1-3. ¿Mbaʼépa ojapo Jesús otopávo umi hénte hembiapo vai hague pe témplope?

 JESÚS omombaʼeterei pe témplo oĩva Jerusalénpe. Upe témplo ningo aréma ojeporu hague oñemombaʼeguasu hag̃ua Ñandejárape. Jehová ningo ipotĩeterei ha oipota ojeadora chupe hekoitépe ha tekopotĩme. Upévare ñapensamínte mbaʼéichapa oñeñandúne raʼe Jesús pe 10 de nisán áño 33-pe. Upérõ haʼe otopa umi hénte hembiapo vaiha pe témplo ryepýpe. ¿Mbaʼépa oiko raʼe upérõ? (Elee Mateo 21:12, 13.)

² Pe témplo korapýpe oĩ una partída vendedór ha kambísta taryrýi. Umíva ojaprovecha umi hénte oúvare témplope ojapo hag̃ua sakrifísio Jehovápe. a Upémarõ Jesús “omosẽmba upégui umi ombaʼevende ha oñemúvape. Oipetepa yvýre umi mesa kambistakuéra oiporúva” (embojoja Nehemías 13:7-9 rehe). Haʼe oguerosapukái umi kuimbaʼe añáme ha heʼi ojapo hague Itúva rógagui “mondaha raity”. Péicha jahecha Jesús orrespetaiterei hague pe témplo orrepresenta rupi Jehovápe. Umi oadoráva Jehovápe omboykete vaʼerã opaichagua mbaʼe kyʼa.

³ Heta áño haguépe, Jesús ojupi rire rréiramo omopotĩ jey peteĩ témplo. Upe témplo orrepresenta hína opa mbaʼe ojapóva umi oadoraséva Jehovápe haʼe oipotahaichaite. ¿Mbaʼéichapa ojapo upéva?

4, 5. a) ¿Mbaʼéichapa oñemopotĩ Ñandejára puévlope 1914 guive 1919 peve? b) ¿Osegípa oñemopotĩ Ñandejára puévlope? Emyesakã.

⁴ Jahecha haguéicha kapítulo 2-pe, Jesús ojupi rire rréiramo 1914-pe ou ohecha mbaʼépa ojapo umi oadoráva Jehovápe. Upe adorasión oñembojoja peteĩ témplore. b Upérõ Jesús ohechakuaa umi unhído, haʼéva ‘Leví raʼykuéra’ tekotevẽha oñemopotĩ (Mal. 3:1-3, ÑÑB). Áño 1914 guive 1919 oñepyrũ meve, Jehová opermiti ipuévlo ohasa heta mbaʼe vaíre ikatu hag̃uáicha oñemopotĩ porã chupekuéra. Umi unhído ohasa rire umi situasión ijetuʼúva, ipotĩ asy opytávo ha Ñandejára oguerohory chupekuéra. Upéi kyreʼỹme  oñepyrũ ombaʼapo ohechauka hag̃ua oñemoĩha hikuái Rréi Jesucristo ládo.

⁵ ¿Heʼisépa upéva Ñandejára puévlo ndorekoveimaha mbaʼeve tekotevẽva oñemopotĩve? Nahániri. Koʼã ára pahápe Jehová ojevale Jesús rehe osegi hag̃ua oipytyvõ isegidorkuérape ikatu hag̃uáicha hekopotĩ ha omombaʼeguasu chupe hekoitépe. Umi mokõi kapítulo oúvape jahecháta mbaʼéichapa oñehekomboʼe Ñandejára puévlope hekopotĩve hag̃ua. Jahecháta avei mbaʼéichapa oñemopotĩ pe organisasión. Péro upe mboyve ñahesaʼỹijóta mbaʼéichapa oñemopotĩ Ñandejára puévlope omboykete hag̃ua entéro enseñánsa japu.

6. ¿Mbaʼépa ñanemboʼe Jehová omanda vaʼekue umi hudíope?

⁶ ¿Mbaʼépa heʼise ñanepotĩ Jehová renondépe? Ñakontesta hag̃ua ko porandu jahechami mbaʼépa Jehová heʼi vaʼekue umi hudíope osẽ mboyvemi Babilóniagui áño 537-pe a.C. (Elee Isaías 52:11.) Umi hudío oho jeýta ivállepe Jerusalénpe omopuʼã jey hag̃ua pe témplo ha oadora hag̃ua Jehovápe (Esd. 1:2-4). Jehová oipota ipuévlo oheja opaite mbaʼe oúva umi vavilónio rrelihióngui. Jahechami mbaʼe mbaʼépa omanda chupekuéra: “Pesẽ katu Babilóniagui”, ‘ani pepoko mbaʼeve ikyʼáva rehe’ ha “penepotĩke”. Pe adorasión ipotĩ hag̃ua Jehová renondépe ndaikatúi ojeheʼa ni michĩmi pe rrelihión japúre. ¿Mbaʼépa ñanemboʼe upéva? Ikatu hag̃uáicha ñanepotĩ jaadorávo Jehovápe, ñamboykete vaʼerã opa mbaʼe omboʼe ha ojapóva umi rrelihión japu.

