1, 2. 1) ¿Kunsa walja jaqenakamp istʼayasiñatakejj Jesusajj luräna? 2) ¿Kunjamsa Jesusan arkirinakapajj jupat yateqasipjjäna, ukat kunatsa?

 JESUSAJJ walja jaqenak nayraqatanwa qota lakan yatichaskäna. Ukampis mä boter sarjjatasaw qota lakat mä qawqha metronak jitheqtäna, ¿kunatsa ukham jitheqtpachäna? Kunapachatï maynejj uma patjjanki ukhajja, jukʼamp jachʼatwa arupajj istʼasi, ukhamajj sumwa mayninakajj istʼapjjaspa, uk yatisaw Jesusajj ukham luräna (Marcos 4:1, 2 liytʼañataki).

² Khä 1914 mara nayrasa ukat qhepatsa, Criston taqe chuyma arkirinakapajj jupat yateqasisaw jukʼamp jaqenakar yatiyañatak kunayman toqet chʼamachasipjjäna. Cheqansa, Diosan servirinakapajj kuntï Reyejj siski ukwa lurapjje. Ukatwa kuna mayjtʼäwinakatï aka pachan utjki ukarjama ukat jichhak uñstki uka aparatonakamp yatiyañatak chʼamachasipjje, ukhamat janïr akapachajj tukuskipan jukʼamp jaqenakar Diosan Reinopat yatiyañataki (Mat. 24:14). Kunanakas jilat kullakanakaru taqe cheqankir jaqenakar yatiyañatak yanaptʼawayi ukwa aka yatichäwin yatjjataskañäni. Uk yatjjatkasajja, kunjamsa uka cristianonakat yateqassna uk amuytʼasiñaw wakisispa.

3. Russell jilatan arstʼäwinakapajj periodiconakan qellqasitap uñjasajja, ¿kunjamsa cheqa yatichäwinak jan yatiyasiñap munapkäna ukanakajj jikjjatasipjjpachäna?

³ Periodiconaka. Russell jilatampi ukat yanapirinakapampejja, 1879 maratwa Yatiyañataki sat revista apsuñ qalltapjjäna, uka revista toqew jupanakajj Diosan Reinopat walja jaqenakar yatiyapjjäna. Ukampis amuyatajja, 1914 maratak mä qawqha maranak faltkipanwa Cristojj jukʼamp jaqenakar suma yatiyäwinak yatiyasiñapatakejj pʼeqtʼjjäna. 1903 maranwa Eaton chachajj Biblian yatichäwinakapat parltʼañatak Russell jilatar invittʼäna. Eaton chachajj teología toqet suma yatjjattʼatänwa ukat Pensilvania (Estados Unidos) markan protestante sat mä religionan sutipjjaruw parlarakïna. Jupajj akham sasaw  Russell jilatar mä carta qellqäna: “Kuntï jiwasajj amuyktan uk jaqenakajj wal istʼañ munapjjaspa. Uka toqenakat janiw jumasa ni nayas mä kikpak amuyktanti” sasa. Russell jilatasa ukat yanapirinakapasa, ‘jaqenakajj uk wal istʼañ munapjjaspa’ sasaw amuyapjjarakïna, ukatwa kuntï Eaton chachamp parlapjjañapäkäna uk qellqasiñapatak wali uñtʼat mä periodicor mayipjjäna. Waljaniw uka qellqatanak liytʼapjjäna ukat Russell jilatajj chuymar purtʼkirwa Biblian cheqa yatichäwinakap qhanañcharakïna, ukatwa arstʼäwinakap sapa semana qellqañatak uka periodicojj Russell jilatar mayïna. ¡Cheqa yatichäwinak jan yatiyasiñap munapkäna uka jaqenakan amtapajj janiw phoqaskänti!

4, 5. 1) ¿Kunjam chuymanïtapsa Russell jilatajj uñachtʼayäna? 2) Jehová Diosan markap sarayañataki uttʼayatäpki uka jilatanakajja, ¿kunjamsa Russell jilatat yateqasipjjaspa?

