1, 2. a) ¿Mbaʼépa ojapo Jesús hetave tapicha ohendu hag̃ua chupe? b) ¿Mbaʼéichapa Jesús disipulokuéra osegi iñehémplo, ha mbaʼérepa?

 PETEĨ jey heta hénte oñembyaty Jesús jerére peteĩ lágo kóstape, péro haʼe ojupi peteĩ kanóape ha ohomie pe oríllagui. ¿Mbaʼérepa? Haʼe oikuaa oĩramo pe y ári iñeʼẽ ryapu oñehendu porãvetaha. Péicha hetave hénte ohendúta umi notísia porã (elee Marcos 4:1, 2).

² Pe Rréino oñepyrũ mboyve ogoverna yvágape ha upe rire avei, Jesús disipulokuéra osegi iñehémplo ha ojevale opa mbaʼére omog̃uahẽ hag̃ua umi notísia porã hetave héntepe. Pe Rréi poguýpe Ñandejára puévlo osegi ojevale heta mbaʼe pyahúre opredika hag̃ua. Upearã oiporu umi teknolohía ipyahuvéva. Péicha jajapo japredikaségui opa ikatúvape og̃uahẽ mboyve pe fin (Mat. 24:14). Jahechami mbaʼe mbaʼépa ojapo ñane ermanokuéra opredika hag̃ua hetavépe oikóramo jepe mombyry. Ñapensami avei mbaʼéichapa ikatu jajapo ñane ermanokuéra yma guare ojapo haguéicha.

3. ¿Mbaʼérepa oiméne ojepicha umi ndaijaʼéiva Ñandejára siervokuérare?

³ Diário. Ermáno Russell ha iñirũnguéra oguenohẽma Ñemañaha 1879 guive. Péro áño 1900 riremi ojekuaa porãve mbaʼéichapa Jesús ombohape ohóvo hetave hénte oikuaa hag̃ua umi notísia porã. Por ehémplo áño 1903-pe doktór Eaton, orrepresentáva umi protestánte oĩvape Pensilvániape odesafia Charles Rússellpe oñeʼẽ hag̃ua hikuái la Biblia omboʼévare heta hénte renondépe. Doktór Eaton omondo peteĩ kárta Rússellpe, heʼihápe: “Che apensa iporãtaha ñañembojovakéramo ha ñadefende umi mbaʼe jagueroviáva. Heta mbaʼépe idiferénte ñapensa lája ha katuete umi hénte oikuaaséta mbaʼépa la jaʼéva”. Russell ha iñirũnguéra opensa avei heta hénte oikuaasetaha la heʼíva hikuái. Upémarõ ohecha oñeguenohẽ hag̃ua peteĩ diário iñimportántevape umi mbaʼe ojeʼe vaʼekue upe rreuniónpe.  Russell omyesakã porãiterei la Biblia omboʼéva ha oĩ vaʼekue hetaiterei oleéva umi artíkulo. Upévare pe diário ojerure chupe káda semána oguenohẽ hag̃ua idiskúrso. ¡Oiméne ojepichaite umi ndaijaʼéiva Ñandejára siervokuérare!

4, 5. ¿Mbaʼépa ojapo rakaʼe Russell? ¿Mbaʼéichapa umi omoakãva Jehová organisasión ikatu osegi Russell ehémplo?

⁴ Upéi hetave diárioma onohẽse Russell diskursokuéra. Áño 1908 rupi Ñemañaha heʼi umi diskúrso “osẽ memeha once diáriope”. Péro oĩ ermáno ombaʼapóva koʼã mbaʼépe ha haʼekuéra heʼi Rússellpe iporãtaha oguerováramo pe ofisína sentrál oĩva Píttsburghpe ótro siuda tuichavévape. Péicha hetave diário onohẽséta umi artíkulo oñeʼẽva la Bíbliare. Okalkula porã rire, áño 1909-pe ermáno Russell oguerova pe ofisína Broóklynpe (Nueva York). ¿Mbaʼépa oiko upéi? Unos kuánto mése rire, 400 diárioma oguenohẽ umi diskúrso ha heta hetave káda día. Ñandejára Rréino oñepyrũrõ guare ogoverna yvágape 1914-pe mas de 2 mil diário osẽva 4 idiómape oguenohẽ Russell diskúrso ha ótro artíkulo oñeʼẽva la Bíbliare.

⁵ ¿Mbaʼépa ñanemboʼe pe oiko vaʼekue? Russell ningo iñumílde ha ohendu ojeʼéva chupe. Umi omoakãva Jehová organisasión ko tiémpope ojapo porãta osegíramo iñehémplo. Upearã, odesidíta jave peteĩ mbaʼe iñimportánteva ohendu vaʼerã hapichakuéra konsého (elee Proverbios 15:22).

