EKONDWA 10
Ombara mai kohorora ovakarere vayo mombepo
1-3. Jesus wa tjita vi indu tja vaza ovandu amave zunḓa Ondjuwo ondjapuke yaMuhona?
JESUS wa ri nondengero tjinene kondjuwo ondjapuke yaMuhona ndja ri moJerusalem, orondu aa tjiwa kutja aai kuramene po tjike. Ondjuwo ondjapuke yaMuhona ondja ri oruveze rwomerikotameneno watjiri kombanda yehi. Posi yokutja omerikotameneno omayapuke waJehova Mukuru nga, ye sokurira omakohoke nu nge hi notjipo. Ripura uriri kutja Jesus wa ṱunwa vi indu tja hita mondjuwo ondjapuke tji ya ri 10 ku Nisan mombura ndji 33, ne i vaza amai ungurisiwa momuano omuvi. Aape kayenda tjike?—Lesa Mateus 21:12, 13.
2 Morumbo rwovanavisenginina, ovarandise vominenetima na imba mbaave pimbasana ovimariva aave tjiti ovineya kovakambure mbaave ya kondjuwo ondjapuke okuyepunguhira Jehova. a Nu Jesus wa “ramba imba avehe mbuyave randasanene mu yo. Eye wa tjengura oviriro vyaimba mbuyave pimbasana ovimariva.” (Sasaneka Nehemia 13:7-9) Neye wa vera ovarumendu mba isa po ondjuwo yaIhe “ondimba yovapunde!” Kunao Jesus wa raisa ondengero kondjuwo ondjapuke yaMuhona na ku imbi mbyaai kuramene po. Omerikotameneno waIhe aaye sokurira omakohoke!
3 Ozombura ozengi kombunda yanao, Jesus tja za nokuzikwa otjOmbara yOuhona waMukuru eye wa kohorora ondjuwo ondjapuke yaMuhona rukwao momuano mbwa ṱuna ku avehe ndino mbe vanga okurikotamena ku Jehova. Nu hapo ondjuwo iṋe ondjapuke yaMuhona ndja kohorora?
Omakohororero ‘wovapristeri’
4, 5. (a) Ovakongorere vaJesus ovatwirisiwa va ṱunwa nokukohororwa vi okuza kombura ndji 1914 nga komautiro wombura ndji 1919? (b) Inga onga ri omaṱunino nomakohororero omasenina kovakarere vaMukuru poo indee? Kahurura.
4 Otja tji twa muna mEkondwa 2 rembo ndi, Jesus tja za nokuzikwa otjOmbara mombura ndji 1914, eye we ya puna Ihe okuyekukonḓonona ondjuwo ondjapuke kombanda yehi poo omerikotameneno wouatjiri. b Kombunda yomakonḓononeno ngo, Ombara ya muna kutja Ovakriste ovatwirisiwa poo “ovapristeri,” aave hepa okuṱunwa nokukohororwa. (Mal. 3:1-3) Okuza kombura ndji 1914 nga komautiro wombura ndji 1919, Omuhambure, Jehova, wa yandjera ovakarere ve okumuna omarorero nomauzeu pekepeke otjomuano wokuvehambura nokuvekohorora. Ouṋingandu ovatwirisiwa mba va tuurunga omarorero ngo nondoṋeno, ave rire ovandu ovakohoke nave raisa kutja ve nonḓero tjinene yokuyandja oruvara kOuhona waMukuru mbu honaparerwa i Messias!
