1, 2. Muteko xeeni muulupale Yesu aahimyale awe vahinathi, nto nikoho xeeni nootthuneya ninkhumelela?

ALIPA-OOLAMULELA a mulaponi ikwaha sinceene annilaiherya itthu sihinaakhwaniherya aya. Hata murima aya ophavelaka akina khaniwerya waakhwaniherya ele enilaiherya aya. Masi, mwa enamuna yoohakalaliha Yesu Kristu Mwene, Mesiya, toovirikana nto khula okathi onnaakhwaniherya ele enilaiherya awe.

² Nuumala okhalihiwa Mwene 1914, Yesu aari oophavelexa waakhwaniherya eprofesia yaahimyale awe khalai iyaakha sowiiraka 1.900 ottuli. Okathi vakhaani ohinatthi wiiviwa, Yesu aahimyale so: ‘Ehapar’ila yorera y’Omwene wa wirimu enolaleiwa mulaponi mothene’. (Math. 24:14) Wiiraneya wa moolumo awo waarowa wiirela mpantta ethoonyeryo ya okhala wawe wohooneya ntoko Mwene oowerya. Masi, ninnikhumela nikoho nootthuneya: Mwene owo aarowa owerya sai okumiherya muttitthi wa anamalaleerya oowiivahererya anilikana ni anakhotto, vaavo mahiku ookiserya yaarowa aya waatta ananrima, atthu oohiphenta ni ahinimphavela Muluku? (Math. 24:12; 2 Tim. 3:1-5) Nihaana osuwela, maana waakhuliwa waya onaahela muhina maKristau otheene ekeekhai.

3. Yesu oonihenrye sai wira ehaavo etthu yaakupali awe, nto exeeni yaamwiiriha okupali?

³ Nkatthikelani oweha moolumo a eprofesia ya Yesu. Niireke moolumo oowi “enolaleiwa” anooniherya okupali wa Yesu? Aayo! Yesu aahikupaleela wira mahiku ookiserya yaamukhala atthu owiivahererya yaarowa okhaliheryaka omwene. Nto exeeni yaamwiiriha okupali? Owo aamutakiha Tiithi awe. (Yoh. 12:45; 14:9) Ohinatthi orwa valaponi, Yesu aahimoona saana Yehova wira onnikupaleela murima wowiivahererya wa arumeyi Awe. Nrowe niwehe moota Yehova soonihenrya awe waakupaleela wawe arumeyi awe.

4. Muteko xeeni Yehova aavekenle awe aIsarayeli wira akhaliheryeke, nto aIsarayeli yoonenle sai?

⁴ Nkuupuwelani ele yiiraneyale okathi Yehova aamurumme awe Moise omuteka tabernaakulu, wala eheema, yaarowa okhala opuro wookokhorela wa aIsarayeli otheene. Omurumaka Moise, Yehova ahaalattula atthu otheene okhaliherya muteko ole. Moise  aahimyale so: “Khula mutthu avaheke sintthuna awe”. Nto yaakhumelenle exeeni? “Nihiku ti nihiku, vasisu, atthu yaniruha itthu sowatta ni mirima soleva”. Yaanitepa oruuha mpakha oleeliwa wira ‘ahikhalé-tho . . . onruha sovaha sawe’! (Okhum. 35:5; 36:3, 6) Tthiri aIsarayeli yahooniherya ophwanela waya ororomeliwa ni Yehova.

5, 6. Ntoko sirya aya va Esalimo 110:1-3, muupuwelo xeeni Yehova ni Yesu oniphavela aya wira arumeyi ekeekhai akhalaneke mahiku ala ookiserya?

