1, 2. (a) Ki método Hesus a usa pa papia ku un públiko grandi? (b) Kon e disipelnan fiel di Kristu a sigui su ehèmpel, i ku ki meta?

 GRAN kantidat di hende a aglomerá rònt di Hesus kantu di un lago pa skuch’é, pero el a bai sinta den un boto i a hala un poko for di kantu. Dikon? Pasobra e tabata sa ku e superfisie di awa lo a amplia e volúmen di su stèm i henter e multitut grandi ei lo por a tende su mensahe mas kla.—Lesa Marko 4:1, 2.

² Rònt di tempu ku e Reino a nase, e disipelnan fiel di Kristu a sigui su ehèmpel. Nan a usa métodonan inovativo pa plama e bon notisia di Reino na un públiko grandi. Bou di guia di e Rei, e pueblo di Dios ta sigui bini ku ideanan nobo i ta adaptá nan mes na sirkunstansianan nobo i teknologia nobo. Nos ke alkansá mas tantu hende posibel promé ku e fin yega. (Mat. 24:14) Laga nos konsiderá djis algun di e métodonan ku nos a yega di usa òf ta usando pa alkansá hende, sin importá unda nan ta biba. Pensa tambe riba maneranan ku abo por imitá e fe di e rumannan ku a plama e bon notisia rònt di tempu ku e Reino a nase.

3. Kiko a pone ku e enemigunan di e bèrdat no a keda niun tiki kontentu ku nos uso di korant?

³ Korant. For di 1879, Ruman Russell ku su kolaboradónan a kuminsá publiká E Toren di Vigilansia i asina a hiba e mensahe di Reino na hopi hende. Pero den e dékada promé ku 1914, Kristu aparentemente a dirigí asuntunan di tal manera ku e bon notisia por a alkansá un públiko hopi mas grandi. E seri di suseso ku a hiba na esei a kuminsá na 1903. E aña ei, Dr. E. L. Eaton, bosero di un grupo di pastor protestant na Pennsylvania, a reta Charles Taze Russell na un seri di debate riba doktrina bíbliko. Eaton a bisa den un karta dirigí na Russell: “Mi ta kere ku un debate públiko riba algun di e kuestionnan di kua ami ku bo ta diferensiá di opinion . . . lo ta di gran interes pa e públiko.” Russell ku su kolaboradónan tambe a pensa ku e públiko lo ta interesá den esei. Pues, nan a laga publiká e debatenan ei den un korant importante, The Pittsburgh  Gazette. E artíkulonan den korant a bira asina popular i Russell su splikashon kla di bèrdatnan bíbliko tabata asina konvinsente ku e korant a ofresé pa sigui publiká e diskursonan di Russell tur siman. Sin duda, e enemigunan di e bèrdat lo no a keda niun tiki kontentu ku esei!

4, 5. Ki kualidat Russell a desplegá, i kon rumannan den puesto di responsabilidat por imitá su ehèmpel?

⁴ No a tarda mashá ku mas korant kier a publiká e diskursonan di Russell. Pa aña 1908, E Toren di Vigilansia a raportá ku e sermonnan tabata sali den “diesun korant regularmente.” Sinembargo, rumannan ku tabata bon na altura di asuntunan di korant a bisa Russell ku si e muda e ofisina di e Sosiedat for di Pittsburgh pa un stat ku tabata mas konosí, mas korant lo a publiká e artíkulonan basá riba Beibel. Despues di a evaluá e konseho ei i otro faktornan, Russell a muda e ofisina pa Brooklyn, New York, na 1909. Ku ki resultado? Apénas algun luna despues di e mudansa ei, rònt di 400 korant tabata publiká e diskursonan, i konstantemente tabata bini mas aserka. Pa ora ku e Reino a keda establesé na 1914, mas ku 2.000 korant na 4 idioma tabata publiká e sermonnan i artíkulonan di Russell!

