KAPITE 8
Te ʼu Meʼa Gaue Ki Te Faifakamafola—Te ʼu Tohi Ki Te Faifakamafola ʼi Te Malamanei Katoa
1, 2. (1) ʼI te Penikosite ʼo te taʼu 33 H.T.S., kotea ʼae neʼe hoko ʼo mafola ai ia te logo lelei ʼi te Puleʼaga katoa ʼo Loma? (2) Ia ʼaho nei, kotea ʼae ʼe fakamoʼoni ai ʼe tokoni mai Sehova? (Vakaʼi te fakamatala ʼae ʼi te ʼa takai “ Te Logo Lelei Ia Lea ʼe 670 Tupu.”)
NEʼE punamaʼuli te hahaʼi ʼae neʼe ʼomai ki Selusalemi, ʼi tanatou logo ʼae ki te kau Kalilea neʼe natou popoto ʼi te palalau ʼi te ’u lea matapule. Neʼe fia logo ai te hahaʼi ki te logo ʼae neʼe natou tala. Neʼe hoko te aluʼaga ʼaia ʼi te Penikosite ʼo te taʼu 33 H.T.S., pea neʼe maʼu fakamilakulo e te kau tisipulo ia te fealagia ʼae ke natou palalau ʼi te ’u lea kehekehe. Neʼe ko te fakamoʼoni ʼaia ʼo te tokoni ʼa te ʼAtua kia natou. (Lau ia Gaue 2:1-8, 12, 15-17.) Ko te logo lelei ʼae neʼe natou fakamafola ʼi te ʼaho ʼaia, neʼe kaku ki te hahaʼi kehekehe pea mafola leva ʼi te Puleʼaga katoa ʼo Loma.—Kol. 1:23.
2 Ia ʼaho nei, ʼe mole palalau fakamilakulo te ’u kaugana ʼa te ʼAtua ʼi te ’u lea kehekehe. Kaʼe ʼe lahi age te ’u lea ʼae ʼe tala ai ia te logo lelei, he ʼe natou fakaliliu ia lea ʼe 670 tupu. (Gaue 2:9-11) Kua kaku te logo ʼo te Puleʼaga ki te ’u potu fuli ʼo te kele, ʼuhi neʼe lahi te ta e te hahaʼi ʼa te ʼAtua te ’u tohi pea ʼi te ’u lea kehekehe. * ʼE ko he fakamoʼoni ʼaia ʼe fakaʼaogaʼi e Sehova ia te Hau ko Sesu Kilisito, moʼo takitaki tatatou gaue faifakamafola. (Mat. 28:19, 20) Tou vakaʼi ʼihi meʼa gaue neʼe tou fakaʼaogaʼi moʼo fai tatatou gaue ʼaia lolotoga te ’u taʼu ʼe 100 ʼaeni kua hili. ʼE feala ke ke tokagaʼi ai pe neʼe akoʼi mamalie feafeaʼi tatou e te Hau ke tou tokoni ki te hahaʼi pea mo tana fakalotomalohiʼi tatou ke tou akoʼi ki te hahaʼi ia te Folafola ʼa te ʼAtua.—2 Tim. 2:2.
ʼE Foaki e Te Hau Ia Te ʼu Meʼa Gaue Ki Tana Hahaʼi
3. He ko ʼe ʼe tou fakaʼaogaʼi te ’u meʼa gaue kehekehe ʼi te faifakamafola?
3 Neʼe fakatatau e Sesu ia “te folafola o te puleaga” ki te pulapula pea mo te loto ʼo te hahaʼi ki te kele. (Mat. 13:18, 19) ʼE fakaʼaogaʼi e te tagata gaue kele ia he ’u meʼa gaue kehekehe moʼo fuli pea mo teuteuʼi te kele ke to ki ai te pulapula. ʼO toe feia pe, neʼe fakaʼaogaʼi e te hahaʼi ʼa Sehova ia he ’u meʼa gaue kehekehe moʼo teuteuʼi ia te loto ʼo te toko lau ʼi miliona hahaʼi ke natou tali ia te logo ʼo te Puleʼaga. Ko ʼihi meʼa gaue ʼe mole kei fakaʼaogaʼi ʼi te temi nei. Pea ko ʼihi meʼa gaue, ohage ko te ’u tohi pea mo te ’u nusipepa, ʼe kei fakaʼaogaʼi pe. Ko te ’u meʼa gaue ʼae ka tou talanoa ki ai neʼe tokoni ki te kau faifakamafola fuli ke natou palalau mo te hahaʼi ʼi ʼonatou ʼapi. ʼE mole hage ko te ʼu faʼahiga fai ʼae neʼe tou vakaʼi ʼi te kapite kua ʼosi atu.—Gaue 5:42; 17:2, 3.