5 Hapo inga onga ri omaṱunino nomakohororero omasenina wovakarere vaMukuru? Kako katjiperi. Momayuva omasenina, okupitira mOuhona we mbu honaparerwa i Messias, Jehova wa kayenda komurungu okuvatera ovakarere ve kutja ve rire ovakohoke nu ve yenene okukara nga aruhe momerikotameneno wouatjiri. Momakondwa yevari ngu maye kongorere ko, matu kamuna kutja we ve kohorora vi mongaro yomeritjindiro nokutja wa kohorora vi otjira atjihe. Nungwari rutenga ngatu tare komakohororero woupanga wetu kuna Jehova. Otjiṋa otjiyanḓiparise tjongamburiro okumuna oviṋa Jesus mbya tjita, momuano mbwaau munika poruhaera na momuano mbwaau ha yenene okumunika, okuvatera ovemukongorere okukara noupanga oukohoke kuna Jehova.
“Riyapureye oveni”
6. Omaronga waJehova kOvajuda mba huurirwe maye tu vatere vi okuzuva kutja okukara noupanga oukohoke kuna Jehova ku heya tjike?
6 Omakohororero woupanga wetu kuna Jehova ye kamburira mo tjike? Okuzira epuriro ndo, ngatu konḓonone omambo waJehova nga hungira kOvajuda ovahuurwa indu tji va ri pokupita moBabilon meserewondo oritja-6 komurungu waKristus. (Lesa Jesaja 52:11.) Ovahuurwa mbo aave yaruka koJerusalem okukatungurura Ondjuwo ondjapuke yaMuhona nokukotora omerikotameneno youatjiri. (Esra 1:2-4) Jehova aa vanga kutja ovakarere ve ve ise oviṋa avihe mbi notjiṋa nozongamburiro zaBabilon kongotwe. Zemburuka kutja Eye we vepa omaronga nga: “Amu ṱunu koviṋa mbya zerikwa,” “twendeye, mu ze mo moBabilon,” nu “riyapureye oveni.” Omerikotameneno waJehova omayapuke kaye sokuzunḓwa i omerikotameneno woposyo. Nambano matu yenene okutja vi? Oukohoke moupanga wetu kuna Jehova u kamburira mo okupoka komahongero novitjitwa vyozongamburiro zoposyo.
7. Jesus wa ungurisa omurari uṋe kutja ma vatere ovemukongorere okurira ovakohoke moupanga wawo kuna Jehova?
7 Tjimanga Jesus tja za nokuzikwa otjOmbara, eye wa zikamisa omurari mbwaau tjiukwa nawa nu mbwaa ungurisa okuvatera ovakongorere ve okukara noupanga ouwa kuna Jehova. Omurari mbwo, mau kuramene po omukarere omuṱakame nomunazondunge, Kristus ngwa zika mombura ndji 1919. (Mat. 24:45) Mombura ndjo, Ovakonḓonone vOmbeibela tjandje ve rikohorora oveni rukuru komahongero wozongamburiro zoposyo. Posi yokutja ngunda aave hepa omakohororero warwe. Okupitira momukarere omuṱakame ngwi, Kristus wa yenda ama tjivisa ovemukongorere ohunga nomazemburukiro pekepeke novitjitwa mbyaave sokupoka ko. (Omiano 4:18) Ngatu tare kovihorera tjiva.
Ovakriste ve sokuzemburuka Okresmesa poo indee?
8. Otjikeṋa Ovakonḓonone vOmbeibela tjaave tjiwa rukuru ohunga nOkresmesa, posi yokutja otjikeṋa tji tji ha ri otjikahu?
8 Ovakonḓonone vOmbeibela aave tjiwa rukuru kutja Okresmesa i nombutiro yovanavisenginina nokutja Jesus keya kwatwa 25 ku Tjitarazu. Okambo nga Zion’s Watch Tower kaTjitarazu 1881 ka tja: “Ovandu omangete omengi va etwa mokereka okuza kovanavisenginina. Posi yokutja, potuingi aave rundurura ena uriri. Ovapristeri ovanavisenginina va rira ovapristeri ovakriste nu omayuva omayapuke wovanavisenginina aaye pewa omana woukriste tjimuna Okresmesa nao.” Mombura ndji 1883, morupa rwOtjiingirisa ndwa ri nepu ndi, “Hapo Jesus wa kwatwa ruṋe?,” okambo nga o-Watch Tower ka raisa kutja Jesus wa kwatwa momautiro wa Seninaṋi nao. c Posi yokutja, Ovakonḓonone vOmbeibela oruveze ndwo kaave munu ounahepero wokuisa okuzemburuka Okresmesa. Owo va kayenda komurungu okuzemburuka eyuva ndi, nandarire eṱunḓu roBetel yaBrooklyn aari zemburuka eyuva ndi. Nungwari mombura ndji 1926, oviṋa vya runduruka. Ongwaye tji matu tja nao?
