1, 2. Ñanyi mwingilo mukatampe waambijile jimo Yesu, kabiji ñanyi bwipuzho bo twakonsha kushikisha?

BANDAMABYALO JAVULA batemwa kulaya bantu milaye yo babula kufikizha. Nangwatu bintu byawama byo bakebesha kuba, bakankalwa kwibifikizha. Bino Yesu aye wapusanako mambo kimye kyonse ufikizha milaye yanji.

² Kufumatu kimye kyo aikele pa Bufumu mu 1914, Yesu winengezhe kufikizha bungauzhi bo alayile saka kukiji myaka 1,900. Saka akyangye kufwa, Yesu waambijile jimo amba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.” (Mat. 24:14) Kufika kwa buno bungauzhi kukekala ke kiyukilo kya kwikalapo kwanji pa Bufumu. Nangwa byonkabyo, twakonsha kwishikisha bwipuzho bwanema bwa kuba’mba: Nanchi Mfumu ukakonsha kunengezha jibumba ja bantu belambula ja basapwishi mu moba apelako ko kuba’mba kimye kukekala bantu babula butemwe ne bebepekezha kwikala na munema wa kunemeka Lesa nyi? (Mat. 24:12; 2 Timo. 3:1-5) Kyanema kuyuka mukumbu ku buno bwipuzho mambo bwakunza bena Kilishitu bonse.

3. Ñanyi luketekelo Yesu lo ajinga nalo, kabiji ki ka kyamulengejile kushiinwa?

³ Vulukai jikwabo byambo bya bungauzhi bya kwa Yesu. Nanchi byambo bya kuba’mba “bakeasapwila” bimwesha amba washiinwe nyi? Ee. Yesu washiinwe kuba’mba ukekala na bantu bakelambula abo bene mu moba apelako. Ki ka kyamulengejile kushiinwa? Mambo bashanji bamufunjishe. (Yoa. 12:45; 14:9) Saka akyangye kwiya pano pa ntanda, Yesu wimwenejile Yehoba byo aketekejile bapopweshi Banji byo belambwile bene. Twayai tumone byo amwesheshe amba wibaketekela.

4. Ñanyi mwingilo Yehoba ye aambijile bena Isalela amba batundaike, kabiji baubilepo byepi?

⁴ Vulukai kyamwekele kimye Yehoba kyo abuujile Mosesa kushimika ntente wa lusambakeno pa mpunzha kisaka kya bena Isalela yo bapopwelangapo. Yehoba waambijile Mosesa  kwambila bantu amba batundaike mwingilo. Mosesa wibambijile amba: “Yense waswa na muchima yense alete bya bupe bya Yehoba.” Ki ka kyafuminemo? Bantu “baletelengatu lukelo pa juba, pa juba, bya bupe ko aji.” Baletele byavula kya kuba “bebambijile kuleka kwibileta.” (Lupu. 35:5; 36:3, 6) Bena Isalela bamwene kuba’mba kyayijilemo bingi Yehoba kwibaketekela.

5, 6. Kwesakana na Salamo 110:1-3, Yehoba ne Yesu baketekejilenga kutana mupashi wa mutundu ka pa bapopweshi ba kine mu kimye kya ku mpelo?

⁵ Nanchi Yehoba waketekejile kwikala na bapopweshi belambula mu moba apelako nyi? Ee! Kukila pa myaka 1,000 Yesu saka akyangye kusemwa pano pa ntanda, Yehoba watangijile Davida na mupashi kunemba kimye Mesiasa kyo akatendeka kulama. (Tangai Masalamo 110:1-3.) Yesu, Mfumu wakatataka ukekala na balwanyi bakamukana. Pano bino, naye ukekala na jibumba jikamutundaikanga. Kechi bakebakanjikizha kwingijila Mfumu ne. Ne banyike nabo bakelambula abo bene ne kwikala jibumba jikatampe kya kuba’mba bakonsha kwibesakanya ku kime kikalako lukelo. *

⁶ Yesu wayukile kuba’mba bungauzhi bwanembwa mu Salamo 110 bwaambilenga pe aye. (Mat. 22:42-45) Onkao mambo, washiinwe kuba’mba ukekala na bantu bakishinka abo bakelambula bene kusapwila mambo awama pano pa ntanda ponse. Nanchi bintu byaubiwa kala bimweshapo ka? Nanchi kya kine Mfumu wanengezha jibumba ja basapwishi belambula mu ano moba apelako nyi?

7. Panyuma ya kwikala ke  Mfumu, ñanyi bintu byaubile Yesu pa kunengezha baana banji ba bwanga pa mwingilo wajinga kulutwe?

