1, 2. (a) Anong pamamaagi an ginamit ni Jesus tanganing magpatotoo sa dakul na tawo? (b) Paano sinusunod kan maimbod na mga disipulo ni Cristo an halimbawa niya, asin taano?

 DAKUL an nakapalibot ki Jesus sa may gilid nin danaw, pero nagsakay siya sa sarong baroto asin naghuruharayo nin dikit. Taano? Aram niya na paagi sa ibabaw kan katubigan, magigin mas makusog an saiyang boses kaya mas malinaw na madadangog kan mga tawo an mensahe niya.—Basahon an Marcos 4:1, 2.

² Sa mga dekada bago asin pagkatapos kan pagkamundag kan Kahadian, sinusunod kan maimbod na mga disipulo ni Cristo an halimbawa niya paagi sa paggamit nin bagong mga pamamaagi para ipaabot sa dakul an maugmang bareta kan Kahadian. Sa paggiya kan Hadi, padagos na nag-iisip an mga lingkod nin Diyos nin bagong mga pamamaagi asin ibinabagay iyan sa nagbabagong mga kamugtakan saka bagong teknolohiya. Gusto tang magpatotoo sa pinakadakul na mapupuwede bago umabot an katapusan. (Mat. 24:14) Pag-ulayan ta an nagkapira sanang pamamaagi na ginagamit niyato para magpatotoo sa mga tawo sain man sinda nakaistar. Pag-isipan man kun paano mo maaarog an pagtubod kan mga nagpalakop kan maugmang bareta kaidto.

3. Ano an dai ikinaugma kan mga kaiwal kan katotoohan sa paggamit ta nin mga peryodiko?

³ Peryodiko. Ipinupublikar na ni Brother Russell asin kan kairiba niya an Watch Tower puon pa kan 1879 para maipaabot sa dakul an mensahe kan Kahadian. Minsan siring kan dekada bago 1914, minalataw na minaniobra ni Cristo an mga bagay-bagay tanganing makaabot sa mas dakul pa an maugmang bareta. Nagpuon kan 1903 an magkakakonektar na pangyayari. Kan taon na iyan, inangat ni Dr. E. L. Eaton, tagapagtaram nin sarong grupo nin mga ministrong Protestante sa Pennsylvania, si Charles Taze Russell sa sarong serye nin debate dapit sa doktrina sa Bibliya. Nagsurat si Eaton ki Russell: “Naisip ko na an sarong pampublikong debate dapit sa nagkapirang hapot na bako kitang magkauyon . . . magigin interesanteng marhay para sa publiko.” Naisip man iyan ni Russell asin kan kairiba niya, kaya inareglo ninda na ikapublikar an mga debate sa sarong panginot na peryodiko, an The Pittsburgh Gazette. Nagin popular na marhay an mga artikulong  iyan asin nakakapahiro nanggad an malinaw na paliwanag ni Russell dapit sa katotoohan sa Bibliya kaya nag-alok an peryodiko na ipublikar kada semana an mga pahayag niya. Siyertong dai nanggad iyan ikinaugma kan mga kaiwal kan katotoohan!

4, 5. Anong kuwalidad an ipinahiling ni Russell, asin paano maaarog nin mga may katungdan an halimbawa niya?

⁴ Dai nahaloy, may iba pang peryodiko na gustong magpublikar kan mga sermon ni Russell. Kan 1908, ibinareta kan Watch Tower na ipinupublikar na iyan ‘nin regular sa 11 peryodiko.’ Minsan siring, nagsuherir ki Russell an mga brother na pamilyar sa trabaho sa peryodiko na kun ibabalyo niya an mga opisina kan Sosyedad, na nasa Pittsburgh, sa mas midbid na siyudad, dakul pang peryodiko an mapublikar kan mga artikulo na basado sa Bibliya. Pagkatapos turutimbangon iyan asin an iba pang bagay, ibinalyo niya an opisina sa Brooklyn, New York, kan 1909. Ano an resulta? Pira sanang bulan pagkabalyo, mga 400 na peryodiko na an nagpupublikar kan mga sermon, asin padagos pang nadagdagan iyan. Kan maestablisar an Kahadian kan 1914, labi nang 2,000 na peryodiko sa apat na lengguwahe an nagpupublikar kan mga sermon asin artikulo ni Russell!

