1, 2. (a) Ongwaye ovahongewa vaJesus tji va himinwe? (b) Jesus aa hungire ohunga nomakondero yeṋe?

 OVAHONGEWA vaJesus va himinwe indu Jesus tje ve raera kutja, “Tareye nawa komahi womakunino; ovikunwa vya hapa nu vi ri pokukondwa!” Owo va tara koṋa Jesus kaa urike posi yokutja va muna kutja omahi womakunino kaya ri aya hora. Owo ngahino aave ripura kutja, ‘omakondero waye Jesus ngu ma hungire? Ngunda ku norure omakondero okuya.’—Joh. 4:35.

² Posi yokutja Jesus kaa hungire ohunga nomakondero wovikunwa. Nungwari eye aa ungurisa oruveze ndwi okuhonga ovahongewa ve omapu yevari omananḓengu ohunga nomakondero wovandu. Nu hapo omapu yeṋe ngo? Okutjiwa omapu ngo, ngatu konḓonone ehungi ndi nawa.

3. (a) Mape ya otjikeṋa tji tja hinga Jesus okutja, “Tareye nawa komahi womakunino; ovikunwa vya hapa nu vi ri pokukondwa”? (Tara koviweziwako.) (b) Jesus wa kahurura vi omambo we ngo?

³ Jesus tjaa hungire ku novahongewa ve ya ri pomaandero wombura ndji 30 meṋe yotjihuro tjaSamaria hi Sikar. Ngunda ovahongewa ve ava i motjirongo, Jesus wa sewa kombunda pondjombo pa uta okuhungira ohunga nouatjiri ku nomukazendu ngwa hakahana okumuna ounanḓengu woviṋa eye mbyaa hongwa. Indu ovahongewa tji va kotoka ku Jesus, omukazendu wa hakahana okuyenda koSikar okukaraera ovararanganda ve ohunga noviṋa oviwa mbya hongwa. Oviṋa omukazendu mbya hungira vya nana ombango, nu ovararanganda ve va hakahana okuyenda kondjombo okukahakaena kuna Jesus. Ngahino moiri ndjo indu Jesus tjaa tara kokure eye wa muna otjimbunda tjOvasamaria ama tji wondjo, na tja: “Tareye nawa komahi womakunino; ovikunwa vya hapa nu vi ri pokukondwa!” Okuzambo, okukahurura kutja kaa hungire ohunga nomakondero wovikunwa, nungwari aa hungire ohunga nomakondero wovandu, Jesus wa tja: ‘Ingwi ngu ma kondo ma nikorere omuinyo waaruhe ovinikora.’—Joh. 4:5-30, 36.

4. (a) Jesus wa honga omapu yevari yeṋe ohunga nomakondero? (b) Omapuriro yeṋe ngu matu kahungirira ko?

⁴ Omapu yeṋe yevari omananḓengu ohunga nomakondero wovandu Jesus ngaa hongo? Etenga, oviungura mbi vi hepa okuungurwa tjimanga. Omambo we wokutja ‘momahi womakunino ovikunwa vya hapa nu vi ri pokukondwa’ ya  ri oyokuhinga ovemukongorere kutja ve toorere ko omikambo. Okuraisira ovahongewa ve kutja otjiungura hi tji nohakahana pu pe ṱeki pi, Jesus wa weza na tja: “Ingwi ngu ma kondo ma munu ondjambi.” Pu mape hee kutja omakondero ya uta rukuru, kapa ri oruveze rwokuwomba! Oritjavari, ovaungure ve nondjoroka. Jesus wa tja: Ovakune novakonde mave ‘nyanda omitima.’ (Joh. 4:35b, 36) Tjimuna Jesus omuini tja ri nondjoroka tja muna ‘Ovasamaria ovengi mba kambura mu ye,’ ovahongewa ve wina mave kara nondjoroka onene otja tji mave ungura otjiungura tjomakondero nomitima vyawo avihe. (Joh. 4:39-42) Ehungi nda hungirwa meserewondo etenga ri nomaheero omananḓengu tjinene ku eṱe, orondu ri tu raisira oviṋa mbi tjitwa ndino, moruveze rwomakondero wovandu omanenenene. Omakondero woruveze rwetu ya uta ruṋe? Oowaṋi mbe norupa mu wo? Kwa kongorera tjike?

