1, 2. Ndi mushumo ufhio muhulwane we Yesu a dzula o u amba nahone hu takuwa mbudziso ifhio ya ndeme?

 KANZHI vharangaphanḓa vha politiki vha fulufhedzisa zwithu zwine vha si kone u zwi khunyeledza. Na vha re na ndivho dzavhuḓi vha nga kha ḓi sa kona u ita zwe vha zwi fulufhedzisa. Zwi takadzaho ndi uri Yesu Kristo, ane a vha Khosi ya Vhumessia, u ḓadzisa mafulufhedziso awe tshifhinga tshoṱhe.

² Musi Yesu o no vha Khosi nga 1914, o vha o lugela u khunyeledza vhuporofita he a vhu bula miṅwahani ya 1 900 hu tshee nga phanḓa. Musi Yesu a sa athu u fa, o amba hu tshee nga phanḓa a ri: “Mafhungo maḓifha aya a Muvhuso a ḓo ḓivhadzwa ḽifhasini ḽoṱhe.” (Mat. 24:14) U ḓadzea ha eneo maipfi ho vha hu tshi ḓo vha tshipiḓa tsha tshiga tshi sumbedzaho uri u khou vhusa Muvhusoni wa Mudzimu. Naho zwo ralo, hu takuwa mbudziso ya ndeme: Khosi i ḓo kona hani u dzudzanya mmbi ya vhahuweleli vhane vha ḓifunela maḓuvhani a vhufhelo—ane a vha tshifhinga tshine vhathu vha vha na muya wa u ḓiṱoḓela zwavho, vha si na lufuno na u sa funa zwithu zwa vhurereli? (Mat. 24:12; 2 Tim. 3:1-5) Ri tea u ḓivha, nga ṅwambo wa uri phindulo ya yeneyo mbudziso i kwama Vhakriste vhoṱhe vha ngoho.

3. Yesu o vha e na fulufhelo ḽifhio nahone ndi mini zwo itaho uri a vhe na fulufhelo ḽo raloho?

³ Dovhani ni sedze maipfi a Yesu a vhuporofita. Naa maipfi “a ḓo ḓivhadzwa” a sumbedza fulufhelo? Ee! Yesu o vha e na vhungoho ha uri u ḓo vha na vhathu vhane vha ḓo mu tikedza nga u ḓifunela maḓuvhani a vhufhelo. Ndi mini zwo itaho uri a vhe na fulufhelo ḽo raloho? O zwi guda kha Khotsi awe. (Yoh. 12:45; 14:9) Musi Yesu a sa athu vha muthu wa ṋama, o zwi ṱhogomela uri Yehova u na fulufhelo ḽa uri vhagwadameli vhawe vha ḓo sumbedza muya wa u ḓifunela. Kha ri vhone nḓila ye Yehova a sumbedza ngayo ḽeneḽo fulufhelo.

4. Ndi ufhio mushumo we Yehova a ramba Vhaisiraele uri vha u tikedze nahone vho aravha nga nḓila-ḓe?

⁴ Humbulani zwe zwa itea musi Yehova a tshi livhisa Mushe uri a fhaṱe thebenekele kana dennde, ḽe ḽa vha ḽi tshi ḓo vha fhethu ha vhurabeli ha lushaka lwa Isiraele. Yehova o shumisa Mushe u ramba vhathu vhoṱhe uri vha tikedze wonoyo mushumo. Mushe o vha vhudza a ri: “Nnyi na nnyi a ḓise mpho ya Yehova nga hune mbilu yawe ya funa.” Ha vha na mvelelo ifhio? Vhathu vho “ḓisa zwiṅwe  zwifhiwa ha ene misi yoṱhe hú tshee matsheloni.” Vho ḓisa zwithu zwinzhi lwe zwa tea uri vha ‘thivhelwe u ḓisa dzimpho’! (Ek. 35:5; 36:3, 6) Vhaisiraele vho sumbedza uri zwo vha zwo tea uri Yehova a vha fulufhele.

5, 6. U ya nga Psalme ya 110:1-3, ndi muya ufhio we Yehova na Yesu vha lavhelela u u wana kha vhagwadameli vha ngoho maḓuvhani a vhufhelo?