⁷ Panyuma ya kwikala ke Mfumu, Yesu watendekele kunengezha baana banji ba bwanga ba kwingila mwingilo mukatampe. Byonka byo twafunjile mu Kitango 2, waingijile mwingilo wa kupikita ne kuwamisha mu 1914 ne kufika  kuntendekelo ya 1919. (Mala. 3:1-4) Monka mu 1919, watongwele kalume wakishinka watangijilenga baana banji ba bwanga. (Mat. 24:45) Kufumatu kyokya kimye, uno kalume watendekele kupana kajo ka ku mupashi kupichila mu majashi apa kushonkena ne mu mabuku aambilenga bingi pa mwingilo uji na bena Kilishitu bonse wa kusapwila.

8-10. Kushonkena kwibatundaikile byepi kwikala na mukoyo wa kusapwila? Ambai kyakumwenako. (Monai ne kakitenguluzha ka kuba’mba “ Kushonkena Kutanshi Kwalengejile Bantu Kwikala na Mukoyo wa Kusapwila.”)

⁸ Majashi a pa Kushonkena. Bafunda Baibolo baishile na kushonkena ku Cedar Point, Ohio, U.S.A., kutendeka pa 1 September kufika pa 8, mu 1919. Kuno ko kwajinga kushonkena kutanshi panyumatu ya Nkondo Itanshi ya Ntanda Yonse pa kuba’mba batambwile mikambizho. Pa juba ja bubiji, Mulongo Rutherford waambile jashi mo aambijile luonde kuba’mba: “Mwingilo wa bwina Kilishitu pano pa ntanda ke . . . kusapwila mambo aamba pa Bufumu bwa Nkambo.”

⁹ Mulongo Rutherford waambile jashi jikatampe ja kuno kushonkena pa juba ja busatu jajinga na mutwe wa kuba’mba “Kwamba ku Bantu mo Twingijila Mwingilo Umo,” jajinga mu Kyamba kya Usopa pa mutwe wa kuba’mba “Kubijika Bufumu.” Waambile amba: “Umvwe bintu bijitu bulongo, mwina Kilishitu wakonsha kwishikisha amba, Mambo ka o naikela pano pa ntanda? Wakonsha kukumbula amba Nkambo wantongola kwikala ntomesha wa kushimuna mambo a Lesa a kupwanya ntanda, kabiji mwingilo wami ke kubijika ano mambo.”

¹⁰ Mu jino jashi, Mulongo Rutherford wabijikile magazini wakatataka wa kuba’mba The Golden Age (utelwa luno amba Labainga!) ukanembwanga ne kumwingijisha kulumbulwila bantu amba Bufumu lo luketekelo lwa bantu. Washikishe luonde kuba’mba ayuke bantu bakebelenga kusampanya uno magazini. Sawakya wa pa kuno kushonkena walumbulwile amba: “Bantu bonse bajinga mu luonde 6,000 baimene kumwesha kuba’mba bakebelenga kwingila uno mwingilo.” * Kino kimweshatu kuba’mba Mfumu wajinga na bantu bakebeshe kusapwila pa Bufumu bwanji.

11, 12. Kyamba kya Usopa kya mu 1920, kyaambilepo byepi pa kimye kikatendeka mwingilo waambijile jimo Yesu?

¹¹ Mabuku anembwa. Kupichila mu Kyamba kya Usopa, buneme bwa mwingilo waambijile jimo Yesu, ko kuba’mba kusapwila pa mambo awama a Bufumu ayukanyikilwe bingi. Akimonai byamwekele ku ntendekelo ya myaka ya mu ma 1920.

¹² Ñanyi mambo akasapwilwa pa kufikizha byanembwa pa Mateo 24:14? Uno mwingilo bakamwingila kimye ka? Kyamba kya Usopa kya July 1, 1920, kyajinga na mutwe wa kuba’mba “Mambo Awama a Bufumu,” kyalumbulwile amba: “Mambo Awama atongolwa pano ke oa aamba pa mpelo ya bwikalo bwa kala ne pa kwikajikwa kwa Bufumu bwa  Bumesiasa.” Kino kibaaba kyaambile pa kimye ano mambo po akasapwilwa amba: “Ano mambo afwainwa kusapwilwa pakachi ka nkondo ya ntanda yonse [Nkondo Itanshi ya Ntanda Yonse] ne kimye kya ‘malwa akatampe.’” Kino kibaaba kyaambile amba: “Kimye kyafika kya kusapwila . . . konse konse mambo awama mu Kilishitendomu.”