6. ¿Mbaʼéichapa umi artíkulo osẽva diáriope oipytyvõ peteĩ kuñakaraípe?

⁶ Umi diskúrso oñeʼẽva la Bíbliare osẽva umi diáriope oipytyvõ heta héntepe iñeʼẽrendu hag̃ua Ñandejárape (Heb. 4:12). Por ehémplo peteĩ kuñakarai hérava Ora Hetzel ojevautisa vaʼekue 1917-pe omombeʼu koʼã artíkulo oipytyvõ hague chupe oservi hag̃ua Ñandejárape. Haʼe heʼi: “Amenda rire aha avisita che sýpe oikóva Róchesterpe (Minnesota). Ag̃uahẽvo atopa hese orrekorta hína peteĩ diáriogui Russell diskursokue. Mama omombeʼu chéve umi mbaʼe oaprendéva”. Péicha ko ermána oikuaa ypy Jehovápe ha 60 áñore opredika meme pe Rréino.

7. ¿Mbaʼérepa umi omoakãva Jehová organisasión ohecha jey osegítapa oiporu umi diário?

⁷ Áño 1916-pe umi omoakãva Jehová organisasión ohecha jey osegítapa oiporu umi diário oikuaauka hag̃ua umi marandu porã. Pe primera gérra mundiál káusare ijetuʼu oñekonsegi hag̃ua oñekotevẽva oñeimprimi hag̃ua umi diário. Áño 1916-pe umi ermáno Inglaterragua omombeʼu ivaiha la situasión, ha heʼi: “Koʼág̃a oĩ mas de 30 diário oguenohẽva umi diskúrso. Péro hepyeterei umi kuatia ha péichante jahárõ koʼẽrõite saʼivétama umi oimprimíva”. Upéi 31 de octubre de 1916 omano ermáno Russell. Ñemañaha 15 de diciembre de 1916 omombeʼu: “Koʼág̃a ermáno  Russell ndaiporivéima ha upévare noñeguenohẽmoʼãvéima umi diáriope idiskursokuéra”. Ndojeporuvéiramo jepe umi diário ojepredika hag̃ua, oĩ ótra kósa tuichaiterei oipytyvõva. Por ehémplo pe “Foto-Drama de la Creación”.

8. ¿Mbaʼe mbaʼépa ojeporu ojejapo hag̃ua pe “Foto-Drama de la Creación”?

⁸ Pelíkula. Russell ha iñirũnguéra ombaʼapo vaʼekue tres áñore onohẽ hag̃ua pe “Foto-Drama de la Creación”, ha opresenta hikuái 1914-pe (Pro. 21:5). Ko “Foto-Drama” oñemombaʼeterei upe tiémpope. Ojejapo hag̃ua ojeporu vaʼekue fóto ha divúho, ha oñembohasa aja oñehendu músika ojegravapyréva. Hetaiterei hénte ombaʼapo ojegrava hag̃ua pe pelíkula ha ojeporu avei heta animál upearã. Peteĩ infórme 1913-pe guare heʼi: “Hetaiterei mymba oĩva peteĩ hardín votánikope ojeporu osẽ hag̃ua pe párte ojehechaukahápe  Noé ojapo vaʼekue”. Heta divuhánte oĩva Londres, Nueva York, París ha Filadélfiape ojapo umi divúho ojekuaáva ko pelíkulape.

9. ¿Mbaʼérepa hetaite ojegasta ha oñembaʼapo ojejapo hag̃ua pe “Foto-Drama”?

⁹ ¿Mbaʼérepa hetaite ojegasta ha oñembaʼapo ojejapo hag̃ua ko “Foto-Drama”? Peteĩ kárta ojelee vaʼekue umi asambleahápe 1913-pe heʼi: “Umi diário Estados Unidosgua osẽ porã oiporu rupi divúho ha fóto, umi hénte imanduʼave umívare. Ojekuaa enterovépe ogustaitereiha umi fóto oñembohasáva ohóvo. Ñandéve katu hiʼãiterei ñamog̃uahẽ umi notísia porã ha ñamboʼe ñande rapichakuérape. Upévare rohechakuaa iporãtaha jaiporúramo umi pelíkula, divúho ha fóto japredika ha ñaporomboʼe hag̃ua”.

10. ¿Mbaʼe lugárpepa ojehechauka raʼe pe “Foto-Drama”?