9. Ovikeṋa Ovakonḓonone vOmbeibela mbi va uta okuzuva nawa ohunga nOkresmesa?
9 Mena romakonḓononeno omakoto ngu va tjita ohunga nepu ndi, Ovakonḓonone vOmbeibela va uta okumuna kutja Okresmesa noviṋa avihe mbi tjama neyuva ndi kavi yozike Mukuru. Orupa rwOtjiingirisa ndwi, “Ombutiro yOkresmesa,” ndwa ri mokambo nga The Golden Age komayuva 14 ku Tjitarazu 1927, ka raisa kutja Okresmesa omazemburukiro wovanavisenginina, nge yandja ombango tjinene kehore nu nge notjiṋa nomerikotameneno wovisenginina. Orupa ndwi rwa raisa oukahu kutja Kristus kena pe tu rakiza kutja tu zemburuke eyuva ndi nu komurungu rwa tja nai ohunga nOkresmesa: “Mena rokutja ovandu mouye nOmudiaboli ve yakura eyuva ndi nokutja omba uta omazemburukiro weyuva ndi . . . ootjiṋa tji matji sokuhinga imba mbe riyandja okuura ku Jehova kutja ave ha kara norupa momazemburukiro wa ro.” Nu okuza ku Tjitarazu wombura ndjo eṱunḓu roBetel ka ri na pura zemburuka Okresmesa rukwao nga ku ndinondi!
10. (a) Mu Tjitarazu wombura ndji 1928, omazuviro yeṋe omakahu nga pitisiwa ohunga nOkresmesa? (Wina tara kokaongo nga “ Ombutiro nondando yOkresmesa.”) (b) Ovakarere vaMukuru va tjivisiwa vi ohunga nomazemburukiro womayuva warwe ngaaye sokunakaurwa? (Wina tara kokaongo nga “ Okutjiukisa omikandi vyomayuva warwe womasuviro.”)
10 Mombura ndja kongorera ko, Ovakonḓonone vOmbeibela va muna omazuviro warwe omakahu ohunga nOkresmesa. Tji ya ri 12 ku Tjitarazu 1928, Mbuti Richard H. Barber, ngwaa ungura pomberoo ohongora, wa yandja ehungi moradio ndaa ri hungire ohunga nombutiro ombi yomayuva womasuviro ngo. Ovakarere vaMukuru va raisa ongaro iṋe kerakiza nda za komberoo ohongora? Mbuti Charles Brandlein tjaa zemburuka indu eye neṱunḓu re tji va isa okuzemburuka Okresmesa, wa tja: “Hapo tja ri otjiṋa otjizeu ku eṱe okuimbirahi oviṋa vyovanavisenginina mbyo? Kako! . . . Ya ri tjimuna omundu tje hukura ombanda yondova na imbirahi.” Mbuti Henry A. Cantwell kombunda ngwa karira omutarere ngu varura ozombongo wa raisa ombepo otjingeyo indu tja tja: “Twa ri nonyuṋe kutja twa yenena okuisa okuungurisa oviṋa mbi kutja tu raise orusuvero rwetu ku Jehova.” Ovakongorere vaKristus va ri nonḓero yokutjita omarundurukiro ngaaye heperwa po nokutja ave ha kara norupa momazemburukiro nga zire momerikotameneno omahakohoke. d—Joh. 15:19; 17:14.
