1, 2. (a) Omuano uṋe Jesus mbwa ungurisa kutja ma hungire ku notjimbumba otjinene tjovandu? (b) Omomuano uṋe ovahongewa vaKristus ovaṱakame mu va horera ku ye nu omena ratjike?

 OVIMBUMBA vyovandu vya worongana ongondoroka na Jesus pomukuro weo, nungwari Jesus wa ronda mokayaha na hingi okamukato okaṱiṱi moukoto weo. Ongwaye tja tjita nao? Eye aa tjiwa kutja omeva maye tjiti kutja eraka re ri zuvakwe nawa nu ihi tja vatera kutja ovandu mbaave puratene ku ye ve zuve nawa ombuze ndjaa zuvarisa.—Lesa Markus 4:1, 2.

² Moruveze rwomazikiro wOuhona, ovahongewa vaKristus va horera ku ye mokuungurisa omiano pekepeke vyokuhandjaura ombuze ombwa yOuhona waMukuru kovandu ovengi. Kehi yomahongorero wOmbara, ovakarere vaMukuru va tjita omarundurukiro otja ozongaro zawo paaze runduruka nounongo oupe tjaau handjaukire ko. Tu vanga okuvasisa ombuze ndji kovandu ovengi otja pu matu yenene ngunda omaandero aye hiye ya. (Mat. 24:14) Tara komiano tjiva mbi twa rora okuungurisa kutja tu vasise ombuze ndji kovandu koṋa akuhe. Wina ripurira komiano mbi mo yenene okuhorera kongamburiro ya imba mba zuvarisa ombuze ombwa momayuva omakuru.

3. Omaungurisiro wetu wozokorande ya pindikisa vi ovapirukire vouatjiri?

³ Ozongoramambo. Mbuti Russell novakwao mbaave ungura pamwe aave pitisa okambo nga o-Watch Tower okuza kombura ndji 1879, otjomuano wokuvasisa ombuze yOuhona kovandu ovengi. Posi yokutja, ozombura zokomurungu wombura ndji 1914, pe munika aayo Kristus wa ṱuna oviṋa kutja ombuze ombwa i vaze kovandu mouparanga wouye. Oviṋa ovingi vya uta okutjitwa mombura ndji 1903. Mombura ndjo, Dr. E. L. Eaton, ngwa ri omuhungirire po wotjimbumba tjokereka yoProtestant moPennsylvania, wa ningira Charles Taze kutja ve kare nombatasaneno ohunga nomahongero pekepeke wOmbeibela. Ovihungiriro mbi aavi sokutjitirwa pomatuwo omanene komurungu wovapuratene. Morutuu ndwa tjanga ku Russell, Dr. Eaton wa tjanga kutja, “Ami mbe ripura kutja okuhungirira komapuriro tjiva ami na ove mu twa panguka . . . maye nana ombango yovandu ovengi.” Russell novakwao mbaave ungura pamwe wina aave munu kutja otjiṋa hi tjiri matji nana ombango yovandu, kunao owo va tjita ozondyero zokutja ve kare notjihungiriro mongoramambo imwe  ohongora yena The Pittsburgh Gazette. Ovihungiriro mbyaavi pitisiwa mongoramambo mbi, vya uta okutjiukwa nawa nu omakahururiro waRussell omawa ohunga nouatjiri wOmbeibela ya nana ombango yovengi ngandu ongoramambo ndji tji ya ningira Russell kutja ma pitise ovihungiriro mbyo mongoramambo otjivike atjihe. Otjiṋa hi tjiri tja pindikisa ovapirure vouatjiri!

4, 5. Otjikaṋena tjiṋe Mbuti Russell tja raisa nu imba mbe nomerizirira motjira tjaJehova mave yenene okumuhorera vi?