⁵ Ki lès importante nos ta siña for di e desaroyo ei? Wèl, rumannan ku tin sierto outoridat den e organisashon di Dios awe ta hasi bon di imitá e humildat di Ruman Russell. Den ki manera? Ora di tuma desishon importante, ta bon pa tene kuenta ku e konseho di otro hende.—Lesa Proverbionan 15:22.

6. Kon e bèrdatnan publiká den korant a influensiá un persona?

⁶ E bèrdatnan di Reino ku tabata sali den korant a kambia bida di hopi hende. (Heb. 4:12) Por ehèmpel, un ruman muhé ku yama Ora Hetzel, kende a batisá na 1917, tabata un di e tantísimonan ku a tende di e bèrdat via di e artíkulonan ei. Ruman Hetzel a konta: “Despues ku mi a kasa, mi a bai bishitá mi mama na Rochester, Minnesota. Ora m’a yega, m’a hañ’é ta kòrta artíkulonan for di korant. Nan tabata e sermonnan di Russell. Mi mama a splika mi e kosnan ku el a siña for di nan.” Ruman Hetzel a aseptá e bèrdatnan ku el a siña, i pa kasi 60 aña e tabata un fiel proklamadó di e Reino di Dios.

7. Dikon e rumannan ku tabata dirigí e organisashon a disidí di stòp di usa korant?

⁷ Na 1916, dos suseso klave a pone e rumannan ku tabata dirigí e organisashon rekonsiderá e uso di korant pa plama e bon notisia. Pa kuminsá, e Guera Mundial ku tabata tumando lugá a kousa un skarsedat di entre otro papel. Un informe na 1916 for di nos departamento di korant na Inglatera a hala atenshon na esaki, bisando: “Aktualmente, tin apénas 30 korant ta publiká e sermonnan. I muy probablemente e kantidat akí lo baha konsiderablemente debí na e preis di papel ku ta subiendo ketu bai.” E di dos suseso tabata e morto di Ruman Russell dia 31 di òktober 1916. Pues, E Toren di Vigilansia di  15 di desèmber 1916 a anunsiá: “Awor ku Ruman Russell a fayesé, nos lo stòp kompletamente ku e sermonnan [den korant].” Maske e forma di prediká ei a yega na un fin, otro métodonan sí a sigui ku hopi éksito, manera por ehèmpel e “Foto-Drama di Kreashon.”

8. Kuantu trabou tabata enbolbí den produkshon di e “Foto-Drama di Kreashon”?

⁸ Un programa di slide i pelíkula. Russell ku su kolaboradónan a traha mas o ménos tres aña pa produsí e “Foto-Drama di Kreashon,” i nan a estren’é na 1914. (Pro. 21:5) E Drama, manera nan a yam’é, tabata un produkshon inovativo ku a konsistí di un kombinashon di pelíkula, zonido sinkronisá i slide di glas di koló. Sientos di hende a tuma parti den presentashon di esenanan di Beibel ku nan a filma i ku a inkluí asta bestia. Segun un informe di 1913, nan a trese kasi tur e bestianan di un parke di bestia grandi pa nan por a graba e parti  di Noe den e pelíkula. Pa loke ta e sientos di slide di glas ku nan a usa den e produkshon, artistanan na Filadelfia, Lònden, New York i Paris a pinta kada un na man.

9. Dikon nan a hinka asina tantu tempu i plaka den produkshon di e “Foto-Drama”?

⁹ Dikon nan a hinka asina tantu tempu i plaka den produkshon di e “Foto-Drama”? Un resolushon ku nan a tuma na e seri di kongreso di 1913 ta splika esei: “E éksito sin presedente ku korantnan merikano tin den forma opinion públiko ku yudansa di plachi i kòmeks . . . huntu ku e tremendo popularidat i fleksibilidat di pelíkula, a demostrá nan balor plenamente. I esei segun nos, komo predikadó- i maestronan progresivo di Beibel, ta hustifiká e pleno sosten ku nos ta duna pelíkula i slide komo un método efektivo i deseabel pa evangelisadó- i maestronan usa.”