⁴ Mä qawqha tiempotjja, yaqha periodiconakaw Russell jilatan arstʼäwinakap qellqañ munapjjarakïna. ‘11 periodiconakaw uka arstʼäwinak qellqapjje’ sasaw Yatiyañataki revistajj 1908 maran yatiyäna. Ukampis qellqatanak lurañ yatipkäna uka jilatanakaw Russell jilatarojj akham sapjjäna: ‘Pittsburgh (Pensilvania) sat markan utjki uka oficinanak yaqha markar jittayam’ sasa. Ukhamatwa yaqha periodiconakajj Biblian cheqa yatichäwinakap qellqapjjasapäna. Uka toqeta ukat yaqha toqenakat sumpach amuytʼasaw Russell jilatajja, 1909 maran Brooklyn (Nueva York) markar oficinanak jittayjjäna. ¿Kunas paspachäna? Mä qawqha phajjsitjja, niya 400 periodiconakaw Russell jilatan arstʼäwinakap qellqapjjäna. Diosan Reinopajj 1914 maran uttʼaskäna ukhajja, Russell jilatan arstʼäwinakapasa ukat Biblian yaqha yatichäwinakapasa, 2.000 periodiconakanwa pusi arunakan qellqasjjäna.

⁵ ¿Kunsa ukajj yatichistu? Jehová Diosan markap sarayañataki uttʼayatäpki uka jilatanakajja, Russell jilatjamarakiw altʼat chuymanïpjjañapa ukat kun amtañatakis kuntï mayninakajj sapki uks istʼapjjañaparakiwa (Proverbios 15:22 liytʼañataki).

6. Periodiconakan mistkäna uka cheqa yatichäwinakajj kunjamsa jaqenakar yanaptʼawayi uk qhanañchtʼam.

⁶ Periodiconakan Reino toqet qellqaskäna uka cheqa yatichäwinakajja, walja jaqenakaruw sum jakasipjjañapatak yanaptʼawayi (Heb. 4:12). Ora Hetzel sat kullakat amuytʼañäni, jupajj 1917 maranwa bautisasïna ukat yaqha jilat kullakanakjamaw periódico toqejj cheqa yatichäwinak yateqäna. Jupajj akham sänwa: “Casarasitajat mä qawqha tiempotjja, mamajar visittʼiriw sarta, jupajj Rochester (Minnesota) sat markanwa jakasïna. Mamajan utapar purta ukhajja, jupajj Russell jilatan arstʼäwipwa periodicot khuchsuskatayna. Uka arstʼäwinak liytʼasajj  kunsa yateqäna ukwa mamajajj awisitäna”. Ukhamatwa Ora sat kullakajj cheqa yatichäwinak yateqäna ukat 60 maranakaw Diosan Reinopat taqe chuym yatiyawayi.

7. ¿Kunatsa periodiconakamp yatiyasiskakiniti janicha uk amuytʼapjjäna?

⁷ Khä 1916 maranjja, yatiyasiñapataki pʼeqtʼapkäna uka jilatanakajj periodiconakamp yatiyasiskakiniti janicha ukwa amuytʼapjjäna. ¿Kunatsa? Nayrïr Jachʼa Chʼajjwäwi utjatap laykojja, kunanakatï periódico lurañatak wakiskäna uk jikjjatañajj wali chʼamänwa. Uka maranjja, Gran Bretaña markan Russell jilatan arstʼäwinakap periodiconakar apayapkäna uka jilatanakajj akham sapjjänwa: “Russell jilatan arstʼäwinakapjja, 30 periodiconakakiw qellqjjapjje. Papelanak alañajj wali jiläjjatap laykojj janjamakiw ni uka periodiconakas qellqañ munjjapjjaniti” sasa. Ukat octubre 31, 1916 maranwa Russell jilatajj jiwjjarakïna. Ukatwa Yatiyañataki diciembre 15, 1916 maran mistkäna uka revistajj akham säna: “Niyakejjay Russell jilatajj jiwatäjjchejja, janiw arstʼäwinakapajj periodiconakan qellqasjjaniti” sasa. Suma yatiyäwinakajj janiw periódico toqejj yatiyasjjänti, ukampis “Foto-Drama de la Creación” sat película toqew jilat kullakanakajj yatiyañ qalltapjjäna.

8. “Foto-Drama de la Creación” sat película apsuñatakejja, ¿kunsa jilat kullakanakajj lurapjjäna?

