1, 2. ¿Baʼax nojoch meyajil tu yaʼalaj Jesús kun beetbil, yéetel baʼax kʼáatchiʼil ku beetaʼal tu yoʼolal?

 LE GOBIERNOʼOBOʼ maases maʼatech u beetkoʼob baʼax ku yaʼalikoʼob. Yaneʼ kex u kʼáat u beetoʼobeʼ maʼ tu páajtal u béeykuntkoʼob. Baʼaleʼ Jesucristo, le Rey Yéeyaʼanoʼ, mantatsʼ ku béeykuntik baʼax ku yaʼalik.

² Ka tsʼaʼab u beet u Reyil tu jaʼabil 1914, Jesuseʼ káaj u béeykuntik le profecía tsʼoʼok kex mil novecientos jaʼaboʼob u yaʼaloʼ. Táanil tiʼ u kíimileʼ tu yaʼalaj: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob» (Mat. 24:14). U béeytal le baʼax u yaʼalmaʼ táakaʼan ichil le baʼaxoʼob kun chíikbesik tsʼoʼok u káajal u reinar teʼ kaʼanoʼ. Bejlaʼeʼ le máakoʼoboʼ chéen u yutsiloʼob ku kaxtikoʼob, minaʼan u yaabilajoʼob yéetel maʼ u yaabiltmoʼob Diosiʼ. Le oʼolal ku beetaʼal le kʼáatchiʼaʼ: ¿Bix jeʼel u páajtal u kaxtik yaʼab j-kʼaʼaytajoʼob teʼ tu tsʼook kʼiinoʼobaʼ? (Mat. 24:12; 2 Tim. 3:1-5.) Jach kʼaʼanaʼan k-ojéeltik u núukil le kʼáatchiʼaʼ tumen ku yeʼesik jach máaxoʼob tsaypachtik Cristo.

3. ¿Baʼax confianzail yanchaj tiʼ Jesús, yéetel tiʼ máax tu kanaj?

³ Koʼox kaʼa ilik le baʼax tu yaʼalaj Jesusoʼ. Letiʼeʼ tu yaʼalaj «yaan u k’a’ayta’al», lelaʼ ku yeʼesik jach tu jaajil yaan u beetaʼal. U yojel yaan u yantal máakoʼob ken u kʼububaʼob yéetel kiʼimak óolal u beetoʼob le meyaj teʼ tu tsʼoʼok kʼiinoʼobaʼ. ¿Máax kaʼans tuukul beyoʼ? U Taata (Juan 12:45; 14:9). Táanil tiʼ u taal way Luʼumeʼ tu yilaj bix u confiar u Taata tiʼ le máaxoʼob meyajtikoʼ. Koʼox ilik bix tu beetil Jéeoba lelaʼ.

4. ¿Tiʼ baʼax meyajil tu yaʼalaj Jéeoba tiʼ le israelitaʼob ka áantajnakoʼoboʼ, yéetel bix tu beetiloʼob?

⁴ Tuukulnakoʼon tiʼ baʼax tu beetaj le israelitaʼob le ka aʼalaʼab tiʼ Moisés ka u beet junpʼéel tabernáculo utiaʼal u adorartaʼal Jéeobaoʼ. Jéeobaeʼ tu yaʼalaj tiʼ Moisés ka u kʼáat áantaj tiʼ le israelitaʼoboʼ. Moiseseʼ tu yaʼalajtiʼob: «Tuláakal máaxoʼob u kʼáatoʼob u tsʼáaʼob [siibaloʼob] tiʼ Yuumtsil tu jaajil yóoloʼobeʼ, unaj u taaskoʼob». ¿Baʼax túun tu beetoʼob? Letiʼobeʼ chéen «xiʼik u bin u taaskoʼob sáamsamal» u siibaloʼob. Le oʼolal kʼaʼabéetchaj u yaʼalaʼaltiʼob ka xuʼuluk u taaskoʼob u maasil (Éxo.  35:5; 36:3, 6). Le israelitaʼoboʼ tu yeʼesoʼob maʼ chéen kunel úuchik u confiar Jéeoba tiʼobiʼ.

