1, 2. (a) Ka nyi yange i wase u samber a loho u dedoo ken Tartor u Roma cii, sha shighe u mbaapostoli laa? (b) Ka nyi i tese ér sha shighe wase ne kpa Yehova ngu suen se? (Nenge ngeren u kiriki u a lu a itinekwagh ér “ Mba Pasen Loho u Dedoo ken Ijô i Hemban 670” la.)

IOR mbagenev yange ve va inya hen gar u Yerusalem, nahan kwagh er her u kpiligh ve iyol kpishi yô. Ior i Galilia lu lamen ken ijô i ken ityar igen, man kwagh u ve lu ôron la doo mba ve lu ungwan la kpishi. Lu sha iyange i Pentekosti u ken inyom i 33 la kwagh ne er ye. Mbahenen lu lamen ken ijô kposo kposo sha ivande, man kwagh ne lu ikyav i tesen ér Aôndo lu a ve. (Ôr Aerenakaa 2:1-8, 12, 15-17.) Loho u dedoo u ve pase sha iyange ne la ar a ior mba sha ajiir kposo kposo, shi shighe kar yô, u samber ken Tartor u Roma cii.—Kol. 1:23.

² Nyian ne, mbacivir Aôndo mba lamen ken ijô kposo kposo sha ivande ga. Nahan cii kpa, mba hemban pasen kwagh ken ijô kpishi a mba sha shighe u mbaapostoli la. Ve gema ityakerada i samber a loho u dedoo ken ijô i hemban er 670 nahan. (Aer. 2:9-11) Ior mba Aôndo gber ityakerada kpishi, ken ijô kposo kposo, sha nahan yô, mba samber a loho u Tartor ne sha hanma vegher sha tar cii. * Kwagh ne kpa ka ikyav i i tese wang ér Yehova ngu hemen tom wase u pasen kwagh ne sha ikyev i Tor Yesu Kristu yô. (Mat. 28:19, 20) Er se lu timen sha akaa agen a se er tom a mi u pasen kwagh ken anyom 100 a a kar ne la, ver ishima nenge er Tor la a lu tsaase se hanma shighe sha er kwagh u ior una gba se ishima, shi á taver se ishima u lun mbatesen ior Mkaanem ma Aôndo yô.—2 Tim. 2:2.

3. Er nan ve se eren tom a ikyav mbi tomov kposo kposo u pasen kwagha?

³ Yesu yange kaa ér “kwaghôron u Tartor” la ngu er ivor nahan, ishima i or di gema ngi er inya nahan. (Mat. 13:18, 19) Er orsule ka nan er tom a ikyav mbi tomov kposo kposo sha u tsôghol inya shi kahan i sha u lôôn ivor nahan, kape ior mba Yehova kpa ve eren tom a akaa kposo kposo a wasen ve u sôron asema a ior umiliôn umiliôn sha er vea ngohol loho u Tartor la je la. Akaa ne agen yange i er tom a mi sha shighe kpuaa tseegh. Kpa akaa agen er ityakerada man umagazin nahan, ka ikyav mbi tomov mbi injaav mbi se pasen kwagh a mi her yô. Igbenda i pasen kwagh i í ter ken ityough ki sha 7 la wase se u aren a ior kpishi a u zuan ishigh a ve shio, nahan kpa ikyav mbi tomov mbi i  er kwagh u mbi ken ityough kin cii yange mbi wase mbapasenkwagh u Tartor u lamen a ior ishigh a ishigh.—Aer. 5:42; 17:2, 3.

4, 5. Yange i pasen kwagh a akaaôron a i waan ken geramafon la nena, kpa kwagh ne faantyô u eren nyi ga?

⁴ Akaaôron a kuran ken icer. Ken kwavanyom u 1930 man u 1940 la, mbapasenkwagh ve kura akaaôron a Bibilo ken icer ve wa sha geramafon sha u ior ve ungwa. Akaaôron la yange a kuma miniti utaan ga. Ashighe agen akaaôron a i kuran ken icer la yange a lu a atineakaa a lihen ga, er “Triniti” man “Pugatori” man “Tartor” nahan. Yange i eren tom a icer ne nena? Anmgbian Clayton Woodworth, Jr., u yange i er un batisema ken inyom i 1930, ken tar u Amerika la kaa ér: “Yange m tôô geramafon u kiriki u lun a wainda man anwe u cuku, m kôr uwegh kura m ver sha tser la ken kpe, maa a hii u kuhwan sha inja. Yange mea za nôôr hen ya yô, m bugh geramafon la m ver, maa m kema uwegh sha hunda. Orya la nana bughun hunda yô, m kaa a nan mer, ‘M va u a loho u injaa u m soo mer ungwa yô.’” Nahan ior ve er nena? Anmgbian Woodworth kaa ér: “Ashighe kpishi ior ve lumun u ungwan. Ashighe agen di ior ve hide ve wuhe hunda ve. Ior mbagenev yange ve hen ér m ngu teen a tee geramafon.”

