1, 2. (a) Se a te auala ne fakaaoga ne Iesu ko te mea ke mafai o faipati faka‵lei atu a ia ki se kau fakalogo‵logo tokouke? (e) Ne tau‵tali atu pefea a soko fakamaoni o Keliso ki tena fakaakoakoga, kae kaia?

KO MAOPOOPO atu se vaitino ki a Iesu i te tafatai, kae ne sopo atu a ia ki luga i se poti kae tai momea atu ki tai. Kaia? E iloa ne ia me ka tai fakalasi atu tena leo ne te vai telā ka mafai ei o lagona faka‵lei ne te kau fakalogo‵logo e tokouke.​—Faitau te Maleko 4:1, 2.

² I tausaga i tafa o te fanaumaiga o te Malo, ne tau‵tali atu a soko fakamaoni o Keliso ki tena fakaakoakoga, mai te fakaaogaga o auala ‵fou ke fakasalalau atu ei te tala ‵lei o te Malo ki tino fakalogo‵logo e tokouke. Mai lalo i te takitakiga a te Tupu, ne tumau eiloa a tino o te Atua i te faka‵fouga mo te fakafetaui aka ki fakanofonofoga kese‵kese mo poto ‵fou kolā ko mafai o fakaaoga. E ma‵nako tatou ke oko atu ki tino e tokouke kae koi tuai o oko mai te gataga. (Mata. 24:14) Mafaufau ki nisi auala ko oti ne fakaaoga ne tatou ke talai atu ki tino, faitalia a koga e ‵nofo ei latou. Mafaufau foki ki auala e mafai ei o fakaakoako atu tatou ki te fakatuanaki o tino kolā ne talai atu ne latou te tala ‵lei i te kamataga.

3. Ne fakaitaita atu pefea ki fili o te munatonu a te fakaaogaga ne tatou o nusipepa?

³ Nusipepa. Ne ‵lomi ne te Taina ko Russell mo ana taugasoa a te Watch Tower talu mai te 1879, telā ne avatu ei te fekau o te Malo ki tino e tokotuke. Kae i te sefulu tausaga mai mua o te 1914, ne foliga mai me ne fakagasue‵sue ne Keliso a mea ko te mea ke talai atu te tala ‵lei ki tino e tokouke. Ne kamata mai eiloa te fakasologa o mea ‵tupu i te 1903. I te tausaga tenā, ne ‵teke atu a Dr. E. L. Eaton, se sui mai te potukau o faifeau o te Lotu Poletesano i Pennsylvania, ki a Charles T. Russell ona ko nisi akoakoga faka-te-Tusi Tapu. I tena tusi ki a Russell, ne tusi mai a Eaton: “Ne mafaufau au me ka fakatau‵fai tāua ki nisi fesili kolā e ‵kese tāua i ei, ka fia‵fia malosi ki ei a tino.” Ne mafau‵fau foki a Russell mo ana taugasoa me ka fia‵fia ki ei a tino, telā ne fakatoka ne latou ke fakatau tuku atu olotou manatu ki se nusipepa, ko The Pittsburgh Gazette. Ne lauiloa malosi a te nusipepa kae ne fakamalosi atu a fakamatalaga manino a Russell ki te munatonu i te Tusi Tapu telā ne ma‵nako ei latou ke ‵lomi a fakamatalaga  a Russell i vaiaso katoa. Ne fakaitaita malosi atu eiloa a te mea tenā ki fili o te munatonu!

4, 5. Se a te uiga ne fakaasi atu ne Russell, kae e mafai pefea o tau‵tali atu a tino i tulaga pule ki tena fakaakoakoga?

⁴ E seki leva kae ne ma‵nako a nusipepa e uke ke ‵lomi ne latou a fakamatalaga a Russell. I te 1908, ne lipoti mai ne te Watch Tower me ne ‵lomi “faeloa” a lāuga i “nusipepa e sefulutasi.” Kae ko taina kolā ne masani ‵lei mo galuega e aofia i te fakatokaga o nusipepa ne fai atu ki a Russell me kafai e avatu ne ia a ofisa o te Sosaiete mai Pittsburgh ki se fa‵kai telā e lauiloa, ka uke ‵ki eiloa a nusipepa ka fia ‵lomi ne latou a mataupu, kolā e fakavae ki te Tusi Tapu. Mai tua o te mafaufau ki fakatakitakiga mo nisi manatu ‵tonu, ne avatu ei ne Russell a ofisa ki Brooklyn, Niu Ioki, i te 1909. Se a te ikuga? Mai tua ifo i ei, e nofo loa ki te 400 o nusipepa ne ‵lomi i ei a lāuga, mo nisi mea kolā ne fakaopoopo atu faeloa ki te fakasologa. Mai te taimi ne fakatu aka ei te Malo i te 1914, e sili atu i te 2,000 o nusipepa i ‵gana e fa ne ‵lomi i ei a lāuga mo mataupu a Russell!