⁵ Niireke Yehova onilipelela wira mahiku ala ookiserya anookhala atthu arina murima wowiivahererya ntoko khalai? Aayo! Maana iyaakha 1.000 Yesu ohinatthi oyariwa valaponi, Yehova ahimuupuxerya Davidi olepa voohimya sa okathi Mesiya aarowa awe opacerya olamulela. (Musome Esalimo 110:1-3.) Tthiri yamukhumelela awanani a Yesu, nuumala owo okhalihiwa Mwene. Masi, owo aamukhalana-tho atthu yaarowa omukhaliherya. Atthu awo khiyaarowa okhanyereriwa wira amurumeele Mwene. Maana hata amiravo yaarowa wiivahereryaka, wira okhumelele muttitthi muulupale, waatta waya onilikana ni okame onimorela vathi vaasiisu okathi onikhuma nsuwa. *

⁶ Yesu aanisuwela wira eprofesia ya Esalimo 110, yaamuhimya yoowo. (Math. 22:42-45) Tivonto Yesu aakupaleela awe wira yaamukhala atthu yaarowa omukhaliherya, yiivahereryaka ni murima wotheene wira alaleerye ihapari sooreera ilapo sotheene. Nto itthu siiraneyale sinooniherya exeeni? Niireke tthiri Mwene ookumiherya muttitthi wa anamalaleerya anlikana ni anakhotto?

7. Nuumala okhalihiwa Mwene, etthu xeeni Yesu yaapakale awe wira ale animukhaliherya aweryeke ovara saana muteko waarowa okhumelela?

⁷ Nuumala okhalihiwa Mwene, Yesu aahipaka marehereryo wira aalokiherye atthareli awe mwaha wa muteko mulupale waarowa aya ovara. Ntoko soonale ahu Muru wa 2, owo aahivara muteko wowaavarerya ni waareeriha okhuma 1914 mpakha wanipacerya wa 1919. (Mal. 3:1-4) Nto mwaakha wa 1919, owo  aahimuthanla murumeyi oororomeleya wira oweettiheke atthareli awe. (Math. 24:45) Vanceenexa okhuma okathi ole orowa ohoolo, murumeyi owo onnikumiherya yoolya yomunepani, orweela wa myaha sa akongresu ni iliivuru, nto khuta okathi owo onnittittimiherya muritti orina awe khula muKristau wa olaleerya.

8-10. Enamuna xeeni akongresu yaatumererya aya muteko woolaleerya? Nvahe ntakiheryo. (Nwehe-tho ekaaxa eni: “ Akongresu Oopacerya Yaatumererya Muteko Woolaleerya”.)

⁸ Myaha sinilavuliwa okongresuni. Aphavelaka olakiheriwa, alipa-oomusoma Biibiliya yaahithukumana oCedar Point, Ohio, EUA, okhuma 1 mpakha 8 a Setembro 1919, owo waari muthukumano muulupale woopacerya nuumala Ekhotto Yoopacerya ya Olumwenku. Nihiku na nenli munna Rutherford aahilavula mwaha oowiiweya saana wa ale yaarwenle muthukumano ole; owo aahimyale so: “Muteko wa maKristau valaponi . . . ti olaleya ihapari sa omwene wa Apwiya”.

⁹ Okathi woohiliyaleya wa kongresu owo, waakhumenle nihiku na neeraru, vaavo munna Rutherford aalavunle awe mwaha aari ni muru oni: “Masu wa Anamuteko Akhwiihu”, waakumiheriwe muhoolo mwaya ni erevista The Watch Tower waarina muru ola: “Olaleya Omwene”. Rutherford aahimyale so: “Ikwaha sikina muKristau woonasa wene onniikoha oriki: Exeeni ekiirihale okhala valaponi? Nto waakhula wawe ohaana okhala so: Apwiya aakimorela ikharari nto khukikhaliha mulipa-oorummwa onilaleya ihapari sa Muluku sa owaataaniha atthu, nto muteko ni eparakha aka ori olaleya ihapari seiyo”.

¹⁰ Nlelo mwakha yoole ohinliyaleya, munna Rutherford aahilaleya okumiheriwa wa erevista esya A Idade de Ouro (Vano eniitthatiwa Despertai!), erevista ela yaarowa waalakiheryaka atthu wira Omwene tori nlipelelo nookhalela wa apinaatamu otheene. Nto Rutherford aahikoha ariki: atthu akavi athukumanne va, aniphavela okawa erevista ela? Vanihimmwa wira: “Waakhuliwa waya waari wookuxa murima. Atthu otheene 6.000 yaheemela ntoko mutthu mmosa”. * Tthiri Mwene ookhalana atthu animukhaliherya yaawo aniphavela tthiri olaleya Omwene awe!