⁴ Tjimanga ozongoramambo ozengi aaze vanga okupitisa ovihungiriro vyaRussell. Mombura ndji 1908, okambo nga o-Watch Tower ka tjivisa kutja omahungi ngo aaye pitisiwa aruhe “mozongoramambo 11.” Nungwari, ovarumendu ovakambure mbaave tjiwa oviungura vyozongoramambo nawa va raera Russell kutja indu tja tjindisire omberoo yOtjira tjaJehova okuza moPittsburgh okuyenda kotjihuro tji tji tjiukwa nawa, ozongoramambo ozengi kombanda ya inḓa maze kara nonḓero okupitisa omahungi nga zikamena kOmbeibela nga. Kombunda yokuripurira oukoto kotjiṋa hi nomapu warwe wina, Russell wa tjindisira omberoo koBrooklyn tjaNew York mombura ndji 1909. Kwa kongorera tjike? Kombunda yomieze omiṱiṱi tji vaza nokutjinda, ozongoramambo ape 400 za uta okupitisa ovihungiriro mbi, nu zarwe ozengi aaze riweza kotjivaro hi. Indu Ouhona tji wa zikwa mombura ndji 1914, tjandje pe nozongoramambo zokombanda 2 000 nḓaaze pitisa ovihungiriro vyaRussell momaraka yane!

⁵ Omekuriro ngo maye tu hongo tjike? Imba mbe nomerizirira motjira tjaJehova ndino mave sokukondja okuhorera komerisusuparisiro waRussell. Omomuano uṋe? Indu tji mave tjiti ozondyero ozonanḓengu, ngave puratene kondunge yavarwe.—Lesa Omiano 15:22.

6. Ouatjiri mbwaau pitisiwa mozokorande wa ṱuna vi komundu umwe?

⁶ Ouatjiri ohunga nOuhona mbwaau pitisiwa mozongoramambo nḓo wa rundurura omiinyo vyovandu ovengi. (Hebr. 4:12) Okutara kotjihorera, Sisi Ora Hetzel, ngwa papitisiwa mombura ndji 1917, wa ri umwe wovandu mbe rihonga ouatjiri okupitira mozongoramambo. Eye wa tja: “Ami tji mba za nokukupwa, mba karyangera mama moRochester tjaMinnesota. Tji mba vaza, mbe mu vaza ama kondo omahungi tjiva okuza mongoramambo. Owo ya ri omahungi nga tjangwa i Russell. Mama we ndji kahururira oviṋa mbye rihonga okuza momahungi nga.” Ora wa yakura ouatjiri mbwe rihonga nu oure wozombura ape 60 eye wa ri omuzuvarise wOuhona waMukuru omuṱakame.

7. Omena ratjike imba mbaave hongorere otjira, tji ve ripurira rukwao komaungurisiro wozokorande?

⁷ Mombura ndji 1916, oviuṋe vivari ovinanḓengu vya hinga imba mbe hongorera otjira kutja ve ripure rukwao kutja omaungurisiro wozongoramambo okuhandjaura ombuze ombwa maye sokukayendisiwa komurungu poo indee. Otjitenga, Ovita Ovinene mbya tambuka oruveze ndwo vya tjita kutja ma rire ouzeu okumuna oviṋa mbi ungurisiwa momapipitisiro wozongoramambo. Mombura ndji 1916, pa tjitwa omatjivisiro okuza korupa rwetu rwozongoramambo moBritanje ndwa raisa ouzeu mbwa ri po indu tji rwa tja: “Nai pe nozongoramambo 30 uriri nḓe pitisa Omahungi waRussell. Nu otjivaro hi mape ya matji henduruka orondu ombapira yokupirinda ozongoramambo ya rira ondiru.”  Otjiṋa tjarwe, tja ri onḓiro yaMbuti Russell tji ya ri 31 ku Seninaṋi 1919. Mena rotjiṋa hi, okambo nga The Watch Tower komayuva 15 ku Tjitarazu 1916 ka tjivisa kutja: “Mena rokutja Mbuti Russell ke po rukwao, omahungi [nge pitisiwa mozongoramambo] kaye nokupitisiwa rukwao.” Nandarire kutja omuano womahongero mbwi wa yanda, omiano vyarwe vyokuzuvarisa tjimuna omaraisiro wenyando ndi “Photo-Drama of Creation,” ya kayenda komurungu okukara nondoṋeno.