⁵ Se a te akoakoga tāua ne tuku mai i te fakatokaga fou tenā? Se mea ‵lei ke fakaakoako a latou kolā e maua ne latou a tamā tulaga pule i te fakapotopotoga a te Atua i aso nei ki te loto maulalo o Russell. Se a te auala e mafai ei o fakaakoako atu latou? I te faiga o fakaikuga tāua, mafaufau ki fakatakitakiga mai nisi tino.​—Faitau te Faataoto 15:22.

6. Ne pokotia pefea se tino i muna‵tonu kolā ne ‵lomi aka i nusipepa?

⁶ Ne ‵fuli eiloa a olaga o tino ne muna‵tonu e uiga ki te Malo kolā ne ‵lomi aka i nusipepa konā. (Epe. 4:12) E pelā mo Ora Hetzel, telā ne papatiso i te 1917, se tokotasi mai i tino e tokouke kolā ne tauloto muamua ki te munatonu e auala i mataupu konā. “Mai tua o taku avagaga,” muna a Ora, “ne fanatu au o āsi ki toku mātua i Rochester, Minnesota. I te taimi ne oko atu ei au, ne maua ne au a mataupu ne ‵kati mai i se nusipepa. Ko lāuga a Russell. Ne fakamatala mai ne toku mātua a mea ne tauloto ne ia mai i ei.” Ne talia ne Ora a muna‵tonu ne tauloto ne ia kae ne fai a ia mo fai se tino folafola fakamaoni o te Malo mō se 60 tausaga.

7. Kaia ne toe mafau‵fau ei a tino kolā ne fai ne latou te takitakiga ki te fakaaogaga o nusipepa?

⁷ I te 1916, e lua a mea ne ‵tupu telā ne toe mafau‵fau ei a tino kolā ne fai ne latou te takitakiga, ki te fakaaogaga o nusipepa ke fakasalalau atu ei te tala ‵lei. Muamua la, ko te gasolo aka o malosi te Taua Sili i te taimi tenā. I te 1916, ne fakaasi mai ne se lipoti mai ‵tou matagaluega mō nusipepa se tulaga faigata, penei: “E 30 tupu fua a pepa kolā e ‵lomi atu i ei a Lāuga i te taimi nei. Kāti ka gasolo ifo ki lalo te aofaki tenā ona ko te momea aka te ‵togi ‵mafa o pepa.” A te lua o mea ko te mate atu o te Taina ko Russell i te po 31 o Oketopa, i te 1916. Tela la, ne faka‵pula mai The Watchtower i a Tesema 15, 1916: “Ona ko te galo atu o te Taina ko Russell, ka fakagata katoatoa atu a te ‵lomiga o lāuga [i nusipepa].” E tiga eiloa ne gata atu a te auala tenei ke talai atu, ne momea aka eiloa te manuia a nisi auala, e pelā mo te “Photo-Drama of Creation.”

8. Ne a mea ne aofia i te faitega o te “Photo-Drama of Creation”?

 ⁸ Fakamatalaga o ata. Ne ga‵lue a Russell mo ana taugasoa i tausaga e tolu ke faite aka ei a te “Photo-Drama of Creation,” telā ne ‵tala mai i te 1914. (Faata. 21:5) Ne aofia i te Koniseti, a tamunei, leo, mo ata kolā ne ‵lomi i lanu valevale. Ne aofia a te fia selau o tino i tala faka-te-Tusi Tapu kolā ne pei fakavitiō, kae ne aofia foki i ei a manu. “A te ‵toe koga lasi telā e tausi i ei a manu ko te zoological gardens,” ko pati i te lipoti mai te 1913, “ne fakaaoga ke fai ki ei a te Tamunei i te tala o Noa.” Kae e pelā mo te fia selau o ata ‵lanu valevale kolā ne fakaaoga i te tamunei, ne ‵kala eiloa ne tino ‵lomi ata i Lonitona, i Niu Ioki, Paris, mo Filatelafia, a ata takitasi ki olotou lima.