5. Owaṋi ngu hongorera otjiungura tjomakondero mouye auhe, nu otjirimunikise Johanes tja muna tji raisa vi kutja oviungura mbi vi nohakahana?

⁵ Motjirimunikise omuapostele Johanes tja muna, Jehova wa tjiukisa kutja wa zika Jesus okurira omuhongore wotjiungura tjomakondero wovandu mouye auhe. (Lesa Omavandururiro 14:14-16.) Motjirimunikise hi, Jesus wa raisiwa otja ngu nekori rouhona notjikonde. ‘Ekori rouhona rongoldo kotjiuru’ tjaJesus ri raisa otjihako tje otjOmbara ndji honapara. ‘Otjikonde otjitwe meke re’ tji kuramena po otjiungura tje otjOmukonde. Indu Jehova tja hungira okupitira momuengeli kutja ‘omakondero wehi ya horo,’ eye wa ṋunisa kutja oviungura mbi vi hepa okuungurwa tjimanga. Ii, otjiperi kutja “oruveze rwomakondero rwe ya,” okutja kape noruveze rwokuwomba! Okutoorera ko omikambo kerakiza raMukuru ‘rokuungurisa otjikonde,’ Jesus wa twa otjikonde tje kehi nu omakondero wovandu kombanda yehi arire tji ya utwa. Otjirimunikise tjapeke hi matji tu zemburukisa rukwao kutja ‘momahi womakunino ovikunwa vya hapa nu vi ri pokukondwa!’ Hapo otjirimunikise hi matji tu vatere okutjiwa kutja otjiungura tjomakondero mouye auhe tja uta ruṋe poo indee? Ii, tjinene!

6. (a) “Oruveze rwomakondero” rwa uta ruṋe? (b) ‘Omakondero wehi’ ya uta ruṋe? Kahurura.

⁶ Mena rokutja otjirimunikise Johanes tja muna mOmavandururiro ekondwa 14 matji raisa Jesus otjOmukonde, a zara ekori rouhona (mezeva 14), otjiraisiro tjokutja eye wa zikwa rukuru otjOmbara mombura ndji 1914. (Dan. 7:13, 14) Oruveze oruṱiṱi kombunda yanao, Jesus wa rakiziwa kutja nga ute nomakondero. (mezeva 15). Ongongorasaneno yovitjitwa otjingeyo i munika mehungi raJesus ohunga nomakondero wovikokotwa, eye pa tja: “Omakondero owo omaandero wouye.” Okutja, oruveze rwomakondero noruveze rwomaandero wouye mbwi twa utira tjimwe, mombura ndji 1914. Kombunda ‘moruveze rwomakondero,’ omakondero oyeniyeni otji ya uta. (Mat. 13:30, 39) Tji twa tara kombunda kaṱiṱi okuza koruveze mu tu hupa nai, matu yenene okumuna kutja omakondero ya uta ozombura ozonḓiṱi  kombunda yaJesus tja uta okuhonapara otjOmbara. Rutenga, okuza kombura ndji 1914 nga komautiro wombura ndji 1919, Jesus wa ungura otjiungura tjomakohororero mokati kovakongorere ve ovatwirisiwa. (Mal. 3:1-3; 1 Petr. 4:17) Okuzambo, mombura ndji 1919, ‘omakondero wehi’ otji ya uta. Nokuhina okuwomba, Jesus wa ungurisa omukarere omuṱakame ngwa za nokuzikwa oupe okuvatera ovakambure ovakwao okumuna ounanḓengu wokuungura otjiungura tjokuzuvarisa nohakahana. Ngatu tare kutja pa tjitwa tjike.

7. (a) Omakonḓononeno yeṋe nga vatera ovakambure ovakwetu okumuna kutja otjiungura tjokuzuvarisa tji nohakahana? (b) Ovakambure ovakwetu va tunduuzwa okutjita tjike?