5, 6. Jeʼex u yaʼalik Salmo 110:1 tak 3, ¿baʼax confianzail tu yeʼesaj Jéeoba yéetel Jesús tiʼ le máaxoʼob kun adorartik teʼ tu tsʼook kʼiinoʼobaʼ?

⁵ ¿Láayliʼ wa bey u confiar Jéeoba tiʼ le máaxoʼob meyajtik teʼ kʼiinoʼobaʼ? Láayliʼeʼ. Maas tiʼ mil jaʼaboʼob táanil tiʼ u síijil Jesús way Luʼumeʼ, Jéeobaeʼ tu nuʼuktaj David utiaʼal u tsʼíibtik baʼax kun úuchul ken káajak u reinar le Mesíasoʼ (xok Salmo 110:1-3). Jesús, le túumben Reyoʼ, yaan máaxoʼob kun líikʼil tu contra. Baʼaleʼ yaan xan u tsʼáaikuba yaʼab máakoʼob tu tséel. Letiʼobeʼ maʼ kun obligartbiloʼob u meyajtoʼob le Reyoʼ. Tak le táankelmoʼoboʼ yéetel kiʼimak óolal ken u tsʼáaubaʼob tu tséel. Tumen jach yaʼaboʼobeʼ ku keʼeteloʼob yéetel «le pʼuuljaʼ ku síijil tiʼ le jaʼatskab kʼiinoʼ». a

⁶ Jesuseʼ u yojel tiʼ letiʼ ku tʼaan le baʼax ku yaʼalik Salmo 110 (Mat. 22:42-45). Le oʼolal jach u yojel yaan u yantal máaxoʼob áantik utiaʼal u kʼaʼaytaʼal le maʼalob péektsil tuláakal tuʼuxoʼ. ¿Bix tsʼoʼok u yúuchul lelaʼ? ¿Yaan wa j-kʼaʼaytajoʼob áantik le Rey teʼ tu tsʼook kʼiinoʼobaʼ?

7. ¿Baʼaxoʼob tu beetaj Jesús le ka tsʼoʼok u tsʼaʼabal u beet u Reyil utiaʼal u kaʼansik le máaxoʼob kun áantik teʼ meyajoʼ?

⁷ Le maʼ úuch tsʼaʼabak u beet u Reyil Jesusoʼ káaj u kaʼansik le máaxoʼob tsaypachtik utiaʼal u beetkoʼob le nojoch meyajoʼ. Jeʼex t-ilaj teʼ xook kaʼapʼéeloʼ desde 1914 tak 1919, taal u yil bix u meyajtaʼal Dios tumen le sukuʼunoʼob yéeyaʼanoʼob utiaʼal u binoʼob kaʼanoʼ (Mal. 3:1-4). Tu jaʼabil túun 1919, letiʼeʼ tu yéeyaj le palitsil chúukpajaʼan u yóol yéetel yaan u naʼat utiaʼal u nuʼuktik le máaxoʼob tsaypachtikoʼ (Mat. 24:45). Desde teʼ kʼiinoʼob jeʼeloʼ le palitsiloʼ káaj u tsʼáaik le maʼalob kaʼansaj ku keʼetel yéetel janaloʼ. Lelaʼ ku tsʼáaik yéetel le tsoltʼaanoʼob ku máansaʼal teʼ asambleaʼoboʼ bey xan teʼ jóoʼsaʼaniloʼoboʼ,  leloʼobaʼ ku yeʼeskoʼob u kʼaʼanaʼanil u tsʼáaik u yóol máak teʼ kʼaʼaytajoʼ.

8-10. ¿Bix úuchik u yeʼesaʼal u kʼaʼanaʼanil le kʼaʼaytaj teʼ asambleaʼoboʼ? Aʼal junpʼéel baʼax uchaʼan (ilawil xan le cuadro ku kʼaabaʼtik « Le yáax asambleaʼoboʼ tu líiʼsoʼob u yóol máak utiaʼal kʼaʼaytaj»).

