1, 2. (a) Ana ligongo cici ŵakulijiganya ŵa Yesu ŵasimonjile? (b) Ana Yesu jwasalaga ya kugowola kwa mtundu wapi?

 ŴAKULIJIGANYA ŵa Yesu akusimonga mnope ni yaŵecete Yesu. Jwalakwe ŵasalile kuti, “Alolecesye cenene ku migunda, mbeju sikomele ni sili cile kuti asigowole.” Jemanjajo akulolecesya mbali jakulanjila Yesu, nambo akwamba kusiwona mbeju syakubiliŵitila sya balele syanganisiŵe komala. Jemanjajo akuliwusya kuti, ‘Ana gowola cici? Pakuŵa pasigele miyesi jejinji kuti jiyice ndaŵi jagowola.’—Yoh. 4:35.

² Pelepa ngakuŵeceta yakugowola kusyesyene. M’malo mwakwe Yesu akusaka ŵajiganye ŵakulijiganya ŵakwe yindu yiŵili yakusosekwa mnope yakugowola kwausimu. Kweleku kuli kwasonganya ŵandu kuti aŵe ŵakulijiganya ŵakwe. Ana Yesu ŵasakaga kwajiganya yindu yamtuli? Kuti tumanyilile kwanga kwa ciwusyoci kwende tujilole cenene nganiji.

3. (a) Ana cacamtendekasisye Yesu kusala kuti “Mbeju sikomele . . . kuti asigowole” caliji cici? (b) Ana Yesu jwalondesye mwamtuli ciwundo cakweci?

³ Yesu ŵakambilanaga ya kugowolayi ni ŵakulijiganya ŵakwe cakumbesi kwa caka ca 30 C.E., ciŵandika tawuni ja Sukali ku Samaliya. Ŵakulijiganyaŵa paŵajinjilaga mu tawuniji, Yesu jwasigele pacisima paŵamlalicilaga jwamkongwe juŵapikanicisye mwacitema kusosekwa kwa yaŵamjiganyaga. Ŵakulijiganya ŵala paŵawujile kwa Yesu, jwamkongwe jula jwawutucile ku Sukali kukwasalila acalongo acimjakwe yindu yakusimonjesya yaŵalijiganyisye yila. Acalongo acimjakwe ŵajinji ŵatesile lung’wanu ni yaŵasasileyi mwamti ŵawutucile ku cisima kula kuti akawonegane ni Yesu. Yikuwoneka kuti pandaŵiji Yesu ŵaweni Asamaliya ali mkwika m’migunda capakutalicila. Pandaŵiji ni paŵasasile ŵakulijiganyawo kuti, ‘Alolecesye cenene m’migunda, mbeju sikomele ni sili cile kuti asigowole.’ Kaneko pakusala yaŵagopolelaga kuti nganikuŵa kugowola kusyesyene nambo kugowola kwausimu, Yesu jwajonjecesyesoni kuti, ‘Jwakugowola mbeju . . . akusonganya mbeju sya ku umi wangamala.’—Yoh. 4:5-30, 36.

4. (a) Ana ni yiwundo yiŵili yapi yakwamba masengo gakugowola yaŵajiganyisye Yesu? (b) Ana citukambilane yiwusyo yapi?

⁴ Ana Yesu ŵajiganyisye yiwundo yakusosekwa yiŵili yapi yakwamba kugowola kwausimu? Candanda cili cakuti, masengoga gakusosekwa kutendekwa mwacitema. Pajwasalaga kuti “Mbeju  sikomele . . . kuti asigowole” jwalimbikasyaga ŵakulijiganya ŵakwe kutendapo kandu. Pakwakamucisya ŵakulijiganya ŵakwe kuti akuwoneje kusosekwa kwakamula masengoga mwacitema, Yesu jwajonjecesye kusala kuti, “Jwakugowola akupocela cile malipilo gakwe.” Yisyene, kugowolaku kwaliji kuli kutandite kala, m’yoyo, pasosekwaga kutenda citema. Caŵili cili cakuti, ŵakugowola akusangalala. Yesu jwasasile kuti ŵakupanda soni ŵakugowola “tacisangalala yalumo.” (Yoh. 4:35b, 36, NW) Mpela muyaŵelele kuti Yesu jwasangalele piŵaweni ‘Asamaliya ŵajinji . . . ali kumkulupililla’ jwalakwe, m’yoyosoni ŵakulijiganya ŵakwe ŵaliji ŵakuti cacisangalala mnope pakukamula masengo gagowola mwakulipeleka ni mtima wosope. (Yoh. 4:39-42) Ngani jajatendekwe mu yaka 100 yandandaji jili jakamucisya mnope kwa m’weji. Tukuŵeceta yeleyi ligongo lyakuti jikulosya yayikutendekwa pamasengo gekulungwa gagowola mwausimu masiku agano. Ana masengo gagowola ga masiku agano gatandite cakaci? Soni ana ŵani ŵakukamula masengoga? Nambi ana paŵele yakuyicisya yamtuli?

