1, 2. (a) Paonan-o nagsarang an maopay nga sumat ha bug-os nga Imperyo han Roma han siyahan nga siglo? (b) Ano an ebidensya nga ginbubuligan kita ni Jehova yana? (Kitaa an kahon nga “ Maopay nga Sumat ha Sobra 670 nga Yinaknan.”)

DIRI makatoo an mga bisita ha Jerusalem han ira hinbabatian. An mga taga-Galilea nakakayakan hin iba-iba nga pinulongan, ngan an ira mensahe nakadani ha mga mamarati. Pentekostes 33 C.E. hadto, ngan an mga disipulo milagroso nga nakakarawat han regalo ha pakayakan hin iba-iba nga yinaknan—ebidensya han bulig han Dios. (Basaha an Buhat 2:1-8, 12, 15-17.) An maopay nga sumat nga ira iginsangyaw hito nga adlaw hinbatian han mga tawo nga iba-iba an gintikangan, ngan nagsarang ito ha bug-os nga Imperyo han Roma.—Col. 1:23.

² An mga surugoon han Dios yana diri milagroso nga nakakayakan hin iba-iba nga pinulongan. Pero ginhuhubad nira an mensahe han Ginhadian ha sobra 670 nga yinaknan, mas damu gud kay han ha siyahan nga siglo. (Buh. 2:9-11) Nagpupublikar hira hin damu hinduro nga literatura ha damu nga yinaknan salit an mensahe han Ginhadian nakaabot ha ngatanan nga bahin han tuna. * Waray ruhaduha nga ebidensya ini ha paggamit ni Jehova han Hadi, hi Jesu-Kristo, ha paggiya han aton pagsangyaw. (Mat. 28:19, 20) Samtang ginhihisgotan an pipira han aton ginagamit ha pagtuman han buruhaton ha naglabay nga 100 ka tuig, tigamni kon paonan-o kita ginbabansay han Hadi basi magin interesado ha mga tawo ngan magin magturutdo han Pulong han Dios.—2 Tim. 2:2.

3. Kay ano nga nagamit kita hin magkalain-lain nga garamiton ha pagsangyaw?

³ Iginpariho ni Jesus an “pulong mahitungod han Ginhadian” ha binhi, ngan an kasingkasing han tawo ha tuna. (Mat. 13:18, 19) Sugad la nga nagamit an hardinero hin magkalain-lain nga garamiton ha paghabok han tuna ngan pag-andam hito basi matamnan hin binhi, ginagamit han katawohan ni Jehova an magkalain-lain nga garamiton basi maiandam an kasingkasing han minilyon nga mga tawo ha pagkarawat han mensahe. An pipira hito nga garamiton mapulsanon ha sulod hin limitado nga panahon. Kondi an iba, sugad han libro ngan magasin, may nagpapadayon nga kapulsanan. Diri pariho han kadam-an nga pamaagi nga  ginhisgotan ha naglabay nga kapitulo, an mga garamiton nga hihisgotan dinhi nakakabulig ha mga magwarali han Ginhadian ha ira personal nga pakiistorya ha mga tawo.—Buh. 5:42; 17:2, 3.

4, 5. Paonan-o gin-gamit an mga ponograpo, kondi ano an diri nahihimo hito?

⁴ Nakarekord nga mga pahayag. Ha mga dekada han 1930 tubtob han 1940, ginagamit an nakarekord nga Kasuratanhon nga mga sermon nga iginpapatokar ha portabol nga mga ponograpo. Waray mag-singko minutos an kaihaon han tagsa hito. Usahay haglipot an ulohan hito, sugad han “Trinidad,” “Purgatoryo,” ngan “Ginhadian.” Paonan-o ito gin-gamit? Hi Bugto Clayton Woodworth, Jr., nga nabawtismohan ha Estados Unidos han 1930, nagsiring: “Nagdadara ako hin portabol nga ponograpo nga pariho hin maleta pagkit-on, ngan naandar pinaagi hin ispring, ngan may-ada ito natuturotangtang nga burutangan hin gutiay nga dagum nga kinahanglan ko iplastar ha ligid han plaka basi tumokar. Kon aada na ako ha purtahan, gin-aabrihan ko an ponograpo, iginpaplastar an dagum ha plaka, ngan nagtitimbri ha doorbell. Pag-abri han tagbalay, nasiring ako, ‘May-ada ako dara nga importante nga mensahe nga karuyag ko nga imo hibatian.’” Ano an reaksyon? Hi Bugto Woodworth nagsiring: “Agsob nga namamati hira. Kondi usahay, ginsasara nira an purtahan. Ngan usahay kahuna nira nga namamaligya ako hin ponograpo.”