9. Kaia ne uke katoa ei a taimi mo tupe ne fakamāumāu ki faiga o te “Photo-Drama”?

⁹ Kaia ne uke katoa ei a taimi mo tupe ne fakamāumāu ki te faitega o te “Photo-Drama”? Ne fakamatala mai i se fakaikuga ne fai i te fakasologa o fono i te 1913: “A te iku manuia i se auala  fakaofoofogia o nusipepa Amelika i te ‵fuliga o kilokiloga a tino ona ko te fesoasoani o ata kamaga mo ata i olotou tala kolā ne ‵lomi mo vaega mō mekesini, fakatasi mo te lauiloa mo te fakafetauigofie aka o ata mo tino fai‵pati, ne fakaasi katoatoa mai i ei te lotou aoga, kae e tali‵tonu katoatoa matou, e pelā me ne tino talai mo potukau o faiakoga faka-te-Tusi Tapu, kolā e gasolo atu faeloa ki mua, i te tukuatuga omotou tamunei kolā e seki laisene faka‵lei e pelā me ne auala ma‵goi kae ‵gali mō tino talai mo faiakoga.”

10. Ne pefea te uke o koga ne fakaasi atu ei a te “Photo-Drama”?

¹⁰ I te 1914, ne fakaasi atu a te “Photo-Drama” i fa‵kai e 80 i aso takitasi. Toeitiiti ko kātoa te valu miliona o tino i te Iunaite Sitete mo Kanata ne lavea ne latou te ‵peiga. I te tausaga foki eiloa tenā, ne fakaasi atu te “Photo-Drama” i Ausetalia, Peletania, Tenimaki, Finilani, Siamani, Niu Sila, Norway, Sweden, mo Switzerland. Kae ko te ‵kopi faigofie o te ata tenā e aunoa mo tino e gasue‵sue i ei, ne fakaaoga i fa‵kai fo‵liki. A te ‵kopi tenā​—ko te “Eureka Drama”​—ne ‵togi māmā atu te faiga i lō te avatuga mai te suā koga ki te suā koga. I te 1916, ne seki ‵fuli eiloa a te “Photo-Drama” io me ko “Eureka Drama” ki te ‵gana Amenia, Dano-Norwegian, Falani, Siamani, Eleni, Italia, Polisi, Sepania, mo te ‵gana Sweden.

11, 12. Ne fakamalosi atu pefea a te “Photo-Drama” ki se tamatene e tokotasi, kae se a te fakaakoakoga ne tuku mai ne ia?

¹¹ A te ‵fuliga i te ‵gana Falani o te “Photo-Drama” ne lasi eiloa tena fakamalosiga ki a Charles Rohner, telā ko 18 ana tausaga. Ne fakaasi atu i toku fa‵kai​—Colmar , Alsace, i Falani,” ko muna a Charles. “Mai te kamataga eiloa, ne ofo au i fakamatalaga manino o te munatonu i te Tusi Tapu.”

¹² Ne iku atu i ei ki te papatisoga o Charles kae ne kau atu a ia ki te taviniga tumau i te 1922. A te tōfiga e tasi mai i ana tōfiga muamua ko te fesoasoani ke fakaasi atu te “Photo-Drama” ki tino e tokouke i Falani. Ne fai mai a Charles i te fakamatalamaiga ne ia o te galuega talai tenei: “Ne ‵tofi aka au ke fai a nai galuega e tolu: ke fakatagi te vaeolini, te tavini fesoasoani i te tausiga o tupe, mo te tavini ke tausi a tusi. Ne fai mai foki ke fakafilemu ne au a te kau fakalogo‵logo a koi tuai o kamata te polokalame. I taimi malōlō, ne tuku atu ne au a tusi. Ne ‵tofi aka ne matou se taina io me se tuagane ki koga kese‵kese i te hall. E ‵fonu eiloa a lima o tino taki tokotasi i tusi kae olo atu latou ki tino katoa i kogā koga konā. E se gata i ei, i te koga e ulu atu ei ki te hall, e ‵tu i ei a taipola kolā e ‵fonu eiloa i tusi.” I te 1925, ne ‵kami atu a Charles ke tavini atu i te Peteli i Brooklyn, Niu Ioki. Ne ‵tofi aka ei a ia ke takitaki se potukau fai pese mō te fale fakasalalau telā ne fatoa fakatu aka ko te WBBR. Mai tua o te mafau‵fau ki te fakaakoakoga a te Taina ko Rohner, e mafai o fesili ifo tatou penei, ‘E mata, e loto fiafia au ke talia so se tōfiga e tuku mai ke fesoasoani atu i te fakasalalauatuga o te fekau o te Malo?’​—Faitau te Isaia 6:8.