¹⁰ Áño 1914 aja ko “Foto-Drama” ojehechauka 80 siudápe káda día. Estados Unidos ha Canadápe haimete 8 millón tapicha ohecha pe pelíkula. Upe áñope pe “Foto-Drama” ojehechauka koʼã lugárpe: Alemania, Australia, Dinamarca, Finlandia, Gran Bretaña, Noruega, Nueva Zelanda, Suecia ha Suiza. Ojejapo avei peteĩ pelíkula isensillovéva hérava “Drama Eureka”. Péva ojehechauka umi puevloʼírupi. Upéva varatove ha ndahasyive ojegueraha hag̃ua ótro hendápe. Áño 1916-pe pe “Foto-Drama” ha pe “Drama Eureka” ojetradusíma koʼã idiómape: alemán, armenio, dano-noruego, español, francés, griego, italiano, polaco ha sueco.

11, 12. ¿Mbaʼéichapa oipytyvõ pe “Foto-Drama” peteĩ mitãrusúpe ha mbaʼe ehémplopa omoĩ haʼe?

¹¹ Peteĩ mitãrusu de 18 áño hérava Charles Rohner omombaʼeterei pe “Foto-Drama” ojetradusi vaʼekue francéspe. Haʼe heʼi: “Pe pelíkula ojehechauka vaʼekue che puévlo héravape Colmar (Alsace, Francia). Oñepyrũre voi chejurujái apytávo, ahecha rupi oñemyesakã porãitereiha la Biblia omboʼéva”.

¹² Upéi Charles ojevautisa ha 1922-pe oñepyrũ iprekursorádo. Ñepyrũrã ojejerure vaʼekue chupe oipytyvõ hag̃ua ojehechauka jave pe “Foto-Drama” Fránciape. Charles heʼi: “Oñemeʼẽ chéve heta traváho: ambopu vaʼerã pe violín, ahecha vaʼerã umi kontrivusión ha mboýpa ojegasta, avei añenkarga umi puvlikasión rehe. Oñembohasáta jave pe pelíkula ajerure vaʼerã umi héntepe okirirĩmba hag̃ua. Ojepytuʼu aja katu ropresenta vaʼerã umi puvlikasión. Upearã roʼe peteĩ ermáno térã ermánape moõitépa otoka chupe oñatende. Káda uno ogueraha ijyva ári umi puvlikasión ha oñemboja oikuaveʼẽ umi héntepe. Avei romoĩ pe entrádape heta puvlikasión mesa ári”. Áño 1925-pe oñeinvita ermáno Chárlespe oservi hag̃ua Betel oĩva Broóklynpe. Upépe ojeheja ikárgope pe orkésta  ombopúva pe rrádio pyahúpe WBBR. Jahecha rire ermáno Charles ehémplo káda uno ikatu ñañeporandu: “¿Ajapótapa oimeraẽ traváho oñemeʼẽva chéve aikuaauka hag̃ua umi notísia porã oñeʼẽva pe Rréinore?” (elee Isaías 6:8.)

13, 14. ¿Mbaʼéichapa ojeporu pe rrádio ojekuaauka hag̃ua umi notísia porã? (Ehecha avei pe rrekuáro “ Oñembohasáva WBBR rupive” ha “ Peteĩ asambléa iñimportantetereíva”.)

¹³ Rrádio. Pe áño 1920 rire saʼivéma ojeporu pe “Foto-Drama”. Péro ojehecha pe rrádio ideprovechoitereitaha ojekuaauka hag̃ua umi notísia porã. Pe 16 de abril de 1922 ermáno Rutherford ojapo peteĩ prográma istóriko oñembohasáva pe rrádio héravape Metropolitan Opera House oĩva Filadélfiape (Pensilvania). Ojekalkula 50 mil persóna ohendu hague pe diskúrso hérava “Hetaiterei oikovéva koʼág̃a nomanomoʼãi arakaʼeve”. Upe rire 1923-pe, primera ves oñetransmiti rrádio rupive peteĩ asambléa. Upe tiémpope ojeporu umi rrádio ndahaʼéiva Estudiánte de la Biblia mbaʼe, péro upéi umi omoakãva ohecha iporãtaha orekóramo irrádio tee. Upévare ojejapo pe primera rrádio Nueva Yórkpe (Staten Island) ha oñembohéra WBBR. Pe primer prográma ojejapo vaʼekue 24 de febrero de 1924-pe.