⁵ Han 1940, sobra 90 nga pahayag an iginrekord ngan sobra usa ka milyon nga plaka an ginhimo. Hi John E. Barr nga payunir ha Britanya hito nga panahon, ngan nagin membro han Nagmamando nga Lawas, nagsiring: “Han mga tuig 1936 tubtob han 1945, ponograpo an akon pirme kaupod. Ngani, diri ako komportable kon waray hito. Makapadasig gud an tingog ni Bugto Rutherford; baga hin kaupod ko la hiya. Pero syempre, an ponograpo  waray abilidad ha pagtutdo ha mga tawo ha ministeryo, waray liwat ito abilidad ha pagbantad han kasingkasing.”

6, 7. (a) Ano an mga kapulsanan ngan mga limitasyon ha paggamit hin testimony card? (b) Ha ano nga paagi “iginbubutang” ni Jehova ‘an mga pulong ha aton baba’?

⁶ Testimony card. Tikang han 1933, igin-aghat an paggamit hin testimony card ha pagbalay-balay. An testimony card mga lima ka pulgada an kahilaba ngan tulo ka pulgada an kahilapad. May halipot ito nga Kasuratanhon nga mensahe ngan diskripsyon hin Kasuratanhon nga literatura nga naibibilin ha tagbalay. Iduduhol ito han magwarali ha tagbalay ngan ipapabasa. “Naruyagan ko gud an paggamit han testimony card,” siring ni Lilian Kammerud, nga ha urhi nagin misyonera ha Puerto Rico ngan Argentina. Kay ano? “Diri ngatanan nakakahatag hin maopay nga presentasyon,” hiya siniring. “Salit nakabulig ito ha akon nga magin komportable ha pakiistorya ha mga tawo.”

⁷ Hi Bugto David Reusch nga nabawtismohan han 1918 nagsiring: “Mapulsanon gud an testimony card ha kabugtoan tungod kay pipira la an naabat nga husto an ira presentasyon.” Kondi, may mga limitasyon liwat ini. Hiya nagdugang: “Usahay, kahuna han amon kaistorya nga diri kami nakakayakan. Aw, damu ha amon an waray abilidad ha paghatag hin maopay nga presentasyon, pero igin-andam kami ni Jehova ha pag-atubang ha publiko sugad nga iya mga ministro. Waray pag-iha baga hin iginbubutang niya an mga pulong ha amon baba pinaagi ha pagtutdo ha amon ha paggamit han Kasuratan ha pagbalay-balay. Ginhimo niya ito pinaagi han Teokratiko nga Eskwelahan ha Ministeryo nga nagtikang han dekada han 1940.”—Basaha an Jeremias 1:6-9.

