1, 2. (a) Aiseā na lē mautonu ai le ʻausoo? (e) O le ā le ituaiga o seleselega na fetalai ai Iesu?

 NA LĒ mautonu le ʻausoo ina ua fetalai atu Iesu iā i latou: “Inā tetepa aʻe ia outou ma vāai atu i le faatoʻaga, ua matua [sinasina] mo le seleselega.” Na latou lē mautonu, auā ina ua latou vaai i ai, e lē sinasina le fanua ona e lanu meamata le karite. Atonu na latou taumānatu po o le ā lenei seleselega, auā e umi se taimi ona faatoʻā matua lea o le fanua.—Ioa. 4:35, fpl.

² E leʻi fetalai Iesu e faatatau i se seleselega faaletino. Nai lo o lea, sa ia faaaogā lea avanoa e aʻoaʻo ai ona soo i ni lesona se lua e faatatau i le seleselega faaleagaga. O ā nei lesona? Seʻi o tatou iloiloina nisi faamatalaga faaopoopo e faatatau i le mau.

3. (a) Aiseā na fetalai ai Iesu: ʻUa matua le faatoʻaga mo le seleselega’? (Tagaʻi i le faaopoopoga.) (e) Na faapefea ona faamanino mai e Iesu lana fetalaiga?

³ I le taufaaiʻuiʻuga o le 30 T.A., na talanoa ai Iesu ma ona soo i se vaipanoa e lata ane i Sukara i Samaria. Sa ō atu le ʻausoo i le aai, ae talanoa Iesu ma se fafine i le vaieli e faatatau i upu moni faaleagaga. Na vave ona iloa e le fafine le tāua o aʻoaʻoga a Iesu. I le taimi na toe foʻi mai ai ona soo, na faavave atu le fafine i Sukara ma faamatala i ona tuaoi mea na ia aʻoaʻoina. Na latou fiafia i mea sa faamatala atu e lenei fafine. O lea, na latou ō mai ai i le vaieli e feiloaʻi iā Iesu. Atonu ina ua silasila atu Iesu i le lolofi mai o tagata Samaria, ona ia fetalai lea: “Vāai atu i le faatoʻaga, ua matua mo le seleselega.” a Na toe fetalai Iesu: ʻO loo aoaoina e le tagata selesele fua mo le ola e faavavau.’ O lenā fetalaiga na faamautinoa atili ai, sa ia talanoa e faatatau i se seleselega faaleagaga, ae lē o se seleselega faaletino.—Ioa. 4:5-30, 36.

4. (a) O ā lesona e lua na aʻoaʻo atu e Iesu e faatatau i le seleselega? (e) O ā fesili o le a tatou iloiloina?

⁴ O ā lesona tāua e faatatau i le seleselega faaleagaga na taʻua e Iesu? Muamua, ua faanatinati le galuega. Na valaaulia e Iesu ona soo mo se galuega tāua, ina ua ia faapea mai ʻua matua le faatoʻaga mo le seleselega.’ Ae na ia faailoa mai  le faanatinati o lenei galuega ina ua ia fetalai: “Ua maua e le tagata selesele lona totogi.” O lea, e lē tatau ona latou faatuai, auā ua amata le seleselega. O le lesona lona lua, e fiafia le ʻaufaigaluega. Na fetalai Iesu o le a “olioli faatasi” le ʻaufaigaluega. (Ioa. 4:35e, 36) E pei lava o le fiafia o Iesu ina ʻua faatuatua iā te ia le toʻatele o tagata Samaria,’ ua faapena foʻi le fiafia o ona soo, a o latou auai ma le lotoatoa i le galuega o le seleselega. (Ioa. 4:39-42) E tāua tele iā i tatou le mea na tupu i le uluaʻi senituri, auā ua faailoa mai ai mea e tutupu a o faagasolo le seleselega faaleagaga. O anafea na amata ai lenei seleselega? O ai e faia ai so latou sao, ma o ā iʻuga ua maua mai ai?

