1, 2. (a) Ano nga pamaagi an gin-gamit ni Jesus basi mabatian han mga tawo an iya mensahe? (b) Ha ano nga paagi ginsubad han matinumanon nga mga disipulo han Kristo an iya susbaranan, ngan kay ano?

GINPALIBOTAN hi Jesus hin mga tawo ha ligid hin danaw, kondi sinakay hiya ha baluto ngan dumistansya. Kay ano? Tungod kay maaram hiya nga an iya tingog mabanda ha tubig salit madaku ito, ngan an iya mensahe mas mahibabatian han mga tawo.—Basaha an Marcos 4:1, 2.

² Mga dekada antes ngan katapos maestablisar an Ginhadian, ginsubad han matinumanon nga mga disipulo han Kristo an iya susbaranan pinaagi ha paggamit hin bag-o nga pamaagi basi ipasamwak an maopay nga sumat han Ginhadian. Ha paggiya han Hadi, an katawohan han Dios padayon nga nagamit hin bag-o nga pamaagi ha pagpahiuyon ha sitwasyon ngan ha bag-o nga teknolohiya. Karuyag naton masangyawan an damu gud nga tawo antes umabot an kataposan. (Mat. 24:14) Tagdon naton an pipira nga pamaagi nga aton ginagamit basi maabot an mga tawo, diin man hira naukoy. Hunahunaa liwat an mga pamaagi ha pagpasamwak han maopay nga sumat han kabugtoan ha naglabay ngan kon paonan-o mo ito masusubad.

3. Kay ano nga nasina an mga kaaway han kamatuoran ha aton paggamit han peryodiko?

³ Peryodiko. Iginpublikar na ni Bugto Russell ngan han iya mga kaupod an Watch Tower tikang pa han 1879 basi maipasamwak an mensahe han Ginhadian ha damu nga tawo. Kondi ha dekada antes han 1914, baga hin ginmaniobra han Kristo an mga panhitabo basi mas damu pa an mahibaro han maopay nga sumat. An sunod-sunod nga panhitabo nagtikang han 1903. Hito nga tuig, gin-ayat ni Dr. E. L. Eaton, nga tagapagyakan hin grupo han Protestante nga mga ministro ha Pennsylvania, hi Charles Taze Russell ha mga debate may kalabotan ha mga doktrina ha Biblia. Hi Eaton nagsurat kan Russell: “Nahunahuna ko nga an pagdebate ha publiko may kalabotan ha pipira nga isyu nga diri naton ginkakauyonan . . . maruruyagan gud han mga tawo.” Nahunahuna gihap ito ni Russell ngan han iya mga kaupod, salit iginpapublikar nira an mga debate ha nangunguna  nga peryodiko, an The Pittsburgh Gazette. Popular gud ito nga mga artikulo ngan makakombinse hinduro an klaro nga pagsaysay ni Russell han kamatuoran han Biblia salit nagtanyag an peryodiko pag-imprinta han mga sermon ni Russell kada semana. Sigurado nga nasina gud hito an mga kaaway han kamatuoran!

4, 5. Ano nga kalidad an iginpakita ni Russell, ngan paonan-o masusubad hadton may awtoridad ha organisasyon an iya ehemplo?

⁴ Waray pag-iha, nagtikadamu an peryodiko nga naruyag pagpublikar han mga sermon ni Russell. Han 1908, an Watch Tower nagsiring nga “onse nga peryodiko an regular” nga nagpupublikar han mga sermon. Kondi, ginsagdonan hi Russell han kabugtoan nga maaram han kahikayan ha pagpublikar nga kon iya ibalhin an opisina han Sosiedad tikang ha Pittsburgh ngadto ha mas kilala nga syudad, mas damu nga peryodiko an magpupublikar han mga sermon. Katapos turotimbangon ito ngan an iba nga butang, iginbalhin ni Russell an opisina ha Brooklyn, New York, han 1909. An resulta? Pipira la ka bulan, mga 400 nga peryodiko na an nagpupublikar han mga sermon, ngan nadugangan pa ito. Han maestablisar an Ginhadian han 1914, sobra 2,000 nga peryodiko an nagpupublikar han mga sermon ngan artikulo ni Russell ha upat nga yinaknan!

