1-3. Nemene la hnei Iesu hna kuca ngöne la nyidrëti a öhne laka ka ngazo la aqane huliwane la ēnē?

 ATRAQATRE la metrötre i Iesu kowe la ēnē e Ierusalema, ke, tha sihngödri kö koi nyidrë la hna nyihatren hnene ej. Ame la ēnē, tre, hnë traqa itronyi qaane ekö hnene la nöje troa hmi koi Iehova. Ngo, nyipi ewekë troa wië me pë ethan la hmi koi Iehova, Akötresie ka hmitrötr. Pane mekune jë la ewekë ka eje e kuhu hni Iesu la nyidrëti a traqa kowe la ēnē lo 10 Nisan 33 M.K., me öhne laka, hna angazone la ēnē. Nemene la hna kuca e cili?—E jë la Mataio 21:12, 13.

² Ame ngöne la Hnahage Ne La Itre Wanaithihlë, kola atrekënöne la itre ka traqa ne troa tro fë huuje koi Iehova hnene la itre ka salem, me itre ka itö mani. a Hnei Iesu hna “helën’ asë la angete itö hnine la ēnē, me qene ipiëne la ite laulau i angete itö mani.” (Wange ju fe la Nehemia 13:7-9.) Hnei nyidrëti hna qajaqaja la thiina ne la itre ka meku angatre hi, ke, kola xome la uma ne la Tretretro i nyidrë “nyine ngönemenyi ne la nöjei ate kë ’nö.” Iesu hi lai a amamane la metrötre i nyidrë kowe la ēnē, memine la hnene eje hna nyihatren. Nyipi ewekë troa thupëne matre tro pala hi a wië la hmi Tretretro i nyidrë!

³ Itre hadredre lao macatre thupen, lo kola acili Iesu lo Mesia troa Joxu, hnei nyidrëti hna awiëne hmaca la ēnē, ketre ewekë lai ka ketri së asë hi enehila, itre ka ajane troa nyihlue nyipici koi Iehova. Nemene ēnē hnei nyidrëti hna awiën?

4, 5. (a) Hna nyidrawane me awiëne tune kaa la itre Keresiano hna iën qaane lo 1914 uti hë la kola xejë la 1919? (b) Hapeu, pune hë lo lai ijine troa nyidrawane me awiëne la itre hlue i Akötresie? Qeje pengöne jë.

⁴ Tune la hne së hna ce wange hë ngöne la Mekene 2 ne la itusi celë, thupene la hna acili Joxu Iesu lo 1914, hnei nyidrëti me Tretretro i nyidrë hna ce traqa troa waipengöne hnyawa la ēnē ngöne la götrane u, celë hi ketre ewekë hna hnëkëne göne la hmi ka wië. b Ame la thangane la iwai cili, hnene la Joxu hna öhne ka hape, nyipi ewekë troa nyidrawane me awiëne la “ite nekö i Levi” ene la itre Keresiano hna iën. (Mal. 3:1-3) Qaane lo 1914 uti hë la kola xejë la 1919, hnei Iehova hna awiëne me nyidrawane la itre hlue i Nyidrë la kola nue angatre ngöne la itre itupath ka nyimutre, me itre akötr. Eloine pe, hnene la itre hna iën hna cile hut ngöne la itre itupathi  ka tru cili, qa ngöne lai hna nyidrawa angatr, nge madrine catre angatre troa ce huliwa memine la Joxu, ene lo Mesia!

⁵ Hapeu, pune hë lo lai ijine troa nyidrawane me awiëne la itre hlue i Akötresie? Ohea. Ame la itre drai ne la pun, Iehova pala hi a xatuane la itretre drei Nyidrë, jëne la Joxu Iesu, troa wië matre tro pala hi angatre a lapa e hnine la ēnē ngöne la götrane u. Ame ngöne la lue mekene ka troa xulu, tro sa ce wange la aqane nyidrawa angatre ngöne la götrane la thiina, me ngöne la aqane eköthe trongëne la organizasio. Ngo tro sa ithanatane panëne la aqane troa wië ngöne la götrane u. Maine jë tha mama hnyawa kö koi së la aqane xatuane Iesu la itretre drei nyidrë matre tro angatr a wië ngöne la götrane u. Ngo ame hë la easa atre la aqane kuca i nyidrë, kolo ha hane acatrene la lapaune së.

