1, 2. (1) Long taem blong ol fas Kristin, ?wanem i mekem se gud nius i go long plante ples we Rom i rul long olgeta? (2) Tede, ?wanem i soemaot se Jehova i stap blesem wok blong yumi? (Yu luk pej ya “ Gud Nius Long Bitim 670 Lanwis.”)

 LONG yia 33, ol man blong defdefren ples we oli kam long lafet blong Pentekos long Jerusalem, oli sapraes tumas. ?From wanem? God i mekem wan merikel we i soemaot se hem i stap givhan long ol disaepol blong Kraes. Hem i givim paoa long ol disaepol ya we oli man Galili, blong oli toktok long ol narafala lanwis. Ol tok we oli talem, i pulum tingting blong ol man. (Ridim Ol Wok 2:1-8, 12, 15-17.) Nao ol man ya oli karem gud nius i gobak long ples blong olgeta. Ale, gud nius i kasem plante ples we gavman blong Rom i rul long olgeta.—Kol. 1:23.

² Tede, God i no mekem wan merikel blong ol man blong hem oli save toktok long ol defdefren lanwis. Nating se i olsem, ol man blong hem oli tanem gud nius blong Kingdom i go long bitim 670 lanwis. Hemia plante moa lanwis i bitim ol lanwis long lafet blong Pentekos. (Wok 2:9-11) Naoia, gud nius blong Kingdom i stap kasem olgeta ples long wol, from we ol man blong God oli wokem plante buk long ol defdefren lanwis. a Samting ya i pruvum bakegen se Jehova i stap yusum King Jisas Kraes blong i lidim wok ya blong talemaot gud nius. (Mat. 28:19, 20) Naoia bambae yumi tokbaot ol samting we yumi yusum long 100 yia we i pas, blong mekem wok ya. I gud yu makem olsem wanem King ya Jisas i trenem yumi sloslo, blong yumi givhan long ol man, mo blong yumi tijim olgeta long Baebol.—2 Tim. 2:2.

3. ?From wanem yumi yusum ol defdefren tul long wok blong prij?

³ Jisas i talem se ‘tok blong Kingdom’ i olsem sid we man i planem, mo graon we sid ya i foldaon long hem, hemia hat blong man. (Mat. 13:18, 19) Wan man blong wokem garen i gat ol defdefren tul we hem i yusum blong rerem graon, blong hem i save planem sid long hem. Long sem fasin, ol man blong Jehova oli yusum ol defdefren samting we oli olsem tul, blong rerem hat blong ol man from gud nius blong Kingdom. Sam long ol samting ya, oli yusum blong smoltaem nomo. Be sam narafala samting, olsem ol buk mo magasin, yumi stap yusum yet. Long  Japta 7, yumi tokbaot finis ol rod we ol man blong God oli yusum blong talemaot gud nius long plante man wantaem. Naoia, bambae yumi tokbaot ol samting olsem tul, we oli givhan long ol man blong God blong oli storian stret long ol man wanwan.—Wok 5:42; 17:2, 3.

4, 5. ?Oli yusum gramafon olsem wanem? ?Be gramafon i no save mekem wanem?

⁴ Gramafon. Long ol yia afta 1930 mo 1940, ol pablisa oli yusum gramafon blong prij. Oli karem i go long ol haos, blong ol man oli save harem ol tok we oli rikodem. Ol tok ya oli no bitim faef minit, mo oli gat ol sot nem, olsem “Triniti,” mo “Helfaea,” mo “Kingdom.” ?Oli yusum gramafon olsem wanem? Wan brata blong Amerika, nem blong hem Clayton Woodworth, we i baptaes long yia 1930, i talem se: “Mi mi karem wan smol bokis we i gat gramafon insaed long hem. Blong mekem gramafon i wok, man i mas tantanem handel, mo i mas muvum wan smol aean i go long stret ples, blong i stat blong toktok. Ale, taem mi kasem wan haos, mi openem bokis ya, mi muvum smol aean ya i go long stret ples blong hem, nao mi kilkilim doa. Taem man i openem doa, mi talem se, ‘Mi mi wantem talemaot wan impoten mesej long yu. Plis yu lesin long hem.’” ?Olsem wanem? ?Ol man oli lesin? Brata i talem se: “Plante man oli lesin, sam nomo oli satem doa kwiktaem. Be sam narafala oli ting se mi mi stap salem ol gramafon.”