⁸ Tsoltʼaanoʼob ku máansaʼal teʼ asambleaʼoboʼ. Tumen jach u kʼáatoʼob ka kaʼansaʼakoʼobeʼ le j-Xoknáaloʼob tiʼ le Bibliaoʼ tu muchʼubaʼob Cedar Point (Ohio, Estados Unidos) desde 1 tak 8 tiʼ septiembre tiʼ 1919 utiaʼal le yáax asamblea yanchaj ka tsʼoʼok le Yáax Nojoch Baʼateltáambaloʼ. Tu kaʼapʼéel kʼiinil le asambleaoʼ le sukuʼun Rutherfordoʼ tu máansaj junpʼéel tsoltʼaan tuʼux tu yaʼalaj: «Le baʼax unaj u beetik le máaxoʼob tsaypachtik Cristo way Luʼumeʼ [...] u kʼaʼaytikoʼob u maʼalob péektsilil u Reino Yuumtsil».

⁹ Tu cinco kʼiinil le asambleaoʼ le sukuʼun Rutherfordoʼ tu máansaj le jatsʼuts tsoltʼaan ku kʼaabaʼtik: «Tsoltʼaan utiaʼal le j-kʼaʼaytajoʼoboʼ». Lelaʼ jóoʼsaʼab teʼ revista Watch Tower teʼ xook ku kʼaabaʼtik: «Táan u Kʼaʼaytaʼal le Reinooʼ». Le sukuʼunoʼ tu yaʼaleʼ teʼ kʼiinoʼob u jóoʼsmaj máak utiaʼal u tuukuloʼ, maʼalob ka u tukle: «¿Baʼax oʼolal kuxaʼanen?». Tsʼoʼoleʼ tu yaʼaleʼ unaj u núukik máak: «Yoʼolal u yutsil Yuumtsileʼ tu tsʼáajten u páajtalil in bisik u maʼalob péektsilil u kaʼa biskuba máak tu yéetel. Le oʼolal in meyajeʼ in kʼaʼaytik le maʼalob péektsiloʼ».

¹⁰ Teʼ tsoltʼaanoʼ, sukuʼun Rutherfordeʼ tu yeʼesaj junpʼéel túumben revista ku kʼaabaʼtik The Golden Age (¡Despertad!). Tu yaʼalaj xaneʼ yaan u seguer u jóoʼsaʼal utiaʼal u yáantaʼal le máakoʼob u yiloʼob chéen u Reino Dios kun utskíintik tuláakal baʼax beetik u muʼyaj máak. Ka tsʼoʼokeʼ letiʼeʼ tu kʼáataj tiʼ le muchʼukbaloʼob máaxoʼob u kʼáatoʼob táakpajal utiaʼal u tʼoʼoxoloʼ. Junpʼéel informe beetaʼab yoʼolal le asambleaoʼ ku yaʼalik: «Le muchʼukbaloʼoboʼ tu núukoʼob yéetel kiʼimak óolal. Seis mil waʼalajoʼob junpáakiʼ». b Lelaʼ ku yeʼesikeʼ jach yaan máaxoʼob ku tsʼáaikubaʼob tu tséel le Rey utiaʼal u kʼaʼaytikoʼob le Reinooʼ.

11, 12. ¿Baʼax aʼalaʼab tumen le palitsil tu jaʼabil 1920 yoʼolal le meyaj tu yaʼalaj Jesús unaj u beetaʼaloʼ?

¹¹ Jóoʼsaʼaniloʼob. Le xookoʼob tu taasaj le revista Watch Toweroʼ tu yeʼeseʼ u kʼaʼaytaʼal le maʼalob péektsil tu yaʼalaj Jesusoʼ letiʼe baʼax maas kʼaʼanaʼan u beetaʼaloʼ. Koʼox ilik jujunpʼéel tiʼ le xookoʼob jóokʼoʼob desde tu jaʼabil 1920.