⁵ Naa Yehova o vha o lavhelela u wana muya wo raloho wa u ḓifunela kha vhagwadameli vhawe kha ano maḓuvha a vhufhelo? Ee! Miṅwaha i fhiraho 1 000 Yesu a sa athu u bebwa kha ḽifhasi, Yehova o hevhedza Davida uri a ṅwale nga ha tshifhinga tshine Messia a ḓo thoma ngatsho u vhusa. (Vhalani Psalme ya 110:1-3.) Yesu, Khosi ine ya kha ḓi tou bva u rwelwa ṱari, o vha a tshi ḓo vha na maswina ane a ḓo mu hanedza. Fhedzi o vha a tshi ḓo vha na mmbi ya vhatikedzi. Vho vha vha sa ḓo kombetshedzwa uri vha shumele Khosi. Na vhaswa vhukati havho vho vha vha tshi ḓo ḓiṋekedza nga u ḓifunela, vha vha vhanzhi lwe vha vha vha tshi ḓo vhambedzwa na ṅwando une wa ṋukadza mavu mapfuvhi a tshi tswuka. a

⁶ Yesu o zwi ḓivha uri vhuporofita vhu re kha Psalme ya 110 vhu amba ene. (Mat. 22:42-45) Nga zwenezwo, o vha e na zwiitisi zwi pfalaho zwa u fulufhela uri u ḓo vha na vhatikedzi vha fulufhedzeaho vhane vha ḓo ḓiṋekedzela nga u ḓifunela u itela u huwelela mafhungo maḓifha ḽifhasini ḽoṱhe. Mbuno dza ḓivhazwakale dzi sumbedza mini? Naa zwa vhukuma Khosi yo dzudzanya mmbi ya vhahuweleli vhane vha shuma nga u ḓifunela kha ano maḓuvha a vhufhelo?

7. Musi Yesu o no rwelwa ṱari sa Khosi, o dzhia vhukando vhufhio u itela u lugisela vhatevheli vhawe mushumo we vha vha vha tshi ḓo livhana nawo?

⁷ Musi Yesu a tshi kha ḓi tou bva u rwelwa ṱari sa Khosi, o dzhia vhukando ha u lugisela vhatevheli vhawe mushumo muhulwane we wa vha u tshi tea u itwa. Samusi ro zwi vhona kha Ndima ya 2, o ita mushumo wa u ṱolisisa na u kunakisa u thoma nga 1914 u ya mathomoni a 1919. (Mal. 3:1-4) Zwenezwo, nga 1919, a vhea mulanda a fulufhedzeaho uri a range phanḓa vhatevheli vhawe. (Mat. 24:45) Zwihuluhulu u bva nga tshenetsho tshifhinga, onoyo  mulanda o thoma u ṋea zwiḽiwa zwa muya—a tshi shumisa nyambo mabuthanoni na dzikhandiso—zwe zwa ombedzela lunzhi-lunzhi vhuḓifhinduleli vhune Vhakriste vhoṱhe nga muthihi nga muthihi vha vha naho ha u shela mulenzhe kha u huwelela.

8-10. Mabuthano o ṱuṱuwedza hani mushumo wa u huwelela? Ṋeani tsumbo. (Sedzani na bogisi “ Mabuthano a u Thoma e a Ṱuṱuwedza Mushumo wa u Huwelela.”)

⁸ Nyambo dza buthano. Nge Vhagudi vha Bivhili vha vha vha tshi fhisetshela u wana vhulivhisi, vho kuvhangana Cedar Point, Ohio, U.S.A., u bva nga ḽa 1 u swika nga ḽa 8 September, 1919, u itela buthano ḽavho ḽihulwane ḽa u thoma nga murahu ha Nndwa ya Shango ya U Thoma. Nga ḓuvha ḽa vhuvhili, Wahashu Rutherford o ṋekedza nyambo ye khayo a vhudza vhathu vha bvaho kha maṅwe mashango a ri: “Mushumo wa Mukriste kha ḽifhasi. . . ndi u ḓivhadza mulaedza wa muvhuso wa Murena.”