5. Ana ŵani ŵakulongolela masengo gakugowola pacilambo cosope? (b) Ana mesomkulola ga Yohane gakulosya camtuli kuti masengoga gakusosekwa kamulidwa mwacitema?

⁵ Mu mesomkulola gaŵagaweni Yohane, Yehofa akulosya kuti ampele Yesu udindo wakulongolela masengo gakusonganganya ŵandu kuŵa ŵakulijiganya ŵakwe pacilambo cosope. Masengoga gakulandana ni masengo gagowola. (Aŵalanje Ciwunukuko 14:14-16.) M’mesomkulolaga, gakulosya Yesu ali awete cisoti ca ucimwene soni ali ajigele cikwakwa. “Cisindi ca golide” cawete Yesu kumtwe cikulosya kuti jwalakwe akwete udindo wakulamulila mpela Mwenye. “Cikwakwa cakutema mnope” cajigele m’miyala mwakwe, cikulosya kuti jwalakwe akwete masengo gagowola. Pakusala kupitila mwa lilayika kuti “yagowola ya pacilambo capasi yikomele kala,” Yehofa akugombelecesya kuti masengoga gakusosekwa kutendekwa mwacitema. Kusala yisyene, “Sambano jiyice ndaŵi jamasika kapena kuti jagowola.” M’yoyo ngapakusosekwa kucelewa. Pakupikanila lilamusi lya Mlungu lyakuti “mcikamulicisye masengo cikwakwa cenu,” Yesu akucicuŵa cilambo capasi pakamulicisya masengo cikwakwa cakwe. Kweleku kuli kwasonganganya ŵandu mumpingo waciklistu. Mesomkulola gakusangalasyaga gakutukumbusyasoni kuti “mbeju sikomele. . . kuti asigowole.” Ana mesomkulolaga gakutukamucisya kumanyilila ndaŵi jele kugowola kwatandite? Elo.

6. (a) Ana “ndaŵi jagowola” jatandite cakaci? (b) Ana ndaŵi jisyesyene jakugowola pacilambopa jatandite cakaci? Alondesye.

⁶ Mesomkulola ga Yohane ga pa Ciwunukuko mtwe 14, gakulosya Yesu kuŵa Jwagowola jwawete cisindi kapena kuti cisoti (ndime 14), nikuti pandaŵi jagowolaji, jwalakwe jwaliji ali aŵicidwe kala kuŵa Mwenye mu 1914. (Daniele 7:13, 14) Panyuma pa cakaci, Yesu ŵalamulidwe kuti atande gowola. (ndime 15). Yeleyi yikutukumbusya citagu ca Yesu cakwamba yakugowola tiligu. Mu citaguci jwalakwe jwatite, “Kata kula ni kumala kwa cilambo capasi cino.” M’yoyo nikuti ndaŵi jagowola soni jakumala kwa cilambo capasi jikutandila yalumo mu 1914. (Mat. 13:30, 39) Patukulola yayatendekwe munyuma, mpaka tumanyilile kuti kugowola kusyesyene kwatandite pali pamasile yaka yakuŵalanjika Yesu ali atandite kulamulila mpela Mwenye. Nambo masengoga mkanigatande, candanda, Yesu jwakamwile masengo  gakuswejesya ŵakumkuya ŵakwe ŵasagulwe kutandila mu 1914 mpaka cakundanda kwa caka ca 1919. (Mala. 3:1-3; 1 Pet. 4:17) Kaneko, mu 1919, masengo ‘gagowola ya pacilambo capasi’ gatandite. Mwangacelewa, Yesu jwatandite kamulicisya masengo kapolo jwakulupicika juŵagambile kusagulidwa kwene kuti ŵakamucisyeje abale kumanyilila kusosekwa kwakamula masengo gakulalicila mwacitema. Kwende tulole yayiŵele mkutendekwa pamasengoga.