11, 12. Etthu xeeni yaahimmwale ni erevista The Watch Tower 1920 voohimya sa okathi ene woovara muteko waahimmwale ni Yesu?

¹¹ Iliivuru silempwale. Orweela mwa ipaaxina soolempwa sa The Watch Tower, vannooneya saana yootaphulela ya muteko waahimmwale ni Yesu wa olaleeriwa ihapari sooreera sa Omwene. Nrowe nithokorerye matakiheryo vakhaani yoonen’ye okhuma wanipacerya wa iyaakha sa 1920.

¹² Ihapari xeeni saarowa olaleiwaka wira aakhwaniheriwe Matheyo 24:14? Muteko owo waarowa ovariwa liini? Erevista The Watch Tower, ya 1 a Julyo 1920, yaarina muru oni “Evangelyu ya Omwene” yaatthokihenrye so: “Ihapari sooreera iya sinihimya omala wa makhalelo a itthu sa khalai ni okhalihiwa wa Omwene wa Mesiya”. Nto erevista ele yahooniherya saana okathi ene waarowa aya olaleiwa ihapari iya, eriki: “Ihapari iya sihaana olaleiwa eriyari ya okathi wa Ekhotto Yoolupale [Ekhotto Yoopacerya ya Olumwenku] mpakha okathi wa ‘maxakha malupale’”. Tivonto  vaattittimehenrya aya eriki: “Vano ola ti okathi . . . woolaleya ihapari sooreera mapuro otheene a eKristau yoowoka”.

13. Enamuna xeeni erevista The Watch Tower 1921 yaatumererya aya maKristau oowoottihiwa ophavelaka olaleerya?

¹³ Niireke atthu a Muluku yaarowa okhanyereriwaka ovara muteko waahimmwale ni Yesu? Nnaari. Maana mwaha waakhumenle murevistani The Watch Tower, 15 a Maio 1921, muru aya waahimya wira “Mukhale Oolipa Murima” wahooniherya wira maKristau oowoottihiwa yaarowa wiivahereryaka. Khuta mutthu aanitumereriwa wiikoha so: “Kinnoona okhala eparakha yuulupale ni yooruma ovara muteko woolaleerya?” Mwaha ole waahivikaniha oriki: “Ninnikupaleela wira okathi onoona anyu okhala [eparakha muteko wolaleerya] munrowa okhala ntoko Yeremiya, yoowo masu a Apwiya vamurimani vawe yaakhala ‘ntoko moro woviha wavarela mpakha mmakhuvani [mwawe]’ waamutumererya ohihiya olaleya ihapari sa Muluku”. (Yer. 20:9) Moolumo awo oolipiha annooniherya moota Yehova ni Yesu sinaaroromela aya ale anikhaliherya Omwene.

14, 15. Mwaakha wa 1922, erevista The Watch Tower yahaatumererya maKristau owoottihiwa walaleerya akina, masi mwa enamuna xeeni?

¹⁴ Nto maKristau yaarowa waleelaka sai atthu akina ihapari sa Omwene? Mwaha wookhuveya masi wafaita, aakumiheriwe murevistani The Watch Tower 15 a Agosto 1922, arina muru oni: “Muteko Wootthuneya”, wahaatumererya maKristau oowoottihiwa ovara muteko “wowakawela atthu irevista sowimpirimiriwa ni waleeliha vamukhora vaya, alaleyaka wira omwene wa wiirimu ori vakhiviru”.

¹⁵ Tthiri okhuma 1919 orowa ohoolo, Kristu onnirumeela epottha yororomeleya ni ya ankhili wira ottittimiherye mwa ikwaha sinceene wira eparakha aya ni yooruma wa maKristau ari valaponi ti olaleya ihapari sa Omwene. Nto yoonenle sai Alipa-oomusoma Biibiliya yootumererya ele ya olaleya Omwene?