13, 14. Ne fakaaoga pefea a te fale fakasalalau ke fakasalalau atu te tala ‵lei? (Ke onoono foki ki te pokisi ko te “ Polokalame i te WBBR” mo te “ Se Fono Tāua.”)

¹³ Fale Fakasalalau. I tausaga talu mai te 1920, ne kamata  o fanaifo ki lalo te galuega ki te “Photo-Drama” kae ne gasolo aka o malosi atu te fakaaogaga o te letio i te fakasalalauatuga o te tala ‵lei o te Malo. I a Apelila 16, 1922, ne fai atu ne te Taina ko Rutherford tena lāuga muamua i te letio mai te Metropolitan Opera House i Philadelphia, Pennsylvania. Kāti e toko 50,000 a tino ne fakalogo‵logo i te letio ki te lāuga ko te “Ka se ‵Mate Eiloa a te Fia Miliona o Tino Kolā e Ōla Nei.” Kae i te 1923, ne fakasalalau atu ei a te polokalame o se fono o te atufenua mō te taimi muamua. I tafa o te fakaaogaga o mea fakasalalau ‵togi, ne fakaiku aka ne latou kolā e fai te takitakiga me se mea ‵lei ke faite aka loa se mea totino a tatou, telā ne faite te mea muamua i Staten Island, i Niu Ioki, kae ne laisene e pelā me ko te WBBR. Ne fai eiloa te fakasalalauatuga muamua i a Fepuali 24, 1924.

¹⁴ Ne fakamatala mai ne The Watch Tower i a Tesema 1, 1924 a te aoga o te WBBR: “E tali‵tonu matou me ka ‵togi māmā te fakaaogaga o te fale fakasalalau kae magoi atu foki i te fakasalalauatuga o te fekau o te munatonu telā ko oti ne fakaaoga sāle.” Ne toe fai mai penei: “Kafai e lavea ne te Aliki me e aoga a nisi fale fakasalalau i te fakasalalauatuga o te munatonu, ka tuku mai eiloa ne ia a tupe i se auala telā e manako a ia ki ei.” (Sala. 127:1) I te 1926, ne mafai eiloa o faka‵tu ne tino o Ieova a fale fakasalalau e ono. Ne ‵tu a fale e lua i te Iunaite Sitete​—ko te WBBR i Niu Ioki kae ko te WORD i se koga e pili ki Chicago. Kae ko nisi fale e fa e ‵tu i Kanata, i Alberta, British Columbia, Ontario, mo Saskatchewan.

15, 16. (a) Ne a mea ne fai ne faifeau i Kanata ona ko te fakasalalauatuga ne tatou o te tala ‵lei? (e) Ne fesoasoani atu pefea a lāuga i letiō ki te galuega mai fale ki fale?

¹⁵ Ne iloa ‵lei ne faifeau o Lotu i Fenua Kelisiano a te fakasalalauatuga lasi tenei o muna‵tonu i te Tusi Tapu. A Albert Hoffman, telā ne masani ‵lei mo te galuega i te fale fakasalalau i Saskatchewan, i Kanata, ne fai mai: “Ne momea aka faeloa o tokouke a tino ko kamata o iloa ne latou a Tino A‵koga i te Tusi Tapu [ko te igoa o Molimau a Ieova i te taimi tenā]. Ne tuku atu eiloa se molimau tafasili i te gali ke oko ki te 1928, i te taimi ne fakamalosi atu a faifeau ki ofisa o te malo, kae ne seki toe talia ei ke laisene a fale fakasalalau katoa kolā ne faka‵tu ne Tino A‵koga i te Tusi Tapu, i Kanata.”