7. ¿Mbaʼérehepa ojevale Jesús omopotĩ meme hag̃ua isegidorkuérape?

⁷ Jesús oñepyrũ riremi ogoverna yvágape omoĩ pe tembiguái jeroviahápe oipytyvõ hag̃ua isegidorkuérape ikatu hag̃uáicha omboyke umi enseñánsa japu. Cristo omoĩ ko tembiguáipe áño 1919-pe (Mat. 24:45). Upe áñope umi Estudiánte de la Biblia oñemopotĩ heta enseñánsa japúgui. Péro ofaltave gueteri. Upévare pe tembiguái jeroviaha rupive Cristo mbeguekatúpe ohechauka isegidorkuérape mbaʼépa omboyke vaʼerã (Pro. 4:18). Jahechamína unos kuánto ehémplo.

8. ¿Mbaʼépa oikuaáma vaʼekue navidáre umi Estudiánte de la Biblia? ¿Mbaʼépa nontendeporãi rakaʼe hikuái?

⁸ Umi Estudiánte de la Biblia yma guivéma oikuaa navida ouha rrelihión japúgui ha Jesús nonaséi hague 25 de diciembre. Ñemañaha de diciembre de 1881 heʼi: “Oĩ vaʼekue hetaiterei ováva umi rrelihión ndahaʼéivagui kristiána ha oiko chugui katóliko. Péro haʼekuéra okambiánte irrelihión réra. Umi isaserdotekuérape katu oñehenóima paʼi. Ha umi fiésta ojapóva okambia héra ha oiko chugui fiésta kristiána  guaʼu. Umíva apytépe navida”. Áño 1883-pe osẽ pe artíkulo “¿Arakaʼépa onase Jesús?” ha upépe heʼi onaséne hague octubre oñepyrũvo. c Upéicharamo jepe umi Estudiánte de la Biblia ndohechakuaái gueteri ndofestehavéima vaʼerãha navida. Haʼekuéra osegi ojapo ha umi ombaʼapóva Betel de Broóklynpe jepe ofesteha. Péro 1926 rire ndojapovéima hikuái. ¿Mbaʼérepa?

9. ¿Mbaʼépa ohechakuaa navidáre umi Estudiánte de la Biblia?

⁹ Umi Estudiánte de la Biblia oipyguara ha ojepyʼamongeta umi informasión oñeʼẽvare ko témare. Upéicha rupi ohechakuaa hikuái pe navida ha umi kostúmbre ojesegíva upe fiésta aja omotĩha Ñandejárape. La edad de oro de 14 de diciembre de 1927-pe, osẽ peteĩ artíkulo hérava “Moõguipa ou pe navida”. Upépe heʼi ouha rrelihión japúgui, avei upe festého aja umi hénte opensaha ijehénte ha omombaʼeguasuha santokuéra. Pe artíkulo heʼi porã Cristo nomandái hague ojegueromanduʼa hag̃ua onase hague día. Omohuʼã hag̃ua heʼi: “Ko múndo, ñande rete rembipota vai ha Satanás oipota ojegueromanduʼa meme ko día. Jahechávo upéva natekotevẽvéima ni ojeʼe ñandéve ndaikatuiha jafesteha ko arete ñañemeʼẽ rire Jehovápe”. Ndareíri pe família Betel ndofestehavéima navida upe guive.

10. a) ¿Mbaʼépa oñemyesakãve navidáre diciembre de 1928-pe? (Ehecha pe rrekuádro “ Moõguipa ou pe navida ha maʼerãpa ojefesteha”.) b) ¿Mbaʼéichapa ojekuaauka Ñandejára puévlope mbaʼe arete ha fiéstapa naiporãi ojefesteha? (Ehecha pe rrekuádro “ Mbaʼe mbaʼépa naiporãi jafesteha”.)