8. Paonan-o mo gintutugotan an Kristo ha pagbansay ha imo?

⁸ Libro. Tikang han 1914, nagpublikar an katawohan ni Jehova hin sobra 100 nga libro mahitungod han Biblia. An iba hito gindisenyo ha pagbansay ha mga magwarali nga magin epektibo nga ministro. Hi Anna Larsen nga taga-Denmark ngan mga 70 ka tuig na nga magwarali, nagsiring: “Ginbubuligan kita ni Jehova nga magin mas epektibo nga magwarali pinaagi han Teokratiko nga Eskwelahan ha Ministeryo ngan han mga libro nga espisipiko nga gindisenyo para hito. Nahinunumdoman ko nga an siyahan hito nga libro amo an Theocratic Aid to Kingdom Publishers nga iginrelis han 1945. Ginsundan ito han ‘Equipped for Every Good Work,’ nga iginpublikar han 1946. Ngan yana may-ada kita han Magpahimulos han Edukasyon Tikang ha Teokratiko nga Eskwelahan ha Ministeryo nga iginpublikar han 2001.” Waray ruhaduha nga ginagamit ni Jehova an Teokratiko nga Eskwelahan ha Ministeryo ngan an mga libro para hito basi kita magin ‘kwalipikado gud nga mga ministro.’ (2 Cor. 3:5, 6) Nakaenrol ka ba ha Teokratiko nga Eskwelahan ha Ministeryo? Gindadara mo ba an libro nga Eskwelahan ha Ministeryo ha katirok kada semana ngan ginsusundan an paramangno han eskwelahan samtang ginagamit ito? Kon oo, gintutugotan mo an Kristo ha pagbansay ha imo nga magin mas maopay nga magturutdo.—2 Cor. 9:6; 2 Tim. 2:15.

9, 10. Ha ano nga paagi nakakabulig an mga libro ha pagtanom ngan pagsaribo han mga binhi han kamatuoran?

 ⁹ Ginbubuligan liwat kita ni Jehova pinaagi ha pag-aghat han iya organisasyon ha pagtagana hin mga libro nga nagsasaysay han nangunguna nga mga kamatuoran han Biblia, pananglitan An Kamatuoran nga Nagtutungway Ngadto ha Kinabuhi nga Waray Kataposan. Siyahan nga iginpublikar ito han 1968 ngan nagkaada dayon daku nga epekto ha magbarasa. “Damu hinduro an order ha Kamatuoran nga libro,” siring han Nobyembre 1968 nga Ministeryo ha Ginhadian, “salit han Septyembre an factory han Sosiedad ha Brooklyn nagdugang hin pan-gab-i nga eskedyol ha pag-imprinta.” Ito nagsiring: “Han Agosto an order ha Kamatuoran nga libro mas hitaas hin sobra usa ngan tunga ka milyon nga kopya kay han suplay hito!” Pag-abot han 1982, sobra 100 ka milyon nga kopya hito an naipublikar ha 116 nga yinaknan. Ha 14 ka tuig, tikang han 1968 tubtob han 1982, nadugangan hin sobra usa ka milyon an magwarali han Ginhadian ha bulig han Kamatuoran nga libro. *

¹⁰ Han 2005, iginrelis an usa pa nga epektibo nga libro para ha pag-aram han Biblia, an Ano Gud ba an Igintututdo han Biblia? Mga 200 ka milyon na hito an naipublikar ha 256 nga yinaknan! An resulta? Ha sulod la hin pito ka tuig, tikang han 2005 tubtob han 2012, mga 1.2 ka milyon an nagin magwarali han maopay nga sumat. Hito gihap nga mga tuig, an kadamu han gindudumarahan hin pag-aram naghitaas tikang ha mga 6 ka milyon ngadto ha sobra 8.7 ka milyon. Oo, ginbibendisyonan ni Jehova an aton pangalimbasog ha pagtanom ngan pagsaribo han mga binhi han kamatuoran han Ginhadian.—Basaha an 1 Corinto 3:6, 7.

11, 12. Uyon ha gin-unabi nga mga teksto, para kan kanay gindisenyo an aton mga magasin?

¹¹ Magasin. Ha tinikangan, an The Watch Tower ginhimo para la ha “gutiay nga panon,” adton may-ada “langitnon nga pagtawag.” (Luc. 12:32; Heb. 3:1) Han Oktubre 1, 1919, iginpagowa han organisasyon ni Jehova an usa pa nga magasin nga gindisenyo basi maruyagan han publiko. Ito nga magasin naruyagan gud han mga Estudyante han Biblia ngan han publiko salit ha damu ka tuig mas damu an gin-iimprinta hini kay han The Watch Tower. Ito nga magasin siyahan nga gintawag nga The Golden Age. Kondi han 1937, gintawag ito nga Consolation. Katapos han 1946, nakilala ito sugad nga Awake! (Pagpamata! ha Waray-Waray).