⁵ Anong mahalagang leksiyon an itinutukdo sa sato kan pag-uswag na iyan? Marahay na arugon nin mga may katungdan sa organisasyon nin Diyos ngunyan an kapakumbabaan ni Russell. Sa anong paagi? Kun naggigibo nin importanteng desisyon, pag-isipan an suhestiyon nin iba.—Basahon an Talinhaga 15:22. a

6. Ano an epekto sa sarong tawo kan ipinublikar sa peryodiko na mga artikulo manungod sa katotoohan?

⁶ Nakapabago sa buhay nin mga tawo an ipinublikar na mga artikulong idto sa peryodiko manungod sa mga katotoohan dapit sa Kahadian. (Heb. 4:12) Halimbawa, si Ora Hetzel na nabawtismuhan kan 1917, saro sa dakul na inot na nakanuod kan katotoohan paagi sa siring na mga artikulo. “Pagkatapos na ako ikasal,” an sabi ni Ora, “nagbisita ako sa sakong ina sa Rochester, Minnesota. Naabutan ko siyang naggugunting nin mga artikulo sa sarong peryodiko. Mga sermon idto ni Russell. Ipinaliwanag ni Nanay an mga nanudan niya diyan.” Inako ni Ora an mga katotoohan na nanudan niya asin nagin maimbod na parabalangibog kan Kahadian nin Diyos sa laog nin mga anom na dekada.

7. Taano ta tinurutimbang liwat kan mga nanginginot an paggamit nin peryodiko?

⁷ Kan 1916, duwang mahalagang pangyayari an nagin dahilan para turutimbangon liwat kan mga nanginginot an paggamit nin peryodiko sa pagpalakop kan maugmang bareta. Inot, huli sa Dakulang Giyera masakit makakua nin materyales sa pag-imprenta. Kan 1916, nagreport an satong newspaper department sa Britania dapit sa problema: “Labi na sanang 30 peryodiko ngunyan an nagpupublikar kan mga Sermon. Dai mahahaloy, posibleng mabawasan pa nanggad ini huli sa naglalangkaw na presyo nin papel.” An ikaduwa iyo an pagkagadan ni Brother Russell kan Oktubre 31, 1916. Huli kaini, ipinaisi kan The Watch Tower na Disyembre 15, 1916: “Ngunyan na mayo na si Brother Russell, dai na  ipapadagos an sermon na tampok [sa mga peryodiko].” Minsan ngani ipinundo na an paaging ini nin paghuhulit, padagos na nagin mapanggana an ibang pamamaagi, arog kan “Photo-Drama of Creation.”

8. Ano an kalabot sa paggibo kan “Photo-Drama of Creation”?

⁸ Pasali. Mga tulong taon na nagmaigot si Russell asin an kairiba niya para matapos an “Photo-Drama of Creation,” na ilinuwas kan 1914. (Tal. 21:5) An Drama, na apod diyan kaidto, sarong bagong pamamaagi nin pasali na pinag-iriba an mga motion picture, nakarekord na boses saka mga tanog, asin mga glass slide na de-kulor. Ginatos na tawo an nag-akto kan mga pangyayari na nasa Bibliya, asin naggamit pa ngani nin mga hayop. “Ginamit an kadaklan na hayop sa sarong dakulang zoological garden,” an sabi nin sarong report kan 1913, “tanganing makagibo nin may boses saka tanog na Motion picture para sa eksena dapit sa kabtang  ni Noe sa kasaysayan kan kinaban.” Kun dapit sa kada saro sa ginatos asin lain-lain na glass slide na ginamit sa pasali, mano-mano iyan na kinuluran nin mga pintor sa London, New York, Paris, saka Philadelphia.

9. Taano ta dakulon na panahon an ginamit asin dakulaon an ginastos sa paggibo kan “Photo-Drama”?

⁹ Taano ta dakulon na panahon an ginamit asin dakulaon an ginastos sa paggibo kan “Photo-Drama”? Ini an paliwanag sa sarong resolusyon na inaprubaran sa serye nin mga kumbensiyon kan 1913: “Lubos na nahiling an halaga kan mga peryodiko sa Amerika huli sa pagigin mapanggana nanggad kaiyan na impluwensiyahan an opinyon kan publiko sa tabang nin mga karikatura asin ilustrasyon sa saindang mga bareta saka seksiyon sa magasin, na totoo man sa motion picture huli ta popular na marhay iyan pati nakakatao nin impormasyon sa lain-lain na paagi. Asin bilang progresibong mga parahulit saka paratukdo sa klase sa Bibliya, lubos kaming naniniwala na tama an ginibo mi na biyong suportaran an paggamit nin motion picture pati stereopticon slide bilang epektibo asin magayon na pamamaagi para sa mga ebanghelisador saka paratukdo.”