¹⁶ Faitalia te ‵ponoga o fale fakasalalau i Kanata, ne tumau eiloa a Tino A‵koga i te Tusi Tapu o fakasalalau atu i nisi fale fakasalalau. (Mata. 10:23) Ke fakamalosi aka te ma‵goi o polokalame konā, ne tumau eiloa a The Watch Tower mo The Golden Age (i aso nei ko te Awake!) o ‵lomi se fakasologa o fale fakasalalau, kolā e fakasalalau atu ei a muna‵tonu i te Tusi Tapu, ko te mea ke fakamalosi atu a tino talai kolā e olo atu mai fale ki fale ki tino, ke fakalogo‵logo ki lāuga kolā e fakasalalau atu i olotou fale fakasalalau. Se a te ikuga? E fai mai te Bulletin i a Ianuali 1931: “A te fakaaogaga o fale fakasalalau ko oti eiloa ne fakamalosi atu i se auala lasi ki taina kolā e talai atu mai fale ki fale. Ne avatu a lipoti e uke ki  te ofisa e uiga ki tino kolā ne fakalogo‵logo kae ona ko te fakalogo‵logo ki lāuga ne fai ne te Taina ko Rutherford, ne toka ‵lei latou o talia a tusi kolā ne ofo atu ki a latou.” Ne fakamatala mai ne te Bulletin me i fale fakasalalau mo te galuega mai fale ki fale ko “toe auala lauiloa e lua i te fakasalalauatuga o te fakapotopotoga a te Aliki.”

17, 18. E tiga eiloa e mafai o ‵fuli a fakanofonofoga, kae ne tumau pefea a te aoga o polokalame i letio?

¹⁷ I tausaga talu mai te 1930 o vau ki mua, ne gasolo aka eiloa o uke a tekemaiga ki te fakaaogaga ne tatou a fale fakasalalau. Tela la, i te fakaotiotiga o te 1937, ne fakafetai aka a tino o Ieova ki fakanofonofoga kolā ne mafuli‵fuli faeloa. Ne seki toe fakaaoga ne latou a fale fakasalalau kae ne ‵saga malosi atu latou ki te galuega talai mai fale ki fale. * E tiga te feitu tenā, ne tumau eiloa a fale fakasalalau i te faiga o se tusaga tāua ke fakasalalau atu a te fekau o te Malo ki koga ‵mao mo koga o te lalolagi kolā e mavae‵vae i mea fakapolitiki. E pelā mo te 1951 ki te 1991, ne fakasalalau atu faeloa ne se fale fakasalalau i West Berlin, i Siamani, a lāuga faka-te-Tusi Tapu ko te mea ke lagona ne tino kolā e ‵nofo atu i Siamani ki Saegala a te fekau o te Malo. E kamata mai i te 1961 kae e silia atu mo se tolusefulu tausaga, ne fakasalalau atu ne se fale fakasalalau i Suriname, i Amelika ki Saute, se polokalame telā e fakasalalau atu ei a muna‵tonu i te Tusi Tapu kae e 15 minute te leva. Mai te 1969 ki te 1977, e sili atu i te 350 o polokalame i te letio ne fakatoka ne te fakapotopotoga ke faka‵tagi atu, mai lalo o te fakasologa o te mataupu tenei “E Aoga a te Tusi Tapu Kātoa.” I te lunaite Sitete ne fakaaoga ne fale fakasalalau e 291 i sitete e 48 a polokalame a tatou. I te 1996, ne fakasalalau atu i vaiaso katoa a te polokalame telā e fakaulutala penei “Tali ki Au Fesili Mai te Tusi Tapu” i se fale fakasalalau i Apia, te laumua o te fa‵kai o se fenua i te Pasefika ki Saute, ko Samoa.

¹⁸ I te taimi ko fakaotioti ei te 20 senitenali, ne seki toe fai a fale fakasalalau mo fai te ‵toe auala tāua ke fakasalalau atu ei te tala ‵lei. Kae ne sae aka se poto fou telā ne mafai ei o fakaoko atu te fekau ki tino e tokouke ‵ki.

19, 20. Kaia ne faite aka ei ne tino o Ieova a te jw.org kae ne pefea te magoi? (Ke onoono foki ki te pokisi “ JW.ORG.”)

¹⁹ Ko te Itaneti. I te 2013, e sili atu i te 2.7 piliona o tino, toeitiiti ko te 40 pasene o te aofaki o tino i te lalolagi kātoa, e fakaaoga ne latou te itaneti. E ‵tusa mo nisi fakatautauga, e nofo pelā ki se lua piliona o tino e mafai o fakaaoga te itaneti i olotou selefoni, e pelā foki mo tablets. E tumau eiloa i te gasolo aka ki luga o te aofaki tenā i te lalolagi kātoa, kae ko te fakaaoga o te itaneti i selefoni ko gasolo vave aka eiloa ki luga i Afelika, telā e nofo ki te 90 miliona o tino e fakaaoga te itaneti i selefoni. Ko oti eiloa ne ‵fuli ne poto ‵fou konā a te auala e maua ei ne tino a fakamatalaga.