¹⁰ Pe ótro áñope umi Estudiánte de la Biblia ontende porãvéntema mbaʼérepa naiporãi ojefesteha navida. Pe 12 de diciembre de 1928 ermáno Richard Barber, ombaʼapóva ofisína  sentrálpe ojapo peteĩ diskúrso rrádiope ha ohechauka porã pe navida ivaiha oúgui rrelihión japúgui. ¿Mbaʼépa ojapo Ñandejára puévlo ohendúvo ko diskúrso? Peteĩ ermáno hérava Charles Brandlein imanduʼa haʼe ha ifamília ndofestehavéi hague navida. Haʼe heʼi: “¿Rombyasy piko roheja haguére ko fiésta oúva rrelihión japúgui? Ni mbaʼevéicharõ. Haʼete roipeʼáva peteĩ ao kyʼa ha romombo”. Ermáno Henry Cantwell, upe rire oservi vaʼekue superintendénteramo, heʼi avei: “Rovyʼaiterei pórke rohejávo upéva rohechauka rohayhuha Jehovápe”. Umi kristiáno iñeʼẽrendúva ojapo oñekotevẽva anive hag̃ua ojapo peteĩ fiésta omongyʼáva Jehová adorasión d (Juan 15:19; 17:14).

11. ¿Mbaʼéichapa jahechauka jajepytasoha Rréi Jesucristo ykére?

¹¹ Ajépa iporãite pe ehémplo omoĩva umi Estudiánte de la Biblia. Jajepyʼamongetávo haʼekuéra ojapo vaʼekuére iporã ñañeporandu: “Pe tembiguái jeroviaha heʼi jave ojejapo hag̃ua peteĩ mbaʼe, ¿mbaʼépa ajapo jepi? ¿Aagradesépa chupekuéra ha ajapo upe aaprendéva?”. Ñaneñeʼẽrendúramo jahechauka jajepytasoha Rréi Jesucristo ykére. Haʼe ojevale hína pe tembiguái jeroviaháre omeʼẽ hag̃ua tembiʼu hiʼoraitépe (Hech. 16:4, 5).

12. ¿Mbaʼépa opensa rakaʼe umi Estudiánte de la Biblia kurusúre?

¹² Heta áñore umi Estudiánte de la Biblia opensa pe kurusu orrepresentaha kristianokuérape ha ndaivairiha ojeporu. Upéva ndeʼiséi oadoraha hikuái. Haʼekuéra oikuaa  ivaiha oñemombaʼeguasu taʼangakuéra (1 Cor. 10:14; 1 Juan 5:21). Áño 1883-pe Ñemañaha heʼíma vaʼekue “ojeadoráramo tahaʼe haʼéva raʼanga, upéva ombojeguaru Ñandejárape”. Péro umi Estudiánte de la Biblia nopensái oĩ vaiha ojeporu pe kurusu. Por ehémplo, oiporúmi hikuái peteĩ tarhéta orekóva hese peteĩ kurusu raʼanga. Pe kurusu oĩ peteĩ koróna mbytépe. Oimoʼã hikuái pe divúho heʼiseha haʼekuéra ojeroviáramo omano meve, oñemeʼẽtaha chupekuéra peteĩ prémio térã koróna. Áño 1891-pe Ñemañaha apére osẽ primera ves pe kurusu ha koróna raʼanga.

13. ¿Mbaʼéichapa oñemyesakã ndovaleiha ojeporu kurusu? (Ehecha avei pe rrekuádro “ Mbeguekatúpe oñemyesakã ivaiha ojeporu kurusu”.)

¹³ Umi Estudiánte de la Biblia omombaʼe pe kurusu ha koróna raʼanga. Péro 1930 mboyvemi Cristo segidorkuéra ontendeve ohóvo ndovaleiha ojeporu kurusu. Ermáno Grant Suiter (upéi oservi vaʼekue Kuérpo Governántepe) imanduʼa peteĩ asambléare ojejapo vaʼekue Detróitpe, (Michigan, Estados Unidos). Haʼe heʼi: “Pe asambléape ojeʼe pe kurusu ha koróna natekotevẽiha ojeporu, ha ndovaleiha voi katu”. Umi áño oúvape upe rire hetave mbaʼe hesakã chupekuéra. Ojehecha porãiterei umi oadoráva Jehovápe haʼe oipotahaichaite ndaikatuiha oiporu pe kurusu.

14. ¿Mbaʼépa ojapo Ñandejára puévlo ontendévo ndovaleiha ojeporu kurusu?

