6:17）呢個係乜嘢意思呢？
21． （甲）關於商業界，忠信嘅奴隸告誡上帝嘅子民要提防乜嘢？（乙）關於“大巴比倫”，1963年嘅《守望台》點樣講？
21 忠信嘅奴隸喺出版嘅靈糧裏面一再指出，商業界貪污腐敗，充滿物質至上嘅精神，告誡上帝嘅子民唔好受到呢種歪風影響。（馬太福音6:24）上帝組織嘅出版物亦都經常談論撒但組織嘅宗教制度。1963年，英語版《守望台》（漢語版1964年）清楚表明，“大巴比倫”唔單單指有名無實嘅基督教，仲包含世上所有錯誤嘅宗教。呢本書第10章會詳細講吓，上帝點樣幫助嚟自唔同國家唔同文化背景嘅子民離開大巴比倫，棄絶錯誤宗教嘅一切習俗。（啟示錄18:2,4）
22． 第一次世界大戰期間，唔少聖經研究者對於羅馬書13:1嘅勸告有點樣嘅理解呢？
22 而家講吓撒但組織嘅政治制度。真基督徒可唔可以參與戰爭或者國際衝突呢？第一次世界大戰期間，聖經研究者普遍都明白，基督嘅門徒唔可以殺人。（馬太福音26:52）但由於羅馬書13:1勸人要服從“在上當權嘅”，唔少聖經研究者認為，基督徒可以參軍，着軍裝，甚至帶武器，但奉命上陣嗰時，只可以向天開槍，唔可以殺人。
23,24． （甲）第二次世界大戰期間，上帝嘅子民對於羅馬書13:1又有點樣嘅理解呢？（乙）關於呢節經文，基督引導門徒得到乜嘢正確嘅理解？
23 1939年，第二次世界大戰爆發之後，英語版《守望台》嘅文章深入探討中立嘅問題，講明基督徒絶對唔會參與撒但世界嘅戰爭同衝突。呢個真係適時嘅指引！基督嘅門徒聽從呢個指引，就唔會好似參戰國噉背負沉重嘅血債。其實，喺1929年，上帝組織嘅出版物指出，羅馬書13:1所講嘅“在上當權嘅”係指耶和華同耶穌，而唔係指世上嘅統治者，不過當時嘅理解並唔確切。
24 到咗1962年，聖靈引導基督嘅門徒得到正確嘅理解。英語版《守望台》11月15日刊同12月1日刊（漢語版1963年6月15日刊同7月1日刊）登載咗幾篇深具歷史意義嘅文章，詳細講解羅馬書13:1-7。上帝嘅子民終於領悟到耶穌講嘅話所藴含嘅原則。耶穌曾經講過：“凱撒之物要還俾凱撒，上帝之物要還俾上帝。”（路加福音20:25）從呢句至理名言，上帝嘅子民睇出基督徒要服從“在上當權嘅”，但呢種服從唔係絶對嘅。今日，真基督徒明白，“在上當權嘅”係指世上各個政府，基督徒要服從政府，但唔係絶對服從。如果世上嘅當權者要求我哋違抗耶和華上帝嘅命令，我哋就會效法古代嘅使徒，回答話：“我哋必須接受上帝嘅統治，服從上帝而唔係服從人。”（使徒行傳5:29）呢本書第13同14章會講吓，上帝嘅子民點樣堅守基督徒嘅立場，嚴守中立。
能够向人傳講聖經所講嘅永生希望，係好大嘅榮幸！
25． 聖靈引導上帝嘅子民認識上帝嘅王國，你對呢件事有咩感覺？點解呢？
25 關於上帝嘅王國，過去一百年期間，基督嘅門徒學到乜嘢？我哋學到上帝嘅王國幾時喺天上建立，亦都學到呢個王國有幾重要。我哋清楚睇出，聖經話有兩種唔同嘅希望，上帝嘅忠僕有啲會到天上，有啲會喺地上享永生。我哋明白忠於上帝嘅王國意味住乜嘢，亦都知道要服從世上嘅政府，但呢種服從唔係絶對嘅。不妨問吓自己：“如果唔係耶穌基督引導地上嘅忠信奴隸明白呢啲寶貴嘅真理，然後教導人認識，我又點會知道呢？”有基督同聖靈引導我哋，係幾咁大嘅福分啊！