10. Kon ekstenso presentashon di e “Foto-Drama” tabata?

¹⁰ Durante 1914, nan a pasa e “Foto-Drama” den 80 stat tur dia. Kasi 8 mion hende na Merka i Canada a mira e presentashon. E mesun aña ei, nan a pasa e “Foto-Drama” na Alemania, Australia, Dinamarka, Finlandia, Gran Bretaña, Noruega, Nueva Zelandia, Suesia i Suisa. Un vershon simplifiká di e produkshon, ku no a inkluí pelíkula, a keda hinká den otro pa usa den statnan mas chikitu. E vershon ei—“Drama Eureka”—tabata mas barata pa produsí i mas fásil pa transportá. Pa 1916, nan a tradusí sea e “Foto-Drama” òf e “Drama Eureka” na aleman, armenio, danes, franses, griego, italiano, norwechi, polako, spañó i sueko.

11, 12. Ki impakto e “Foto-Drama” tabatin riba un mucha hòmber, i ki ehèmpel e mucha hòmber ei a pone?

¹¹ E tradukshon franses di e “Foto-Drama” tabatin un gran impakto riba Charles Rohner, un mucha hòmber di 18 aña. El a konta: “Nan a present’é den mi stat Colmar, na Alsace, Fransia. For di kuminsamentu mi tabata impreshoná ku e manera kla ku e drama a presentá e bèrdat di Beibel.”

¹² Komo resultado, Charles a batisá i na 1922 el a drenta sirbishi di tempu kompleto. Un di su promé asignashonnan tabata pa yuda presentá e “Foto-Drama” na gruponan grandi di hende na Fransia. Deskribiendo e trabou akí, Charles a konta: “Mi tabatin vários asignashon: toka violin, fungi komo sirbidó di kuenta i tambe komo sirbidó di literatura. Tambe promé ku e programa kuminsá, mi mester a pidi e públiko pa keda ketu. Durante pousa, nos tabata bini ku literatura. Nos a asigná kada un ruman hòmber òf ruman muhé na un sekshon di e sala. Kada un di nan tabatin nan brasa yen ku literatura i tabata aserká tur hende den e sekshon. Ademas, na entrada di e sala nos tabatin mesanan ku hopi literatura.” Na 1925, Charles a haña invitashon pa sirbi na Bètel di Brooklyn, New York. Einan el a haña e tarea di dirigí un orkesta pa e radioemisora nobo, WBBR, ku e rumannan a habri. Despues ku nos a konsiderá e ehèmpel akí di Ruman Rohner, ta bon pa  puntra nos mes: ‘Ami ta dispuesto pa aseptá kualke asignashon ku mi haña pa yuda plama e mensahe di Reino?’—Lesa Isaías 6:8.

13, 14. Kon e rumannan a usa radio pa plama e bon notisia? (Wak tambe e kuadronan “ Programashon di WBBR” i “ Un Kongreso Memorabel.”)

¹³ Radio. Den dékada di 1920, e rumannan a kuminsá baha man na e presentashonnan di e “Foto-Drama.” Na lugá di esei, radio a presentá riba esenario komo un manera importante pa plama e bon notisia di Reino. Dia 16 di aprel 1922, Ruman Rutherford a duna un diskurso históriko transmití via radio. El a hasi esei for di Kas di Ópera Metropolitano na Filadelfia, Pennsylvania. Segun kálkulo, 50.000 hende a tende e diskurso ei titulá “Miónes di Hende na Bida Awor Lo No Muri Nunka.” Anto na 1923, tabatin e promé transmishon di un seshon di kongreso. Banda di usa emisoranan komersial, e rumannan ku tabata dirigí e organisashon a disidí ku lo ta mihó pa traha nos mes radioemisora. Nan a trah’é na Staten Island, New York, i el a keda registrá komo WBBR. E promé transmishon a bai den aire dia 24 di febrüari 1924.