⁵ Ken inyom i 1940 la nahan, i kura akaaôron hemba 90 shi i er icer hemba miliôn môm. John E. Barr u yange lu eren tom pania ken Ingila hen shighe ne, shi va lu môm ken Mbahemenev mba Shin Tine la kaa ér: “Hii ken inyom i 1936 zan zan 1945 la m kenden geramafon ga. Jighilii yô, sha ayange la, m faantyô u zenden a geramafon shio ga. Yange wea ungwa ikyenge i Anmgbian Rutherford ape u lu pasen or kwagh hen hundaya u nan la tseegh kpa ishima i taver we; i lu u er ngu her nahan. Nahan cii kpa, kwaghpasen u sha geramafon ne kôron ior ken ishima ga.”

6, 7. (a) Ka mbamtsera man mbamtaver mba nyi yange ve lu ken tom u pasen kwagh a ukaade laa? (b) Yehova yange tsaase se sha nyi gbenda?

 ⁶ Ukaade mba pasen kwagh a mi. Hii ken inyom i 1933 la, i taver mbapasenkwagh ishima ér ve pasen kwagh sha uya uya a ukaade mba pasen kwagh a mi. Kaade ne yange a kehe a nôngo u kuman er ankwatakerada u se ne ripoti i kwaghpasen a mi la nahan. Yange a lu a loho u Bibilo sha mi kpuaa shi a ter ityakerada i pasen Bibilo i orya nana fatyô u zuan a mi yô. Orpasenkwagh yange nan na orya kaade la, nan kaa a nan ér nana ôr. Anmgbian u kwase Lilian Kammerud u yange va er tom u mishen ken tar u Puerto Rico man Argentina la kaa ér: “Tom u nan ior kaade u pasen kwagh la yange u doom kpishi.” Er nan ve yange soo u? A kaa ér: “Ka se cii yange se fa u pasen kwagh tsembelee ga. Nahan tom ne na yô, hoghol mo u zan hen ior.”

⁷ Anmgbian David Reusch u yange er batisema ken inyom i 1918 la kaa ér: “Ukaade mba pasen kwagh mbara yange ve wase anmgbianev, sha ci u lu anmgbianev kpishi nengen ér vea fatyô u ôron kwagh u vough a ukaade mban shio ga.” Nahan cii kpa, ukaade mban yange ve wase kpa i za bee ga. Anmgbian Reusch kaa ér: “Ashighe agen sea zua a ior mbagenev yô, ve hen ér se mba lamen ga. Man sha mimi yô, se mbagenev kpishi se gbaa nan ior ukaade mban tsô, se lamen a ve ga. Nahan kpa, Yehova lu wan se agoyol a duen za pasen ior kwagh na. Yange lu u ica a gba ga je una tsaase se, se fa u pasen ior kwagh ken Ruamabera tsembelee. Mba va hiin Makeranta u Henen Tom u Hemen u Aôndo la ken kwavanyom u 1940 la yô, i gba mi tsaase se.”—Ôr Yeremia 1:6-9.

8. Ú lumun wer Kristu a tsaase we nena?