8. Ozongondjero zaye nḓa tjitwa kutja enyando ndi “Photo-Drama of Creation” ri ungurwe?

⁸ Omaraisiro woviperendero. Russell novakwao mbaave ungura pamwe va ungura ozombura ape 3 ku tja ve ungure enyando ndi “Photo-Drama of Creation,” nda pitisiwa mombura ndji 1914. (Omiano 21:5) Enyando ndi, otja tjaari isanewa, rari noviperendero mbyaavi nyinganyinga nozombosiro noviperendero vyarwe mbya ri novivara. Ovandu ovengi va ri norupa momanyando wOmbeibela nga kamburwa nu wina mwa ri ovinamuinyo. Omatjivisiro  yemwe wombura ndji 1913, ya tja: “Kutja ve yenene okuhorera kongaro yoruveze rwaNoa, owo va ungurisa ovipuka ovingi porumbo orunene rwovipuka.” Oviperendero ovingi mbya ungurisiwa menyando ndi vya huwa komake i ovandu mba ri moLondon, moNew York, moParis na moFiladelfia.

9. Ongwaye tji pa ungurisiwa oruveze novimariva ovingi nao kutja enyando ndi “Photo-Drama” ri ungurwe?

⁹ Ongwaye tji pa ungurisiwa oruveze novimariva ovingi nao kutja enyando ndi “Photo-Drama” ri ungurwe? Onḓuvasaneno ndja tjitwa pomaworonganeno omanene nga ri mombura ndji 1913 ya tja: “Ozongoramambo zaAmerika za rundurura oumune wovandu momuano omuhimise okupitira moviperendero novisasanekero mbyaavi pitisiwa mu zo. Eṱe wina otjovazuvarise vombuze twa muna kutja tji twa ungurisa oviperendero mbi nyinganyinga na imbi mbi hitasana nomambo ngu maye hungirwa, matu kara nondoṋeno momazuvarisiro wetu.”

10. Enyando ndi “Photo-Drama” ra raisiwa ouparanga pu pe ṱa pi?

¹⁰ Mombura ndji 1914, enyando ndi “Photo-Drama” aari raisiwa movihuro 80 eyuva arihe. Ovandu ape omangete 8 mOmahi Omakutasane waAmerika na Kanada va muna enyando ndi. Mombura otjingeyo ndjo, enyando ndi “Photo-Drama” ra raisiwa momahi nga oAustralia, oBritanje, oDenmark, oFinland, Ehi rOvandoitji, oNew Zealand, oNorway, oSweden, noSwitzerland. Enyando otjingero nda ririsiwa epupu, nu ndi ha ri noviperendero mbi nyinganyinga ra ungurwa na ri raisiwa kovandu movirongo oviṱiṱi. Enyando ndo, ndaari isanewa “Eureka Drama,” kara ri nondiru okuungura nu ra ri epupu okutjindisa. Mombura ndji 1916, enyando ndi “Photo-Drama” poo indi “Eureka Drama” tjandje ya torokwa mOtjiarmenia, mOtjidano-tjaNorway, mOtjifransose, mOtjindoitji, mOtjigrike, mOtjiitaliana, mOtjipolisha, mOtjispanisha na mOtjiswedisha.

11, 12. Enyando ndi “Photo-Drama” ra ṱuna vi komuzandona umwe, nu otjihorera tjiṋe tja raisa?

¹¹ Enyando ndi “Photo-Drama” nda torokwa mOtjifransose ra ṱuna tjinene komuzandu wozombura 18 wena Charles Rohner. Eye wa tja “Enyando ndi ra raisirwa motjirongo tjetu moColmar, tjaAlsace moFransa. Okuza komautiro ami mba tjaterwa i omuano ouatjiri wOmbeibela mu wa raisiwa oukahu.”

¹² Kunao, Charles wa papitisiwa nu mombura ndji 1922 wa uta okukarera Jehova oruveze aruhe. Otjiungura otjitenga tjaa ungura tja ri otjokuvatera okuraisa enyando ndi “Photo-Drama” kovandu moFransa. Tjaa hungire ohunga noviungura mbi, eye wa tja: “Mba perwe oviungura pekepeke, okunyanda okasiore (violin), okuungura novimariva nu wina mba ri omuvatere morupa rwomambo. Ami wina ee ningirwa okumwinisa ovandu ongongorasaneno ngunda ai hiya uta. Pokaruveze kokusuva, aatu yandja omambo. Omundu auhe wa perwe okaruveze metuwo romaworonganeno paa sokuzuvarisira. Nu auhe wa ri nomambo ngaa sora okutjinda nu aa yenene okuhungira ku nomundu auhe mokaruveze ka perwe. Kombanda yanao, pomahitiro wetuwo romaworonganeno, twa ri novitihe mbye urire omambo.” Mombura ndji 1925, Mbuti Charles, wa ningirwa kutja ma kaute okuungura poBetel yaBrooklyn moNew York. Eye tja ri mbo, wa pewa otjiungura tjokurongerisa ovaimbure voradio ombe ndji WBBR. Tji  twa zu nokukonḓonona otjihorera tjaMbuti Rohner, matu sokuripura oveni kutja, ‘Hapo ami mbi ri kamwaha okuyakura ngamwa otjiungura tji mba pewa kutja mbi vatere mokuvasisa ombuze ombwa yOuhona komurungu poo indee?’—Lesa Jesaja 6:8.