⁵ Kam kasem yia 1940, oli rikodem moa long 90 defren sot tok, mo oli mekem bitim wan milian kopi blong olgeta. Long taem ya, Brata John E. Barr, we biaen i kam wan memba blong Hed Kampani, i stap mekem wok blong paenia long Inglan. Hem i talem se: “Long ol yia 1936 kasem 1945, gramafon i olsem fren  blong mi. Taem mi no wokbaot wetem gramafon, mi harem se mi no gat fren. Taem mi harem voes blong Brata Rutherford i kamaot long gramafon, mi mi harem gud. I olsem we hem i stap wetem mi long wok blong prij. Be wan samting nomo, trutok i no kasem hat blong ol man, from we gramafon i toktok nomo be i no tijim man.”

6, 7. (1) ?From wanem smol kad ya i gud? ?Be from wanem i no naf yet? (2) ?Jehova i stanemap wanem blong tijim ‘yumi blong toktok’?

⁶ Smol kad. Stat long yia 1933, ol pablisa oli yusum wan smol kad long wok blong prij. Kad ya i longfala olsem 12 sentimeta mo i bigwan olsem 7 sentimeta. Smol tok we i stap long kad ya i stanap long Baebol, mo i eksplenem ol buk we man i save kasem. Ale, pablisa i givim kad ya long man blong haos, mo i askem long hem blong i ridim. Wan sista we i kam misinari long Poto Riko mo Ajentina, nem blong hem Lilian Kammerud, i talem se: “Mi mi glad blong yusum smol kad ya long wok blong prij.” ?From wanem? “Plante long mifala oli no save toktok gud. Kad ya i mekem wok blong prij i isi moa.”

⁷ Brata David Reusch, we i baptaes long yia 1918, i talem se: “Kad ya i givhan long ol brata, from we plante long olgeta oli fraet se bambae oli talem wan tok we i no stret.” Be kad ya tu i no naf. Brata ya i gohed se: “Sam man oli ting se mifala i nambut. I tru, long sam fasin mifala i nambut. Be Jehova i stap rerem mifala blong go storian stret wetem ol man. Smoltaem biaen, hem i tijim mifala blong toktok. Afta long yia 1940, hem i stanemap Tiokratik Skul blong trenem mifala blong yusum Baebol long wok blong prij.”—Ridim Jeremaea 1:6-9.

8. ?Yu save mekem wanem blong letem Kraes i trenem yu?

⁸ Ol buk. Stat long yia 1914, ol man blong Jehova oli wokem 100 defren buk we oli tokbaot ol tijing blong Baebol. Sam long ol buk ya oli blong trenem ol pablisa blong oli save prij. Wan sista blong Denmak we i prij blong 70 yia, nem blong hem Anna Larsen, i talem se: “Jehova i yusum Tiokratik Skul mo ol buk blong skul ya, blong trenem mifala blong prij. Faswan long ol buk ya i kamaot long yia 1945 (Theocratic Aid to Kingdom Publishers, “God i Givhan Long Ol Man Blong Talemaot Gud Nius”). Long yia 1946, mifala i kasem wan narafala buk (“Equipped for Every Good Work,” ‘Evri Samting We Yumi Nidim Blong Mekem Gudfala Wok’). Long yia 2001, yumi kasem buk ya Tiokratik Skul i Save Givhan Long Yu Long Wok Blong God, we yumi stap yusum yet.” Tru ya, Jehova i yusum gud ol buk ya mo Tiokratik Skul, blong givhan long yumi blong yumi kam ‘naf blong mekem wok blong hem.’ (2 Kor. 3:5, 6) ?Olsem wanem? ?Yu yu putum nem blong yu finis long Tiokratik Skul? ?Yu yu stap karem buk blong Tiokratik Skul i kam long miting evri wik, blong ridim ol advaes we brata i talem? Sipos yes, yu stap letem Kraes i trenem yu blong yu kam gud moa long wok blong tijim ol man.—2 Kor. 9:6; 2 Tim. 2:15.

9, 10. ?Ol buk blong yumi oli mekem wanem wok?