Te fale ʼae neʼe faʼu ai te ʼu fakatagi feʼaveʼaki, ʼi Toronto ʼi Kanata
4, 5. Neʼe fakaʼaogaʼi feafeaʼi ia te ’u fakatagi feʼaveʼaki, kaʼe kotea te faʼahi neʼe mole feala ai ke fai e te kau faifakamafola?
4 Te ʼu akonaki neʼe puke. ʼI te ʼu taʼu 1930 ki te ʼu taʼu 1940, neʼe fakaʼaogaʼi e te kau faifakamafola ia te ʼu akonaki Fakatohi-tapu neʼe puke pea neʼe natou fakatagi ʼi te ʼu fakatagi feʼaveʼaki. Neʼe mole minuta nima ia te ʼu faʼahi ʼaia neʼe puke. ʼI ʼihi temi, neʼe nounou te ʼu kupu tafitō ʼo te ʼu akonaki, ohage la ko te “Tahitolu,” mo te “Pulekatolio” pea mo te “Puleʼaga.” Neʼe fakaʼaogaʼi feafeaʼi ia te ʼu akonaki ʼaia neʼe puke? Ko te tehina ko Clayton Woodworth Jr., ʼae neʼe papitema ʼi te taʼu 1930 ʼi Amelika, neʼe ina ui neʼe ina fakaʼaogaʼi ia te fakatagi feʼaveʼaki ʼi tana faifakamafola ʼi te ’u ʼapi pea mo ina fakatagi ia te ’u akonaki ʼaia. ʼI te avahi mai ʼo te matapa, neʼe ina ui fenei: “ ʼE feala la ke ke fakalogo ki te logo maʼuhiga ʼaeni?” Neʼe ui e te tehina neʼe tokolahi natou ʼae neʼe fakalogo, pea neʼe ʼi ai ʼihi neʼe natou pupunu tonatou matapa. Neʼe manatu e ʼihi neʼe fakatau e te tehina ia te ’u fakatagi feʼaveʼaki.
ʼI te taʼu 1940, ko akonaki kehekehe ʼe 90 tupu neʼe puke ki ni pa fakatagi ʼe tahi miliona tupu
5 ʼI te taʼu 1940, ko akonaki kehekehe ʼe 90 tupu neʼe puke ki ni pa fakatagi ʼe tahi miliona tupu. Ko te tehina ko John E. Barr, ʼae neʼe pionie ʼi Pilitania ʼi te temi ʼaia pea neʼe kau ki muli age ʼi te Kolesi Pule, neʼe ina ui fenei: “Lolotoga te taʼu 1936 ki te taʼu 1945 neʼe au gaue tuʼumaʼu pe mo taku fakatagi feʼaveʼaki. Neʼe maʼuhiga kia au ʼi te temi ʼaia. He ʼe ko taku logo ʼae ki te leʼo ʼo te tehina ko Rutherford ʼi te ’u muʼa matapa, neʼe fakalotomalohiʼi ai au, neʼe hage pe neʼe ma kaugā gaue. ʼE mahino ia, ʼi tamatou fakaʼaogaʼi ia te ’u fakatagi feʼaveʼaki neʼe mole feala ai ke matou akoʼi te hahaʼi, ke malave te logo ki ’onatou loto.”
6, 7. (1) Neʼe kotea te ’u lelei pea mo te ’u toto ʼo te fakaʼaogaʼi ʼo te ’u kate faifakamafola? (2) Neʼe akoʼi feafeaʼi tatou e Sehova ke tou poto palalau?