16. Axitokweene akina yaavotariwe yoonenle sai yootumererya yoowi otheene mmulokoni yahaana olaleeryaka?

¹⁶ Iyaakha sa 1920 ni sa 1930, atthu akina yaanikhootta muupuwelo woowi maKristau oowoottihiwa otheene yahaana olaleeryaka. Nto erevista Watch Tower ya 1 a Novembro 1927 yaahihimya etthu ene yiiraneya eriki: “Mahiku ala aakhala atthu mmakerexani [miloko] arina miritti sa okhulupale ntoko mutokweene . . . masi anikhootta waatumererya anna aya ovara muteko wolaleerya, ni anikhootta orowa olaleerya. . . . Awosa annivaanyiha yooruma ya orowa empa ti empa waleela atthu ihapari sa Muluku, sa Mwene awe ni Omwene awe”. Mwaha ole wahiiwanyeiha oriki: “Vano woophiya okathi wira ale ari oororomeleya yaasuweleke ni waahuluwa atthu ene yaawo, ni waaleela wira khanrowa-tho ovahiwa miritti sa orumeela ntoko mutokweene”. *

17, 18. Anamunceene a mmulokoni yoonenle sai yooruma yaakhuma oseedi, nto imilyau sikina sinoonela sai nuuvira iyaakha 100?

¹⁷ Vohakalaliha-vo anamunceene yaheemya attharela malakiheryo yaakhuma oseedi. Awosa yanoona okhala eparakha waleela akina ihapari sa Omwene. Erevista The Watch Tower, 15 a Março 1926, yaahimyale so: “Atthu oororomeleya anrowa wiivahereryaka,  . . . wira yaleeleke atthu akina ihapari soreera”. Tthiri atthu awo oororomeleya yahaakhwaniherya eprofesia ya Esalimo 110:3 nto yiivahererya wira akhaliherye Omwene wa Mesiya.

¹⁸ Etthu yowiiraka iyaakha 100 sivinre, atthu imilyau sinceene ahiivahererya vootthuna waya wira avare muteko wa olaleya Omwene. Miru sikina sinittharelana sinrowa onooniherya moota awosa yaalaleerya aya, niire so, inamuna ni ikaruma saarumeela aya; ni ele ekhumelenle mwaha wa muteko owo. Masi, wanipacerya nrowe nithokorerye nthowa naya atthu imilyau sinceene aniivahererya aya olaleya Omwene, nnaamwi akhalaka olumwenku atthu aniphavela aya oliviwa paahi. Okathi onrowa ahu othokoreryaka nthowa naya, nihaana wiikohaka so: ‘Exeeni enikiiriha olaleerya ihapari sooreera ni atthu akina?’

19. Exeeni enniiriha wiiwelela miruku sa Yesu soowi “mpajeryeke ophavela Omwene”?

¹⁹ Yesu aahaaruma atthareli awe ‘opajerya ophavela Omwene’. (Math. 6:33) Xeeni vanimananiha ahu wiiwelela yooruma eyo? Mwaha woosuwela wira Omwene ti etthu yootthuneya, maana ti etthu yuulupalexa mwa soolakela sa Muluku. Ntoko soonale ahu muru ovinre, munepa wootteela ohooniherya vakhaani-vakhaani ikeekhai soohakalaliha voohimya sa Omwene. Nto okathi yoole ikeekhai iyo onivara aya murima ahu, murima ahu onnintumererya opacerya ophavela Omwene.

20. Nlikanyiho na Yesu sa muhakhu ovithiwe nnooniherya sai moota atthareli awe yaarowa aya wiiwelela yooruma ya opacerya ophavela Omwene?