7. (a) Ana abale ŵawungunyisye cici cicakamucisye kumanyilila kuti masengo gakulalicila gasosekwaga citema? (b) Ana abale ŵalimbikasidwe kutenda cici?

⁷ Mu July 1920, Sanja ja Mlonda jasasile kuti, “Panyuma pakuwungunya Malemba mwakusamala, pana umboni wakuti dini jipegwile upile wekulungwa wakulalicila utenga wakwamba ya Ucimwene.” Mwambone, maloŵe gakulocesya ga Yesaya gakamucisye abale kumanyilila kuti ngani sya Ucimwene syasosekwaga kulalicidwa pacilambo cosope. (Yes. 49:6; 52:7; 61:1-3) Nambo nganamanyililaga kuti masengoga gacikomboleka camtuli, nambope abaleŵa ŵamdalile Yehofa kuti ciŵamanyisye matala gakutendela yeleyi. (Aŵalanje Yesaya 59:1.) Panyuma pakumanyilila kusosekwa kwakutenda citema pa masengo gakulalicilaga, abale ŵetu ŵalimbikasidwe konjecesya yakutenda mu undumetume. Ana abaleŵa ŵagapocele wuli masengoga?

8. Ana ni yindu yiŵili yapi yaŵapikanicisye cenene Abale yakwamba masengo gakulalicila mu 1921?

⁸ Mu December 1921, Sanja ja Mlonda jasasile kuti, “Caka ca 1921 cili caka capajika, soni ŵandu ŵajinji apikene utenga wa usyesyene mkati mwa cakaci kupunda yaka ya munyumamu.” Sanja jeleji jasasilesoni kuti, “Pana yindu yejinji yayikusosekwape kutendekwa. . . . Kwende tuyitende ni mtima wakusangalala.” Alole yaŵatesile abale pakulosya kuti ŵapikanicisye yiwundo yiŵili yakusosekwa mnope pa masengo gakulalicila yele Yesu ŵasalile ŵandumetume ŵakwe. Jwalakwe jwasasile kuti masengoga gakusosekwa kukamulidwa mwacitema, soni ŵamasengo ali ŵakusangalala.

9. (a) Ana mu 1954, Sanja ja Mlonda jaŵecete yamtuli pakwamba ya masengo gakugowola soni ligongo cici? (b) Ana ciŵalanjilo ca ŵakulalicila pacilambo cikwesile mwamtuli mu yaka 50 yipiteyi? (Alole cati cakuti “ Kutupa kwa Ŵakulalicila Pacilambopa.”)

⁹ Masengo gakulalicila gapitilisye kukula mnope ca m’ma 1930, abale paŵamanyilile kuti pana likuga lya ŵandu ŵangaŵalanjika lya ngondolo sine. (Yes. 55:5; Yoh. 10:16; Ciw. 7:9) Ana yakuyicisya yakwe yaliji yamtuli? Nambala ja ŵandu ŵakulalicila utenga wa Ucimwene jakwesile kutyoka pa 41,000 mu 1934 kwika pa 500,000 mu 1953. Sanja ja Mlonda ja December 1, 1954, jasasile mwakupikanika kuti,  “Msimu wa Yehofa soni macili ga Maloŵe gakwe ni yayikamucisye kuti masengo gekulungwa gakugowolaga pacilambo cosope capasi gakombolece.” a—Sak. 4:6.

10, 11. Ana m’citagu ca kambeju ka tanaposi akugombelecesya mbali syapi syakakule kambejuji?

¹⁰ Mu yitagu yakwe yakwamba Ucimwene, Yesu jwasasile mwakupikanika cenene yakuyicisya ya masengo gakugowola. Kwende tulole citagu ca mbeju ja kacele soni ya cakusasaŵilisya. Citulole mnopemnope mwayitite kwanilicikwa yitaguyi mu ndaŵi ja mbesi jino.

¹¹ Citagu ca mbeju ja kacele. Jwamlume akupanda kambejuka. Kaneko kambejuka kakumela nikuŵa citela, cele yijuni yikwika ni kupata m’bulili. (Aŵalanje Mateyu 13:31, 32.) Ana m’citaguci akugombelecesya mbali syapi syakakule kambejuji? (1) Kakule ka mbejuji kali kakusimonjesya. “Kambeju kamwana mnope kupunda mbeju syosope” kaneko kakuŵa citela cakola “nyambi syekulungwa.” (Maliko 4:31, 32) (2) Ŵasimicisye kuti mbejuji jicikula. “Mbejuji pajimisidwe jikukula.” Yesu nganasala kuti “mwine mpaka jikule.” Nambo jwasasile kuti “jicikula.” Pangali cacikulepelekasya kambejuka kuti kajendelecele kula. (3) Citelaci cili cakutesya lung’wanu soni cikupeleka malo gambone ga kupumulila. “Yijuni ya mwinani yikusayika” ni “kupata malo gakutama mu nyambi syakwe.” Ana mbali sitatusi sikamulana camtuli ni masengo gagowola mwausimu masiku agano?