¹⁴ Ñemañaha 1 de diciembre de 1924-pe guare omombeʼu maʼerãpa ojeporúta pe WBBR. Heʼi: “Rohechakuaa pe rrádio rupive ñamog̃uahẽtaha hetaitereivépe umi notísia porã, ha varatovépe osẽtaha”. Upéi heʼive: “Ñande Ruvicha ohecháramo iporãtaha jaguereko ótra rrádio ojepredika hag̃ua, haʼe ohupytykáne ñandéve la pláta oikuaahaichaite” (Sal. 127:1). Áño 1926-pe Jehová puévlo orekóma 6 emisóra. Mokõi oĩ Estados Unídospe, pe hérava WBBR oĩ Nueva Yórkpe ha WORD oĩva Chicago ypýpe. Umi ótro 4 katu oĩ Canadápe koʼã siudápe: Alberta, Columbia Británica, Ontario ha Saskatchewan.

15, 16. a) ¿Mbaʼépa ojapo umi paʼikuéra ohechávo ojepredika porãitereiha rrádio rupive? b) ¿Mbaʼérepa jaʼekuaa umi diskúrso oñembohasáva rrádiope oipytyvõ hague pe predikasiónpe?

¹⁵ Umi paʼikuéra pyaʼe ohechakuaa oparupietéma oñehenduha umi prográma oñeʼẽva la Bíbliare. Canadápe, ermáno Albert Hoffman oikuaa porã mbaʼéichapa oñembaʼapo peteĩva umi rrádiope. Haʼe heʼi: “Hetaiterei hénte oñepyrũ oikuaa umi Estudiánte de la Bíbliape [koʼág̃a oñehenóiva testígo de Jehová]. Ojepredika porãiterei áño 1928 peve. Upéi umi paʼi oñepyrũ omboliga umi autoridápe omboty hag̃ua umi Estudiánte de la Bíbliagui iñemisóra oĩva Canadápe”.

¹⁶ Oñembotýramo jepe umi emisóra oĩva Canadápe, umi diskúrso oñembohasa emisóra ahénope (Mat. 10:23). Oho porãiterei rupi ko tembiapo Ñemañaha ha La edad de Oro (koʼág̃a hérava ¡Despertad!) oreko peteĩ lísta oĩháme mbaʼe emisórapa ombohasa umi diskúrso. Umi ermáno ohóva opredika ogahárupi oiporu upéva heʼi hag̃ua la  héntepe mbaʼe emisórapepa ikatu ohendu umi diskúrso. ¿Mbaʼépa ojehupyty? Pe Boletín osẽ vaʼekue enero de 1931-pe heʼi: “Og̃uahẽ oréve infórme heʼíva hetaha umi ohendúva rrádiope ermáno Rutherford diskursokuéra. Upéicha rupi umi hénte ohejase umi lívro oñekuaveʼẽ jave chupekuéra predikasiónpe. Péicha umi rrádio tuichaiterei oipytyvõ ermanokuérape”. Pe Boletín heʼi pe tembiapo ojejapóva rrádio ha ogahárupi “oipytyvõha hetaitereípe oikuaa hag̃ua Ñandejára organisasión”.

17, 18. ¿Moõrupipa umi emisóra osegi ideprovécho áño 1930 rire?

¹⁷ Áño 1930 rire hetave oĩ opuʼãva umi ermánore ndoipotáigui ojeporu umi emisóra ojepredika hag̃ua. Opakuévo áño 1937, Jehová puévlo okambia ojapo lája hembiapo. Upévare ndojeporuvéi umi rrádio ojepredika hag̃ua, síno oñesẽve ogahárupi. a Péro ojehecha pe rrádio ideprovechotaha gueteri oñemog̃uahẽ hag̃ua umi notísia porã umi lugár mombyryvehápe ha ndaikatuihápe ojeike umi goviérno káusare. Por ehémplo, 1951 guive 1991 peve peteĩ emisóra oĩva Berlín occidentálpe (Alemania occidental), ombohasa meme umi diskúrso ikatu hag̃uáicha umi oikóva Alemania orientálpe ohendu umi notísia oñeʼẽva pe Rréinore. Áño 1961 guive ha 30 áño aja, pe rrádio nasionál oĩva Surinámpe (Sudamérica), ombohasa káda semána 15 minúto peteĩ prográma oñeʼẽva la Biblia omboʼévare. Upéi, 1969 guive 1977 peve Jehová organisasión ombohasa mas de 350 prográma de rrádio hérava “Opa mbaʼe oĩva Ñandejára Ñeʼẽme ideprovécho”. Estados Unídospe, 48 lugárpe oñembohasa umi prográma osẽva 291 emisórape. Áño 1996-pe peteĩ emisóra oĩva Ápiape, haʼéva Samoa kapitál opytáva Pacífico Súrpe, ombohasa káda semána peteĩ prográma hérava “Oñembohovái umi mbaʼe reñeporandúva la Bíbliare”.