²⁰ E kamata mai i te 1997, ne fakaaoga ne tino o Ieova a te auala tenei o fesokotakiga. I te 2013, ne kamata o avanoa mai a te Web site ko te jw.org i ‵gana kāti e 300, kae ne mafai ei o  avanoa atu a fakamatalaga kolā e fakavae ki te Tusi Tapu i ‵gana e sili atu i te 520. I aso takitasi, e nofo loa ki te 750,000 o tino e āsi atu ki te site tenei ke fai‵tau ki tusi io me ke onoono ki vitio. I masina takitasi, i tafa o te onoono ki vitio, e fai ne tino a ‵kopi o tusi kātoa e miliona tupu a ‵kopi o tusi kātoa, 4 miliona a mekesini kātoa, kae e 22 miliona a ‵kopi fakalogo‵logo.

21. Ne a mea ne tauloto ne koe mai i te tala o Sina?

²¹ Ko oti eiloa ne fai a te Web site mo fai se auala magoi i te fakasalalauatuga o te tala ‵lei o te Malo o te Atua, ke oko foki loa ki fenua kolā e fakatapu i ei te ‵tou galuega talai. E pelā mo te kamataga o te 2013, ne maua ne se tagata e igoa ki a Sina a te jw.org kae ne telefoni atu ki te laumua o tatou, telā e tu i Amelika, kae fesili atu ki nisi fakamatalaga e uiga ki te Tusi Tapu. Kaia ne telefoni fakavave atu ei a ia? Ne tupu aka a Sina mai i se kāiga Musilimu kae ne nofo i se fa‵kai ‵mao i se fenua telā e tapu ‵ki eiloa te galuega a Molimau a Ieova i ei. Ona ko te telefoni tenei, ne fai a fakatokaga ke fai te akoga faka-te-Tusi Tapu a Sina fakalua i te vaiaso mo se Molimau i te Iunaite Sitete. Ne fakaaoga eiloa se polokalame i te Itaneti telā e mafai o fakaaoga i ei te vitio ke fai ei te akoga.

22, 23. (a) Kai sui aka eiloa ne nisi auala ne fakaaoga ne tatou ke talai atu ki tino e tokouke a te galuega talai mai fale ki fale? (e) Ne fakamanuia pefea ne te Tupu a ‵tou taumafaiga?

²² E seai eiloa se auala ne fakaaoga ne tatou ke oko atu ki tino e tokouke, e pelā mo te “Photo-Drama,” polokalame i fale fakasalalau, mo te Web site i te Itaneti, ne ‵tau o sui ki ei a te galuega talai mai fale ki fale. Kaia? Me ne tauloto a tino o Ieova ki te auala ne fakaasi mai ne Iesu. Ne uke atu ana mea ne fai i lō te talai atu fua ki tino e tokouke; ne saga tonu atu o fesoasoani  ki tino taki tokotasi. (Luka 19:​1-5) Ne fakamasani foki ne Iesu ana soko ke fai pen̄a, kae ne tuku atu foki ne ia se fekau ke fakaoko atu ne latou. (Faitau te Luka 10:​1, 8-11.) E pelā mo te mea ne fakamatala mai i te Mataupu e 6, ne fakamalosi atu faeloa a tino kolā e fai ne latou te takitakiga, ki tavini katoa a Ieova ke fai‵pati tonu atu ki tino taki tokotasi.​—Galu. 5:42; 20:20.

²³ I se selau tausaga mai tua ifo o te fanaumaiga o te Malo, ko silia atu nei i te 7.9 miliona o tino talai kolā ko ‵kau malosi atu ki te akoakoga o nisi tino e uiga ki fuafuaga a te Atua. E aunoa mo te fakalotolotolua, ko oti eiloa ne fakamanuia ne te Tupu a auala ne fakaaoga ne tatou ke fakasalalau atu ei te Malo. E pelā mo te mea ka fakaasi mai i te suā mataupu, ko oti foki ne tuku mai ne ia a mea faigaluega kolā e manakogina ne tatou ke fakasalalau atu te tala ‵lei ki fenua katoa, matakāiga, mo ‵gana.​—Faka. 14:6.