10. Gurano kahiwas an naabot kan “Photo-Drama”?

¹⁰ Kan 1914, ipinasali kada aldaw an “Photo-Drama” sa 80 siyudad. Haros walong milyon sa Estados Unidos asin Canada an naghiling o nagdalan kaiyan. Nagpasali man kan taon na iyan sa Alemania, Australia, Britania, Denmark, Finland, New Zealand, Norway, Sweden, asin Switzerland. May ginibo na pinasimpleng bersiyon kaiyan, na daing kaibang motion picture, para ipasali sa mas saradit na banwaan. Iyan an “Eureka Drama,” na mas dikit an gastos asin mas madaling darahon. Kan 1916, itrinadusir an “Photo-Drama” o an “Eureka Drama” sa Armenian, Dano-Norwegian, French, German, Greek, Italian, Polish, Spanish, asin Swedish.

11, 12. Ano an nagin epekto sa sarong hoben kan “Photo-Drama,” asin anong halimbawa an itinao niya?

¹¹ Dakula an nagin epekto kan French na “Photo-Drama” sa 18 anyos na si Charles Rohner. “Ipinasali iyan sa banwaan mi—sa Colmar, Alsace, Pransia,” an sabi niya. “Pagpuon pa sana, naghanga na ako sa malinaw na pagkapresentar kan katotoohan sa Bibliya.”

¹² Bilang resulta, nagpabawtismo si Charles asin kan 1922 naglaog sa bilog na panahon na paglilingkod. An saro sa inot niyang asignasyon iyo an pagtabang sa pagpasali kan “Photo-Drama” sa mga taga Pransia. Sabi niya: “Nagkapira an asignasyon ko—paratugtog nin biyolin, lingkod na nag-aasikaso kan kuwenta asin kan literatura. Bago magpuon an programa, ako man an nagpapasilensiyo sa mga presente. Pag intermisyon, nagdidistribwir kami nin mga literatura. Sarong brother o sister an inaasignar mi sa sarong seksiyon kan hall. An kada saro may darang dakul na literatura dangan dinudulok an kada indibidwal sa seksiyon. Apuwera diyan, igwang mga lamesa na pano nin literatura sa may entrada kan hall.” Kan 1925, inimbitaran siya na maglingkod sa  Bethel sa Brooklyn, New York. Duman inasignaran siya bilang konduktor kan orkestra para sa bagong istasyon nin radyo na WBBR. Pagkatapos na isip-isipon an halimbawa ni Brother Rohner, puwede tang haputon an sadiri, ‘Andam daw akong akuon an ano man na asignasyon na itao sa sako sa pagpalakop kan mensahe kan Kahadian?’—Basahon an Isaias 6:8.

13, 14. Paano ginamit an radyo sa pagpalakop kan maugmang bareta? (Hilingon man an mga kahon na “ Mga Programa sa WBBR” asin “ Makasaysayan na Kumbensiyon.”)

¹³ Radyo. Kan dekada nin 1920, ininaan na an pagpasali kan “Photo-Drama,” pero pinunan na man na gamiton an radyo bilang mahalagang paagi sa pagpalakop kan maugmang bareta kan Kahadian. Kan Abril 16, 1922, sarong makasaysayan na pagbrodkast an ginibo ni Brother Rutherford sa Metropolitan Opera House na nasa Philadelphia, Pennsylvania. Kinakarkulo na 50,000 an nagdangog sa pahayag na “Dai Na Nuarin Man Magagadan an Minilyon na Nabubuhay Ngunyan.” Dangan, kan 1923, ibrinodkast sa kainot-inuti an sarong sesyon nin kumbensiyon. Apuwera sa paggamit nin komersiyal na mga istasyon, nagdesisyon an mga nanginginot na mas marahay kun magkakaigwa kita nin sadiring istasyon, na itinugdok sa Staten Island, New York, asin irinehistro bilang WBBR. Inot na nagbrodkast iyan kan Pebrero 24, 1924.