¹² ¿Baʼax meyajil unaj u beetaʼal jeʼex u yaʼalik Mateo 24:14? ¿Baʼax kʼiin unaj u beetaʼal? Le revista Watch Tower 1 tiʼ julio tiʼ 1920, tu taasaj junpʼéel xook ku kʼaabaʼtik: «U Evangelioil le Reinooʼ», tu yaʼalaj: «U maʼalob péektsilil le Reino ku yaʼalaʼal teʼ tekstoaʼ táan u tʼaan tiʼ u xuʼulsaʼal le kʼasaʼan yóokʼol kaaboʼ yéetel tiʼ u káajal u meyaj le Reinooʼ». Le xookoʼ tu yaʼalaj baʼax kʼiin ken káajak u kʼaʼaytaʼal: «Le maʼalob péektsilaʼ unaj u kʼaʼaytaʼal desde tu kʼiinil le [yáax] nojoch baʼateltáambaloʼ tak tu kʼiinil ‹le nojoch muʼyajiloʼ›». Le oʼolal le xookoʼ tu yaʼalaj xan:  «Bejlaʼeʼ u kʼiinil [...] u kʼaʼaytaʼal le maʼalob péektsil tiʼ tuláakal le máaxoʼob yanoʼob ichil le cristiandadoʼ».

13. ¿Bix úuchik u líiʼsaʼal u yóol le sukuʼunoʼob yéeyaʼanoʼob tu jaʼabil 1921?

¹³ ¿Unaj wa u obligartaʼal le máaxoʼob tsaypachtik Jesús utiaʼal ka kʼaʼaytajnakoʼoboʼ? Maʼatech. Le revista Watch Tower 15 tiʼ marzo tiʼ 1921, tu taasaj le xook ku kʼaabaʼtik «Maʼ u lúubul a wóoleʼex», lelaʼ tu líiʼsaj u yóol le sukuʼunoʼob yéeyaʼanoʼob utiaʼal u binoʼob kaʼan utiaʼal ka maas kʼaʼaytajnakoʼoboʼ. Aʼalaʼab tiʼ cada juntúul ka u tukle: «¿Maʼ wa unaj in wilik bey junpʼéel jatsʼuts meyaj le tsʼaʼanten in beetoʼ?». Le xookoʼ tu yaʼalaj xan: «Toʼoneʼ k-ojleʼ wa ka wilik [bey junpʼéel jatsʼuts meyajeʼ] yaan a wuʼuyikaba jeʼex Jeremíaseʼ. Letiʼeʼ tu yaʼalaj yoʼolal le maʼalob péektsiloʼ: ‹Ku suut junpʼéel kʼáakʼ ku láaj tóok. Kin wuʼuyik tak tin baakeloʼob›. Leloʼ le péeks utiaʼal maʼ u xuʼulul u kʼaʼaytaj» (Jer. 20:9). Le baʼax tu yaʼalaj le revistaoʼ tu yeʼesaj Jéeoba yéetel Jesuseʼ jach ku confiaroʼob tiʼ le máaxoʼob kʼaʼaytik le maʼalob péektsiloʼ.

14, 15. ¿Baʼax aʼalaʼab tu jaʼabil 1922 unaj u beetik le sukuʼunoʼob yéeyaʼanoʼoboʼ?

¹⁴ Baʼaleʼ ¿bix kun páajtal u kʼaʼaytikoʼob u maʼalob péektsilil le Reino tiʼ tuláakal máakoʼ? Le revista Watch Tower 15 tiʼ agosto tiʼ 1922, tu taasaj junpʼéel xook ku kʼaabaʼtik «Junpʼéel meyaj jach kʼaʼanaʼan». Kex maʼ chowak le xookoʼ tu líiʼsaj u yóol le sukuʼunoʼob yéeyaʼanoʼob utiaʼal «ka u kʼaʼaytoʼob le revistaʼoboʼ yéetel ka xiʼikoʼob joonaj joonajil u kʼaʼaytoʼob tsʼoʼok u káajal u meyaj le Reinooʼ».