6 Te ʼu kate faifakamafola. ʼO kamata ʼi te taʼu 1933, neʼe fakalotomalohiʼi ia te kau faifakamafola ke natou fakaʼaogaʼi ia te ʼu kate faifakamafola ʼi te ʼu ʼapi. Neʼe ko te ʼu kiʼi kate neʼe tohi ai te logo Fakatohi-tapu nounou pea mo te ʼu tohi ʼae neʼe feala ke kole e te hahaʼi. Neʼe fakaha e te tehina ia te kate ʼaia ki he tahi pea mo kole age ke ina lau. Ko te tuagaʼane ko Lilian Kammerud, ʼae neʼe misionea ki muli age ʼi Porto Rico pea mo Argentine, neʼe ina ui fenei: “Neʼe au leleiʼia te gaue ʼaki te ’u kate faifakamafola.” Kotea tona tupuʼaga? Neʼe ina ui fenei: “Neʼe mole matou faʼa popoto ʼi te fai ʼo he ’u ʼuluaki palalau ʼe lelei. Koia, ʼaki te ’u kate ʼaia, neʼe au ako ai pe feafeaʼi haku kamata palalau mo te hahaʼi.”
Te kate faifakamafola (ʼi te Fakaitalia)
7 Ko te tehina ko David Reusch, ʼae neʼe papitema ʼi te taʼu 1918, neʼe ina ui fenei: “Neʼe tokoni te ’u kate faifakamafola ki te ’u tehina, koteʼuhi neʼe natou manatu ʼe mole natou poto palalau.” Kaʼe neʼe ʼi ai pe te ’u toto ʼaki te fakaʼaogaʼi ʼo te ’u kate ʼaia. Neʼe ui fenei e te tehina ko Reusch: “ ʼI ʼihi temi, neʼe matou felaveʼi mo ni hahaʼi neʼe natou manatu ʼe mole matou popoto ʼi te palalau. ʼE moʼoni, tokolahi ia matou neʼe mole poto palalau. Kaʼe neʼe teuteuʼi matou e Sehova ke matou palalau ki te hahaʼi. Mole tuai pea neʼe akoʼi matou ke matou palalau pea mo fakaʼaogaʼi ia te Tohi-Tapu ʼi te ’u matapa. Neʼe ina akoʼi matou ʼaki te Ako Fakateokalatike ʼae neʼe kamata ʼi te ’u taʼu 1940.”—Lau ia Selemia 1:6-9.
8. ʼE lava feafeaʼi hau tuku ke akoʼi koe e Kilisito?
8 Te ʼu tohi. Talu mai te taʼu 1914, neʼe fai e te hahaʼi ʼa Sehova te ’u tohi Fakatohi-tapu kehekehe ʼe 100 tupu. Neʼe fai tafitō ʼihi tohi ke liliu ʼo faiva ia te kau faifakamafola. ʼI Danemark ko Anna Larsen, ʼae kua taʼu 70 tupu tana faifakamafola, neʼe ina ui fenei: “Neʼe tokoni mai ia Sehova ke tou faiva ʼi te faifakamafola, ʼaki te Ako Fakateokalatike pea mo te ’u tohi ʼae neʼe fakaʼaogaʼi ki te ako ʼaia. ʼE au manatuʼi, ko te ʼuluaki tohi ʼae neʼe matou fakaʼaogaʼi ko te tohi Aide théocratique pour les proclamateurs du Royaume, neʼe ta ʼi te taʼu 1945. Neʼe hoa ki ai te tohi “Équipé pour toute bonne œuvre,” neʼe ta ʼi te taʼu 1946. Pea ʼi te temi leva ʼaeni, ʼe ko te tohi Tirez profit de l’École du ministère théocratique, neʼe ta ʼi te taʼu 2001.” ʼE mahino ia, neʼe fakaʼaogaʼi e Sehova ia te Ako Fakateokalatike pea mo te ’u tohi ʼaia moʼo “teuteui [tatou] ke [tou] liliu ko ni tagata gaue.” (2 Ko. 3:5, 6) ʼE ke kau koa ki te Ako Fakateokalatike? ʼE ke haʼu koa mo tau tohi École du ministère ki te fono ʼo te vahaʼa pea mo muliʼi te ’u tokoni ʼae ʼe fakatafito ki ai e te taupau ki te ako? Kapau koia, pea ʼe ke tuku ia Kilisito ke ina akoʼi koe ke lelei age tau faiako.—2 Ko. 9:6; 2 Tim. 2:15.