⁷ Mu Suramazeva 1920, okambo nga The Watch Tower ka tja: “Pa raisiwa oukahu okuza momakonḓononeno wOmatjangwa kutja okereka ya pewa ondjingonekero yokuhandjaura ombuze ohunga nouhona.” Okutara kotjihorera, omakwizikiro waJesaja ya vatera ovakambure ovakwetu okumuna kutja ombuze yOuhona aai hepa okuzuvarisiwa mouye auhe. (Jes. 49:6; 52:7; 61:1-3) Owo kaave tjiwa kutja otjiungura hi matji yenenisiwa vi, posi yokutja va ri nongamburiro kutja Jehova me ve pe omuhunga. (Lesa Jesaja 59:1.) Mena roumune oupe mbu va muna ohunga nounanḓengu wotjiungura tjokuzuvarisa, ovakambure ovakwetu mbo va tunduuzwa okuungura otjiungura hi pondondo yokombanda. Ovakambure imba ovarwe va raisa ongaro iṋe?

8. Mombura ndji 1921, oviuṋe viṋe vivari ohunga notjiungura tjokuzuvarisa ovakambure ovakwetu mbi va uta okuzuva nawa?

⁸ Mu Tjitarazu 1921, okambo nga The Watch Tower ka tjivisa kutja, “Indji tjiri ya ri ombura onanḓengu tjinene mozombura azehe; nu ovandu ovengi va zuva ombuze youatjiri mombura ndji 1921 okukapita ozombura zokomurungu wanao.” Okambo nga komurungu ka tja: “Ngunda pe novingi mbi mavi sokuungurwa. . . . Ngatu vi ungure nomitima vyondjoroka.” Tara komuano ovakambure ovakwetu mu va tjiwa omapu yevari omananḓengu nga ohunga notjiungura tjokuzuvarisa Jesus tja raera ovaapostele ve kutja otjinanḓengu tjinene: Otjiungura hi tji nohakahana nu ovaungure va tjo ve nondjoroka.

9. (a) Mombura ndji 1954, okambo nga The Watchtower ka hungira tjike ohunga notjiungura tjomakondero, nu omena ratjike? (b) Otjivaro tjovazuvarise tja yeruruka pu pe ṱa pi mozombura 50 nḓa kapita? (Tara kokaongo nga “ Omayerurukiro wovivaro mouye auhe.”)

⁹ Mozombura nḓa 1930, indu ovakambure ovakwetu tji va tjiwa kutja mape kara otjimbumba otjinene tjozonḓu zarwe nḓu maze yandja ombakatwi kombuze yOuhona, otjiungura tjokuzuvarisa tja uta okuungurwa pondondo yokombanda. (Jes. 55:5; Joh. 10:16; Omavan. 7:9) Kwa kongorera tjike? Otjivaro tja imba mbaave zuvarisa ombuze yOuhona tja yeruruka okuza 41 000 mombura ndji 1934 nga ko 500 000 mombura ndji 1953! Okambo nga The Watchtower ketenga raTjitarazu 1954, ka tja: “Ombepo yaJehova nomasa wEmbo re ombya yenenisa otjiungura otjinanḓengu tjomakondero hi mouye auhe.” a—Sak. 4:6.

10, 11. Mehungi ohunga nondwi yomuti omumosteri, otjiṋenge tjiṋe tjomahapero wondwi tji tja ṋunisiwa?

¹⁰ Momahungi we ohunga nOuhona, Jesus wa kwizika oukahu kutja otjiungura tjomakondero matji kara novikongorere ko viṋe. Ngatu tare kehungi ohunga nondwi yomuti omumosteri na indi orosurise. Matu katara kutja owo ya yenenisiwa vi moruveze rwomaandero.