 ⁹ Jehova i givhan long yumi long wan narafala rod tu. Ogenaesesen blong hem i printim plante buk blong givhan long ol pablisa blong oli eksplenem ol stamba tijing blong Baebol. Wan long ol buk ya i kamaot long yia 1968, nem blong hem, Trutok Blong Soemaot Rod Blong Itenel Laef. Long Kingdom Wok blong Novemba 1968, i talem se: “Ol oda blong Trutok buk oli plante tumas. Taswe, stat long manis Septemba, faktri blong printim ol buk long Brooklyn, i wok evri dei mo evri naet.” Hem i gohed se: “!Long manis Ogis, ol oda blong Trutok buk oli go antap bitim mak, wan milian haf antap long namba we mifala i printim!” Long yia 1982, oli printim finis 100 milian kopi blong buk ya long 116 lanwis. Long 14 yia, stat long 1968 kasem 1982, Trutok buk i givhan long bitim wan milian man, blong oli kam man blong talemaot Kingdom. b

¹⁰ Long yia 2005, wan narafala buk i kamaot blong givhan long ol man blong oli stadi Baebol, nem blong hem, ?Wanem Samting We Baebol i Rili Tijim? !Naoia, oli printim finis 200 milian kopi blong buk ya long 256 lanwis! ?Buk ya i mekem wanem wok? Long seven yia, stat long 2005 kasem 2012, buk ya i givhan long bitim wan milian man, blong oli kam man blong talemaot Kingdom. Long yia 2005, samwe long 6 milian man oli stadi Baebol. Long yia 2012, namba ya i klosap 9 milian. I klia nomo se Jehova i stap blesem hadwok blong yumi blong planem mo putum wota long ol sid blong trutok.—Ridim 1 Korin 3:6, 7.

11, 12. Folem ol vas we oli stap, ?oli wokem ol magasin blong hu?

¹¹ Ol magasin. Fastaem, oli wokem Wajtaoa blong “smol kampani” nomo, hemia ol man we God i ‘singaot olgeta’ blong oli go long heven. (Luk 12:32, NW; Hib. 3:1) Long namba 1 Oktoba 1919, ogenaesesen blong Jehova i printim wan niufala magasin blong ol man afsaed long ogenaesesen, nem blong hem Golden Age. Ol Baebol Studen mo olgeta we oli no Baebol Studen, evriwan oli laekem tumas niufala magasin ya. Taswe, oli printim plante moa Golden Age i bitim Wajtaoa, mo oli gohed olsem blong plante yia. Long yia 1937, oli jenisim nem blong Golden Age i kam Consolation. Mo long yia 1946, oli jenisim nem ya bakegen i kam Wekap!

¹² Long ol yia we i pas finis, Wajtaoa mo Wekap! i jenis smol, be wok blong tufala i no jenis. Tufala i talemaot Kingdom blong God yet, mo tufala i givhan long ol man blong oli bilif moa long Baebol. Naoia, oli wokem tu kaen Wajtaoa, wan blong stadi long kongregesen, mo narawan blong givimaot long wok blong prij. Wajtaoa blong stadi, hem i blong ‘ol man blong masta,’ hemia “smol kampani” mo “ol narafala sipsip” tu. c (Mat. 24:45, NW; Jon 10:16) Wajtaoa we yumi givimaot long wok blong prij, hem i blong ol man we oli no save trutok yet, be oli gat respek long God mo long Baebol. (Wok 13:16) Wekap! i stret long olgeta we  oli gat smol save nomo long Baebol mo long tru God, Jehova.—Wok 17:22, 23.

13. ?Wanem i mekem yu yu sapraes long ol magasin blong yumi? (Tokbaot “ Ol Buk We Ol Man Oli Printim Moa.”)

¹³ Long stat blong yia 2014, evri manis oli printim 44 milian Wekap! long 100 lanwis, mo 46 milian Wajtaoa long bitim 200 lanwis. !Hemia i mekem se tufala magasin ya i kasem moa man i bitim ol narafala magasin long wol! Yumi no sapraes long samting ya, from we ol magasin ya oli karem ol tok we Jisas i talem se bambae i go long olgeta man long wol.—Mat. 24:14.

14. ?Ol man blong God oli wok strong blong mekem wanem? ?From wanem?

¹⁴ Baebol. Long yia 1896, Brata Russell mo ol fren blong hem oli jenisim nem blong kampani we oli setemap blong printim ol buk. Oli wantem se tok ya ‘Baebol’ i stap insaed long nem ya, ale oli jenisim i kam Watch Tower Bible and Tract Society. Jenis ya i stret nomo, from we Baebol nao i bigfala samting we yumi yusum blong talemaot gud nius blong Kingdom. (Luk 24:27) Ale ol man blong God oli wok strong blong printim mo givimaot ol Baebol, mo blong pulum ol man blong oli ridim. Olsem nao, long yia 1926, oli printim Baebol ya Emphatic Diaglott, hemia Niutesteman we Benjamin Wilson i wokem finis. Stat long yia 1942, oli printim mo givimaot samwe long 700,000 kopi blong Baebol ya King James Version. Stat long yia 1944, oli printim Baebol ya American Standard Version, we nem ya Jehova i stap long hem 6,823 taem. Kam kasem yia 1950, oli givimaot 250,000 kopi blong Baebol ya.