⁹ Ḽeneḽo buthano ḽo swika maṱhakheni nga murahu ha maḓuvha mararu musi Wahashu Rutherford a tshi ṋekedza nyambo i re na tshiṱoho tshine tsha ri “Nyambo kha Vhashumi Nga Riṋe,” ye ya gandiswa kha magazini une wa pfi The Watch Tower nga fhasi ha tshiṱoho tshine tsha ri “Tshi Ḓivhadzaho Muvhuso.” O ri: “Nga zwifhinga zwine Mukriste a vha o dzivhuluwa u ḓivhudzisa uri, Ndi ngani ndi fhano kha ḽifhasi? Phindulo yawe i tea u vha i tevhelaho, Nga vhulenda Murena o ita uri ndi vhe muimeli wawe u itela uri ndi ḓivhadze shango mulaedza wa Mudzimu wa u pfumedzana nahone ndugelo na mushumo wanga ndi u ḓivhadza wonoyo mulaedza.”

¹⁰ Kha yeneyo nyambo yo khetheaho, Wahashu Rutherford o ḓivhadza uri magazini muswa, The Golden Age (une zwino wa vhidzwa Awake!), u ḓo gandiswa uri u shumiswe u livhisa vhathu kha Muvhuso une wa vha fulufhelo ḽi ḽoṱhe ḽa vhathu. Nga murahu a vhudzisa vhathetshelesi uri ndi vhangana vhane vha ṱoḓa u shela mulenzhe kha u phaḓaladza wonoyu magazini. Muvhigo u bvaho kha ḽeneḽo buthano wo ṱalutshedza uri: “Vhathu vho aravha nga nḓila i akhamadzaho. Vhathu vha 6 000 vho mbo ḓi takuwa mazha.” b Zwi tou vha khagala uri Khosi yo vha i na vhatikedzi vhe vha vha vha tshi swela u ḓivhadza Muvhuso wayo!

11, 12. Nga 1920, magazini une wa pfi The Watch Tower wo amba uri u ḓo fhela lini mushumo we Yesu a amba hu tshee nga phanḓa uri u ḓo itwa?

¹¹ Khandiso. Magazini une wa pfi The Watch Tower wo bvela phanḓa u tshi ṱalutshedza nga nḓila i pfalaho ndeme ya mushumo we Yesu a u amba hu tshee nga phanḓa—wa u huwelela mafhungo maḓifha a Muvhuso. Ṱhogomelani dziṅwe tsumbo dza mathomoni a vho-1920.

¹² Ho vha hu tshi ḓo ḓivhadzwa mulaedza ufhio hu u itela u ḓadzisa Mateo 24:14? Wonoyo mushumo wo vha u tshi ḓo itwa lini? Magazini une wa pfi The Watch Tower, wa ḽa 1 July, 1920 kha thero i re na tshiṱoho tshine tsha ri “Evangeli ya Muvhuso,” wo ṱalutshedza wonoyo mulaedza, wa ri: “Mafhungo maḓifha hafha ndi a malugana na u fhela ha maitele a kale a zwithu na u tikwa ha muvhuso wa Vhumessia.” Yeneyo thero yo sumbedza zwavhuḓi tshifhinga tshine wonoyu mulaedza wa ḓo huwelelwa ngatsho, yo ri: “Hoyu mulaedza u tea u ḓivhadzwa vhukatini ha tshifhinga tsha nndwa khulwane ya shango [Nndwa ya Shango ya U Thoma] na nga tshifhinga  tsha ‘maṱungu mahulu.’” Nga zwenezwo, yeneyo thero ya ri: “Zwino ndi tshifhinga . . . tsha u ḓivhadza enea mafhungo maḓifha kha Vhudzhagane ḽifhasini ḽoṱhe.”

13. Magazini une wa pfi The Watch Tower wa 1921 wo ṱuṱuwedza hani Vhakriste vho ḓodzwaho uri vha vhe na muya wa u ḓifunela?