5. O ai o loo taʻimua i le seleselega, ma ua faapefea ona faailoa mai i le vaaiga a Ioane le faanatinati o le galuega?

⁵ I le vaaiga na iloa e Ioane, na faailoa ai e Ieova iā te ia le auala na Ia tofia ai Iesu e taʻimua i le seleselega. (Faitau le Faaaliga 14:14-16.) Na faamatala mai i lenei vaaiga, e iai le palealii ma le selesaito a Iesu. O le ʻpalealii auro i le ulu o Iesu,’ ua faamautinoa mai ai lona tulaga o se Tupu. Ae o le “selesaito maʻai i lona lima,” ua faamautinoa mai ai lona tulaga o Lē e selesaito. Na faamatilatila mai e Ieova le faanatinati o le galuega, ina ua ia fetalai mai e ala i se agelu, “ua matuā pula lava le fuata o le lalolagi.” “Ua oo mai le itula e selesele ai,” o lea e lē tatau ona tatou faatuai. Na faatonu e Ieova Iesu ina ʻia tago i lana selesaito.’ Na tali atu Iesu i lenā faatonuga, ma ia faaoo mai ai lana selesaito ma selesele ai le lalolagi. Ua faamanatu mai e lenei vaaiga iā i tatou, ʻua matua le fanua mo le seleselega.’ Ua fesoasoani foʻi iā i tatou e iloa ai le taimi na amata ai le seleselega i le lalolagi aoao.

6. (a) O anafea na amata ai le vaitau o le seleselega? (e) O anafea na amata ai le seleselega i le lalolagi? Faamatala.

⁶ Na taʻua i le vaaiga na iloa e Ioane i le Faaaliga 14, o loo faia le palealii a Iesu, o Lē e faia le seleselega (fuaiupu 14). Peitaʻi, na tofia Iesu e avea ma Tupu i le 1914. (Tani. 7:13, 14) Ae i se taimi mulimuli ane, na faatonuina ai o ia e amata le seleselega (fuaiupu 15). O le faasologa foʻi lenā o mea na tutupu e tusa ai ma le talafaatusa a Iesu, e faatatau i le saito ma le vao leaga. Na taʻua i lenā talafaatusa: “O le seleselega, o le taufaaiʻuiʻuga lea o le faiga o mea a le lalolagi.” O lea, o le 1914 na amata faatasi ai le vaitau o le seleselega, ma le taufaaiʻuiʻuga o le faiga o mea a le lalolagi. Peitaʻi, na faatoʻā amata le seleselega i se taimi mulimuli ane, “i le tau e selesele ai.” (Mata. 13:30, 39) Pe a tatou toe tepa i tua, ona tatou iloa ai lea na amata le seleselega ina ua māeʻa ona avea Iesu ma Tupu. Na amata mai i le 1914 seʻia oo i le tauamatamataga o le 1919, le galuega faamamā na faia e Iesu i ona soo faauuina faamaoni. (Mala. 3:1-3; 1 Pete. 4:17) O lea,  o le 1919 na amata ai le “fuata [seleselega] o le lalolagi.” E leʻi toe faatuai Iesu, ae na ia faaaogāina loa le pologa faamaoni lea ua ia tofia, e fesoasoani i uso e iloa le faanatinati o le galuega. Seʻi o tatou iloiloina le mea na tupu.

7. (a) O le ā le iloiloga na fesoasoani i o tatou uso e iloa ai le faanatinati o le galuega? (e) O le ā na faalaeiauina o tatou uso e fai?

⁷ Na taʻua i le Watch Tower o Iulai i le 1920: “Ua faamaonia mai i suʻesuʻega i le Tusi Paia, ua tuuina mai i le faapotopotoga se faaeaga tautele, o le faailoa atu lea o le feʻau e faatatau i le malo.” O se faaaʻoaʻoga, na fesoasoani le valoaga a Isaia i uso e iloa ai, e tatau ona faalauiloa atu le tala lelei o le Malo i le lalolagi aoao. (Isa. 49:6; 52:7; 61:1-3) E latou te leʻi iloa le auala o le a faataunuu ai lenei galuega. Peitaʻi, na latou talitonu o le a fesoasoani Ieova iā i latou. (Faitau le Isaia 59:1.) O le iʻuga, na iloa e uso le faanatinati o le galuega, ma faalaeiauina ai i latou e faatele so latou sao i lea galuega. O le ā le auala na latou tali atu ai?

8. I le 1921, o ā vala e lua e faatatau i le galuega talaʻi na malamalama ai uso?

⁸ Na faasilasila mai i le Watch Tower o Tesema i le 1921: “O le tausaga sili lenei [1921], ona ua sili atu ai ona toʻatele tagata e faalogo i le feʻau o le upu moni.” Peitaʻi na taʻua atili i le mekasini: ʻO loo telē lava le galuega. O lea, ia tatou faia ma le loto fiafia.’ Seʻi mātau, na iloa e uso lesona tāua e lua na aʻoaʻo e Iesu i ona aposetolo: E faanatinati le galuega, ma e fiafia le ʻaufaigaluega.