¹⁴ Ipinaliwanag kan The Watch Tower na Disyembre 1, 1924 an katuyuhan kan WBBR: “Naniniwala kami na an radyo an pinakamatipid asin pinakaepektibong paagi nin pagpalakop kan mensahe kan katotoohan na magagamit kasuarin man.” Dangan, nagsabi pa iyan: “Kun sa hiling kan Kagurangnan angay na magtugdok nin iba pang istasyon nin radyo para sa pagpalakop kan katotoohan, matao siya nin kuwarta sa paagi na pagmarhayon niya.” (Sal. 127:1) Kan 1926, may anom na sadiring istasyon nin radyo an mga lingkod ni Jehova. Duwa an nasa Estados Unidos—an WBBR sa New York asin an WORD na harani sa Chicago. An apat nasa Canada, na yaon sa Alberta, British Columbia, Ontario, asin Saskatchewan.

15, 16. (a) Ano an ginibo kan mga klero sa Canada huli sa satong pagbrodkast? (b) Paano nagin magkakomplemento an mga pahayag sa radyo asin an pagharong-harong?

¹⁵ Narisa kan klero nin Kakristiyanuhan an mahiwas na pagbrodkast kan katotoohan sa Bibliya. Nagsabi si Albert Hoffman, na pamilyar sa ginigibo sa istasyon nin radyo sa Saskatchewan, Canada: “Urog na nagdadakul an nakakaaram dapit sa Mga Estudyante sa Bibliya [an apod kaidto sa Mga Saksi ni Jehova]. Marahayon an nagin patotoo, pero kan 1928 inimpluwensiyahan kan klero an mga opisyal, kaya nawaran nin lisensiya an gabos na istasyon kan Mga Estudyante sa Bibliya sa Canada.”

¹⁶ Dawa ipinasera duman an mga istasyon ta, padagos na ibrinodkast sa komersiyal na mga istasyon an mga pahayag dapit sa Bibliya. (Mat. 10:23) Para magin mas epektibo an mga programa, nakalista sa The Watch Tower asin The Golden Age (inaapod ngunyan na Awake!) an komersiyal na mga istasyon na nagbobrodkast kan katotoohan sa Bibliya tanganing madagka kan mga parahayag na naghaharong-harong an mga tawo na dangugon an mga  pahayag sa lokal na mga istasyon. Ano an resulta? Nagsabi an Bulletin na Enero 1931: “An pagbrodkast sa radyo tunay na nakapahiro sa mga tugang na magharong-harong. Nakakaresibi kami nin dakul na report sa opisina na nagsasabing may mga naghihinanyog asin, huling nadangog an mga pahayag ni Brother Rutherford, andam na marhay na akuon an mga libro na iinaalok sa sainda.” Sinabi kan Bulletin na an pagbrodkast asin pagharong-harong “an duwang panginot na pamamaagi nin paghuhulit kan organisasyon kan Kagurangnan.”

17, 18. Minsan ngani nagbago an mga kamugtakan, paano padagos na nagkaigwa nin papel an radyo?

¹⁷ Kan dekada nin 1930, gruminabe an pagkontra sa paggamit ta nin komersiyal na mga istasyon nin radyo. Kaya kan huring kabtang kan 1937, nakibagay an mga lingkod ni Jehova sa nagbabagong mga kamugtakan. Dai na sinda nagbrodkast sa komersiyal na mga istasyon kundi urog pang nagkonsentrar sa ministeryong pagharong-harong. b Minsan siring, nagpadagos an mahalagang papel kan radyo sa pagpalakop kan mensahe kan Kahadian sa mga lugar na harayo o masakit hulitan huli sa pulitika. Halimbawa, puon 1951 sagkod 1991, regular na nagbobrodkast nin mga pahayag sa Bibliya an sarong istasyon sa Sulnupan na Berlin, Alemania, tanganing makadangog kan mensahe kan Kahadian an mga nasa lugar na inaapod kaidto na Sirangan na Alemania. Sa laog nin labing tulong dekada puon 1961, sarong nasyonal na istasyon nin radyo sa Suriname, Amerika del Sur, an nagbobrodkast surusemana nin 15 minutos na programa na nagpapalakop kan mga katotoohan sa Bibliya. Puon 1969 sagkod 1977, naggibo an organisasyon nin labing 350 nakarekord na programa sa radyo sa seryeng “Kapaki-pakinabang an Gabos na Kasuratan.” Sa Estados Unidos, 291 istasyon an nagbobrodkast kaiyan, sa 48 estado. Kan 1996, sarong istasyon sa Apia, an kabiserang siyudad kan Samoa sa Timog Pasipiko, an nagbobrodkast surusemana nin programa na may titulong “Simbag sa mga Hapot Mo Dapit sa Bibliya.”