9, 10. ʼE tou fakaʼaogaʼi feafeaʼi te ’u tohi moʼo to pea mo fakavai ia te pulapula ʼo te moʼoni?
9 Neʼe toe tokoni mai ia Sehova ʼaki te foaki e tana kautahi ia te ’u tohi ke feala ki tana kau faifakamafola ke natou *
fakamahino ia te ’u akonaki tafitō ʼo te Tohi-Tapu. Neʼe ʼaoga lahi ia te tohi La vérité qui conduit à la vie éternelle. Neʼe ʼuluaki ta ʼi te taʼu 1968 pea neʼe ha atu aipe ia tona fua lelei. Neʼe ui fenei ʼi Te Minisitelio ʼo Te Puleʼaga ʼo Novepeli 1968: “Neʼe lahi ʼaupito te fakaui ʼo te tohi Vérité, koia neʼe tonu ke gaue te fale ta tohi ʼo te Sosiete ʼae ʼi Brooklyn ʼi te poʼuli.” Neʼe hoko atu fenei: “ ʼI te mahina ʼo ʼAukusito, neʼe mole feʼauga te ’u tohi Vérité. Neʼe kei ʼaoga ke ta te ’u tohi ʼe tahi miliona tupu!” ʼI te taʼu 1982, ko tohi ʼe 100 miliona tupu neʼe ta ia lea ʼe 116. Ia taʼu ʼe 14, mai te taʼu 1968 ki te taʼu 1982, ʼaki te tokoni ʼo te tohi Vérité, ko te toko tahi miliona tupu neʼe liliu ko he kau faifakamafola ʼo te Puleʼaga.10 ʼI te taʼu 2005, neʼe ta te tahi tohi moʼo fakaʼaogaʼi ki te ʼu ako Tohi-Tapu. Neʼe ko te tohi Koteā ’Aē ʼe Akoʼi Moʼoni Mai ʼi Te Tohi-Tapu? Ko tohi ʼe 200 miliona tupu kua ʼosi ta ia lea ʼe 256. Pea kotea tona fua? Ia taʼu ʼe fitu, mai te taʼu 2005 ki te taʼu 2012, ko te teitei toko 1 miliona luageau afe kua liliu ko he kau faifakamafola ʼo te logo lelei. Neʼe kaugā malie ia natou ʼae neʼe natou ako ia te Tohi-Tapu, ko te toko 6 miliona ʼi te taʼu 2005 pea ko te toko 8 miliona fitugeau afe tupu ʼi te taʼu 2012. ʼE mahino papau ia, ʼe tapuakiʼi e Sehova ʼatatou faiga ʼae ke tou to pea mo fakavai te pulapula ʼo te moʼoni.—Lau ia 1 Kolinito 3:6, 7.
11, 12. ʼO mulimuli ki te ’u vaega Tohi-Tapu ʼo te ʼu palakalafe ʼaeni, neʼe fakatuhatuha kia ai ʼatatou nusipepa?
11 Te ʼu nusipepa. ʼI te kamata, neʼe fai tafitō te nusipepa Te Tule Leʼo maʼa te “kii fagaovi,” natou ʼae ʼe “kau ki te pauʼi ʼae mai lagi.” (Luka 12:32; Hep. 3:1, MN) ʼI te ʼaho 1 ʼo Oketopeli 1919, neʼe ta e te kautahi ʼa Sehova ia te tahi nusipepa, neʼe fakahagahaga tafitō leva ia ki te hahaʼi. Neʼe leleiʼia e te Kau Ako ʼo Te Tohi-Tapu pea mo te hahaʼi ia te nusipepa ʼaia. Koia, lolotoga ni taʼu neʼe lahi age te ta ʼo te nusipepa ʼaia ʼi Te Tule Leʼo. Ko te nusipepa ʼaia neʼe ʼuluaki higoa ko te L’Âge d’Or. ʼI te taʼu 1937, neʼe fetogi ʼo fakahigoa ko te Consolation. Pea ʼi te taʼu 1946, neʼe fakahigoa leva ko te Réveillez-vous !