9. (a) I le 1954, o le ā na taʻua i le Watchtower e faatatau i le seleselega, ma aiseā? (e) O le ā le faatelega o le ʻautalaʻi i le 50 tausaga ua mavae? (Tagaʻi i le siata “ Faatelega i le Lalolagi Aoao.”)

⁹ A o faagasolo vaitausaga o le 1930, na faatele ai e uso lo latou sao i le galuega talaʻi, ina ua latou iloa e toʻatele le motu o tagata o isi mamoe o loo manaʻomia ona faalogo i le feʻau o le Malo. (Isa. 55:5; Ioa. 10:16; Faaa. 7:9) O le ā le iʻuga? I le 1934 e 41,000 le ʻautalaʻi, ae e oo ane i le 1953 ua siitia i le 500,000. Na taʻua i le Watchtower o Tesema 1, 1954: “O le agaga paia o Ieova ma le mana o lana Afioga, ua faataunuuina ai le seleselega tele i le lalolagi aoao.” b—Saka. 4:6.

10, 11. I le talafaatusa e faatatau i le fatu o le sinapi, o ā vala e faatatau i le tuputupu aʻe o le laau o loo faamatilatila ai?

¹⁰ I talafaatusa a Iesu e faatatau i le Malo, na ia faailoa manino mai ai le iʻuga o le galuega o le seleselega. O lea, seʻi o tatou iloiloina ana talafaatusa e faatatau i le fatu o le sinapi ma le mea faafefete. O le a tatou uaʻi patino atu i le auala ua faataunuuina ai na talafaatusa i le taimi o le iʻuga.

¹¹ Le talafaatusa e faatatau i le fatu o le sinapi. Na totō e se tagata le fatu o le sinapi, ma na tupu tele ma avea ma apitaga mo manu felelei. (Faitau le Mataio 13:31, 32.) O ā vala e faatatau i le ola aʻe o lenei fatu o loo faamamafa i lenei talafaatusa? (1) E mataʻina le tupu tele o le laau. O le sinapi “e sili ona laʻitiiti i lo o fatu uma,” peitaʻi, na avea o se laau e iai ona “lālā tetele.” (Mare. 4:31, 32) (2) E mautinoa e ola. ʻIna ua lūlūina le fatu, ona tupu ai lea.’ E leʻi faapea mai Iesu atonu o le a ola le laau. Peitaʻi na ia fetalai, “ona tupu ai lea,” pe e leai se mea e mafai ona taofia le tupu aʻe o le laau. (3) A o tupu tele le laau, e tosina i ai manufelelei ma e avea ma o latou apitaga. “E momoe ai manufelelei o le lagi i ona lālā.” Ua faapefea ona faatatau mai nei vala e tolu i le seleselega faaleagaga i aso nei?

12. E faapefea ona faatatau le talafaatusa i le fatu o le sinapi i le seleselega i aso nei? (Tagaʻi foʻi i le siata “ Faatelega o Suʻesuʻega Faale-Tusi Paia.”)

¹² (1) Tupu Tele: Ua faamatilatila mai i le talafaatusa le tupu tele o le feʻau o le Malo, ma le faapotopotoga Kerisiano. Talu mai le 1919, na amata ai ona aoaoina le ʻaufaigaluega maelega o le seleselega, i le faapotopotoga Kerisiano ua māeʻa ona faamamāina. I lenā taimi sa toʻaitiiti le ʻaufaigaluega, peitaʻi ua faatuputeleina i lenei taimi. E mataʻina lenei faatelega mai i vaitausaga o le 1900, seʻia oo mai i aso nei. (Isa. 60:22) (2) Mautinoa: E lē mafai ona taofia le tupu tele o le faapotopotoga i aso nei. E tusa lava po o ā teteega e pei o ni papa tetele, peitaʻi o loo faaauau pea ona tupu le laau. (Isa. 54:17) (3) Apitaga: O “manufelelei o le lagi” ua avea le laau ma o latou apitaga, ua faaāta mai ai le faitau miliona o tagata lotofaamaoni mai i le pe ā ma le 240 atunuu. O i latou ia ua tali atu i le feʻau o le Malo, ma avea ai ma vaega o le faapotopotoga Kerisiano. (Eseki. 17:23) Ua faafouina i latou ma maua foʻi meaʻai faaleagaga ma le puipuiga.—Isa. 32:1, 2; 54:13.