¹⁵ Desde tu jaʼabil 1919, chíikpajeʼ Cristoeʼ táan u meyajtiʼ le palitsil chúukpajaʼan u yóol yéetel yaan u naʼat utiaʼal u yeʼesik tiʼ le máaxoʼob tsaypachtik jach kʼaʼabéet u kʼaʼaytikoʼob le maʼalob péektsil way Luʼumoʼ. Baʼaleʼ ¿bix tu kʼamil le j-Xoknáaloʼob tiʼ le Biblia le ka aʼalaʼabtiʼob baʼax meyajil unaj u beetkoʼoboʼ?

16. ¿Baʼax tu beetaj jujuntúul ancianoʼob ka tu yuʼuboʼob tuláakal unaj u jóokʼol kʼaʼaytaj?

¹⁶ Tu yáamil 1920 tak 1939, yanoʼobeʼ maʼ uts tu tʼaanoʼob úuchik u yaʼalaʼal tuláakal le yéeyaʼanoʼob unaj u jóokʼloʼob kʼaʼaytajoʼ. Tu jaʼabil 1928, tsoʼol teʼ revista La Torre del Vigía (u revistail marzo-abril) baʼax ku yúuchloʼ, tu yaʼalaj: «Yaan jujuntúul ichil le múuchʼuliloʼob tsʼaʼan u beet u ancianoiloʼoboʼ [...] maʼ u kʼáat u yáantoʼob le sukuʼunoʼob utiaʼal ka jóokʼkoʼob kʼaʼaytajoʼ yéetel mix letiʼob u kʼáatoʼob táakpajliʼ [...]. Baʼaxeʼ ku tʼaanoʼob kʼaas tiʼ le kʼaʼaytaj joonaj joonajiloʼ, tiʼ le Rey tsʼaʼanoʼ yéetel tiʼ le Reinooʼ». Le xookoʼ tu yaʼalaj xan: «Tsʼoʼok u kʼuchul u kʼiinil a náachkuntkabaʼex tiʼ le máakoʼob beyoʼ yéetel aʼaleʼextiʼob yaan u xuʼulul u beetik u ancianoiloʼob». c

17, 18. ¿Baʼax tu beetaj u maas yaʼabil le múuchʼuliloʼob yoʼolal le nuʼuktaj tsʼaʼaboʼ, yéetel baʼax tsʼoʼok u beetik u millonesil máakoʼob tu yáamil le cien jaʼaboʼob tsʼoʼok u máanoʼ?

¹⁷ Baʼaleʼ u maas yaʼabil le múuchʼuliloʼoboʼ tu beetoʼob yéetel kiʼimak óolal le baʼax aʼalaʼabtiʼoboʼ. Tu yiloʼob bey junpʼéel jatsʼuts meyaj u kʼaʼaytikoʼob le maʼalob péektsiloʼ. Le revista Watch Tower 15 tiʼ marzo tiʼ 1926, tu yaʼaleʼ ‹le chúukaʼan u  yóoloʼoboʼ yaan u kʼaʼaytajoʼob yéetel kiʼimak óolal, maʼ kun obligartbiloʼob›. Letiʼobeʼ jach maʼalob úuchik u beetkoʼob baʼax ku yaʼalik Salmo 110:3 yéetel tu yeʼesoʼob maʼ kʼaʼabéet u obligartaʼaloʼob utiaʼal ka u meyajtoʼob le Rey yéetel kiʼimak óolaloʼ.

¹⁸ Tu yáamil le cien jaʼaboʼob tsʼoʼok u máanoʼ u millonesil sukuʼunoʼob tsʼoʼok u táakpajloʼob utiaʼal u kʼaʼaytaʼal le Reinooʼ. Teʼ tuláakʼ xookoʼoboʼ yaan k-tʼaan tiʼ bix úuchik u kʼaʼaytajoʼob, baʼaxoʼob meyajnajtiʼob yéetel bix biniktiʼob. Baʼaleʼ táanileʼ koʼox ilik baʼax péeksik u millonesil máakoʼob utiaʼal kʼaʼaytaj kex kuxaʼanoʼob tiʼ junpʼéel yóokʼol kaab tuʼux chéen u yutsil máak ku kaxtik. Le táan k-ilik lelaʼ maʼalob ka k-tukle: «¿Baʼax péeksen in kʼaʼayt le maʼalob péektsiloʼ?».