¹⁴ E Toren di Vigilansia di 1 di desèmber 1924 a splika kiko tabata e propósito di WBBR: “Nos ta kere ku e manera mas ekonómiko i efektivo pa plama e mensahe di e bèrdat ku nos a yega di usa te awor ta radio.” E artíkulo a sigui bisa: “Si Señor haña ta bon pa traha mas radioemisora pa plama e bèrdat, lo e perkurá e plaka pa esei na su manera.” (Sal. 127:1) Pa 1926, e pueblo di Yehova tabata doño di 6 radioemisora. Dos di nan tabata na Merka: WBBR na New York i WORD den bisindario di Chicago. E otro kuaternan tabata na Canada: Alberta, British Columbia, Ontario i Saskatchewan.

15, 16. (a) Kon klero na Canada a reakshoná riba nos transmishonnan? (b) Kon e diskursonan na radio i e trabou di kas pa kas a komplementá otro?

¹⁵ Di mes, klero di kristiandat a ripará ku via radio e rumannan tabata transmití bèrdat bíbliko pa un área hopi grandi. Albert Hoffman, kende tabata konosí ku e trabou ku a tuma lugá na e radioemisora na Saskatchewan, Canada, a konta: “Mas i mas hende a kuminsá konosé e Studiantenan di Beibel [manera tabata yama Testigunan di Yehova e tempu ei]. Te ku 1928, e rumannan a logra duna un bon testimonio. Pero e aña ei klero a pone asina tantu preshon riba funshonarionan gubernamental ku tur radioemisora na Canada ku tabata den man di e Studiantenan di Beibel a pèrdè nan pèrmit pa transmití.”

¹⁶ Apesar ku nan a sera nos radionan na Canada, e emisoranan komersial sí a sigui transmití e diskursonan bíbliko. (Mat. 10:23) Pa e programanan ei por a alkansá mas hende, E Toren di Vigilansia i E Époka di Oro (ku awor yama Spièrta! ) tabatin un lista di e emisoranan komersial ku tabata transmití bèrdat bíbliko. Di e manera ei e publikadónan ku tabata bai di kas pa kas por a animá e hendenan pa skucha e diskursonan na  nan emisora lokal. Ki impakto esei tabatin? E Boletin di yanüari 1931 a bisa: “E transmishon di radio tabata un berdadero estímulo pa e rumannan ku tabata prediká di kas pa kas. Na ofisina, nos tabata risibí hopi informe tokante hende ku tabata skucha e transmishon di e diskursonan di Ruman Rutherford i p’esei nan tabata kla pa aseptá e bukinan ku e rumannan a ofresé nan.” E Boletin a deskribí e transmishonnan di radio i e trabou di kas pa kas komo “dos gran método di publisidat di e organisashon di Señor.”

17, 18. Aunke sirkunstansia a kambia, kon radio a sigui hunga un papel den plama e mensahe di Reino?

¹⁷ Den dékada di 1930, oposishon kontra nos uso di radio komersial a bira mas intenso. Pues, na final di 1937, e pueblo di Yehova a adaptá nan mes na e kambio di sirkunstansia akí. Nan a stòp ku transmishon komersial i a kuminsá konsentrá mas i mas riba sirbishi di kas pa kas. a Pero tòg radio a sigui hunga un papel importante den plama e mensahe di Reino na algun lugá aislá òf den áreanan kaminda tabata difísil pa prediká. Por ehèmpel, di 1951 pa 1991, un emisora na Wèst Berlin, Alemania, tabata transmití diskursonan bíbliko regularmente pa asina e rumannan ku tabata biba den e parti di loke e tempu ei tabata konosí komo Alemania Oriental por a tende e mensahe di Reino. Kuminsando na 1961, i pa mas ku 30 aña, un radioemisora nashonal na Sürnam tabata transmití un programa semanal di 15 minüt ku a plama bèrdatnan bíbliko. Di 1969 pa 1977, e organisashon a graba mas ku 350 programa radial den e seri “Henter e Skritura Ta Probechoso.” Na Merka, 291 radioemisora, den 48 estado, tabata pasa e programanan. Na 1996, un radioemisora na Apia, siudat kapital di Samoa, un nashon den Oséano Sur Pasífiko, tabata transmití un programa semanal titulá “Kontesta Riba Bo Preguntanan di Beibel.”