¹³ Naa vhathu vha Mudzimu vho vha vha tshi ḓo tou kombetshedzwa u ita mushumo we Yesu a u amba hu tshee nga phanḓa? Hai. Thero ine ya ri “Ivhani Na Tshivhindi,” i re kha magazini une wa pfi The Watch Tower wa ḽa 15 March, 1921, yo ṱuṱuwedza Vhakriste vho ḓodzwaho vhe vha vha vhe na muya wa u ḓifunela. Muṅwe na muṅwe o ṱuṱuwedzwa uri a ḓivhudzise uri: “Naa a si ndugelo yanga khulwane khathihi na vhuḓifhinduleli hanga, u shela mulenzhe kha wonoyu mushumo?” Yeneyo thero yo bvela phanḓa ya ri: “Ri na vhungoho ha uri musi ni tshi zwi dzhia [zwi ndugelo u shela mulenzhe kha wonoyo mushumo] ni ḓo fana na Yeremia, we mbiluni yawe ipfi ḽa Murena ḽa nga ‘mulilo u dugaho, wo dzhenaho maramboni [awe],’ ḽa mu ṱuṱuwedza lwe a si kone u litsha u amba.” (Yer. 20:9) Yeneyo ṱhuṱhuwedzo ya lufuno yo sumbedza uri Yehova na Yesu vha a fulufhela vhatikedzi vha Muvhuso vha fulufhedzeaho.

14, 15. Nga 1922, magazini une wa pfi The Watch Tower wo ṱuṱuwedza Vhakriste vho ḓodzwaho uri vha swikelele vhaṅwe nga nḓila ifhio?

¹⁴ Vhakriste vha ngoho vha fanela u swikelela hani vhaṅwe nga mulaedza wa Muvhuso? Thero pfufhi na i re na maanḓa ya tshiṱoho tshine tsha ri “Tshumelo Ndi Ya Ndeme,” i re kha magazini une wa pfi The Watch Tower wa ḽa 15 August, 1922, yo ṱuṱuwedza Vhakriste vho ḓodzwaho uri vha vhe na mukovhe kha “u phaḓaladza nga u fhisea mulaedza wo gandiswaho kha vhathu na u amba navho mahayani avho, vha tshi ṱanziela uri muvhuso wa ṱaḓulu u tsini.”

¹⁵ Zwi tou vha khagala uri u bva nga 1919, Kristo o shumisa mulanda a fulufhedzeaho na wa vhuṱali u ombedzela lunzhi-lunzhi uri ndugelo na vhuḓifhinduleli ha Mukriste kha ḽifhasi ndi u ḓivhadza mulaedza wa Muvhuso. Naho zwo ralo, Vhagudi vha Bivhili vho aravha hani ṱhuṱhuwedzo ya uri vha shele mulenzhe kha mushumo wa u ḓivhadza nga ha Muvhuso?

16. Vhaṅwe vhahulwane vho vhewaho vho aravha hani musi vha tshi vhudzwa uri vhathu vhoṱhe vha tea u ya tsimuni?

¹⁶ Nga vho-1920 na vho-1930, vhaṅwe vho hanedza muhumbulo wa uri Vhakriste vhoṱhe vho ḓodzwaho vha tea u ya tsimuni. Magazini une wa pfi Watch Tower wa ḽa 1 November, 1927 wo ṱalutshedza zwe zwa vha zwi tshi khou itea, wo ri: “Ṋamusi hu na vhane kerekeni [tshivhidzoni] vha vha vhahulwane . . . vhane vha hana u ṱuṱuwedza vhahavho uri vha ye tshumeloni, na vhane vha hana u ya tshumeloni. . . . Vha sasaladza nyeletshedzo ya uri vha tea u ya nnḓu nga nnḓu u phaḓaladza kha vhathu mulaedza wa Mudzimu, wa Khosi yawe na muvhuso wawe.” Yeneyo thero yo amba nga ho livhaho ya ri: “Tsho swika tshifhinga tsha uri vha fulufhedzeaho vha swaye vhathu vho raloho nahone vha vha iledze na u vha vhudza uri a ri tsha ḓo dovha ra khetha vhanna vho raloho uri vha vhe vhahulwane.” c

17, 18. Vhunzhi ha vhathu zwivhidzoni vho aravha hani vhulivhisi vhu bvaho kha mulanda a fulufhedzeaho nahone vha dzimilioni vho aravha hani miṅwahani i fhiraho ḓana yo fhelaho?