19. ¿Baʼax péeksikoʼon utiaʼal maʼ u xuʼulul k-kaxtik táanil le Reino jeʼex úuchik u yaʼalik Jesusoʼ?

¹⁹ Jesuseʼ tu yaʼalaj tiʼ u disipuloʼob: «Maʼ u xuʼulul a kaxtikeʼex táanil u Reino Dios» (Mat. 6:33). ¿Baʼaxten unaj k-beetik le baʼax tu yaʼaloʼ? Tumen k-naʼatik jach kʼaʼabéet le Reino utiaʼal u béeykuntik le baʼax u tukultmaj Diosoʼ. Jeʼex t-ilaj teʼ xook máanikoʼ le kiliʼich muukʼoʼ jujunpʼíitil úuchik u yáantkoʼon k-naʼat baʼaloʼob yaan yil yéetel le Reinooʼ. Le ken k-naʼat tubeel le baʼaxoʼob ku kaʼansaʼal yoʼolal le Reinooʼ, k-puksiʼikʼaleʼ ku péeksikoʼon utiaʼal maʼ u xuʼulul k-kaxtik.

20. Jeʼex u yeʼesik u kettʼaanil le tesoro mukaʼanoʼ, ¿baʼax unaj k-beetik ken k-kan u jaajil yoʼolal le Reinooʼ?

²⁰ Jesuseʼ u yojleʼ le máaxoʼob tsaypachtikoʼ yaan u kaxtikoʼob táanil le Reinooʼ. Jeʼex u yeʼesik u kettʼaanil le tesoro mukaʼanoʼ (xok Mateo 13:44). Le táan u meyaj le máak aʼalaʼab teʼ kettʼaanoʼ tu kaxtaj junpʼéel tesoro mukaʼan, letiʼeʼ tu séebaʼanil tu yilaj jach koʼoj u tojol. ¿Baʼax túun tu beetaj? «Tumen jach kiʼimak u yóoleʼ, bineʼ ka tu konaj tuláakal le baʼax yaantiʼoʼ ka tu manaj le terreno» tuʼux mukaʼan le tesorooʼ. ¿Baʼax k-kanik tiʼ le baʼax tu beetoʼ? Ku kaʼansiktoʼoneʼ le ken k-naʼat u jaajil yoʼolal le Reino yéetel ken k-naʼat baʼax meyajiloʼob ku beetkeʼ, k-beetik tuláakal le ku páajtal utiaʼal k-tsʼáaik táanil ichil k-kuxtaloʼ. d

21, 22. ¿Bix u yeʼesik u disipuloʼob Jesús ku tsʼáaikoʼob táanil le Reino ichil u kuxtaloʼoboʼ? Aʼal junpʼéel baʼax uchaʼan.

²¹ Le máaxoʼob yanoʼob tu tséel u Reino Diosoʼ maʼ chéen aʼalbil u beetkoʼobiʼ, baʼaxeʼ ku yeʼeskoʼob yéetel baʼaxoʼob ku beetkoʼob jach ku tsʼáaikoʼob táanil ichil u kuxtaloʼob. Ku kʼubik u kuxtaloʼob, baʼaxoʼob yaantiʼob yéetel ku meyajtiʼob le baʼaxoʼob u yojel u beetoʼob utiaʼal u kʼaʼaytikoʼob le Reinooʼ. Yaʼabeʼ ku beetik tuláakal le ku páajtal utiaʼal u maas chʼíikiloʼob u kʼaʼaytoʼob le Reinooʼ. Cada juntúul tiʼ letiʼobeʼ tsʼoʼok u yilik bix u yáantaʼal tumen Jéeoba ikil u tsʼáaik táanil le Reino ichil u kuxtaloʼ. Koʼox ilik junpʼéel baʼax eʼesik lelaʼ.