13, 14. Oradio ya ungurisiwa vi mokuhandjaura ombuze ombwa? (Wina tara kokaongo nga “ Ozongongorasaneno zomurari wondjivisiro mbwi WBBR” na inga “ Omaworonganeno omananḓengu tjinene.”)

¹³ Oradio. Mozombura nḓa 1920, oviungura vyenyando ndi “Photo-Drama,” vya uta okuyaruka ombunda, posi yokutja oradio ya rira omuano omunanḓengu wokutjivisa ombuze yOuhona. Tji ya ri 16 ku Kozonyanga 1922, Mbuti Rutherford wa yandja ehungi enanḓengu moradio ponganda ndjaai isanewa Metropolitan Opera House moFiladelfia tjaPennsylvania. Ovandu ape 50 000 va zuva ehungi rOtjiingirisa nda ri nepu ndi “Ovandu omangete mbe nomuinyo nai, kamaave roro okuṱa.” Okuzambo mombura ndji 1923, pa uta okupitisiwa otupa twomaworonganeno omanene. Kombanda yokuungurisa ozoradio zarwe, imba mbaave hongorere otjira va muna kutja ma rire nawa tji va utu omurari wawo oveni wondjivisiro mbwa tungwa mOkakoverwahi kaStaten tjaNew York, nu oyo aai isanewa WBBR. Omapitisiro omatenga ya tjitwa tji yari 24 ku Tengarindi 1924.

¹⁴ Okambo nga The Watch Tower ketenga raTjitarazu 1924, ka kahurura ondando yomurari mbwi WBBR indu tji ka tja: “Tu kambura kutja okuungurisa oradio omuano mbu ha kosa ondiru nu omusemba mokuvasisa ombuze youatjiri kovandu.” Okuzambo ka weza nu ake tja: “Indu Muhona tja munu kutja ohepero okutunga omurari warwe woradio kutja ombuze youatjiri i zuvakwe, Eye ma tjiti kutja pe kare ovimariva momuano we mbu ma vanga.” (Eps. 127:1) Mombura ndji 1926, ovakarere vaJehova va kara nomirari 6 vyondjivisiro. Omirari 2 vya ri mOmahi Omakutasane waAmerika, o-WBBR mbwa ri moNew York na warwe mbwi WORD mbwa ri meṋe yaChicago. Inḓa ozarwe 4 za ri moKanada, moAlberta, moKolumbia tjaBritanje, moOntario, na moSaskatchewan.

15, 16. (a) Ovanane vozongamburiro moKanada va ṱunwa vi i omirari vyetu vyondjivisiro? (b) Omahungi woradio nomazuvarisiro okuza kondjuwo nondjuwo aavi vatere vi ovazuvarise?

¹⁵ Omahandjauriro wouatjiri wOmbeibela nga, ya zuvakwa i ovanane vozokereka zOvakriste voposyo wina. Albert Hoffman ngwaa tjiwa oviungura mbi kayendisiwa pomurari mbwa ri moSaskatchewan tjaKanada wa tja: “Ovandu ovengi va uta okutjiwa Ovakonḓonone vOmbeibela [kombunda mba katjiukwa otjOvahongonone vaJehova]. Ombuze ombwa ya zuvarisiwa tjinene nga kombura ndji 1928, indu ovanane vozokereka zOvakriste voposyo tji va ṋiṋikiza ohoromende. Omirari vyondjivisiro avihe vyOvahongonone vaJehova moKanada vya pandjara otutuu twawo twokuungura.”