6. Hna xatua së tune kaa hnene la itre hna amekötine hnei Iehova kowe la angetre Iudra göi troa wië ngöne la götrane u?

⁶ Nemene la aliene la kola hape, troa wië ngöne la götrane u? Tro sa pane ce wange la itre ithanata hnei Iehova hna qaja kowe la angetre Iudra ka bëeke qaa hna po e Babulona ngöne lo itre macatre 500 M.P.K. (E jë la Isaia 52:11.) Kola bëeke hnene la itre ka po Ierusalema eë troa pane xupe hmaca la ēnē me acile hmaca la hmi ka wië. (Ezera 1:2-4) Ame la aja i Iehova, tre, tro angatr a nuetrije la nöjei ini ne la hmi Babulona. Hanawange la itre hnei Nyidrëti hna amekötine koi angatr: “The kete kö la ka sis ; tropi qa hnin’ ej ; wiëpi nyipunie.” Tha tro kö a adrone la hmi ka wië i Iehova hnene la hmi ka thoi. Haawe, nemene la mekune nyine tro sa xom? Ame la troa wië ngöne la götrane u, tre, troa thupëne matre tha tro kö a adronyi së hnene la itre ini memine la itre hna majemine kuca hnene la hmi ka thoi.

7. Drei la hnei Iesu hna xome troa xatuane la itretre drei nyidrë troa wië ngöne la götrane u?

⁷ Ase jë hi acili Joxu Iesu, nyidrëti hi lai a acile jë lo 1919 la hlue ka nyipici me inamacan. Jëne la hlue ka nyipici cili, nyidrëti a xatuane la itretre drei nyidrë troa wië ngöne la götrane u. Pëkö ejolene e troa wangatrehmekune la hlue cili. (Mat. 24:45) Ame ngöne la macatre cili, ase hë la Itretre Ini Tusi Hmitrötr nyidrawa angatre kö qa ngöne la itre ini ka thoi. Ngo, hetre itre xa nyine tro hmaca kö a nyidrawane ngöne la götrane u. Jëne mina fe la hlue cili, hnei Keriso hna amamane trongëne kowe la itretre drei nyidrë la itre xa feet me itre hna majemine kuca nyine troa nuetrij. (Ite edomë 4:18) Tro sa ce wange la itre xa ceitun.

8. Nemene hë la hna atre ekö hnene la Itretre Ini Tusi Hmitrötr göi Noel, ngo nemene la hna tha trotrohnine hnyawa hnei angatr?

⁸ Ekö fe hë la Itretre Ini Tusi Hmitrötr atre laka ame la Noel, tre, ka xulu qa ngöne la itre hmi wanaithihlë, nge tha hna hnaho Iesu kö lo 25 Diseba. Önine la Ita Ne Thup ne Diseba 1881 ka hape: “Itre milio lao etrune la itre wanaithihlë ka hane traqa kowe la hmi Keresiano. Ngo, itre ëje hi la hna saze, ke, ame lo itre keme ne hmi wanaithihlë, tre, itre keme ne hmi Keresiano hmaca pena  ha. Haawe, ame hë lo itre feete i wanaithihlë, hna ati ëjene hmaca pena ha hnene la hmi Keresiano, tune la Noel.” Ame lo 1883, hna qaja hnene la Ita Ne Thup [qene Papale] fene la tane mekun, “Eue La Kola Hnaho Iesu?” ka hape, hna hnaho Iesu lo kola xejë la treu Okotropa. c Ngo, tha hna trotrohnine hnyawa kö hnene la Itretre Ini Tusi Hmitrötr la enyipiewekëne la troa nuetrije la feetë Noel. Hnei angatre pala hi hna feetën, goi feetëne fe ekö hnene la itre atrene la Bethela e Brooklyn. Ngo, thupene jë hi lo 1926, saze hë. Pine nemen?

