1, 2. Ki trabou grandi Hesus a profetisá ku lo tuma lugá, i ki pregunta importante esei ta lanta?

 GOBERNANTENAN hopi biaha ta hasi promesa ku nan no ta kumpli kuné. Asta esnan ku tin tur bon intenshon, kisas no por kumpli ku loke nan primintí. Pero felismente, e Rei Mesiániko Hesukristu sí ta diferente. Semper e ta kumpli ku su palabra.

² Despues ku Hesus a bira Rei na 1914, e tabata kla pa kumpli ku un profesia ku el a duna kasi 1.900 aña promé. Poko promé ku el a muri, el a profetisá ku ‘e bon notisia di e Reino lo ser prediká den henter e tera habitá.’ (Mat. 24:14) Kumplimentu di e palabranan ei lo tabata parti di e señal di su presensia komo Rei di e Reino di Dios. Pero un karakterístika di e último dianan lo tabata ku mayoria di hende lo ta egoista, sin amor i sin rèspèt pa religion. Esei ta lanta un pregunta importante: Kon e Rei lo a logra organisá den e tempu akí un ehérsito di predikadó ku ta ofresé nan mes di buena gana? (Mat. 24:12; 2 Tim. 3:1-5) Nos tin ku haña sa e kontesta, pasobra esei tin di haber ku tur kristian.

3. Hesus tabata sigur di kiko, i di unda el a haña e siguransa ei?

³ Laga nos bolbe wak e palabranan profétiko di Hesus. E palabranan “lo ser prediká” ta indiká ku Hesus tabatin sigur ku den e último dianan lo tin hende ku ta apoy’é di buena gana. Pero di unda el a haña e siguransa ei? Di su Tata. (Huan 12:45; 14:9) Promé ku Hesus a bini na tera komo hende, el a tuma nota ku Yehova tabatin sigur ku Su sirbidónan lo a ofresé nan mes di buena gana. Laga nos wak kon Yehova a ekspresá e siguransa ei.

4. Yehova a invitá e israelitanan pa apoyá ki trabou, i kon nan a reakshoná?

⁴ Kòrda kiko a pasa ora Yehova a manda Moises traha e tabernakel, òf tènt, ku mester a bira e sentro di adorashon pa e nashon di Israel. Via Moises, Yehova a invitá henter e pueblo pa apoyá e trabou di konstrukshon ei. Moises a bisa nan: “Esun ku su kurason ta dispuesto, lag’é hiba [un] ofrenda pa  SEÑOR.” Kiko tabata e resultado? “E pueblo tabata sigui hiba ofrendanan boluntario p’e tur mainta.” Nan a hiba asina tantu kos ku mester “a stòp e pueblo di hiba mas”! (Éks. 35:5; 36:3, 6) Asina e israelitanan a demostrá ku Yehova tabatin rason di pone konfiansa den nan.

5, 6. Segun Salmo 110:1-3, ki aktitut Yehova, i di mes tambe Hesus, a ferwagt di haña entre nan sirbidónan den e tempu di fin?

⁵ Yehova a ferwagt di haña e mesun aktitut dispuesto ei entre su pueblo den e último dianan? Sí! Mas ku 1.000 aña promé ku Hesus a nase riba tera, Yehova a inspirá David pa skirbi tokante e tempu ora ku e Mesías lo a kuminsá goberná. (Lesa Salmo 110:1-3.) Hesus, e Rei resien koroná, lo tabatin enemigu ku lo resistié, pero tambe lo e tabatin un ehérsito di hende ku lo a apoy’é. Lo no tabatin nodi di obligá nan sirbi e Rei. Asta e hóbennan den e ehérsito ei lo a ofresé nan mes libremente i lo a bira un multitut masha grandi. Ta p’esei mes e salmo a kompará nan ku e kantidat inkontabel di gota di serena ku sa kubri tur kos ora mainta habri. a

⁶ Hesus tabata sa ku e profesia di Salmo 110 a referí na dje. (Mat. 22:42-45) P’esei e tabatin sigur ku lo tin hende leal ku lo apoy’é komo Rei i pone nan mes disponibel pa prediká e bon notisia den henter e tera. Kiko historia ta mustra? E Rei a logra organisá den e último dianan akí un ehérsito di predikadó ku di buena gana ta pone nan mes disponibel?

7. Despues ku Hesus a keda koroná komo Rei, kua ta e pasonan ku el a dal pa prepará su siguidónan pa e trabou ku tabata warda nan?