⁸ Peliculanaka. Russell jilatasa ukat yanapirinakapasa, niya kimsa maratwa “Foto-Drama de la Creación” sat película lurañ tukuyapjjäna, ukajj 1914 maranwa uñachtʼayasïna (Pro. 21:5). Uka peliculajj “Drama” satarakïnwa. ¿Kunjam lurtʼatäpachänsa? Peliculanaka, vidrior pintat color dibujonaka, grabat musicanaka ukat arstʼäwinakwa mayaruk apthaptʼasïna. Biblian utjki uka sarnaqäwinak mä videökaspas ukham wakichañatakejja, walja jilat kullakanakaw yanaptʼapjjäna, animalanakas utjarakïnwa. 1913 maranwa mä yatiyäwejj uka toqet mistüna, ukajj akham sänwa: “Noé chachan sarnaqäwip grabañatakejja, mä jachʼa zoologicojj utjki ukatwa niya taqpach animalanak apanipjjayäta” sasa. Ukatsti, Filadelfia, Londres, Nueva York ukat París markanakata khitinakatï wali sum pintañ yatipkäna ukanakaw walja dibujonak pintapjjäna.

9. ¿Kunatsa “Foto-Drama” sat película lurañatakejj tiempo apstʼasipjjäna ukat qollqe irsupjjarakïna?

⁹ ¿Kunatsa “Foto-Drama” lurañatakejj tiempo apstʼasipjjpachäna ukat walja qollqe irsupjjarakpachäna? Kuntï jilat kullakanakajj 1913 maran mä jachʼa tantachäwin amtapkäna ukajj akham sänwa: “Kunapachatï periodiconakan dibujonaka ukat fotonak utjki ukhajja, jukʼampiw jaqenakajj uka periodiconak liyiñ munapjje. Ukat taqeniw peliculanak uñtañ munapjjaraki. Jiwasajj Bibliat suma yatichirinakjama ukat yatiyirinakjamajja, ‘peliculanak toqe  ukat fotonak toqe yatichañajj askïspawa’ sasaw amuyaraktanjja. Ukanakaw jilat kullakanakarojj jaqenakar sum yatichapjjañapatak yanaptʼani” sasa.

10. ‘“Foto-Drama” sat película waljaniw uñtapjjäna’ sasajja, ¿kunatsa sissna?

¹⁰ “Foto-Drama” peliculajj utjkäna ukjja, 80 markanakanwa 1914 maran sapür uñtapjjäna. Estados Unidos ukat Canadá markanakanjja, niya 8 millón jaqenakaw uñtapjjäna. Uka pachpa maranwa Alemania, Australia, Dinamarca, Finlandia, Gran Bretaña, Noruega, Nueva Zelanda, Suecia ukat Suiza markanakan uñtapjjarakïna. Ukatjja, jan peliculanakani mä dramaw apsusirakïna, ukajj “Drama Eureka” satänwa. Uka drama yaqha cheqanakar apañajj janiw chʼamäkänti, ukatwa jiskʼa markanakar apasajj uka drama uñachtʼayapjjerïna. 1916 maratakejja, “Drama Eureka” ukat “Foto-Drama” peliculajj alemán,  armenio, danonoruego, español, francés, griego, italiano, polaco ukat sueco arunakanwa utj-jjäna.

11, 12. ¿Kunjamsa “Foto-Drama” peliculajj mä waynan chuymapar purtʼäna, ukat kunsa jupat yateqassna?

¹¹ “Foto-Drama” peliculajj francés arut uñachtʼayaskäna ukhajja, Charles Rohner sat waynajj 18 maranïnwa. Jupajj akham siwa: “Nayajj Colmar (Alsacia, Francia) markanwa jakasiyäta, ukanwa uka película uñtayapjjetu. Uka peliculajj Biblian cheqa yatichäwinakapwa sum amuytʼayäna, ukajj qalltatpachaw chuymajar purtʼitäna” sasa.