¹⁴ ¿Mbaʼépa ojapo Ñandejára puévlo ontendevévo ko mbaʼe? ¿Oñemohakateʼỹpa pe kurusu raʼangáre? Ermána Lela Roberts, are oservi vaʼekue Jehovápe heʼi: “Rontendévo mbaʼépa orrepresenta, ndahasyiete oréve rohejaite hag̃ua”. Ótra ermána hérava Ursula Serenco omombeʼu mbaʼéichapa oñeñandu heta ermáno. Haʼe heʼi: “Ore romombaʼe vaʼekue pe kurusu pórke oréve g̃uarã orrepresenta Cristo ñemano péro upéi rohechakuaa romombaʼe hague peteĩ taʼanga oúva rrelihión japúgui. Heʼiháicha Proverbios 4:18, ore rape hesakã hesakãve ohóvo ha roagradeseterei upévare”. Cristo segidorkuéra iñeʼẽrendúva ndojeheʼaséi ni mbaʼevéicharõ umi mbaʼe kyʼa oúvare rrelihión japúgui.

15, 16. ¿Mbaʼéichapa jahechauka jaserviseha Jehová témplo korapýpe haʼe oipotahaichaite?

¹⁵ Ñande ñapensa upéicha avei. Jaikuaa Cristo oipytyvõha ipuévlope pe tembiguái jeroviaha rupive ani hag̃ua ojeheʼa rrelihión japúre. Upévare umi informasión omeʼẽva ñandéve heʼíramo umi arete, kostúmbre térã oimeraẽ mbaʼe ouha rrelihión japúgui, pyaʼe voi ñamboyke umíva. Umi ermáno oiko vaʼekue oñepyrũrõ guare Cristo presénsia oñehaʼã vaʼekue siémpre ipotĩ hag̃ua Jehová témplo korapy. Ha ñande jajapose avei haʼekuéraicha.

¹⁶ Ndajahecháiramo jepe Jesúspe, haʼe osegi ojapo heta mbaʼe oñangareko hag̃ua kongregasionkuérare. Haʼe ndoipotái umi enseñánsa japu omongyʼa umi kongregasión. ¿Mbaʼéichapa Jesús oñangareko hína isegidorkuérare? Jahechami.

17, 18. Pe ehémplo oñeʼẽvape rred tuichaitereívare, ¿mbaʼépa orrepresenta a) pe rred?, b) oñenohẽha opaichagua pira?, c) oñemoĩha kanástope?, ha d) oñemomboha umi ndovaléiva?

¹⁷ Rréi Jesucristo oñatende entéro kongregasión oĩvare ko yvy ape ári. Ñande ndajapilláiramo jepe, Cristo ha umi ánhel oipeʼa hína ojuehegui mokõi grúpo. Jesús oñeʼẽ kuri ko tembiapóre omombeʼúrõ guare pe ehémplo oñeʼẽva pe rred tuichaitereívare (elee Mateo 13:47-50). ¿Mbaʼépa heʼise ko ehémplo?

¹⁸ ‘Peteĩ rred tuichaitereíva ojepoíva márpe.’ Pe rred orrepresenta pe predikasión ojejapóva oparupiete ha pe mar katu orrepresenta yvyporakuérape. Heʼívo ‘onohẽha opaichagua pira’, heʼise opaichagua hénte ohenduha umi notísia porã. Oĩ umi ojapóva opa mbaʼe oñekotevẽva oiko hag̃ua chugui kristiáno, ha oĩ avei umi ñepyrũrã oikuaasevéva péro upéi ndojapói mbaʼeve oñemoĩ hag̃ua pe rrelihión añetegua ykére. e “Oñemoĩ kanástope umi pira iporãva”, heʼise umi hénte ipyʼaporãvape oñembyatyha kongregasionkuérape. Upépe ikatu omombaʼeguasu hikuái hekopete Jehovápe. “Oñemombo umi ndovaléiva.” Koʼã ára pahápe Jesús ha umi ánhel oipeʼa hína “umi iñañáva hekojojáva apytégui”. f Upéicha rupi ndojehejái omongyʼa kongregasión umi ndaipyʼaporãiva ha ndohejaséiva ikostúmbre vai ni umi enseñánsa japu. g

19. ¿Mbaʼéichapa reñeñandu reikuaávo Cristo oñangarekoha kongregasión rehe?

¹⁹ Ajépa ñandepyʼaguapyete jaikuaágui ñande Ruvicha Jesucristo oñangarekoha umi oĩvare ipoguýpe. Ñanembareteve jaikuaa haguére koʼag̃aite peve Jesús hakateʼỹha Jehová adorasión rehe ha isiervokuérare, ha ndoipotaiha mbaʼeve omongyʼa chupekuéra. Upeichaite vaʼekue avei oĩrõ guare ko yvy ape ári, upévare omopotĩ pe témplo. Jaagradesete Cristo ombaʼapo meme haguére ani hag̃ua mbaʼeve omongyʼa Ñandejára puévlope. Jahechauka hag̃ua ñañemoĩha pe Rréi ha Irréino ládo ñamboykete vaʼerã opa mbaʼe oúva rrelihión japúgui.