¹¹ Ehungi ohunga nondwi yomuti omumosteri. Omurumendu worive wa kuna ondwi yomumosteri. Ondwi ndji ya hapa nai rire omuti nu ouzera au tungu mo oviruwo vyawo. (Lesa Mateus 13:31, 32.) Oviuṋe viṋe ohunga nomahapero wondwi ndji mbya ṋunisiwa mehungi ndi? (1) Omuano ondwi ndji mu ya hapa omuhimise. Ondwi “okaṱiṱi pozondui azehe” ya rira omuti mbwa twako “otutavi otunene.” (Mar. 4:31, 32, EEP) (2) Omekuriro wondwi ndji aaye undjirwa ko. Jesus wa tja: Indu ondwi ndji “tji ja kunua, mai hapa.” Eye kena pa tja, “Mape ya ai hapa.” Omekuriro wayo kaye nomatjaerero. (3) Omuti mbwe kura mbwi u nana ombango yovaryange nu u vepa otjizire. ‘Ozonḓera zejuru maze sora okutunga oviruo momuzire uajo.’ Oviuṋe vitatu mbi mavi hitasana vi nomakondero wovandu moruveze rwetu?

12. Ehungi ohunga nondwi yomumosteri ma ri ṱunu vi koviungura vyomakondero ndino? (Wina tara kokaongo nga “ Otjivaro tjovandu mbe rihonga Ombeibela tji yerurukira ko.”)

¹² (1) Omuano ondwi mu ye kura: Ehungi ndi mari raisa omuano ombuze yOuhona mu ya handjauka nomuano ombongo yOvakriste mu ye kura. Okuza kombura ndji 1919 ovaungure omapatje, va woronganisirwa mombongo yOvakriste ndja kohororwa. Oruveze ndwo, otjivaro tjovaungure tja ri otjiṱiṱi, posi yokutja tja yeruruka tjimanga. Omekuriro wayo okuza pomautiro wozombura nḓa 1900, nga kundino tjiri omahimise. (Jes. 60:22) (2) Omayenenisiro: Omekuriro wombongo yOvakriste kaya ri nomatjaerero. Nandarire kutja ondwi ndji ya muna omapirukiro omengi, oyo ye kurira ko. (Jes. 54:17) (3) Omawameno: “Ozonḓera zejuru” nḓa tunga oviruwo vyazo momuzire womuti mbwi, ze kuramena po ovandu omangete vomitima omiwa okuza momahi ape 240 mba yakura ombuze yOuhona mokurira ouṋepo wombongo yOvakriste. (Esek. 17:23) Owo va muna ovikurya vyombepo, orusuvo nondjeverero.—Jes. 32:1, 2; 54:13.

13. Ehungi ohunga nosurise ri ṱuna vi koviuṋe vyomekuriro?

¹³ Ehungi ohunga nosurise. Indu omukazendu tja twamo osurise moruhere, oyo i tjita kutja oruhere ru sure. (Lesa Mateus 13:33.) Oviuṋe viṋe ohunga nomekuriro mbya ṋunisiwa mehungi ndi? Ngatu tare ku vivari vyavyo. (1) Omekuriro ye eta omarundurukiro. Osurise ya tjita kutja ‘oruhere aruhe ru sure.’  (2) Omekuriro nga ye tjitwa mouye auhe. Osurise ndji ya surisa [‘oruhere ruomahoro jetatu,’ EEP]. Oviuṋe vivari mbi, mavi ṱunu vi kotjiungura tjomakondero wovandu ndino?

14. Ehungi ohunga nosurise ri ṱuna vi koviungura vyomakondero ndino?

¹⁴ (1) Omarundurukiro: Osurise mai kuramene po ombuze yOuhona, nu oruhere maru kuramene po ovandu. Otja osurise tji i surisa oruhere, ombuze yOuhona wina otjinga i tjita omarundurukiro momitima vyovandu indu tji va zu nokuyakura ouatjiri. (Rom. 12:2) (2) Ye tjitwa mouye auhe: Omuano osurise mu i surisa oruhere mau kuramene po omuano ombuze yOuhona mu i handjauka. Osurise i rungwa mu noruhere nga tji ya wana nawa. Momuano otjingewo, ombuze yOuhona ya handjauka “nga komaandero wehi.” (Oviung. 1:8) Otjiuṋe hi matji raisa kutja nandarire momahi oviungura vyetu mu vi ha yandjerwa, ombuze yOuhona mai handjauka, kutja oviungura vyetu vyokuzuvarisa motupa twehi twi vi munika kovandu ovengi poo indee.