¹⁶ Nandarire kutja omirari vyetu vyondjivisiro moKanada vya patwa, omahungi wOmbeibela ya kayenda komurungu okupitisiwa mozoradio zarwe. (Mat. 10:23) Kutja omaungurisiro nga ye kare nondoṋeno, mokambo nga The Watch Tower na inga The Golden Age (nambano ku ke isanewa o-Awake!) aa mu kara ongongorasaneno yozoradio pekepeke omahungi wOmbeibela mu maye pitisiwa kutja ovazuvarise mbu mave zuvarisa okuza kondjuwo nondjuwo ve tunduuze ovandu okupuratena. Kwa  kongorera tjike? Okambapira nga Bulletin (nambano ku ke isanewa okambapira kOviungura vyEtu vyOuhona) kaRozonḓu 1931 ka tja: “Oviungura vyoradio vya vatera ovakambure ovakwetu tjinene momazuvarisiro wawo wokuza kondjuwo nondjuwo. Pe ya otutuu otuingi komberoo yetu tu twe tu tjivisa kutja ovandu ovengi va puratena kozoradio nu tji va za nokuzuva omahungi ngaaye yandjwa i Mbuti Rutherford, owo va ri nonḓero yokukambura omambo ngaave pewa.” Okambapira nga Bulletin ka tja, omahungi woradio nomazuvarisiro wokuza kondjuwo nondjuwo ombyari “omiano vivari ominene otjira tjaJehova mbyaatji ungurisa okutjivisa ombuze ombwa.”

17, 18. Nandarire kutja pa ri omarundurukiro, oradio ya kayenda vi komurungu okukara norupa mokuhonga ovandu?

¹⁷ Mozombura nḓa 1930, pa ri omapirukiro omengi mena romaungurisiro wetu wozoradio zarwe. Okutja komaandero wombura ndji 1937, ovakarere va Jehova va tjita omarundurukiro. Owo va isa okuungurisa oradio nave utu okuyandja ombango onyingi kotjiungura tjokuzuvarisa okuza kondjuwo nondjuwo. a Nakombanda yanao, oradio ya kayenda komurungu okukara norupa orunene mokutjivisa ombuze yOuhona kovandu mba turire motuveze twokokure poo mba ri momahi warwe. Okutara kotjihorera okuza mombura ndji 1951 nga ko 1991, omurari umwe woKongurova kwaBerlin tjEhi rOvandoitji, aau pitisa omahungi ohunga nOmbeibela eyuva arihe kutja ovandu mbe ri Komuhuka wEhi rOvandoitji ve yenene okuzuva Ombuze yOuhona. Okuza mombura ndji 1961 ngandu ozombura 30 kombunda yanao, oradio yotjiwaṋa moSuriname Komamuho waAmerika aai pitisa ongongorasaneno motjivike atjihe yozominute 15 ndjaai tjiukisa ouatjiri wOmbeibela. Okuza mombura ndji 1969 nga 1977 otjira tjaJehova tja pitisa omahungi wOmbeibela wokombanda 350 nga kamburwa kehi yorupa rwOtjiingirisa ndwaaru isanewa “Omatjangwa aehe omananḓengu.” Nu mOmahi Omakutasane waAmerika, omirari 291 vyoradio movihuro 48, vya yakura omapitisiro wozongongorasaneno nḓo. Mombura ndji 1996, omurari woradio moApia, otjihuro ohongora tjaSamoa, wa handjaura ongongorasaneno yOtjiingirisa otjivike atjihe ndjari nepu ndi “Omaziriro komapuriro woye ohunga nOmbeibela.”

¹⁸ Otja eserewondo 20 tjaari ya popezu, oradio kaya ri norupa orunene mokuhandjaura ombuze ombwa rukwao. Nungwari, pe ya omuano warwe mbwa tjita kutja i rire oupupu okuvasisa ombuze kovandu ovengi tjinene.

19, 20. Ongwaye ovakarere vaJehova tji va uta orungovi ndwi jw.org, nu orwo rwa kara nondoṋeno pu pe ṱa pi? (Wina tara kokaongo nga “ JW.ORG.”)