13. O ā vala o loo faamatilatila i le talafaatusa e faatatau i le mea faafefete?

¹³ Le talafaatusa e faatatau i le mea faafefete. Na tuu e se fafine le mea faafefete i se paluga falaoamata, ona fefete ai lea o le paluga atoa. (Faitau le Mataio 13:33.) O ā vala e faatatau i le faatelega, o loo faamatilatila mai i le talafaatusa? Seʻi o tatou iloiloina ni vala se lua. (1) E suia ai le paluga atoa. Na tuu le mea faafefete i le paluga, ona ʻfefete ai  lea o le paluga atoa.’ (2) E aafia ai le paluga atoa. E fetaui lenā manatu, auā sa tuu le mea faafefete i totonu o ʻfua falaoamata tetele e tolu,’ ona fefete ai lea o le paluga atoa. E faapefea ona faatatau mai nei vala i le seleselega faaleagaga i aso nei?

14. E faapefea ona faatatau atu le talafaatusa i le mea faafefete i le seleselega i aso nei?

¹⁴ (1) Suiga: O le mea faafefete ua faaāta mai ai le feʻau o le Malo, ae o le paluga falaoamata e faaāta mai ai le fanau a tagata. E pei lava ona suia e le mea faafefete le paluga falaoamata, e faapena foʻi ona suia e le feʻau o le Malo loto o tagata e talia le feʻau. (Roma 12:2) (2) Aafiaga: O le faasolosolo ona fefete o le paluga, ua faaāta mai ai le salalau atu o le feʻau o le Malo. O le mea faafefete, na aafia ai le paluga falaoamata atoa. I se tulaga talitutusa, ua salalau atu le feʻau o le Malo i “tuluʻiga uma o le lalolagi.” (Galu. 1:8) O lenei vala o le talafaatusa ua faailoa mai ai, e salalau atu le feʻau o le Malo e oo lava i vaipanoa o loo faasā ai le talaʻiga, e ui e iloagatā i nisi taimi.

15. Ua faapefea ona faataunuuina upu o loo i le Isaia 60:5, 22? (Tagaʻi foʻi i pusa “ O Ieova na Māfua Ai” ma “ Le Auala ua Avea ai ʻLē e Faatauvaa’ ma ʻAtunuu Malosi.’”)

 ¹⁵ Pe tusa o le 800 tausaga a o leʻi faamatalaina e Iesu nei talafaatusa, na valoia ai e Ieova e ala mai iā Isaia le mamao o le a oo atu ai le seleselega faaleagaga i aso nei. Na valoia mai ai foʻi le fiafia o le a maua mai i lenei galuega. c Na faamatala mai e Ieova o le a gasolo mai i lana faalapotopotoga, tagata “mai i mea mamao.” Na ia fetalai i le “fafine” lea e faaāta mai e le vaega totoe o le ʻaufaauuina e faapea: “O le a e vaai ai ma e matuā olioli, e olioli lou loto ma matuā fiafia auā o le a ō atu iā te oe ʻoa o le sami; e ō mai foʻi iā te oe punaʻoa o atunuu.” (Isa. 60:1, 4, 5, 9) Maʻeu le moni o na upu i aso nei! Ua fiafia i latou ua loa tausaga o auauna iā Ieova e mātauina, le faatoʻateleina o tagata talaʻi o le Malo i o latou atunuu.

16, 17. O le ā se tasi o māfuaaga e ʻolioli faatasi ai le ʻaufaigaluega?’ (Tagaʻi foʻi i le pusa “ Le Auala na Pāʻia ai Loto o Tagata i le Amazon Ona o ni Sāvali se Lua.”)

¹⁶ Na fetalai Iesu: ʻE aoaoina e le tagata selesele fua mo le ola e faavavau, ina ia olioli faatasi ai o lē e lūlū ma lē e selesele.’ (Ioa. 4:36) E faapefea ona tatou “olioli faatasi” i le seleselega o loo faia i le lalolagi aoao? Seʻi o tatou iloiloina ni vala se tolu.

