第6章
传道嘅人——甘心献出自己
1,2． （甲）耶稣牺牲生命之前预告咗乜嘢？（乙）乜嘢问题有待解答？
政治领袖经常作出承诺，但大部分都系空头支票。有啲领袖好想兑现承诺，但往往都有心无力。令人欣慰嘅系，弥赛亚君王耶稣基督讲到做到，从来都唔会食言。
2 耶稣喺1914年登基作王之后，就准备实现自己喺1900年前预告嘅事。耶稣牺牲生命之前冇几耐，预告话：“呢个王国嘅好消息会传遍普天下”。（马太福音24:14）呢个预言系末世征象嘅一部分，预言嘅应验表明耶稣已经临在，执掌王权。但问题系：喺呢段最后嘅日子，人人都自私自利、缺乏爱心，对宗教冇兴趣，噉君王耶稣点样兴起一支甘心舍己嘅传道大军呢？（马太福音24:12；提摩太后书3:1-5）我哋一定要揾到呢个问题嘅答案，因为答案同每个真基督徒息息相关。
3． （甲）耶稣深信乜嘢？（乙）耶稣点解会有咁大嘅信心？
3 再嚟睇吓耶稣嘅预言。“会传遍”呢几个字唔系正正显示出耶稣嘅信心咩？耶稣深信喺最后嘅日子，一定会有一群人甘心为上帝嘅王国效劳。点解耶稣会有咁大嘅信心呢？因为佢向天父学习。（约翰福音12:45；14:9）耶稣降世为人之前亲眼睇到，耶和华信任崇拜佢嘅人，深信佢哋有甘心乐意嘅精神。等我哋嚟睇吓耶和华点样表达呢种信心。
“你嘅子民要甘心献出自己”
4． （甲）耶和华请以色列人捐助乜嘢工程？（乙）以色列人有乜嘢反应？
4 请回想一下耶和华吩咐摩西建造圣幕嗰时，发生咗乜嘢事。圣幕系以色列人崇拜耶和华嘅中心。耶和华通过摩西，请所有以色列人捐助呢项工程。摩西对以色列人讲：“凡甘心乐意嘅，都可以将奉献俾耶和华嘅礼物送上嚟”。结果，民众每日朝早都“不断将自愿献嘅礼物送上嚟”。送嚟嘅礼物实在太多，摩西唯有叫佢哋唔使继续奉献。（出埃及记35:5；36:3,6）以色列人确实冇辜负耶和华嘅信任。
5,6． 诗篇110:1-3预告，耶和华同耶稣相信喺最后嘅日子，真心崇拜上帝嘅人会显出点样嘅精神？
5 耶和华系唔系早就相信，喺最后嘅日子崇拜佢嘅人会甘心献出自己呢？当然系啦！耶稣喺地上出生前千几年，耶和华已经启示大卫写低，弥赛亚开始统治嗰时有乜嘢事发生。（请读诗篇110:1-3）耶稣一登基作王，就受到仇敌嘅反对。不过，佢有一支拥护王国嘅大军，心甘情愿为君王效劳。连年轻人都乐意加入呢支队伍，佢哋嘅数目就好似晨曦中覆盖大地嘅露珠咁多。 a
甘心为上帝王国效劳嘅人多如露珠（见第5段）
6 耶稣知道，诗篇110篇嘅预言所讲嘅就系佢自己。（马太福音22:42-45）所以，耶稣完全有理由相信自己作王嗰时，一定会有一群人甘心为佢效劳，乐意将王国嘅好消息传遍世界各地。历史话俾我哋知乜嘢呢？喺最后嘅日子，君王耶稣有冇兴起一支甘心舍己嘅传道大军呢？
“宣扬呢个信息系我嘅荣幸，亦都系我嘅责任”
7． 耶稣作王之后，点样帮助门徒做好准备，迎接前头嘅任务？
7 耶稣作王之后冇几耐，就帮助门徒做好准备，迎接前头重大嘅任务。呢本书第2章讲过，从1914年到1919年初期，耶稣视察同埋洁净圣殿。（玛拉基书3:1-4）1919年后期，耶稣委派忠信嘅奴隶带领佢嘅门徒。（马太福音24:45）从嗰时开始，忠信嘅奴隶就通过大会演讲同埋出版物嚟分发灵粮，反复强调每个基督徒都有责任亲自去传道。
8-10． 大会点样促进传道工作？请举例。（另见附栏“ 早期嘅大会促进传道工作”）
8 大会演讲 1919年9月1-8日，圣经研究者喺美国俄亥俄州杉树角举行大会。呢个系第一次世界大战之后嘅第一个重要大会，大家都好想知道上帝嘅组织有乜嘢指示。大会嘅第二日，卢述福弟兄喺演讲当中明确噉话俾听众知：“基督徒喺地上嘅使命……系宣扬主嘅王国。”
9 三日之后，卢述福弟兄发表咗一个题目叫做“向同工讲话”嘅演讲，将大会推向高潮。佢话：“基督徒静落嚟嗰时好自然会谂一谂：我喺地上有乜嘢使命呢？答案应该系，主仁慈噉派我做大使，劝世人同上帝和好。宣扬呢个信息系我嘅荣幸，亦都系我嘅责任。”后来，呢个演讲以《宣扬王国》作为题目，喺《守望台》刊登出嚟。