15, 16. (1) ?Wanem samting we yu yu laekem long Baebol ya New World Translation? (Tokbaot “ Wok Blong Tanem Baebol i Hareap Moa.”) (2) ?Yu save mekem wanem blong letem tok blong Jehova i tajem hat blong yu?

¹⁵ Long yia 1950, oli printim New World Translation of the Christian Greek Scriptures (Matiu kasem Revelesen). Long yia 1961, oli printim ful Baebol (New World Translation of the Holy Scriptures). Baebol ya i leftemap nem blong God, Jehova. Oli putumbak nem ya i stap long evri ples we i bin stap long olfala Hibru hanraet (Jenesis kasem Malakae). Mo tu, oli putumbak nem ya 237 taem long Matiu kasem Revelesen. Plante taem, oli jekem bakegen Baebol ya New World Translation mo oli stretem sam samting, blong meksua se ol tok blong hem i stret mo i isi blong ridim. Long yia 2013 oli mekem sam jenis bakegen. Ale, long ol yia 1950 kasem 2013, oli printim bitim 201 milian kopi blong New World Translation long 121 lanwis, sam long olgeta oli ful Baebol mo sam oli haf nomo.

¹⁶ ?Wanem tingting blong samfala, we naoia oli save ridim New World Translation long lanwis blong olgeta? Wan man Nepal i talem se: “Plante man oli no kasem save long Baebol we mifala i gat long lanwis blong Nepal, from we i gat plante tok insaed we mifala i no moa yusum. Be mifala i kasem save gud long New World Translation, from we ol tok long hem i sem mak long ol tok we mifala i yusum oltaem.” Wan woman long Ripablik blong Sentrol Afrika i ridim New World Translation long lanwis Sango, nao wota blong ae blong hem i ron. Hem i talem se: “Hemia nao lanwis we i toktok i go stret long hat blong mi.” Sipos yumi ridim  Baebol evri dei, yumi stap letem ol tok blong Jehova i kasem hat blong yumi.—Sam 1:2; Mat. 22:36, 37.

17. ?Yu save mekem wanem blong soemaot se yu glad long trening mo ol samting we yumi kasem blong yusum? ?Wanem frut bambae i kamaot?

¹⁷ ?Olsem wanem? ?Yu yu glad long trening mo ol samting we King Jisas Kraes i givim long yumi blong yusum? Sipos yes, bambae yu tekem taem blong ridim ol buk blong yumi. Mo bambae yu yusum ol buk ya blong givhan long ol narafala. Bambae yu olsem Sista Opal Betler, we hem i baptaes long namba 4 Oktoba 1914. Hem i tokbaot laef blong hem, se: “Bifo, mi mo man blong mi [Edward], mitufala i yusum gramafon mo smol kad blong prij. Mitufala i prij long ol haos wanwan mo mitufala i givimaot ol buk mo magasin. Mitufala i joen long ol spesel wok mo wokbaot long rod blong givimaot ol smosmol traket. Afta, mifala i kasem trening blong visitim ol man bakegen, mo blong mekem Baebol stadi long olgeta. Long ful laef blong mitufala, mitufala i bisi, mo mitufala i hapi tu.” Jisas i talem finis se ol man blong hem bambae oli bisi long wok blong planem sid blong trutok mo karem kakae long garen, mo bambae oli harem gud tumas. Plante milian man mo woman, olsem Opal, oli save talem se tok ya i tru nomo.—Ridim Jon 4:35, 36.

18. ?Yumi gat wanem blesing?

¹⁸ Plante man we oli no mekem wok blong King Jisas Kraes, oli stap talem se ol man blong God ‘oli no gat nem mo oli no skulgud.’ (Wok 4:13) !Be yu traem tingbaot! !King ya i mekem ol man ya we oli no skulgud oli naf blong printim plante milian buk! !Mo sam long ol buk ya, oli tanem i go long plante moa lanwis mo oli printim plante moa long olgeta, i bitim ol narafala buk long wol! Samting we i moa impoten, se King ya i trenem yumi mo i givim strong tingting long yumi blong yusum ol samting we hem i givim, taem yumi talemaot gud nius long olgeta kantri. !Yumi gat nambawan blesing ya blong wok wetem Kraes blong planem sid blong trutok, mo blong tekemaot kakae long garen!