15. Omambo nge ri mu Jesaja 60:5, 22 ya yenenisiwa vi? (Wina tara kouwongo mbwi “ Jehova ongwa yenenisa otjiṋa hi,” pomukuma 93 na inga “ Omuano ‘eṱunḓu eṱiṱiṱiṱi’ mu ra rira ‘otjiwaṋa otjinene notjinamasa,’” pomukuma 96-97.)

¹⁵ Ozombura ape 800 komurungu wa indu Jesus tja serekarera omahungi ngo, okupitira mu Jesaja, Jehova wa kwizika oukahu ohunga nomuano omakondero woruveze rwetu mu maye  tjitwa nondjoroka ngu maye eta. b Jehova wa kahurura ohunga nomuano ovandu mu mave “zu kokure” okuya kotjira tje. Eye wa hungira ohunga na “Jerusalem [poo ‘omukazendu,’ NW]” ndino ngu kuramena po otjihupe tjovatwirisiwa mbe ri kombanda yehi, na tja: “Ove mo munu otjiṋa hi no urisiwa nondjoroka. Mo zezerisiwa i ouṋingandu no kumwa. Ovihuze vyoviwaṋa mavi etwa kove; okuza hembandina yokuvare outumbe wavyo mau etwa.” (Jes. 60:1, 4, 5, 9) Omambo ngo tjiri ouatjiri! Kundino, ovakarere vaJehova mbe mu karera ozombura ozengi ve urisiwa nondjoroka tji mave munu omuano otjivaro tjovazuvarise vombuze yOuhona momahi wawo mu tja yeruruka okuza kovandu ovaṱiṱi uriri nga komayovi omengi.

16, 17. Omena ratjike ‘omukune nomukonde aveyevari tji mave nyanda omitima’? (Wina tara kokaongo nga “ Omuano oumbapira uvari mu wa ṱuna komitima vyovandu vevari moAmazon.”)

¹⁶ Zemburuka kutja Jesus wa raera ovaapostele ve kutja, ‘Ngu ma kondo ma nikorere omuinyo waaruhe ovinikora; omukune nomukonde aveyevari opu mave zu okunyanda omitima.’ (Joh. 4:36) Eṱe tu ‘nyanda vi omitima’ pamwe motjiungura tjomakondero mouye auhe? Omomiano omingi. Ngatu tare ku vitatu.

¹⁷ Rutenga, tu nondjoroka yokumuna orupa Jehova ndwe na rwo motjiungura hi. Tji matu zuvarisa ombuze yOuhona, tu kuna ozondwi. (Mat. 13:18, 19) Indu tji matu vatere omundu okurira omuhongewa waKristus, tu konda ovihape. Nu atuhe tu kara nondjoroka onene tji matu munu omuano Jehova mbwe tjita kutja ozondwi zOuhona ze ‘pite nokuhapa.’ (Mar. 4:27, 28) Ozondwi tjiva nḓu tu kuna ze kahapa kombunda nu aze kakondwa i ovazuvarise varwe. Ove mape ya u notjihorera tjovitjitwa tjimuna otjomukazendu omukambure moBritanje wena Joan, ngwa papitisiwa ozombura 60 nḓa kapita. Eye wa tja: “Ami mba hakaena ku novandu mbe ndji raera kutja mba kuna ozondwi momitima vyawo indu tji mbe ve zuvarisira ombuze ozombura nḓa kapita. Ovahongonone varwe nangwari ve kerihonga Ombeibela kuna wo nave ve vatere okurira ovakarere vaJehova. Mbi nondjoroka kutja ozondwi nḓu mba kuna za hapa naze kondwa.”—Lesa 1 Ovakorinte 3:6, 7.