11. Eṱe matu raisa vi kutja tu yandja oruvara kOuhona waMukuru mbu honaparerwa i Messias?
11 Ovakonḓonone vOmbeibela ovaṱakame mbo tjiri ve tu raisira otjihorera otjiwa! Tji matu ripurire kotjihorera tjawo, ma rire nawa okuripura oveni kutja: ‘Omuhunga mbu tu pewa i omukarere omuṱakame ami mbi u vara vi? Mbi u yakura nondjoroka ne ṱakamisa oviṋa mbi me rihongo poo indee?’ Onḓero yetu yokukara nonḓuviro i raisa kutja tu vanga okuyandja oruvara kOmbara yOuhona waMukuru, Messias, ndji ungurisa omukarere omuṱakame okuyandja ovikurya vyombepo moruveze ndu ri ro.—Oviung. 16:4, 5.
Ovakriste ve sokuungurisa otjikroise poo indee?
Otjisasanekero tjotjikroise notjikrone (Tara koparagrafa 12 no 13)
12. Oure wozombura ozengi, Ovakonḓonone vOmbeibela va ri noumune uṋe ohunga notjikroise?
12 Oure wozombura ozengi Ovakonḓonone vOmbeibela aave vara otjikroise otjotjisasanekero otjiyakurwa tjOvakriste. Owo kaave munu kutja otjikroise matji sokurikotamenwa, orondu aave tjiwa kutja okurikotamena kovisenginina ouposyo. (1 Kor. 10:14; 1 Joh. 5:21) Komautiro wombura ndji 1883, okambo nga o-Watch Tower ka raisa oukahu kutja “Mukuru ka yakura omerikotameneno aehe wovisenginina.” Posi yokutja, kotjirutenga Ovakonḓonone vOmbeibela kaave munu kutja ouposyo okuungurisa otjikroise momuano mbwaave munu kutja omusemba. Okutara kotjihorera, owo aave zara ospela ndja ri notjikroise notjikrone otjotjiraisiro tjondjiukiro. Ku wo ya ri otjiraisiro tjokutja tji va ṱakama nga konḓiro yawo, mave munu otjikrone tjomuinyo. Okuutira mombura ndji 1891, otjisasanekero tjotjikroise notjikrone aatji munika kombanda yokambo nga o-Watch Tower.
13. Ovakongorere vaKristus va muna ondjerera iṋe ohunga notjikroise? (Wina tara kokaongo nga “ Okuhara ondjiviro ombwa ohunga nomaungurisiro wotjikroise.”)
13 Ovakonḓonone vOmbeibela aave vara otjisasanekero tjotjikroise notjikrone otjoviṋa ovihuze. Nungwari, okuza komaandero wozombura nḓa 1920 ovakongorere vaKristus va yenda amave hongwa ohunga nomaungurisiro wotjikroise. Mbuti Grant Suiter kombunda ngwa kakarera otjokaṋepo kOrutu Orunane, tjee ripura ohunga nomaworonganeno omanene wombura ndji 1928 nga tjitwa moDetroit, Michigan, tjaAmerika, u zemburuka kutja: “Pomaworonganeno nga pa raisiwa kutja kari ohepero okuungurisa otjisasanekero tjotjikroise notjikrone nokutja kaviṋa oviyakurwa.” Mozombura ozonḓiṱi nḓa kongorera ko, kweya ondjiviro yarwe. Ya rira oukahu kutja otjikroise katjiṋa tjaatji sokuungurisiwa momerikotameneno omakohoke.