¹⁹ Orungovi. Okuza mombura ndji 2013, ovandu vokombanda yomatau 2.7, mbe ri ozoperesende ape 40 zovandu avehe mouye, aave ungurisa orungovi. Otja kovivaro tjiva, ovandu ape omatau 2 ve hita morungovi noungoze wawo poo oukombiuta wawo womomake. Otjivaro ho tji kayenda komurungu okukura mouparanga wouye, posi yokutja ovandu ovengi mbe hita morungovi noungoze poo noukombiuta womomake, ovandu mbe ri moAfrika, mu mu novandu ape omangete 90 mbe ungurisa orungovi. Omekuriro ngo ya ṱuna tjinene komuano ovandu ovengi mu ve muna ondjivisiro ndino.

 ²⁰ Okuutira mombura ndji 1997, ovakarere vaJehova va uta okuungurisa omuano womahakaeneno mbwi. Mombura ndji 2013, orungovi ndwi jw.org rwa uta okuungurisiwa momaraka ape 300, nu ondjivisiro ohunga nOmbeibela i yenena okunanwa momaraka wokombanda 520. Eyuva arihe, ovandu ape 750 000 ve hita morungovi ndwi. Okuweza ko, pendje nokutara ouvidio, ovandu momueze auhe wina ve nana omambo wokombanda omangete 3, oumbo omangete 4, novipuratenwa omangete 22.

21. Ove we rihongere tjike kotjihorera tjomurumendu ngwa tamunwa moparagrafa ndji?

²¹ Orungovi ndwi rwa rira omuano omuwa wokutjivisa ombuze ombwa ohunga nOuhona waMukuru, nandarire momahi oviungura vyetu mu vi ha yandjerwa. Okutara kotjihorera, momautiro wombura ndji 2013, omurumendu umwe wa muna orungovi ndwi jw.org nu a tono ongoze komberoo yetu ohongora, ndji ri moAmerika, okupura ondjivisiro onyingi ohunga nOmbeibela. Ongwaye otjiṋa hi tji tja ri otjihimise? Omena rokutja omurumendu ngwi wa ri Omumuslima nu aa kara mokarongo okaṱiṱi oviungura vyetu maavi ha yandjerwa oparukaze. Mena rokutja eye wa tona ongoze, pa tjitwa ozongondjero zokutja omurumendu ngwi ma ute okukonḓonona Ombeibela tuvari motjivike ku nOmuhongonone ngwaa kara mOmahi Omakutasane waAmerika. Omakonḓononeno nga aaye tjitwa okupitira morungovi.

22, 23. (a) Omiano vyokuzuvarisira ovandu ovengi vya pingena omazuvarisiro wokuza kondjuwo nondjuwo poo indee? (b) Ombara ya sera vi ozongondjero zetu ondaya?

²² Omiano pekepeke mbi twa ungurisa kutja tu vasise ombuze kovandu ovengi, tjimuna ongoramambo, enyando ndi “Photo-Drama,” oradio norungovi, kavi na pu vya ungurirwa kutja vi pingenise omazuvarisiro wokuza kondjuwo nondjuwo. Omena ratjike? Omena rokutja ovakarere vaJehova ve rihongera kotjihorera  Jesus tja raisa. Kombanda yokuzuvarisa ombuze kovandu ovengi, eye wa ungura oviṋa vyarwe ovingi; eye aa yandja ombango tjinene kokuvatera ovandu kourike wawo. (Luk. 19:1-5) Jesus wina wa honga ovahongewa ve kutja ve tjite omuano otjingewo, nu wa yandja ombuze ku wo ndjaave sokuzuvarisira ovandu. (Lesa Lukas 10:1, 8-11.) Otja tji twa muna mEkondwa 6, imba mbaave hongorere otjira aruhe aave tunduuza ovakarere vaJehova okuhungira ku novandu kourike wawo.—Oviung. 5:42; 20:20.

²³ Ozombura 100 kombunda yomazikiro wOuhona, ovazuvarise vokombanda yomangete 7.9 va kara norupa mokuhonga varwe ohunga nozondando zaMukuru. Nokuhina omakeyakeyero, Ombara ya sera ondaya komiano pekepeke mbi twa ungurisa okutjivisa Ouhona. Otja ekondwa ndi mari kongorere ko tji mari karaisa, eye we tu pa oviungurisiwa mbi matu hepa kutja tu vasise ombuze ombwa komihoko avihe na koviwaṋa avihe na komaraka aehe.—Omavan. 14:6.