¹⁷ Zwi takadzaho ndi uri vhunzhi ha vhathu zwivhidzoni vho aravha nga mafulufulu vhulivhisi vhu bvaho kha mulanda a fulufhedzeaho. Vho zwi dzhia zwi ndugelo u ḓivhadza vhathu mulaedza  wa Muvhuso. Magazini une wa pfi The Watch Tower wa ḽa 15 March, 1926, wo zwi vhea nga heyi nḓila: “Vha fulufhedzeaho vha ḓo vha vhashumi vha u ḓifunela . . . uri vha vhudze vhathu wonoyu mulaedza.” Vhenevho vha fulufhedzeaho vho ḓadzisa maipfi a vhuporofita a wanalaho kha Psalme ya 110:3 nahone vha tikedza Khosi ya Vhumessia nga u ḓifunela.

¹⁸ Miṅwahani i fhiraho ḓana yo fhelaho, vhathu vha dzimilioni vho ḓiṋekedzela u ita mushumo wa u ḓivhadza Muvhuso nga u ḓifunela. Kha ndima dzi si gathi dzi tevhelaho, ri ḓo haseledza nḓila ye vha huwelela ngayo—maitele na zwishumiswa zwe vha zwi shumisa—na uri mvelelo dzo vha dzifhio. Naho zwo ralo, kha ri thome ri haseledze zwo itaho uri vhathu vha dzimilioni vha shele mulenzhe kha wonoyu mushumo wa u huwelela nga ha Muvhuso nga u ḓifunela, naho vha tshi dzula kha shango ḽine vhathu vha humbulela vhone vhaṋe fhedzi. Musi ri tshi khou haseledza zwiitisi, ndi zwavhuḓi u ḓivhudzisa uri, ‘Ndi ngani ndi tshi ḓivhadza vhaṅwe vhathu mafhungo maḓifha?’

19. Ndi ngani ri tshi tea u tevhela nyeletshedzo ya Yesu ya u ‘dzula ri tshi ṱoḓa Muvhuso u thoma’?

¹⁹ Yesu o eletshedza vhatevheli vhawe uri vha ‘dzule vha tshi ṱoḓa Muvhuso u thoma.’ (Mat. 6:33) Ndi ngani ri tshi tea u tevhela yeneyo nyeletshedzo? Nga nṱhani ha uri ri a zwi ṱhogomela uri Muvhuso ndi wa ndeme, na uri u dovha wa vha wa ndeme kha ndivho ya Mudzimu. Samusi ro zwi vhona kha ndima yo fhiraho, muya mukhethwa wo dzumbulula nga zwiṱuku nga zwiṱuku ngoho dzi nyanyulaho nga ha Muvhuso. Musi ngoho ya Muvhuso ya ndeme i tshi kwama mbilu dzashu, ri ṱuṱuwedzea u ṱoḓa wonoyo Muvhuso u thoma.

20. Tshifanyiso tsha Yesu tsha lupfumo lwo dzumbiwaho tshi sumbedza hani nḓila ine vhatevheli vhawe vha ḓo aravha ngayo nyeletshedzo ya u ṱoḓa Muvhuso u thoma?

²⁰ Yesu o vha a tshi ḓivha nḓila ine vhatevheli vhawe vha ḓo aravha ngayo nyeletshedzo ya u ṱoḓa Muvhuso u thoma. Ṱhogomelani tshifanyiso tshawe tsha lupfumo lwo dzumbiwaho. (Vhalani Mateo 13:44.) Musi a tshi khou ita mushumo wawe wa ḓuvha ḽiṅwe na ḽiṅwe, mushumi wa tsimuni u wana lupfumo lwo dzumbiwaho nahone a ṱavhanya a zwi ṱhogomela uri ndi lwa ndeme. U mbo ḓi ita mini? “Nga nṱhani ha u takala hawe a ṱuwa a ya a rengisa thundu yawe, nahone a renga yeneyo tsimu.” Ri guda mini? Musi ri tshi wana ngoho ya Muvhuso nahone ra ṱhogomela uri ndi ya ndeme, ri ḓo ḓidzima zwiṅwe zwithu u itela uri ri kone u vhea zwithu zwine zwa tshimbidzana na Muvhuso u thoma vhutshiloni hashu. d

21, 22. Vhatikedzi vha Muvhuso vha fulufhedzeaho vha sumbedza hani uri vha ṱoḓa Muvhuso u thoma? Ṋeani tsumbo.