⁸ Ityakerada. Hii ken inyom i 1914 la je, ior mba Yehova gber ityakerada atô kposo kposo hemba 100, i i tim sha atineakaa a ken Bibilo yô. Ityakerada ne igen yange i gber i sha u tsaase mbapasenkwagh sha er vea hemba fan u pasen kwagh yô. Anmgbian u kwase Anna Larsen u ken tar u Denmark, u a pase kwagh hegen i nôngo u kuman anyom 70 yô, kaa ér: “Yehova yange wase se u hemban fan u pasen kwagh sha ci u ityesen i se zua a mi ken Makeranta u Henen Tom u Hemen u Aôndo man ken ityakerada i eren makeranta ne a mi la. Takerada u hiihii u yange se zua a mi u wasen se yô, lu takerada u i gber ken inyom i 1945, i yilan u ér, Theocratic Aid to Kingdom Publishers la. Ken inyom i 1946 la i gber takerada u “Equipped for Every Good Work” la. Hegen ne se mba a takerada u Benefit From Theocratic Ministry School Education, u yange i gber ken inyom i 2001 la.” Sha mimi yô, Makeranta u Henen Tom u Hemen u Aôndo la, kua ityakerada i i eren u a mi la, wase se kpishi er Yehova a lu tsaase se ér se ‘kuma u lun mbatomov’ la. (2 Kor. 3:5, 6) We u nyôr Makeranta u Henen Tom u Hemen u Aôndo ne vee? U ve mkombo a takerada wou u Ministry School la hanma kasua, shi u bughun u u nengen ker shighe u orhemen makeranta a lu ôron kwagh ker la kpa? Aluer u ngu eren nahan yô, u ngu den wer Kristu a tsaase we, u hingir or u fan ityesen.—2 Kor. 9:6; 2 Tim. 2:15.

9, 10. Se er tom a ityakerada u lôôn ivor i mimi shi urun i nena?

 ⁹ Yehova shi wase se sha ikyev i nongo na. A na nongo ne ngu gberen ityakerada i wasen mbapasenkwagh u kaven atesen a Bibilo sha er vea pase mbagenev a yô. U tesen ikyav yô, takerada u The Truth That Leads to Eternal Life la yange u lu ikyagh ki tomough ki injaa kpen kpen. Yange i hii gberen u ken inyom i 1968 la, maa fese je hanmaor nenge tom u takerada ne er yô. Tom Wase u Tartor u Novemba 1968 kaa ér: “Yange takerada ne lu yinan a yina, je yô, ken uwer u Setemba la, i seer shighe u eren tom tugh hen ijiir i gberen ityakerada ken afishi a ken Brooklyn la.” Tom Wase u Tartor la shi kaa ér: “Yange ior pine takerada ne sha shighe ugen la, ken uwer u Agusutu je hemba ingyegh ki i gber la ken inya sha miliôn môm man tiôn!” Mba ker ken inyom i 1982 yô, i gber ukôpi mba takerada ne hemba miliôn 100 ken ijô 116. Hii ken inyom i 1968 zan zan ar ken inyom i 1982 la, ken atô u anyom 14 tseegh, takerada ne wase ior mba hemban miliôn môm nahan hingir mbapasenkwagh u Tartor er se nahan. *

¹⁰ Ken inyom i 2005 la, shi i due a ikyagh ki tomough kigenegh ki wasen se u henen Bibilo a ior yô, lu takerada u Bibilo Tese Ér Nyi Jimi? la. I hila gber ukôpi mba takerada ne mba kuman ér miliôn 200 nahan ken ijô 256! Ka nyi i due ken kwagh nee? Ken atô u anyom ataankarahar tseegh, hii ken inyom i 2005 zan zan 2012 la, ior mba kuman iyenge er miliôn 1 man dubu deri uhar nahan hingir mbapasen loho u dedoo. Ken atô u iaven ne môm, ingyegh ki ior mba se henen Bibilo a ve la mough hen miliôn ateratar yem miliôn 8 man dubu deri utaankaruhar. Sha mimi yô, Yehova ngu veren iniôngon yase i lôôn ivor i mimi u sha kwagh u Tartor, shi urun i la.—Ôr 1 Mbakorinte 3:6, 7.

11, 12. Er i pase ken avur a i nger ken akumahiange ne nahan ka unô ior nahan yange se gberen umagazin asev sha ci ve?

¹¹ Umagazin. Sha hiihii la, yange i gberen magazin u Iyoukura la jighilii sha ci u “anikyumuile u kpeghee,” u i lu mba ve lu a “kwar sha myer u a dugh sha” la. (Luka 12:32; Heb. 3:1) Sha iyange i Oktoba 1, 1919 la, nongo u Yehova due a magazin ugen u yange i gber un sha gbenda u una doo ior kposo kposo, mba se pasen ve kwagh la yô. Magazin ne yange doo Mbahenen Bibilo kua ior mbagenev ishima je, kar hemba samber a magazin u Iyoukura la, kuma anyom imôngo je. Sha hiihii la, i yilan iti i magazin la ér The Golden Age. Ken inyom i 1937 la, i gema iti la hingir Consolation. Mba va ker ken inyom i 1946 la yô, i gema yilan un ér Awake!