¹⁸ Áño 2000 mboyve, ndojeporuvéi pe rrádio oñemog̃uahẽ hag̃ua umi notísia oñeʼẽva Ñandejára Rréinore. Péro oñepyrũ ojeporu ambue mbaʼe ojepredika hag̃ua hetave héntepe.

19, 20. ¿Mbaʼérepa Jehová organisasión oiporu pe sítio jw.org, ha mbaʼe iporãvapa ojehupyty? (Ehecha avei pe rrekuádro “ JW.ORG”.)

¹⁹ Internet. Áño 2013 guive oĩ mas de 2.700 millón oiporúva Internet. Ojeʼe voi oĩha dos mil millón oiporúva Internet iselulárpe ha távletpe. Ha heta hetave umi orekóva Internet ko yvy tuichakuére. Por ehémplo koʼág̃arupi Áfricape oĩ voi mas de 90 millón opagáva káda mes oiporu hag̃ua. Upévare ikatu oñemog̃uahẽ umi héntepe hetave informasión.

²⁰ Upéicha rupi áño 1997 guive Jehová organisasión oñepyrũ oikuaauka umi notísia porã Internet rupive.  Áño 2013 guive pe sítio jw.org oĩma 300 idiómape, ha umi informasión oñeʼẽva la Bíbliare oĩ oñemboguejy hag̃ua 520 idióma rasápe. Káda día 750 mil tapichárupi oike ko sítiope olee hag̃ua umi informasión térã ohecha hag̃ua umi vidéo. Káda mes avei umi hénte omboguejy más de 3 millón lívro kompléto, 4 millón rrevísta ha 22 millón gravasión.

21. ¿Mbaʼépa ñanemboʼe karai Sina rehe oiko vaʼekue?

²¹ Ko sítio rupive ojekuaauka Ñandejára Rréino opárupi. Por ehémplo ideprovechoiterei umi lugár ojeproivihápe testígogui opredika. Oñepyrũmíre áño 2013 peteĩ karai hérava Sina ojuhu pe sítio jw.org ha ohenói testígo ofisína sentrálpe, oĩva Estados Unídospe. Pe karai ojerure informasión oñeʼẽva la Bíbliare. Péro, ¿mbaʼérepa nohenóiri hetãme? Haʼe ningo musulmán ha oiko peteĩ lugár ojeproivihápe umi testígogui opredika. Ohenói rire, ojehecha peteĩ testígo oĩva Estados Unídospe ostudia hag̃ua hendive la Biblia. Haʼekuéra ostudia dos vése káda semána Internet rupive.

22, 23. a) ¿Mbaʼérepa jasegi japredika ogahárupi? b) ¿Mbaʼérepa ikatu jaʼe pe Rréi ovendesiha ñane rembiapo?

²² Jahecháma mbaʼéichapa yma ideprovécho ñamog̃uahẽ hag̃ua umi notísia porã umi diário, pe “Foto-Drama”, rrádio ha koʼág̃arupi Internet. Péro koʼã mbaʼe nomyengoviái pe predikasión jajapóva umi hénte rogaitépe. ¿Mbaʼérepa? Ñande jasegiségui Jesús ehémplo. Opredikáramo jepe umi hénte atýpe, haʼe oñehaʼã avei oipytyvõ peteĩteĩme  (Luc. 19:1-5). Jesús ohekomboʼe idisipulokuérape ojapo hag̃ua avei upéicha ha heʼi chupekuéra mbaʼe notísiapa omombeʼu vaʼerã (elee Lucas 10:1, 8-11). Jahecháma haguéicha kapítulo 6-pe, umi omoakãva Jehová organisasión omokyreʼỹ meme umi ermánope oñeʼẽ hag̃ua káda persónandi umi notísia porãre (Hech. 5:42; 20:20).

²³ Ojapóma cien áño pe Rréino oñepyrũ hague ogoverna yvágape, ha koʼág̃a oĩma haimete 8 millón oikuaaukáva kyreʼỹme mbaʼépa Ñandejára rembipota. Jahecha porãiterei pe Rréi ovendesiha umi mbaʼe jajapóva jaikuaauka hag̃ua pe Rréino. Pe kapítulo oúvape jahecháta mbaʼéichapa haʼe omeʼẽ ñandéve ñaikotevẽva ñamog̃uahẽ hag̃ua umi notísia porã entéro tetã, trívu, ha umi oñeʼẽvape opaichagua idióma (Apoc. 14:6).