10 喺呢个具有历史意义嘅演讲当中，卢述福弟兄宣布发行一本新杂志《黄金时代》（而家叫做《警醒！》），目的系要帮助人明白上帝嘅王国系人类唯一嘅希望。卢述福弟兄问听众：“边个愿意分发呢本杂志？”大会嘅一份报告描述当时嘅情景话：“在场嘅6000人一齐企咗起身。听众嘅反应咁热烈，真系激动人心！” b好明显，君王耶稣有一支甘心为佢效劳嘅大军，乐意传讲佢嘅王国。
11,12． 1920年有一期《守望台》指出，耶稣预告嘅传道工作会喺几时执行？
11 出版物 耶稣预告，“呢个王国嘅好消息会传遍普天下”。通过《守望台》嘅文章，我哋越来越明白传道工作嘅意义有几重大。请睇吓上个世纪20年代初嘅一啲例子。
12 基督嘅大军会传讲乜嘢好消息，从而应验马太福音24:14嘅预言呢？几时会传讲呢个好消息？英语版《守望台》1920年7月1日刊嘅一篇文章《王国嘅福音》解释呢节经文话：“好消息系同旧制度嘅终结以及弥赛亚王国嘅建立有关嘅。”至于几时传讲，文章接落嚟清晰噉指出：“从［第一次世界］大战直到‘大患难’，呢个好消息一定要传讲出去。……而家系时候将呢个好消息喺信奉基督嘅国家里面广传开去。”
13． 1921年，《守望台》点样鼓励受膏基督徒甘心献出自己？
13 上帝嘅子民系咪迫于无奈，先至做耶稣预告嘅传道工作呢？唔系嘅。英语版《守望台》1921年3月15日刊嘅一篇文章《要刚强壮胆》鼓励受膏基督徒甘心献出自己，促请每个人谂一谂：“参与传讲好消息嘅工作，唔系无上嘅光荣咩？唔系我嘅本分咩？”文章跟住话：“主嘅话喺耶利米心里‘燃烧，困喺［佢］嘅骨头里面’，佢冇办法唔讲出嚟。当你将传道工作［睇成系殊荣］，就一定会好似耶利米噉样，忍唔住要传讲上帝嘅话语。”（耶利米书20:9）呢番鼓舞人心嘅说话，反映出耶和华同耶稣信任忠心为王国效劳嘅人。
14,15． 1922年，《守望台》劝勉受膏基督徒用乜嘢方法向人传道？
14 真基督徒应该点样向人传讲王国嘅信息呢？英语版《守望台》1922年8月15日刊，有一篇简短有力嘅文章叫做《服务至为重要》，劝勉受膏基督徒要“主动上门探访人，向佢哋分发书刊，指出天上嘅王国临近嘞”。
15 好明显，自从1919年以来，基督一直通过忠信睿智嘅奴隶反复强调，宣扬上帝王国嘅好消息系基督徒喺地上嘅职责，亦都系佢哋嘅殊荣。噉早期嘅圣经研究者有冇听从呢个劝勉呢？
“忠心嘅人甘愿献出自己”
16． 对于所有基督徒都应该参与传道工作，有啲被选出嚟嘅长老有乜嘢反应？
16 上世纪二三十年代，有啲人唔同意所有受膏基督徒都应该参与传道工作。英语版《守望台》1927年11月1日刊指出当时嘅情况话：“教会［会众］里面有啲长老……唔单止唔带头传道，亦都唔肯鼓励弟兄传道。……佢哋仲藐视逐家逐户宣扬上帝、君王同王国嘅建议。”文章明确噉指出：“而家，忠心嘅弟兄要记低而且避开呢啲人，亦都要令佢哋知道，佢哋会失去长老嘅职分。” c
17,18． （甲）会众大部分人对忠信奴隶嘅指示有乜嘢反应？（乙）过去百几年期间，有好几百万人点样做？
17 令人高兴嘅系，会众大部分人都听从忠信奴隶嘅指示，热心传讲上帝王国嘅信息，而且以呢项工作为荣。英语版《守望台》1926年3月15日刊有句话噉讲：“忠心嘅人甘愿献出自己，向人传讲上帝嘅王国。”佢哋用行动证明自己乐意为弥赛亚君王效劳，应验咗诗篇110:3嘅预言。
18 过去百几年期间，有好几百万人乐意献出自己嚟宣扬上帝嘅王国。接落嚟嘅几章会讲吓佢哋点样传道——所用嘅方法同工具，以及传道工作有乜嘢成果。下文会先讲吓，喺呢个以自我为中心嘅世界里面，点解仲有咁多人自愿传讲上帝嘅王国。不妨一边睇，一边问吓自己：“点解我要向人传讲好消息呢？”
“要不断先追求王国”