²² Le sukuʼun Avery yéetel Lovenia Bristow, u yatanoʼ, káaj u beetik u precursoriloʼob kex óoliʼ tu jaʼabil 1929 tu noojol  Estados Unidos. Ka máan kʼiineʼ Loveniaeʼ tu yaʼalaj: «Teen yéetel Averieʼ yéetel kiʼimak óolal múul meyajnajoʼon bey precursoril ichil yaʼab jaʼaboʼobeʼ. Yaʼab u téeneleʼ maʼ k-ojel tuʼux ken k-chʼaʼ u tojol gasolinaiʼ mix baʼax ken k-jaante. Baʼaleʼ mix juntéen tu pʼatoʼon Jéeoba. Maʼ xuʼul k-tsʼáaik k-óoliʼ yéetel mantatsʼ yanchajtoʼon le baʼax kʼaʼabéetoʼ». Loveniaeʼ tu kʼaʼajsaj xan le baʼax úuch juntéenjeak táan u beetik u precursoriloʼob tu kaajil Pensacola (Florida) le ka pʼáat óoliʼ minaʼan u tojol utiaʼal u manik u yoʼochoʼob. Le ka kʼuchoʼob teʼ camión tuʼux kajaʼanoʼoboʼ tu yiloʼob kaʼapʼéel nukuch bolsa chuupoʼob yéetel baʼax jaantbil yéetel pʼaʼat junpʼéel chan juʼun tuʼux ku yaʼalik: «Yéetel yaabilaj ku tsʼaʼabalteʼex tumen le compañía yaan Pensacolaoʼ». e Loveniaeʼ tu yaʼalaj yoʼolal le bukaʼaj jaʼaboʼob jach chʼíikoʼob u meyajtoʼob Diosoʼ: «Jéeobaeʼ junpuliʼ maʼ tu pʼatoʼoniʼ. Letiʼeʼ maʼatech u pʼatik le máaxoʼob ku kʼubik u yóoloʼob tiʼoʼ».

23. ¿Bix a wuʼuyikaba yoʼolal le baʼax tsʼoʼok a kanik yoʼolal le Reinooʼ, yéetel baʼax jach a kʼáat a beete?

²³ Maʼ tuláakloʼon jeʼel u páajtal k-beetik le bukaʼaj ku beetik u maasil teʼ kʼaʼaytajoʼ, tumen cada juntúuleʼ yaanal bix kuxlik. Baʼaleʼ tuláakloʼon jeʼel u páajtal k-kʼaʼaytik le maʼalob péektsil yéetel u jaajil k-óoloʼ (Col. 3:23). Tsʼoʼoleʼ tumen tuláakloʼon jach kiʼimak k-óol úuchik k-kanik u jaajil yoʼolal le Reinooʼ, jach taak k-beetik tuláakal le ku páajtal utiaʼal k-tsʼáaik kʼaj óoltbiloʼ.

24. ¿Máakalmáak le meyaj maas nojoch ku beetik le Reino teʼ tu tsʼook kʼiinoʼobaʼ?

²⁴ Desde teʼ siglooʼ máanikoʼ, le Reyoʼ táan u béeykuntik le baʼax ku yaʼalik Mateo 24:14. Letiʼeʼ maʼ tu obligartik mix máak utiaʼal ka u beet le meyajaʼ. Baʼaxeʼ le máaxoʼob ku jóokʼloʼob tiʼ le kʼasaʼan yóokʼol kaabaʼ tu juunaloʼob ku chʼaʼtuklikoʼob u beetkoʼob yéetel kiʼimak óolal. Le kʼaʼaytaj ku beetkoʼob tuláakal yóokʼol kaabaʼ ku chíikbesik tsʼoʼok u káajal u gobernar Jesús teʼ kaʼanoʼ. Lelaʼ letiʼe meyaj maas nojoch ku beetik le Reino teʼ tu tsʼook kʼiinoʼobaʼ.