12. Ana citagu ca kambeju ka tanaposi cikukamulana camtuli ni masengo gagowola m’masiku getu gano? (Alole cati cakuti “ Kukwela kwa Ciŵalanjilo ca Majiganyo ga Baibulo.”)

¹² (1) Kakule kambejuji: Citaguci cikulosya kakule ka utenga wa Ucimwene soni mpingo wa Ciklistu. Ŵandu aŵele ali mkwasonganganya mumpingo waciklistu kuti akamule masengo gakugowola mwakulipeleka kutandila mu 1919. Mundaŵijo, ciŵalanjilo ca ŵamasengo caliji camwana mnope, nambo cakusile mwangajembeceya. Kusala yisyene, Kukula kwakutendekwe kutyocela mu yaka ya m’ma 1900 kwika mundaŵi jetu jino kuli kwakusimonjesya mnope. (Yes. 60:22) (2) Kusimicisya: Mpingo wa Ciklistu uŵele uli mkwendelecelape kukula. Atamose kuti acimmagongo ŵa Mlungu alinjilile kulepelekasya kuti utenga wa Ucimwene ukakula, nambo yeleyi nganiyikomboleka. Utenga wa Ucimwenewu ukwendelecelape kukula. (Yes. 54:17) (3) Malo gambone ga kupumulila: ‘Yijuni ya mwinani’ yayikupata malo gambone gakupumulila m’citelaci, yikwimila ŵandu ŵajinji ŵamitima jambone ŵakutyocela m’yilambo ciŵandika 240. Ŵanduŵa papikene utenga wa Ucimwene akusaŵa mbali ja mpingo wa Ciklistu. (Esek. 17:23) Mu mpingomu, ni mwakusapata ŵanduŵa cakulya causimu, cisangalalo, soni citeteyo.—Yes. 32:1, 2; 54:13.

13. Ana ni mbali syapi syakusigombelecesya mu citagu ca yakusasaŵilisya?

¹³ Citagu ca yakusasaŵilisya kapena kuti cakufufumisya. Jwamkongwe patasile yakufufumisya mu utandi, utandi wosopewo ukusafufumuga. (Aŵalanje Mateyu 13:33.) Ana ni mbali syapi syasigombelecesye mu citaguci? Kwende tulole mbali siŵili. (1) Kufufuma kukutendekasya mtandawu kucenga. Cakufufumisyaci cawanganicilene ni mtanda wosope “mpaka mtanda wosope wafufwime.” (2) Macili gakufufumisya gakwika palipose. Cakufufumisyaci cikuwanganicilana ni “utandi wakwana mipimo jitatu,” jajikupanganya mtanda  wosope. Ana mbali siŵilisi sikukamulana mwamtuli ni kugowola kwausimu kwakukutendekwa masiku getu gano?

14. Ana citagu ca yakusasaŵilisya cikukamulana camtuli ni masengo gagowola m’masiku getu gano?

¹⁴ (1) Kucenga: Cakufufumisya cikwimila utenga wa Ucimwene, soni mtanda ukwimila ŵandu. Cakufufumisya cikusatendekasya kuti mtanda wosope ufufume panyuma pakuwanganya yicindu yiŵiliyi. Mwakulandana ni yeleyi, utenga wa Ucimwene panyuma pakuti ŵandu awupocele ukusatendekasya mitima jawo kucenga. (Alo. 12:2) (2) Macili gakwika palipose: Kwika palipose kwa macili ga yakufufumisya kukwimila kuwanda kwa utenga wa Ucimwene. Cakufufumisya cikusakamula masengo palipose mu utandiwo mwamti cikusafufumisya mtanda wosope. Mwakulanda ni yeleyi, utenga wa Ucimwene uyice “mpaka kumbesi kwa cilambo.” (Mase. 1:8) Citaguci cikulosya kuti m’yilambo yele masengo getu gakulalicila ŵagalekasisye, utenga wa Ucimwene ukusayikako nambo mwangawonecela.