9. Nemene la hna trotrohnine hnene la Itretre Ini Tusi Hmitrötr göi Noel?

⁹ Hetre thangane la hna waipengöne hnyawa hnene la Itretre Ini Tusi Hmitrötr la mekune cili, ke, trotrohnine hë angatre ka hape, ame la qaane la Noel, me itre hna kuca ngöne la ijine cili, tre kola adrone la ëje i Akötresie. Hnene la tane mekune hna hape, “Qaane La Noel,” ngöne la zonal, L’Âge d’Or ne 14 Diseba 1927 (qene Papale), hna qaja ka hape, feete i itre wanaithihlë la Noel, nge tru hi la hna kuci madrin, me atrunyi idrola. Mama hnyawa pi hi hnene la tane mekune cili ka hape, tha Keriso kö la atre acile la feete cili, nge hna nyipune hnene la tane mekune ka hape: “Ame la kepine matre nuetrije pi la feete cili hnene la itre ka nyihlue nyipici koi Iehova, tre, hnene laka trotrohnine hi angatre laka, fen, memine la itre aja i ngönetrei, me Diabolo la angetrekë huliwan, me ka sajuëne la feete cili.” Tha sesëkötre kö së laka, ame lai Diseba cili, tha feetë Noel hmaca kö la itre atrene la Bethela, uti hë enehila!

10. (a) Nemene la hna amamane hnyawa hnene la cainöje göi Noel hna drenge lo Diseba 1928? (Wange ju fe la itre mekune hna eköhagen, “ Noel, Qaane Me Alien Ej.”) (b) Hna hmekëne tune kaa la itre hlue i Akötresie matre tha tro kö angatr a hane sine la itre feet hna atrune hnei hmi? (Wange ju la itre mekune hna eköhagen, “ Pengöne La Itre Drai Hna Feetën.”)

¹⁰ Ame lo macatre thupen, goi kapa fe la Itretre Ini Tusi Hmitrötr la ketre cainöj göi Noel. Ame lo 12 Diseba 1928, hnei  Richard Barber, ketre atrene la hnalapa ne xomi meköt, hna cainöje jëne radio, me amamane hnyawa la itre qaane ka ngazo ne la feete cili. Hnene la itre hlue i Akötresie hna kapa tune kaa la mekune cili ka xulu qaathene la hnalapa ne xomi meköt? Ame la kola mekune hmaca ka hape tha feetë Noel hë hnei Charles Brandlein me hnepe lapa i angeic, kola qaja hnei angeic: “Hapeu, ewekë ka jole kö lai koi huni troa nue la itre hna majemine kuca ka xulu qaathene la itre nöje wanaithihlë? Ohea! . . . Ceitune hi lai memine la kola una trije la iheetre ka dro.” Ketre tui, Henry Cantwell, ketre atre iwai trootro e thupen, öni angeic: “Madrine catre huni e troa nuetrije la ketre ewekë göi troa amamane la ihnimi hun koi Iehova.” Hetre ajane la itre ka ce huliwa nyipici me Keriso troa amekötine la mele i angatr, me tha hane sine la ketre feet ka xulu qa ngöne la hmi ka thoi. d—Ioane 15:19; 17:14.

11. Nemene la aqane tro sa amamane ka hape, easa sajuëne la itre hna amekötine hnene la Joxu, ene lo Mesia?

¹¹ Drei la ketre tulu ka lolo koi së hna amë hnene la Itretre Ini Tusi Hmitrötr! Celë hi matre isawaipengö së jë kö ka hape: ‘Nemene la aqane goeëne ni la itre hna amekötine qaathene la hlue ka nyipici? Eni kö a kapa madrin itre ej, me trongën?’ E aja së troa idrengethenge, easë hi lai a amamane ka hape, easa sajuëne la Joxu, ene lo Mesia, atre iëne la hlue ka nyipici göi troa thawa la xeni ne la u ngöne la ijin.—Ite hu. 16:4, 5.