¹² Ken anyom a a kar ne, i gema gbenda u i gberen magazin u Iyoukura man u Awake! la, nahan kpa, awashima u umagazin mban yô, kaha ga; ka u yôôn Tartor u Yehova shi wasen ior u nan Bibilo jighjigh. Nyian ne, i gema gberen magazin u Iyoukura ne, mgber u henen ken tiônnongo kua u nan ior ken won. Iyoukura i henen ken tiônnongo la ngi sha ci u “anikyumuile u kpeghee,” kua mbara mba ve lu “iyôngo igen,” ve kohol cii ve lu “ya” la. * (Mat. 24:45; Yoh. 10:16) Iyoukura i nan ken won la di ka i gber i jighilii sha ci u mbara mba ve lu a fa mimi ga, kpa ve ne Aôndo icivir shi ve ne Bibilo kpa icivir la. (Aer. 13:16) Magazin u Awake!  la, hembe veren ishima sha mbara mba ve fe kwagh u Bibilo kua Yehova Aôndo kpishi ga la.—Aer. 17:22, 23.

13. Ka nyi i kpiligh we iyol sha kwagh u umagazin aseva? (Nenge caate i i lu a itinekwagh ér “ Ityakerada i I Gber sha Tar Yô” la.)

¹³ Ken mhii u inyom i 2014 la, hanma uwer yô, i gber ukôpi mba magazin u Awake! la hemba miliôn 44 man ukôpi mba magazin u Iyoukura la kuma er miliôn 46 nahan. I gema magazin u Awake! la ken ijô i kuman er 100 nahan; magazin u Iyoukura la di i gema un ken ijô i hemban 200. Sha nahan yô, sha tar cii i hemba geman umagazin mban ken ijô kpishi shi i hemba samber a ve a hanma magazin ugen sha tar cii! Er ityom ne i lu i kiriki ga nahan kpa, i de kpiligh se iyol ga. Umagazin mban mba a loho u Yesu yange kaa ér a pase u a tser tar cii la.—Mat. 24:14.

14. Ka nyi yange se gber shi se samber a mi, man lu sha ci u nyi?

¹⁴ Bibilo. Ken inyom i 1896 la, Anmgbian Russell man akar a na gema iti i sha tindi i ve gberen ityakerada a mi la, sha er ishember i Bibilo la kpa ia lu sha iti shon yô; sha nahan yô, i gema yilan ér, Watch Tower Bible and Tract Society. Yange i gema iti la nahan lu sha inja je, gadia ka Bibilo i lu ikyagh ki tomough ki vesen ki i eren tom a mi u̱ samber a loho u dedoo u Tartor la hanma shighe cii ye. (Luka 24:27) U zuan sha kwagh u iti la i tese la yô, ior mba Aôndo er tom sha gbashima u samber a Bibilo shi taver ior asema ér ve ôron i kpaa. U tesen ikyav yô, ken inyom i 1926 la, se gber Ruamabera u Mbakristu u ken zwa Grika u Benjamin Wilson gema la, sha akeke ase a gberen ityakerada; i yilan Bibilo ne ér, The Emphatic Diaglott. Ken mhii u inyom i 1942 la, se gber shi se samber a ukôpi mba Bibilo i King James Version la nôngo u kuman ukôpi 700,000. Anyom nga kar ahar yô, se hii u gberen Bibilo i American Standard Version i i nger iti i Yehova ker ajiir 6,823 la. Ken inyom i 1950 la nahan, se samber a Bibilo ne kuma ukôpi 250,000.

15, 16. (a) Ka nyi i doo u sha kwagh u Bibilo i New World Translation laa? (Nenge ngeren i kiriki u a lu a itinekwagh ér “ U Eren Tom u Geman Bibilo Fele Fele” la.) (b) U er nan ve Mkaanem ma Yehova ma a kôr u ken ishima?