²⁰ Niireke Yesu aanisuwela enamuna atthareli awe yaarowa ya wiiwelelaka yooruma ela ya opacerya ophavela Omwene? Yesu mwaneene onnaakhula mwa nlikanyiho nawe na muhakhu ovithiwe mmatta. (Mmusome Matheyo 13:44.) Mwa nlikanyiho nla, namuteko ovaraka muteko awe onniphwanya muhakhu ovithiwe, moohipisa onnisuwela efaita erina aya muhakhu ole. Nto etthu xeeni enipaka awe? ‘Atteliwene murima, onnirowa otumiha sothene sirinawe, khuthuma ematt’eyo’. Vano etthu xeeni eniixutta ahu? Okathi oniixutta ahu ekeekhai ya Omwene nto khiyasuwela efaita aya, hiyo ninnipaka etthu piitthu eniwerya ahu wira nipwehe opuro woopacerya miteko sa Omwene mookumini mwahu. *

21, 22. Anooniherya sai ale anikhaliherya Omwene moororomeleya wira annihela Omwene nipuro noopacerya? Nvahe ntakiheryo.

²¹ Ale anikhaliherya Omwene moororomeleya, sowiira saya ti sinooniherya wira annipacerya ophavela Omwene, ohiya moolumo paahi. Awo annivahererya okumi aya, owerya waya, ni mihakhu saya wira akhaliherye muteko woolaleya Omwene. Anceene aaleva itthu sinci wira akele muteko wa okathi wotheene. Anamalaleerya otheene owiivahererya ahoona ekhayaru wira Yehova onnaareeliha ale anipacerya ophavela Omwene. Nkathokoreryani ntakiheryo na okathi woopacerya mahiku ahu yaala.

²² Wanipacerya wa iyaakha sa 1920, Avery ni Lovenia Bristow yaarumeela ntoko makolportore (mapioneero) epantte ya onikhuma epheyo ya Estados Unidos. Muhoolo mwaya Lovenia  aahilavula oriki: “Miyo ni Avery, naari ootepa ohakalala okathi waavara ahu muteko wa opioneero. Okathi mukina khinaasuwela moota woophwanya musurukhu wa gasolina ni itthu sikina saatthuneya othuma. Masi khuta okathi mwa enamuna yahaalipelela ahu, Yehova aaninikhaliherya. Hiyo naahivikaniha ovara muteko awe. Tthiri naanikhalana itthu saatthuneya”. Lovenia onnuupuwela okathi mukina yaarumeela aya oPensakola, Flórida; nto musurukhu ni eyoolya khumala. Atthikaka nipuro naamanke aya, enupa aya ya maroota, awosa yaahiphwanya mirupa saaheliwe yoolya ni khulempwa so: “Ekompanyia ya Pensakola ennoovahani itthu iya, maana ninnoophentani”. * Upuwelaka iyaakha sinceene sivinre ovaraka muteko wa okathi wotheene, Lovenia onihimya so: “Yehova khotonko oniliyala. Owo ohooniherya wira onnivaha efaita omuroromela wahu”.

23. Munoonela sai voohimya sa ekeekhai ya Omwene exuttale anyu, nto etthu xeeni enilakela anyu opaka?

²³ Ekeekhai wira khivaniweryaneya otheene sahu okhalana mwaattelo mmosaru wa olaleerya. Maana makhalelo a khuta mutthu annivirikana. Masi, otheene sahu nihaana woonaka okhala eparakha yuulupale olaleya ihapari sooreera ni murima ahu wotheene. (aKol. 3:23) Okhala wira ninnitepa ovaha efaita ikeekhai sa Omwene sixuttale ahu, hiyo ninniphavela ni murima ahu wotheene, opaka etthu piitthu eniwerya ahu wira nimurumeele saana nittharihelaka owerya wahu. Niireke nyuwo munuupuwela siiso?

24. Etthu xeeni yuulupale enaakhwaniheriwa ni Omwene mahiku ala ookiserya?

²⁴ Etthu yowiiraka eseekulu emosa evinre, Mwene onnaakhwaniherya tthiri eprofesia awe elempwale va Matheyo 24:14. Nave onnipaka eyo voohimukhanyererya mutthu. Nuumala okhuma molumwenkuni mowaatta atthu a nrima, atthareli a Yesu anniivahererya vootthuna waya wira alaleeryeke. Olaleerya waya ihapari sooreera wuulaanale ilapo sotheene oniirela mpantta wa ethoonyeryo ya okhala-vo wa Yesu momweneni mwawe; nave onnooneya-tho okhala etthu emosa mwa iye sinaakhwaniheriwa ni Omwene awe.