12. Ame ngöne la itre macatre ka nyimutre, nemene la aqane waipengöne la kuluse hnene la Itretre Ini Tusi Hmitrötr?

¹² Ame ngöne la itre macatre ka nyimutre, hnene la Itretre Ini Tusi Hmitrötr hna kapa la kuluse ceitu me ketre ewekë nyine  nyihatrene la Keresiano. Atre hnyawa hi angatre ka hape, tha tro kö a thili kowe la kuluse, ke, trotrohnine hë angatre ka hape, ngazo la kuci idrola. (1 Kor. 10:14; 1 Ioane 5:21) Ame lo 1883, hna qaja ngöne la Ita Ne Thup ka hape, “ka sisi xajawa i Akötresie la nöjei aqane kuci idrola.” Ngo, ame kowe la Itretre Ini Tusi Hmitrötr, tre pëkö engazone la troa xome la kuluse nyine kuci hmi. Drei la ketre ceitun, madrine catre angatre troa nyihatre i angatre hnene la pine hna nyi emingömingön hnei kuluse me korona ngöne la iheetre i angatr. Ame koi angatr, kolo lai a hape, e tro angatr a mele nyipici uti hë mec, tro hë angatr a kapa la korona ne mel. Ame hë lo 1891, kolo fe hë a mama ngöne la icetröne la Ita Ne Thup lo lai kuluse me korona.

13. Nemene la itre ithuemacanyi ka mama trootro kowe la itretre drei Keriso göi kuluse? ( Wange ju fe la itre mekune hna eköhagen, “Aqane Mama Trootro La Kuluse.”)

¹³ Ka tru ekö kowe la Itretre Ini Tusi Hmitrötr la kuluse me korona. Ngo, ame hë lo pune la itre macatre 1920, mama trootro hë kowe la itretre drei Keriso la pengöne la kuluse. Hnei Grant Suiter, ketre atrene e thupen la Lapa Ne Xomi Meköt, hna qaja la asabele lo 1928 e Détroit, Michigan, Etazini, ka hape: “Ame ngöne la asabele, kola qaja la kuluse me korona ka hape, tha ka nyipi ewekë kö, nge nyine troa nuetrij.” Ame ngöne la itre macatre thupen, hna hamëne la itre xa ithuemacany göi kuluse. Mama hnyawa pi hi laka, pëkö göhnene eje ngöne la hmi ka wië.

14. Nemene la aqane kapa hnene la itre hlue i Akötresie la itre ithuemacanyi ka mama trootro göi kuluse?

¹⁴ Nemene la aqane kapa hnene la itre hlue i Akötresie la itre ithuemacanyi ka mama trootro göi kuluse? Hnei angatre kö hna atrune pala hi la kuluse me korona ceitu me ewekë nyine hatre i angatr? Kola mekune hmaca hnei Lela Roberts, ketre hlue i Iehova ka hekö catre hë, ka hape: “Atre jë hi huni la alien, nge eahuni fe lai a canga nuetrije ju.” Hnene la trejine föe ka mele nyipici, Ursula Serenco, hna fe la hni eahlo me qaja la mekuna i ka ala nyim, ka hape: “Atre hë huni laka, ame lo ewekë hne hun hna atrun nge ka nyihatrene la meci ne la Joxu, nge hnei huni hna nyihluen, tre, ewekë ka traqa qaathei itre wanaithihlë. Tune la hna qaja ngöne Ite Edomë 4:18, easa olene laka, mama hnyawa ha la gojenyi së, ke hna fe hnyawa la lue meke së.” Tru la ajane la itretre drei Keriso ka mele nyipici troa nuetrije la itre hna majemine kuca ka ngazo hnene la itre hmi!

15, 16. Nemene la aqane tro sa amamane ka hape, easa ajane catrëne tro pala hi a wië la götrane hnahage ne la ēnē i Nyidrë e celë fen?