¹⁸ Kan patapos na an ika-20 siglo, bako nang radyo an panginot na pamamaagi sa pagpalakop kan maugmang bareta. Minsan siring, nagkaigwa nin saro pang teknolohiya na nagpagin posible na makapagpatotoo sa pinakadakul kasuarin man.

19, 20. Taano ta naggibo an mga lingkod ni Jehova nin Web site na jw.org, asin gurano iyan kaepektibo? (Hilingon man an kahon na “ JW.ORG.”)

¹⁹ Internet. Puon 2013, labing 2.7 bilyones katawo, haros 40 porsiyento kan populasyon kan kinaban, an naggagamit nin Internet. Sigun sa nagkapirang pagkarkulo, mga duwang bilyon an may access paagi sa mobile device, arog nin smartphone asin tablet. Padagos pa iyan na nagdadakul sa bilog na kinaban, pero ngunyan an may pinakamarikas na pagdakul nin mobile Internet connection iyo an Aprika, na labing 90 milyones an may subscription. An mga pag-uswag na iyan an panginot na nagpabago sa kun paano nakakakua nin impormasyon an dakul na tawo.

 ²⁰ Puon 1997, ginamit kan mga lingkod ni Jehova an pamamaaging ini nin komunikasyon. Kan 2013, maa-access na an Web site na jw.org sa mga 300 na lengguwahe, asin puwede nang i-download sa labing 520 lengguwahe an impormasyon na basado sa Bibliya. Aroaldaw, labing 750,000 na beses na ina-access an Web site. Apuwera sa paghiling nin video, nagda-download an mga tawo kada bulan nin labing 3 milyones na bilog na libro, 4 milyones na bilog na magasin, asin 22 milyones na audio track.

21. Ano an nanudan mo sa eksperyensiya ni Sina?

²¹ Nagin epektibong marhay an Web site sa pagpalakop kan maugmang bareta dapit sa Kahadian nin Diyos, dawa sa kadagaan na may restriksiyon an paghuhulit ta. Halimbawa, kan inot na mga bulan kan 2013, na-access nin sarong lalaki na si Sina an jw.org kaya nag-apod siya sa headquarters, sa Estados Unidos, para maghagad nin dugang pang impormasyon dapit sa Bibliya. Taano ta pambihira an pag-apod na ini? Muslim si Sina asin nakaistar sa harayong baryo sa sarong nasyon na grabe an restriksiyon sa gibuhon kan Mga Saksi ni Jehova. Huli kaini, inareglo na kada semana duwang beses siyang tutukduan sa Bibliya nin sarong Saksi sa Estados Unidos. Ginigibo ninda iyan gamit an Internet video service.

22, 23. (a) Sinalidahan daw kan mga pamamaagi nin pagpatotoo sa dakul na tawo an ministeryong pagharong-harong? (b) Paano binebendisyunan kan Hadi an paghihinguwa ta?

²² Bako man katuyuhan kan arin man sa satong mga pamamaagi nin pagpatotoo sa dakul na tawo, arog kan mga peryodiko, “Photo-Drama,” mga programa sa radyo, asin Web site, na salidahan an ministeryong pagharong-harong. Taano man? Huling nakanuod an mga lingkod ni Jehova sa arugan na itinao ni Jesus.  Urog pa sa paghuhulit sa darakulang grupo an ginibo niya; nagkonsentrar man siya sa pagtabang sa mga indibidwal. (Luc. 19:1-5) Sinanay man niya an mga disipulo na gibuhon iyan, asin tinawan sinda nin mensaheng ipapaabot. (Basahon an Lucas 10:1, 8-11.) Siring kan pinag-ulayan sa Kapitulo 6, pirming dinadagka kan mga nanginginot an lambang lingkod ni Jehova na personal na makipag-ulay sa mga tawo.—Gui. 5:42; 20:20.

²³ Pakalihis nin 100 na taon pagkamundag kan Kahadian, labing 7.9 milyones na parahayag an aktibong nagtutukdo sa iba dapit sa katuyuhan nin Diyos. Daing duda na binebendisyunan kan Hadi an satong mga pamamaagi nin pagpaisi kan Kahadian. Arog kan pag-uulayan sa sunod na kapitulo, tinatawan man niya kita nin mga kasangkapan na kaipuhan sa pagpalakop kan maugmang bareta sa lambang nasyon, tribo, asin lengguwahe.—Kap. 14:6.