15. Ana maloŵe gakusimanikwa pa Yesaya 60:5, 22 gakwanilicikwe camtuli? (Alolesoni mabokosi gakuti, “ Yehofa ni Juŵayikombolekasisye,” soni lyakuti “ Ana ‘Mtundu wa Ŵandu Ŵapanandi’ Uŵele Camtuli ‘Mtundu Wamacili,’?”.)

¹⁵ Yaka ciŵandika 800 Yesu mkanasale yitaguyi, Yehofa kupitila mwa Yesaya, jwasasile m’maloŵe gangaliŵalicika. Jwalakwe jwasasile ya masengo gakugowola mwausimu gagakutendekwa m’masiku getu  gano soni kusangalala kwakuciyika ligongo lya masengoga. b Yehofa jwasasile ya ŵandu “ŵakutyocela kwakutalika” kuti caciyika mu likuga lyakwe. Yehofa pakuŵeceta kwa ŵandu ŵa ku “Yelusalemu” ŵele masiku agano akwimila ŵasagulwe ŵasigele pacilambopa, jwatite, “Pandaŵijo ngope jenu jicisangalala pacimciyiwona yeleyi, soni mtima wenu ucisangalala mnope ligongo cipanje ca ku nyasa ciciyika kwa mmwejo. Cipanje ca ku yilambo yosope ciciyika kwa mmwejo.” (Yes. 60:1, 4, 5, 9, NW) Maloŵega gali gasyesyene. Ŵandu ŵatumicile Yehofa kwa ndaŵi jelewu, ali ŵakusangalala mnope pakukuwona kutupa kwa ciŵalanjilo ca ŵakulalicila ya Ucimwene kutyoka pa ŵamnono kwika pa masausande.

16, 17. Ana ni ligongo lyapi lyalikutendekasya ‘jwakupanda ni jwakugowola kusangalala yalumo’? (Alole libokosi lyakuti “ Tumapepala Tuŵili Twakamucisye Ŵandu Ŵaŵili ŵa ku Amazon.”)

¹⁶ Mpaka akumbucile kuti Yesu ŵasalile ŵandumetume ŵakwe kuti, ‘Jwakugowola mbeju . . . akusasonganya mbeju sya ku umi wangamala, kuti jwakupanda ni jwakugowola asangalale yalumo.’ (Yoh. 4:36) Ana “tukusasangalala yalumo” camtuli pa masengo gakugowola gagakutendekwa pacilambo cosope? Tukusasangalala pamagongo gejinji. Kwende tulole gatatu.

¹⁷ Lyandanda, tukusasangalala patukuyiwona yakutenda Yehofa pa masengoga. Patukulalicila utenga wa Ucimwene tukusaŵa tuli mkupanda mbeju. (Mat. 13:18, 19) Patumkamucisye jwine kuŵa jwakulijiganya jwa Klistu, tukusaŵa kuti tukugowola yisogosi. Wosopewe tukusaŵa ŵakusangalala patukuyiwona yatesile Yehofa kuti mbeju ja Ucimwene ‘jimele ni kukula.’ (Mak. 4:27, 28) Mbeju sine syatukusapanda sikusamela mkupita kwa ndaŵi soni sikusagowoledwa ni ŵakulalicila ŵane. Komboleka kuti ŵasimene ni cakutendekwa cakulandana ni ca mlongo jwa ku Britain lina lyakwe Joan, juŵabatiswe yaka 60 munyumamo. Jwalakwe jwatite, “Simene ni ŵandu ŵaŵasalile kuti napandile mbeju m’mitima jawo pandaŵi jinalalicilaga m’yaka ya munyumamo. Une nganimanyililaga kuti Ŵamboni ŵane ŵajendelecele kwajiganya Baibulo soni kwakamucisya kuti aŵe ŵakutumicila ŵa Yehofa. Ngusangalala kuti mbeju jinapandile jakusile soni kugowoledwa.”—Aŵalanje 1 Akolinto 3:6, 7.

18. Ana lilemba lya 1 Akolinto 3:8, likusasala ligongo lyapi lyakuŵela ŵakusangalalila?

¹⁸ Lyaŵili, tukusaŵa ŵakusangalala patukuganicisya maloŵe ga Paulo gakuti “Jwalijose tacipocela mbote jakwe kapena kuti malipilo mwakamulana ni masengo giŵatesile.” (1 Akoli. 3:8) Malipiloga gakusapelecedwa mwakukamulana ni masengo gagatendekwe, ngaŵa yakuyicisya ya masengogo. Maloŵega gali gakulimbikasya mnope kwa ŵandu ŵakusalalicila m’mikuli ja ŵandu ŵangali lung’wanu. Jwamboni jwalijose jwakutenda nawo masengo gakupanda ni mtima wosope, Yehofa akusam’wona kuti “akusogola yisogosi yejinji.” M’yoyo, akwete ligongo lyakusangalalila.—Yoh. 15:8; Mat. 13:23.