13. Kyamba kya Usopa kya mu 1921 kyatundaikile byepi bena Kilishitu bashingwa kwikala na muchima wa kwipana?

¹³ Nanchi bantu ba Lesa bafwainwe kwibakanjikizha kwingila mwingilo waambijile jimo Yesu nyi? Ine. Kibaaba kya kuba’mba “Chinchikai,” kya mu Kyamba kya Usopa kya March 15, 1921, kyatundaikile bingi bena Kilishitu bashingwa kwikala na muchima wa kwipana. Yense watundaikilwe kwishikisha amba: “Nanchi jino kechi jo jishuko ja kwingilako mu uno mwingilo wanema nenyi?” Kino kibaaba kyatwajijila kwamba amba: “Twaketekela kuba’mba inge mwaingilako uno mwingilo mukekala nobe Yelemiya, awo waumvwinenga mu muchima wanji nobe ‘muji mujilo ubena kuteema mu bikupa [byanji],’ kabiji wakoka na kwikanya, pano bino kechi wakonsha kwikanya ne.” (Yele. 20:9) Luno lutundaiko lwamwesheshe kuba’mba Yehoba ne Yesu baketekela bantu bakishinka batundaika Bufumu.

14, 15. Mu 1922, Kyamba kya Usopa kyatundaikile bena Kilishitu bashingwa kusapwila ku bantu kwingijisha ñanyi mashinda?

¹⁴ Bena Kilishitu bakine bakonsha kusapwila byepi mambo a Bufumu ku bantu? Kibaaba kipi kyajinga mu Kyamba kya Usopa kya August 15, 1922, kyajinga na mutwe wa kuba’mba “Mwingilo Wanema,” kyatundaikile bano bena Kilishitu bashingwa kusapwila kupichila mu “kutwajila bantu magazini pa mazubo abo ne kwisamba nabo pa bufumu bwa mwiulu amba bwafwenya pepi.”

¹⁵ Kufumatu mu 1919 kufika ne lelo jino, Kilishitu ubena kwingijisha kalume wa kishinka kwamba javula pa mwingilo uji na bena Kilishitu baji pa ntanda wa kusapwila pa mambo a Bufumu. Pano nga Bafunda Baibolo baubilepo byepi pa luno lutundaiko lwa kwingila mwingilo wa kusapwila pa Bufumu?

16. Bakulumpe bamo baubilepo byepi byo baumvwine kuba’mba yense wafwainwa kwingilako mu mwingilo?

¹⁶ Mu myaka ya mu ma 1920 ne 1930, bamo bakainenga kishinka kya kuba’mba bena Kilishitu bonse bashingwa bafwainwa kwingilako mwingilo. Kyamba kya Usopa kya November 1, 1927, kyalumbulwile byamwekelenga amba: “Kuji bamo mu bipwilo baji pa bifulo bya bakulumpe . . . babena kukana kutundaika balongo kwingilako mwingilo, kabiji abo bene bakana kwingilako. . .  Bakana kuya ku nzubo ku nzubo na kusapwila mambo a Lesa, pa Mfumu wanji ne bufumu bwanji ku bantu.” Kibaaba kyaambile amba: “Kimye kyafika kya bantu bakishinka kumona bantu ba uno mutundu ne kwibachinuzhuka, kabiji babula kuba bino kechi bakekalapo pa bifulo bya bukulumpe ne.” *

17, 18. Bavula mu bipwilo baubile byepi pa kumvwa lutangijilo lwafumine ku kalume wa kishinka, kabiji bavula baubapo ka pa myaka 100 yapitapo?

 ¹⁷ Kyawaminekotu ke kya kuba’mba bavula mu bipwilo baumvwijile luno lutangijilo lwafumine ku kalume wa kishinka. Baumvwanga bingi bulongo kwingilako mwingilo wa Bufumu. Kyamba kya Usopa kya March 15, 1926, kyaambile amba: “Bantu ba kishinka bakepana bene, . . . kusapwila ano mambo ku bantu.” Bantu bakishinka baubile byonka byaamba bungauzhi buji pa Salamo 110:3 ne kwipana abo bene kutundaika Mfumu wa Bumesiasa.

¹⁸ Kukila pa myaka 100 yapitapo, bantu bavula bepana abo bene kusapwila pa mambo a Bufumu. Mu bitango bimo byalondelapo, tusa kukesamba pa byo basapwila, mashinda ne bintu byo bengijisha, kabiji ne byafumamo. Patanshi, twayai twisambe ene mambo bantu kyo bepaina kwingilako mwingilo wa kusapwila pa Bufumu, nangwa kya kuba bekala mu ntanda muji bantu betemwa abo bene. Byo tubena kwisamba pa ene mambo, twafwainwa kwishikisha kuba’mba, ‘Ñanyi mambo ene alengela kuba’mba nsapwilenga bantu?’

19. Mambo ka o twafwainwa kulondela lutundaiko lwa kwa Yesu lwa ‘kutwajijila . . . kukeba Bufumu patanshi.’

¹⁹ Yesu watundaikile baana banji ba bwanga amba “twajijilai . . . kukeba Bufumu patanshi.” (Mat. 6:33) Mambo ka o twafwainwa kulondela luno lutundaiko? Mambo twayuka buneme bwa Bufumu kuba’mba po paimena nkebelo ya Lesa. Byonka byo kyaambiwa mu kitango kyafumako, mupashi wazhila ubena kusolola pachepache bukine bwaamba pa Bufumu. Umvwe mambo awama aamba pa Bufumu etufika pa muchima, etulengela kutangizhako Bufumu patanshi.