19． 点解我哋听从耶稣嘅劝告“不断先追求王国”？
19 耶稣劝门徒“要不断先追求王国”。（马太福音6:33）点解我哋听从耶稣嘅劝告呢？主要系因为我哋睇出上帝王国嘅重要性。上帝要实现佢嘅旨意，佢嘅王国系必不可少嘅。前一章已经讲过，圣灵逐步启示人明白振奋人心嘅王国真理。我哋俾呢啲宝贵嘅真理深深打动，自然就会先追求王国。
基督徒揾到上帝王国嘅真理，就好似一个人揾到隐藏嘅宝藏噉，开心到不得了（见第20段）
20． 宝藏嘅比喻点样表明，耶稣嘅门徒会听从劝告，不断先追求王国？
20 耶稣知道门徒会听从劝告，不断先追求王国。请睇睇一个关于宝藏嘅比喻。（请读马太福音13:44）耶稣喺比喻里面提到，耕田嘅人做紧平日嘅工作嗰时，偶然发现藏喺野地嘅财宝，即刻就睇出佢好有价值。耕田嘅人点做呢？“佢非常喜乐，就去卖晒一切所有嘅，买咗嗰块地。”我哋从呢个比喻学到乜嘢呢？我哋揾到上帝王国嘅真理，睇出呢啲真理非常宝贵，就乐意作出任何牺牲，务求继续将上帝嘅王国放喺应有嘅位置——我哋生活嘅首位。 d
21,22． 忠于上帝王国嘅人点样表明自己先追求上帝嘅王国？请举例说明。
21 点样表明自己先追求上帝嘅王国呢？忠于上帝王国嘅人唔会净系讲而唔去做。佢哋会献出自己嘅才干、财物，甚至献出一生嚟传讲上帝嘅王国。为咗参与全时服务，唔少人作出好大嘅牺牲。所有甘心乐意传道嘅人都可以凭自己嘅亲身经历作证：凡系先追求王国嘅，一定会得到耶和华嘅赐福。等我哋嚟睇吓早期嘅一个例子。
22 上世纪20年代后期，埃弗里·布里斯托同妻子洛文娅开始喺美国南部做派书者（而家叫做先驱）。好多年之后，洛文娅回忆话：“我同埃弗里一齐做先驱好多年，度过唔少快乐嘅时光。有好多次，我哋冇钱加油或者买食物，但系耶和华一直都通过某啲方式令我哋得到生活嘅必需品。就噉样，我哋一直做先驱，从来都唔会缺衣少食。”洛文娅记得佢哋两个喺佛罗里达州彭萨科拉镇服务嗰时，有一次啲钱就快使晒，食物亦都就嚟食完。佢哋返到活动房屋车，发现有两大袋食物，仲有张纸仔，上面写住：“请接受彭萨科拉连嘅爱。” e回顾过去几十年做先驱嘅经历，洛文娅话：“耶和华从来都冇揼低我哋唔理，我哋信赖佢，佢一定唔会令我哋失望。”
23． （甲）你对自己揾到嘅王国真理有乜嘢感觉？（乙）你决心点样做呢？
23 我哋人人嘅情况都唔同，唔一定可以用同样多嘅时间传道。但系，每个人都可以全心全意宣扬好消息，将佢睇成系殊荣。（歌罗西书3:23）由于我哋珍视所揾到嘅宝贵嘅王国真理，好想尽心竭力为王国效劳，所以无论要牺牲乜嘢，我哋都心甘情愿，甚至毫不犹疑噉做。你系咪都有噉嘅决心呢？
24． 喺最后嘅日子，上帝王国嘅一个伟大成就系乜嘢？
24 过去一百年间，君王耶稣的确讲到做到，马太福音24:14记载嘅预言已经应验咗。点样应验呢？耶稣嘅门徒弃绝咗呢个世界以自我为中心嘅态度，献出自己传讲上帝嘅王国，但唔系出于勉强，而系甘心乐意。佢哋喺世界各地所做嘅传道工作，系上帝王国喺呢段最后日子嘅一个伟大成就，呢个清楚表明耶稣已经临在，执掌王权嘞。
b 《主嘅工作交托俾边个？》（英语）呢本小册子话：“《黄金时代》用嚟喺逐家逐户传道时分发。……讲出上帝王国嘅信息之后，无论住户订唔订杂志，都可以俾对方一本《黄金时代》。”之后有好多年，上帝嘅组织鼓励弟兄姊妹话俾住户知，唔单止可以订《守望台》，仲可以订《黄金时代》。从1940年2月1日开始，上帝嘅组织鼓励弟兄姊妹将杂志一本本噉分发出去，而且记低分发嘅数量。
d 耶稣喺另一个比喻里面亦都讲明咗同样嘅道理。比喻讲到一个商人寻找贵重嘅珍珠，一揾到就即刻卖晒所有嘢，买咗嗰粒珍珠。（马太福音13:45,46）呢两个比喻话俾我哋知，人可能会通过唔同嘅途径认识王国嘅真理。有啲系偶然遇到嘅，有啲系刻意去揾嘅。不过，无论点样揾到真理，我哋都愿意作出牺牲，将上帝嘅王国放喺生活嘅首位。
e 嗰个年代，会众叫做“连”。