¹² Ha damu nga dekada, damu ka beses nga nagbag-o an disenyo ngan pormat han An Barantayan ngan Pagpamata!, kondi an katuyoan hito waray magbag-o—an pagpasamwak han Ginhadian han Dios ngan an pagbulig ha iba nga magkaada pagtoo ha Biblia. Yana, An Barantayan may-ada na aradman nga edisyon ngan panpubliko nga edisyon. An aradman nga edisyon para ha “mga surugoon ha panimalay”—an “gutiay nga panon” ngan an “iba nga mga karnero.” * (Mat. 24:45; Juan 10:16) An panpubliko nga edisyon para ha diri pa maaram han kamatuoran kondi may pagtahod ha Biblia ngan ha Dios. (Buh. 13:16) Samtang an Pagpamata! para hadton gutiay la an hinbabaroan mahitungod ha Biblia ngan ha tinuod nga Dios, hi Jehova.—Buh. 17:22, 23.

13. Para ha imo, paonan-o naiiba an aton mga magasin? (Hisguti an tsart nga “ World Record han mga Publikasyon.”)

 ¹³ Ha pagtikang han 2014, sobra 44 ka milyon nga kopya han Pagpamata! ngan mga 46 ka milyon nga kopya han An Barantayan an iginpupublikar kada bulan. An Pagpamata! iginhubad ha mga 100 nga yinaknan, ngan An Barantayan ha sobra 200, salit inin duha nga magasin an may rekord nga iginhuhubad ha pinakadamu nga yinaknan ngan naipupublikar ha pinakadamu nga kopya ha bug-os nga kalibotan! Diri kita angay mahipausa hini kay ini nga mga magasin nagsusulod han mensahe nga igintagna ni Jesus nga igsasangyaw ha bug-os nga inuukyan nga tuna.—Mat. 24:14.

14. Ano an aton madasigon nga igin-aaghat, ngan kay ano?

¹⁴ Biblia. Han 1896, ginsaliwnan ni Bugto Russell ngan han iya mga kaupod an ngaran han korporasyon nga ginagamit ha pag-imprinta hin literatura basi iupod an pulong nga Biblia, salit nakilala ito nga Watch Tower Bible and Tract Society. Angayan ito nga pagbag-o kay an Biblia an aton nangunguna nga garamiton ha pagpasamwak han maopay nga sumat han Ginhadian. (Luc. 24:27) Uyon han legal nga ngaran han korporasyon, an mga surugoon han Dios madasigon nga nag-aaghat han pagpanaltag ngan pagbasa han Biblia. Pananglitan han 1926, gin-imprinta naton ha aton mga imprintahan an The Emphatic Diaglott, usa nga hubad han Kristiano Griego nga Kasuratan ni Benjamin Wilson. Tikang han 1942, nag-imprinta ngan nanaltag kita hin mga 700,000 nga kopya han bug-os nga King James Version. Paglabay la hin duha ka tuig, nag-imprinta kita han American Standard Version, diin 6,823 ka beses nga mababasa an ngaran ni Jehova. Han 1950, nakapanaltag na kita hin sobra 250,000 nga kopya hito.

15, 16. (a) Ano an imo naruruyagan mahitungod han Bag-o nga Kalibotan nga Hubad? (Hisguti an kahon nga “ Pagdagmit ha Paghubad han Biblia.”) (b) Paonan-o mo gintutugotan hi Jehova ha pagbantad han imo kasingkasing?