⁵ Ano nga importante nga leksyon an aton mahibabaroan tikang hito? Maopay nga subaron han may awtoridad ha organisasyon han Dios yana an pagkamapainubsanon ni Russell. Ha ano nga paagi? Kon naghihimo hin importante nga desisyon, tagda an sagdon han iba.—Basaha an Proberbios 15:22.

6. Paonan-o an kamatuoran nga nabasa han usa nga indibiduwal ha peryodiko nakaapekto ha iya?

⁶ An kamatuoran han Ginhadian nga iginpublikar ha mga peryodiko nakagbag-o ha damu. (Heb. 4:12) Usa ha ira hi Ora Hetzel nga nabawtismohan han 1917. Hiya nagsiring: “Han mag-asawa ako, binisita ako kan Nanay ha Rochester, Minnesota. Hin-abtan ko hiya nga nagpipinan-gunting hin artikulo ha usa nga peryodiko. Mga sermon adto ni Russell. Ginsumatan ako ni Nanay han iya hinbaroan tikang hito.” Ginkarawat ni Ora an kamatuoran, ngan matinumanon nga nagpasamwak han Ginhadian han Dios ha mga unom ka dekada.

7. Kay ano nga ginturotimbang utro han mga nangunguna an paggamit han peryodiko?

⁷ Han 1916, duha nga panhitabo an nag-aghat ha mga nangunguna nga turotimbangon an paggamit han peryodiko ha pagpasarang han maopay nga sumat. Siyahan, tungod han Daku nga Girra, makuri an pagkuha hin suplay para ha pag-imprinta. Hito gihap nga tuig, ginhisgotan han aton newspaper department ha Britanya ito nga problema. Ini nagsiring: “Ha pagkayana sobra 30 nga peryodiko na la an nagpupublikar han mga Sermon. Posible nga ha diri maiha, maiibanan pa gud ini tungod han pagtikamahal han papel.” Ikaduha, an kamatay ni Bugto Russell han Oktubre 31, 1916. Tungod hini, an The Watch Tower han Disyembre 15, 1916 nag-anunsyo: “Yana nga waray na hi Bugto Russell, iuundang na an pagpublikar han  mga sermon [ha mga peryodiko].” Bisan kon natapos na an paggamit han peryodiko, an iba nga pamaagi ha pagsangyaw sugad han “Photo-Drama of Creation,” padayon nga nagmalampuson.

8. Paonan-o ginhimo an “Photo-Drama of Creation”?

⁸ Pasalida. Mga tulo ka tuig nga ginhimo ni Russell ngan han iya mga kaupod an “Photo-Drama of Creation” nga siyahan nga iginpasalida han 1914. (Prob. 21:5) An Drama, sugad han tawag hito hadto, kombinasyon hin pelikula, sound recording, ngan de-kolor nga mga glass slide. Ginatos an nagpartisipar ha paghulagway han panhitabo han mga istorya ha Biblia. May mga hayop liwat nga gin-gamit. Usa nga report han 1913 an nagsiring: “Kadam-an han hayop ha usa nga daku nga zoo an gin-gamit basi maipakita ha Sine an eksena mahitungod kan Noe.” Ginatos liwat nga slide an mano-mano nga ginkoloran  han mga artist tikang ha Londres, New York, Paris, ngan Philadelphia.

9. Kay ano nga gin-gastohan hin daku nga panahon ngan kwarta an “Photo-Drama”?

⁹ Kay ano nga gin-gastohan hin daku nga panahon ngan kwarta an “Photo-Drama”? An resolusyon nga gin-uyonan ha mga serye hin kombensyon han 1913 nagsiring: “Tungod kay malampuson gud an mga peryodiko ha Amerika ha pag-impluwensya ha publiko pinaagi ha paggamit hin mga cartoon ngan drowing ha ira mga news ngan ha mga magasin, pati na an pagin sikat ngan pagin naipapahiuyon han mga pasalida ha kahimtang, nagpapakita nga mapulsanon ini, ngan natoo kami, sugad nga mga magsarangyaw ngan magturutdo han Biblia, nga angay gud namon ig-endorso an mga pelikula ngan mga stereopticon slide sugad nga epektibo ngan maopay nga paagi para ha mga ebanghelisador ngan magturutdo.”