¹⁸ Segun ku siglo 20 tabata yega na su final, radio no tabata hunga un papel importante mas den plamamentu di e bon notisia. Ma un otro teknologia a presentá riba esenario, i esei a hasi posibel ku e rumannan por alkansá un kantidat sin presedente di hende.

19, 20. Dikon e pueblo di Yehova a traha e website jw.org, i kon efektivo e ta? (Wak tambe e kuadro “ JW.ORG.”)

¹⁹ Internet. Na 2013, mas ku 2,7 mil mion hende, kasi 40% di e poblashon di mundu, tabata konektá na Internet. Segun algun kálkulo, rònt di 2 mil mion hende ta subi Internet via aparatonan móbil, manera telefòn i tablet. Mundialmente, e sifra ei ta kresiendo ketu bai, pero e kresementu di mas rápido den kantidat di konekshon di Internet móbil ta tumando lugá aktualmente na Afrika, kaminda tin mas ku 90 mion abonamènt di Internet móbil. E desaroyonan ei a trese un kambio fundamental den e manera ku hende ta risibí informashon.

 ²⁰ Na 1997, e pueblo di Yehova a kuminsá usa e medio di komunikashon masal akí. Na 2013, e website jw.org a bira disponibel na un 300 idioma, i e tabatin informashon basá riba Beibel pa download na mas ku 520 idioma. Tur dia, e website ta haña mas ku 750.000 bishita. Tur luna, fuera di wak vidio, hende ta download mas ku 3 mion buki kompleto, 4 mion revista kompleto i 22 mion grabashon oudio.

21. Kiko bo a siña for di e eksperensia di Sina?

²¹ E website a bira un medio poderoso pa plama e bon notisia di e Reino di Dios, asta na paisnan kaminda nos trabou di prediká ta bou di restrikshon. Por ehèmpel, na prinsipio di 2013, un hòmber ku yama Sina a haña e website jw.org i a bèl nos sede mundial na Merka, pidiendo mas informashon tokante Beibel. Dikon e yamada akí a kapta atenshon? Wèl, Sina ta di kultura musulman i ta biba den un pueblito aislá den un pais kaminda e obra di Testigunan di Yehova ta bou di restrikshon severo. Komo resultado di e yamada akí, e rumannan a hasi areglo pa Sina por studia Beibel dos biaha pa siman ku un Testigu di Yehova na Merka. Nan tabata tene e estudio via di Internet, usando un servisio di vidio.

22, 23. (a) E métodonan pa alkansá kantidat grandi di hende a remplasá e sirbishi di kas pa kas? (b) Kon e Rei a bendishoná nos esfuersonan?

²² Niun ora so no tabata e intenshon pa un di e métodonan ku nos a usa pa alkansá kantidat grandi di hende—manera korant, e “Foto-Drama,” programanan di radio i e website—remplasá e sirbishi di kas pa kas. Dikon nò? Pasobra e pueblo di Yehova a siña for di e ehèmpel di Hesus. El a  hasi mas ku djis prediká na multitutnan grandi di hende; el a konsentrá tambe riba yuda personanan individual. (Luk. 19:1-5) Ademas, Hesus a siña su disipelnan pa hasi meskos, i el a duna nan un mensahe pa entregá na e hendenan. (Lesa Lukas 10:1, 8-11.) Manera nos a konsiderá den Kapítulo 6, e rumannan ku tabata dirigí e organisashon semper a animá kada un sirbidó di Yehova pa papia ku hende personalmente.—Echo. 5:42; 20:20.

²³ Shen aña despues ku e Reino a nase, kasi 8 mion publikadó ta partisipá aktivamente den e trabou di siña otro hende tokante e propósito di Dios. Pues, no tin duda ku e Rei a bendishoná e métodonan ku nos a usa pa anunsiá e Reino. Manera e siguiente kapítulo lo mustra, el a asta duna nos e hèrmèntnan ku nos tin mester pa plama e bon notisia na tur nashon, tribu i lenga.—Rev. 14:6.