¹⁵ Ken inyom i 1950 la, i due a mgem u Bibilo u New World Translation, Ruamabera u Mbakristu u ken zwa Grika la tseegh. Ken inyom i 1961 la, i due a Bibilo ne jimin cii. Mgem u Bibilo ne na Yehova icivir sha u hiden ngeren iti na sha ajiir a yange iti la lu ken ngeren u hiihii u Ruamabera u ken zwa Heberu la. Shi iti i Aôndo ne ngi ken Bibilo i New World Translation la kwa 237 ken Ruamabera u Mbakristu u ken Zwa Grika la. I hide i sôr Bibilo ne acin imôngo sha er ia lu vough shi ia lu ican u ôron ga yô; i mase sôron i semberee ne ken inyom i 2013. Er ken inyom i 2013 la nahan, i gber Bibilo i New World Translation ne jimin cii shin avegher a i̱, hemba ukôpi miliôn 201 ken ijô 121.

¹⁶ Mbagenev ôr Bibilo ne ken zwa ve nahan ve kaa ér nyi? Orgen ken tar u Nepal kaa ér: “Ior kpishi ka vea ôr Bibilo i tse i ken zwa Nepali la yô, i taver ve u kaven sha ci u yange i gema i ken zwa u mbangise. Kpa hegen ne ka sea ôr Bibilo yô se kav tsembelee sha ci u i nger i sha gbenda u ior ve lamen ayange ne la.” Kwase ugen ken tar u Central African Republic yange hii u ôron mgem u Bibilo i ken zwa u Sango la, maa gba vaan, kaan ér, “Ka zwa wam kpôô kpôô je ne, Bibilo ne kôrom ken ishima je zua ga.” Doo u hanma wase nana ôron Mkaanem ma Yehova hanma  iyange sha er ma a fatyô u kôron se ken ishima er kwase la nahan yô.—Ps. 1:2; Mat. 22:36, 37.

17. U tese wer u ngu a iwuese sha ikyav mbi tomov mbi i ne se shi i lu tsaase se a mi la nena, man u er nahan yô, a lu nyi ia due kere?

¹⁷ Doo u kpishi er Tor Yesu Kristu a ne se ikyav mbi tomov shi a lu tsaase se hanma shighe la kpa? U ôron ityakerada i nongo u Aôndo u gberen la, shi u eren tom a i sha u wasen mbagenev kpa? Aluer ka nahan yô, u kav er hii ve anmgbian u kwase Opal Betler, u er batisema ken uwer u Oktoba 4, 1914 la yange ôr mkaanem man yô. A kaa ér: “Ken anyom a karen la, mo vea orya wam, [Edward] se pase ior kwagh a geramafon man ukaade mba pasen kwagh a mi mbara. Shi se pase kwagh sha uya uya a ityakerada man antyakeradav kua umagazin. Se yôô angwe u Tartor sha ajiir kposo kposo, se due waaji shi se kar ior ikyatakerada i akaayôôn. Ken masejime yô, i va tese se u hiden za nengen a ior [hegen ka i yila ér, u hiden za sôron ior], shi henen Bibilo a mba i sar ve u fan mimi la sha uya vev. Se er tom ken uma wase kpishi shi se zua a msaanyol kpaa.” Yesu yange kaa ér mbadondon nav vea er tom u lôôn ivor shi sundan la kpoghuloo shi a saan ve iyol kpaa. Ior umiliôn umiliôn er Opal nahan, nenge er kwagh u Yesu yange ôr ne a lu eren mimi yô.—Ôr Yohane 4:35, 36.

18. Ka ian i civirigh i nyi se lu a mini?

¹⁸ Ior kpishi mba ve lu a hingir mbatomov mba Tor la ga yô, vea tôô ér ior mba Aôndo mba ‘ior mba fan takerada yum ga shi mba ior mba lun sha kwarkyaa kpaa ga.’ (Aer. 4:13) Kpa hen ase sha kwagh ne! Tor ne gema ior nav ve hingir mba gberen ityakerada mba zan gwa, mba ve hembe geman ityakerada ken ijô kpishi shi ve hembe samber a i a hanma nongo ugen cii yô! Kpa u hemban cii yô, a tsaase se shi ngu mgbeghan se u eren tom a ikyav mbi tomov mbin sha u samber a loho u dedoo ne, aren a ior mba ken akuraior cii. Sha mimi yô, se mba a ian i icivirigh i eren tom u lôôn ivor i mimi shi sundan mbahenen la vea Kristu imôngo!