19. (a) Ana yakulocesya ya Yesu ya pa Mateyu 24:14, yikusatukamucisya camtuli kuŵa ŵakusangalala? (b) Ana tukusosekwa kumbucilaga cici naga tuli ngatukupata majiganyo ga Baibulo?

¹⁹ Lyatatu, tukusasangalala ligongo masengo getu gakusakwanilisya yakulocesya. Aganicisye yaŵajanjile Yesu kwa ŵandumetume ŵakwe paŵam’wusisye kuti, “Ana ticicitendekwa cici kulosya kuti ndaŵi jikwanile jakwikasoni kwa ŵalakwe nambo soni mbesi ja cilambo capasi?” Jwalakwe jwasalile ŵandumetumeŵa kuti cimo mwa yimanyilo  ciciŵa kulalicidwa kwa ngani syambone pacilambo cosope capasi. Ana jwalakwe jwasalaga ya masengo gakupanganya ŵakulijiganya? Iyayi. Jwalakwe jwatite: “Nipo ngani syambonesi sya kwamba ya Ucimwene wa Mlungu tisicilalicidwa pa cilambo cosope capasi, kuti ŵandu ŵamitundu josope asipikane.” (Mat. 24:3, 14) Yeleyi yikulosya kuti kulalicila ya Ucimwene kwakuli kupanda mbeju, kuli cakutendekwa cimo cakulosya cimanyilo. M’yoyo, patukulalicila ngani syambone syakwamba Ucimwene yikusaŵa yili mkutujendelape cenene ligongo “tukutendela umboni,” atamose kuti ngatukupata majiganyo ga Baibulo. c Atamose ŵandu akalosya lung’wanu, tukusaŵa tuli mkukwanilisya cakulocesya ca Yesu soni kukola upile wakuŵa “ŵamasengo acimjakwe ŵa Mlungu.” (1 Akoli. 3:9, NW) Lyeleli lili ligongo lyambone lyakusangalalila.

20, 21. (a) Ana maloŵe ga pa Salimo 113:3 gakwanilicikwa camtuli? (b) Pangani jakugowola, ana tusimicisye kutenda cici soni ligongo cici?

²⁰ Mu yaka 100 yandanda, Yesu jwakamucisye ŵakumkuya ŵakwe kumanyilila kuti masengo gakugowola galiji gakusosekwa kutendekwa mwacitema. Kutyocela mu 1919 kwawula msogolo, Yesu aŵele mkwakamucisya ŵakulijiganya ŵa masiku agano kuwupikanicisya usyesyenewu. Yakuyicisya yakwe, ŵandu ŵa Mlungu ajonjecesye undumetume wawo. Kusala yisyene masengo gakugowola nganigajima. Mpela mulikusaŵecetela lilemba lya Salimo 113:3, masengo gakulalicila gakukamulidwa masiku agano “kutyocela kungopoko lyuŵa mpaka kungapilo lyuŵa.” Yisyene, kutyocela kungopoko lyuŵa mpaka kungapilo lyuŵa, ŵakupanda soni ŵakugowola akukamula masengo soni kusangalalila yalumo mwangasamala kandu kwakusimanikwa ŵanduŵa. Soni kutyocela kungopoko lyuŵa mpaka kungapilo lyuŵa, kwakuli kutyocela kundaŵi mpaka kwigulo, tukusakamula masengoga ni nganisyo syakuti gakusosekwa kukamulidwa mwacitema.

²¹ Mitima jetu jikusasangalala mnope patukulola yayitendekwe mu yaka yakupunda 100 yipiteyi. Mnopemnope patukukawona kakuga kamwana ka ŵakutumicila ŵa Mlungu mwakakulile kuŵa “mtundu wamacili.” (Yes. 60:5, 22) Kwende tukunde kuti kusangalalaku soni cinonyelo cetu pa Yehofa, “msyene yakugowola,” kututendekasye jwalijose jwetuwe kwendelecela kukamula masengo gakugowolaga mpaka kumbesi.—Luk. 10:2.