18. Epu riṋe ndi ri 1 Ovakorinte 3:8, ndi ma ri tupe ondjoroka?

¹⁸ Omuano omutjavari, eṱe matu ungura nondjoroka indu tji twe ripurire komambo waPaulus ngu maye tja: “Ndjambi ma yandja ku auhe ondjambi ye otja koviungura vye mbya ungura.” (1 Kor. 3:8) Ondjambi i yandjwa otja koviungura nungwari kakovikongorere ko mbi za mu vyo. Otjiṋa hi tjiri otjiyanḓiparise tjinene kovazuvarise mbe zuvarisa motuveze ovandu mu ve ha yakura ombuze nawa! Komurungu waMukuru, Omuhongonone auhe ngu u ungura oviungura vyomakunino mbi nomutima auhe u “eta ovihape ovingi” nu ihi matji sokutuhinga kutja tu kare nondjoroka.—Joh. 15:8; Mat. 13:23.

19. (a) Omakwizikiro waJesus nge ri mu Mateus 24:14, maye tjama vi nondjoroka yetu? (b) Matu sokuripurira ku ye nandarire kutja katu nondoṋeno mokuisapo ovandu ovahongewa?

¹⁹ Omuano omutjatatu, tu nondjoroka kutja oviungura vyetu vi yenenisa omakwizikiro womatjangwa. Tara keziriro raJesus kovaapostele ve indu tji ve mu pura kutja: “Tu raera kutja oviṋa avihe mbi mavi tjitwa ruṋe nokutja otjiraisiro tjomeero woye  notjomaandero wouye mbwi ma rire tjiṋe?” Eye we ve raera kutja otjiuṋe tjimwe tjotjiraisiro hi matji rire omazuvarisiro wombuze mouparanga wouye. Eye hapo aa hungire ohunga notjiungura tjokuisapo ovandu ovahongewa? Kako. Eye wa tja: “Nu indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe.” (Mat. 24:3, 14) Okutja, okuzuvarisa ohunga nOuhona poo okukuna ozondwi, otjiuṋe tjimwe tjotjiraisiro. Kunao, otja tji matu zuvarisa ombuze ombwa ohunga nOuhona, matu sokutjiwa kutja nandarire kutja katu toṋene mokuisapo ovandu ovahongewa, matu toṋa mokuyandja “omahongononeno.” c Otjiperi, kaina tja kutja ovandu mave raisa ongaro iṋe, eṱe tu norupa mokuyenenisa omakwizikiro waJesus nu tu nondjingonekero yokukarera ‘otjovaungure vapamwe vaNdjambi.’ (1 Kor. 3:9) Indi tjiri epu ewa ku eṱe okukara nondjoroka!

20, 21. (a) Omambo nge ri mu Maleaki 1:11 ye yenenisiwa vi? (b) Ove we rimana okutjita tjike motjiungura tjomakondero nu omena ratjike?

²⁰ Meserewondo etenga, Jesus wa vatera ovaapostele ve okumuna kutja oviungura vyomakondero vya ri nohakahana. Okuza kombura ndji 1919, Jesus wa vatera ovakarere ve voruveze rwetu okuzuva ouatjiri otjingewo. Mokuyandja ombakatwi kotjiṋa hi, ovakarere vaMukuru va uta okuungura oukukutu motjiungura hi. Oviungura vyomakondero tjiri kavi nomatjaerero. Otja omuprofete Maleaki pa kwizika, oviungura vyokuzuvarisa ndino vi kayendisiwa “okuza komapitiro weyuva nga komahitiro waro.” (Mal. 1:11) Otjiperi, ovakune novakonde ve ungura nokuyoroka pamwe akuhe ku ve ri, okuza komapitiro nga komahitiro weyuva, okuza koutjiro nga koutokero. Nu okuza komapitiro nga komahitiro weyuva, okuza komuhuka nga kongurova poo eyuva arihe, eṱe tu ungura oviungura mbi nohakahana.

²¹ Tji twa tara kozombura 100 nḓa kapita, na tji matu munu omuano okambumba okaṱiṱi kovakarere vaMukuru mu kekura nga tji karira “otjiwaṋa otjinene notjinamasa,” omitima vyetu vi “urisiwa nondjoroka.” (Jes. 60:5, 22) Matu zeri kutja ondjoroka ndjo norusuvero rwetu ku Jehova ngu ri ‘omuini womakondero,’ mavi hingi auhe wetu okukayenda komurungu okukara norupa mokumana otjiungura otjinenenene tjomakondero!—Luk. 10:2.