¹² Charles waynajj 1922 maranwa bautisasïna ukat sapürunjamaw Diosatak irnaqtʼañ qalltäna. ¿Kunanaksa nayraqat lurpachäna? Francés aru parlir jaqenakar “Foto-Drama” sat peliculajj uñachtʼayaskäna ukan yanaptʼañapatakiw jawstʼapjjäna. Kunanaksa luräna uk jupapachpaw akham sasin qhanañchtʼistu: “Nayarojj akanak lurañaw waktʼitäna: violín sat instrumento tukaña, qollqe uñjaña ukat Bibliat apstʼat qellqatanak churaña. ‘Peliculajj janïr qalltkani ukhaw amuktʼapjjañapatak jaqenakar mayïta’ sasaw sapjjarakitäna. Película uñtkasajj mä rat samartʼañaw utjkäna, ukhaw Bibliat apstʼat qellqatanak jaqenakar churapjjarakirïta, ukatakejj mä jilata jan ukajj mä kullakaw kawkhantï jaqenakajj qontʼatäpkäna uka cheqar sarirïna. Qellqatanak amparar apasaw sapa maynir uñachtʼayapjjerïta. Punkunjja, Bibliat apstʼat kunayman qellqatanakaw mä mesjjan utjarakïna”. 1925 maranjja, Brooklyn, Nueva York markan utjki uka Betel utan serviñapatakiw Charles jilatarojj invittʼapjjäna. Ukanjja, WBBR sat radion utjkäna uka orquesta sarayañapatakiw jupar mayipjjäna. Uka radiojj ukhakiw istʼatäñ qalltaskäna. ¿Jiwasajj Charles jilatjamarakïtanti? Diosan Reinopat jukʼamp yatiyasiñapatakejja, ¿kuna luräwi katoqañatakis jankʼakïtanti? (Isaías 6:8 liytʼañataki.)

13, 14. ¿Kunjamsa radio toqejj suma yatiyäwinakajj yatiyasïna? (“ WBBR radion wakichäwinakapa” ukat “ Jan armkañ jachʼa tantachäwi” siski uka recuadronak uñjjattʼäta.)

¹³ Radio. 1920 maranjja, “Foto-Drama” sat peliculajj janiw nayrjam añch uñtasjjänti. Ukampis radio toqew Diosan Reinopat suma yatiyäwinakajj yatiyasjjäna. Abril 16, 1922 maranwa Rutherford sat jilatan arstʼäwipajj radiot istʼasïna, ukajj jan armkañapunïnwa. Uka radiojj Filadelfia (Pensilvania) sat markanwa jikjjatasïna, Metropolitan Opera House satänwa. Niya 50.000 jaqenakaw “Jichhürunakan jakapki ukanakatjja millón millón jaqenakaw jan jiwapkaniti” siski uka arstʼäwi radiot istʼapjjäna. 1923 maranjja, mä jachʼa tantachäwin arstʼäwinakapaw radiot istʼasirakïna. Diosan markap sarayapkäna uka jilatanakajj akhamwa amuyapjjäna: ‘Yaqha radionakamp irnaqañajj walikïskiwa, ukampis jiwasan mä radio utjistaspa ukhajja, jukʼamp askïspawa’  sasa. Ukhamajj febrero 24, 1924 maranwa WBBR sat radiot jilatanakajj yatiyañ qalltapjjäna. Uka radiojj Staten Island (Nueva York) sat markanwa jikjjatasïna.

¹⁴ ¿Kuna amtampis WBBR sat radio uttʼayapjjäna? Yatiyañataki diciembre 1, 1924 maran mistkäna uka revistajj akham sänwa: “Radio toqew cheqa yatichäwinak jukʼamp sum yatiyasispa ukat janirakiw walja qollqejj munaskiti” sasa. Ukat akham saskakïnwa: “Suma yatiyäwinak yatiyasiñapatak jukʼamp radionak utjañap wakischi ukhajja, Tatituw ukanak utjañapatak yanaptʼaskani” sasa (Sal. 127:1). 1926 maratakejja, Jehová Diosan servirinakapajj 6 radionak toqew Diosan arunakap yatiyapjjäna. Pä radiojj Estados Unidos markanwa jikjjatasïna (WBBR radiojj Nueva York markana ukat WORD sat radiojj Chicago marka jakʼana). Mayni pusi radionakasti, Canadá markanwa jikjjatasirakïna (Alberta, Columbia Británica, Ontario ukat Saskatchewan cheqanakana).

15, 16. 1) Canadá markankir tatakuranakajj radio toqe sum yatiyasiskatap uñjasajja, ¿kunsa lurapjjäna? 2) ¿Kunjamsa radiot istʼaskäna uka arstʼäwinakajj utat uta yatiyasiñapatak yanaptʼäna?