¹⁷ Muamua, e tatou te fiafia e mātauina le vaegafai a Ieova i lenei galuega. E tatou te lūlūina fatu o le upu moni, pe a tatou talaʻia le feʻau o le Malo. (Mata. 13:18, 19) Ae e tatou te selesele mai, pe a fesoasoani i isi e avea ma soo o Keriso. E tatou te fiafia, pe a mātauina le auala ua faatupu ai e Ieova fatu o le Malo. (Mare. 4:27, 28) O nisi fatu e tatou te lūlūina, e faatoʻā tātupu i se taimi mulimuli ane ma seleseleina e isi. Atonu na tupu iā te oe le mea sa tupu iā Joan, o se tuafafine mai Peretania ua 60 tausaga talu ona papatiso: “I nisi taimi, ou te feiloaʻi ai i ē e faapea mai na ou talaʻi atu iā i latou. Peitaʻi, na latou suʻesuʻe mulimuli ane ma nisi o Molimau a Ieova, ma fesoasoani iā i latou e avea ma auauna a Ieova. Ua ou fiafia ua mafai ona fua ma selesele mai fatu na ou lūlūina.”—Faitau le 1 Korinito 3:6, 7.

18. O le ā le māfuaaga e tatou te olioli ai e tusa ai ma le 1 Korinito 3:8?

¹⁸ Lona lua, e tatou te maua pea le fiafia pe a manatua le manatu na taʻua e Paulo: “E maua e tagata taʻitoʻatasi lona lava taui e tusa ma ana galuega.” (1 Kori. 3:8) E tatou te maua le taui e tusa ai ma a tatou galuega na fai, ae e lē fuaina i le iʻuga o a tatou galuega. Maʻeu le faalaeiau o lenā manatu iā i latou o loo galulue i vaipanoa e toʻaitiiti ai ē e talilelei mai i le talaʻiga! I le silafaga a Ieova, o i latou uma o loo faia ma le lotoatoa so latou sao i le lūlūina o fatu, o loo latou “fua tele mai,” ma o le māfuaaga lea o lo latou olioli.—Ioa. 15:8; Mata. 13:23.

19. (a) E faapefea ona tatou maua le fiafia i fetalaiga a Iesu o loo i le Mataio 24:14? (e) O le ā e tatau ona manatua pe a tatou lē taulau i le faia o isi ma soo?

¹⁹ Lona tolu, e tatou te fiafia ona o la tatou galuega ua faataunuuina ai valoaga. Na fesili le ʻausoo iā Iesu: “O le ā  foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” Na fetalai Iesu, o le galuega talaʻi i le lalolagi aoao po o le lūlūina o fatu, o se tasi lea o vala o le faailoga. Pe na ia talanoa e faatatau i le galuega o le faia o isi ma soo? E leai. Na ia fetalai: “O le a talaʻiina atu lenei tala lelei o le malo i le lalolagi atoa e fai ma molimau.” (Mata. 24:3, 14) O lea, pe a talaʻia le Malo, ia tatou manatua e tusa pe e tatou te lē taulau i le faia o isi ma soo, ae o loo tatou taulau manuia i le “molimau” atu. d E tusa pe e lē talilelei mai tagata, ae ua faia so tatou sao i le faataunuuina o le valoaga a Iesu, ma maua ai le faaeaga o le avea ma “ʻaufaigaluega faatasi ma le Atua.” (1 Kori. 3:9) O māfuaaga na e tatou te olioli ai.

20, 21. (a) Ua faapefea ona faataunuuina upu o loo i le Malaki 1:11? (e) O le ā ua e maumauaʻi e fai i le galuega o le seleselega, ma aiseā?

²⁰ I le uluaʻi senituri, na fesoasoani Iesu i ona soo e iloa le faanatinati o le galuega o le seleselega. Talu mai le 1919, o loo faaauau pea ona taumafai Iesu e fesoasoani i ona soo e malamalama i lenā manatu tāua. O le iʻuga, ua faateleina le sao o tagata o le Atua i lea galuega, ma ua faamaonia ai e lē mafai ona taofia le galuega o le seleselega. E pei ona valoia e Malaki, o le a talaʻia le tala lelei i aso nei “e mai i le mea e oso aʻe ai le lā e oo atu i le mea e goto i ai.” (Mala. 1:11) Ua galulue ma fiafia faatasi le ʻaufaigaluega, e tusa lava po o fea o le lalolagi o loo latou galulue ai. Ua latou iloa foʻi le faanatinati o le galuega, e tusa lava po o le ā le umi e latou te galulue ai.

²¹ Pe a tatou toe tepa i le 100 tausaga ua mavae, e ʻolioli ma matuā fiafia’ o tatou loto ona o le auala na avea ai se vaega toʻaitiiti o tagata o le Atua, ma se “atunuu malosi.” (Isa. 60:5, 22) O lea, ia uunaʻia i tatou e le olioli ma lo tatou alolofa iā Ieova “le Matai o le seleselega,” e faia ai pea se sao i le faamāeʻaina o le galuega tele o le seleselega.—Luka 10:2.