12 ʼAki te temi, neʼe fetogi ia te agaaga fai ʼo Te Tule Leʼo pea mo te Réveillez-vous ! Kaʼe neʼe mole fetogi ia te fakatuʼutuʼu ʼo te ’u nusipepa ʼaia, ʼae ko te tala ia te Puleʼaga ʼo te ʼAtua pea mo fakamalohi ia te tui ki te Tohi-Tapu. Ia ʼaho nei, ʼo ʼuhiga mo Te Tule Leʼo, ʼe maʼu ia te nusipepa ki te ako pea mo te nusipepa ki te tufa. ʼE fai ia te nusipepa ki te ako maʼa te “hahai” ʼa te tagata pule, ʼae ʼe kau ki ai te “kii fagaovi” pea mo “ihi ovi,” ʼae ko te tahi ʼu ovi. * (Mat. 24:45; Soa. 10:16) Ko te nusipepa ki te tufa ʼe fai tafitō kia natou ʼae heʼeki natou iloʼi ia te moʼoni kaʼe ʼe natou fakaʼapaʼapa ki te Tohi-Tapu pea mo te ʼAtua. (Gaue 13:16) Pea ʼe fakahagahaga ia te Réveillez-vous ! kia natou ʼae ʼe mole natou faʼa iloʼi ia te Tohi-Tapu pea mo te ʼAtua moʼoni, ia Sehova.—Gaue 17:22, 23.
13. Kia koe, kotea ʼae fakaofoofo ʼo ʼuhiga mo ʼatatou nusipepa? (Vakaʼi te pakī “ Te ʼu Tohi ʼAe Neʼe Laka Tona Ta.”)
13 ʼI te kamata ʼo te taʼu 2014, neʼe ko Réveillez-vous ! ʼe 44 miliona tupu pea mo Tule Leʼo ʼe 46 miliona tupu ʼae neʼe ta ʼi te mahina fuli. Ko te Réveillez-vous ! neʼe fakaliliu ia lea ʼe 100 tupu, pea ko Te Tule Leʼo ia lea ʼe 200 tupu. Ko te ’u nusipepa ʼaia ʼe lua ʼae ʼe lahi tokotahi tona fakaliliu pea mo tona tufa ʼi te kele. ʼE mole tou punamaʼuli ki ai. ʼE tuʼu ʼi te ’u nusipepa ʼaia ia te logo ʼae neʼe ui e Sesu ʼe tonu ke fakamafola ʼi te kele katoa.—14. Kotea ʼae neʼe fakamaʼuhigaʼi e te ’u kaugana ʼa te ʼAtua, pea kotea tona tupuʼaga?
14 Te Tohi-Tapu. ʼI te taʼu 1896, neʼe fetogi e te tehina ko Russell pea mo ʼona kaugā gaue ia te higoa ʼo tanatou sosiete ta tohi. Neʼe natou loto ke maʼu ai te kupu Tohi-Tapu (Bible). Koia neʼe higoa leva ia ko te Watch Tower Bible and Tract Society. Neʼe tuha ia te fetogi ʼaia koteʼuhi ʼe ko te Tohi-Tapu ia te meʼa gaue ʼae ʼe tou fakaʼaogaʼi tuʼumaʼu moʼo fakamafola ia te logo lelei ʼo te Puleʼaga. (Luka 24:27) ʼO mulimuli ki te higoa ʼaia, neʼe fakama’uhiga’i e te ’u kaugana ʼa te ʼAtua ia te tufa pea mo te lau ʼo te Tohi-Tapu. Ohage la, ʼi te taʼu 1926, neʼe ta ʼi ʼatatou masini ta tohi ia te Tohi-Tapu The Emphatic Diaglott, neʼe ko te Koga Tohi-Tapu Fakakeleka neʼe fakaliliu e te tagata ko Benjamin Wilson. ʼO kamata ʼi te taʼu 1942, neʼe ta pea mo tufa te ’u Tohi-Tapu ʼe 700 000 ʼae ʼe higoa ko te King James Version. Hili ki ai taʼu ʼe lua, neʼe kamata ta ia te Tohi-Tapu American Standard Version, ʼae neʼe tuʼu ai ia te huafa ʼo Sehova tuʼa 6 823. ʼI te taʼu 1950, neʼe tufa te ʼu Tohi-Tapu ʼaia ʼe 250 000 tupu.