¹⁵ Kunjamsa Biblian cheqa yatichäwinakapajj jukʼamp yatiyasïna ukwa tatakuranakajj uñjapjjäna. Saskatchewan markan utjkäna uka radion irnaqtʼir Albert Hoffman sat jilatajj akham sänwa: “Sapürutjamaw jukʼamp jaqenakajj Bibliat Yatjjatirinakar istʼapjjäna. 1928 marakamaw Diosan arunakap radio toqejj sum yatiyasiwayi. Ukampis uka maranwa Canadá markan utjkäna uka radionakan jistʼantatäñapatak tatakuranakajj marka apnaqerinakar amtayapjjäna”.

¹⁶ Canadá markan utjkäna uka pusi radionakajj jistʼantasjjänwa, ukampis yaqha radionak toqew arstʼäwinakajj yatiyasiskakïna (Mat. 10:23). Biblian cheqa yatichäwinakap kuna radionakatsa istʼapjjaspa uk jaqenakar yatiyañatakejja, Yatiyañataki ukat ¡Despertad! revistanakanwa mä listajj mistüna. Ukhamatwa jilat kullakanakajj utat uta yatiyir sarkasajj uka radionakat arstʼäwinak istʼapjjañapatakejj jaqenakar invittʼapjjasapäna. Ukham lurasajja, ¿kunas jikjjatasïna? Enero 1931 maran mistkäna Boletín sat qellqatajj akham sänwa: “Utat uta jukʼamp yatiyasiñapatakiw radiojj jilat kullakanakar yanaptʼawayi. ‘Walja jaqenakaw radion wakichäwinakap istʼapjje’ sasaw yatiyapjjetu ukat niyakejjay Rutherford jilatan arstʼäwinakap istʼjjapjjchejja, jaqenakajj jankʼakiw libronak katoqasipjje” sasa. “Tatitun servirinakapajja, utat uta ukat radio toqew Diosan arunakap wal yatiyasipki” sasaw uka qellqatajj qhanañcharakïna.

17, 18. ¿Kunjamsa radiojj jaya cheqanakan yatiyasiñapatak yanaptʼaskakïna?

 ¹⁷ Khä 1930 maranakanjja, walja jaqenakaw radionak toqe yatiyasiñap jan munapkänti. Ukatwa 1937 mara tukuyarojja, Jehová Diosan servirinakapajj radio toqe yatiyañat sipansa, utat uta yatiyañatak jukʼamp chʼamachasipjjäna. a Ukampis jan puriñjamäkäna uka cheqanakanjja, radio toqejj Diosan Reinopat yatiyasiskakïnwa. Amuytʼañataki, 1951 marata 1991 marakamaw Berlín markan inti jalanta (Alemania occidental) toqen utjkäna uka radiot Bibliat apstʼat arstʼäwinakajj istʼasïna, ukhamatwa Alemania markan inti jalsu toqen jakasipkäna uka jaqenakajj Reinon cheqa yatichäwinakap istʼapjjäna. Surinam (Sudamérica) sat markanjja, 15 minutonakaw sapa semanajj Biblian cheqa yatichäwinakap mä radio toqejj yatiyasïna. Uka wakichäwejj 1961 maranwa qalltäna ukat 30 maranakaw ukham yatiyasiwayi. 1969 marata 1977 marakamajja, Diosan markapajj 350 jila wakichäwinakwa radiot istʼasiñapatak grabapjjäna, uka wakichäwinakajja, “Taqe qellqatasti wali askirakiwa” sat pʼeqeñchäwinïnwa. Estados Unidos sat jachʼa markanjja, 291 radionakanwa uka wakichäwinakajj 48 cheqanakan istʼasïna. Apia (Samoa) markanjja, sapa semanaw “Bibliat jisktʼanakamar qhanañchañataki” sat wakichäwejj mä radio toqejj 1996 maran istʼasirakïna.

¹⁸ Niya 2000 maratakejja, janiw radio toqejj yatiyasjjänti. Ukampis yaqha toqew suma yatiyäwinakajj jukʼamp jaqenakar yatiyasjjäna.

19, 20. 1) ¿Kunatsa Jehová Diosan markapajj jw.org sat cheq Internetan utjañapatak chʼamachasipjjäna? 2) ¿Internetan jw.org sat cheqajj utjki ukajj jaqenakar yanaptʼaskpachati? (“ JW.ORG” siski uka recuadro uñjjattʼäta.)