20. Mu kishimpi kya bya buneme byafyamika, Yesu wamwesheshe byepi baana banji ba bwanga byo bakalondela lujimuno lwa kutangizhako Bufumu patanshi?

²⁰ Yesu wayukile bikoba baana banji ba bwanga pa lujimuno lwa kukebesha Bufumu patanshi. Akimonai pa kishimpi kyanji kyaamba pa bya buneme byo bafya. (Tangai Mateo 13:44.) Wamwingilo uji mu kishimpi byo aingijilenga mu bujimi, wataine kya buneme kyo bafya ne kuyuka mutengo wakyo. Waubile byepi? “Na mambo a lusekelo, uya na kupotesha byonse byo aji nabyo kuba amba apote abwa bujimi.” Tufunjilako ka ku kino? Inge twayuka bukine bwaamba pa Bufumu ne kuyuka byo bwanema, tukepana pa kuba’mba tutangizheko bya Bufumu mu bwikalo bwetu. *

21, 22. Bantu ba kishinka batundaika Bufumu bamwesha byepi amba batangizhako Bufumu patanshi? Ambai kyakumwenako.

²¹ Batundaika Bufumu mu bukishinka bamwesha bino mu byubilo byabo, kechi mu byambotu ne, ko kuba’mba batangizhako Bufumu patanshi. Bapana bumi bwabo, mingilo yo bayuka, ne mali abo ku mwingilo wa kusapwila pa Bufumu. Bavula baleka byo boba pa kuba’mba bengile mwingilo wa kimye kyonse. Bonse basapwishi bepana bamona kuba’mba Yehoba upesha boba batangizhako Bufumu patanshi. Akimonai kino kyakumwenako kya kala.

²² Ba Avery ne Ba Lovenia Bristow bajinga ba koputala (bapainiya) baingijilanga pamo ku kabeta ka ku bulenge  ka ku United States kutendeka ku mpelo ya myaka ya mu ma 1920. Panyuma ya kupitapo myaka, Ba Lovenia bavuluka kuba’mba: “Ba Avery ne amiwa twaingila bingi bulongo mwingilo wa bupainiya kufumatu kimye kyo twatendekele. Bimye byavula kechi twayukanga ne kwafumanga mali a kupotamo manyi a mu motoka nangwa kajo ne. Bino, Yehoba witupanga byonse. Kabiji twatwajijile mwingilo wa bupainiya. Twaikalanga na byonse byo twakebanga.” Ba Lovenia bavulukapo juba jimo byo baingijilenga mu muzhi wa Pensacola, mu Florida byo babujile mali ne kajo. Byo bafikile pa nzubo, bataine byola bibiji bikatampe mwajinga kajo pamo na kakalata kajinga na byambo bya kuba’mba, “Kufuma ku kipwilo kya Pensacola kimutemwa bingi.” * Pa kuvuluka myaka yo baingijile mu mwingilo wa kimye kyonse, Ba Lovenia baambile amba: “Yehoba kechi witutaya ne. Kabiji kechi ukalubako byo twamuketekela ne.”

23. Mumvwa byepi pa bukine bwa Bufumu bo mwafunda, kabiji mwafuukulapo kuba ka?

²³ Kechi twakonsha kusapwila kwesakana na bisapwila bakwetu ne. Tupita mu makatazho apusana pusana. Nangwa byonkabyo, atweba bonse twafwainwa kunemeka mwingilo wa kusapwila mambo awama na muchima yense. (Kolo. 3:23) Na mambo a kuba’mba twanemeka bukine bwa Bufumu bo twafunda, tukebesha bingi kwipana kwingilako pakatampe. Nanchi ne anweba kechi byobyo mukeba kuba nenyi?

24. Ñanyi mwingilo mukatampe wa Bufumu ubena kwingijiwa mu moba apelako?

²⁴ Pa myaka yavula yapitapo, Mfumu ubena kufikizha byambo bya bungauzhi byanembwa pa Mateo 24:14. Kabiji pa kuba bino, kechi ukanjikizha ne. Panyuma ya kufuma mu ntanda muji bantu betemwa abo bene, baana ba bwanga bepana abo bene kusapwila. Mwingilo wabo wa kusapwila mambo awama mwaya ntanda yonse ke kiyukilo kya kwikalapo kwa kwa Yesu mu Bufumu, kabiji ye mwingilo mukatampe wa Bufumu ubena kwingijiwa mu ano moba apelako.