⁷ Poko despues ku Hesus a keda koroná komo Rei, el a dal paso pa prepará su siguidónan pa e trabou inmenso ku tabata warda nan. Manera nos a mira den Kapítulo 2, el a hasi un inspekshon i un trabou di limpiesa for di 1914 te na prinsipio di 1919. (Mal. 3:1-4) Mas lat den aña 1919, el a nombra  e esklabo fiel pa guia su siguidónan. (Mat. 24:45) Djei en adelante, e esklabo akí a kuminsá distribuí kuminda spiritual—via diskursonan di kongreso i publikashonnan imprimí—ku bes tras bes a enfatisá e responsabilidat ku tur kristian tin di partisipá personalmente den e trabou di prediká.

8-10. Kon kongresonan a duna un empuhe na e trabou di prediká? Duna un ehèmpel. (Wak tambe e kuadro “ Kongresonan Ku A Duna un Empuhe na e Trabou di Prediká.”)

⁸ Diskursonan di kongreso. Despues di Promé Guera Mundial, e Studiantenan di Beibel tabata ansioso pa sa kiko nan tabatin ku hasi. P’esei nan a reuní huntu pa nan promé kongreso grandi na Cedar Point, Ohio, di 1 pa 8 di sèptèmber 1919. Riba e di dos dia, Ruman Rutherford a duna un diskurso den kua el a bisa e presentenan bon kla: “Un kristian su mishon riba tera ta pa proklamá e mensahe di e reino di Señor.”

⁹ E kulminashon di e kongreso tabata riba e di sinku dia ora Ruman Rutherford a duna e diskurso titulá “Diskurso pa Kolaboradónan.” Despues a publiká e diskurso ei den E Toren di Vigilansia bou di e tema “Anunsiando e Reino.” Ruman Rutherford a deklará: “Durante momentonan di reflekshon, un kristian di mes ta puntra su mes: ‘Pakiko mi ta na mundu?’ I su kontesta lo mester ta: ‘Señor, den su bondat, a hasi mi su embahador pa mi duna mundu e mensahe divino di rekonsiliashon. I mi tin e privilegio i deber di anunsiá e mensahe ei.’”

¹⁰ Den e diskurso históriko ei, Ruman Rutherford a anunsiá ku lo kuminsá publiká un revista nobo—E Époka di Oro (ku awor yama Spièrta!)—pa yuda dirigí hende na e Reino komo e úniko speransa pa humanidat. Kaba el a puntra kuantu di e rumannan presente lo kier a yuda distribuí e revista akí. Segun un informe di e kongreso, “e reakshon tabata un esena emoshonante. Tur 6.000 hende a lanta para pareu.” b Tabata bisto ku e hendenan ku a apoyá e Rei tabata dispuesto i ansioso pa proklamá su Reino!

11, 12. Segun un Toren di Vigilansia di 1920, den ki periodo e trabou ku Hesus a profetisá di dje lo a tuma lugá?

¹¹ Publikashonnan imprimí. Mediante e páginanan di E Toren di Vigilansia a bira mas i mas kla kon importante e predikashon ku Hesus a profetisá di dje tabata. Ban wak algun ehèmpel di e dékada di 1920.

¹² Segun Mateo 24:14, ki mensahe lo a ser proklamá? I na ki tempu e obra ei lo a tuma lugá? E Toren di Vigilansia di 1 di yüli 1920 a splika e mensahe ei den e artíkulo titulá “Evangelio di e Reino,” bisando: “E bon notisia ta tokante e fin di e sistema bieu di kosnan i tokante e reino Mesiániko ku a keda establesé.” E artíkulo a mustra tambe bon kla na ki tempu lo a prediká e mensahe akí, bisando: ‘Mester entregá e mensahe akí den e periodo entre e gran guera mundial [Promé Guera  Mundial] i e “tribulashon grandi.”’ P’esei, segun e artíkulo, ‘awor ta e tempu pa prediká e bon notisia den tur skina di kristiandat.’