¹⁹ Internet. 2013 maranjja, niya 2.700 millón jaqenakaw Internetar mantapjjäna, mä arunjja, sapa patakat 40 jaqenakaw Internetar mantawayapjje. Ukat niya 2.000 millón jaqenakaw celularanak toqe, tableta sasin uñtʼatäki ukanak toqe jan ukajj yaqha ukhamanak toqejj Internetar mantapjjaraki. Cheqansa, sapürutjamaw jaqenakajj Internetar jukʼamp mantasipki. África cheqanjja, 90 millonats jila jaqenakaw Internetarojj celular toqe ukat yaqha ukham aparatonak toqejj mantapjje. ¿Kunsa taqe ukanakajj uñachtʼayistu? Kunjamsa jaqenakajj yatiyäwinak katoqapjje ukajj janiw nayrjamäjjeti.

²⁰ Diosan markapajja, 1997 maratwa Internet toqe yatiyañ qalltawayi. Ukat 2013 maratwa Internetan jw.org sat cheqajj utj-jjaraki, uka cheqajj 300 arunakaruw jaqokipasiwayi. Uka cheqatwa Biblian yatichäwinakap 520 jila arunakan apaqasispa. Ukat 750.000 jila kutiw jaqenakajj kunayman aparatonak toqejj uka cheqar sapür mantapjje. Ukat sapa phajjsiw uka cheqatjja, 3 millón libronaka,  4 millón revistanaka ukat 22 millón grabacionanak istʼañatak apaqasi.

21. ¿Kunsa Sina sat chachat yateqsna?

²¹ Cheqas Internet toqew Diosan Reinopat suma yatiyäwinakapajj jukʼamp yatiyasiski, kawkhanakantï yatiyañajj jarkʼatäki uka cheqanakansa uka toqew yatiyasiskaraki. Sina sat mä chachat amuytʼañäni, jupajj 2013 maranwa Internetan jw.org sat cheq jikjjatäna ukat Bibliat jukʼamp yatjjatañatakiw Estados Unidos markan utjki uka sucursalar jawsäna. Uka chachajj islam sat religionaruw nayrajj saräna. Markapanjja, jan yatiyapjjañapatakiw Jehová Diosan Qhanañchirinakapajj jarktʼat uñjasipjje. Jichhajj Estados Unidos markan jakasiri mä jilatampiw uka chachajj semanan pay kuti Internetan maynimp parltʼañatak utjki uka toqejj Bibliat yatjjataski.

22, 23. 1) Jehová Diosan servirinakapajja, ¿kunatsa utat uta yatiyañ jan jaytapjje? 2) ¿Kunjamsa Reyejj servirinakapar bendeciwayi?

²² Jukʼamp jaqenakar purtʼañatakejja, Jehová Diosan servirinakapajj kunaymaninakatwa yatiyawayapjje. Sañäni, periodiconak toqe, “Foto-Drama” sat película toqe, radio toqe ukat jichhajj Internet toqew yatiyapjjaraki. Ukampis ukanakajj janipuniw utat uta yatiyañ lantejj lurasiwaykiti. ¿Kunatsa? Jehová Diosan servirinakapajj Jesusatwa yateqasipjje. Jupajj walja jaqenakarus yatichkchïnjja, sapa maynir yanaptʼañatakiw jukʼamp chʼamachasïna (Luc. 19:1-5). Jesusajj ukham lurapjjañapatakiw arkirinakapar  yatichäna ukat kuna toqetsa yatiyapjjañapäna uksa yaticharakïnwa (Lucas 10:1, 8-11 liytʼañataki). Amtañäni, Diosan markap sarayapkäna uka jilatanakajja, nayratpachaw sapa maynimp parltʼapjjañapatak Diosan servirinakapar chʼamañchtʼawayapjje, ukwa 6 yatichäwin yatjjataniwaytanjja (Hech. 5:42; 20:20).

²³ Diosan Reinopajj uttʼayaskäna ukhat jichhakamajja, patak maranakaw pasawayjje. Jichhajj niya 8 millón jilat kullakanakaw Jehová Diosan amtanakap jaqenakar yatiyasipki. Cheqansa, kunayman toqetwa jupanakajj Diosan Reinopat yatiyawayapjje, ukatwa Reyejj jupanakar bendeciwayi. Janiw ukakïkiti, taqe markanakana ukat kunayman arunakat yatiyapjjañapatakejja, jupaw kuna yanaptʼanakatï wakiski ukanak servirinakapar churawayi, uka toqetwa jutïr yatichäwin yatjjataskañäni (Apo. 14:6).