10. Mationan-o kakalyap an pagpasalida han “Photo-Drama”?

¹⁰ Han 1914, iginpasalida an “Photo-Drama” ha 80 nga syudad kada adlaw. Haros walo ka milyon ha Estados Unidos ngan Canada an nakakita hito. Hito gihap nga tuig, iginpasalida ito ha Alemanya, Australia, Britanya, Denmark, Finland, New Zealand, Norway, Sweden, ngan Switzerland. Naghimo liwat hin ginpasimple nga bersyon nga waray pelikula para ha gudtiay nga bungto. Ito nga bersyon, an “Eureka Drama,” mas gutiay an gasto ha paghimo ngan mas masayon ibiyahe. Han 1916, an “Photo-Drama” ngan an “Eureka Drama” nahubad na ha Aleman, Armenian, Dano-Norwegian, Espanyol, Franses, Griego, Italian, Polish, ngan Swedish.

11, 12. Ano an epekto han “Photo-Drama” ha usa nga batan-on, ngan ano nga ehemplo an iya iginpakita?

¹¹ An Franses nga hubad han “Photo-Drama” daku an epekto ha 18 anyos nga hi Charles Rohner. Hiya nagsiring: “Iginpasalida ito ha amon bungto, ha Colmar, Alsace, Fransia. Ha pagtikang pa la, naimpres na ako han matin-aw nga pagpresenta han kamatuoran ha Biblia.”

¹² Sugad nga resulta, nabawtismohan hi Charles, ngan han 1922 sinulod hiya ha bug-os-panahon nga pag-alagad. Usa han iya siyahan nga toka an pagpasalida han “Photo-Drama” ha Fransia. Hiya nagsiring: “Damu an akon toka—pagtokar han biyolin, pagin accounts servant, ngan pagin literature servant. Ginhangyo liwat ako ha pagpahilom han magkirita antes magtikang an programa. Durante han intermisyon, nagtatanyag kami hin mga literatura. Usa nga bugto nga lalaki o babaye an igintutoka ha tagsa nga seksyon han katirokan. May dara hira nga mga literatura, ngan gindudulhan an kada usa ha ira seksyon. Labot pa hito, nagbutang kami hin mga lamesa nga puno hin literatura ha entrada han katirokan.” Han 1925, gin-imbitar hi Charles ha pag-alagad ha Bethel ha Brooklyn, New York. Didto, igintoka hiya pagdumara han orkestra para ha WBBR, an bag-o nga estasyon han radyo han Sosiedad. Katapos paghisgotan an kinabuhi ni Bugto Rohner, pakianhan naton an aton  kalugaringon, “Andam ba ako kumarawat hin bisan ano nga toka basi makabulig ha pagpasamwak han mensahe han Ginhadian?’—Basaha an Isaias 6:8.

13, 14. Paonan-o an radyo nakabulig ha pagpasarang han maopay nga sumat? (Kitaa liwat an mga kahon nga “ Mga Programa ha WBBR” ngan “ Makasaysayan nga Kombensyon.”)

¹³ Radyo. Ha dekada han 1920, nagluya an paggamit han “Photo-Drama,” kondi nagin importante an radyo ha pagpasarang han maopay nga sumat han Ginhadian. Han Abril 16, 1922, iginpresenta ni Bugto Rutherford tikang ha Metropolitan Opera House ha Philadelphia, Pennsylvania an iya pahayag nga siyahan nga hinbatian ha radyo. Mga 50,000 an nakabati hito nga pahayag nga may ulohan nga “Minilyon nga Nabubuhi Yana an Diri Na Gud Mamamatay.” Katapos han 1923, ha siyahan nga higayon iginbrodkast an sesyon hin kombensyon. Labot pa ha pagplete hin mga estasyon han radyo, nagdesisyon an mga nangunguna nga praktikal an pagkaada hin kalugaringon nga estasyon. Gintukod ito ha Staten Island, New York, ngan nakarehistro ha ngaran nga WBBR. Ngan han Pebrero 24, 1924, nagtikang ito ha pagbrodkast.

¹⁴ Ano an katuyoan han WBBR? An The Watch Tower han Disyembre 1, 1924 nagsiring: “Natoo kami nga an radyo amo an pinakadiri-magasto ngan epektibo nga paagi ha pagpasarang han mensahe han kamatuoran.” Katapos ito nagdugang: “Kon nakikita han Ginoo nga angayan an pagtukod hin dugang nga estasyon han radyo basi maipasamwak an kamatuoran, magtatagana hiya hin kwarta para hito.” (Sal. 127:1) Pag-abot han 1926, unom na an estasyon han radyo han katawohan ni Jehova. An duha ha Estados Unidos—WBBR ha New York ngan WORD ha hirani ha Chicago. An upat ha Canada—ha Alberta, British Columbia, Ontario, ngan Saskatchewan.