13. Kon un Toren di Vigilansia di 1921 a animá kristiannan ungí pa demostrá nan aktitut dispuesto?

¹³ Akaso lo a pone preshon riba e pueblo di Dios pa hasi e trabou ku Hesus a profetisá di dje? Nò. E artíkulo “Sea Yen di Ánimo,” ku a sali den E Toren di Vigilansia di 15 di mart 1921, a animá kristiannan ungí pa demostrá nan aktitut dispuesto. Kada ruman mester a puntra su mes: “Partisipashon den e trabou akí no ta e privilegio di mas grandi ku mi tin i a la bes mi deber?” E artíkulo a sigui bisa: “Nos tin sigur ku ora bo ta mir’é asina lo bo ta manera Yeremías. E palabra di Señor tabata ‘manera kandela den su kurason, será den su wesunan,’ i a keda urgié te ku e no por a keda sin papia.” (Yer. 20:9) E animashon kaluroso ei a reflehá e konfiansa ku Yehova i Hesus tin den e rumannan fiel ku ta apoyá e Reino.

14, 15. Segun un Toren di Vigilansia di 1922, den ki manera kristiannan ungí mester a hasi esfuerso pa alkansá hende?

¹⁴ Kon kristiannan berdadero lo mester a alkansá otro hende ku e mensahe di Reino? E artíkulo kòrtiku pero potente titulá “Sirbishi Ta Esensial,” ku a sali den E Toren di Vigilansia di 15 di ougùstùs 1922, a urgi kristiannan ungí pa nan partisipá “aktivamente den e obra di hiba e mensahe imprimí pa e hendenan i papia ku nan na nan kas, dunando testimonio ku e reino di shelu ta serka.”

¹⁵ Pues, ta bisto ku di 1919 en adelante, Kristu a usa su esklabo fiel i prudente pa enfatisá bes tras bes ku un kristian su privilegio i deber riba tera ta di proklamá e mensahe di Reino. Pero kon e Studiantenan di Beibel di e tempu ei a reakshoná riba e animashon ku nan a haña pa partisipá den e trabou di proklamá e Reino?

16. Kon algun di e ansianonan eligí a reakshoná riba e pensamentu ku tur kristian mester partisipá den sirbishi?

¹⁶ Den dékada di 1920 i di 1930, algun ruman a resistí e pensamentu ku tur kristian ungí mester a partisipá den sirbishi. E Toren di Vigilansia di 1 di novèmber 1927 a splika kiko tabata pasando: “Awe tin rumannan den kongregashon ku ta okupá e puesto responsabel di ansiano . . . ku ta nenga di animá nan rumannan pa partisipá den sirbishi, i kende nan mes tambe ta nenga di partisipá den sirbishi. . . . Nan ta hasi chèrchi di e idea ku nan mester bai di kas pa kas pa hiba e mensahe di Dios, di su Rei i di su Reino na e hendenan.” E artíkulo a bisa frankamente: “A yega ora pa e sirbidónan di Dios marka e hendenan ei, evitá nan i bisa nan ku nos lo no konfia e tipo di hòmbernan ei mas ku e funshon di ansiano.” c

17, 18. Kon mayoria di ruman den e kongregashonnan a reakshoná riba e guia di e esklabo fiel, i kon miónes di hende a reakshoná durante e último 100 añanan?

¹⁷ Felismente, mayoria di ruman den e kongregashonnan a reakshoná ku entusiasmo riba e guia di e esklabo fiel. Pa  nan, tabata un privilegio di por kompartí e mensahe di Reino ku otro hende. E Toren di Vigilansia di 15 di mart 1926 a ekspresá esei asin’akí: “Sirbidónan di Dios lo pone nan mes disponibel . . . pa konta e hendenan e mensahe akí.” E rumannan fiel ei a kumpli ku e palabranan profétiko di Salmo 110:3 i a demostrá ku nan ta apoyá e Rei Mesiániko di buena gana.

¹⁸ Durante e último 100 añanan, miónes di hende a ofresé nan mes di buena gana pa kumpli ku e trabou di proklamá e Reino. Den algun di e kapítulonan ku ta sigui, nos lo bai konsiderá kon nan a prediká—e métodonan i hèrmèntnan ku nan a usa—i ki resultado nan tabatin. Pero promé, laga nos konsiderá pakiko miónes di hende a partisipá di buena gana den e trabou di prediká e Reino, apesar ku nos ta biba den un mundu egoista ku ta promové e aktitut di “ami promé.” Segun ku nos ta konsiderá e motibunan, ta bon pa nos puntra nos mes: ‘Kiko ta motivá mi pa kompartí e bon notisia ku otro hende?’