¹⁵ Han 1950, iginrelis ha Ingles an Bag-o nga Kalibotan nga Hubad han Kristiano Griego nga Kasuratan. Han 1961, iginrelis ha Ingles an bug-os nga Bag-o nga Kalibotan nga Hubad han Baraan nga Kasuratan. Ini nga hubad nagpapasidungog kan Jehova tungod kay an iya ngaran iginpahiuli ha husto nga hinmumutangan hito sugad han ha orihinal nga Hebreo nga Kasuratan. Mababasa liwat an ngaran han Dios hin 237 ka beses ha Kristiano Griego nga Kasuratan. Basi masiguro nga husto ito ngan masayon masabtan, pipira ka beses na nga ginrebisa an Bag-o nga Kalibotan nga Hubad, an pinakabag-o han 2013. Hito nga tuig, sobra 201 ka milyon nga kopya han bug-os nga Bag-o nga Kalibotan nga Hubad o han mga bahin hito an napublikar ha 121 nga yinaknan.

¹⁶ Ano an reaksyon han pipira nga nakabasa han Bag-o nga Kalibotan nga Hubad ha ira yinaknan? Usa nga lalaki nga taga-Nepal an nagsiring: “Para ha damu, makuri hisabtan an daan nga hubad han Biblia ha Nepalese tungod kay pormal hinduro nga pinulongan an gin-gamit hito. Kondi yana, mas nasasabtan na gud namon an Biblia kay an pinulongan nga amon ginagamit ha kada adlaw amo an ginagamit hito.” Katapos mabasa an hubad han Biblia ha Sango, usa nga taga-Central African Republic an nagtangis ngan nagsiring: “Ini an yinaknan nga nakakabantad han  akon kasingkasing.” Pariho hito nga babaye, mahimo naton tugotan hi Jehova ha pagbantad han aton kasingkasing pinaagi ha pagbasa han iya Pulong kada adlaw.—Sal. 1:2; Mat. 22:36, 37.

17. Paonan-o mo iginpapakita nga gin-aapresyar mo an mga garamiton ngan pagbansay nga imo nakakarawat, ngan ano an magigin resulta?

¹⁷ Gin-aapresyar mo ba an pagbansay ngan mga garamiton nga padayon nga igintatagana han Hadi, hi Jesu-Kristo? Naggagahin ka ba hin panahon ha pagbasa han mga literatura han organisasyon han Dios, ngan ginagamit ito ha pagbulig ha iba? Kon oo, mauyon ka kan Bugto Opal Betler nga nabawtismohan han Oktubre 4, 1914. Hiya nagsiring: “Ha damu nga katuigan, ako ngan an akon bana [nga hi Edward] naggamit han ponograpo ngan mga testimony card. Nagbabalay-balay kami gamit an mga libro, bokleta, ngan magasin. Naapi kami ha mga kampanya ngan mga parada ngan nananaltag hin nakaimprinta nga mga proklamasyon. Ha urhi, ginbansay kami ha pagbisita utro ha amon mga nakaistorya [gintatawag na yana nga pagbalik-bisita] ngan ha pagdumara hin pag-aram ha Biblia ha balay han mga interesado. Sagipo kami pero malipayon.” Hi Jesus nagsaad nga an iya mga sakop magigin sagipo ha pagsabwag, pag-ani, ngan pagkalipay. Pariho kan Opal, minilyon an makakagpamatuod nga natutuman gud ito nga saad.—Basaha an Juan 4:35, 36.

18. Ano nga pribilehiyo an aton gintatag-iya yana?

¹⁸ Mahimo hunahunaon han damu nga diri pa nagsusunod han Hadi nga an katawohan han Dios ‘ordinaryo la ngan diri edukado.’ (Buh. 4:13) Kondi hunahunaa la! Ginpahinabo han Hadi nga an iya ordinaryo nga katawohan magin daku nga paraimprinta, nga nag-iimprinta han pipira nga publikasyon nga iginhubad ha pinakadamu nga yinaknan ngan ha pinakadamu nga kopya ha bug-os nga kasaysayan! Labaw ha ngatanan, iya kita ginbabansay ngan gin-aaghat ha paggamit hini nga mga garamiton basi ipasamwak an maopay nga sumat ha ngatanan nga nasud. Daku gud nga pribilehiyo nga makaupod an Kristo ha pagtanom han binhi han kamatuoran ngan ha pag-ani hin mga disipulo!