15, 16. (a) Ano an reaksyon han mga klero ha Canada ha aton paggamit han radyo? (b) Paonan-o an radyo ngan mga magasin nakabulig ha mga magwarali ha ira pagbalay-balay?

¹⁵ An pagsarang han kamatuoran han Biblia ha bulig han radyo nakita han mga klero han Kakristianohan. Hi Albert Hoffman nga maaram han nahimo han radyo ha Saskatchewan, Canada, nagsiring: “Mas nagdamu an kumilala ha mga Estudyante han Biblia [an tawag ha mga Saksi ni Jehova hadto]. Usa adto ka maopay nga pagtestigo tubtob han ginpakurian han mga klero an mga opisyal han 1928, ngan an ngatanan nga estasyon ha Canada han mga Estudyante han Biblia nawad-an hin lisensya.”

¹⁶ Bisan pa ha pagsara han aton mga estasyon han radyo ha Canada, an mga sermon ha Biblia padayon nga iginbrodkast ha komersyal nga mga estasyon. (Mat. 10:23) Basi mas mapahimulsan ito nga mga programa, makikita ha The Watch Tower ngan The Golden Age (Pagpamata! na yana) an lista han komersyal nga mga estasyon nga nagbubrodkast han kamatuoran ha Biblia basi maaghat han mga nagbabalay-balay an mga tawo nga mamati ha mga sermon ha lokal nga mga estasyon. An resulta? An Bulletin (An Aton Ministeryo ha Ginhadian na yana) han  Enero 1931 nagsiring: “Nakaaghat gud an paggamit han radyo ha kabugtoan nga nagbabalay-balay. Damu nga report nga nakarawat han opisina an nasiring nga an mga tawo namati ngan, tungod ha pakabati han mga sermon ni Bugto Rutherford, andam na gud pagkarawat han mga libro nga igintanyag ha ira.” Ginhulagway han Bulletin an pagbrodkast ha radyo ngan an pagbalay-balay nga buruhaton sugad nga “an duha nga pinakaepektibo nga paagi han pagsangyaw han organisasyon han Ginoo.”

17, 18. Paonan-o an radyo padayon nga nakabulig ha pagpasamwak han mensahe bisan han pagbag-o han sitwasyon?

¹⁷ Ha dekada han 1930, nagduro an pagkontra ha paggamit naton han komersyal nga mga estasyon. Salit pag-ikatarapos han 1937, nagpahiuyon an katawohan ni Jehova ha pagbag-o han sitwasyon. Inundang hira ha komersyal nga pagbrodkast ngan nagpokus ha pagbalay-balay. * Kondi ha pipira nga higrayo nga dapit o ha mga lugar nga masamok an politika, an radyo nagpabilin nga importante ha pagpasarang han mensahe han Ginhadian. Pananglitan, tikang han 1951 tubtob han 1991, usa nga estasyon ha West Berlin, Alemanya, an regular nga nagbrodkast han mga sermon ha Biblia basi adton nag-uukoy ha gintatawag hadto nga Este nga Alemanya makabati han mensahe. Tikang han 1961 ngan ha sobra tulo ka dekada tikang hito, usa nga nasyonal nga estasyon ha Suriname, South America, an nagbrodkast kada semana hin 15 minutos nga programa mahitungod han kamatuoran han Biblia. Tikang han 1969 tubtob han 1977, naghimo an organisasyon hin sobra 350 nga nakarekord nga programa ha radyo han serye nga “An Ngatanan nga Kasuratan Mapulsanon.” Ha Estados Unidos, mababatian an programa ha 291 nga estasyon ha 48 nga estado. Han 1996, usa nga estasyon ha Apia, an kapital nga syudad han Samoa ha South Pacific, an nagbubrodkast kada semana han programa nga “Mga Baton ha Imo mga Pakiana Mahitungod han Biblia.”

¹⁸ Ha pag-ikatarapos han ika-20 ka siglo, an radyo diri na an nangunguna nga instrumento ha pagpasarang han maopay nga sumat. Kondi usa nga bag-o nga teknolohiya an naimbento basi maabot an damu hinduro nga tawo.