15, 16. (1) Kotea ʼae ʼe ke leleiʼia ʼi te Tohi-Tapu Traduction du monde nouveau? (Vakaʼi te fakamatala ʼae ʼi te ʼa takai “ Te Tuputupu Vave ʼo Te Fakaliliu ʼo Te Tohi-Tapu.”) (2) Kotea ʼae ʼe feala ke ke fai ke malave ki tou loto ia te ʼu folafola ʼa Sehova?
15 ʼI te taʼu 1950, neʼe ta ia te Tohi-Tapu Les Écritures grecques chrétiennes — Traduction du monde nouveau. (Fakapilitania) Pea ʼi te taʼu 1961, neʼe ta ia te Tohi-Tapu katoa Les Saintes Écritures. Traduction du monde nouveau. (Fakapilitania) Neʼe fakakololiaʼi e te Tohi-Tapu ʼaia ia Sehova, he neʼe toe tohi tona huafa ʼi te ’u vaega ʼae neʼe maʼu ai ʼi te Fakahepeleo. ʼE toe ha ia te huafa ʼo te ʼAtua tuʼa 237 ʼi te Koga Tohi-Tapu Fakakeleka. Ke totonu pea mo mahino gafua ia te Traduction du monde nouveau, neʼe toe vakaʼi tuʼa lahi pea neʼe fai fakamuli ʼi te taʼu 2013. ʼI te taʼu ʼaia, neʼe ko Tohi-Tapu Traduction du monde nouveau ʼe 201 miliona tupu ʼae neʼe ta katoa peʼe fakakoga ia lea ʼe 121.
16 Neʼe feafeaʼi ʼihi ʼi tanatou lau ia te Tohi-Tapu Traduction du monde nouveau ʼi tanatou lea? Ko te tagata mai Népal, neʼe ina ui fenei: “Neʼe faigataʼa maʼa te tokolahi tanatou mahino ki te Tohi-Tapu ʼafeā Fakanépal, koteʼuhi ʼe fakaʼaogaʼi ai ni kupu faigataʼa. Kaʼe ʼi te temi nei, kua tou mahino lelei age ki te Tohi-Tapu, he ʼe fakaʼaogaʼi ai ni kupu ʼe tou mahino ki ai.” ʼI te kamata lau e te fafine ʼi République centrafricaine ia te Tohi-Tapu ʼaia ʼi te lea Sango, neʼe kamata tagi pea neʼe ina ui fenei: “ ʼE malave ki toku loto he ʼe kua tohi ʼi taku lea.” Ohage ko te fafine ʼaia, ʼe feala kia tatou takitokotahi ke malave ki totatou loto ia te ’u folafola ʼa Pes. 1:2; Mat. 22:36, 37.
Sehova, moka tou lau ʼi te ʼaho fuli ia te Tohi-Tapu.—Tou Lotofakafetaʼi Ki Te ʼu Meʼa Gaue Pea Mo Totatou Akoʼi
17. ʼE feafeaʼi hau fakaha tau lotofakafetaʼi ki te ’u meʼa gaue pea mo totatou akoʼi? Kotea anai tona fua moka ke fai te faʼahi ʼaia?