14. Ovakarere vaMukuru va raisa ongaro iṋe indu tji va muna ondjerera ohunga nOkresmesa kouṱiṱiṱiṱi?
14 Ovakarere vaMukuru va raisa ongaro iṋe komazuviro omape ohunga notjikroise? Owo va panḓera pokuungurisa ovisasanekero vyotjikroise notjikrone mbi va suverere mbi poo indee? Lela Roberts ngwa karera Jehova ozombura ozengi wa tja: “Eṱe tji twa tjiwa kutja aavi kuramene po tjike twe vi imbirahi tjimanga.” Omukazendu omukambure warwe wena Ursula Serenco wa tja: “Eṱe twa uta okumuna kutja oviṋa mbyaa tu yandja ko ondengero tjinene otjovisasanekero vyonḓiro yaMuhona wetu nomeriyandjerero wetu wOvakriste, nangwari vya ri oviungurisiwa vyovanavisenginina. Otja ketjangwa rOmiano 4:18, eṱe twa ri nonyuṋe kutja ondjira yetu aai yerisiwa nga ondjerera aihe tji ya hanyanya.” Ovakongorere vaKristus ovaṱakame kaave vanga okukara norupa movitjitwa ovihakohoke vyozongamburiro zoposyo!
15, 16. Eṱe matu raisa vi kutja twe rimanena okuṱiza orumbo rwOndjuwo ondjapuke yaMuhona kombanda yehi oukohoke?
15 Eṱe ndino wina tu nongurameno otjingeyo. Tu tjiwa kutja Kristus u ungurisa omurari mbu tjiukwa nawa, owo mbu ri omukarere we omuṱakame nomunazondunge okuvatera ovakongorere ve okukara noupanga ouwa kuna Jehova. Okutja, indu tji twa pewa omaronga okupitira movikurya vyombepo mbi tu pewa ohunga nomazemburukiro, ovitjitwa poo otuzo tu tu notjiṋa nozongamburiro zoposyo, matu sokuraisa onḓuviro tjimanga. Eṱe wina matu vanga okuṱiza orumbo rwondjuwo ondjapuke yaJehova kombanda yehi oukohoke tjimuna ovakambure ovakwetu mba hupire moruveze indu Kristus tja uta okuhonapara.
16 Momayuva omasenina, Kristus wina aa ungura oviṋa mbyaa tu ha yenene okumuna, kutja ma tjevere ozombongo zovakarere vaJehova ku imba mbaave eta ombepo ombi mu zo. Omomuano uṋe ma tjita nao? Indjeye tu konḓonone.
Omatukiro ‘wovavi movawa’
17, 18. Momasasanekero ohunga nombate, oviṋa mbi mavi kongorere mba vi nomaheero waye (a) okuyumba ombate momuronga, (b) ‘okukambura ozohi omihoko pekepeke,’ (c) okuwongera ozohi inḓa ozombwa movitjuma, nokuimbirahi ozohi inḓa ozombi?
17 Ombara Jesus Kristus i yandja ombango tjinene kozombongo zovakarere vaMukuru kombanda yehi arihe. Jesus novaengeli va ungura oviungura vyomahaṋeno wovandu momiano mbi tu ha yenene okumuna. Jesus wa hungira ohunga noviungura mbi motjisasanekero tje ohunga nombate yozohi. (Lesa Mateus 13:47-50.) Otjisasanekero hi tji nomaheero watjike?
Ombate yozohi i kuramena po otjiungura tjOuhona tjokuzuvarisa tji tji kayendisiwa moviwaṋa vyovandu (Tara koparagrafa 18)
18 Okuyumba ‘ombate momuronga.’ Ombate i kuramena po otjiungura tjOuhona tjokuzuvarisa tji tji kayendisiwa moviwaṋa vyovandu. ‘Okukambura ozohi omihoko pekepeke.’ Ombuze ombwa i nana ovandu pekepeke tjimuna imba mbe toora omikambo vyokurira Ovakriste vatjiri novengi varwe mbu mape ya ave raisa ombango pomautiro nungwari ave ha toora ongurameno yatjiri komerikotameneno omakohoke. e Okuwongera ozohi ‘inḓa ozombwa movitjuma.’ Ovandu vomitima omiwa ve wongerwa mozombongo nḓe sasanekwa novitjuma, mu ve yenena okurikotamena ku Jehova momuano omukohoke. Okuimbirahi ozohi “inḓa ozombi.” Momayuva omasenina Kristus novaengeli ve haṋa ovandu “ovavi movawa.” f Kunao imba mbe hi nomitima omiwa poo ngahino mbe hi nonḓero yokupoka kozongamburiro novitjitwa voposyo, kaave yandjerwa okuzunḓa ozombongo. g
19. Ove u noumune uṋe ohunga noviṋa Kristus mbya tjita okutjevera kutja ovakarere vaMukuru ve kare noupanga ouwa kuna Mukuru nokutjita kutja omerikotameneno wouatjiri ye rire omakohoke?