19, 20. Kay ano nga an katawohan ni Jehova nagkaada jw.org, ngan ano an nagin resulta hito? (Kitaa liwat an kahon nga “ JW.ORG”)

¹⁹ Internet. Han 2013, sobra 2.7 ka bilyon tawo, haros 40 porsyento han populasyon han kalibotan, an nagamit han Internet. Sumala ha pipira nga pagbanabana, mga duha ka bilyon an may access hito ha ira mga mobile device sugad han smartphone ngan tablet. Ito nga kadamu mas nagtitikahitaas pa gud, kondi pinakadamu ha Aprika diin sobra 90 ka milyon an may koneksyon ha Internet ha ira mobile device. Ini nga pag-uswag nakagbag-o gud han paagi han pagsarang han impormasyon.

²⁰ Han 1997, nagtikang an katawohan ni Jehova paggamit hini nga paagi han komunikasyon. Han 2013 nagtikang  ma-access an jw.org nga Web site ha mga 300 nga yinaknan, ngan an mga impormasyon nga basado ha Biblia mahimo na ma-download ha sobra 520 nga yinaknan. Kada adlaw, sobra 750,000 an nag-aabri han site. Kada bulan, labot la ha pagkita hin video, sobra 3 ka milyon nga libro, 4 ka milyon nga magasin, ngan 22 ka milyon nga audio track an ginda-download.

21. Ano an imo hinbaroan tikang ha eksperyensya ni Sina?

²¹ An Web site epektibo gud nga paagi ha pagpasarang han maopay nga sumat han Ginhadian han Dios bisan ha mga lugar diin igindidiri an pagsangyaw. Pananglitan, temprano han 2013, nabilngan han usa nga lalaki nga hi Sina an jw.org nga site ngan tinawag ha headquarters ha Estados Unidos basi maghangyo hin dugang nga impormasyon mahitungod ha Biblia. Kay ano nga naiiba man adto nga tawag? Tungod kay hi Sina usa nga Muslim nga nag-uukoy ha hirayo nga baryo ha nasud diin igindidiri an buruhaton han mga Saksi ni Jehova. Sugad nga resulta hini nga tawag, ginhikay nga makag-aram hi Sina han Biblia makaduha ka beses ha usa ka semana ha bulig han usa nga Saksi ha Estados Unidos. Ginhihimo nira an pag-aram pinaagi hin Internet video service.

22, 23. (a) Makakasaliwan ba ha pagbalay-balay nga ministeryo an mga paagi nga aton gin-gamit ha pag-abot ha damu nga tawo? (b) Paonan-o ginbibendisyonan han Hadi an aton mga pangalimbasog?

²² An mga paagi nga aton gin-gamit basi madangat an damu nga tawo, sugad han peryodiko, “Photo-Drama,” radyo, ngan Web site, diri makakasaliwan han pagbalay-balay nga ministeryo. Kay ano? Tungod kay ginsusubad han katawohan ni Jehova an susbaranan ni Jesus. Labaw pa ha pagsangyaw ha damu nga  tawo an ginbuhat ni Jesus tungod kay nagsentro hiya ha pagbulig ha kada tagsa. (Luc. 19:1-5) Iya liwat ginbansay an iya mga disipulo ha pagbuhat han pariho, ngan gintagan hira hin mensahe nga isasangyaw. (Basaha an Lucas 10:1, 8-11.) Sugad han ginhisgotan ha Kapitulo 6, pirme gindadasig han mga nangunguna an tagsa nga surugoon ni Jehova nga personal nga makiistorya ha mga tawo.—Buh. 5:42; 20:20.

²³ Usa ka gatos ka tuig katapos maestablisar an Ginhadian, sobra 7.9 ka milyon nga magwarali an aktibo nga nakikigbahin ha pagtutdo mahitungod han katuyoan han Dios. Waray ruhaduha, ginbibendisyonan han Hadi an pamaagi nga aton ginagamit ha pagpasamwak han Ginhadian. An sunod nga kapitulo naghihisgot mahitungod han mga garamiton nga iya igintatagana basi maipasamwak naton an maopay nga sumat ha tagsa nga nasud, tribo, ngan pinulongan.—Pah. 14:6.