17 ʼE ke leleiʼia koa te ’u meʼa gaue pea mo te akoʼi ʼo tatou e te Hau ko Sesu Kilisito? ʼE ke toʼo koa he temi ke ke lau ai te ’u tohi ʼae ʼe ta e te kautahi ʼa te ʼAtua, pea mo ke fakaʼaogaʼi moʼo tokoni ki ʼihi? Kapau koia, pea ʼe ke manatu tahi anai mo te tuagaʼane ko Opal Betler, ʼae neʼe papitema ʼi te ʼaho 4 ʼo Oketopeli 1914. Neʼe ina ui fenei: “ ʼAki te alu ʼo te temi, neʼe au fakaʼaogaʼi mo toku ʼohoana [ia Edward] te fakatagi feʼaveʼaki pea mo te ’u kate faifakamafola. Hili ʼaia, neʼe ma faifakamafola ʼi te ’u ʼapi, ʼaki te ’u tohi, mo te ’u kiʼi kaupepa pea mo te ’u nusipepa. Neʼe ma lagolago ki te ʼu tufa mo te faifakamafola ʼaki te ʼu pano, pea mo tuku ki te hahaʼi te ’u pepa lotu. Pea ki muli age, neʼe akoʼi maua ki te fai ʼo te ’u ʼaʼahi pea mo te ’u ako Tohi-Tapu. Neʼe ma maʼumaʼua pea mo fiafia ʼi toma maʼuli.” Neʼe fakapapau e Sesu ʼe maʼumaʼua anai tana hahaʼi fakalogo, he ʼe natou to, mo utu pea mo fakafiafia fakatahi. Ko te toko lau ʼi miliona ohage ko Opal, ʼe natou fakamoʼoni ki te hoko ʼo te fakapapau ʼaia.—Lau ia Soane 4:35, 36.
18. Kotea te pilivilesio ʼe tou maʼu?
18 Tokolahi ʼe mole heʼeki natou kaugana ki te Hau, ʼe lagi natou manatu ko te hahaʼi ʼa te ʼAtua ʼe ko “he u tagata . . . nee mole ako.” (Gaue 4:13) Kaʼe ʼe feala ke ke tokagaʼi, neʼe haga ia te Hau ʼo akoʼi tana hahaʼi ke natou liliu ko he kau faifakamafola malolohi, pea mo natou tufa ia te ’u tohi ʼae ʼe lahi tokotahi tona fakaliliu pea mo tona tufa. Pea ko te faʼahi ʼae ʼe maʼuhiga age, neʼe ina akoʼi pea mo uga tatou ke tou fakaʼaogaʼi te ’u meʼa gaue ʼaia moʼo fakamafola ia te logo lelei ki te hahaʼi ʼo te ’u fenua fuli. ʼE ko he toe pilivilesio lahi ʼe tou maʼu, he ʼe tou kaugā gaue mo Kilisito ʼi te to ʼo te pulapula ʼo te moʼoni pea mo fai ni tisipulo!
^ pal. 2 ʼI te ’u taʼu pe ʼaeni ʼe hogofulu kua hili, neʼe ta e te hahaʼi ʼa Sehova ia tohi Fakatohi-tapu ʼe 20 miliale tupu. ʼO hilifaki atu ki ai, ko te teitei toko 3 miliale ʼi te malamanei ʼe feala ke natou olo ki totatou tuʼasila ʼi te Neti, te jw.org.
^ pal. 9 Neʼe fakaʼaogaʼi te tahi age ’u tohi ki te ’u ako Tohi-Tapu, ohage la ko te tohi La Harpe de Dieu (neʼe ta ʼi te taʼu 1921), mo te tohi “Que Dieu soit reconnu pour vrai !” (neʼe ta ʼi te taʼu 1946), mo te tohi E Feala Keke Mauli O Heegata Ite Palatiso Ite Kele (neʼe ta ʼi te taʼu 1982) pea mo te tohi Te ’Atamai Mālama ’Aē ’e Ina Taki Ki Te Ma’uli He’egata (neʼe ta ʼi te taʼu 1995).
^ pal. 12 Vakaʼi Te Tule Leʼo ʼo te ʼaho 15 ʼo Sulio 2013, ʼi te pasina 23, palakalafe 13, ʼae ʼe talanoa ai ki tatatou mahino foʼou ʼo ʼuhiga mo te “hahai” ʼa te tagata pule.