¹⁵ Casi hi la aja së enehila me angatr ekö. Atre hi së ka hape, Keriso a iëne la hlue ka nyipici me inamacan nyine gojenyine thewe xeni ngöne la götrane u matre troa xatuane la itre hlue i nyidrë tro pala hi a wië. Haawe, ame la kola hmekë së qa ngöne la itre feet, me itre hna majemine kuca hna atrune hnei hmi ka thoi, tre hne së fe hna canga kapa me hane drengethenge. Tune lo itre trejine trahmanyi me föe ka mele ngöne lo ijine kola xötrei acili Joxu Iesu, easa ajane catrën tro pala hi a wië la götrane hnahage ne la ēnē i Nyidrë e celë fen.

¹⁶ Ame ngöne la itre drai ne la pun, Iesu a kuca la itre ewekë ka sihngödre koi atr matre troa thupëne la itre atrene la ekalesia qa  ngöne la itre atr ka iapoizinë angatre ngöne la götrane u. Hnei nyidrëti hna kuca tune kaa? Tro sa ce ithanatane la mekune celë.

17, 18. Ame ngöne la ceitune ne la eötr, nemene la aliene la (a) kola nue la eötr e kuhu hnagejë, (b) kola “jöte la nöjei ie menu” (c) kola una la itre ie ka loi kowe la itre tengen, nge (d) kola trije la itre ie ka ngazo?

¹⁷ Iesu Keriso Joxu a goeëne me thupëne la itre ekalesia ne la nöje i Akötresie e cailo fen. Tha mama kö koi së, ngo Keriso me itre angela a kuca la huliwa ne troa isaijene la itre atr. Hnei Iesu hna qeje pengöne la huliwa cili ngöne la nyidrëti a xome la eötr nyine ceitun. (E jë la Mataio 13:47-50.) Nemene la aliene la ceitune celë?

¹⁸ “Tune la eöt, hna nue e kuhu hnagejë.” Kola nyihatrene la eötr hnene la huliwa ne cainöjë Baselaia hna kuca kowe la itre atr e celë fen. Itre atr hna aceitunëne me hnagejë. “Jöte la nöjei ie menu.” Kola ea la nöjei atr menu hnene la maca ka loi, ene lo itre atr ka thele troa nyihlue i Iehova, memine fe la itre atr ka canga hetre hni ne ajan ngo tha mekune kö troa xomi bapataiso. e Kola “una la ite ka loi kowe la ite tengen.” Hna icasinekeune la itre atr ka hni ka meköt ngöne la itre ekalesia hna aceitunëne me itre trengen. Ame e cili angatr a atrunyi Iehova jëne la hmi ka wië. Hna trije pë hë la “ite [ie] ka ngazo.” Ame ngöne la itre drai ne la pun, Keriso me itre angela a isaijene “la ite ka ngazo me ite ka meköt.” f Ame la thangan, tha hna apoizinëne kö la ekalesia hnene la itre atr ka tha meköti kö, angetre xele ma nuetrije la itre ini me itre hna majemin kuca ka ngazo. Tha hna nue angatre fe kö troa hane sine la itre ekalesia wanga apoizinëne jë angatre la itre atren. g

19. Tune kaa la mekuna i epuni göne la hna kuca hnei Keriso matre troa wië pala hi la nöje i Akötresie?

¹⁹ Ketre ewekë ka akeukawanyi së ngöne la easa atre ka hape, Iesu Keriso Joxu la atre thupëne hnyawa la itre ka lapa fene la musi nyidrë. Kolo fe a kola akeukawanyi së hnene la aqane catre huliwa i nyidrë enehila göi troa nyidrawan, me thupëne la nyipi hmi me itre hlue i Akötresie, tune lo aqane nyidrawane nyidrëti ekö lo ēnē e celë fen. Easa olene koi Iesu Keriso la hnei nyidrëti hna catre thupëne matre troa wië pala hi la nöje i Akötresie ngöne la götrane u! Loi e tro sa catre sajuëne la Joxu, memine la Baselaia i nyidrë, hnene la hne së hna catre kötrene pala hi la hmi ka thoi.