²¹ Vhatikedzi vha Muvhuso vha fulufhedzeaho a vha sokou zwi amba uri vha ṱoḓa Muvhuso u thoma, vha zwi sumbedza nga mishumo. Vha kumedza vhutshilo havho, vhukoni havho na thundu dzavho kha mushumo wa u huwelela nga ha Muvhuso. Vhanzhi vho ḓidzima zwithu zwinzhi u itela u farakanea kha vhuḓinḓa ha tshifhinga tsho ḓalaho. Vhenevho vhahuweleli vha u ḓifunela vho zwi ṱhogomela nga ho livhaho uri Yehova u fhaṱutshedza vhane vha vhea Muvhuso u thoma. Ṱhogomelani tsumbo ya misini ya kale.

 ²² Avery na Lovenia Bristow vho shuma vhoṱhe sa vha-colporteur (vhavulanḓila) ngei tshipembe ha United States u thoma mafheloni a vho-1920. Nga murahu ha miṅwaha yo vhalaho, Lovenia o ri: “Nṋe na Avery ro ḓiphina nga miṅwaha minzhi mushumoni wa vhuvulanḓila u bva nga tshenetsho tshifhinga. Hu na zwifhinga zwinzhi zwe ra vha ri sa ḓivhi uri ri ḓo wana ngafhi tshelede ya u renga peṱirolo kana zwiḽiwa. Fhedzi tshifhinga tshoṱhe Yehova o shumisa nḓila dzo fhamba-fhambanaho u itela u ri thusa. Ro sokou bvela phanḓa na vhuvulanḓila. Tshifhinga tshoṱhe ro vha ri sa shayi tshithu.” Lovenia o humbula tshiṅwe tshifhinga musi vha tshi khou shuma ḓoroboni ya Pensacola, Florida, nahone tshelede na zwiḽiwa zwi tsini na u fhela. Musi vha tshi vhuyelela kha kharavani ye vha vha vha tshi dzula khayo vho wana khedzi mbili khulwane dzo ḓala nga zwiḽiwa nahone hu na kubammbiri kwo ṅwalwaho u pfi, “Vhahaṋu vha ni funaho vha Tshivhidzo tsha Pensacola.” Musi Lovenia a tshi elekanya nga ha mahumi a miṅwaha e a a fhedza vhuḓinḓani ha tshifhinga tsho ḓalaho, u ri: “Yehova ha athu vhuya a ri laṱedza. U dzula a tshi ita uri ri mu fulufhele.”

23. Ni ḓipfa hani nga ha ngoho ya Muvhuso ye na i wana nahone no ḓiimisela u ita mini?

²³ Roṱhe ri nga si kone u fhedza tshifhinga tshi fanaho kha mushumo wa u huwelela. Zwiimo zwashu a zwi fani. Naho zwo ralo, roṱhe ri nga zwi dzhia zwi ndugelo u ḓivhadza mafhungo maḓifha nga mbilu yoṱhe. (Vhakol. 3:23) Nga nṱhani ha uri ri dzhiela nṱha ngoho ya Muvhuso ya ndeme ye ra i wana, ro ḓiimisela—ee, ri fhisetshela—u ḓidzima zwoṱhe u itela u shuma nga hune ra nga kona ngaho. Naa no ḓiimisela u ita nga u ralo?

24. Ndi tshifhio tshithu tshihulwanesa tshe tsha khunyeledzwa nga Muvhuso maḓuvhani a vhufhelo?

²⁴ Ḓanani ḽa miṅwaha ḽo fhiraho, Khosi yo ḓadzisa maipfi ayo a vhuporofita o ṅwalwaho kha Mateo 24:14. Yo ita nga u ralo i sa khou tou kombetshedza muthu. Musi vhatevheli vhayo vho bva kha ḽino shango ḽi re na tseḓa, vho ḓiṋekedzela nga u ḓifunela kha mushumo wa u huwelela. U huwelela havho mafhungo maḓifha shangoni ḽoṱhe ndi tshipiḓa tsha tshiga tshi sumbedzaho uri Yesu u khou vhusa Muvhusoni wa Mudzimu—nahone ndi tshiṅwe tsha zwithu zwihulwane zwe zwa swikelelwa nga Muvhuso maḓuvhani a vhufhelo.