19. Dikon nos ta obedesé e konseho ku Hesus a duna pa ‘sigui buska promé e Reino’?

¹⁹ Hesus a konsehá su siguidónan pa ‘sigui buska promé e Reino.’ (Mat. 6:33) Dikon nos ta obedesé e konseho ei? Básikamente, pasobra nos sa kon importante e Reino ta; e ta un parti esensial di Dios su propósito. Manera nos a mira den e kapítulo anterior, spiritu santu progresivamente a revelá bèrdatnan emoshonante tokante e Reino. Ora e bèrdat presioso di e Reino yega na nos kurason, nos ta sinti nos motivá pa buska promé e Reino ei.

20. Kon Hesus su ilustrashon di e tesoro skondí ta mustra kon su siguidónan lo a reakshoná riba e konseho pa sigui buska promé e Reino?

²⁰ Hesus tabata sa kon su siguidónan lo a reakshoná riba e konseho pa sigui buska promé e Reino. Wak e ilustrashon ku el a duna di e tesoro skondí. (Lesa Mateo 13:44.) Den e ilustrashon ei, un kampesino pa kasualidat ta haña un tesoro skondí i mesora ta rekonosé su balor. Kiko e ta hasi? “E ta asina kontentu ku el a hañ’é ku e ta bai, bende tur loke e tin i kumpra e tereno ei.” Ki lès esaki ta siña nos? Wèl, ora nos haña e bèrdat di Reino i ta rekonosé su balor, gustosamente nos lo hasi kualke sakrifisio nesesario pa nos por tene asuntunan di Reino kaminda nan mester ta: na promé lugá den nos bida. d

21, 22. Kon kristiannan leal ku ta apoyá e Reino ta demostrá ku nan ta buskando promé e Reino? Duna un ehèmpel.

²¹ Kristiannan leal ku ta apoyá e Reino ta demostrá ku obra, no djis ku palabra, ku nan ta buskando promé e Reino. Nan ta dediká nan bida, nan abilidatnan i nan rekursonan na e trabou di prediká e Reino. Hopi ruman a hasi sakrifisio grandi pa nan por a drenta sirbishi di tempu kompleto. Tur e predikadónan boluntario ei a mira personalmente ku Yehova ta bendishoná esnan ku pone e Reino promé. Laga nos wak un ehèmpel di siglo pasá.

 ²² Avery ku Lovenia Bristow a kuminsá sirbi huntu komo kòlportùr (pionero) den e parti zùit di Merka na final di dékada di 1920. Añanan despues, Lovenia a konta: “Ami ku Avery a pasa hopi aña felis huntu den e trabou di pionero. Hopi biaha, nos no tabata sa di unda nos lo a saka sèn pa gasolin òf pa kumpra komestibel. Pero di un manera òf otro, Yehova semper a perkurá pa esei. Nunka nos no a stòp di traha pionero. Semper nos a haña loke realmente nos tabatin mester.” Lovenia ta kòrda un biaha ku nan tabata sirbi na Pensacola, Flórida, i nan no tabatin sèn ni komestibel. Ora nan a yega na e trailer kaminda nan tabata biba, nan a haña dos saku grandi ku komestibel i un karchi ku a bisa: “Ku hopi kariño, di parti di Kongregashon Pensacola.” Lovenia, pensando riba e dékadanan ku el a traha den sirbishi di tempu kompleto, a bisa: “Yehova nunka ta bandoná nos. Nunka e ta traishoná e konfiansa ku nos ta pone den dje.”

23. Kiko bo ta pensa di e bèrdat di Reino ku bo a haña, i kiko bo ta determiná pa hasi?

²³ Nos tur no tin e mesun sirkunstansianan. Pues, no ta nos tur por prediká mes tantu. Pero nos tur tin e privilegio di proklamá e bon notisia ku henter nos alma. (Kol. 3:23) Nos ta apresiá e bèrdat presioso di Reino ku nos a haña, i p’esei nos ta dispuesto—sí, ansioso—pa hasi kualke sakrifisio nesesario pa nos por sirbi mas tantu posibel. Abo tambe ta determiná pa hasi esei?

24. Kiko ta un di e logronan di mas grandi di e Reino den e último dianan?

²⁴ Durante e último 100 añanan, en bèrdat e Rei a kumpli ku su palabranan profétiko ku ta pará skirbí na Mateo 24:14. I el a hasi esei sin obligá hende. Despues ku su siguidónan a sali for di e mundu egoista akí, nan a ofresé nan mes di buena gana pa prediká. Nan ta predikando e bon notisia rònt mundu. Esei ta parti di e señal di Hesus su presensia komo Rei i a la bes un di e logronan di mas grandi di e Reino den e último dianan.