19 Katjiṋa otjiyanḓiparise nao okutjiwa kutja Ombara yetu Jesus Kristus i tjevera imba mbe ri kehi yayo? Nu katjiṋa otjihuhumiṋe nao okutjiwa kutja orusuvero ndwe na ro ndino komerikotameneno watjiri na kovakarere vaJehova, ru ri tjimuna tji rwa ri indu tja kohorora ondjuwo ondjapuke yaMuhona meserewondo etenga? Tjiri tu nondangi tjinene kutja Kristus u ungura nomasa okutjita kutja ovakarere vaMukuru ve kare noupanga ouwa kuna Jehova! Matu yenene okuyandja oruvara kOmbara na kOuhona wayo mokunakaura oviṋa avihe mbi mavi tjama nozongamburiro zoposyo.
a Ovajuda ovaryange aave hepa okuungurisa ovimariva vyarwe kutja ve sute otjitjamurongo pondjuwo ondjapuke yaMuhona nu ovarandise aave sutisa ovandu kutja ve pimbise ovimariva mbi mu imbi mbyaavi heperwa po. Ovaryange wina aave hepa okuranda ovinamuinyo mbi mave sokupunguha. Jesus wa tja ovarandise mbo ‘ovapunde,’ ngahino mena rokutja aave sutisa ovandu ovimariva ovingi.
b Ovakarere vaJehova kombanda yehi ve rikotamena ku ye motumbo twondjuwo ye ondjapuke.
c Orupa ndwi rwa raisa kutja omayuva wokupepera ngu ku za Jesus oma kwatwa, “kaye hitasana nawa nehungi rovarise mbaave tjevere ozonḓu zawo.”—Luk. 2:8.
d Orutuu rwomayuva 14 ku Tjikukutu 1927, ndwa tjangwa i Mbuti Frederick W. Franz rwa tja: “Katu nokukara nomazemburukiro wOkresmesa ombura ndji. Eṱunḓu roBetel ra tya kutja kari nokuzemburuka Okresmesa rukwao.” Omieze omiṱiṱi kombunda yanao, Mbuti Franz wa tjanga morutuu rwomayuva 6 ku Tengarindi 1928, na tja: “Muhona u tu kohorora kouṱiṱiṱiṱi komauvi wozongamburiro zaBabilon zOmudiaboli.”
e Okutara kotjihorera, mombura ndji 2013 pa ri novazuvarise 7 965 954 nu ovandu 19 241 252 va ri pOmazemburukiro wonḓiro yaKristus.
f Omatukiro wozohi ozombwa ku inḓa ozombi kaye ri tjimuna omahaṋeno wozonḓu kozongombo. (Mat. 25:31-46) Omahaṋeno poo ombanguriro osenina yozonḓu nozongombo mai tjitwa moruveze rwondatumisire ondirise. Ngunda oruveze ndo aru hiye ya, imba mbe ri tjimuna ozohi ozombi mape ya ave kotoka ku Jehova nave wongerwa mozombongo nḓe sasanekwa novitjuma.—Mal. 3:7.
g Komaandero mape sana aayo ozohi inḓa ozombi maze yumbwa momuriro, pu mape hee kutja maze kayandekwa moruyaveze.
